يا ولاد المحظوظين

محدش يستغرب فعلا انتوا ولاد محظوظين وعشان الكلام يكون دقيق
الناس الى فوق 30 سنه محظوظين والى اقل من كده باهبهينهم - ايوه إلى على وزن ماهمهينهم -هم الى محظوظين
حد يسألى ليه ؟؟
هقولكم طب ما تسألوا اباهتكم هو انا الى محظوظ ولا هم؟؟؟!! اما انتوا غراب اوى!!!!
بصوا عشان موجعش دماغمكم فى ليله اكثر جمالا من هذه - يا فرجينيا - من واحد وعشرين سنه الا يوم حصل حدث غير مسار التاريخ
-حدث ولم يعد.
فى الليله دى من واحد وعشرين سنه ابويه بقا عنده ابوشن جديد .. اه والنعمه ابويه بقى عنده اوبشن جديد ..
اوبشن انه يتقال له يا ابو محمود - اظن اوبشن جامد - طبعا هو متقلوش يا ابو محمود خالص لانى مش الكبير بس برضه بقى عنده الاوبشن يستغله بقى ميستغولش هو حر محدش شريكه
طبعا امى برضه بقى عندها الاوبشن ده - مش عايز ذكاء
طب ابى بقى عنده الاوبشن ده ايه علاقه ان بهباهتكم محظوظين او محظوظات - مذكر ومؤنث سالم - حد يقول مش سالم انا مليش دعوه؟؟
العلاقه وطيده عزيزى المدون عزيزتى المدونه .. فهم بالطبع محظوظين عشان عاشوا الليله -الاكتر جمالا يا فرجينيا عليك نور-الى اتولدت فيها
اى نعم هم مشافونيش -وده يقلل من كميه الحظ الى بيتمتعوا بها -انما برضه على كل حال فهم برضه محظوظين
حاولوا ان تسرحوا لتتخيلوا معى هذه الليله كيف كانت؟؟
الساعه 12 بليل - اصلى بحب السهر - بدأت اصرخ وااااااء واااااااااء
تخيلوا شكل القمر وكيف ارتسمت على وجهه ابتسامه الفرح - الظاهر كان شمتان فى عشان بعيط - وشكل النجوم التى اخذت ترقص وترقص وترقص لحد ما وقعت مغمى عليها
تخيلوا شكل السحاب وهو عمال يعمل حاجات كده ملهاش معنى - الظاهر بيغلس على النجوم - بس شكله حلوووو اوى
تخيلوا حاجات كتييييييير اوى حلوه فقد تم اضافه بطوط جديد للعائله
انتوا طبعا معشتوش اليوم ده انما اسألوا اهاليكم هيحكيلوكم حاجات غريبه جدا حصلت فى اليوم ..
كل ده مش مهم انا قلت عشان الجيل ده ميحقدش على الجيل الى فات فانا قررت اقولكم خبر اكسكلوسف حصريا مش هتلاقوه غير هنا

احم احم
امممممممممم وكمان احم احم
اصلى محرج
طب اخر احم احم
خلاص انا هرفع الوصايه .. اوعى حد يقول ياكوتوموتو وانت لسه تحت الوصايه .. هقوله لأ انت مش فاهم .. اه انا لسه تحت الوصايه ههههههههههه اكدب؟؟!!
بس بصوا للجزء المليان من الكوبايه انا دلوقتى اقدر اتحكم فى فلوسى واموالى ومجوهراتى ودهبى وياقوتى ومرجانى ..
دلوقتى اقدر اتحكم فى عزبى واطيانى .. خلاص بقيت حر - واقدس الحياه الزوجيه واشارك فى الاثاث - يعنى محدش يقدر يتحكم فيا تانى
خلاص زمن الى فات فات من هنا ورايح فى بطوط جديد
لما اعوز فلوس بدل ما كنت بقول لامى عايز فلوس دلوقتى خلاص .. هفتح الباب بغضب واقولها بصوت عالى لو سمحت يا ماما من فضلك هاتى اى شئ لله دا انا غلبان.

يعنى دلوقتى اقدر اقول بقلب جامد انى هبدا انظر لطلبات البنات -الكتير اوى - الى عايزنى اجوزهم يعنى خلاص الى عنده قريبه او واحده بيعزها اوى يقدر يتقدم الان بطلب وانا هبدأ انظر له عشان اختار شريكه حياتى الى هتشاركنى فى ال - لا مش الدهب والياقوت - هتشاركنى فى ال احمدك يااااااااارب

بيض بالجنبه القريش

كااااااااااان يا ما كااااااااااااان زماااااااااااااااااان يجى من اكتر من عشر سنين وفى تمام الساعه السادسه صباحا كل يوم

كنت انا تقريبا فى رابعه ابتدائى عندما قرر ابى انه مش هيسافر تانى وانه هيفضل معانا احنا كبرنا خلاص ومحتاجين ابونا يبقى جنبنا

امممممممممممممممم ندخل بقى فى الموضوع

محمود اصحى يا حبيبى

حاضر يا بابا

هه ياله يا حبيبى اصحى

حاضر انا هصحى اهو يبدأ فى اللعب فى راسى

يالهه يا حبيبى اصحى ............

اقول فى نفسى ( مهو هيفضل يصحى فيا لحد ما اقوم مهو مش زى مااما شويه وهتزهق امرى لله اصحى)

اصحى فأجد اختى واخويه كلهم صاحيين ونبدأ الحفله

ابى بصوت بين العالى والنص نص يقووول ياله يا ماما هاتى الفطار

ولان امى اساسا مش معودنا على الفطار فكنا مش بنفطر انما ابى راسه والف سيف لازم العيال تفطر كل يوم وتصحى بدرى ولان احنا بنحب البيض فقرر ابى اننا نفطر بيض بس بالجنبه القريش عشان معذى

والنبى يا بابا بلاش تحط جبنه عليه

ازاى هوه البيض يبقى بيض من غير جبنه

ربنا يخليك مش بنحبه

هتحبوه ده طعمه حلو اوى

وندخل بسرعه المطبخ لنلحق كام لقمه بيض قبل ما تتحط الجبنه عليه

واخيرا يصل طبق الجبنه وطبق البيض ليبدأ ابى فى خلط الاتنين على بعض

تصرخ اختى مش هفطر

يقولها ابى لا يا حبيبتى بابا يزعل ومفيش عندنا حد يغضب على الاكل

نسمى الله ونعصر على نفسنا لمونه وناكل وامرنا لله عشان بابا ميزعلش
..

.

.

.

.

.
بعد عشر سنوات من القصه دى كان ابى توفى من ثمانى سنوات ..وتم الغاء وجبه الفطار ثانيه .. وتم الغاء وجبه الجنبه بالبيض لكن ظللت انا احب الاستيقاظ مبكرا ... احب المذاكره فى نفس الوقت الذى كان يحبه ابى

.

.

.

فى صباح قريب جدا قلت ما اعمل لنفسى فطار قمت وجهزت البيض وعملت فطار وبعد لقمه او اتنين قلت ما احط عليه جبنه الله البيض بالجبنه ده طعمه حلو اوى ..ازاى مكنتش اعرف قيمته؟؟!! ...ازاى كنت برفض اكله ..دا انا كنت غبى اوى؟؟!! ..

دا الذ اكله فى الدنيا

دى الوجبه دى موجوده فى كل مواقع الجيم

وكمان فى المواقع الطبيه الاستفاده من الكاليسيوم والبروتين الى فالبيض لا يتم باحسن احواله الا اذا اضفنا عليها كميه من الجبنه القريش

الله يرحمك يا بابا يا ترى فى ايه تانى مكنتش اعرف قيمته ؟؟؟؟؟؟؟؟؟؟؟؟؟؟

متنسوش تقولى رايكم فى التصويت الى فى الجنب ... انتوا عارفين ان انا متواضع ومحبتش اشكر فى المدونه هسيبكم انتم تشكروا فيها

اهم حاجه العملى!!!!!!

لو ليك ابن او اخ او قريب حتى لو من بعيد وبعيد جداااااااا فى طب اسنان..وعرفت انه بيشرب سجاير , حشيش , بانجو , او حتى بيشم صوابعه رجله... ولا يهمك كل ده ممكن يتعالج وممكن يتصلح ... انما لو سمعته - حتى لو فلته لسان- بيقولك الجمله السحريه دى " اهم حاجه العملى" هنا تحدث الطامه الكبرى...هنا لابد من وقفه - ايوه الى هى دى- هنا لابد ان نتأخذ اجراءات وقائيه - والوقايه خير من العلاج- لتفادى الفضيحه ام جلاجل والجرسه ام حناجل - معرفش مين حناجل وجلاجل دول ويستحسن متحاولش تعرف -

.اذا عرفت ان ابنك - او اى حد من مكتوبين فوق بالاحمر -له اصحاب كتير بيتكلم معاهم بالساعات فى التليفون

فاعلم ان هذا المدعو -ايوه المكتوب بالاحمر- يكرر هذه الجمله معهم طواااال المكالمه -اهم حاجه العملى- اذا لابد من قطع خط الهاتف وعدم شحن الموبايل ويفضل انك تشترى جهاز يشتت الشبكه كلها او تعمل له عمليه جراحيه يفقد بعدها النطق

اما لو كان - عم الاحمر ده - بيروح الكليه كل يوم بدرى... فده لان السكاشن بتكون بدرى والمحروس اهم حاجه عنده العملى...

لو بيروح يجيب سنان مخلوعه من دكاتره السنان يبقى المحروس ال ايه مهتم بالعملى

هنا لابد من وقفه - ايوه زى الى فاتت بالظبط- لان الواد بيضيع منك لتلحقه لا متلحقوش ...

وحكايه اهم حاجه العملى دى حكايه مهمه لازم وحتما ولابد تتناقش فى مجلس الشعب - طلبه اسنان هيضيعوا - فمن مكانى هذا اوجه عنايه المسئولين - والغير مسئولين -عن هذه الجريمه التى تحدث لطلبه اسنان مصر بلا رقيب ولا حسيب

الموضوع ببساطه انك تلاقى كل الكليه - طبعا انا اقصد الناس الحلوه بس - تقعد تقول اهم حاجه العملى و تييييييييييييت فى النظرى - الرقابه هى الى حذفت - وفى الاخر انت هتشتغل بايدك , .. والى فى الكتاب هيتلم فى اخر ليله.. كل ده مش مشكله المشكله ان اخر ليله بتجى واليكم ما يحدث فيها...

تجد نفسك من الاخر مش عارف حاجه خالص تنفع تتكتب بكره..

تقعد تندب وتروح للاصحابك

هاااااا يا عيال هنعمل ايه؟؟؟

والله يا بطوط احنا بنقول نأجل الامتحان

يا نهار نأجل لا يا عيال احنا ندخل نكتب اى حاجه

اى حاجه ايه يامان انت عارف حاجه؟؟؟

مش النظرى قريب من العملى

هههههههههههههههههههههه انت شفت الكتاب فيه ايه؟؟؟

لأ ..( يدونى الكتاب )

يا نهااااااااااااااااااااااااار وبعدين يا عيال

ليكرروا يا عم خلاص مش انت ايدك حلوه - ومحدش يفهم غلط بايدك حلوه دى - فى الشغل خلاص بقى طنش اهم حاجه العملى

احيانا تسمع كلامهم وتأجل.. وده اما انه ربنا سترها معاه ويعدى بيها - او يمتحنها فى الصيف هو ونصيبه بقى -..... واما يقع فى شر اعماله ويشيل غيرها وغيرها فيقعد بيهم ..

واحيانا تقول لأ... انا هسهر اذاكر واروح امتحن اكيد هكتب اى كلام حتى مهو النظرى ايه غير الى بنعمله فى العملى!!!!!!!

....تروح الامتحان تلاقى الكلام غريب لا هو عربى ولا هو انجليزى ...... الظاهر والله اعلم انه لغه لسه مكتشوفهاش....

لتجد نفسك ماسك نفسك بالعافيه انك تضحك - والله بالعافيه فعلا - وتظل تدعى ان ينتهى نص الوقت عشان تخلص من ام الورقه الى ملهاش لزمه الى ادهوالك ال ايه ورقه اجابه طب هة فين الاجابه؟؟؟!!!!!!

هنا تبدأ تنتقم من دكتور الماده - وهو بصراحه يستاهل - فتظل تكتب له وتكتب له وتكتب له ما قد يسبب له جلطه او شلل رعاش.....

يسول لك خيالك المريض انك انتقمت منه ... ليبدأ هو فى الانتقام منك - اثناء تصيح الورقه بتاعتك -ويضع لك الصفر الكبير الامور العسول - ده الصفر مش الدكتور.

يا ريت ع اد كده دا بعد كده هتروح لتواجه الدكتور فى عقر داره - مكتبه - ليبدا معك الشفوى اجمد حاجه بقى انهم دلوقتى بيعملوا حركه جامده موووووت - بس محلصلتش معايا الحمد لله- انه يجيب لك ورقه اجابتك فى الشفوى.

عشان يفضل جريمتك تطاردك لاخر لحظه

وفى الشفوى مش هقدر اوصف الى بيحصل بس لو قلت بيتمسح بيك البلاط وبعدين يتزعف بيك السقف وبعدين يتكنس بيك المدخل واحيانا السلالم - هبقى اكتب بوست منفصل عنه - وانت تفضل مصمم ان اهم حاجه العملى
كل الى عملوه فيك ده وانت برضه مصر على ان اهم حاجه العملى

عزيزى ابو -او قريب الاحمر الى فوق - اذا كنت عايز ابنك او - الاحمر الى فوق - ميخدش دبلوم اسنان وياخد بكاليريوس اسنان قله سيبك من التأجيل والعملى زى النظرى - زى ماقالت سعاد حسنى - العملى زى النظرى مهش كماله درجات
ومن مكانى هذا انصح كل شاب - ومش كل فتاه على اساس انهم مش محتاجين - الاهتمام بالعملى لوحده لا يفيد والتأجيل بيودى فى ستين داهيه - واسأل مجرب- وقوم ذاكر بدل ما انت قاعد ع النت

اللعب لا يفيد لا يفيد لايفيد - واسال مجرب - كفايه انك لو سقطت هتأجل جوازك سنه فاهم يعنى ايه تاجل جوازك سنه كان الله فى عونك ياعنى

ملى!

أيوه يعنى ايه حضرتك

من أول إمبارح وأنا قاعد أسأل نفسي سؤال بديهي جدا إنما مش لاقى له أجابه مقنعه خالص ..

رغم بساطه السؤال ورغم إنى قريت مليون موضوع بيتكلم عنه بطريقه لا تقل بساطه عن الطريقة إلى هتكلم بيها ..

والى متوقع بالطبع التعليقات إلى هتيجى وهكتبها ليكم قبل ما أقوم أمشى بس مش خسرانين حاجه اهو نقول إلى نفسنا فيه ورزقي ورزقكم على الله ..

الموضوع ببساطه يعنى إيه أنا بحب امى وأخويه واختى والعيال اصحابى ؟؟..أه.. يعنى إيه تعريف الحب ده ؟؟يعنى امتى أقول إننى بحب امى وامتى أقول إنى مش بحبها ؟؟..ولا أقولك بلاش امى عشان السؤال مش هيبقى واضح أوى ..

إنما يعنى إيه بحب أخويه أو اختى أو حد من اصحابى؟؟؟انا قاعد أفكر في السؤال ده رغم اعترافي بغباءه بس هيبان فى الأخر إيه مغزاه ...الاجابه إلى وصلت ليها ان الحب "هو اشتغاله يشتغل بيها الإنسان نفسه ..ويظل يشتغل نفسه ..ويشتغل نفسه لحد ما هي تشتغل لوحدها لدرجه انه لما بيحب يبطل مش بيعرف"..وبعدين قلت لنفسي يا عم أنت ..لأ الحب حاجه تانيه غير كده ..

الحب هو" انك تهتم بحد لما يجرى له حاجه تبقى أنت إلى تعبان ومش طايق نفسك وتفضل كده لحد لما يبقى كويس "

وبعدين قلت طب نسقط الكلام ده على الواقع لما أخويه يعنى يتعب ببقي عايزه يخف وببقي بدعي له في الصلاة وكده .. بس أنا فاكر إنى كنت قاعد من زمايل لي في شقه , ومكناش لسه أصحاب أوى , المهم واحد زميلنا تعب , أنا فاكر إننا غيرنا مواعيد مذاكرتنا كلنا عشان نصحيه ياخد الدوا في معاده , وكنا نرجع بسرعة من الكلية ونعمل حسابنا نجيب له الأكل معنا , كلنا مسافرناش يوم الجمعة عشان نفضل قاعدين معاه لأنه مش هيعرف يسافر لوحده,دا غير الفتاوى إلى قعدنا نفتيها له في شرا ادويه واتخرب بتنا كلنا في الشهر ده شرا دوا له , وكلنا عملنا كده رغم إننا مكناش أصحاب أوى ساعتها -طبعا دلوقتى أصحاب جامد..

يبقى تفسير ده إننا بنعمل كده عشان إحنا بنى ادمين وده شئ جوانا ومش دليل على الحب ولا يحزنون يبقى أكيد فى تعريف تإنى للحب اوتعترفوا إن تعريف الاشتغاله ده تعريف كويس..

طب نيجى للموضوع المتفرع من ده.. يعنى إيه بحب واحده أه حب بين ولد وبنت ؟؟يعنى عاجبنى شكلها وشخصيتها وحصل بنا كميا؟؟اكاد احلف بالمصحف إنى لما كنت زمان بكلم بنات معظمهم عجبنى شكلهم وشخصيتهم وحصل بنا كميا وطبعا حسيت إنى بحبهم بس واحده بس إلى قدرت اشتغل نفسي وأقول إنى بحبها وعشان كده رحت قلتله اوأظن ابسط دليل على ده انك تلاقى ولد أو بنت يقولك أنا مش عارف أنا بحب مين فيهم ..

ممكن يكون تعريفه "انك كل ما تشوف الشخص ده- الى مفروض انك بتحبه - بتبقى مستريح ومش عايز تمشى" , طبعا التعريف ده مش شغال مع أخويه لإنى نفسي يقوم ينام دلوقتى لإنى مخنوق منه ولا هينطبق على ناس كتير جدااااااااا بحس انه مش وقتهم وطبعا التعريف ده مش هينفع مع علاقة البنات مع الولد سواء كانت صداقه - بغض النظر حرام ولا حلال ولا بعض النظر ليه مهو الكل عارف أنها مش حلال يعنى - أو حب (خروج وكلام ) يعنى ده إلى حلال - ههههههههههههههه - مش من أبو إلى في القلب في القلب..

اقصد إن اى ولد هيقعد مع اى بنت - باستثناء البنات الغلسه - مش هيبقى عايز يقوم بغض النظر عن هو بيحبها ولا خلينا أصحاب أحسن..

في تعريف تإنى "هو انك تبقى مهتم بحد وتفضل تفكر فيه"..

هقولكم على حاجه عملتها قبل كده اشتغلت اصحابى لمده شهر أو اكتر وقلت إنى خطبت وفضلت أحكى لهم عن إلى بيحصل بيني وبين بسمه خطيبتي والى اضطريت اسميها بسمه لإنى كتبت ع الدبلة " م محمود ب بطوط" فكان لازم اختار اسم بنت بحرف الباء رغم إنى معرفش حد خالص اسمه بسمه من كتر ما حكيت عنها وكنت مشغول بيها وأنا لوحدى عشان أقول لهم تإنى يوم إلى حصل حبيت بسمه فعلا محدش يسأل مين بسمه لأنها ملهاش وجود خالص مالص دى كانت كدبه بس لانى فضلت مهتم بيها وبحكاويها حبتها

أكيد فى تعريف أنا مش عارفه كويس ويمكن أنا بخلط بين كل أنواع الحب عشان عايز اطلع تعريف جامع مانع لا يصد ولا يرد وعلى أساسه ممكن احدد ......... حد هيقولى طب إيه الفايده من تحديد تعريف للحب..... لا..... هالفرق كبير جدا

• 
  
  لو طلع الحب حاجه مش بأدينا الواحد يفقد الأمل انه ينسى إلى بيحبه..


• 
  
  ولو طلع اشتغاله الواحد يعرف انه بيشتغل نفسه ويبطل يعيش الدور..


• 
  
  ولو طلع اى حاجه تانيه الواحد يحدد لنفسه علاج على أساس ده..

----------------------------------

التعليقات هتيجى كتالي

• 
  
  الحب يا محمود حاجه مستحيل تتوصف ترر را رااااااااااااا


• 
  
  الحب يا دكتور عباره عن كميا مش ممكن نوصفها انما ممكن نحسها وهرد عليه واقوله ايوه حضرتك يعنى ايه بقى


• 
  
  عيبك انك خلطت بين كل أنواع الحب كل نوع وليه تعريف وسؤالي هيكون طب هو نوع واحد إلى عايز تعريفه يعنى إيه بتحب بنت؟؟؟؟


• 
  
  وفى ناس هتقولى الحب انك تبقى مدهول بنيله- على فكره دا جالى فى الشات - وهقول ايوه يعنى ايه حضرتك

وفى ناس معينه متوقع تعليقهم بس أحب أشوفها بنفسي عشان أحس إنى ذكى و مش عايز اقعد اقول على كل تعليق ايوه يعنى ايه حضرتك

ابى فرح مثل الاطفال وتركنا نموت قهرا

اتذكرك وانت تطرق الباب مسرعا .. نفتح لك بسرعه , على وجهك ابتسامه كبيره بل ضحكه تملا وجهك , حين نراك نظن انك حققت اعظم انتصار فى تاريخك .. تتجه نحو { التلفيزيون } تغير المحطه الى القناه الاول لتسمع نشره اخبار التاسعه .. سبحان الله تفتح على الخبر مباشره

اتذكر الخبر وكأنه حدث بالامس [ موت عشره ومئات الجرحى اثر تفجير عبوه ناسفه فى بار فى تل ابيب وحماس تعلن مسئوليتها عن الحادث ... خميس ابو العافيه التليفزيون المصرى قطاع الاخبار ].

تضحك كطفل وتظل تردد الله اكبر الله اكبر , شوف يا محمود بتوع حماس والله رجاله , ربنا ينصر المسلمين يااااااارب , قول يا محمود .. كنت اردد ورائك بمنطق طفل

اتذكرك وانا انام على ذراعك فى حجره نومك وانت تحكى لى قصه محمد الفاتح وخالد بن الوليد وكيف فتح عمرو بن العاص - رضى الله عن الجميع- مصر

اتذكرك وانت تحكى لى عن يحيى عياش ( المهندس) واتذكر الفيلم التسجيلى الذى رأيته عشرات المرات على الفيديو كنت تتكلم وعينك بها ما لم افهمه ربما الى الان

اتذكر اجتياح للجيش الاسرائيلى - لقطاع غزه كما اظن- وارى على وجهك الحزن وكأنك دفنت ارحامك جميعا اليوم تقول ان شاء الله هترد حماس.. يتأخر الرد.. اجئ اليك واسألك بمنطق طفل

ليه يابابا حماس مردتش؟؟؟ تاخذنى فى حضنك تقول لى يا حبيبى الامور مش سهله اوى كده وتحكى لى كيف يصل السلاح الى المجاهدين وكيف يخططوا للعمليه

اتذكر جلساتى مع نفسى وانا اقول ليفعلوا ما يقدروا عليه حتى اذا امتكلك رقابهم لا تأخذنى بهم رحمه

هل انت من زرعت هذه الثقه - فى امتلاك رقابهم- ام انه كان مجرد تخيل طفل

بعد يومين حماس ترد يا ابى !!!!!! موت اسرائيلى وجرح اثنين .. تفرح انت .. احزن انا فلم يكفينى الرد

اظل اتجادل معك وايه يعنى موت واحد وجرح اتنين هم دول حاجه؟؟ ده مش رد

تظل تكلمنى ان مجد الاسلام قادم

اتذكرك فى رمضان بعد الفجر وانت تقرا معنا جزء القرءان ثم تظل تدعوا للمسلمين فى كل العالم .. اتخيلك الان تدعوا لهم وكانك كنت تدعوا لهم باسمائهم هل كنت تعرفهم جميعا؟؟

تفرح حين اقول انى اتممت حفظ كذا من القرءان تقول لى هذا يغيظ اليهود

مازلت اتذكر شكل ابتسامتك - التى وصفوا لى مثلها وانت تنطق بالشهاده وانت تسلم روحك لبارئها

لكنى اسألك هل اخترت يوم موتك؟؟ ما عدنا يا بى نجرى على الاخبار وما عاد هناك خميس ابو العافيه ... ما عاد هناك رد يا ابى وما عدنا نضحك مثل الاطفال