2011/06/05

فى اوضه العمليات ..العيان بيصحى


اول مره فى حياتى النهارده ادخل عمليه جراحيه .. عمليه جراحيه بجد .. فى اوضه عمليات وعشان تدخل لازم تبقى معقم كليا من فوقك لتحتك .. 
وأحب اقول بعد اول مره .. ان اول مره دى ليها رهبه لأقصى درجه بس برضه ليها متعه.
العمليه كانت كسور فى الجمجمه .. تقريبا كل عضم الجمجمه كان مفكك .. كنت متابع الحاله من اولها ..من اول الاشاعات لحد ما دخل العيان العمليات.
بالمناسبه جراحات الوجه والفكين اللى بيقوم بيها دكتور اسنان مش دكتور بشرى .. بس دكتور اسنان محضر دكتوراه فى جراحه الوجه والفكين .. يعنى اى كسور فى عضم الوجه دا تخصص دكتور السنان مش دكاتره بشرى.
والنهارده كان بالنسبالى فرصه الدخول فى عالم الجراحه .. وبعتبر ان دى احسن حاجه فى امتياز .. ان غالبا بيكون متاح ليك فيها انك تلف وتستمع بكل الاقسام .
اول ما دخلت اوضه العمليات لاول مره وبعد ما العيان خد بنج .. حسيت برهبه .. العيان وهو فى البنج كأنه ميت بالظبط .. وبعدها دخل الدكتور بمشرط عشان يفتح فتحات فى الوش ومنها يدخل يثبت العضم المكسور بشرائح فى الوش وبمسامير.. اول مره اشوف الدرل ( الشنيور ) وهو بيخرم اماكن للمسامسير عشان يربط بيها الشرايح .. تحس انك شغال فى خشبه مش فى انسان .. اصلا اول ما العمليه بتدأ بتروح الرهبه تماما.
يرجع تانى الرعب ودكتور فوزى عمال يعلى صوته باقصى درجه .. العيان بيصحى  .. العيان بيصحى .. نادوا دكتور التخدير.
ساعتها تخيلت العيان وهو قايم ووشه كله دم ومتشرح تقريبا .. وبيقول يا ولاد التييييييييت بتعملوا ايه 
كنت دايما بعتقد ان الدكاتره فى العميات بيكونوا على اعصابهم جامد وفى قمه تركيزهم .. متوقعتش ابدا انهم بيتكلموا فى التليفون عادى .. وبيقولوا لبعض وقف الشغل ثوانى عاوز اشرب مثلا  .. او اى كلام فى التليفون .
عمى لما كنت بتصل بيه ويقولى اقفل بسرعه عشان انا فى عمليه وهرجع اتعقم تانى بسبب اتصالك دا .. مكنتش بصدقه اوى اصلا .. كنت بفتكره يقصد انه داخل على عمليه مش فى عمليه بجد يعنى والعين ادامه مفتوح وشه او بطنه.
الدكاتره بيبقوا جوه العمليه بيس وكووول لاقصى درجه وكأنهم مثلا بيلعبوا جيمز .. والجو مش بيقى اكشن ومتوتر ولا اى حاجه ..بالعكس بيبقوا بيهزروا وبيتكلموا فى السياسيه وهم شغالين .. وبين كل كلمه وكلمه ممكن حد فيهم يوجه التانى انه ياخد باله مثلا من العصب الفلانى عشان ميتقطعش .. ياخد باله عشان يثبت العضمه الفلانيه فى المكان الصح . كأنهم بيحشوا ضرس مثلا مش اكتر.
مكملتش بقى حكايه العيان بيصحى.. دى كانت اللحظه الاكشن الوحيده .. بعدها جه دكتور التخدير بمنتهى البرود المبالغ فيه .. قال للدكتور فوزى انت محتاج التخدير لمده كام دقيقه بعد كده .. الدكتور قاله مش ااقل من ساعه ونص .. قال طيب وحقن العيان حقنه ومشى من غير كلام.
ورجع الجو تانى للكلام عن على عبد الله صالح وعن رحله دكتور فوزى لانجلترا .. وعن المستشفيات فى السعوديه بتكون مجهزه ازاى .. وبين كل موضوع وموضوع .. خلى بالك يا د عصام .. انا هشد وانت ثبت المسمار دا فى العضمه دى .. او ناولينى لو سمحت اى حاجه بتستخدم فى العمليه .
اشوفكم بكره بقى :)

هناك 5 تعليقات:

فراشة يقول...

يا ربنا ... المريض بيفوق افتكرت مشهد من مسلسل أجنبي برضه المريض كان بيفوق كده ف وسط العمليه

ربنا يعافينا يارب

ويشفي المريض ده يارب


ربنا يوفقك يا دكتور وتبقى دكتور شطور كده انت اللي بتعمل العمليات الصعبة دي بنفسك :)

بسنت يقول...

مش عارفه حاليا بعد الخبره فى المجال الطبى والشغل مع الدكاتره بشوفهم خاصه الجراحين زى الجزارين مش شايفه اى انسانيه الحقيقه يعنى لما بتقول بيتعاملوا مع خشبه اعتقد قصدك فى ورشه
حتى الحساب بيكون بالقطعه عمليه تجاريه بحته مش الكل طبعا بس السائد
المهنه دى عايزه ثوره بردوا
اما فى الاسنان فربنا يوفقك وتفضل على انسانيتك

غير معرف يقول...

لا ازاى
الجراحين مش جزارين
كل ما فى الامر ان الجو اللى ممكن مرعب لبعض الناس بقى روتين حياتهم
لكن الجراح مهما كان ثابت وهادى ويبان انه مش مهتم فى العملية بيبقى اكتر حد شايل هم العيان اثناء وبعد العملية
واكتر حد بيتعب جدا لو حصلت اى مضاعفات
ومن كتر الضغط النفسى اللى بيعيشوا فيه هما اكتر ناس بيعانوا من امراض الضغط والسكر والجلطات

احساس طفلة محبة للرومانسية بس واقعية يقول...

منتهى الرعب بجد
عشان كدا انا بقول الحمد لله ان ربنا مدى بعض الناس القدرة على تحمل منظر الدم والجروح والتعامل معاها عشان نقدر نعيش بس دا ميمنعش انى مستغربة لانها توصل للمريض بيفوق انا لو هناك كان زمانى موت رعب ان تبقى حياة انسان فى ايدك وانت تروح تشرب و تهزر لا يمكن مهما كان التوتر النفسى اللى عايزين يخرجوا منه ميبقاش فى وضع زى دا

دمت بكل خير
وبالتوفيق ان شاء الله

غير معرف يقول...

مش مصدقه...
على فكره قريت البلوجات كلهاوعجبتنى فكره التدوين والتدوينات بس للاسف كسلت ارد على كل بلوج لوحده..وبعد ماقريت لسه برده مش مصدقه جو العمليه..حتى لو مفيش توتر على الاقل فى تركيز غير عادى.
روز