2008/04/04

ذنبى ...........اه.!!!!.ذنبك ........لا!!!!ا



الحوار ده بالحرف دار بين اخوى الصغير واختى الكبيره

انا مكنتش طرف فى الحوار
ده بس قعدت افكر فى منطق عجيب حصل المهم انقل لكم الحوار -قصدى الخناقه- وبعدين اقولكم الى عايز اقوله

  • هى:ابقى روح هات الريسيفر من عند الراجل الى بيصلحه
  • هو : لا ابقى روحى جبيه انتى
  • هى: هو كل حاجه انا الى هعملها وبعدين انت بتقعد على التليفزيون زيك زي وانا رحت مرتين للراجل وفهمته المشكله انت كل الى عليك هتروح تاخده منه انا اتصلت بيه وقال انه صلحه
  • هو: لا برضه انا مش رايح والى متضرر يروح يجيبه هوه
  • هى: يعنى ايه؟؟!!
  • هو: يعنى انت المستفاده من التليفزيون ده وانا مش بقعد عليه قدك يبقى انتى الى من مصلحتك تروحى تجبيه
  • هى: ما انت برضه بتقعد عليه

جدير بالذكر ان اختى واخويه مقسمين ساعات التلفزيون بينهم عشان ميتخانقوش

وجدير ايضا بالذكر ان الحوار هيسلك مسلك اخر دلوقتى

  • هو : بصى التليفزيون فى حاجات كتيره حرااااااااام وانا مش هاخد ذنوب حد
  • هى : والله دلوقتى بتقول كده امال كل الساعات الى بتقعدها ودامه دى تبقى ايه؟
  • هو : باخد ذنوب نفسى بس ومش هروح اجيبه فاابقى باخد ذنوبى وذنوبك
  • هى: لا طالما ذنوب يبقى انا هروح اصلحه وملكش دعوه بيه تانى طالما حرام بقى
  • هو: انا قلتلك انا مش عايز اخد ذنوب حد تانى انما ذنوبى ملكيش دعوه بيها
  • هى: ما انا برضه مش عايزه اخد ذنوب حد تانى اشمعنى انا بقى الى اجيبه
  • هو : ما انا قلتلك على المتضرر انه يروح يجيبه
  • هى :يعنى نسيبه هناك لحد ما حد فينا يحس انه متضرر
  • هو: ايوه بالظبط
حد يقدر يقولى مين الى غلطان؟؟؟ وايه رأيكم فى المنطق نفسه؟ اكيد بالطبع شفتوا المنطق ده كتير جداااا واحد معاه علبه سجاير بيشرب منها وبياخد من اصحابه انما ميرضاش يدى لحد منهم سجاره من علبته عشان ميخدش ذنبه طب لم انت عارف انها حرام بتشرب ليه؟؟ وممكن تخلى اى حد يشتريلك سجاير او تاخد من اى حد طب مهو فرض عليك تنصحه وتقوله انك لو ادتينى هتاخد زى ذنبى- من غير ما ينقص ذنبى وفرض عليك وانت رايح تشترى تقول للبياع اياك تبيع لى لانك هتبقى شريك معايا فى الذنب
على فكره انا نفسى مش لاقى اجابه ومش عارف هو منطق صح ؟؟ ولا منطق غلط ؟؟

بس زى ما دايما بقول على حاجه مش عارفها بس شاكك فيها
المنطق ده شبه الغلط انما هو غلط او صح مش عارف
------------------------------------------------------
شرح لابد منه بعد اول كومنت


انا بتكلم
المنطق الى بيتكلم بيه
انا مش هصلح التليفزيون - رغم انى بسمعه - عشان فيه حاجات حرااااااام

انا مش هعطيك سجاير - رغم انى باخد منك وبشرب - عشان حرام

اخد ذنبى اه ذنبك انت لا؟؟

رغم انه المفروض لما حد يساعده على ذنب - زى انه يديلوه سجاره - يقوله لا بنفس المنطق ويخاف على الناس زى ما هو خايف على نفسه
او يبطل ويريح نفسه

هناك 43 تعليقًا:

الفارس الملثم يقول...

اول تعليق... هاتلي ساندوتش فول علي حسابك بقي

الفارس الملثم يقول...

يا عم محمود , ما هو الدش او التلفزيون حسب استخدامك ليه , انت بس اللي بتتحمل الذنب علي حسب الشئ بتتفرج عليه , يعني لو حد طلب منك سكينة ممكن هو يكون عشان يقطع بيها حاجة او يقتل بيها حد , يكون ذنبك لو انت متاكد انه ايقتل بيها , اما لو كان يخضع لقانون الاحتمالات فالذنب علي من يفعله ...

والا انحرم كل شئ في حياتنا ونعمل خيمة نعيش فيه لان في حاجات كتير ينطبق عليها نفس الشئ زي المدونات والنت وحتي الكمبيوتر ..

مع تحياتي

بطوط حبوب يقول...

مفيش لا فول ولا طعميه
وانا بتكلم عن المنطق زى حكايه السجاير
ركز وابقى كومنت تانى
انت فهمت المنطق الى بيتكلم بيه
انا مش هصلح التليفزيون - رغم انى بسمعه - عشان فيه حاجات حرااااااام
انا مش هعطيك سجاير - رغم انى باخد منك وبشرب - عشان حرام
اخد ذنبى اه ذنبك انت لا؟؟
رغم انه المفروض لما حد يساعده على ذنب - زى انه يديلوه سجاره - يقوله لا بنفس المنطق ويخاف على الناس زى ما هو خايف على نفسه
او يبطل ويريح نفسه

خمسة فضفضة يقول...

السلام عليكم ورحمة الله وبركاته

في ناس كتير كده ، اعتقد ان دول بيبقي جواهم صراع داخلي بين اللي هما بيعملوه واللي المفروض يتعمل اصلا ، بين الصح والغلط وبيبقوا عارفين ان اللي بيعملوه ده غلط وعاوزين يبطلوه بس مش قادرين فيقولوا كفايه علينا ذنب نفسنا ومش ناقصه ذنوب حد تاني
لحد ما ربنا يامر بالهدايه من عنده و يقدروا يتغلبوا علي هوي النفس ويرجعوا للطريق الصحيح

علي فكره انا مع كلام الفارس الملثم حاجات كتير ليها وجهين ابيض واسود علي حسب استخدامنا ليها ايه وده ينطبق علي التليفيزيون

اما السجاير بقي في دي مالهاش الا وجه واحد بس ومافيش خلاف علي انها حراااااام ميه في الميه


سلام

HelSiNg يقول...

السلام عليكم

حلو المنطق دا بس محدش بيفكر فيه

يعنى انا بشرب سجاير وباخد من الناس وباعزم على الناس محدش عمره قاللى الكلام دا

بس انت عارف الاحسن ان كل واحد يشيل ذنبه بس زى ما بتقول بس ساعتها محدش هيبيع سجاير

موضوع التليفزيزن مختلف لان مش كله حرام فلو انا صلحته مش هاخد ذنب لانى معرفش نية اللى هياخده يتفرج عليه ايه ممكن نيته كويسه وممكن لأ

عصفور المدينة يقول...

السلام عليكم هذا المنطق سليم وطبعا كما هو واضح أن كل واحد منهما يستخدمه في استخدام محرم
لأن هناك ذنب للشخص وذنب التعاون على الإثم والعدوان
وقديما قيل
حق على شاربي الكؤوس أن يتناصحوا

وبخصوص تعليق الأخ الحبيب الفارس الملثم سأوضح مثاله أكثر
لو أنت تقف في محل يبيع السكاكين وجاءك واحد وزوجته وطفلتهما يقولان نريد شراء سكين
هذه حالة قارنها بالحالة التالية
دخل رجل خالعا قميصه وبالفانلة وصرخ في وجهك أعطني سكينا كبيرا فأعطيته سكينا كبيرا فصرخ في وجهك لا أعطني أكبر من هذه
=======
هنا يبرز دور ما يسمى في أصول الفقه بالقرائن
فالقرينة معتبرة طبعا في الحالة الثانية أنت يغلب على ظنك أن هذا الرجل ربما ذاهب ليذبح زوجته وفي هذه الحالة يكون بيعك سكينا له هو تعاون على الإثم والعدوان
ففي هذه الحالة الأفضل أن تحضر له كوباية لمون
:)

على فكرة هذه التدوينة رائعة جدا وهذا الموضوع لو عمل به كل إنسان لتغير حال الدنيا

ذكرت مرة في مدونتي أنني كنت سأبدأ التدخين والذي منعني هو أحد زملائي المدخنين بل وضربني ومنعني بالقوة جزاه الله خيرا

مواطن مطحون يقول...

ازيك يا بطبط .... انت عارف طبعا انك ممكن كنت بتنبذ اسلوب الحوار و تقولهم نبيع الرسيفر اهو برضه تبقوا استريحتوا خالص ايه رأيك و تبقى كمان قفلت مدخل الشيطان و مفيش خناق ايه رأيك

نرجع بقى للمنطق اللي بتتكلم عليه هو الصح اصلا ان شركة السجاير اللي بتنتج سجايرها في مصر الحكومه تقولها السجاير حرام

و كمان سواق العرابيه و الموظفين اللي شغالين فيها و الا فالسجاير ده بتنتج ازاي في مصر

بس احنا في موسم تفشي السيئات في المجتمع و السيئات بقت موضه بنتمنظر بيها على بعض
شخنا بقى كان يقولنا حاجه حلوه : يا سلام لو تعرف تدخل لكل واحد من مدخله يعني تدخل لشارب السجاير من سجايره اللي ببيشربها متسألنيش ازاي لأني لسه بدور عليها
و تدخل للحرامي من باب السرقه اللي هو بيحبه

العمليه ده جربتها في حاجات بس هينه شويه يعني جربتها مع اصحابي الروشين و اللي تصرفاتهم غريبه دخلالهم من مدخلهم و بعد كده براحه و واحده وواحده بدأت ارميلهم المعلومات و اللي انا عايزه
بس خلي بالك لتغرق فيها انت
نسيت اقول ان انا مخاصمك

WhatEver?!!! يقول...

السلام عليكم

غالبية الناس بقت بتتعامل بامبدأ دة
"انا ومن بعدى الطوفان"

صعب اوى تلاقى حد بيخاف على دنوبك انت يعنى ينصحك ويقولك لاء حرام

تلاقى دايما الرد جاهز
"يا عم هو انا اللى هتحاسب ولا هو"

بس فعلا التليفزيون يختلف عن السجاير
يعنى السجاير مسلم انها حرام
اما التليفزيون فانا مش اعرف اللى هيستخدمه ده نيتة اية

معدتقدش انى ممكن اضيف اكتر من كل الناس اللى علقوا قبلى

تحياتى

بطابيطو ترمس يقول...

هههههههه
اخواتك دول ثكر بيفكروني بيا امنا ومطحون في المناقشات الهادئه
بص ياسيدي
المبدا انه ياسيدي انه في حاجات باستخدامنا ممكن نخليها حلال وممكن نخليها حرام
لكن السجاير دي حرام حرام
لكن مبدا انه مش هيدي حد عشان ميأذهوش فدة عبط لانه بلدخان برضه بياذينا وكمان صحته دي مسؤل غنها قدام ربنا المفروض ينفع الناس بيها بدل مياذي اليلد بزيادة الامراض والمصاريف العلاج
يعني برضه بياذينا
وكمان حته انه يعمل الحرام لكن ميديش غيرة عشان ميخدش ذنبه
طب ماغيرك لو شافك بتعمله هيقلدك
يعني كدة كدة انت نقلت الشئ الحرام
واللي مشتبه في قليله يبقي اكيد كثيرة مؤذي ولا ايييييييه
يلا ياعم سلام بقي
ابقي زورني في العشه المترمسه
بطابيطو ترمس

helium atom يقول...

بطوط.. اللى بيحصل دا اشتغالة

واحد عارف ان الموضو دا حرام .. مايعملهوش و كمان مايدخلش نفسه فى شبهة

زى مثلآ حد بيلعب قمار بس مش بيقول لحد .. بحجة انو مش ينشر الفتنة.. يا سلام؟.. طيب ماهو ربنا شايفك ..وانت كدة منافق ..و انت بتأذى نفسك.. انت كدة بتشتغل نفسك...

لكن بالنسبة لموضوع الريسيفر بتاعكوم.. فاخوك و اختك بيتلككوا عشان مكسلين يروحوا يجبوه

و اختك المسكينة فى الاخر هاتروح تجيبه..و اخواك هيقعد اودامه و يتفرج على "سابق و لاحق"

helium atom يقول...

كمان موضوع السجاير دا مايعملهوش غير واحد بخيل .. بس بيتحجج بموضوع الذنب دا

بالضبط زى اخواتك

و بالضبط لما يكون معاك اكل .. و مش عاوز تدى منه .. فتقول لصاحبك " اصل الراجل اللى انا جايب منه مش كويس و انا خايف على صحتك"


زى ماقولت

اشتغالة

خبيب يقول...

المنطق سليم تماما في تصوري

إن كوني أرتكب الذنب لا ينفي كونه ذنبا

ولا ينفي أن إعانتي لغيري عليه ذنب آخر

ولا يسقط عني الأمر بالمعروف أوالنهي عن المنكر

وما لا يدرك كله لا يترك كله

وهذا - مثلا - ما استدعى الفارق - في القانون - بين متعاطي المخدر وبين تاجره

---

لكنه في هذه الحالة : قولة حق أريد بها "ترييح الدماغ"

غالتليفزيون وسيلة كما هو معروف ولا يسري عليه حكم السيجارة مثلا

وهو حين يجلب الريسيفر فإن أحدا لا يقول أنه سيتحمل ذنب من أساء استخدامه ، وإلا أصبحت تجارة التليفزيونات والكمبيوترات من المعاصي !

---

صدقا ، حين قرأت الحوار ، تذكرت المقولة الشهيرة : "يا صاحب الورع الكاذب!"

معذرة

:)

غير معرف يقول...

سلام علييييكم
الحمد لله ادينى ما استنتش كتير اهوه عشان اعلق
صح؟؟؟؟؟
عجبنى اوى طريقة الموضوع
و عايز راى فى المبدا نفسه صح؟؟
كون الاانسان مش عايز يشيل ذنوب غيره فده كويس
بس لو ده الصدق فعلااااا ماكانش قال عادى اشيل ذنوب نفسى
ده اسمه ضحك على النفس
يعنى ذنوبى اه اما ذنوبك لا
ما هى فى الاول و الاخر ذنوب
غير ان فيها انانية
و عدم حب للغير
اشيلك ذنزبى لكن ما اشيلش ذنوبك
طب فين " لا يؤمن احدكم حتى يحب لاخيه ما يحب لنفسه"
الموضوع ده غلط غلط غلط
و هتلاقيه كله غلط
من اول النية السيئة
للانانية و عدم الايثار
لذنوب بتتشال

معايا؟

عجبنى اوى اخر جملة فى اخر تعليق ده


"يا صاحب الورع الكاذب!"

بنت المسلمين

رهف يقول...

بطبوط حبوب
تحياتى لك
انا اول مره ازور مدونتك بس تقريبا كده هش اخر مره
بخوص الموضوع المطروح لى رأى فيه أن مينفعش أجزء مبدئى انت عارف التلفزيون حرام والسجاير حرام يبقى لاأتفرج على حاجه حرام ولا أشرب سيجاره بغض النظر مين اللى مديهالو
اصحاب الفكر ده يمكن شيفين انهم كده بخففو من ذنوبهم لكن اكيد ده منطق مش صحيح فمينفعش اشيل ذنب وانا عارف ومتأكد منه وأقول كفايه ذنب نفسى مشيلش ذنب غيرى كمان ....

هبة المنصورى يقول...

طبعاً منطق خربان زيه زى الريسيفر بالظبط.. دى اسمها تلاكيك سيادتك.. وبعدين مين اللى حرمه؟! وذنوب ايه بس؟ ماهو عندك قنوات كتييييير وفيها الحلو والوحش والنص نص.. وأنت بقى عليك الفلتره.. ومحدش هيقولك لأ دى قناه مش مظبوطه ماتتفرجش عليها وخاصة لما يكون زى أخوك الصغير كده عنيد.. بل بالعكس ممكن يعند زياده.. ده بالنسبة للقنوات الفضائية اللى باشوفها بعد فلترتنا احنا مفيدة جداً
السجاير بقى بجد نفسى أسأل اللى بيشربها عن فايده واحده ليها.. ده أنت بتدفع فلوس عشان تبوظ سنانك وتخرب رئتك ومش بس كده لأ بتخنق الناس حواليك وآل كده الواد راجل صاحب مزاج عالى.. بجد لعنة.. ربنا يعافى شبابنا

عبده الرايق يقول...

هو المنطق فى حد ذاته كويس
وطالما الواحد بيعمل حاجه وعارف انها غلط ومش عايز حد غيره ينضر منها
فيمنعها عنه
ده فى حد ذاته كويس
لانه فى الوقت اللاحق سيمنع هذا الاذى عن نفسه
اما بقى اخواتنا المتصارعين على مين يجيب الريسيفر
ده كسل
وانا ناوى احل الموضوع
ادينى عنوان المحل
وانا اجيبه ومالكشى دعوه بيه تانى
حكم الواحد مفلس

بطوط حبوب يقول...

خمسه فضفضه
وعليكم السلام ورحمه الله وبركاته
صراع داخلى ؟؟!! احتمال
بس حتى لو فى الصراع ده المفروض انهم ينصحوا الناس برضه
انهم يقولولهم انهم لو ساعدوهم على الحرام يبقى حرام عليهم مش ياله نفسى وخلاص
ولا ايه؟؟

***************************

هيلسنج
مين قال انه منطق مش موجود على فكره دا موجود كتير اوى انت يمكن مشفتوش انما الى يعيش يشوف
نورتنى

وفعلا موضوع التلفزيون متغير بس يمكن المنطق متشابه

***************************

عصفور المدينه

حق على شاربى الكؤوس ان يتناصحوا صح مفيش اشكال فى ده
بس النصيحه منها ان اقولك متساعدنيش فى المعصيه عشان متخدش زيي
منها انك لو اديتنى سيجاره اوقلك لا عشان متخدش ذنبى ولا ايه؟؟!!
وزى ما قولتلك حكايه القرائن دى وسد الذرائع غير معتبره عن مشايخنا - الشافعيه خصوصا فى المثال ده

***************************

مواطن مطحون
انا بلقلق من جمله ادخلهم من مدخلهم دى -اصلها ممكن تكون حق يراد بها باطل
اعرف واحد بيعمل زى الى اصحابه بيعملواه تقريبا بالظبط ويقولك بعمل كده كمدخل للدعوه
طب وانت هتخسر نفسك؟؟!!
يقولك لا ان شاء الله

وفعلا لازم ننصح بعض بس منطق ان اسيبك تساعدنى على الى شايف انه حرام من غير ما انصحك
واجى انصحك لما اطلب منك تساعدنى هو ده الغريب

***************************

وات ايفر ؟!!!
نورت المدونه بجد وفعلا الكل بيقول ياله نفسى ربنا يهدينا يااااااارب

***************************

بطابيطوا ترمس

هيقولك بدخانه بيأذينا اه؟ مساعدش غير بقى
وهو ده الى بتكلم عنه

بطوط حبوب يقول...

هيليوم اتوم

ما انا عارف انه اشتغاله دول اخواتى وعارفهم كويس
انما انا بتكلم عن المنطق نفسه لانى شفته فى حكايه السجاير دى - مش معايا - مع اتنين اصحابى
وعلى فكره المفروض فعلا ان اهل المعاصى يستروا نفسهم يعنى الى بيلعب قمار من ورا الناس اقل سوءا من الى بيلعب ودامهم لانه بيجرأهم بالفعل وكمان فى مجاهره بالمعصيه

طبعا اخواتى بيتلكككوا بس انا بتكلم عن المنطق نفسه

والسجاير دى الواد بخيل ؟؟!! مش عارف جايز انت صح وجايز هو مقتنع بالمنطق ده

***************************
خبيب

والله كنت ناوى اسمى الموضوع الورع الكاذب بس حسيت انى هحرق الموضوع بعنوانه ده
انا متفق معاك كليا

***************************
بنت المسلمين
وعليكم السلام
وابقى ادخلى باسمك ولنك ال360 احسن
المهم

اشيلك ذنوبى لكن مشلش ذنوبك؟؟
وكان لو شيلتك ذنوبى مش هاخد عليها ذنوب تانى
اللهم عافنا يااااااارب نورتى المدونه بجد

***************************

رهف

ان شاء الله مش اخر مره
وجه نظرك واضحه اوى بس الطرف التانى بيقولك المشرحه مش ناقصه قتله يعنى كفايه اوى الى بعمله
مش بدافع عنه انا معترض عليه بس بقولك بيقول ايه
نوتينى

***************************
هوبه

نورتينى ومش عارف من افرحه اعمل ايه
ادبحلك حد من اخواتى من فرحتى؟؟!!

منطق خربان ؟؟!! بس منطق
التلفزيون فى حاجات كتيره كويسه واخواتى بيتلككوا لانهم مكسلين انا كنت بتكلم عن المنطق نفسه

وموضوع السجاير والسنان ده ملكيش دعوه فى دكاتره أدها وأدود

***************************
عبده الرايق

انت تأمر يا باشا
المحل اسمه الشيماء فى الشارع العمومى
إدفع انت بس الرهنيه الى عليه وخده بالهنا والشفا

الفارس الملثم يقول...

انا حقيقي عارف قصدك ايه يا محمود , لان الموضوع اتناقش قدامي كتير باشكال مختلفة ’ يعني مثلا ناس شايفة الاغاني حرام لكن بتسمعها بس يقولك بس انا مش ممكن اديك شريط اغاني عشان متحملش ذنبك " طبعا لو كنت من اللذين بيحركوا الاغاني بصورة مطلقة " بينما التلفزيون هنا ممكن يستخدم في مشاهدة برنامج ديني او ممكن يستخدم في مشاهدة فيديو كليب او ما هو اسوأ

الانترنت انت تستخدمه الان في مناقشة مواضيع هادفة او من الممكن استخدامه في الدخول لمواقع اباحية ..

عندما تعطي لاحد خمرا فانت تاخد ذنب معه بالتاكيد بينما لو اعطيته عنب مثلا فهنا الامر يخضع لقانون الاحتمالات قد ياكل العنب او يحوله خمرا , اما كونك متاكد انه سيحوله خمرا فهذه مسالة فقهية اعتقد ان علماء الدين اقدر علي الحكم عليها ..

هناك نقطة اخري فكونك تغري انسان لا يدخن بشرب السجاير او تسهل له طريق لهذا فانت تتحمل وزر مؤكد , بينما اعطائه سجاير وهو اصلا مدخن ولن يختلف الامر كثيرا بالنسبة له فبالتاكيد الوزر اقل بكثير ..

اخيرا هناك قول " كبر مقتا عند الله ان تقولوا ما لا تفعلون " يعني واحد يعمل الخطأ ثم يقول للناس عكس ما يعمل فهو انسان منافق يكذب علي نفسه وعلي الاخرين ..

تقبل مداخلتي التانية محمود

حمامة يقول...

اكيد منطق غلط

يعنى ايه اتحمل ذنبى بس طيب ما تنصحه

سبحان الله ف امره

غير كده اعتقد انه سلك مسلك تانى خالص

وده علشان يطلع من الموضوع الأصلى

بيفكرنى بأخويا لما يحب يطلع من موضوع

ويقنعنى بيه بالعافيه يجيبها من ناحية

الحرام وقال الله وقال الرسول ومادام

فيها ذنوب طيب ما اكيد انت فى غنى عنها

مش عارفه انا حاسه انه منطق غريب

وغير مقنع بالمرة

وبعدين مش المفروض هو الولد يبقى هو

اللى يروح يجيبه D:

Bongo يقول...

نظرية غلط من اولها

يعني لو انت عارف انها معصية و ذنب هتعمله بس مش هتشيل ذنب غيرك !!
مش منطق ..

و زي ما ناس كتير قالت كل حاجه ليها الأستخدام اللي يخليها صح و الأستخدام اللي يخليها غلط ,,

و بعدين شايفهم بيتخنقوا سايبهم يتخنقوا .. بدل ما تتدخل و تحل المشكله :D :D

المهم
حليتوا المشكله ازاي ؟؟

روز يقول...

D:
لا تعليق

واحدة مفروسة يقول...

بطوط.. نا جايه اهدى النفوس.. اولا هديهم كده و انا حجيب التورته.. قصدى الرسيفر... من غير خناق .. وبعدين ياعم لازم يكون فيه تعاون.. واحد وداه للتصليح التانى يجيبه مافيش مشكله.. المشكله الاساسيه ان كل واحد بيتكل على التانى. فى العمل نفسه.... اما المنطق الفولاذى...ماهى كل الناس ماشيه كده... قصدى البلد.. كل واحد يعمل الغلط جهارا و لا يقبل النصيحه .. و يقولك مالاكش دعوه يا عم...يوم الحساب .. انا اللى حشيل الذنب مش انت.. منطق عجيب.. ده ينم على الانانيه المفرطه... و عدم التفكير فى الغير... والله لو كل واحد قبل ما يتصرف اى تصرف يفكر فى كل اللى حواليه و يعمل حسابهم .. ااكدلك اننا حنكون افضل كتير..و بعدين سجاير ايه اللى انت بتتكلم عنها ديه .. ده انت موضه قديمه .. انت ما بتتفرجش على تلفزيون ولا ايه... دلوقتى فيه بانجو.. ماشاءالله ....ماشاءالله.. ومخدرات الحمد لله الحمدلله... يابنى الشباب فى تقدم الله ينور

الباحث عن الحقيقة يقول...

المهم جبتوا الرسيفر ولا سبتوه
ممكن اروح اجيبه انا واخليه عندى علشان محدش فيكم ياخد ذنب حد
اللى حصل ده بيوضح لاى مدى فيه تناقض فى انفسنا احنا وضميرنا الديني والاخلاقي
شئ عجيب فعلا
شكرا على الموضوع
الواد اخوك الصغير ده لمض اوي على فكره

Wael يقول...

انا مقتنع بالمنطق ده جدا ..

" ولا تزر وازرة وزر اخرى "
" بل الانسان على نفسه بصيره , ولو القى معاذيره "
" كل نفس بما كسبت رهينه "


انما ده هايدخلنا ف نقطة تانية , وهو : هل "فعل المعاصى عن اقتناع بانها معاصى " اخطر من " فعل المعاصى عن جهل " ؟ او اخطر من " فعل المعاصى عن اقتناع بانها غير معاصى " ؟

إنما التوبة على الله للذين يعملون السوء بجهالة ثم يتوبون من قريب


وبعدين على فكرة المقارنة بين " الريسيفر " وبين " السجاير " غلط من الاساس , لان الريسيفر ممكن يكون فيه وجه افاده , انما السجاير فهى سلاح ذو حد واحد فقط .

الموضوع ده كبير ومحتاج كلام كتير

الكلام ده طبعا من حيث المبدأ ....

انما بخصوص الحالة اللى ادامى دى , فلازم اروح اجيب الريسيفر قبل الراجل ما يفكه ويبيعه قطع غيار . وبعدين ربنا يحلها بقا ف مواضيع الحلال والحرام دى .

فرنسا هانم يقول...

لو بصينا للمنطق هنلاقى الاتنين منطقهم سليم وموقفهم سليم
ومش هاقدر اغلط حد فيهم

*سمر* يقول...

هو محدش فيهم غلطان ..
بس بما انها الاخت الكبيرة ..وبما انها البنت ..وهو ولد ..يعنى هو اللى مفروض يروح يجيبه..

بس منطقهم بأة ..مش قادرةاقول حاجة قاطعة ..لكن اعتقد ..ان لو هما باصين للتليفزيون على انه اغانى وهلس بس ..يبأة عندهم حق ..انا لو مكانهم مش هروح اجيبه بنفسى علشان مشيلش دنب حد ..على الرغم ان الفرجه عليه حرام ..طيب مهم اكيد عارفين انهم شايلين ذنوب ..بس ميشييلوش حد ذنوب ...

اما بأة لو هما شايفين التليفزيون حاجات تانيه كتيير غير الهلس ..يبأه اعتقد ان محدش شايل ذنب حد ..وفى الحالة دى هيبأة عمل مباح ...

اللى انا اقصد اقوله ..ان المنطق يقيم صح او غلط على اساس النية من الفرجه على التليفزيون ..

اسفه على الاطالة ..وتحياتى :)
http://wa7di-ofakker-137.blogspot.com/

appy يقول...

اممممممممم
ايه يا بطوط اللوغارتمات دى
منطق مين سليم يعنى ايه مش هجيب التليفزيون علشان مأخدش ذنوبك وذنوبى وليه اصلا يتفرجوا على حاجه فيها ذنوب
معتقدش ده منطق صح اساسا هو هروب من التليفزيون والمشوار بس

مها يقول...

أغرب حاجة فى القصة دى يا بطوط إنك لعبت دور المشاهد ووقفت على الحياد!!
مع إنى حاسة إن دى مش طبيعتك..
عموماً رأيك فيها اتعرف لما قلت لـ "خبيب" إنك كنت ناوى تسميها "الورع الكاذب" .. وباتفق مع "خبيب" فى كل كلمة قالها .. واتفق مع "سمر" فى إنه من النبل أن نعفى أخواتنا البنات من المهام التى لن يضيرنا كثيراً القيام بها .. لكن واضح إن أخوك صغير السن عنيد جداً .. معلش خناقة تفوت . بس يا ترى القصة دى خلصت على ايه؟ اوعى تكون انت اللى اتدبست ورحت جبت الرسيفر فى الآخر؟
هههههههه

صيدلانيه طالعه نازله يقول...

انا اعتقد ان الحوار ده مش صراع افكار و لا حاجه ده مجرد هروب من عمل اى شيءو بس هيه مكسله تروح و هوه كمان راح رامى حكايه الحرام و الحلال دى فى الملعب و دار الحوار عليها بعد كده
ياما عملنا كده زمان انا و اخويا برضه
لكن الدش و النت و حلاله و حرامه يعتمد على استعمالك ليه

oceaneyes يقول...

لا طبعا ..التفكير ده غلط فى غلط

سواء بقى على تليفزيون او سجاير او اى حاجة ليها علاقة بكدة ..

طالما هو بيعمل الغلط وهو عارف ان ده شىء غلط ..فدى فى حد ذاتها مصيبة اكبر ..وذنبها اكبر بكتير من اللى بيعمل الغلط من غير ما يبقى عارف انه غلط ..

وقتها بقى مش هاتفرق كتير انه ياخد ذنب غيره ..لانه كدة كدة بيعمل الغلط ده ..


انا عن نفسى مش مقتنعة بالمبدأ ده ..بس ربنا يهدى الجميع


مدونة حلوة على فكرة


تحياتى


:)

امواج يقول...

بطوط ازيك

انا شيفه فعلا ان موضوع حرام ده مجرد هروب من الموقف بكلمه مفيش فيها نقاش
بدل ما يقول مش نازل مش فاضى ..........
يقول حرام

تعرف زى اى
زى يوم عيد ميلادك مثلا تقول عاوز هديه
تيجى يوم عيد ميلاد حد يقولك فين الهديه تقوله بدعه وكل بدعه ضلاله وكل ضلاله فى النار

بقولها كتير بصراحه للهروب من الموقف ههههههههه

او حاجه تنيه اول مره اخد بالى منها الوقتى
فى منتدى مثلا انا ممكن ادخل اخد اغنيه او صور فنانين او فيلم او كليب
لكن عمرى ما نزلت انا على منتدى اغنيه مثلا
ديما اقول لنفسى اشيل ذنبى بس مش ذنب الاف هيسمعوها بسببى

يظهر انه مبدأ منتشر الايام دى



بوستاتك مميزه بطوط
بالتوفيق

Abo 7anf يقول...

السلام عليكم
المبدا انا سمعته كتير
بس اكيد كل واحد عارف هو بيعمل ايه
والا كان الاشترى الدش من الاول شال ذنوب الناس كلهم
وبعدين على رايك لما فى شخص عارف انها حرام بيعملها ليه
كل واحد بيحاول يوهم نفسه انوا مش غلطان

monaliza يقول...

انا بقى ليا وجهة نظر تانية خالص على الحوار
المفروض الراجل هو اللى يتصرف فى المواقف دى ومايسيبش اخته تروح للصنايعية كده وهو قاعد فى البيت

مفقوعة مرارتي من حماتــــــــــــي يقول...

تصدق الحوار ده منتشر اوي في كل البيوت بتاعتنا
تصدق انا بحب التليفزيون لما بيبوظ بيسيب وقت فراغ الواحد يقدر يلتفت لغيره ... انا حالياً الرسيفر عندي بايظ
تعرف عملنا ايه انا وجوزي طلعنا الدومنا وقعدنا نلعب لحد مانام مني علي الأرض من تعبه
وهو طبعاً اللي غلبني

بنوته مصرية يقول...

بص يا بطوط

الموقف اللي بتقول عليه ده فكرني بي كشك كدا تحت البيت بتاع واحد عجوز بيشرب سجائر بس مش بيبيعها فمرا جوزي بيساله انت ليه مش بتجيب سجاير قاله انا اخد ذنمبي انا مخدش ذمب حد


التليفزيون زيه زي النت زي التليفون زي اي حاجه حوالينا زية زي السكينه والكوبايه

ممكن تستخدم السكينه في الخير وممكن في الشر والكوباية برضة ممكن تشرب فيها مية او الدواء وممكن تشرب فيها خمرة

ده رئي ممكن التليفزيون تتفرج فيه علي حرام وممكن تتفرج علي كرتون او برامج اسلامية

فهمت رئي

تحياتي لك
رودي

somaa mahaba يقول...

هههههه على فكره الحوار دا بيدور فى كل البيوت بطرق مختلفه
فى حاجه اسمها حامل الخمر وشاربه..
والاتنين فى النار..وانا صراحه بحس السجاير زيها زى الخمره وفى افتاء من الازهر بتقول انها حرام....
لكن التليفزيون به ايجابيات وسلبيات انت اخدت ايجابيته عصمت نفسك من الذنوب اخدت سلبياته يبقى انت اخترت الطريق الوحش
زى السكينه تعمل الاكل وتقتل الناس هل لو قتلت حد اللى باعهالك اخد ذنبها..؟؟؟اكيد لا
تحياتى ليك سومه_87

mostafarayan يقول...

اناشايف ان الحل بسيط قوي هماالأتنين يروحو يجبوه مع بعض

بطوط حبوب يقول...

الفارس الملثم

كبر مقتا عند الله ان تقولوا ما لا تفعلون
جزاك الله خيرا اصبت ان شاء الله

******************************

حمامه

هو بيتهرب من المرواح بس انا مش بناقش قضيه اختى واخويه بقدر ما انا بناقش المنطق
وكلامك مظبوط بس لو شفتى بقيه الردود للناس التانيه هتلاقيهم ردوا عليه
تقبلى تحياتى

******************************

بنجو

لحد الان المشكله ماتحلتش
ههههههههههههه

******************************

روز

ولا انا هعلق

******************************

واحده مفروسه

الانانيه المفرطه
الله عليكى
هى ده المشكله مش فكره حرام وحلال بقى بس دى مشكله اخويه واختى انما انا بناقش المنطق نفسه

******************************

الباحث عن الحقيقه

يا عم حلال عليك

والواد الصغير لمض فعلا

******************************

وائل

هههههههههههههه تفتكر الراجل يعملها؟؟!!

******************************

فرنسا هانم

الاتنين منطقهم سليم وانا الى غلطان ههههههههههههههه
؟؟؟

******************************

سمر

نورتينى
وجه نظرك سلميه او لا تقدرى تحددى لو قريتى كل التعليقات

******************************

ابى

مهو لو فى عندنا دبابير ونحل كنا حلينا المشكله ههههههههههه
نورتينى

******************************

مها

انا دور الحياد احسن حد يقولى روح انت
هههههههههههه
لا اصل انا اقتطعت جزء من الحوار بس مش كل الحوار وله تفاصيل تانيه يرجع تاريخها لاربعين سنه ضوئيه
هههههههههههه
مش بقولك موضوع كبير

******************************

صيدلانيه طالعه نازله
هروب طبعا

******************************

oceaneyes

مقدرش اقولك انت صح ولا غلط انت تقدر تشوف الردود وتحدد بنفسك اظن بقى عندنا الان كل وجهات النظر

بطوط حبوب يقول...

امواج

حلوه عيد الميلاد دى ابقى اجربها
وانت كمان مؤمنه بنفس وجه نظر اخويه

شوفى باقى التعيقات يمكن تغيرى رايك

******************************

ابو حنف
وعليكم السلام


نورتنى يامان

******************************

موناليزا

مهو بيقول اعانه على الاثم ومش رايح

******************************

مفقوعه مرارتى من حماتى

هههههههههههههههه تكيفتوا مع الوضع المره الجايه تفوزى يااااااارب

******************************

بنوته مصريه

باصص
هااااا
لو شفتى باقى وجهات النظر ممكن تغيرى وجه نظرك

******************************

سوما -87

ماشى السجاير حرام محدش قال لا طب ممكن حد يعم على حد ولا لا؟؟؟
طالما اصلا هم بيشربوا

******************************

مصطفى ريان

هندرس الموقف نورتبنى على العموم

somaa mahaba يقول...

ههههههه بطوط لو اخدناها من المنظور التوفيرى مش الدينى يبقى كل واحد يشيل سجايره فى جيبه...وميعزمش...
ومن المستحسن يلم سبارس من الشارع اهى تنفعه وقت زنقه
تحياتى ليك سومه_87

sebofy7alo يقول...

أنا رأيي أنكم تروحوا تجيبوة من عند الراجل اللي بيصلحة مع بعضيكم أو
خلي الراجل يبعتهلكم دليفاري أريح أوي وهو اللي حيشيل ذنوبكم كلكم.
سلام يا عسل

مسلم يقول...

الصراحه ديه حاجه جميله خالص

و معناها إن الناس فيها خير؛ و بكره إن شاء الله الإتنين هيبطلوا يتفرجوا علي التليفزيون خالص

بس جايز يكونوا الإتنين مكسلين يجيبوا الريسيفر من عند الراجل؛ و ساعتها هزعل قوي