2010/02/07

أكتب الصح؟ ولا كله؟



النهارده كنت قاعد اتكلم وانا و( مصطفى) و ( زيكا ) و(عادل) واتكلمنا فى هل الصح انك تعمل رقابه على مدونتك ولا لأ؟
وبغض النظر عن رأى كل واحد فيهم فى الموضوع بس انا بعد الحوار قعدت مع نفسى فى العربيه افكر .. واكتشفت ان الحقيقه ان انا مش بدون واللى بعمله ابعد شئ عن التدوين. 
انا فهمى عن التدوين انه معمول عشان تكتب اى حاجه .. مره عن نفسك.. مره عن حاجه شفتها .. مره عن حاجه سمعتها .. مره عاوز تشتم .. مره عاوز تمدح .. مره عاوز تقول يلعن ابو البشريه كلها .. ومره عاوز تحكى عن مصيبه سوده عملتها  انت حر فى الاخر
وانا - زى كل البشر - مش كل حاجه انا شايفها صح بعملها .. ومش كل حاجه انا شايفها غلط مش بعلمها.
انا مثلا برفض الصداقه بين الولد والبنت .. برفضها من منطلق عقلى انى مستحيل هقتنع ان مراتى ليها صديق ...ومستحيل هقبل الوضع دا .. وبرفضها من منطلق شرعى.
بس هل دا معناه ان عمرى ما كان ليا صديقات .. مش هقول بعتبرهم زى اخواتى لان العلاقه بنا مش كده .. بس بعتبرهم زى اصدقائى الولاد.. وزيهم زى الولاد ممكن يوصلوا لمرحله انهم اعز اصدقائى او انهم مجرد اصدقاء..
اكتشفت وانا قاعد بينى وبين نفسى ان انا بعمل رقابه على كل كتاباتى بالازدواجيه دى .. من منطلق انا رافض فكره الصداقه بين الولد والبنت ورافض فكره ان اللى بيشوفنى عبر المدونه فقط يعتبرونى ولد صايع  يبقى مينفعش اقول ان ليا صديقات .. وكأنى بكتب فى المدونه الصح مش بكتب عن محمود انا .. ودا بعيد عن هدف التدوين .. انا كده مش بدون ودا بيفوت عليا حاجات كتير تتكتب.
مكتبتش عن البنت اللى كنت بحبها .. كتبت بوستين ومسحتهم  .. وكانوا بوستين يضحكوا .. رغم انى كنت بمر بحاله نفسيه فوق من الزباله وانا بكتبهم ..ومعرفش ازاى ساعتها كتبت بوستين يضحكوا .. كنت عاوز اضحك وكتبت .. او مكنتش عاوز ابان حزين ..وبعدين مسحتهم لأن الصح - فى قناعتى - ان العلاقه دى مكنتش صح .. وما ينفعش تبان ضعيف وواد كتكوت.
مكتبتش انى سبت البيت بعد خناقه بينى وبين ماما ورحت اسكندريه .. عشان الصح اننا منتخانقش مع امنا وماينفعش تبان انك قليل الادب.. رغم انى بتخانق مع امى زى اى حد 
مكتبتش انى دبلرت سنه بسبب موضوع البنت اللى كنت بحهبا دى ودبلرت سنه كمان بعد ما كان تقدرياتى فى كل السنوات اللى قبلها جيد جدا لاسباب تانيه .. لان الصح انى مدبلرش وماينفعش تبان فاشل
مكتتبتش عن السنه اللى عشتها  ايام المدينه الجامعيه  .. لما الواحد كان بيصحى قبل الفجر يلاقى نفسه احتلم .. فيقوم فى عز الشتا .. والجو برد ومواسير المايه فى المدينه الجامعيه فى الهوا.. يعنى المايه تلج .. ومفيش سخان .. بس عشان الفجر ميرحش الواحد ياما قام وخدله الدش البارد والمتلج دا .. مكتبتش دا عشان مش صح انك تكتب كلمه زى (احتلمت) فى المدونه رغم ان عادى انك تحتلم
مكتبتش عن حاجه خنقانى بقالها يومين ولحد لحظه البوست دا بسبب .. مش هقول السبب بس هقول هو عامل زى ما ولد يجيب هديه لولد سلسله .. التانى شاف ان دى اهانه انك تجيب له هديه سلسله واعتبر انك كده شايفه واد سيس وتيييييت ... والاول مكنش قصده بس هو شايف ان عادى ان ولد يلبس سلسله ومكنش قصده يزعله . 
انا بقى امثل فى المثال دا الشخص الاول .. وكاره نفسى انى فعلا مقصدتش اهين التانى وان فى فهمى ان دا عادى وكاره نفسى اكتر انه موصولش كده   ( بالمناسبه دا مجرد مثال عشان مش عاوز تعليق يسيب الموضوع ويمسك فى السلسله وانا مقتنع ان مينفعش راجل يلبس سلسله)
اكتشفت انى اليومين دول مخنوق ومش طايق نفسى .. وكتبت بوستين تلاته فيهم ضحك .. رغم ان المدونه مكان تفضفض فيه مش تضحك فيه على نفسك.
اكتشفت انه بيمر عليا لحظات ببقى عاوز اقول فيه كلام ابيح مش بقوله فى الواقع ... بس مش المفروض انى  معرفش أعمل كده على المدونه .. اه انا مش بقول كلام ابيح فى الحقيقه عشان اتربيت ان دا غلط .. بس مين قال اننا مش بنشتاق نعمل الغلط.
وانا قاعد بينى وبين نفسى اكتشفت ان انا فى حاجات كتير مفروض انى كنت اكتبها عشان ابقى اشوفها بعدين .. لان دى مدونتى .. بس انا معرفتش اكتب عنها لانه ماينفعش.
مكتبتش مثلا ان كان معايا شريكه فى الشغل  .. والعلاقه بنا كانت محترمه جدا .. والله وفوق من المحترمه .. وبعدين اتكشفت ان البنت دى محترمه مع المحترم وانها فى الحقيقه صايعه جدا اخر درجات الصياعه اللى تتخيلوها.. بس انا حسيت ان القصه دى غلط انها تتكتب

مره واحد كان قاعد معانا وسوو كان فى القعده .. الواحد دا كان عاوز يكتب على المدونه تجربته انه عاش مع مومس فى بيت واحد لمده كام يوم .. سوو قاله متكتبش حاجه الناس تمسكها عليك بعد كده .. هتستفاد ايه لما الناس تعرف عنك انك كنت مع مومس اربع تيام ..
وجه نظر سوو صح جدااااا وانا مقتنع بيها .
بس تفتكروا الحل ان الواحد يكتب بنك نيم محدش يعرفه؟ ولا يكتب وخلاص وطظ فى وجه نظر الناس.
مينفعش الواحد يقف فعلا عريان ادام الناس اللى يعرفوه وبيشوفوه .. وبرضه مينفعش تعمل مدونه بتتكلم عنك متكتبش فيها الا الصح رغم انك زى كل البشر بتعمل الصح والغلط .
حاسس دلوقتى انى مصدود عن التدوين جدا ومش طايق اكتب حاجه ودماغى بتلف وبتدور حوالين انا عاوز اعمل ايه؟ 
ياريت اللى يسيب كومنتك ميركزش على كل مثال كحده .. دول مجرد امثله لقيت انهم ممكن يوضحوا وجه نظرى .. ويعلق على اخر سطور فى البوست والاسئله اللى بيطرحها البوست ككل

هناك 30 تعليقًا:

barbie يقول...

write what ever mahmoud want to write w sebak men elnas...elnas msh 7atfedak lama tekoon ma5noo2..w ab3deen fe 7aga law enta ma5no2 w me7tag tefdfad u can write it on a peper msh shart the blog.....w bekda fadfadt bas msh 3ala elmal'a

starfire يقول...

مش لازم لما تدون انك تتكلم عن نفسك ممكن تتكلم عن افكارك ممكن تكتب فى السياسه بس مش شرط انك تكتب عن نفسك
وزى ما قالت باربى اكتب اللى انت عاوزه فى ورقه

غير معرف يقول...

عارف انى بطلت تدوين بسبب اللى انت بتتكلم عليه دة؟
كل ما اجى اكتب حاجة اقول طيب لو فلانة عرفت هتقول عنى ايه؟ طب لو فلان عرف هقابله بأنهى وش
فجبت ضرف المدونة
اعتقد الحل انك تعمل مدونة بإسم شخص مجهول و ماتعملش علاقات مع حد عشان تقول اللى فى نفسك

pinky يقول...

اكتب الصح بس

لــــ زهــــــراء ــــولا يقول...

السلام عليكم

بص يا دكتور احيانا مش كل اللى عاوزين نقوله او نكتبه بيكون صح
انت قول كل اللى جواك
صح او غلط على فكره الصح ممكن يكون من وجهة نظرك انت صح وممكن يكون من وجهة نظر الاخر غلط
فاهم كلامى
ربنا يوفقك ويكرمك

Mahmoud Ahmed يقول...

اهم حاجه انك تكون صريح مع نفسك
حتي لو بينك و بين نفسك
و تحاول تصلح اي غلط بتعمله

ست البيت يقول...

ما هو لما قلت اننا خوات محدش صدق
سلام عليكم الأول
وبعتذر عن الدخول المتقطع دا
كنا بنجوز الواد الكبير
والوسطاني كمان اسبوعين
عقبال ما اجوز د.محمود أخويا الصغير اللي بيشرفني ف المحافل الدولية
بص يا د. كلامك كأن أنا اللي قيلاه
نفس اللخبطة والدربكة اللي بتبقى في عقل الواحد
ساعات بنبقى عاوزين ننفلت من الفقاعة اللي حطينا نفسنا فيها
او الناس حطيطنا فيها
باختصار الموضوع دا حتلاقيه قوي عند الناس اللي بتحاول تلتزم زي وزيك
وزي ناس كتييييييييير قوي
بتقع ما بين بين
ما بين ألزامها اللي بيحتم عليها واللي بنحب حتميته دي أن ما تعملش كذا وكذا
وما بين طباع النفس البشرية وحبها وجلبها ع حب كل مصيبة توديها ورا الشمس
ساعات مثلا مثلا يبقى الواحد مشتاق لكمة حلوة من حد
واحد نفسه في زوجة تقوله كلمة حلوة
رغم انه مش متجوز
ومش قادر لظروفه ايا كانت
يلاقي واحدة باعته تقوله كلام جميل وتشكر فيه
صدقني بيفرح
ووقتها بيحصل اللي انت وصفته في مدونتك دا كله
الصراع القوتين اللي بيشدونا من اليمين والشمال
والأمر دا صعب قوي للي الناس بتشاور عليهم بالالتزام
يعني مينفعش واحد مثلا ملتحي يقف يعاكس بنات
رغم أنه مسنفعش واحد من اساسه يعاكس بنات
مينفعش واحدة ملتزمة محجبة تتكلم عن أحساسها بفراغ عاطفي مثلا مينفعش واحدة منقبة تقول أنا نفسي في راجل يحتويني
والله حتلاقي التعليقات نازلة ترف عليها زي الزفت وحتلاقي المدونين اياهم نشروا غسيلهم المترب عليها لمدة 3 سنين
رغم أ، دا عادي
خلاصة القول متكتبش غير كل حاجة محترمة فعلا سوو عنده حق حنستفاد ايه من واحدة بتتكلم عن علاقة محرمة
دا مش بس فحش لأ دا تفاحش كمان

ست البيت يقول...

ودا يودينا عدل على كلمة سقف الحرية
يا اخي الصغير ما فيش حرية مطلقة
لأن الحرية المطلقة تفجر كل النزعات الحيوانية بداخلنا
لو ما فيش قوانين بشرية وقبلها إلهية
حتبقى غابة فعلا
أنا حرة في القصاص منك أو العفو عنك
لكن لو القتل مفتوح حتفنى البشرية
ولو ما فيش قصاص ما كانش حيبقى في رادع
الحرية لها ثمن وثمنها أن تقدر تلك الحرية ولا تمتهنها
تحياتي يا بطوط
بجد التدوينة دي تلخص حالتي التدوينية في الشهريين اللي فاتوا
يا ريت يكون فهمت قصدي من الكلام الرغي دا كله
يالا سلام عليكم

starfire يقول...

اكيد فيه حدود للحريه فانت حر مالم تضر

فاتيما يقول...

ايه صيغة السؤال الملعبكة دى
دى مينجاوبش عليها اشاسا !!!!


عموما نعبر هذه النكطة
و اقول لسعادتك رأيى
فى هذا الموضوع الشائك


انت الأول ابن حلال مصفى
و اصلا انا كنت بفكر ف هذا الموضوع بقالى مدة و بتناقش فيه مع اقرب المقربين ليا

و وصلت لقرار
و نفذته فعلياً



سووو صح
و نصايح المقربين صح
الواحد مش لازم يكتب كل حاجة

بس برضو احنا مش زى بعض
و كل شيخ و له طريقة
يبقى لو كتب خلاص
عشان دا اسلوبه و رأيه
يبقى الحل إيه؟؟

انه يعمل زى انت ما عملت
و يشيلها ف المسودات بعد شوية



جالى اراء كتير تنصحنى بذلك
حتى من مجهولين كتر خيرهم يعنى
عاوزين المصلحة


و انا كنت بفكر فى هذا بعد ما لقيت التدوين بقى بيدخله نماذج غريبة عجيبة الشكل و المضمون



لو تعرف بوست التغريبة
دا اول حاجة خليتها مسودات
و غيره تانى شيلته مسودات
و لما يسوفة يرجع ...ان شاء الله
هخليه يقراهم على راحته


ساعات الواحد يكتب حاجة
عشان حاسس انه لازم يكتبها
فى هذا التوقيت بعينه
و الا جراله حاجة

و عشان بيكون محتاج رأى
و ونس و طبطبات و نصايح الاخرين اللى بيحبوه و يحبهم


بعد ما تعدى المرحلة
خلاص ... يشيل الحاجات دى
و يحتفظ بيها لنفسه


الا لو كان ناوى يحطها فى شكل كتاب
او أى شكل او وسيط آخر


الملخص ان الواحد
يكتب الصح
و بعدين يغربل هذا الصح


ملحوظى حانبية
لو قررت تشيل بوستات
ابقى ابتدى ببتاع البنات "الندلة" عشان ضايقنى انا وكل اللى قروه تقريباً مونث و مذكر


خالص ودى يا اجدع دكتور سنان
ف مصر

adel يقول...

انا اتكلمت معاك !!!!
ماشي

بص انا لسه عند رأي مش معني انك عرفت الناس انك تخجل و تخبي عوراتك منهم
لانهم لسه مش من حقهم برضه يقيدوك

النقطة الي بشترك فيك معاه اني مش بشتم اصلا في الحقيقة فبقي الطبيعي ان ده مش علي المدونة
وعشان كده لما بقرا شتيمة مش بتبقي حساسية بس لو ملهاش لازمة بحس بالرتلة من اللي بيكتب و السلام !!!!!

بس التدوين من دون و دون يعني يكتب
اكتب اي حاجة و كل حاجة
ياراجل زيكا عامل مدونة يكتب عليها status بس
شفت الفراغ :)

هتكتب الصح بس ؟؟؟
لا اكتب الغلط قبل الصح
مش يمكن الناس اللي هنا (اللي بعضهم) علي درجة من الذكاء و الخبرة الاكبر منك تنصحك بشئ يقنعك

وبعدين هتخبي الغلط ليه ؟
مكسوف من الناس و مش مكسوف من ربنا !!!!!!!!!!!

بص انا رغم اني اكتر واحد بعمل حسابي اللي بيقروا بس ماشي بمبدأ مريحني قوي

كل اللي يعجبك و البس اللي يعجبك ...اكتب اللي يعجبك
وسوري ... طظ في الناس

لو الناس فاهماني ... هتفهم كلامي
لو مش فاهماني .. يبقي متفرقش معايا يفهموا ولا لا

صح الكلام ؟

غير معرف يقول...

بص يا بطوط
في مثل كدا بيقول
صوابعك مش زى بعضها
انت نفسك جواك حاجات هتحس انها غلط
من وجهة نظر حد تانى ممكن تكون صح
وفي كل الحالات وتحت اى ظرف
مش هتقدر ترضي جميع الاطراف المختلفه او حتى لو كانت متفقه على حاجه
اكيد مختلفه في حاجات تانى

بس انت لو عايز تكتب .. يبقى تكتب اللى يرضي ضميرك
سواء لاقى السلب او الايجاب
اهم حاجه انت من جواك تكون راضي
ماتدوسش على نفسك ومشاعرك في سبيل ارضاء الاخرين وتنال استحسان منهم
انت بنى ادم
ودم ولحم ومشاعر وحقوق وكيان وعمل وفي الاخر سيرة بتسيبها في الدنيا
او بصمة تسيب اثرك فيها

انا اول مرة اقرالك كم الكآبه دى

ربنا يزيح عنك همك

ديدي

KING TOOOT يقول...

المشكلة إنك فاهم إن التدوين ده لازم يكون مرايا لحياتك
الحقيقة إن التدوين ده جزء من الحياة ، مش الحياة كلها
ممكن تكتب ، بس لازم يبقى إللي إنت حاتكتبه ده مناسب لحاجات كتير
شخصيتك
قناعاتك
أخلاقك
وطبعا قبل ده كله
دينك
يعني مش كل حاجة أعملها لازم أكتبها على المدونة ، والموضوع هنا مالوش علاقة بالصح و الغلط ، بيكون له علاقة أكثر بما هو خاص وما هو عام
يعني مثلا الراجل ممكن يكتب عن حبه لمراته و عشقه ليها و إحترامه لشخصيتها ، لكن ماينفعش بقى يكمّل و يكتب إللي بيحصل في غرفة النوم مثلا ، رغم إن إللي بيحصل بينهم ده شرعي و صح و مش غلط
ماينفعش أكون في مرة غلطت مثلا ، و فقعت واحد مقلب ، طلع من نافوخه ، وأجري أكتب ده على المدونة و أقول أصلي عملت ده يبقى ليه ما أكتبوش
شوف يا دكتور
المدونة دي زي العلاقة بينك و بين الناس بالظبط
لما بتتخانق مع والدتك مثلا مش بتقف في وسط الجامعة تلم الناس و تقول أنا النهاردة يا شباب ضربت خناقة مع أمي علشان كذا و كذا ، يمكن بتحكي لأصدقائك المقربين ، لكن في العموم ، مش بتقول لكل الناس
المدونة ، وسيلة علن ، و إعلان ، لأنها وسيلة نشر ، يبقى يتحزف منها كل ما هو خاص ، وكل ما هو يضر الناس أو مالوش لازمة عندهم
ويفضل المفيد و النافع ، حتى لو إن إنت في الحقيقة مش دايما بتعمل أشياء مفيدة و نافعة
لأن التعامل في ما هو متاح للعامة ، ماينفعش غير بقواعد العلانية ، و حزف كل خاص و حميم
خالص تقديري
KING TOOOT

moaz villa يقول...

يجب أن تؤمن بما في داخلك تجد ماتكتبه يعبر عنك

ستيتة يقول...

ها اكتب من غير ما أقرأ تعليقات الناس علشان انا كمان عاوزة أفضفض
قلت طب ما تروحي تكتبي بوست
قلت لأ
ها أفضفض هنا
مليش نفس اكتب بوست عندي

انا كمان نفسي مصدودة على رأي زكي رستم


بص يا سي بطوط
المدونة مش دلق كلام ابدا
بدليل فيه ناس عاملين مدونات بيدلقوا فيها كلام لو دخلنا لهم مرة مجاملة بنجد زهق ومش عاوزين ندخل تاني وعارفين انه دلق كلام وطب نفسي بس ومفيش شيء ها يترك اثر في نفسنا

التدوين او الكتابة موهبة بس مش عميقة
يعني محدش فينا او قليل جدا منا ممكن يبدعوا ويبقوا كتاب محترفين
لكن اغلبنا بيكتبوا حلو
بيكتبوا شيء ساعات بيفرج عن الناس
ساعات بيوصف الناس
ساعات بيعمل حالة تخرجنا من حالة الهه اياها


ساعات بكتب ولما اقرأ اللي كتبته بعد شويتين كده اتعجب انا جبت منين الكلام الجميل ده
آه ساعات بيعجبني اللي بكتبه
نادر بس ساعات بتحصل
واقول لو انا في اللحظة دي مش ها اعرف اكتبه
انا كأن اصلا كان علي عفريت هو اللي كاتب مش انا

انا كمان ممكن زي ما انت بتقول احكي كل شيء ينفع يتكتب او مينفعش
انا مش بتكسف وبستحي ولا حد ماسك لي ذلة ولا يعرف يمسك

بس قعدت كده مع نفسي لقيت شيء مهم قوي يا بطوط
فيه فرق بين انك تحكي كل صغيرة وكبيرة وتبقى قدام الناس عريان وكأنهم اكتر من اهلك
لأن كتير من أهلك ميعرفوش كتير من اللي ها تحكيه على المدونة
وده مش عيب
لو كان ها يريحك اعمله
لو كان ها يفيد حد اعمله
وانا كمان ها اعمله

لكن لو طلعنا النفس من جوا صدرنا
ومدخلش تاني
وانتقلنا للحياة الآخرة
وقامت قيامتنا
لازم نكون متأكدين إن اللي احنا كاتبينه ها نجتهد منخدش عليه ذنوب زيادة
ولا ها يوقفنا ييوم العرض زيادة
ولا ها نتعاتب عليه زيادة
لأن افعالنا لوحدها ربنا أعلم بيها
وقد إيه هي شين وعار وشنار
يبقى حتى المدونة اللي بتفرج همومنا نتحاسب عليها

ما احنا ها نتحاسب عليها
بس ياريت تدخل في باب الحساب اليسير
ياريت
ياريت يكون فيها تبسمك في وجه اخيك صدقة
ياريت يكون فيها الكلمة الطيبة صدقة
ياريت يكون فيها علم ينتفع بيه

ماهو تجارب الحياة علم
ولما بتحكي شيء وقعت فيه ولو بشكل ظريف وتقول للي اصغر منك يمكن وجايز يقرر ميتلسعش من الشوربة

دي وجهة نظري الملخبطة جدا
ومعرفش كتبت اصلا ازاي
انا نفسي مسدودة عن الدنيا كلها

Unknown يقول...

سلام عليكم بطوط
كنت همشى و ارجع لك تانى لأن الموضوع عاوز كلام (مرتب ) حبتين لكن لمّا قرأت تعليق كينج توت حسيت انه قصر عليا الطريق جداً ،، أنا مع كينج توت تماماً

،،، عارف فى حاجتين بحطهم أدام عينى لما آجى أكتب أى حاجة على المدونة

- الأول لو ليا عمر و نصيب فى أولاد يكبروا و يقروا اللى باباهم كان بيكتبه ،،،؟

- تانى حاجة لو مليش عمر و انتهت حياتى وفضل الكلام ده اللى رايح واللى جاى يقراه ،،، هيدعى لى و لا هصعب عليه و يتعظ منى و يقرر ميعملش زيىى المشكلة اكبر إنى لما أموت ،، طبيعى من بوستات الزملا إن معظم المدونين لأول مرة هيدخلوا مدونتى و يقروا اللى كنت بكتبه بالذات آخر بوست ،،، طيب لو طلع بوست بكتب فيه عن نزوة ؟

المدونة دى عمل احنا بنعمله غالباً و احنا و اعيين مش واحنا سكرانين أو نايمين ،، يعنى مكلفين تماماً و احنا بنكتب كل كلمة ،،، و ما من كاتب إلا سيفنى و يبقى الدهر ما كتبت يداه ...

عارف ياجميل ،،، حاجات كتير حتى فى الشرع بيبقى مش المفروض تتقال ،،، و طبعاً انت عارف بعض التهم اللى لازم يكون فيها اربع شهود تقريباً مع استحالة ان ده يحصل ،، من باب الستر ،، بستغرب أوى من كتير من الكتاب يكتبوا عن سيرتهم الذاتية و انه شرب خمر فى مكان و انه اقام علاقت غير شرعية ،،، بحس انه بيستهبل ،،، هو مش المفروض اننا نوقف الانفلات اللى حاصل والا نساهم فيه ،،، بتخيل فى أوقات كتير لو حد دخل قرأ حاجة عندى و راح دور عليها و كانت بداية انحرافه ،،، رغم انى كنت بكتب عن (حاجة عملتها ) و المفروض انى أكتبها مدام عملتها ،،،
أنا مش موافق على وجهة النظر دى يابطوط و شايف ان المدونة مش مكان للفضفضة اللى بيقف يفضفض فى الشارع أو أى مكان عام بيكون حد فاقد لقواه العقلية أو متخدر لإجراء عملية جراحية أو أو ،، إلا إن كان فى وسط أصدقاؤه المقربين جداً
المدونة صوت عالى و احنا مش بنعلى صوتنا إلا علشان نوصل رسالة واضحة و نكلم بيها كل الناس زى اللى بيتكلم فى ميكروفون ،،، لو ينفع نمسك ميكروفون و نلف الشوارع نحكى أمثلة زى اللى اتقالت يبقى ينفع نكتبها على المدونة

طبعاً كل المواقف اللى بيتقال عليها ممكن مناقشتها بشكل غير شخصى يركز على المبادئ و الأفاكار العامة ،، بدلاً من عرض صور قد لا نرضى عن أنفسنا يوماً إن عدنا إليها ،، لكن للأسف اللى بيتنشر على المدونة صعب يتمسح ،،،
تقدير لأجمل بطوط على العم بلوجر
ومعذرة للإطالة

R-H-S يقول...

بيتهيألي ان التدوين تبادل منفعه يعني ممكن تكتب بوست او تجربه عن نفسك تنفع واحد مر او هيمر بنفس التجربه
وممكن تكتب مشكله ليك واحد مر بيها وعنده خبره ويقدر يفيدك

دا مفهومي عن التدوين

وممكن مدونتك تتعمل كتاب هي كمان وتبقي مشهوووووور.

تحياتى يابوالبطابيط(لو مش عجباك مش هقولها تاني)

Helium Atom يقول...

A3taked ennak ert7t shwaya, coz u admitted some of ur hidden stuff :)

Faker abl keda lamma kanet eimanyatna aktar, wi konna benra2ib kol 7aga bin3melha?...el e7sas da bytooh mennena wi bydee3 ma3nah kol ma eimanyatna bt2el

3aref zay eh?...zay ma kont bet2ool zmaan " zanbi ah, zanbak enta la2" tb3an m3a e5tlaf el sbab. bass el 5oof men enni akoon sbab fi tadleel 7ad, kan hwa da el rakeeb el wa7eed

boss ya btoot, ma7adesh aal en el blog da hadafu da3awi... wi ma7adesh aal ennak el mafrood teban malak through ur posts " wi mosh by7sal, bel3aks enta betban 7ad 3adi"...lakin EZA BOLEETUM FASTATERU, mosh ma3nah ennu y7sal moseeba aw zanb kbeer, bass 3la el a2al 7ers, mogarrad 7ers enni asheel zanb 7ad 3mal zay elli ktabtu...zanbi ah, zanbak enta la2

3aref zay eh?... zay el klam 3la el sex..mafakartesh fi marra leh el klam 3la el sex in-public 7aram?!
marra enta kont bet2olli, ana lamma by7sal 7aga ma3a as7abi, bagri wi asaya7 3ashan madeesh 7ad forsa enni yzlleni… 7atta ana yumha oltelak, keda enta 7yatak kollaha mosh feeha 5soosya… olteli sa3et’ha ana bakteb elli yenfa3 yetktab, bass mosh bsaya7 li nafsi!

Btoot, enta bt3ani men twahan aw la5bata, nateeget en ba3d el eltzam bi kyam mo3ayan fakad ma3nah, nateeget za7met el dunya. Abl keda kan eltzamak kan men el ktob, bass delwa2ti el mafrood t7afez 3aleeh ba3d kol sadma fi el wake3…da el far2 been el ktab wi el 7yaah

Mawdoo3 el nickname momkin yedeek 7orreya aktar, bass mosh zay ma enta mota5ayel… 3ashan fi el a5er nafs el sha5s hwa elli bykteb

Btoot, 5ud balak 3la nafsak, wi ew3a el dunia tfrumak wi tdaya3 m3ani gameela gwak… wi ya rab tkoon kwayes, m3a enni al2ana 3aleek geddan :-S

Unknown يقول...

بطوط ياجميل
وقعت فى واحد رغاى النهاردة معلش ،،، البيت بيبتى أكيد :)

فكرت فى حاجة كمان ،،، بتخيل لو دعوات ( حرية الإبداع و التعبير ) بمفهومها اللى يمكن يكون البوست ده جزء منه اتنفذت بشكل كامل ( طابعاً احنا بنعيشها بالفعل لكن بشكل جزئى ) و بقى كل حاجة مطروحة و كل التجارب مكتوبة فى الإعلام المقروء و بالتالى متمثلة فى الإعلام المرئى و ايضاَ محل نقاش فى الندوات و البرامج ،،، عندى سؤال إجابته بقت بالفعل صعبة من دلوقتى ،،، هنربى الأجيال اللى جاية ازاى و هنلاحق على ايه و لا ايه ؟
تقديرى

غير معرف يقول...

احيانا بنبقى محتاجين نكتب حاجات جوانا ونعبر عنها ومش لاقين مكان الا المدونة عادى لو نكتبها لو كانت مواقف او احتى اخطاء لينا كلنا بنغلط بلازم نعرف اننا غلطنا ونرجع عن اللى حصل
ونفكر مرة واتنين وتلاتة فة اللى هنكتبه

وفكرة النيك نيم احيانا بتكون هى الحل

Unknown يقول...

مش عارف يصح أعلق 3 مرات على بوست واحد ولا ايه ؟ لكن نعتبره نقاش مفتوح
بالنسبة لموضوع النيك نيم ،، أنا شايف اننا بنناقش صلاحية الكلام للنشر من عدمه سواء تحت اسم حقيقى و لشخص حقيقى معروف أو لنيك نيم ،،، لأننا بنناقش تأثير الكلام على القارئ و على المجتمع بشكل عام مش على الكاتب اللى فعلاً مشكلته هتتحل لو بقى ( مجهول) ،،، و يبقى الموضوع زى تاييد جريمة ضد مجهول لو اتفقنا على عدم صحة بعض المواضيع للنشر بشكل عام
بالمناسبة كل المواضيع تصلح للنشر بشكل يليق للأماكن العامة مع اختلاف فى عرض الصورة و مدى القرب منها و مدى عرض التفاصيل ،،، بمعنى أن الصور الخاصة جداً تصلح للنشر بشرط تحويلها لصورة عامة و مراعاة ذلك ،،،
تقديرى

الشعب لابد له من حكومه تشكمه يقول...

اممممممممم عندى حالة سده النفس دى:)

بس هقولك انا مثلا معروفه انى مرحه جداااا ومش من النوع اللى بيكتئب نوهائيا ومش بعبر عن اى حاجه جوايا نهاااااائى’
لما عملت البلوج قلت هورى جانب تانى محدش بيشوفه هتكلم عن حجات جوايا او اورينى نفسى وانا كئيبه بس تخيل,,فشلت فشل ذريع
وعملت زيك بالظبط فى عز مكنت بكون مضايقه بنزل بوست خفيف والناس تقول ضحكتينا اوى!!!

لما بدات احتك بالمدونين فى الحياه فى حجات محدش يعرفها مثلا حواليا حاجه تخصنى من جوه زى مثلا انى بحب الورد اوى وبحلم ان هدايا ورد تنزل عليا لما تقابل حد ويقولك هجيبلك ورده ومتزعليش كده,
عارف بتتخض لانك بتحس ان الحجات بتعتك اوىىى اللى حواليك شافوها وانك بأيت مكشوف اوى ودا مريحنيش بصراحه,

من الاخر اكتب اللى يريحك واللى انت شايف نفسك مش هيضايقك ولاهيحرجك وتقدر تحط عنيك فى عنين اى حد وتقول ايوه ان كتبت ده وتقولها من غير كسوف.
لو شايف انك تقدر تعمل ده اعمله,

بس انا شايفه برضه ان كل كلام وليه سقف مش لازم يتعداه,مش فكره حرام ولا عيب’اللى اقصده فكره خصوصيتك انت.

The illusionist يقول...

هو ده الموضوع اللى الواحد يقول فيه كل اللى فى نفسه
هنقول
وربنا يستر

The illusionist يقول...

اولا مساء الخير عليك يا استاذ بطوط
انا كنت ناوى من اسبوع انزل موضوع شبه موضوعك حبه
بس كسلت
فبكده هكتب موضوعى عندك وربنا يسهل
انا فكرت فى نفس الحكايه
انا نفسى اكتب كل حاجه فى نفسى
عاوز اخش اشتم كل الدكاتره واحد واحد باسمه
وشتايم تليق بيهم
عاوز اخش اقول انى مخنوق
واعبر عن خنقتى
مش دى مدونتى
وانا حر
حد ليه حاجه عندى مثلا
بس للاسف الشديد
احنا كلنا مهما ان كانت درجه استهتارنا
هنخضع لقانون النقد
انت خايف
الناس تاخد عنك فكره غلط
فى حين انت عاوز تنطلق
عاوز تقول كل حاجه انت مش قادر تقولها بلسانك
انت بتقولها حتى بايدك وتهرب
واللى بيرد عليك بايده برضو
يعنى حتى دى مش شجاعه
ومع ذلك كمان
انت خايف تقول بايدك
هتقول ايه
هتقول ان انت شربت حشيش قبل كده
هههههههههه
ابقى قابلنى ان حد جه يعلق عندك
بل بالعكس كمان
الناس وهى بتشيت مع بعضها
وجت سيرتك هيقولوا ده حشاش واهبل
مش فضح نفسه على مدونته
طب ما يستر نفسه
ده اكيد مجنون
وحتى
حتى لو انت فكرت تبقى شخصيه محترمه ومستقله
وتكتب فكرك
ومش عابئ باراء الناس
هتواجه
اولا الناس مش هتزورك
لانك فى عرفهم الفكرى
راجل قبيح
ثانيا
محدش هيحترمك
ثالثا
هتبقى ماده للنقد
رابعا وده الاهم بجد
ان لو حد فكر يعلق عندك هيفتكرك كده فعلا
واحتمال يهزئك
او اللى يعلقوا عندك يبقوا ناس سفله فعلا
لانهم فاكرين اك زيهم

The illusionist يقول...

لذلك الحل صديقى بطوط
كما قلت انا منذ قديم الازل
فى موضوع واحد ليا اختلفت كثير من الاراء عليه
http://nightpiper.blogspot.com/2009/10/blog-post.html

ان اهم حل النفاق
انت بتنافق
نافق ثم نافق ثم نافق
هتنافق نفسك بكتابه اشياء انت مش عاوزها
هتكتب كل حاجه انت مش عايزها
لا الناس هى اللى عاوزاها
هتنافق الناس فى مواضيعهم
لو كتبوا الصح
هتقول كويس
كتبوا الغلط
اما تنافقهم عشان تبقى صديق ليهم
ومتفقدش شعبيه
او تعمل العكس
وهتفقد فعلا
مش عارف اقول ايه
تكتب الصح
ولا كلو
لا طبعا
الصح بس
كلو ده
تقوله لاصدقاائك بس
المدونين مهما ان كانوا ايه
مش هيبقوا زى صديق وشك فى وشه وبتقوله كل حاجه
لكا انت بقى لو عاوز تفضفض فعلا
يبقى بنك نيم ظريف
وده اسمه الهروب
بس احسن من الفضيحه
ومستنى رايك

أفكار و خيالات يقول...

السلام عليكم و رحمة الله و بركاته

الحقيقة يا بطوط أنت بهذا الملصق قد لخصت فيه كثيرا من الصراع النفسي داخل نفس كثير من الناس

أولا: أنا قرأت الملصق و تعليقات القراء و أعجبني كل التعليقات و كذلك ذلك الموضوع

لكن في رأيي :" إن التدوين ليس إلا جزء من حياتك و ليس مراية لكل شخصيتك "

و ده اللي لغاية دلوقتي مخليني أتردد كثيرا في الكتابة في المدونة

لأني مش عارف أركز على أي جزء من حياتي
ثانيا : " إعلم أن الكلمة طالما هي في فمك فأنت تملكها أما ان خرجت من فيك فهي التي تملكك "

ممكن تفضفض و ممكن تشاور أصحاب الخبرة لكن لازم تركز على اللي هيفيدوك مش تحكي لكل الناس


ثالثا :" قال تعالى" ما يلفظ من قول إلا لديه رقيب عتيد "
و قال النبي صلى الله عليه و سلم " كل أمتي معافى إلا المجاهرون "

يعني الكلام له شروط و ليس كل الكلام يقال
" و هل يكب الناس على مناخرهم في النار إلا حصائد ألسنتهم "

هارجعلك تاني بس هروح أصلي وآجي أكمل

marwa mahdy يقول...

ممممم,انت بتفكرني بنفسي كل ماكون عاوزه اكتب مذكراتي لاني بقالي فتره مش بكتبها قعد أقول ياعني لو وقعت المذكرات دي في ايد حد منظري هايكون ايه ؟اكيد مابعملش حاجات فظيعه بس ربنا يستحملك ويستحمل اذدواجيتنا اكتر من الناس.
وفي النهايه مابكتبش حاجه ,لكن هاكتب ان شاء الله مذكراتي لاني محتاجه أفكر مع نفسي يعني فضفضه مع نفسي ,صح بقي غلط هاكتب .
انت عاوز تحكي مع نفسك يبقي مع نفسك لو عاوز فضفضه وزي مابتقول مش بيهمك الاراء اوي اكتب علي الورق في حاجه مخصصصه لييك ,
وتسأل نفسك هدف المدونه اييه ؟ اي حاجه بضيع فيها وقت لازم يكون ليها هدف . المدونه بتكتب حاجات عن نفسك صحيح صح او غلط بس بحدود لانها موجهه لناس غيرك ليهم شخصيه تانيه خالص بظرووف تانيه ببيئه مختلفه يعني مش طالبه خالص فضفضتك وكلامك مع نفسك يأثر علي حد بالسلب ويوصل حاجه ماكنتش مفرووض توصل دي حاجه ,الحاجه التانيه في الدين حتي الجهر بالمعصيه شيء مش كويس,احكي عن كل حاجه شاغله بالك لانها اكيد هانكون فكرنا فيها او حصلت لينا بس العرض للموضوع لازم يكون فيه رساله بتقول حاجه صح حتي لو الموضوع كله بيتكلم عن حاجه غلط عملتها .مايهمكش بقي انك معرووف للناس وهيقولو عنك ايه؟
اللي فكرك ملاك ومش بتغلط أريحلك انو يشوفك وحش ويبعد عنك لأن تفكيره مش واقعي وهايتعبك فتكون جت من عندو واللي متقبلك بأخطائك وعارف ان حكايه او موقف كتبتها مش شرط تكون بتعبر عن محمود بكل تفاصيله وعيوبه ومميزاته أهلا وسهلا بيه .

صوت من مصر يقول...

عاوز اقولك انى عامل مدونتى لنفسى بدون اى شىء للاخرين فلو هشتم هعمل اى حاجه دى بتاعتى انا
دى رسالتى فى الحياة

محمد فؤاد (صاحب عمود النور) يقول...

بص انت زى ماقولت
انت بتدون عشان خاطر تخرج شحنه جواك
وممكن تكتشف ان عندك موهبه
بس

Dr.karim يقول...

ايه ياعم الكلام الكبير ده
بص ..مهما الواحد حاول يفكر قبل كل حاجه يعملها علشان مايندمش عليها اكيد اكيد هتقع منه حاجات
ايوه احنا بشر وبنغلط بس ربنا في اوقات كتير بيسترنا فمش لازم نفضح نفسنا
زي ما قال الرسول "افضل الصلاة والسلام عليه { كل أمتي معافى إلا المجاهرين}
فانا عن نفسي مش باعتبر انك تبقي صادق في كتاباتك للدرجه دي حاجه كويسه
الناس مش كلها دماغها زيك
مش كل الناس هتعتبر دي مصداقيه وشفافيه للمدون
فيه ناس هتشوفها قله ادب
وفيه اللي هيقراها وتعجبه ويمكن توجه تفكيره لحاجه تاخد انت ذنب عليها
وفيه اللي ممكن يزعل لانك اتكلمت عنه وعن حاجه حصلت خاصه بيه
فبالتالي فعلا لازم يبقي فيه رقابه علي تدوينك
ده رأيي..........