2009/03/26

ابرز هديتك .. اعتز بصحبتك


السنه الى فاتت زى اليومين دول كده بالظبط قعدت اشرح لكم اد ايه ان اباهتكم وماماهتكم كانوا محظوظين لانهم شافوا اليوم دا من اتنين وعشرين سنه - كان ساعتها واحد وعشرين بس
وكل الى خته منكم رغم انى وضحت حقائق تاريخيه وبينت بالادله التى لا تقبل الشك انكم ولاد محظوظين وان مولد بطوط كان خير للبشريه -شويه كلام 

اكيد محدش عارف لو مكنتش جيت كان ايه اللى حصل - مش كان احتمال أبويا مثلا يطلق امى؟؟او يتجوز عليها .. او هى تطلب الطلاق 
واحتمال ماما حد فيكم تعرف كده فتقوم تقول الرجاله ملهمش امان وتطلب الطلاق برضه 
وطبعا لو مكنتش جيت اكيد اللى كنت هتجوزها كانت هتعنس .. واحتمال باباها برضه يطلق مامتها عشان خاطر البت اللى عنست دى
وكانت ماماتها هتعتبر دا اهانه كبيره .. هى مالها اساسا دا كله نصيب ... وبعدين تخده وتقطعه  وتحطه ف اكياس وترميه ف البحر .. وتنتحر  .. والبنت تتيتم وتعنس يبقى كتير اوى بجد
وطبعا مكنتش مدونتى هتبقى موجوده.. ومرات صاحب  البلوجر لما تدخل تشوف المدونات هتحس ان اكيد ف حاجه ناقصه فـ تطلب طبعا الطلاق من جوزها اللى مقدرش رغم انه صاحب شركه مدونات كبيره .. وجوجل بقى وبتاع .. ومقدرش يسد النقص الفظيع اللى هيسببه غياب بطوط عن التدوين......
ولما تتطلق بقى تاخد منه اللى وراه واللى ودامه فيبقى على الحديده ويقفل الشركه ... ويروح يبيع بطاطا على كوبرى القصر العينى
ويتخانق مع الراجل اللى هناك ... ولانه اجنبى الحكومه هتقف فـ صفه .. فمرات صاحب البطاطا اللى واقف دلوقتى طبعا هتطلب الطلاق لانه مش عارف يأكلها
ومحدش عارف الراجل الاجنبى - اللى كان صاحب البلوجر - هيبعلنا ايه .. ممكن تبقى مسممه وناس كتير تموت .. وناس كتير تترمل .. وناس تتيتم ... وحقوق الاطفال والحوارات دى
دا غير انى لو مكنتش جيت ..صاحبى اللى قاعد معايا ف الشقه مكنش هيقدر يدفع الايجار كله .. فيتخانق مع اهله .. وصاحب العماره ... ابوه يطرده ... وصاحب العماره يسجنه ... تقوم بقى البنت اللى المفروض يتجوزها مترضاش به لانه بقى سوابق
فابوها بقى ممكن يطلق امها .. وامها ممكن تقطعه وتحطه ف اكياس ...والخ
وكمان مصر كانت هتخسر رجل من اهم رجالاتها .. -دا اللى هو انا - والطب كان هيخسر دكتور من اهم رجالته .. وناس سنانها كانت هتبوظ .. وجوزها يطلقها برضه ... وناس اللثه بتاعتها كانت هتدمر .. ومراتتاها تطلب الطلاق .. وناس كانت هتعنس عشان شكل سنانها وحش ... والله بجد الحمد لله انى جيت
 

دا غير حاجات كتير لو قعدت فكرت ممكن اقولهاكم بس المشكله انى بجد مستعجل وبكتب البوست بسرعه رهيبه ومرتجل والله حتى من غير تحضير
المهم حد بقى فيكم يعمل زى المره اللى فاتت - بعد ما وضحت اهو ليكم اد ايه كان مولدى سعاده للبشريه - 
ويجى يقولى كل سنه وانت طيب يا دوك .. سنه سعيده يا بطوط .. هابى برث داى يا ابو البطابيط ... يارب تحقق كل احلامك السنه دى يا دكتره ... والخ الخ من الكلام دا ... احب اقولكم ان دا مش هينفع السنه دى
انا بقى مادى جداااااا ..جداااااا واحمدوا ربنا انى جيت اساسا
اللى هيدخل المدونه وايده فاضيه مش عارف هعمل فيه ايه ..
وعشان مغلبكمش ف التفكير ف الهديه اختاورا واحده من تلاته اظن كده عدانى العيب
  • لاب توب أبل ما كنتوش
  • كاميرا ديجيتل 10 ميجا بكسل و 12 اكس على الاقل 
  • اى فون
تجيب هديه تبقى شاطر ...امور  .. احبك .. احترمك .. اعتز بكوننا اصدقاء
متجبش يبقى سنتك معايا بيضا بإذن الله .. وكل كومنتاتى عندك يجولى وصورى وجواباتى .......وملكش حاجه عندى
عيدا ميلادى لسه يوم 31 الشهر دا يعنى تلحقوا تعملوا جمعيه وتقبضوا الاول ... محدش له حجه بقى ..وربنا يخلينى ليكم ياااااااااارب
انا جبت قطعه جاتوه واحده لحد ما استلم الهدايا وابقى اجيب تورته بقى :P

2009/03/13

الحل الخبور لمشكله المرور


فى دوله ما (مش مصر خالص على فكره ) عندهم مشكله فظيعه ف المرور .. تقدروا تقولوا البلد كلها واقفه .. اى حد عايز يروح مثلا - لميدان الجيزه او شارع فيصل او دار السلام او كوبرى الجامعه او بولاق - ( تشابه اسماء مش اكتر ) فلازم يعمل حسابه ان المتر - دا غير الكيلو متر - هيقطعه فى ساعه على الاقل
المهم انا عرفت من مصدر مطلع ف البلد دى .. ازاى رئيس وزائهم ( مش اسمه نظيف على فكره) فكر ف حل للمشكله دى 
والمصدر المطلع دا نقلى الحوار الى دار بين رئيس الوزرا وبين نفسه ( عشان تعرفوا المصدر بتاعى مطلع اد ايه واليكم ما حدث بينه وبين نفسه ..

شعب غبى غبى غبى .. ربنا يخده كله يااااااااارب .. واقفين فى الشوارع طول اليوم وعاملى زحمه وخلاص .. 
والى يغيظ انه بيطالب الحكومه بحل المشكله  .....اولا مال الحكومه ومال الزحمه ف الشوارع شعب بجد موارهوش غير وجع القلب
ثم مين السبب ف المشكله دى ؟؟ الحكومه ؟؟ ولا الشعب .. بمنتهى  البساطه شيل الشعب من الشارع تتحل مشكله الزحمه
شيل الحكومه من الشارع.. ولا حد هيحس باى فرق دا يمكن المشكله تتعقد اكتر
ما علينا لازم آجى على نفسى وأحل المشكله لأم الشعب دا ..  اموت واعرف اصلا مين اللى قال انها مشكله........انا عن نفسى شايف ان الزحمه فيها رزق...
اه طبعا فيها رزق وربنا ما يجعلنا قطاعين ارزاق
الزحمه دى مش موفره فرص عمل للشباب ... موفره ولا لأ محدش يقدر ينكر .. اللى بيبيع مناديل واللى بيمسح ازاز العربيات ... عمل دا ولا ؟؟ شباب دول ولا لأ
ثم ان الزحمه ممكن تكسب رحله عمره ...لو المواطن شغل اذاعه القران الكريم طول اليوم ف العربيه .. هيسمع على ما يوصل- ان وصل - على الاقل كل يوم جزئين فى شهر يبقى سمع القران مرتين .. يعنى بتاع تلات اربع سنين بالكتير ويكون ختم القران ويدخل اى مسابقه ويكسب عمره .. وياعالم يمكن يكسب حج
واللى ( استغفر الله العظيم ) بيمسع اغانى .. اهى فرصه للترويج لازاعات الاغانى وبعيدين يتصلوا بـ0900 ومين عالم يمكن يكسبوا اى حاجه
والزحمه كمان بتقلل فرص الطلاق والخلافات العائليه ... لان مفيش وقت .. نص اليوم ف الشغل ونصه ف المواصلات يتخانقوا امتى؟؟ .. ودا كمان بيقلل الكثافه السكانيه - على المدى البعيد - لنفس السبب و .... الخ الخ من الفوايد
بس هو شعب فقرى ومش مقدر النعمه الى هو فيها .. وهيفضل يتبطر لحد ما تزول من وشه .. النعمه اللى العالم كله بيحسده عليها
طب وحياتك يا دى الشعب لحل لك المشكله .. انا كنت عايز انعمك لكن انت مبيطمرش فيك 
وقعد رئيس الوزرا يكتب قرارت لحل المشكله
اولا : رفع سعر البنزين ... بدل ما الشعب عمال يتصرمح بالعربيه وعامل زحمه
ثا نيا : رفع سعر السولار.... وابقى ورينى بقى مرتبك ازاى هيقضيك مواصلات بس ياااااااابن الشعب ... لو عندك اربع ولاد ف الكليات والمدارس ..متوسط الواحد 2 جنيه مواصلات .. دا غيرك .. يبقى 300 جنيه كل شهر بالصلاه على النبى .. يبقى تغزى الشيطان وتسيبك من الشغل ( لانه ملوش لزمه بالمناسبه ) وتقعد العيال من التعليم ( لانى مش هعرف اشغلهملك

ثالثا: الى هيعمل اى حاجه بعربيته ف الشارع - عشان انا مخنوق من الشعب كله - يدفع غرامه خمس الاف جنيه وسجن شهر .. اهو يرحنا الشهر دا من الزحمه الى هو عاملها
رابعا :.. يبقى معاك مثلث وشنطه اسعافات ... وقبل ما تجيبهم ما شوفش وشك ف الشارع
ولو المشكله برضه متحلتش يبقى نلجأ لاخر قانون وهو
خامسا : العربيه الى يعدى عليها خمس سنين تتعدم هى وصاحبها
والله المستعان وعليه التكلان وبالله التوفيق