2008/10/05

وتأتى الافكار

سبحان الله بجد
لا فعلا سبحان الله .. لما ببقي فاضي ومش لاقى حاجه اعملها بحس بـ جفاف في الأفكار .... ولما أبقى مشغول وفعلا مفيش وقت لاى حاجه ... ألاقى الأفكار عماله بتتصارع في دماغي
طبعا أنا دلوقتى مش مشغول أوى كده بالدرجة إلى ممكن تبان من الكلام ... بس النت في البيت مقطوع .. وكمان كنا في رمضان ... وفى العشر الأواخر في اعتكاف ( رغم انه كان جزئي السنة دي بالنسبالى لظروف الكلية ) .. وكمان الشقة إلى في الدور التامن علوي أو التاسع من الأخر والى مجرد ذكر اسمها بتوجع كل عضلات رجلي
بس فعلا عندي رغبه كبيره في الكتابة .... وعندي استعداد انشر كل يوم بوست ... بس طبعا مش هينفع
مش عارف الرغبة دي وليده إيه؟؟ يمكن لأنكم وحشتونى أوى بجد .. وده بجد والله لانى مرتبط بناس كتيره هنا جدا .. والوقت إلى فات كنت بعيد عن متابعه مدونتهم بس يااارب يتلمسوا لي الأعذار
أو يمكن تكون الرغبة دي –  في الكتابة – وليده الوقت الطويل إلى الواحد بيقضيه في حاجات ملهاش لزمه ... وقت طويل في طلوع السلم مثلا
والى بيعملى حاله من هستيرية الضحك كل مره أطلعه فيها .. مش عارف ليه؟؟
بس هو ممكن يكون إحساس بالتخلف العقلي إلى خلاني اسكن في شقه في الدور التامن – آل من قله الشقق يعنى –
المهم بفضل طول الطريق
-إلى  بياخد في المتوسط من ساعة لساعة ونص :D-
 اضحك لدرجه انى بخاف السكان لو فتحوا الباب يفتكروني مجنون
إحساس في منتهى الروعة مزيج بين تعب الجسم .. وبين ادمانى لتحويل كل شئ غبى ورخم وسخيف إلى ماده من الضحك والسخرية
ويمكن عشان كده تروادنى مئات الأفكار في كل مره تصلح لعمل بوستات كتيره ربما انشرها في يوم من الأيام
أو ربما تكون تلك الرغبة – في الكتابة – وليده تلك اللحظة الرائعة التي ادخل فيها الشقة بعد عناء من يوم شاق في الكلية وفى السلالم
لأجد نفسي مرمى على أول سرير أشوفه -إلى هو في الصالة حضرتك حيث الصالة  اوضه نوم زى ما انتم عارفين- لأجد عضلات رجلي تعزف كل عضله منها على انفراد سنفونيه اااااااااااااااه
أما عضلات الضهر فتبدأ في عزف سنفونيه ياااااااااالهوى وهى سنفونيه – لمن لا يعرفها – أكثر آلما من الأولى
بعد ذلك يبدأ المشوار الأقل تعبا .... مقارنه بما سيأتي بعده
ألا وهو الطبيخ ... ولمن لا يعرفني ..فـ أنا لا أواجه اى مشكله في الطبخ ... المشكلة كلها تكمن في أنى بآكل إلى بطبخه .. والى بصراحة بيكون عقاب اليم يتعدى عقاب طلوع السلم والنزول منه
مشكله الميه إلى مش راضيه تطلع .. والراجل بتاع امن الكلية إلى نسى شكلي ... واحساسى انى أول سنه لي في الكلية – رغم انى في البكالوريوس بسبب نزولى السنه الى فاتت-... والمغامرات مع الزملاء الجدد ... ثم في النهاية شكلي الجديد – الله يسامح إلى كان السبب فيه – ولا الناموس إلى بيطلع الدور التامن أكيد مش كتير منكم يعرفه .... أو صاحبنا التالت إلى مقدرش يقعد اكتر من يومين وروح بتهم .... والتلاجه ام باب صغير زى العين السحريه
J
 كل دي حاجات إن شاء الله هكتب عنها
لكي اثبت لكم إن ... الحياة رائعة بكل معنى الكلمة ... وكل ما فيها مثير للضحك
وللموضوع بقيه بطريقه أكثر ترتيبا وبأسلوب أكثر بطوطيه بس مضطر اقفل الموضوع عشان الحق أروح أقرا بوستاتكم الاخيره ...
** بعض الناس لا يحب بعض البوستات الشخصية أرجو منكم أن تطلبوا منى التوقف إذا شعرتم بهذا
دعوتكم

هناك 40 تعليقًا:

Miss. Sosa يقول...

هههههههه

والله انا قولتلك من الاول التامن ده كتير اوي .. كتير اوي مش بعقل يعني

بس هنعمل ايه من رحم المعاناة يولد الرجال

ومن الدور التامن بيولد دكاترة الاسنان :))

ربنا يعينك يارب

ojg يقول...
أزال المؤلف هذا التعليق.
ojg يقول...

بجد بجد
انت صعبت عليا
مش مجامله يعني
أصل مفيش إلا سلالم وقلنا ماشي
ناموس ..ونبقى نعصر علي جسمنا ليمون أو نزرع ريحان
ضحك وانت طالع.. عادي واهو الضحك احسن م العياط
انما تطبخ وتاكل اللي بتطبخه
لالالالالالا
ده كتير يا ناس
ليه يابني تعمل في نفسك كده؟؟؟
ربنا يرحمك بقى
:))
وبالنسبة للبوستات الشخصية
دي حرية كاتب المدونة
بالنسبة ليا مفيش مشكلة
خاصة انك مش هتحكي يعني عن الماج اللبني اللي مرسوم عليه دبدوب بمبي وازاي شربت فيه نسكافيه باللبن وكان سكره زياده
ولا ايه؟؟؟
:))

Mona Shereif يقول...

مش عارفه ضحكت ليه وانت بتقول كل ما تطلع السلم تضحك
ههههههههههههههههههه
والله بجد مش عارفه ليه
يمكن علشان بتحصلى ساعات

جميل يا بطوط
ووحشتنا بجد
ومتحرمناش من افكارك
ربنا يوفقك

صبرني يارب يقول...

بتطلع كل يوم 9 ادوار
هههههههههههههههههههههههه
يلا مش مهم اهو رياضه برضه

اول مره بتهيئلي اجي مدونتك وان شاء الله مش اخر مره

وسعدت بك وعود حميد ويلا عايزين شغل

حنين.. يقول...

8 ادوار
وناموس
ومفيش ميه
وطبيخ ومش طبيخ
الله يكون فى عونك والله
لانى السنه اللى فاتت كنت ساكنه مع واحده صاحبتى فى الدور الخامس وكان فيه ناموس والميه كانت بتغلبنا
وكان كل يوم واحده تطبخ فينا
كنت ساعات ارجع الاقيتها بتتضحك وبتقولى
لسه معملتش اكل
ههههههههههههههههه
السنه دى خلاص هقضيها مواصلاات, اتشالله على عربيه كاروا
ربنااااااا معاك يارب واللله

mostafa rayan يقول...

مش عارف اقولك ايه يا محمود انا طبعا مقدر مأساة الدور التامن دي بس بجد حاول انك تلاقي شقة تانية غيرها قبل الدارسة ماتتدخل في الجد
بالنسبة لمواضيعك الشخصية فدي مدونتك وانت حر تنشر فيها اللي انت عايزه ومش من حق اي حد يعترض على كدة
على رأي الصباغ دي مدونة ملك مش قانون جديد لمدة سنتين انشر اللي انت عايزه ولا يهمك
- بخصوص الصورة اللي اتصورنها يوم اشرف توفيق الصورة دي عند مين دلوقتي لأني عايز نسخة منها

Empress appy يقول...

هههههههههههههه ايه يا بطوط بس البوست اللى يعمل ضيق تنفس من طلوعه ده
ربنا معاك يا بطوط بجد وبعدين ايه حد معترض دى مدونتك يعنى بيتك انت حر اعمل اللى انت عاوزة اعتبره يوم تنفيظ وتنظيف زى البيت عادى تغير وبعدين بيبقى حلو نشاركك لحظات كتير
كل سنه وانت طيب وبخير

ست البيت يقول...

كل عام وانت بخير يا ابو البطابيط
وكل عام والكلية كلها بخير وشد حيلك كده وانا اجيبلك العيلة كلها العيادة قول يا رب
اما موضوع انك تكتب في مدونتك حاجات شخصية فدي حرية
وانا شايفة انها حاجات دمها خفيف جد اومش قادر اقولك اني بضحك كل مرة اقرا فيه بوست العريس بتاع اختك

الفكرة ان مثلا لما تكون المدونة مثلا دينية وفجأة ألاقي صاحبها اللي كان مصر على توهها قلب على شتيمة في النظام وسياسة فارغة وركوب الموجة
هنا بس الناس بتتخض او ده رأيي الشخصي جدا
أما أن تكتب في مدونتك عن اللي تحبة دا شي براحتك مدونتك زي بيتك ما املك غير اني ادخلها بستأذان واقعد فيها بأدب واخرج منها بسلام واحترام
غير كده تبقى بالاسكندراني سويقة
وكل عام وكل الناس بخير وصحة وعافية

kochia يقول...

كله كوم والسلم كوم
بس واضح ان الافكار فعلا غزيرة

منتظرين توضيح كل ما سبق بقي
وكل سنة وانت طيب

تحياتي

محمد فاروق الشاذلى يقول...

تعرف إنى بنهج وانا بكتب التعليق
حسيت إنى كنت طالع وراك على السلم
ربنا يسامحك على التعب ده
لازم تكتب لنا اكتر عن الشقة دى

مها يقول...

ههههههههههههههههه
سيمفونية يا لهووووى وحكاية ان المشكلة مش ف الطبخ لكن ف انك بتاكل اللى بتطبخه .. بجد مت م الضحك!!! أنا عارفة إنك بتعانى وما يصحش حد يضحك ف ظروف مش مناسبة زى دى.. بس إذا كان رب البيت بالضحك طالعوون لتاسع دور.. فشيمة أهل المدونات الضحكو برضو!!!

هههههههههههه

أنا عيد ميلادى النهاردة وتدوينتك دى أحلى هدية بجد ..

ربنا معاك يا بطوط .. خللى بالك من نفسك وما تغبش علينا كتير

غير معرف يقول...

اهوه ده الكلام
اديلووووووووووووووو

الواحد دايما عنده احساس الكلام المتحوش
ومش عارف يطلعه ده
حاسة بيك والله

ربك المعين المفرج المسهل

عيد سعيد عليك يا حبوب

مها ميهوووو

mohamed يقول...

وايه ياعم اللى يسكنك فى الدور التامن م السابع كويس بس اهى رياضه
انا اول مرة ازور مدونتك بس مستنى اقرا بوستات الافكار اللى بتجيلك فى رحلة الالف سلمه

حمامة يقول...

يبدو اننا كلنا كده
الافكار مش بتجيلنا الا واحنا مشغولين ومش فاضيين نكتب او حتى نفكر

انا عن نفسى بتحصلى كتير واول ما اكون فاضيه الافكار تروح او ميكونش جايلى نفس اكتب اصلاً

بالنسبة للشقه ربنا يعينك
انت كده احبطتنى على فكرة
ده احنا الشقه اللى اخدناها ف الدور السادس من غير اسانسير
بجد انا مرعوبة لانى مبحبش السلالم

ربنا ييسر وربنا يعينك
سنه تفوت ولا حد يموت
المهم تركز بس ف الدراسة وربنا معاك يارب
:)

oRiGiNaL HeArT يقول...

ربنا معاك
ويقويك على تسلق السلم
هههههه
اكتب بقى عناوين البوستات اللى بتيجى فى دماغك فى ورقة علشان لما تيجى تكتبهم تفتكرهم
واحنا مستنيين مغامراتك فى البكالريوس

غير معرف يقول...

ههههههه

اقولك ايه بس يا بطوط .. انت بتطلع وتنزل كل يوم التامن .. الله يكون في عونك .. بس على مايخلص التيرم الاول تكون انت انقرضت او اختفيت .. اما من الضحك الهيستيري .. او من أااااااااااه ويالهوىىى

انا مرة جربت اطلع الدور السادس عشان الكهربا مقطوعه جيت عند الخامس وجالى ضيق تنفس:D

الله يكون في عووووونك يا اخى

وبعدين الناموس لسا فيه صحه بيطلع التامن .. دى ناموسه من فصيلة ايه بقى ان شاء الله؟؟ دراكولا؟؟

اما عن الطبيخ .. بالهنا والشف .. ومطرح ميسري يجرى ههههههه

مؤمنه يقول...

السلام عليكم ورحمة الله وبركاته
لا ان شاء الله هتبقى بوستات ممتعه ومفيده واول افاده ان عمر الواحد ما يفكر انه يسكن فى شفه فى الدور التامن
بس حلو اوى ان الواحد يقدر يتعامل مع الازمات بضحك ربنا يديمها نعمه
وربنا ييسر السنه ان شاء الله

كل عام وانت بخير
والسلام عليكم ورحمة الله وبركاته

wafaa يقول...

سلم.. ناموس ..طبيخ
ربنا يكون ف عونك

كراكيب يقول...

ههههههههههههههههههه
ايه دااااااااه
انت مشكلة جدا على فكرة

ضحكتني ضحكتني يعني

وبعدين لو الناس مش هيعجبها المواضيع الشخصية يبقى لما تدخل وتلاقيها ما تقراهاش عادي يعني بس انت نزل اللي عايز تنزله امال انت عامل البلوج دي ليه
قول اللي عايز تقوله يا بطوط

ومستنية جديدك اوي جدا خالص

miro el niro kwaniro

غير معرف يقول...

السلام عليكم حبيب قلبى بطوط
بجد البوست جميل جدااااااااااااا وبيضحك من القلب ههههههههههه
منتظرين كل جديد منك
وكل اللى اقدر اقولهولك ان بوستاتك وحشتنا
نورت من تانى ويلا سلام

Ahmed Mohamed يقول...

بص سعات لما تكون الدنيا ساقعه قوي بحط شويه ميه علي دماغي ميه ساقه بردو وبقول اييييييييه ده ايه الحير ده
وبعدها بضحك لدرجة اني بنسي البرد والسقعه ال يعني بستهبل وبشتغل نفسي ولا انا كده ال بضحك علي السقعه

بحس ساعتها الحياه اسهل من مش عارف ليه

غير معرف يقول...

سلام عليكم
مبدئيا كده مفيش حاجه اسمها وقت بقضيه فى حاجات ملهاش لازمه... استحضر دايما نيتك وانت طالع انك سكنت هنا فى طلب العلم يعنى فى سبيل الله هيبقى الوقت كله فى ميزان حسناتك وانت وشطارتك بقى فى تعدد النوايا

((فـ أنا لا أواجه اى مشكله في الطبخ ... المشكلة كلها تكمن في أنى بآكل إلى بطبخه))
الحمد لله ان مش حد تانى اللى بياكل... ربنا مش هيسامحك فى حق عبيده :))

((الحياة رائعة بكل معنى الكلمة ... وكل ما فيها مثير للضحك )

انا فعلا كنت شايفاها كده لغايه ماخلصت دراسه...فكرتى متغيرتش لكن الظروف بتغير معالم الصور وساعات بتحط عليها نضاره سودا...انا عارفه ان ده مؤقت بس يارب ينتهى بقى
بوست رائع... اضحك الله سنك

غير معرف يقول...

هههههههههههههههه


ربنا يعديلك السنة دى على خير

اضحك الله سنك

شيماء سمير

صاحب المضيفة يقول...

كل سنة وانت طيب يا حلو

كنت منتظ تيجي تعيد علي في المضيفة

لكن يالا ملحوقة


خلي بالك هانسالك في درجات السلم بعد كده ابقى عدها كويس وانت طالع

:):):):)

مواطن مصرى نايم يقول...

انا ساكن فالخامس
مش عارف ايه احساسى لو ساكن فالتاسع او التامن
بس و الله ربنا يكون فعونك
هههههههههههههههه
طيب خلى حد يدلدل لك السبت
و اطلع فيه
ههههههههههه

HeBa يقول...

يااااه

ده أنت بتعاني أوي

صحيح محدش بيأكلها بالساهل

ربنا يوفقك ويكرمك يا دكتور

خمسة فضفضة يقول...

السلام عليكم ورحمة الله وبركاته

كل سنةوانت طيب يا محمود

والله فكرتني بنفسي وانا في العمره كان الفندق بعيد فاكل ما كنت افكر في المشوار افضل قاعده في الحرم ومارداش اقوم اروح وعلي ماكنت اوصل كانت كل حته في جسمي بتغني السمفونيات بتاعتك دي بس بطريقه ابشع
ههههههههه

انصحك يابني تغير الشقه مش هاتلاقي نفسك علي اخر السنة


سلام

Asmaa mahaba يقول...

ههههههههه اقولك على حاجه انا فرحانه فيك :q
اللهم لا شماته يعنى
ربنا يعفينا
وابقى اعرف لوحدك انا فرحانه فيك ليه وحكلمك ايبى تقطع عليك البنزين عشان انت تستاهل

مهرة سالم يقول...

السلام عليكم...
الله ياعينك يا بطوط...
والضحك مفيد للصحه...
بس بجد الأفكار دائما تأتي عندما نتعرض لضغوات عديده..
ونتزنق قوي بالوقت....
.........
ان شاء الله نقرأ جديدك عن قريب..
...........
دمت بخير ..

Ghada , Rofayda يقول...

اتفق معاك في انه فعلا في الاوقات الفاضيه مخنا بيكون شبه فاضي هو كمان

وصدق اللي قال من كثرت مهامه كثرت انجازاته

تحيااااتي....
دمت مشغووولا..حتى لانحرم من بوستاتك

واحد من البلد دى يقول...

السلام عليكم

إنت فين يا ابنى

كل ما كنت ادخل القى المدونة مقفولة.
مش عارف ليه..؟؟

عموما ..
حمد الله على السلامة

بص بقى يا بطبط يا ابنى..
انت ما لقيتش غير الدور الثامن..

الحل الوحيد بقى يا حبيبى.

إنك تحول لكلية فى الزهرة أو عطارد
علشان تنزل من الكلية على الشقة عدل..
هههههههه

ربنا يقويك..

أنصحك من دلوقتى تصاحب دكتور عظام..
اهو ينفعك فى المستقبل..

على فكرة..؟؟
التعليق ده انا كتبته سنة 2008....
على اساس إنك حتقراه فى 2010..
عقبال ما تطلع السلم..

وبعدين لو السلم بالطوووووول ده..

يبقى ممكن البكالريوس فى الدور السادس مثلا..

بس و حياتك تبعد عن الدور التانى علشان بيفكرنى بالملحق..

ههههههههههههه

ربنا يقويك يا دكتور


ملحوظة..

كل سنة و انت طيب بمناسبة عيد ميلادك الأربعين..؟؟؟؟

وهذا بحساب عمرك الأن و سرعتك فى صعود السلم و أوقات الراحة بين الأدوار و الأغماء من الفرحة لتمكنك من الوصول للشقة وفى النهاية ..طبعا ..حتحب تشوف مدونتك اللى بقالك عشرييييييييين سنة ما شفتهاش...ياااااااه

عموما..
انا حبيت أعرفك إن فيه أصحاب مخلصين زيى كده..

بيكتبولك تعليقات و انت فى السن ده..
هههههههههه

وفى النهاية..أحب أقولك..
كل سنة وانت طيب بمناسبة عيد ميلادك الستين..
وهذا لأنك أكيد قعدت عشرين سنة تانية تقرا تعليقى..

ههههههههههههه
هههههههههههه
هههههههههه
هههههههه
هههههه
هههه
ههه
هه
ه


تحياتى

Maha Shahen يقول...

طالما اتورطت بقى ومش لاقى سكن تانى غير الشقه المعجزه دي نصيحه منى اطلعها جرى يا بطوط
اصل كل ما تتوقف علشان تستريح هيزيد الالم اكتر لكن لو اخدتها طاااااخ مره واحده هتشعر بالالم في النهايه داب لأنك وصلت خلاص بقى
وبالنسبه للأكل الله يكون في عونك الواحد ممكن يفشل في طبخه لكن ياكولها كمان عقاب صعب ليه هههههههههههههه
وبعدين اعمل بوست انت عايز تطبخ ايه وخد الاقتراحات بتاعتنا في طريقة الصنع واهو تكتسب خبره برضوا وترحم نفسك
الله يكون في عونك
وبعدين منزهقش ابدا من قصص بطوط ولو شخصيه

ربنا يوفقك

يا مراكبي يقول...

ربنا يديك الصحة ويقدرك على الدور التامن ده .. إبقى دور على دكتر ينفعك بعد إستهلاك العضلات الرهيب ده كله

أنا لو منك .. آخد حقي من السمسار ده وأعزمه كل يوم في البيت فوق عشان تطلع عينه في الطلوع لفوق

غير معرف يقول...

عارف؟

لما تكون الدنيا زنقت اوى .. and u have nothing to do with that

u won't be able to anything but laughing

(:

but im sure that after a couple of yrs comming, u gonna remember those moments ,when u thought that u had been the foolest one on the earth , as the happiest time in ur whole life ... with its joy and pain , success and failure ,it stills very special moments passed by u


p.s. i tried to comment in arabic ,but u know that im having a
problem with that

D:

ربنا يكرمك يا ابنى (winks)

Unknown يقول...

توقف ايه ياراجل انا اساسا كنت هموت واعرف مغامرات كابتن بطوط فى طلوع السلم لالالا مستنية انا اعرف كل الحاجات والمحتاجات..........هو تغيير شكلك دة معناه حلاقة الذقن مثلا؟؟؟؟
اممممممممممممم لما نشوف

klmat يقول...

اول مره ادخل مدونتك بوست جميل وصريح ودمه خفيف
اجمل مافى الدنيا ومن الحكمه ان تاخذ الامور اللى مش
تمام بضحك .بتلاقى كل حاجه بتتسهل والدنيااجمل
فى انتظار الباقى مع الدعوات بالنجاح والسعاده

أحلى حياة يقول...

هههههههههه

ما شاء الله بجد روحك حلوة اوي في ظل الظروف الصعبة اللي واضح انك بتواجهها تمانيه واربعين ساعه في الاربعه وعشرين ساعه D:D:

بجد ما شاء الله ويارب الناس كلها تبقى زيك كده واخده الحياه ببساطه وبدون تعقيد

ربنا يدم عليك نعمة الرضا والثقة يارب ويحفظهما من الزوال ويرزق المسلمين اجمعين الرضا يااارب

بجد لا يسعني سوى وقل ما شاء الله عليك بجد :)

أحلى حياة يقول...

قول*

اسماء يقول...

سلام عليكم
ما شاء الله عليك يا بطوط
انا اول مرة اشوف مدونتك بجد موضوعك جميل
انا اعدت اتضحك جداااااااااا
بس ع راي المثل اللي يشوف بلوة غيرة تهون عليه بلوته
انا شغلي ف الدور ال29 وطبعا الامر ما يسلمش من انقطاع الكهربا
تخيل بقا السيمفونيات والعزف المنفرد والسولو والاوركسترا
هههههههههههههههههههههههههه
بس برضوا بضحك
تسلم ايديك وانا خلاص سيفت البلوج بتاعك عشان ادخل واقري عليه كل جديد