2012/08/30

اصدقاء دكتور الاسنان



انا محمود .. دكتور اسنان ..بيقولوا انه دكتور شاطر وكل ما الوقت بيعدى بيأكدوا دا الحمد لله .. انا عارف ان كلمه شاطر او ناجح مش هتفرق معاك ..يعنى اكيد مش هتخلى عندك الرغبه انك تزورنى فى العياده ..انا عارف اصلا ان بقى فى بينى وبينك عداء من ساعه ما عرفت انى دكتور اسنان .

بس انا هقولك على معلومه .. شقائى بيك بجد اكبر من شقائك بيا .. انا اللى مطلوب منه انه يعمل شغله على احسن وجه , انه يشيل التسوس واثاره كلها ويعالجك صح .. تحت تأثير زنك الرهيب اللى يجيب لوحده مليون صداع ..وكأن تعب الشغل لوحده مش كفايه ولازم تكمل عليه بزنك وبسؤالك العبقرى"دكتور خصلت؟؟!! " " طب فاضل كتير؟" وكأنى يعنى ممكن اخلص وافضل سايبك فاتح بقك من حلاوته مثلا
لكن انت كل المطلوب منك انك تستحمل خمس دقايق من غير صوت وانا هخلص . طب انا راضى ذمتك مين فينا مهمته اسهل.

بس عارف ايه هى الحاجات اللى بتخلينى متحمل تعب الشغل دا .. حاجه زى انه يزورنى اصدقاء جداد زى " علا , ومصطفى , وزهره , واحمد"

علا 9 سنين

اول مره شفتها قلت لها بصوت واطى اوى : " علا انتى شبه البنت اللى كنت بحبها زمان" 
هى فعلا شبه البنت اللى كنت بحبها وانا فى ابتدائى .. كانت سنانها اللى ادام شكلها كده برضه وشكل ضحكتهم زى بعض بالظبط .. وحتى تسريحه الشعر

لدرجه انى تخيلت انها هى بس وقف بيها العمر ... لك ان تتخيل طريقتى فى التعامل مع حبيبتى اللى العمر وقف بيها وخلانى اكبر وسابها بنفس شقاوتها وبرائتها

يمكن دا المبرر الوحيد اللى بيخلينى استحمل " والنبى والنبى والنبى تعمل بسرعه ماشى "

"ماشى يا علا بس افتحى بقك بقى "
" طب والنبى والنبى بلاش البتاعه اللى بتزن دى .. خليك فى البتاعه التانيه"
"لأ يا علا ماينفعش"

" طب هتوجعنى؟!"

"لأ"

"انت قلت لأ ماشى انا هفتح اهو "

الحوار دا حوار بيتكرر كل مره وبنفس الطريقه لدرجه ان الممرضه حفظته. بس انا عمرى ما زهقت منه .. حد يزهق من دلع حبيبته :) 

اخر مره شفتها اتقدمت لها رسمى بس لسه مردتش عليا :D



مصطفى 8 سنين
مصطفى بقينا اصحاب من اول مره .. "مصطفى افتح فاتحه الاسد ومش هتحس بحاجه" ..."لو حسيت باى وجع حرك ايديك انا شايفها كويس ومتحركش راسك" ... مصطفى مش بيرد عليا دايما هو بينفذ تعليماتى بس وبيحرك راسه

من يومين جالى العياده لواحده من غير اى حد كبير معاه على غير العاده .... " دكتور ممكن اطلب من حضرتك طلب"

"اتفضل يا مصطفى " .. لقيته بيبص للممرضه مكسوف يتكلم ادامها " سهام اخرجى واقفلى الباب عشان التكييف .. عاوز ايه بقى يا مصطفى"

" بابا جاى يحشى سنانه عند حضرتك دلوقتى .. ممكن حضرتك تقوله ان السجاير هى اللى مبوظه سنانه عشان هيسمع كلامك ويبطل "

من يومها وكل ما افتكر الموقف ابتسم اوى وادعى ربنا يبارك فيه ... وكل مره بعالج باباه فيها من اى حاجه بقوله السجاير لازم تقل او تختفى خالص ... بعمل دا بس عشان خاطر مصطفى  :)



زهره  8 سنين
زهره اتفقنا بعد ما خلصت لها علاج  اننا خلاص بقينا اصحاب .. فاتفاجئت تانى يوم انها جيبالى تانيه اول كلها عشان تعرفهم على صديقها الجديد .. شكلها وهى بتعرفهم عليا .. دا الدكتور انا وهو اصحاب مش احنا اصحاب برضه يا دكتور .. اه يا زهره اصحاب وانا هموت من الضحك .. وعرفتنى على اسماء صحباتها كلهم ومشيت

احمد 6 سنين
احمد بقى اللى عمرى ما هنساه .. عشان الجزمه عضنى وانا بعمل له سنانه .. وياريته سكت على كده .. لأ دا كمان كل ما يجى مع باباه عشان اعالج باباه من اى حاجه .. يقعد يحكى انه عضنى  بس يوقع تحت ايدى تانى بس وانا اخلص منه القديم والجديد :) .

بالطبع انا وكل اهالى الاطفال دول بقينا اصدقاء بشكل كبير ونشئ بنا ود ..اعتقد ان دى اكبر ميزه فى مهتنى انى بصاحب ناس كتير حلوين .. يمكن الحاجات الصغيره اللى زى دى اللى بتخيلنى افضل حاسس بنعمه ربنا عليا انه اختار لى المهنه دى. وقلت اشاركم فيها :) 

لو عجبك البوست .. شير فى الخير بقى

هناك 14 تعليقًا:

Unknown يقول...

ايه علاقة دة بإن انا اعيط؟؟؟؟؟؟؟ دة المفروض انه كلام حلو وبيفرح

هو انا هبلة يا دكتور؟؟

MindEktomia يقول...

هما دول المرضى :D

sony2000 يقول...

حلو اوييييي
من زمان مجتش هنا

Unknown يقول...

اكتشاف جديد قد يغير مهنة طب الأسنان,,
لسه في Cooperative children
ههههه هايل

Unknown يقول...

بغض النظر عن اي حاجة جاوب مباشرة:
سهام حلوة؟
حالتها الاجتماعية وعمرها وكل تفاصيلها بسرعة من فضلك :P

ايه ياعم الاسم دا... سهام! :D
عجبني البوست اوي يا بطوووووووط بجد حلو اوي فيه جو عجبني جدا

alassmaa يقول...

جميلة :)

انا حره يقول...

والله وبقيتى دكتوره يابطبووووووطه ...

عملت ايه فالجيش ياواااد

احم

قصدى يادكتور بطبوط

nebal يقول...

راااااااااااااااااائعه
حلو البوست عشت مع زهرة ومصطفى فتحة الأسد والولد العضاض وتخيلتهم ...
تسلم وربنا يعينك .. بس برضوو هم أصعب :P ، هم المتألمووون .. وربنا يعينك على اعاده البسمه لهم :)

Hanan Elshafey يقول...

عااااااااااااا
انا عيطت وضحكت يابطوط
حلو اووووووووووووووي ):(
انت حلو ^_^

غير معرف يقول...

مبروك العياده يادكتور

غير معرف يقول...

بس برضه ربنا ميكتب عليا اروح لدكتور اسنان ولو

مروه زهران يقول...


حلو أوى حكاياتك مع الأطفال
ممتعة ومضحكة
يارب يحب فيك خلقه

هناء محمود يقول...

تعليقى متأخر

بس الموضوع عجبنى فكرتنى بالحكايات اللى جوزى بيرجع يحكهالى بعد ما بيخلص عيادته .. هو بقى دكتور أطفال وبس يعنى حكاياته كلها عيالى جدااا

كفاية إنه أصلا بيبقى بيكشف على حالة وبقيت زباينه من الأطفال ممكن ياخدوا القرار لواحدهم ويتسربوا من ورا أهلهم ويفتحوا أوضة الكشف ويدخلوا يتفرجوا هههههههههه ... غير إللى بيشبطوا فى الكراسى الصغيرة وهما مرواحيين ولازم ياخدوا أى بديل علشان يسكتوا .. بحس ان عيادته كانت أشبه للحضانة من العيادة وخصوصا بالصور الكرتونية اللى ملزقها فى كل حته .. بس هو فعلا تخصص ممتع

سهيله يقول...

بخاف منكوا اوووي بصراحه