2011/06/10

رحله البحث عن الموتوسكل


محمد زوج اختى اتسرق منه الموتوسكل بتاعه  وبدأ تجربه البحث عن الموتوسكل المسروق والبحث عنه كان تجربه مثيره تستحق السرد.
اول حاجه راح القسم عشان يعمل محضر  وهناك بقى قالوله انهم مش هيدروا على الموتوسكل اصلا , وانه عليه انه يدور بنفسه وان المحضر فقط عشان يحميك لو حد عمل بيه حاجه.
يا استاذ احنا كنا بنجيب اللى بنشك فيهم ونهريهم ضرب لحد ما حد فيهم يعترف , لكن دلوقتى مبقاش فيه كده انت دور بنفسك.

الناس دلوه على سمسار للحراميه عشان الحراميه بيروحوا يبيعوا اللى بيسرقوه فى مكان معين والراجل دا بيبقى الوسيط بينه وبين الحرامى .. اموت واعرف انا بقى ازاى الناس عارفه كده والشرطه مش عارفه
راح هناك عند التاجر .. التاجر اسمه كلاى .. دا لقى بتاع 75 موتوسكل مسروقين ومنتظرين اصحابهم يجوا . وهناك بقى سمع يجى ميت حكايه.
ابن الدكتور محسن الظابط فى الجيش -كان معايا فى ثانوى على فكره- اتسرقت عربيته الاوكتافيا وسلاحه الميرى .. طلعوا عليه حراميه ثبتوه وسرقوه .
وابن الحاج غنيم بتاع الكيماوى صحى الصبح له عربيه الشفروليه مسروقه.
والتوك توك اتسرق امبارح من مش عارف مين .. ويجى مليون قصه.
وصاحب مطعم ايطاليانو طلعوا عليه بسلاح آلى وغموه .. وركبوا معاه العربيه .. وسرقوا منه 38 الف جنيه فوق العربيه .. وكل ما يتحرك يقوموا يحركوا الآلى عشان يطلع الصوت اللى بيطلع فىالافلام دا تشك تشك تشك. والراجل دلوقتى مكتئب ومش بيكلم حد بقاله تلات تيام.
وعرف كمان ان الحراميه تخصصات .. يعنى فى حراميه موتوسكلات صينى , فى حراميه موتوسوكلات ماركه تانيه ودول ميتعدوش على دول.. ورغم ان المعلومات دى متوفره اهى الا ان الشرطه عامله عبيطه 
الحلو بقى فى الموضوع انه لحد دلوقتى دفع 300 جنيه ولسه مشافش الموتوسكل وشكله مش هيشوفوه :)
رحله البحث عن الموتوسكل هنكملها على مدار الشهر لو حصل فيها حاجه
:D

هناك تعليق واحد:

غير معرف يقول...

فكرتنى بساعة ما شنطتى اتسرقت كانوا تلاته راكبين على موتوسيكل وخطفوها (يكونش موتوسيكل محمد زوج اختك :D)
ورحنا وبلغنا وبردو محصلش حاجة
بس ساعتها بجد انا زعلت اوى مش عشان قيمة الشنطة او الفلوس اللى فيها ولا عشان بطاقتى وكارنيهاتى وكل ما املك كان فيها بس عشان احساس صعب اوى لما حد ياخد حاجة بتاعتك غصب عنك وانك مش قادر تعمل حاجة ولا قادر تستردها احساس خلانى احس ان الشنطة دى كانت غالية عليا اوى وانها كانت زى بنتى :D و مهونش عليا الاحساس بالقهر الا انى تخيلت الحرامية وهما بينزلوا يجيبوها من قاع جهنم ويطلعوا بيها وتقع وينزلوا يجيبوها تانى
على كل يا محمود البوست ده مهم اوى لانه تدوين عملى لحالة الفوضى وانعدام الامن فى البلد وانتشار السرقة والبلطجة
ربنا يسترها ع البلد دى