2011/12/31

اتناشر الا دقايق .. مكسب وخساره


السنه اللى فاتت كانت عامله زى حظك اليوم " ستصادف نجاحا باهرا فى حياتك العمليه , وفشل ذريع فى حياتك العاطفيه , وربما ستخسر اعز الناس اليك "
اهو دا اللى حصل بالظبط والحمد لله .. عشان كده مقدرش اقول انها كانت سنه سعيده او حزينه .. هى كانت سنه محوريه اتبدلت فيها كل المعطيات اللى كنت داخل بيها فى 2011 لمعطيات جديده تماما فى 2012
السنه بدأت انى شفت فى نفسى حاجه جديده انا معرفهاش فى نفسى .. انا عارف انى خواف ويمكن كتير ببقى جبان ... اظن اى واحد والده يتوفى وهو صغير بيبقى فيه العيب دا .. انا اول مره اشوفنى شجاع كان يوم 28 يناير .. انا خفت اول كام دقيقه بعد صلاه الجمعه وانا خارج من مسجد الاستقامه فى الجيزه ... بس لما الضرب اشتد ولقيت مليون واحد جنبى .. الشجاعه مُعديه .. حسيت ساعتها انى ممكن ابقى شجاع وكانت دى بدايه كويسه ...الرائع فيها انها غيرت نظرتى لنفسى.. واظن ان مدين لليوم دا وبالايام اللى نزلت فيها بعده بشئ جوايا اتعلمته... وزى الكل كنت متفائل بالسنه الجديده... وزى الكل لسه بطمن نفسى وبقول ان شاء الله ربنا هيتمها على خير

السنه دى كمان فرقت معايا فى الكارير بتاعى .. اتعلمت فيها كتير وربنا مَنّْ عليا فيها .. اظن ان انا بقيت أشطر وثقتى فى نفسى زادت كتير .. والحمد لله قدرت وانا فى بدايه حياتى كده انى افتح عيادتى والحمد لله بقت شغاله كويس ..ودخلها بقى مستقر بشكل كبير الحمد لله.

وخسرت فيها عمى الله يرحمه .. تانى مره اعيش شعور اليُتم ... ولاول مره احس انى فى الدنيا لوحدى .. ماشى فيها كده بصدرى ومفيش حد اتسند عليه .
وحشنى اوى الضحك والهزار والتريقه بتوعه ... انا فاكر انى كتير ايام ما كان فى المستشفى اروح اقف ادام الباب ومدخلش "كانت ممنوعه الزياره" مجرد وقفتى ادام الباب وانا عارف انه جوه كان بيريحنى ..ومجرد تصور انى ممكن اخسره كان بيملئى بالرعب ...بس حتى الوقوف ادام باب اوضته من غير ما اشوفه بقى رفاهيه لا املكها .. انا بقيت بكره الموت اوى .. القلب مبقاش حمل فراق لحد تانى ... انا عاوز ابقى اول واحد يموت فى كل اللى بحبهم .. مش عاوز اجرب شعور الخساره دا تانى

خسرت فيها " ليلى " ... كان درس قاسى اوى وساب فى القلب علامه .. بس مش عارف انا اتعلمت منه ايه؟! ...كل اللى اعرفه انها اكتر مخلوق بعد عمى انا حبيته فى حياتى .. رغم انى عارف انى استسلمت ومقاوحتش الدنيا ... انا خلقى ضيق اوى ومش حمل حروب طويله ... ومقدرش احارب الكل ...وعشان كده خسرتها ... انا عارف ان انا ظلمتها باستسلامى .. رغم انها عمرها ما ظلمتنى ... انا بلوم نفسى كتير على كل خناقه صغيره اتخانقنا فيها ... هى مكانتش تتستحق كده هى  كانت تستحق اللى يرسم كل يوم على وشها بسمه .
رغم انه فات شويه وقت كتير .. بس لسه بتوحشنى ولسه بشتاق لصوتها... وفى نفس الوقت كل ما بفتكرها ببتسم وبدعى لها ... ولحد دلوقتى مش شايف ومش هعرف اشوف غيرها ...بمنتهى البساطه بحبك يعنى " ليلى" 
ولحد دلوقتى بفتكر جمله قلتها لها " انا عاوز احبك ,, ولو فشلت القصه عاوز اتألم ,, وساعتها كل ما هفتكرك مش هزعل بالعكس هبتسم ,, مينفعش اسمك يرتبط غير بالبسمه "

اللى بفطس من الضحك ان السنه دى وبعد التجربه دى ما خلصت بنتين هم اللى يجوا يقولولى انهم بيحبونى .. انا اول مره بنت تقولى انها بتحبنى اصلا ... واللى يحصلى ساعتها انى افضل احلم ب " ليلى" كام يوم بعدها واصحى كل يوم وحاسس بلمسه ايدها .. واصحى اسأل نفسى هو فى حب غير " ليلى"... وامسح تليفون البنت وابطل اروح المكان اللى ممكن اشوفها فيه .. وامسحها من النت او احطها فى جروب ميشوفنيش اون لاين.

وخسرت فيها اصدقاء افتراضيين .. مسحونى او مسحتهم بسبب الاختلاف فى وجهات النظر عن الثوره ... بدأت احس ان محدش فينا قادر يستحمل مجرد وجود وجه نظر مخالفه له ... بعض الصداقات دى زعلت على خسارتها وبعضها فرحت ان دا حصل .

وعرفت ان تجار المخدرات ناس طيبه اوى ... وعندهم كرم حاتمى .. هبقى احكيلكم ازاى دا حصل لما احكى لكم مغامراتى مع سواق التوك توك اللى بتحصل كل يوم فى رحله ذهابى للعياده والعوده منها.

انا طلعت من السنه دى برغبه انى احب كل الناس ... واتعود انى ابعد عنهم ... لان الناس اللى حبتها من غير ما اتعود ابعد عنهم ... لما القدر بيبعدهم القلب مش بيتحمل :(
ربنا يجعلها سنه سعيده علينا كلنا وتكون فى طاعه وتبقى فى ميزان حساتنتا مش سيئاتنا اللهم امين
ويعدل حالنا وحال البلد :) ويسقط حكم العسكر :D

2011/10/19

تفاحه ماما


وانا بتكلم انا وماما وهى بتلقح بالكلام وبتقول " البنت الكويسه عامله زى التفاحه فى اعلى فرع فى الشجره , محدش يشوفها ولا يلمسها ولا يشمها الا اللى يطلع لحد عندها , والبنت المش كويسه هى التفاحه اللى على الارض , اى حد يقدر يشوفها وفى الاخر هى مجرد تفاحه بايظه ومعفنه"
لما خلصت وجه نظرها لقتنى بحب فعلا التفاحه اللى على فرع قريب سهل اوى اى حد يشوفها , أو حتى التفاحه اللى على الارض .
ايه الميزه اصلا فى التفاحه اللى فى اعلى الشجره ؟ 
ومين غريب الاطوار دا اللى مستعد يطلع كل دا رغم انه هيقابل مليون تفاحه عشان خاطر يروح يقطف اللى فوق خالص دى ؟
ايه المغرى فيها ؟
وازاى شاف الاغراء دا ؟ 
وايش عرفه انه فى الاخر ولما يطلع فوق ويطلع عينه مش هيلاقيها تفاحه وحشه؟ عشان رأى الناس؟ مين الناس اللى الواحد ممكن يطلع عشان واثق فى رأيهم.. شجره زى دى مين قاله انهم صح؟
ثم التفاحه اللى فوق فى اعلى الشجره دى شكلك ايه ادامها وانت عبيط كده وطالع كل دا عشان خاطر تفاحه. .. تفاحه فى شكلها كتير او قريب منها على الاقل وكان موجود فى الاغصان الاقرب.
وبعدين مين قال انك لما هتوصل لفوق اوى كده هتقدر تشوفها كويسه ولا لأ؟ اكيد الوضع فوق وانت فى اعلى قمه الشجره مش مريح .
واكيد هيبقى كل همك ساعتها انك تنزل "بام التفاحه دى " للارض. هتعرف منين بقى اذا كانت كويسه ولا لأ .. ذوقك فى التفاح ولا لأ؟
ثم برضه هى التفاحه دى هتعملى ايه عشان اعمل كل دا عشانها .. انا شخصيا اعتقد ان لو مكانش فى تفاح بيقع او مكانش فى تفاح على الاغصان الاقرب . مكنتش هاكل تفاح الا لما يبقى عندى سلم كبير او عماره طويله جنب الشجره دى .. عشان اوطى وانا باخد التفاحه اللى فوق دى وكأنى برضه باخدها من على الارض.
لكن التفاحه اللى فى الغصون القريبه .. مغريه .. لذيذه ومشتهاه .. لولاها مكناش عرفنا ان التفاح حلو اصلا .
التفاحه القريبه هى اصلا تعريف التفاح فى عنينا .. هى اللى بتلمع باثاره لما تيجى عليها الشمس ..وهى اللى ريحتها هتجذبك ..  وهى اللى هتعاكسك وتقع فوق راسك وانت قاعد تحتها .. فتلهمك انك فعلا محتاج تفاحه دلوقتى .. هى اللى هتقدر تشوفها وتلف حواليها .. كل عيوبها هتعرفها اوى .. وممكن تحب العيوب دى من كتر ما بقيت بتحبها.. هى اللى ريحيتها هتجذبك ليها ... هى تعريف الاغراء بكل معنى الكلمه 
هى اللى هتقدر تخليك تيجى لحد عندها وتقولها انا عاوزك.
وبعدين مين قال انه التفاحه الكويسه لازم تبقى فوق .. دا ميزه التفاحه القريبه انك هقدر تشوفها .. هتميز بينها وبين اى تفاحه تانيه .. هتشوفها اتقطم منها قطمايه قبل كده؟
عيال لعبوا بيها فبقى شكلها من بره حلو لكنها من جوه عصير .
هتقدر تميز اوى كل اللى فيها
انا بحب التفاحه اللى تيجى .. مش التفاحه اللى تتعبك .. القريبه , المغريه , المثيره 
مش الممله البعيده الصعبه.
=== واد انت ..انت فاهم انا اقصد ايه بطل استهبال  "دا صوت ماما "
--- لما تبقى عاوزه حاجه ابقى قوليهاعلى طول بلاش لف ودوران احنا برضهبنعرف نصيع :))
** البوست ليس بالضروره يعبر عن وجه نظرى الحقيقه .. هومجرد سفسطه للرد على منطق ماما :)

2011/09/15

حب البلد بيعيش...لمّا يموت الجوع


الانسان مبيقدرش يبقى انسان الا بعد ما يقدر يشبع كل غرائزه الحيوانيه .. دى حقيقه مهما حاولنا نجملها او نصيغها باى شكل اقل حده.
متقدرش تمنع التحرش بنسبه 100% الا لو اشعبت الغريزه الحيوانيه اللى فى داخلنا .. عن طريق اباحه الجنس او تسهيل الجواز.
نفس الكلام دا ممكن يتقال على اضراب الدكاتره.
انا شخصيا واحد من الناس المتردده فى اخذ موقف من اضراب الدكاتره .. المستشفى اللى انا فيها مضربه واضراب كلى كمان .. ورغم كده انا وكتير غيرى لسه فى حيره.
انا بعترف وبصراحه وبوضوح انى بشتغل باستهتار شديد جدا فى المستشفى .. استهتار يضر بمصلحه العيان لاقصى درجات الضرر .
بس لو جيت تحلل ليه انا بعمل كده هحكيلك ايه اللى بيحصل بالظبط
العيان اول ما بيدخل عندنا بيدخل قسم التشخيص .. القسم دا اللى هيحوله لاى قسم تانى حسب حالته " حشو ,علاج عصب ,اطفال تركيبات, خلع"
ابسط ادوات التشخيص حاجه اسمها بروب ومرايه .. انا مش مسموح لى استخدم لكل عيان بروب لانى لو عملت كده بدل ال200 حاله اللى بنشتغلهم كل يوم هنشتغل بالكتير 30 حاله
البروب له ناحيتن .. ناحيه مصممه انها تكشف على الاسنان الاماميه وناحيه للسنان الخلفيه .
احنا بنستخدم ناحيه واحده بس للعيان وبنركن الناحيه التانيه على الحوض .. اللى هو اصلا ملوث ..بجانب انى لمسته بايدى الملوثه من العيان اللى قبله .. ومينفعش نستخدم البروب لعيان واحد لاننا كده هنقلل عدد العيانين ال30 للنص وباقى العيانين اصلا بنشخصهم بعنينا بس.
اذا قلنا ان دا بيحصل فى عياده التشخيص اللى هى  ( أ, ب) كمل على دا فى باقى العيادات.
انا شخصيا فى قسم الحشو بشتغل اى كلام .. احنا بنستخدم ارخص حشوه بلاتين فى السوق .. والحشوه دى بتبقى مفروله ومستحيل تعيش اكتر من سنتين تلاته من غير ما يتكون تحتها تسوس.
انا شفت بعينى فى محل مستلزمات اسنان والراجل ضربلنا الحشوه دى وفضلت تطلع هباب اسود كل ما نلمسها ودا معناه انها بتحلل شويه بشويه.
مهما انا عملت الحشوه دى بذمه .. هتعب نفسى فيها على الفاضى وهى كده كده هتبوظ.
الاطفال 80% بنعملهم خلع بصرف النظر عن الحاله تنفع حشو ولا لأ .. ودى جريمه... بس احنا بنعمل كده لسبب بسيط ان مفيش غير كرسى واحد فى عياده الاطفال ومينفعش امشى كل العيانين من غير ما اعالجهم .. لا هم هيسيبونى ولا قلبى هيطاوعنى اعمل كده فى طفل حتى لو كنت بضره على المدى البعيد ..لانى بالكتير مش هقدر اعمل حشو لاكتر من 6 حالات فى اليوم كله.
انا مبشتغلش بذمه لانى هتعب تعب مضاعف فى المستشفى لان النور اللى فى الكرسى سايب ومش بيتظبط واغلب الشغل شغال فى الضلمه ومش شايف .. وبعد التعب المضاعف وضهرى اللى هيتقطم لان الكرسى مش شغال بالكفاءه المفروضه ..  العيان مش هيستفاد منه لانى فى الاخر بحط له مواد هى اقل مواد فى السوق.
بتعب اكتر وهو بيستفاد اقل .
لو صممت الضرس بشكل عبقرى- واللى هو مستحيل يحصل من غير على الاقل نور وكرسى ابن ناس - وحطيت فيه حشوه سيئه الحشوه مش هتعيش .. العكس ممكن يعيش.
ضيف لدا انى لو تعبت فى حالات هتفشل كده كده .. لو كان عندى شغل بره ايا كان او حتى عياده هروحلها تعبان ومش هقدر اشتغل.


انا دلوقتى امتياز .. ومرتبى كله على بعضه 251 جنيه بعد شهرين ان شاء الله هستلم تكليفى وهيكون المرتب بتاعى الاساسى 151 جنيه وحوافز من 300% لـ400% يعنى دخلى هيبقى من 600 ل 700 جنيه تقريبا .
انا ليه مقلتش ان المرتب بتاعى هيبقى من 600 لـ700 جنيه من الاول وقلت لك الاساسى كذا والحوافز كذا .. دا مش عشان اقلل من حجم المرتب والله .. لكن لأن اصحابى اللى فى تكليفهم السنه دى حوافز شهر 1 بيقسموا انهم لسه مخدوهاش .. يعنى من شهر 1 لحد النهارده كل اللى بيقبضوه 151 جنيه .. هى الحوافز مش هتروح عليهم وهيخدوها تدريجيا .. بس انت فاهم يعنى ايه هو عايش بقاله كام شهر ب151 جنيه؟
دا غير ان التكليف بيكون غالبا فى اماكن بعيده .. يعنى تبعد عن اهلك وكمان متقدرش تفتح عياده لانك مش مستقر فى مكان .. وفى الاخر تاخد مرتب اى كلام.
انا مش عارف اشوف الطب كمهنه انسانيه لانى احتياجاتى الاوليه مستحيل هتتحقق بالمرتب دا .. مش عارف اخاف على مصلحه المريض لان مصلحتى مش متحققه .. ولان مستحيل مصلحته هتتحقق مهما اشتغلت كويس طالما كل الادوات اللى بشتغل بيها مش شغاله.
الدكاتره عموما اللى بيشتغلوا فى المستشفيات بيتقال عليهم مش بيفهموا حاجه فى الطب ... والاغلب ان الكل بيشتغل باستهتار لانه عارف انه مستحيل العيان هيحصل على نتيجه كويسه فى الامكانيات دى.
النتيجه ان الخدمه اللى هتاخدها فى اى مستشفى حكومى هتبقى خدمه سيئه .
والدكتور عشان يبقى دكتور شاطر ان مكانش غنى ماديا اصلا مستحيل يقدر يحضر ماستر او زماله .. لانها بتوصل لارقام فلكيه 30 الف واكتر.
بالمناسبه الدكاتره اغلبهم اغنيا جدا ودول غالبا بيقدموا على اجازات او استقاله او على الاقل نص مرتب او بيسافر .. وفى منهم اللى بيفضل فى وزاره الصحه وبيشتغل باستهتار وبيحضر بعدم انضباط لكل الاسباب اللى فوق دى .. لانه بيشوف انه ملوش لزمه اتعب كل التعب دا من غير نتيجه
بالمناسبه متتعاطفش معايا انا الحمد لله وفضل من ربنا دخلى كويس بره وزاره الصحه :) بس عشان دخلى يبقى كويس محتاج اولا يكون حظى كويس وربنا يوفقنى والحاجه التانيه محتاج اشتغل حوالى 14 ساعه فى اليوم.

الحيره بقى فى حوار الاضراب .. هى الاجابه على الاسئله دى هل دا وقته وحال البلد الكل عارفه؟
والسؤال التانى : هل من حقى اقول للعيان لانى مش عارف اعيش ولانى كده كده هعالجك اى كلام فى اى كلام فانا خلاص مش هعاجلك وأتألم او متتألمش مليش دعوه؟
طب ما انا برضه عاوز حقى .. ومش هشتغل ولا هعرف اشوف الطب كمهنه انسانيه الا لو قدرت اشبع احتياجاتى الحيوانيه الاول؟
انا شخصيا مش عارف وان كنت مضرب مع المضربين بحكم ان المستشفى كلها مضربه اصلا وقافلين الابواب ومبندخلش ولا عيان للمستشفى اصلا.

2011/09/03

نور 2




احيانا بتكون شايف نفسك حزين .. فتبقى حزين .. ساعتها قلبك بيدق الدقه الممله دى وبتحسه تقيل اوى فى صدرك .. متعرفش اذا كان بدق بسرعه ولا بيرتعش ولا في ايه .. المهم انك بتحسه تقيل.
وفى عز لحظه زى دى يجيلك تليفون .. تضحك اوى من قلبك .. قلبك يبطل دق ويتنطط  وكأنه فرحان يمكن لانه حاسس ان الصوت اللى كان طالع كان صوت سعيد.
اهو دا اللى حصل من اسبوعين تلاته.
اتصلت نور تسأل عن حاجه  .. بس معرفش ازاى قدرت تستدرجنى انى احكى عن ذكريات اياااااام فاتت .
تصدقى انى فعلا عمرى ماكنت حزين .. وانى مش لايق على ملاحمى انى اعمل حزين .
يخرب بيت مخك فكرتينى بحاجات كنت نسيتها من زمن .. انا فاكر اول بنت حبيتها زماااااان وانا فى تالته اعدادى .. وعمرنا ما اتكلمنا مع بعض .. كان عندنا اى ولد يكلم اى بنت يبقوا الاتنين قليلات الادب .. بس انا كنت مخطط ادخل صيدله بقى وهى تدخل بشرى ونتجوز .. وفى السنتين الفرق دول اكون ظبطت امور .. عارفه الحلو بقى انها دخلت تجاره وانا دخلت اسنان وانقطعت اخبارها ... كانت زى القمر تصدقى .. ومعرفش فين اراضيها دلوقتى :)).
وفاكر اول بنت حبيتها فى الكليه .. يا نهار اسوخ على المسخره لما رحت قابلت ماماتها وانا لسه فى اولى كليه .. وعشان جو الاكشن يكمل كانت يومها عامله حادثه ورابطه عنيها وكان منظر ابن لذينا .. كل ما افتكر الموقف دا اقول يخرب بيت الجرأه اللى كنت فيها .. لما رحت قلت لها انا بحب بنتك وعاوزك تبقى عارفه ولو ينفع اتدم معنديش مانع  ... وكل ما افتكر عمى الله يرحمه وهو بيشجعنى اروح اتقدم وبقى مؤمن بقضيتى .. وفى الاخر فهمت انه مرضيش يقولى ان دا عبط عشان كان متأكد انى مش هسمع كلامه فقال يجارينى واكيد اهلها كده كده مش مجانين يعنى عشان يوافقوا نتخطب من اولى كليه... وفضل يتريق عليا فى الموضوع دا لحد ما مات الله يرحمه .
وفاكر كمان وانا فى الكليه وكان ليا زميلات كتير .. وقمت فى مره قفشت عليهم كلهم وقلت لهم انا مش هكلم بنات تانى .. يا نهار منيل على الاحراج .. كل ما افتكر الموقف دا وشى يحمر لحد دلوقتى .. انا كده حسيستهم اننا كنا صيع والحقيقه مكانتش كده خالص ... هيبرت الموضوع بشكل بشع .. ولما بشوف ناس غشيمه فى التعامل مع الناس وفى اظهار الصح والغلط بفتكر الموقف دا جدا .. وخصوصا ان مكنش فيه مبرر له ابدا.
انا فاكر اول لقاء مدونين رحته .. كان فى بنوته هناك رقيقه جدا وكنت اعرفها من زمان شات بس .. وفاكر انها كانت بنت محترمه اوى اوى .. ويوم لقاء المدونين خدت رقم تليفونى من صديقه مشتركه .. واتصلت بيا بعد كده .. اظن انها لحد النهادره مش متخيله انها عملت كده .
فاكر انها اتصلت بيا مره وبعدين حست ان دا تصرف غلط انها تكلم ولد فى التليفون .. فادت رقم تليفونى لصاحبتها .. شافت ان العلاقه لو كانت فى جروب هتبقى مش غلط اوى .. يا نهار الوان .. تعرفى ان مكالمه التليفون بنت اللذينا دى غيرت تاريخى كله .
قصه حب وقصه شغل وقصه سنتين تلاته مكانوش مستحيل هيبقوا كده الا بعد مكالمه التليفون وعزومه البيتزا بتاعه كليه علوم دى :)
كل دا بدأ بفضول مكالمه .. ايام من اجمل ايام حياتى عيشتها بعد المكالمه دى .. وايام من اسوأ ايام حياتى عيشتها بعد المكالمه دى :))
انا اول مره اكتشف دلوقتى وانا بكملك انى مش حزين .. انا مش حزين بجد .. يا نهار ابيض على صندوق الذكريات دا .. انا افتكرت ان الحزن مش بيليق على ملامحى ابدا .
ياااااااه يا بت يا نور فكرتينى بحاجات وايام .. طب تصدقى والله العظيم انا خرجت من المود تماما ..والله بجد اانا مينفعش اكتئب .. طب عارفه هقولك حاجه لو فضلت مش مكتئب كده اسبوعين وحسيت انى تخطيت مرحله الحزن دا
هكتب بوست فى المدونه وهجيب سيرتك وهشهرك فى مصر والعالم العربى :))
اقفلى يا فقر عشان اقوم اشوف اللى ورايا ... وحولى بقى من المستشفى دى عشان انا زهقت منك .. اه وابقى دورى على قصيده لعلى سلامه  .. فيها جمله هى بالظبط انا 
" والحزن نشن ماجتش فيا"
بت يا نور شكرا بجد وربنا يخليكى :)

2011/08/09

يوم ما اتقدمت لها


مش فاكر اى حاجه من التفاصيل .. كل اللى فاكره انها قبلها بيوم فضلت تقولى بحبك كتير .. وفضلت انا مشغول باللى هيحصل بكره .. " فى ايه يا حبيبتى انتى بتقولى بحبك كتير ليه النهارده " " خايفه تكون اخر مره تسمعنى وانا بقولهالك عاوزه اشبع اوى منها "
يومها فضلت مشغول اوى باللى ممكن يحصل بكره
انا مش فاكر كل التفاصيل مش فاكر فى المكالمه دى غير صوتها وهى بتقولى بحبك , اللى خلانى اخرج من التفكير والترتيب لبكره , واقولها وانا بعشقك.
انا مش فاكر تفاصيل اللى حصل تانى يوم ,, كل اللى فاكره انهم كانوا معايا عشان نتقدم للبنت اللى كنت بقولها بحبك امبارح ,, مش فاكر ايه اللى حصل ..ومش فاكر دا حصل من كام يوم
هو عشرين يوم ولا اكتر ولا اقل 
انا كنت عارف ان باباها رافض عشان عرف انى اعرفها من فتره طويله ,,حس انى اهنته حتى لو كنت جاى اخطبها ,, فحب يخلى الكل يرفض ميبقاش هو لوحده
مش فاكر ايه اللى حصل بالتفصيل بس كل اللى فاكره انه نجح انه فى دا.
كل اللى فاكره انى اول ما خرجت من عنده قلت لعمى انا اسف ,,اسف بجد ,, وفاكر انه قعد ينصح فيا لمده ساعتين ويقولى كلام ممل مش فاكر منه ولا حرف طبعا.
انا فاكر كمان انها قالتلى قبلها بيوم  انا لو واثقه انك هتوافق كنت لميت هدومى دلوقتى وسبت البيت ,, بس انا مش واثقه فيك لو عملت كده 
وفاكر انى قلت لها دا حل كارثى ,, وفاكر انى كنت فى اعماقى واخد قرار ان لو الدنيا فركشت انى هعتبر الدنيا فركشت.
فاكر كمان انى بعد اللقاء اللى حصل مع والدها .. حذفتها من الفيس بوك ومن الماسنجر ومسحت رقم تليفونها ,, انا فاكر انا عملت دا ليه  ,, اضايقت لما لقيتها كتبت حاجه بخصوص الموضوع دا بطريقه محبتهاش ,, وكمان حسيت اننا لازم نختفى من ادام بعض لان الوضع دا مؤلم بزياده.
فاكر كمان اننا مودعناش بعض ولا قلتها انى لسه بحبها اوى وانها وحشانى اوى .. وفاكر الايام دى وهى بتمر عليا ومقتنع انها لازم تبقى مؤلمه وانها هتسمتر فتره لحد ما تنتهى
انا بس كل اللى عاوزه انى افضل فاكر كل التفاصيل حتى اللى محكتهاش .. مش عاوز انسى ولا تفصيله مهما كانت صغيره .. مهما كانت حلوه او وحشه
بس يارب كل اللى طالبه منك انا مش عاوز انساها ومش عاوز اتعذب بيها
يارب عدى الايام دى بسرعه كل اللى بطلبه انها تعدى بسرعه وبس

2011/06/30

يا صديقى لقد سئمت


فى ازمته الاخيره قررت الا اقف بجواره .. نقاشى معه لن يجدى .. نصيحتى له بالتخلى عن بعض الاشياء المتعبه له .. سيعتبربها على كل حال اننى احاول احباطه .. حسنا لن افعل .. لن انصحه ولن اقول له تلك الكلمات التى يجب ان تقال فى هذا الموقف .. كن حزينا  يا صديقى او سعيدا لا يهم .. محبطا او متفائلا .. لم يعد الامر يعنينى كما كان من قبل  ..كُن انت او غيرك .. استمع لى او ارفض .. لم اعد هذا الشخص الذى سيطلب منك دائما الاقتراب لتسمع .. لن اطلب منك ان تفعل شيئا اخرا.. سئمت من كثير من تصرفاتك وايضا كثير من عنادك .. اصدقاءُُ نحن منذ متى؟! .. كم مره سمعت نصيحتى وكم مره رفضتها؟! ..وكم مره اتخذت قرارا يستفزنى لأبتعد عنك اكثر .. انت الان حر اتخذ قراراتك بنفسك .. داوى جراحك بنفسك .. واحضن نفسك بنفسك .. لم اعد يا صديقى كما كنت .. لقد سئمت .. فقط سئمت

2011/06/27

تكتب الكتاب الاول وبعدين تتقدم :)

 
فى مثل هذه المواضيع بحب اخد رأى المبدعه نهى العربى .. لانها بتجمع بين العقل الكبير والطاقق فى نفس الوقت.
لذا ارسلت لها هذه الرساله طالبا منها رأيها واليكم الرساله.
والله يا نهى هانم انا رأيي ان احسن حل اى اتنين لقوا فى بينهم لنك والحياه بيس .. يكتبوا الكتاب وبعدين يبقى العريس يروح يتقدم للعروسه
وبكده ابوها ساعتها ميقعدش يبيع ويشترى فيه .. هو غالبا هيقتل العريس وخلاص :)
بس المشكله ان الاهل لما هيحسوا ان " العيال" اتصرفوا من وراهم ممكن يكون موقفهم عدائى ورغم ان دى مشكله كبيره بس خلينا نتفق ان العلاقه بين الابن والاب علاقه ابديه .. يعنى مستحيل تنتهى لمجرد شئ غلط حصل .. اه اكيد هيزعلوا وليهم حق .. بس فى الاخر هينفع ترضيهم .. لكن لو علاقه الجواز من الطرف التانى فركشت مش هيبقى ليها حل.
وبعدين انتى لو جيتى تشوفى اهم الاسباب اللى بيرفض عشانه الاهالى .. بيكون غالبا للابن هى رغبه اهله فى انهم هم اللى يختاروا له العروسه .. مينفعش يختار لنفسه ..او اعتراضهم على طلبات اهلى البنت حتى لو يقدر يجيبها .. لكن بيحسوا انهم طمعانين فيه .. ولو للبنت فبيكون السبب انهم عاوزين العريس يجيب لبن العصفور وكأنهم هيتجوزوا ويموتوا .. لازم كل حاجه تبقى موجوده من اول اوضه الاطفال لحد البامبرز وخلافه عشان لما يبقوا يخلفوا يبقى كل حاجه موجوده.
لكن بحل كتب الكتاب الاول ...خلاص بقى امر واقع والكل لازم يتصرف من خلاله ...اى اهل يقولوا اى كلام ملوش لزمه يبقوا عارفين انه مينفعش ... وان من الاخر احنا جايين ليكم عشان الشكل الاجتماعى لكن دى حياتنا واحنا اخترناها وخلاص.
بس هو  قرار لازم تتحمل عواقبه .. قرار بالحجم دا لازم كل طرف يبقى اولا متأكد انه الطرف التانى ينفع .. ويسأل عليه وميكتفيش بالعواطف بس .. وياخد رأى ناس اكبر منه فى الشخص التانى .. ويسأل نفسه مليون مره هو ينفع زوج ولا مينفعش .. مش كل صديق او حبيب او زميل شغل ينفع زوج ولا كل صديقه او حبيبه او زميله شغل تنفع زوجه ..دى حاجات محسومه.
الحاجه التانيه انهم لازم يكونوا مستعدين بالحد الادنى للمعيشه ويبقوا عارفين مادياتهم كويس جدا فى حاله الاهل اعتبروا دا عقوق وضربوا كرسى فى الكلوب
حاسس انها الجريمه المتكامله .. ايه رأيك انتى بقى وافتينا ماجورين 
فجاء رد نهى كالتالى :)
وجهة نظري في حوار الجواز ده
عشان الناس بتهلك فيه كتير
دلوقتي هل البلد دي فيها مشكلة جواز؟
اه فيها
سببها ايه؟
بالنسبة للطبقة المتوسطة الدنيا اللي انا انتمى ليها، المشكلة دايما في الاهل، فيه كمية اساطير مسيطرة ع الناس، رهيبة جدا و تقريبا هي السبب في الجواز و الطلاق سوا
يعني لغاية دلوقتي اللي بيتعرفوا على بعض عن طريق النت غير معترف بيهم، في حين انها طريقة زي اي طريقة و اعتقد انها مش حتكون اسوأ اطلاقا من اللي بيتعرفوا اول مرة في الصالون ادام الجاتوه و الحاجة الساقعة، و لو على السؤال في اي حالة ممكن تدور على التاريخ الجنائي بتاع اي طرف من الطرفين
كمان مشكلة المهر، الشبكة، القايمة، العفش،...الخ، و لو وقفت على دماغك و قلت امال انتوا ابتديتوا ازاي، يقولك ملكش دعوة و انا عارف مصلحتك، و اللي بالمناسبة مش مقنع بالنسبة لي حد عارف مصلحتي اللي انا مش شايفاها و المفروض اني اشتغل عليها معاه و احققها!!!
و القايمة اللي اساسا عادة لو البت مش طايقة العيشة بترميها في الزبالة و تخلع أو هو يقرفها عشان يخليها تخلع برده، انما ازاي نعمل حاجة غير ما عملت سنية و فتحية و حسنات و ام السعد؟؟؟؟ عيب
ده جبن اجتماعي بحت و حفرة تاريخية الاهالي واقعين فيها
تعالى بقى لكمية المشاكل الناتجة عن الحوارات الفكسانة دي
اولا الشباب يا حيتعقد يا حيتحرش يا حينحرف، و البنات يا اما حتبقى بوز يا اما حتتجوز واحد كل همها انها تحلبه في الفلوس، اما بقا فكرة ان شاب يتجوز من طبقة اقل منه ماديا عشان يقدر يكون في المكانة الاعلى و يعرف يجيب ع الطلبات دي، فكرة سخيفة جدا، عشان الجواز ده اقتناع روحي و فكري و عقلي و مليون حاجة تاني، ازاي بقا حعمل كل ده مع واحدة انا اختارتها لمجرد اني مش عارف اتجوز اللي اقتنعت بيها، و بعدين بيسألك ليه العيال بيطلعوا معقدين و الراجل مش بيطيق مراته بعد كام شهر، و ان الطلاق كتير
عشان معظم الجوازات حاليا اللي عاوزة تتم، اللي بيريح فيها الواد و البت دماغهم انهم بيسمعوا كلام دادي و مامي بالملي، يا كده يا حيركنوا، او يعدوا يهلكوا في خناقات لا حصر لها، عشان كل واحد حاطط في ذهنه شخص معين، و قابل بقا كمية الاتهامات المبنية على الحوار ده، و انتي مش متربية و بتصيعي من ورانا، و انت عاوز تعادي اهلك عشان حتة بت طب عليا الطلاق من امك ما انت مجوزها و لو وقفت على شعر راسك...
ثانيا، لو بيحب واحدة معينة و ابوها نفخه حيروح يدور على اي واحدة كحلة يطبخ فيها العيلين و خلاص شكرا على كده و اهه يبقى عف نفسه و جاب العيال اللي امه حتموت عليهم و كفا الله المؤمنين شر القتال، فين بقا حوار نظام الاسرة اللي احنا يا عيني ميتين عليه في المجتمع و خايفينه يضيع، دي اسر مشوهة اصلا
لمحبي التفاؤل طبقا و الالوان و كده انا عارفة الكلام ده مبيعجبش ناس كتير، بس انا مقتنعة ان ربطة العيال جنب اهاليهم بعد ما يبقوا شحطا دي اساسا بتموت فيهم الاعتماد على النفس او حتى قوة الشخصية، و بالتالي فعلا مبيعرفوش يفتحوا بيوت
الاهالي كمان بيبصوا اتجاه واحد، انت دينيا ملزوم بالطاعة المطلقة ليا الا في الشرك بالله، و بما اننا في 2011 و ابوك مش حيدخل يقولك اعبد تمثال العجوة اللي انا جبته، يبقى نتكلم في مستوى اعلى شوية، و هو انت ليك حرية اختيار اد ايه، و الفرق بين النصيحة و الاجبار، و الابتزاز العاطفي بتاع لو عملت كدا قلبي و ربي غضبانين عليك ليوم الدين....
عشان كده فكرت لو خمسين جوز، واحد و واحدة، عاوزين يبدأوا حياتهم بشكل متوازن و ناضجين فكريا و ماليا كفاية انهم يفتحوا بيوت، يروحوا يتجوزوا و يتخلصوا من العنب العنب العنب و القايمة و زفة التكسيات و ينشئوا بيوت و يا ريت يتفقوا مع بعض يعملوا كده في يوم واحد عشان تبقا صدمة للمجتمع الساذج اللي نايم في العسل و مش راضي يحل حاجة و مطلع عين اللي جابونا بس
الفكرة دي لو بدت خيالية لكن انا شايفاها حتتحقق يوم ما
طبعا فيه حاجات المجتمع مبيبصش ليها الا بقلم على وشه، يعني الاب مبيعرفش انه ابنه مدمن غير و هو عنده اوفر دوز و فاضله عشر ثواني و يودع، بالظبط كده حوار البرامج و و النبي سهلوا الشروط و خلوا العيال تتجوز بدل العرفي، و ان ابنك و بنتك بيتفرجوا على افلام من وراك عشان حاجتهم الطبيعية اللي انت فاكر انك مانعها، مش جايب نتيجة بقاله زمن، يبقى لازم قلم و لا مش لازم ؟؟
اما بقا اللي حيقيس على الناس كانت بتتجوز زمان ازاي يروح يرجع زمان و هو يستريح 
ايه رأيكم بى فى الليله كلها :)

2011/06/22

حاجات غلط


يارب انا عارف ان فى حاجات غلط كتير اوى انا بعملها .. ومكسوف اوى من نفسى ..بس والله يارب انا نفسى اقدر اتوب عن الحاجات دى .. ونفسى كل الحاجات الغلط دى تتصلح .. او اقدر ابطلها... وبحاول اعمل حاجات صح كتير يمكن تقلل الغلط دا.
يارب انت العالم ان قلبى متعلق بشويه حاجات غلط يمكن مش قادر اسيبهم دلوقت .. بس والله برضه قلبى متعلق بشويه حاجات صح 
انا قلبى فيه خير وشر .. يارب كتر فى قلبى الخير وامحى منه الشر.
يارب انت الوحيد اللى قادر انك تصلح كل الاوضاع الغلط .. فى ايدك قلبى وقلوب البشر كلهم  ...يارب اهدى قلبى وقلوبهم واصلح لى حالى.
يارب انا ضعيف اوى .. وانت القوى .. اصلح لى امورى وخدنى فى طريقك .
يارب بحق ما بتستر عليا وانا بعمل الغلط .. وبحق النعم اللى انا متغرق بيها وفيها بأمرك .. تم نعمتك عليا يارب واهدينى وساعدنى انى معملش حاجه غلط.ِ
يارب اغننى بحلالك عن حرامك .. يارب اغننى بحلالك عن حرامك

2011/06/13

شات


رغم انه مش بيعمل معاها شات بقاله كتير .. بس لاول مره يحس انه مشدود لشخص كده .. مشدود من مجرد شات كتابه .. كان اغلب كلامهم هزار وضحك.. زى اى شات .. بس ايه المميز فيها تفرق ايه عن اى واحده تانيه عمل معاها شات قبل كده....يمكن لانه فعلا كان عاوز يحب.. وهو لما يبقى عاوز يحب يحب واحده من النت وكل علاقته بيها شات؟ 
من يوم ما حس انه مشدود ليها اوى ..وهو مستغرب .. بعد شويه طلب رقم تليفونها .. صوتها فى التليفون ناعم .. مش ناعم اوى بس مليان مرح .. اجمل حاجه فيها انها لسه طفله 
اوحش حاجه فيه انه بدأ يحس انه كبر.
لما كلمته ليله امتحاناها دعى لها جامد اوى ... واستغرب هو ليه كان بيدعى ليها اوى كده.. واستغرب هىليه اتصلت بيه هو .. وحس انها بتبادله نفس المشاعر اللى هو مش فاهم ازاى هو بيحس بيها.
طلب منها انها تقابله وقالت له مينفعش تنزل من البيت تقابل ولد .. شكلها يبقى وحش ادام نفسها .. انا ممكن اقابلك وسط ناس.
ساعتها لما رد عليها وقالها ..انا هقابلك وسط العاصمه يعنى وسط مليون شخص على الاقل.
كان رغبته انه يشوفها اكبر من انه يفهم وجه نظرها عشان كده
طلب منها يشوفها اكتر من مره وفى الاخر يوم ما نزل وشافها ..  وقعد معاها فى كافيه جميل .. واتكلموا فى كل حاجه وهزروا وضحكوا .. ورغم انها طلعت زى القمر ..مشى وهو مش حاسس انها كانت شخص مميز ولا حاجه .. وانه بس كان مشدود لحاله ولما شافها انتهت الحاله دى .. وانهم من دلوقتى مش اكتر من اتنين بيعملوا شات :)
وللحديث بقيه ...

2011/06/11

قرموط


بدأت اخد دروس سباحه يا بشريه
وشهر واحد وابقى ولا عبد اللطيف ابو هيف
وكل واحد يعرف مقامه بقى 
وشكرا :)

2011/06/10

رحله البحث عن الموتوسكل


محمد زوج اختى اتسرق منه الموتوسكل بتاعه  وبدأ تجربه البحث عن الموتوسكل المسروق والبحث عنه كان تجربه مثيره تستحق السرد.
اول حاجه راح القسم عشان يعمل محضر  وهناك بقى قالوله انهم مش هيدروا على الموتوسكل اصلا , وانه عليه انه يدور بنفسه وان المحضر فقط عشان يحميك لو حد عمل بيه حاجه.
يا استاذ احنا كنا بنجيب اللى بنشك فيهم ونهريهم ضرب لحد ما حد فيهم يعترف , لكن دلوقتى مبقاش فيه كده انت دور بنفسك.

الناس دلوه على سمسار للحراميه عشان الحراميه بيروحوا يبيعوا اللى بيسرقوه فى مكان معين والراجل دا بيبقى الوسيط بينه وبين الحرامى .. اموت واعرف انا بقى ازاى الناس عارفه كده والشرطه مش عارفه
راح هناك عند التاجر .. التاجر اسمه كلاى .. دا لقى بتاع 75 موتوسكل مسروقين ومنتظرين اصحابهم يجوا . وهناك بقى سمع يجى ميت حكايه.
ابن الدكتور محسن الظابط فى الجيش -كان معايا فى ثانوى على فكره- اتسرقت عربيته الاوكتافيا وسلاحه الميرى .. طلعوا عليه حراميه ثبتوه وسرقوه .
وابن الحاج غنيم بتاع الكيماوى صحى الصبح له عربيه الشفروليه مسروقه.
والتوك توك اتسرق امبارح من مش عارف مين .. ويجى مليون قصه.
وصاحب مطعم ايطاليانو طلعوا عليه بسلاح آلى وغموه .. وركبوا معاه العربيه .. وسرقوا منه 38 الف جنيه فوق العربيه .. وكل ما يتحرك يقوموا يحركوا الآلى عشان يطلع الصوت اللى بيطلع فىالافلام دا تشك تشك تشك. والراجل دلوقتى مكتئب ومش بيكلم حد بقاله تلات تيام.
وعرف كمان ان الحراميه تخصصات .. يعنى فى حراميه موتوسكلات صينى , فى حراميه موتوسوكلات ماركه تانيه ودول ميتعدوش على دول.. ورغم ان المعلومات دى متوفره اهى الا ان الشرطه عامله عبيطه 
الحلو بقى فى الموضوع انه لحد دلوقتى دفع 300 جنيه ولسه مشافش الموتوسكل وشكله مش هيشوفوه :)
رحله البحث عن الموتوسكل هنكملها على مدار الشهر لو حصل فيها حاجه
:D

2011/06/09

العيان بيصحى 2


لما كتبت من يومين عن المشهد اللى حصل فى اول مره ادخل فيها اوضه عمليات بجد .. ناس كتير خدت فكره ان الدكاتره بيتعاملوا ببرود وقسوه قلب .. وجالى تعليق ان الجراحين دول جزارين .. والحقيقه عكس كده تماما.
الطب مهنه زى كل المهن .. فى ناس عندها قلب وناس غليظه القلب زى اى حاجه تانيه .. لكن انا بعتقد ان ممارسه الطب لازم بتزرع الحنيه فى قلب الدكتور.
يعنى الدكتور اللى لسه قلبه قاسى .. اظنه كان هيبقى متوحش لو كان اى حاجه تانيه غير انه يبقى دكتور .. وانه الطب رقق من قلبه بنسبه كبيره.
نرجع تانى للعمليه .
ناس كتير بتتخض لما تسمع ان الدكتور خرم بـ( الدرلر) الشنيور عشان يثبت مسامير .. وكان بيثبت المسامير كأنه بيثبتها فى خشبه.
الشنيور دا ساعه لما بيخرم بيطلع دخان كأنك بتخرم فى خشبه وبيبقى فى مساعد واقف جنبه بينزل محلول عشان درجه الحراره مترتفعش .. وبعدين يثبت المسامير بمفك شبه المفك الصليبه .. والمسمار وهو بيدخل بيعمل صوت طق طق
انا عارف ان المشهد دا يبان لك مرعب .. لكنه فى الحقيقه مش بالرعب دا .. الحقيقه ان كل شئ بيحصل متوقع وبالتالى معمول حسابه .. فمفيش داعى للقلق ولا للتوتر .. الدكتور بيشتغل بهدوء وبراحه لأنه عارف انه محتاج عشان يثبت الشريحه عشان يثبت بيها الغضمه اللى اتكسرت فى الجمجمه .. فهو لازم يحط مسامير .. وعشان يثبت المسامير فهو لازم يخرم بالشنيور لان دى الطريقه الوحيده لتثبيت العضم.. ولانه متوقع ان هيطلع دخان وهترتفع درجه الحراره فيخلى المساعد بتاعه يصب محلول على الجرح .. وصوت الطق طق بتاعه المسامير وهى بتتثبت دليل انها داخله فى عضم كثافته كويسه يقدر يستحمل الشريحه.
ايه اللى ممكن يخليه يقلق او يتوتر طالما العمليه ماشيه بالشكل اللى هو متخيله .. ويمكن عشان كده لحظه التوتر الوحيده اللى حصلت .. هى لما حس ان العيان بدأ يفوق ..دا شئ مش المفروض يحصل .. ساعتها الدكتور لأنه عارف انه بيتعامل مع روح مع كائن حي بيتوتر.
منساش ابدا جمله قالها ليا رئيس قسم الجراحه فى المستشفى اللى عمى الله يرحمه كان فيها .. لما كنت بقوله يا دكتور هو مش ممكن نخوض المغامره وندخل اوضه العمليات يمكن يكون فيها الامل بدل ما حاله عمى بتسوء كل يوم عن اليوم اللى قبله 
الدكتور يومها قالى جمله عمرى ما هنساها " الشطاره يا دكتور مش انى ادخل بعمك اوضه العمليات واخرج من غيره ,, الشطاره ان وانا داخل ابقى عارف انى هخرج بيه"
 اهل المريض بيبقوا قلقانين عشان مش عارفين ايه بالظبط اللى بيحصل .. بيبقوا متخيلن ان الدكتور داخل يقطع ويلزق فى لحم قريبهم .. والحقيقه مش كده 
انا شخصيا بتصادفنى حاجات وانا بخلع ضرس مثلا .. فالعيان يسمع صوت طق فيحس ان فى مصيبه .. وانا بالعكس لما بسمع صوت طق ببقى عرفت ان خلاص الضرس ساب من عضم الفك ودا مؤشر يخلينى ارتاح مش اقلق.. على الرغم من انه بيرعب العيان.
الدكتور لو شاطر فهو لازم يبقى فاهم هو يعمل ايه وبيعمله ليه .. وطول مهو فاهم مش بيبقى قلقان ولا متوتر .. كانه بيعمل اى عمل روتينى .. لكن لما الدنيا بتمشى فى اتجاه عكس اللى هو عاوزه .. ساعتها بتلاقى اوضه العمليات خليه نحل والكل متوتر وبيحاول يتنقذ المريض باى شكل.
وعلى رأى دكتور الجراحه اللى عندنا: ان العيان يموت على الطربيزه" سرير العمليات" فأقل وصف ممكن يتقال انه محطم لاعصاب كل فريق الجراحه.
هدوء الدكتور - الشاطر اللى عنده قلب ضمير - دليل ان كل شئ على ما يرام .. مش دليل انه معندوش قلب.

2011/06/08

قطع النت


قطع النت بمثابه تجربه قاسيه
عزيزى القارئ ادعوا الله الا تمر بهذه التجربه ابدا
لذا نأسف عن انقطاع التدوينات فى اليومين السابقين على ان نستعيد انشطتنا غدا ان شاء الله :)
والله الموفق

2011/06/05

فى اوضه العمليات ..العيان بيصحى


اول مره فى حياتى النهارده ادخل عمليه جراحيه .. عمليه جراحيه بجد .. فى اوضه عمليات وعشان تدخل لازم تبقى معقم كليا من فوقك لتحتك .. 
وأحب اقول بعد اول مره .. ان اول مره دى ليها رهبه لأقصى درجه بس برضه ليها متعه.
العمليه كانت كسور فى الجمجمه .. تقريبا كل عضم الجمجمه كان مفكك .. كنت متابع الحاله من اولها ..من اول الاشاعات لحد ما دخل العيان العمليات.
بالمناسبه جراحات الوجه والفكين اللى بيقوم بيها دكتور اسنان مش دكتور بشرى .. بس دكتور اسنان محضر دكتوراه فى جراحه الوجه والفكين .. يعنى اى كسور فى عضم الوجه دا تخصص دكتور السنان مش دكاتره بشرى.
والنهارده كان بالنسبالى فرصه الدخول فى عالم الجراحه .. وبعتبر ان دى احسن حاجه فى امتياز .. ان غالبا بيكون متاح ليك فيها انك تلف وتستمع بكل الاقسام .
اول ما دخلت اوضه العمليات لاول مره وبعد ما العيان خد بنج .. حسيت برهبه .. العيان وهو فى البنج كأنه ميت بالظبط .. وبعدها دخل الدكتور بمشرط عشان يفتح فتحات فى الوش ومنها يدخل يثبت العضم المكسور بشرائح فى الوش وبمسامير.. اول مره اشوف الدرل ( الشنيور ) وهو بيخرم اماكن للمسامسير عشان يربط بيها الشرايح .. تحس انك شغال فى خشبه مش فى انسان .. اصلا اول ما العمليه بتدأ بتروح الرهبه تماما.
يرجع تانى الرعب ودكتور فوزى عمال يعلى صوته باقصى درجه .. العيان بيصحى  .. العيان بيصحى .. نادوا دكتور التخدير.
ساعتها تخيلت العيان وهو قايم ووشه كله دم ومتشرح تقريبا .. وبيقول يا ولاد التييييييييت بتعملوا ايه 
كنت دايما بعتقد ان الدكاتره فى العميات بيكونوا على اعصابهم جامد وفى قمه تركيزهم .. متوقعتش ابدا انهم بيتكلموا فى التليفون عادى .. وبيقولوا لبعض وقف الشغل ثوانى عاوز اشرب مثلا  .. او اى كلام فى التليفون .
عمى لما كنت بتصل بيه ويقولى اقفل بسرعه عشان انا فى عمليه وهرجع اتعقم تانى بسبب اتصالك دا .. مكنتش بصدقه اوى اصلا .. كنت بفتكره يقصد انه داخل على عمليه مش فى عمليه بجد يعنى والعين ادامه مفتوح وشه او بطنه.
الدكاتره بيبقوا جوه العمليه بيس وكووول لاقصى درجه وكأنهم مثلا بيلعبوا جيمز .. والجو مش بيقى اكشن ومتوتر ولا اى حاجه ..بالعكس بيبقوا بيهزروا وبيتكلموا فى السياسيه وهم شغالين .. وبين كل كلمه وكلمه ممكن حد فيهم يوجه التانى انه ياخد باله مثلا من العصب الفلانى عشان ميتقطعش .. ياخد باله عشان يثبت العضمه الفلانيه فى المكان الصح . كأنهم بيحشوا ضرس مثلا مش اكتر.
مكملتش بقى حكايه العيان بيصحى.. دى كانت اللحظه الاكشن الوحيده .. بعدها جه دكتور التخدير بمنتهى البرود المبالغ فيه .. قال للدكتور فوزى انت محتاج التخدير لمده كام دقيقه بعد كده .. الدكتور قاله مش ااقل من ساعه ونص .. قال طيب وحقن العيان حقنه ومشى من غير كلام.
ورجع الجو تانى للكلام عن على عبد الله صالح وعن رحله دكتور فوزى لانجلترا .. وعن المستشفيات فى السعوديه بتكون مجهزه ازاى .. وبين كل موضوع وموضوع .. خلى بالك يا د عصام .. انا هشد وانت ثبت المسمار دا فى العضمه دى .. او ناولينى لو سمحت اى حاجه بتستخدم فى العمليه .
اشوفكم بكره بقى :)

2011/06/04

مكان اخلو فيه


كل ما يجول فى خاطرى فى هذه الايام هو البحث عن مكان يخلو منها .. مكان لا توجد هى فيه ولا يحضرها لى خيالى .. فقط اريد الهدوء والجلوس مع نفسى .
لكن اين هذا المكان ؟

2011/06/02

الحياه صعبه :)


الحياه صعبه اوى
بس فيها ناس بيخلوك تعرف تشوفها جميله
عشان عنيهم بتبقى جميله
لما تلاقى حد منهم حافظ اوى عليه :)

2011/06/01

لا سعيدا لا حزينا


عارف لما تبقى فى البحر ولابس مايوه واسع اوى .. والمايه بتدخل جوه المايوه .. المايه بتاعه البحر دايما بتبقى دافيه .. عارف انت بقى الحاله دى ..وعارف التفكير او لحظه التأمل اللى بتجيلك ساعتها .. اهو دا الشعور اللى انا حاسس بيه طول اليوم .. كل حاجه مريت بيها النهارده كنت شايفها من بعيد وكأنى مش بطلها .. كنت بشوفها بعين شخص متأمل وهو قاعد فى البحر ولابس مايوه والمايه بتدخل جوه المايوه .. حاجات كنت عاوز اصورها واجى هنا بسرعه اكتبها .. وكل الحاجات اللى كانت موجوده فى الذاكره عندى كنت عاوز اخرجها وابروزها وارجع تانى اكتبها .
بس ساعه لما جيت اكتب لقتينى بسأل نفسى سؤال صعب .. سؤال هو اللى هيتوقف عليه انا هختار انى صوره من الصور دى واطبعها واحمضها واجى انشرها هنا ..هو انا دلوقتى سعيد ولا حزين ؟ بحب ولا مبحبش؟ محتاج اضحك ولا اعيط ؟
يمكن يكون السؤال سازج بس فى الحقيقه هو مش كده .. انا فعلا اكتر شعور اقدر اقول عنه انه مسيطر عليا هو شعور انى مش عارف هو فى ايه بقى؟
احيانا بحس شويه انى ندمان
طب عارف ايه اكتر حاجه دلوقتى ندمان انى معملتهاش .. انا كان نفسى اوى اخد رأى عمى الله يرحمه عن رأيه فى والد "ليلى " كنت محتاج اقوله انا خفت من ايه لما قابلته وكنت عاوزه يفكر معايا .. انا حاسس ان لسه كان فى كلام كتير بنا -انا وعمى- مخلصناهوش .. انا واحشنى اوى اننا نقعد نتكلم واخد رأيه بس فى كام موضوع
والحاجه التانيه اللى ندمان عليها اوى .. كان يوم اول عمليه عملها عمى .. كان على لسانى اقوله عمى انا بحبك اوى .. بس خفت يعيط لما اقوله كده .. وخفت يقلق .. كان بيعيط كتير اوى فى الايام الاخيره ..وانا كمان كانت دموعى على باب عينى فمرضش اقوله كده .. قلت هبقى اقولها لما يقوم بالسلامه .. انا ندمان اوى انى ملحقتش اقوله انى بحبه اوى .. تفتكر هو عارف انى كنت بحبه اوى ؟

كمان امبارح  اول مره اقول "لليلى" انى بحبها وابقى حاسس وانا بقولها ان فى حاجه غلط ..  اقل مره ابقى حاسس انى بحبها وانا بقولها.. مش عارف ليه ورغم ان دا مش منطقى ومفيش سبب مادى له بس انا بدأت احس ان فى حاجه غلط بعلاقتى بـ ليلى
بقيت حاسسها ابعد وانا كمان مبقتش متفهم حاجات كنت متفهمها زمان .. كمان بقى خلقى ضيق وبقيت بكره ان يبقى فى مشكله .. انا عموما بدأت احس ان خلقى بقى ضيق اوى وبدأت احس ان فى حاجات كتير مش عاوز فيها مشاكل وعاوزها تخلص بالشكل اللى انا عاوزه وخلاص.
ما كفايه كتابه كده النهارده ونكمل بكره احنا هنروح من بعض فين :)
البوستات الجايه غالبا هتمشى فى نفس الخط دا .. انا قلت انوه بس عشان انا عارف ان فى ناس مش بتحب البوستات اللى شبه دى .. فقلت اقولهم من الاول :)

2011/05/31

مش قادر اصبر لبكره


انا جاتلى دعوه على الفيس بوك لشهر كامل تدوين .. شهر كامل تكتب فيه كل يوم .. مش عارف ليه المره دى غير كل مره حاسس انى متحمس جدا للموضوع دا .. متحمس لدرجه انى مقدرتش انتظر للصبح لحد ما يبدأ المعاد الرسمى لانطلاق حمله تدوينه كل يوم .. رغم ان المره دى مفيش حاجات كتير ممكن يتكتب عنها.
الدراسه اللى كانت بتعمل اكشن وبتخرج مشاعر مختلفه ... الحمد لله خلصت على خير
البنت اللى كنت عاوز اتجوزها .. رحت لباباها وقالى خلينا نأجل الموضوع شويه لحد ما الظروف تكون واضحه 
عمى واحب شخص ليا فى الدنيا واللى كنت قلقان عليه عشان مرضه الاخير .. ربنا توفاه من ايام ومن ساعتها وانا حاسس زى ما اكون عيل صغير تاه من امه فى السوق .. عمال يدور فى كل الوشوش عن امه ويعيط ... بس برضه مشاعر القلق والاضطراب وعدم الاسقرار بقت مشاعر حزن عميق ومستمر... ربنا يرحمه يارب.
حتى الشغل مفيش فيه جو اكشن .. ربنا يسرلى بعياده صاحبها مسافر من سنه تقريبا وقالى اخد عيادته وادفع فلوسها من دخلها .. اه هى لسه فى البدايه ولسه بدفع فيها اكتر ما ما باخد منها .. بس هى حاجه مستقره انك فى بدايه حياتك تكون عندك عياتك الخاصه... بدل التنطيط فى المستوصفات الى اغلب الدكاتره بتعلمه بعد التخرج.
مفيش حاجه ممكن تكون مثيره للكتابه بالنسبالى فى الوقت دا ... حتى الكلام عن وضع البلد ملوش طعم دلوقتى .. كل الناس عماله تحلل وتنتقد ومحدش بيسمع حد .. مش ناقصانى انا كمان اقعد اكتب يعنى عن حال البلد.
ممكن الواحد يكتب مذكراته يوم 25 يناير او يوم 28 يناير جمعه الغضب وباقى ايام الثوره .. الحديث فى المواضيع دى هتبقى كأنى بقول انا بطل وشاركت فى الثوره وكل الاحداث اللى هتتحكى مش هيبقى ليها معنى غير كده .. رغم اننا كلنا عارفين ان مكنش فى الايام دى بطل .. البطل الوحيد كان كلنا مع بعض.
رغم كل اللى فوق دا انا متحمس جدا للكتابه .. اصل كل سطر من اللى فوق عشان يوصل للحاله دى مر بحاجات كتير واكشن كتير .. وكان نفسى اوى احكى عن كل حاجه فيها . كان نفسى اتكلم مع نفسى زى ما بعمل هنا .. اتكلم بصوت عالى وابقى عارف ان فى قلوب زى المرمر بتسمع.
عموما سيبكم من كل اللى فوق دا ونبدأ من بكره ان شاء الله :)

2011/05/20

نور


رغم انى بحب الحركه دى لما مخى بيعملها , بس المره دى انا منزعج منها ، بحب مخى لما بيضيف للاحداث الواقعيه شويه تفاصيل ويشيل منها شويه تفاصيل ، يعملها حكايه ممتعه احيانا ، حزينه ، او حتى مضحكه ، يقلبها بوست ويكتبها فى المدونه ، بعشق قلب الحياه لبوست ، وبحب مخى لما بيغير الواقع ويعيشنى الحاله اللى هو عاوزها ، بس المره دى انا نفسى اتغلبطت ، ايه الاحداث الواقعيه فى القصه وايه التفاصيل اللى اتضافت عليها عشان تبقى قصه .
نور؟ هو انا فعلا قابلت بنت اسمها نور؟ وفعلا بتشتغل صيدلانيه فى المستشفى عندنا؟ ونور دى عامله ازاى ؟ جميله؟ الجمال دا انا عارف انه من التفاصيل اللى مخى ممكن يكون اضافها بس الاكيد انها كانت جذابه ،، جذابه لدرجه انك تحس انكم اصدقاء من زماااااان. او تحس انكم لازم تبقوا اصدقاء .
هى نور فعلا شخص بجد؟ اللى فاكره والاكيد انه حصل انها كانت موجوده فى اجتماع الاطباء ، كانت مرحه ودمها خفيف بشكل يخليك تحس انك تعرفها من زمان ،، هو انا كنت اعرف نور من زمان ولا دى كانت اول مره فعلا اشوفها
يومها قلت لها متعرفيش مكان كافيه كويس؟ اصل دا اول يوم ليا فى المستشفى وعاوز اروح كافيه اشرب اى حاجه ؟ يومها ركبت معاها العربيه ،، ممتعه الرحله فى صحبه نور ، مضحكه الرحله فى صحبه نور ، بتقدر تخلى كل الكلام مبتسم وبيضحك، اول مره اشوف الكلام نفسه وهو بيضحك ، او ممكن متكونش دى الحقيقه ودى مجرد تفاصيل مخى ضافها لما قررت اكتب عنها.
يومها اتكلمنا عن اضراب الدكاتره ،، كنت رافض فكره اننا من حقنا نضرب ،، احنا زى الجيش وزى الشرطه مينفعش نضرب ،، نور احنا كان المفروض نكون اول ناس تقول احنا هنشتغل بنص الاجر عشان بلدنا ،، وهنوفر الامكانيات فى المستشفيات من نص اجرنا دا ، احنا كان لازم نكون اول ناس تقف مع البلد لحد ما البلد تقف على رجلها ، كانت عنيها بتلمع وانا متحمس فى شرح وجه نظرى ،، يمكن مكانتش بتلمع مش فاكر ،، بس الاكيد ان التفاصيل الصغيره دى هيكون فيها شويه تغييرات عن الحقيقه.
ويومها كمان سالتنى ؟ محمود انت بتحب؟ او حبيت قبل كده؟ .. رغم ان السؤال فى الطبيعى يخلينى استغرب انها تساله .. الا انى جاوبت وكأن دا الطبيعى انها تسأل .. نور عندها الملكه دى .. انها تخلى الحاجات اللى مش عاديه تبدو منطقيه جدا بالشكل دا  ، او يمكن انا كأنى كنت شايل جوايا حاجه وعاوز اطلعها

هى نور فعلا كده؟ ولا انا اللى قررت ارسمها هنا كده ؟ ولا انا اللى محتاج لوجودها كده فخليتها كده؟
بحب اوى لما حد ينادينى ويقولى " محمود" مبقتش بحب بطوط ، وبحس ان "دكتور" بتبقى رسميه اكتر من اللازم .. عشان كده كنت مبسوط لما سالتنى محمود انت حبيت قبل كده؟
يومها قلت لها يااااااااه يا نور .. انا مريت بتجربه زمان ايام الكليه رغم انها كان لازم تبقى تجربه مؤثره الا انها كانت تجربه انتهت يوم ما انتهت ... عارفه يا نور انها انتهت من غير ما تسيب اثر كبير وانا لحد دلوقتى مستغرب من دا.
ومريت بتجربه حديثه مش عارف انتهت على ايه .. اللى فاكره انى قابلت باباها وقالى انت استعجلت انتظر شويه.
يومها نور استغربت من رد باباها وقالتلى يعنى ايه استعجلت ؟؟.. ويومها حكيت لها تفاصيل اكتر .. من النادر انى احكى لاى حد تفاصيل اكتر .. بس نور بتعرف تخليك تعمل كده من غير ما تحس
يومها قالتلى محمود تحب تسمع الحقيقه من اختك؟... قلت لها اه احب ...قاتلى القصه دى خلاص انتهت بس انتوا مأجلين انكم تنجرحوا لبعدين .. ويومها انا سرحت فى معنى الجمله وبعدين نسيتها.
يوم ما نور جاتلى العياده كانت زياره غريبه .. اول حد اعرفه معرفه شخصيه يجى هنا ،، ويقولى الله عيادتك جميله ربنا يبارك لك فيها ويوسع رزقك وابقى افتكرنا ياعم.. مقدرتش تنسى حته المرح بتاعتها حتى وهى بتدعى .. هى نور عملت كده فعلا؟ هو اصلا فى حد اسمه نور انا اعرفه؟ ولا انا محتاج حد كده فرسمته وكتبت عنه وبحكى لكم عنه كأنه كان موجود فعلا ؟
فاكر انها قعدت على الكرسى وانى اشتغلت ليها سنه محتاجه تركب فوقها تركبيه ، وانتظرت يومها لحد ما اخدت لها المقاس وصبيت فيه الجبس .. انتظرت لحد ما نشف واخدته عشان هى اللى هتوديه للمعمل بنفسها
يومها اتكلمنا فى الاضراب برضه واتكلمنا فى هتعمل ايه مع باباها؟
معملتش حاجه يا نور كل حاجه زى ما هى .
صعبان على اوى انت يا محمود فى القصه دى ؟ البنوته كمان صعبانه عليا
عارفه يا نور  انا متأكد ان الدنيا هتبقى احسن ،،  .. على فكره انت بجد تستاهل من الدنيا كل خير والله يا محمود
عارفه كمان يا نور ايا كان انتى شخص بجد انا قابلته او رسمه رسمتها وعشت فيها بخيالى.. شكرا على الكام كلمه اللى قلتيها .. وشكرا على انك بتنادينى بمحمود .. انا كان واحشنى جدا محمود .

2011/02/15

ارجع لينا يا ريس


من وجه نظر مدون اصيل بيخاف على اللى بيكتبه .. وخصوصا لو المدون دا بيكتب كتابه ساخره ولو نسبيا  .. وبيختار صوره حصلت فى بلده ويفضل يضحك عليها .. حتى لو كان ضحك اسود.
احب اقول للريس بكل صدق ارجع يا ريس .. احنا أكلنا من وراك عيش كتير .. دا انا كنت اقرا عنوانين الاخبار بس يجييلى مليون فكره لمليون بوست مسخره.
يعنى انا عمرى ما هنسى مثلا الخبر اللى كان فى المصرى اليوم .. ايام انفلونزا الخنازير .. لما قالوا ان الحكومه بتجهز دلوقتى مقابر جماعيه فى الفيوم فى حاله انتشار الوباء .. والمشكله ان الخبر مكتوب بجد .. يعنى كوميديا الموقف مش افيهات ..خبر زى دا كان لازم يطلع تدوينه ساخره رائعه كتبت انا عنها.
يعنى لو مكنش ليك انجاز غير دا كان لازم تفضل.
دلوقتى يا ريس بعد ما انت مشيت هنكتب احنا ازاى؟
هه؟ قولى هنكتب ازاى؟ حكومتك الذكيه كان اكبر محفز لينا على الكتابه .. دلوقتى هناكل عيش منين ... يا ريس بجد احنا كنا بنهرج معاك انت قفشت ومشيت ليه؟
دا انا اغلب بوستاتى كنت انت الوحى ليها .. تقوم عشان قلنا ليك امشى .. تقفش وتزعل وتمشى؟
يا راجل دا احنا ال18 يوم اللى فاتوا والله كنا بنضحك ضحك السنين .. كل ما تبت انت فى الكرسى .. كل ما نلاقى تانى يوم فى التحرير افيهات جديده .. اول مره اشوف شعب بيعمل ثوره وهو فطسان من الضحك .. يوم الجمعه - جمعه الغضب - والامن عمال يرش علينا مايه ويهرينا ضرب بالقنابل المسيله للدموع .. والله فاتك المنظر .. وعنينا واجعانا وبنضحك ونقول .. احححححححح البتاعه دى بنت كلب بتوجع جدا.. وحياه امهم لنعدى برضه ...هيضرب يا رجاله اجروووووووا .. والكل يجرى وشويه وتلاقى واحد فطسان من الضحك .. ولا منظرنا واحنا بنجرى فى الاخر عشان نعدى اول كردون امن .. وكلنا بنقول احنا اخواتكم احنا اخواتكم .. اول ما عدينا فاتك انت اللحظه دى .. انفجرنا فى الضحك كلنا وبعدين حسينا اننا اقوى من اى حد ... ولا منظر الناس اللى بتفتى بقى فى الوقت دا .. شويه يقولوا نجرى لأدام وشويه يقولوا نجرى لورا .. ومره واحده تلاقى الناس كلها مش عارفه تتصرف وبترتجل منظر يضحك بعد ما تنتصر.. المايه والقنابل كانت بتوجع بس مكناش عارفين نمنع نفسنا نضحك .
واحد قلع التيشرت بتاعه ووقف ادام العربيه اللى كانت بتضرب قنابل مسله للدموع .. وقاله هوه دا كل اللى تقدر تعمل يا ***** اضرب يا بن **** وكل ما يضرب عليه قنبله يجرى عليها ويحدفها عليه ... وكل ما تيجى فى مكان صح يضحك .. ولما قاله ايه سفن ايه هو انت هتفضل تضرب طول اليوم .. كلنا فطسنا من الضحك.
يا ريس انت كنت مخلى الوضع مسخره والضحك على المسخره كنا اتعودنا عليه .
دلوقتى عمر طاهر ونواره نجم وبلال فضل وخالد كساب مش هيعروفا يضحكونا تانى
هيكتبوا ايه يضحك يعنى 
هيكتبوا خبر زى واحده معمول ليها علاج على نفقه الدوله .. وبعدين يطلع الواحده دى ماتت من عشر سنين والعمليه كانت زرع بروستاتا .. اسمها احسان والراجل كان بيحسب احسان اسم راجل 
الفساد كان بيطلع بوستات منتهى الروعه .. منتهى الضحك .. كده انت قطعت اكل عيشنا لما مشيت يا ريس
يعنى من دلوقتى مبقاش فى تلفزيون حكومى؟ ولا جرايد حكوميه؟ ولا تصريحات من وزرا .. 
اخص عليك
اخص عليك اخص
سؤال البوست احنا دلوقتى هنشتم مين وهنتريق على مين عشان انا مش عارف اكتب حاجه من يوم ما مشى؟

2011/01/22

بحبك يا ريس


يا ريس انا حبيت اكتبلك كلمه حب .. كلمه حب خاليه من النفاق ومن التزويق .. حب حقيقى وربنا الاعلم .. حب مش عشان الضربه الجويه ولا السياسات الرشيده ولا حتى حب عِشره ..  حب مش فردى دا حب بيشاركنى فيه مئات المصريين اللى بيركبوا المترو كل يوم .. مش حب عشان المترو انشأ فى عهدك يا ريس .. مش بقولك حب ملوش اى علاقه بالمصلحه .. لكنه حب نوع خاص.
عارف انت يا ريس شعور المواطن اللى ركب المترو من اى مكان .. والمترو زحمه موووووت .. ومن جواه قلبه بيدق وبيهتف باسم مبارك .. ايوه مبارك المحطه .. يووه قصدى محطه مبارك .. المحطه اللى هينزل فيها ناس كتير اوى زى ما يكون التتار نازلين من المترو ..وبالتالى احتمال كبير كرسى يفضى .. وبكده المواطن اللى واقف بقاله عشر محطات مثلا ورجله ورمت  بيستريح ويقعد بعد يوم تعب طويل .. عارف انت يا ريس لحظه ما بتظهر محطه مبارك .. الناس كلها بتفرح اوى ومن جوه قلبها بتحب مبارك .. المحطه.
سامع واحد بيقولى مهو يا فالح المترو بيرجع يتملى تانى فى نفس المحطه .. احب اقولك يا ريس والشهاده لله ودى سمعتها بودنى والله ... اول ما الناس نزلت من المترو والمترو فضى لمده ثوانى لحد ما الناس تركب .. اول ما فضى سمعت واحد بيقول ربنا يخليك يا مبارك .. واول ما اتملى تانى سمعته بيقول الله يخرب بيتك يا رمسيس**. .. الناس بقت تعشق مبارك المحطه (والانسان) .
تعرف يا ريس الناس مبتزعلش ان لو عدد المتروهات زاد واعطالها قلت ومواعيدها اتظبطت .. مش هيبقى فى زحمه فى مبارك قصدى فى محطه مبارك ..الناس بتنسى دا .. ومش بتفتكر غير انها اخيرا لقت كرسى تستريح عليه .. والكرسى دا لقته فين غير فى مبارك .
مره شفت واحد كان بيكلم حبيبته , خطبيته , اى حاجه فى التليفون .. وواضح انه كان نفسه يقولها انه بيحبها ..حس فى لحظه شوق وهو بيسمع صوتها انه عاوز يقولها بيحبها .. بس المترو كان زحمه وكان مكسوف يقولها كده ادام كل الناس .. سمعته يا ريس وهو بيقولها بحبك فى الكام ثانيه اللى وقف فيهم المترو فى محطتك .. وشفته بيبص على اسمك اللى مكتوب فى المحطه وبيتسم وكأنه بيقولك شكرا
متقلقش يا ريس .. الواحد دا مفكرش فى انه محتاج شغل بمرتب كويس عشان يعرف يتجوز البنت دى مفكرش فى العيش ولا فى السكر ولا فى اى حاجه غليت وصعّبت عليه المهمه وطولت عليه المشاور.. مفكرش انه محتاج يوفرلها حياه كريمه .. متخافش يا ريس هو مزعلش منك .. انا عارف ان كل اللى كان محتاجه انه يقولها بحبك ..وقالها فى مبارك  ثم هو الناس خدت ايه من الجواز ..كفايه اوى انه قالها بحبك وانه معرفش يقولها غير لما انت جيت .. ايوه مبارك المحطه

وفاكر شكلى انا وانا شايل البالطو الابيض كل يوم .. ورايح الكليه .. فاكر انى كنت بفرح اوى وانا بقعد فى محطه مبارك .. فاكر انى كنت بحب مبارك المحطه  .. عمرى ما فكرت انى هخرج من الكليه فاكتشف ان تلت تربع دول العالم عاوزانى اعمل معادله عشان مش معترفه بشهادتى ولا بوقوفى فى المترو كل يوم .. وحتى لو كنت فكرت فى دا برضه كنت هفرح بقعودى فى المترو كنت هحب اسمك كل اشوفه وربنا يبقى يحلها لما اتخرج

وبنات كتير فرحت لما جت مبارك المحطه .. كان فيه ولد قليل الادب بيتحرش بيها .. ولما جه مبارك المحطه اتخلصت منه ..اما انها نزلت او هو نزل .. وفرحت اوى لما جه اسمك .. فرحت فرح حقيقى .. ومفكرتش ان لو فى قانون الناس بتحترمه مكنش فى شخص تجرأ على كده .. مفكرتش غير فى ان حبها ليك زاد لانك خلصتها منه .. من غير ما تعمل حاجه .. غير انها جت فى مبارك المحطه.
وواحده ست اتخطف منها كيس فى مبارك والحرامى جرى .. ولقينا الست بتموت من الضحك .. الكيس مكنش فيه غير سندوتشات والحرامى فكر انه فيه فلوس لانه كان ملفوف بشكل يوحى انه فيه فلوس .. الضحكه دى مجتش غير فى مبارك ..وطبعا محدش فكر ان الحرامى دا كان ممكن يسرق حاجه بجد مستغل الزحمه الرهيبه والامن القليل .. الناس ضحكت وفرحت ودا محصلش غير فى مبارك
عارف يا ريس وانا راكب القطر ورايح اسكندريه .. كان جنبى شخص غلس جدا جدا .. كان نفسى جدا ينزل .. وخطر فى دماغى انى محتاج دلوقتى مبارك .. والوحيد اللى جه فى دماغى فى اللحظه دى .. قلت لو مبارك هنا كان احتمال كبير الراجل دا ينزل فى المحطه واستريح منه .. وتصدق وتؤمن بايه .. انه لما نزل فى طنطا كان نفسى يغيروا اسمها ويسموها مبارك .. عشان يفضل طول العمر مرتبط اسمك عندى بالراحه من اى شخص غلس يغلس عليا فى المواصلات.

فى مبارك مليون فرحه حصلت .. ومليون ضيق اتزال ..اه البلد حالها متعدلش .. لكن على الاقل الناس استريحت ولقت مكان تقعد فيه.
وعشان كده يا ريس حبيبت اقولك كلمه وفاء .. انا بحب مبارك .. مبارك المحطه
وكان نفسى أسألك مبارك المحطه تحب تقول ايه لمبارك الانسان :)
** محطه مبارك بتطل على ميدان رمسيس .. وعشان كده فى ناس بتسميها رمسيس

2011/01/13

سامح لكن لا تنسى


مأساه الكدب الكبيره مش فى انه بيضيع الحق .. الى بيكدب عليك بتخيل انه  واحد مطلع لسانه وبيقولك انت عبيط .. انا اقدر اقولك كلام مش حقيقى وانت تصدقه .. انا خليتك تثق فيا وانا مش أهل لدا .. واظن سبب اننا كلنا بنكره الكدب لاننا بنحب منظهرش بمظهر الغبى اللى صدق كلام مش حقيقى.
الكداب بيوصلك وبيوصل لنفسه رساله انه اذكى منك .. وانك غبى .. واظن ان دا هو الشعور المؤذى فى الكدب اكتر بكتير من كون الحق ضاع.
بس مين فينا مبيكدبش؟ .. انا نفسى بكدب على ماما فى اسعار الهدوم .. لانها  دايما بتقولى ان البياع ضحك عليا .. وحتى لما اشترى حاجه ماركه يعنى مفيش بياع يضحك ولا يحزنون.. برضه بتحسيسنى انى عبيط وبيضحك عليا .. عشان كده بكدب فى كل اسعار اى حاجه اشتريتها على ماما... بكدب عشان اقول لنفسى انك يا ماما مبتعرفش فى الاسعار .. والحاجه اللى فكراها ب 100 هى تمنها 500 دى الحقيقه .. بس بكتفى بالحقيقه دى لنفسى وبكدب اريح... لان الحقيقه هتزعلها.. بكدب لانى عملت اللى انا عاوزه فبلاش ازعلها طالما كده كده هعمل.

وبكدب لو اديتك معاد وبعدين اتاخرت .. لو قلتلى ادامك اد ايه هقولك سبع دقايق بالظبط ان شاء الله .. واكيد ساعتها هكون بكدب... بكدب ساعتها عشان اطمنك حتى لو بالكدب
بكدب فى حاجات كتير وبكدب كل يوم .. وكل شويه فى شخص بقوله انا اعرف اكتر منك .. او انا اذكى منك لانى قدرت اقنعك انى مش بكدب وقت ما كنت بكدب.
لكن لما هى كدبت عليا انزعجت ...السؤال الوحيد اللى نط ادامى ساعتها انا غبى فى ايه كمان؟ .. الكدب هنا مكنش مجرد احساس انى غبى .. الكدب هنا كان مؤشر بيقولك متثقش جدا فى الشخص اللى لازم تثق فيه جدا جدا جدا.
ممكن تكون الكدبه بيضا , وممكن تكون صغيره ..وممن يكون غرضها الوحيد انى مزعلش .. لكنها فى الاخر كدبه .. كدبه بتقول انى مش فاهم حاجات كتير .. وكدبه بتخلينى اسأل فى ايه تانى كدب شبه دى؟

كدبه تخليك تسال نفسك لاى مدى المفروض الثقه تكون موجوده .. وامتى لازم متعتدمش عليها ... لما اتفقت معها على كام موضوع .. وكنت متأكد انها بتنفذ الاتفاق بالحرف .. بس عشان هى قالت انها بتنفذه بالحرف ..وبعدين اكتشف انها حطت استثناءات للاتفاقات دى من غير ما ترجعلك .. استثناء يخلى الاتفاق كأنه مش موجود ساعتها السؤال الوحيد اللى بيجى فى دماغك فى ايه كمان؟ ايه اللى ممكن اكتشفه بعد كده .. ولاى مدى هى شيفانى غبى ..وهل انا عارف عنها فعلا كل حاجه ولا انا اغبى من كده.
لما قالت انها فعلا بتقلل صلتها بالناس اللى فى الشغل وبعدين تكتشف انهم بيشتغلوا مع بعض وبيقعدوا وقت الراحه ياكلوا مع بعض ويتكلموا فى كل حاجه بره الشغل ..وتكون الاجابه يعنى اكل لوحدى ؟ ساعتها بتسأل لما قالت لك انا بقلل علاقتى بالناس فى الشغل كان قصدها ايه؟
والعلاقه كان حجمها ايه لما تقل توصل لكده؟
الكدب بيولد الشك .. لانه بيقلل ثقه الواحد فى ذكائه وفى الطرف الاخر
عشان كده لو حد كدب عليك مره .. ولو مره واحده .. صدقنى هتكتشف بسهوله انها مش مره واحده وانها سلسله متعرفش انت فين اولها .. وهتفضل تايه لفتره طويله ومتشكك فى حاجات كتير.
بس حتى لو قبلت الاعتذار .. نصيحه منى ليك سامح .. بس اياك تنسى
سامح لان مفيش حد مبيغلطش .. وكمان الكدب كان بحسن نيه عشان انت لو عرفت الحقيقه كنت هتزعل اوى 
واياك تنسى ..لان مينفعش يتكرر الموقف دا تانى .. لو اتكرر يبقى اما توافق تعيش طول عمرك غبى .. واما تنسى انك شفتها احسن
وانصحك تكتب الكدبه الى حصلت فى مكان تشوفه كتير .. عشان تفضل فاكر انه مينفعش تنسى .. حتى لو سامحت

2011/01/08

بطوطوليكس ونظريه التمويه


البوست دا بوست سرى جدا  .. انا هكشف فيه عن وثائق مهمه جدا اخر حاجه .. انا هكشفهاا بس عشان حق القارئ فى المعرفه.
السر الخطير اللى عندى وثائق تثبته - رغم انه مش محتاج وثائق - ان مصر هتدخل فى حرب مع دوله كبيره جدا جدا جدا .. دوله جامده التنين .. وعشان كده مصر بتستعد جدا وبكل قوتها - فى السر طبعا - عشان تحارب الدوله دى.
حد يقولى يا عم انت بتهرج اكيد .. اقوله يبقى كده المخابرات المصريه انتصرت طالما انت مش مصدقنى
بص انت ركز معايا للاخر وانا هثبتلك ان كلامى صح.
فاكر انت فى حرب 73 لما كان جنودنا على القنال بالجلاليب , والسادات ادى لبعض الجنود اجازه لرحلات حج او عمره , وفى كل خطابات السادات اننا هنتجه للتنميه الداخليه ومش هنحارب .. فاكر انت كل التمويه دا؟ .. كانت فكره المخابرات المصريه انها تحسس اسرائيل اننا مش هنحارب .. وهوب عبرنا القناه
اهو دا بالظبط اللى مصر بتحاول تعمله دلوقتى .. طبعا انا معرفش اسم الدوله دى بس عشان التمويه جامد جدا المره دى فانا متأكد انها دوله جامده التنين.
انتوا فاكرين يعنى حوادث غرق العبارات , وموت السياح ,والقروش اللى فى شرم , والانفجارات الطائفيه , وكبت المعارضه , وتزوير الانتخابات , والوكسات الاقتصاديه , والوكسات فى التعليم , والصحه  دى بجد وحق حقيقى؟
احب اقولكم لا بالعكس .. ابسوليتلى .. احنا دوله جامده جدا جدا .. لكن بنعمل كل دا تمويه.. دا مجرد تمويه يا اخونا .. ما انتوا فاهمين المصرى معروف بجبروته.
يعنى لما يطلع وزير الماليه على التلفزيون المصرى واسمعه صدفه بيقول اننا فاضلنا تلاتين قرش بس ونبقى اعظم دوله فى العالم اقتصاديا .. الراجل دا مش بيكدب يا اخونا .. دا بيقول الحقيقه .. بس عشان مخابرتنا اقوى مخلينا مش حاسين بدا .. عشان التمويه ينجح.
عشان كده الراجل دا لما كان بيتكلم على دعم الدوله للصحه وان العلاج فى المستشفيات الحكوميه هيفضل ببلاش .. وبعدها بيومين بالعدد والله الاقى الاسعار فى المستشفى اللى بشتغل فيها - الحكوميه - سعر العلاج الاقتصادى فيها يزيد للضعف والله مره واحده .. يبقى العيب مش فى الراجل ابدا ..دا كله تمويه يا اخونا

يعنى لما يطلع مسئول ويبان عبيط واهبل وهو بيقول الانفجار حصل بين جامع وكنيسه يعنى الهدف منه مش النصارى الهدف منه مصر كلها .. ويسيبه من الاسباب ومن علاج المشكله لو كان فى مشكله ويفضل يغنى تحيا مصر .. وينسى خالص ان الانفجار كان وقت القداس وان مفيش مسلم بيروح يصلى فى الجامع الساعه 12 بليل .. يبقى المسئول دا قاصد يظهر عبيط واهبل ..عشان الدوله الجامده اللى هنحاربها تحس ان المسئولين عندنا عبط وهبل فميخافوش منهم ... تمويه يعنى مش اكتر.

لما يبقى وظيفه وزير الصحه انه يعد الموتى والقتلى بس .. يعنى ايام انفلزنزا الخنازير كل اللى كان بيعمله يطلع يقولك مات كام واحد النهارده .. يبقى مقصود والغرض منه التمويه مش اكتر .. واساسا اساسا محدش بيموت ولا حاجه الناس دى بتمثل عشان العدو يبلع الطعم .. تمويه مش اكتر.

ولما يبقى وزير الداخليه لسه وزير بعد التزوير فى الانتخابات , وبعد الاحداث الطائفيه الاخيره , وبعد التعذيب فى السجون .. يبقى الناس اللى بيقولوا بتتعذب مش بتتعذب ولا حاجه دول بيمثلوا عشان التمويه مش اكتر.. ودا ينطبق برضه على الانفجارات.
ولما بيموتوا من التعذيب مش بيكونوا ماتوا ولا حاجه .. دى الحكومه بتسكنهم فى قصر جامد جدا فى حته سريه .. بتأكلهم ما لذ وطاب وهم راضيين وموافقين عشان التمويه ينجح 

مصيبه سوده لتكونوا فاكرين  ان الريس بتاعنا عجز فعلا وبقى شكله كبير جدا .. يا اخونا هو عامل شكله كده بس عشان التمويه .. والله انتوا ظالمين وربنا هيعمل فيكم كتير ..اخص عليكم بجد.
يعنى بذمتكم فى دوله فى العالم بيدخل فيها وزراء مجلس الشعب؟ .. وتبقى مش عارف وظيفه مجلس الشعب انه يراقب الوزير دا .. ووظيفه الوزير فى المجلس انه يراقب الباقى ولا مين بيضرب مين؟ .. لكن لما تفهم ان دا كله تمويه هتستريح والله
يا اخونا مصر لسه بخير .. بس كل اللى بيحصل تمويه مش اكتر .. صدقونى  .. والمسئولين اللى بيبانوا عبط وهبل دول للتمويه مش اكتر .. والمسئولين اللى بيطلعوا يقولوا اننا احسن دوله فى العالم دول بيقولوا الحقيقه بس المخابرات لسه مقالتش ليهم اننا داخلين حرب مع دوله جامده الاخطبوط فلازم يموهوا 
طب اقعدوا فكروا كده بينكم وبين نفسكم هتلاقوا الاستهبال اللى حاصل فى البلد دا اكيد يعنى معمول قصد وله حكمه .. ومفيش حكمه اكبر من انه تمويه واننا داخلين حرب جامده جدا ومحتاجين التمويه دا .

انا قلت انوركم على الحقيقه دى .. وطبعا مجبتش كل الحاجات اللى ممكن تتفهم فى ضوء نظريه التمويه دى لكن البركه فى ذكائكم بقى .. عشان الناس اللى بدأت تفقد الامل .. ترجع تانى تثق فى اننا دوله جامده جدا اخر حاجه .. وكل اللى بيشوفوه دا تمويه مش اكتر .. مش بقولكم داخلين حرب جامده جدا :)