2009/02/02

كفايه ان انا موافق




امبارح اتصلت بيا تاخد رأيي فى مشروع عريس جديد ... هى مش تاخد رأيي تاخد رأيي بس اهى بتسمعه


وهى من معرفتى بيها - القويه على ضعفها ... والعميقه على سطحيتها
هى .. جميله كـ ملكه جمال السويد , بيضاء كجبنه دومتى , رقيقه وناعمه زى ارنب صغير لسه بيبى , نشيطه زى فلاح قريتنا , وذكيه كعالم فيزياء انجليزى , حنونه كجدتى , مرحه كـ خوخه فى عالم سمسم , ورزينه كـ طمطم فى بوجى وطمطم ,مؤدبه ولبقه كـ موظفه خدمه العملاء فى اتصالات , متحمله المسئوليه كـ الاخ الاكبر بعد وفاه ابوه , طموحه كـ نمله عايزه تطلع الجدار , لما بشوفها بفتكر (الاستاذ ارنوب) فى حكايات جدتى بنظارته التى تزيده وسامه ووقار
 .
كانت بتسألنى عن رأيي فى ارتباطها بشاب والى فهمته منها
انه .. اسمر كـــ ليله شتاء من غير قمر ,اسنانه بيضاء كـ قلب مؤمن تائب , مؤدب كـ أمير مخرجش من قصره الا يوم ما شافها , وجنتل مان كـ أخر رجل فى العالم , من اصل كـ أمير تركى , متفاهم كـ دكتور طيب فى الجامعه , رومانسى كـ ميكى ماوس , وميسور الحال كرجل مستعد للجواز من بكره , فى عينه كلمه بحبك , وعلى وجهه ابتسامه تكشف ما لو صرح به مش هتديله الا بالجزمه
 .
ولانى عارف موقف ( الاستاذ ارنوب ) فى فلسفه الارتباط فى حكايات جدتى دار بنا الحوار الاتى ... ولأنى اصلا بحب اخبار الجواز عموما معرفش ليه ؟؟ جايز بحس انه خلاص بقى هيجى على الدور ... فكنت متولى مهمه اقناعها

الخلاف بنا ممكن تلخصيه فإنى شايف انه المفروض الولد اساسا يتجوز بالكتير بعد الثانويه واهو يبقى تقريبا عرف مستقبله ولو نسبيا , والبت بالكتير بالكتير يعنى فى تانيه تالته ثانوى
طبعا ( ارنوب هانم) مش مقتنعه بده وده الحوار الى دار بنا


ازيك يا بطبط
الحمد لله يا ارنوب هانم ايه اخباراتك؟؟
الحمد لله .. بص يا سيدى فى واحد متقدم لى
بجد؟؟ قشطه خير
المهم بعد ما وصفته وحكت لى عن ظروفه وانا سألت عن شويه تفاصيل
طيب يا بنتى دا جامد جدا موضوع السمار ده مش مهم اوى ...ابقى حطى كريم اساس غامق شويه يوم الفرح وخلاص ( مبتتفرجيش على امينه شلبايه ولا ايه؟) ... او اعتبرى نفسك بتبصى له من ورا إزاز فاميه ...بطلى تلاكيك
 
ههههههههههههههههههه ... لأ مينفعش ...... ثم انا لو خلفت اولاد شكلهم وحش مش هألكلهم وهسبهم كده جعانين طول اليوم
يا بنتى يبقى اى حد يديهم البزازه وخلاص
هههههههههههههههه انت هتهرج من اولها؟؟
طب ليه يا بنتى مش اخيرا بقى جه الفارس على حصانه الاخضر الى بتنتظره كل البنات؟؟
لأ انا مبفكرش كده ثم هو حصان ابيض... انت عندك عمى الوان يا ولا ايه؟
يا ستى ابيض اخضر أهو حصان وخلاص ... المهم يخطف قلبك وتحسى انه الحد الى لازم تتجوزيه
يا بنى انا مبفكرش كده انا عايزه اساسا اجوز بعد عشر سنين
بعد ايه؟؟ مش سامع ؟؟ الظاهر حد دخل فى الخط الوووووووووووو ارنوب هل تسمعنى
بطل استهبال يا بطوط طبعا اقل حاجه عشر سنين لحد ما اثبت نفسى


ههههههههههههههههههههه تثبتى نفسك يا بنتى بسيطه جدا انتى فاكره انا انا كنت هوافق انك تتجوزى من غير ما تثبت نفسك ... بالعكس ... ابسوليوتلى ..انتى  لازم فعلا تثبتى نفسك
واثبت نفسى ازاى ؟؟ 
انتى توقفى كده ودام مامتك بنظره كلها شك وريبه ...يا حاجه انا مين؟؟
هترد اكيد وتقولك  .. انتى اتهبلتى يا بنتى
امممممممممم اذا انتى  بنتها
بنفس النظره ترجعى تقوليها لأ بجد انا مين
هتقولك ارنوب  يا حبيبتى انت خلاص اتهبلتى بجد ؟؟
امممممممممم اذا انتى ارنوب  وابنتها وهو المطلوب اثباته وممكن تجربى مع باباكى واخواتك وكده



يا سلاااااااااااام؟
انتى فاكره ان دا كفايه  ... بالعكس ... ابسوليوتلى ... انتى بعدها  تدخلت كده الاوضه بتاعتك ومعاكى المصحف وحطيه على عينك واحلفى انك ارنوب ... وطالما انتى مش بحلف كدب فبكده انا اثبتى نفسك

يوووووووووووه يا بنى انا اقصد ان يبقى لى اسمى ؟؟
معلش اصلك لسه صغيره ...انا هفهمك ينوبنى ثواب ....لعلمك انا بقالى تلات تشهر مبرضاش حد يقولى ,يا دكتور, يا استاذ  ,ولا حتى ياوااااااااااااد اى حاجه من دول منعتها دلوقتى لازم يبقى لى اسم .... كله بيقولى يا محمود ... امال ايه انتى فاكرها سايبه ... دا حياه او موووووووووووت انتى ممكن تعملى كده برضه

مش بقولك انك طفل ....بس على العموم هو فى ميزه وعيب- بجانب السمار ده
هاااااااااااااا؟؟ 
...الميزه .. انه هيجى كل اسبوع يوم او اتنين .. لان شغله ظروفه كده
دا العيب قصدك ؟؟
لأ الميزه


على رأيك ...اهو احسن حتى تبقى فاضيه طول الاسبوع .. أقولك ابقى اعملى مدونه , روحى نادى , حطى ماسكات ... بقى دي ميزه بالزمه ..ما علينا طالما انتى شايفاها ميزه


هو كل الى فى دماغك حكايه الماسكات دى؟؟

ايوه يا بنتى دا اهم فقره اساسا فى الجواز ... هو الواحده بتتجوز ليه غير عشان تحط ماسكات طول اليوم  
وانا بقى ارجع من الشغل بقى لو تعبان اقولها .... حرام عليكى يا مفتريه خلصتى الخيار الى فى التلاجه كله .. منك لله
ولو كنت فراحان ومبسوط .. اقولها يااااااااااه يا حبيبتى الخيار عليكى يجنن
فتحتى نفسى ع الجواز حرام عليكى
تعرف والله انت طفل

هههههههههههه  رغم انى فعلا بتكلم بجد  طب والعيب؟
انه اكبر منى بعشر سنين
اوبس ... فعلا كتير
كتير ايه يا بطوط دا صغير على جدا
اه فعلا صغير ... ازاى انا مختش بالى؟؟
انت بتتريق؟؟
ليه لا سمح الله ... اوعى توافقى على حد اكبر منك باقل من 359 سنه ....أقولك هاتيه من دار مسنين... على رأى امى البنات بقت عايزه قطع رقابتها
اتلم يا بطوط
 اسكتى دا انا كده ملموم  خلى بالك انك بتكلمى انسان عنده مراره

يا بنى انا مبقتنعش ان الراجل يكون اكبر من الست باقل من كده عشان تحس انها مع حد متحمل المسئوليه وعاقل وبيفهم .....ثم كمان انا لسه عايزه اعمل الماستر بتاعى ودراساتى وابحاثى الى انت عارفها .. وشغلى ومش مستعده اهد كل طموحى كده عشان ال ايه اتجوز
طب ما تتكلموا فى الحاجات دى وشوفى رأيه
هو غالبا موافق .. هو متفاهم جدا اصله
طب يا بنتى خلاص انتى اصلا عمرك مهتلاقى حد يهاودك كده احمدى ربنا بقى...و كفايه ان انا موافق


طالما انت موافق هفكر .........لووووووووووووووووول......بس برضه الجواز هيقلل الطموح وكده وكمان انا مش عارفه مش حاسه انى عايزه اتجوز دلوقتى



هنا بطوط اغمى عليه 



واستمر النقاش بنا لمده طويله دون ان يقتنع اى منا بفلسفه التانى 
ومازال العريس منتظر الرد - بجد كان الله فى عونه- ومازالت مقتنعه فى داخلها انها مش لازم تتجوز قبل عشر سنين ... الظاهر انها مصممه متتجوزش الا لما تعمل طقم سنان عند بطوط  للعلم انا بنبه اهو هتدفعى زيك زى اى حد عشان يعنى لو طمعناه من اولها لأ

ومازالت مقتنعه ان بطوط لسه طفل وكل الى عايزه انه يتجوز واحده عشان يبقى عنده كائن فى البيت ويكتشف الزراير الى بتشغله والى بتطفيه طب تصدقوا انه فعلا سبب كافى
:)

هناك 16 تعليقًا:

احساس طفلة محبة للرومانسية بس واقعية يقول...

هاهاهاهاهاهاهاها
اسلوبك رائع يا بطوط
والفلسفتين فيهم حاجات صح

بس التردد فى حد ذاتو عيب مش ميزة
ممكن يكون عند الاستاذة ارنوب ميزة
:)

دى بتقولك لو جابت اولاد وحشين مش هتأكلهم
ينهاااااااااااار اخضر وازرق وبنفسجى كمان

وانت كمان يا بطوط زودتها اوى
هو عشان تثبت نفسها تروح تسأل الحاجة مامتها هى مين

هاهاهاهاهاهاهاهاها
لا بجد موضوع ظريف جدا يا بطوط

ارجو ان تتقبل مرورى

مها يقول...

يا بطوووووووووط
تغطس تغطس وتقب بحاجات تموت م الضحك
طبعا ارنوب واضح انها متأثرة بتجارب تعيسة فحت لناس كتير حواليها.. بس الكاتالوج بتاعها طلع تعيس ردم هو كمان.. ومش هناقشك ف حتويات كتالوجك انت كمان لأنه ف الواكع مافيش ف مسألة الجواز كتالوج ستاندرد لكل الناس والخلاصة ف الإصة دي هى كلمتين وبس: ساعة القضا يعمى البصر ..

ولا فتاوى يا بنى بتنفع .. ولا أحكام

وعقبال عندكم

mohamed ghalia يقول...

هههههههههههههههههه
يخرب بيت دماغك
ومازالت مقتنعه ان بطوط لسه طفل وكل الى عايزه انه يتجوز واحده عشان يبقى عنده كائن فى البيت ويكتشف الزراير الى بتشغله والى بتطفيه طب تصدقوا انه فعلا سبب كافى
تصدق فعلا ده ممكن يكون سبب كافى واضح إنى سى انوبه عايزة واحد على الأقل بينهم 10سنوات عشان يكون تقدر تحقق طموحها وذاتها واضح إنها هتستنى كتير
يمكن يكون ده فى مصلحتك
دمت بكل الود حبيب قلبى

نهــــــــــار يقول...

السلام عليكم يا بطوط...
هو ابسلوتلي إنه بسبب معرفتها بيك قررة ترفع سن الزوج...
بهزر معاك ..إوعك تزعل ..
بس أنا ما بين الرأيين والله يتتم بخير..
...
دمت بخير..

فاتيما يقول...

ياه عليك يا محمود
دنتا ليك الجنة بعد المكالمة دى
أنا دمى اتحرقلك سلف
متهيألى إنها لسه صغيرة قوى على إتخاذ قرار الجواز فعلاً
و سعيدة قوى إنى صادفتك يوم المعرض
تحياتى و خالص إحترماتى
و عقبال ما نفرح بيك إن شاء الله

حاسوباتيه يقول...

هههههههههههههه تفكيرات غريبه بصراحه خلاصهي حره تستنى 10 سنين براحتها تاعب نفسك ليه

جمعاوي صاحب "عيادة أسنان" يقول...

السلام عليكم
إزيك يا ريس

سبحان الله على التوافق انا كمان كاتب بوست برده فى مأوحة كده ومناكفة والذى منه

المهم

*******************************
ومازالت مقتنعه ان بطوط لسه طفل وكل الى عايزه انه يتجوز واحده عشان يبقى عنده كائن فى البيت ويكتشف الزراير الى بتشغله والى بتطفيه طب تصدقوا انه فعلا سبب كافى
:)


*****************************
ايه الكلام ده بقى ده منطق يا راجل

المهم انتوا التنين ذوى فلسفتين ولاد لذينة وفعلا مش هينفع تقريبا تتناقشوا تانى

لأنك طفل يا حوده خلاص بقى نقضيها معيلة ومش متناقش تانى

يلا سلام يا ريس

لورنس العرب يقول...

يا سيدي الفاضل انا اعرف واحده رفضت عريس لأن اسمه سيد

عصفور طل من الشباك يقول...

هو من جهة إنك طفل فبجد دي حاجة إحنا عارفانها عنك من زمان

صح ولا إيه ما تنكرش يا بطوط

أما الأستاذة أرنوب فأعتقد إن كل دي تلاكيك لأنه ما حصلش توافق وقبول، لأن القبول هيخليها مش شايفة عيوب صغيرة زي السمار والسن والكلام ده

أما موضوع تثبت نفسها فأنا معها فيه قبل الجواز وبعده وما دام هو مفهم زي ما بتقول يبقى لقطة هتندم عليها بعدين

samarpinky يقول...

gameddddddd el post da ya batooooot

Princesa ... WHiSPeR يقول...

فكرتني بنفسي من سنه بالظبط
مش ارنوبة بس اللى بتفكر كده
كل البنات تقريبا

Saturn يقول...

hmmmmmmmmmmmmm..... mashy!!l

sarah (Ocean fragrance)1 يقول...

3lafekra ana mwaf2aha fe 7gat kteeer.. ya3ny law makontsh mota2akeda en fe wa7er asmar(aw 7atta abyad) met2ademly..kont 2olt enaha ana..1

bas mawdo3 el sen da mobala3' fe awi akter mn 10 sneen kteer gedan da keda mn sharee7a zamanya mo7'talefa tmaman

we ba3deen kman 10 sneen kteer bardo ma3a el 3elm enha momken fe 7'lal 3 sneen tkon 3amla master we betfaker fel phd so 4 years from now is more than enough da law m7adesh 2al 3aneset

we mwaf2aha gedan fe2naha tesbet nafsaha we ykon leeha 2esm
bos ya batoot 2olaha law matgawezetsh tkalemny 3shan nethvbet e7na el etneen ma3a ba3d

enjoyed your writing ya basha

marwa mahdy يقول...

gamed gedaaan ya battot ,so funny

مها يقول...

ههههههههههههههه
كأنى باقراه لاول مرة
يا بني انت مالكش حل والله العظيم
يا بختها اللى فى يوم بجد بجد تحبها

:)

غير معرف يقول...

This post is actually a good one it assists new the web
visitors, who are wishing for blogging.

Also visit my blog post: screen next