2011/06/27

تكتب الكتاب الاول وبعدين تتقدم :)

 
فى مثل هذه المواضيع بحب اخد رأى المبدعه نهى العربى .. لانها بتجمع بين العقل الكبير والطاقق فى نفس الوقت.
لذا ارسلت لها هذه الرساله طالبا منها رأيها واليكم الرساله.
والله يا نهى هانم انا رأيي ان احسن حل اى اتنين لقوا فى بينهم لنك والحياه بيس .. يكتبوا الكتاب وبعدين يبقى العريس يروح يتقدم للعروسه
وبكده ابوها ساعتها ميقعدش يبيع ويشترى فيه .. هو غالبا هيقتل العريس وخلاص :)
بس المشكله ان الاهل لما هيحسوا ان " العيال" اتصرفوا من وراهم ممكن يكون موقفهم عدائى ورغم ان دى مشكله كبيره بس خلينا نتفق ان العلاقه بين الابن والاب علاقه ابديه .. يعنى مستحيل تنتهى لمجرد شئ غلط حصل .. اه اكيد هيزعلوا وليهم حق .. بس فى الاخر هينفع ترضيهم .. لكن لو علاقه الجواز من الطرف التانى فركشت مش هيبقى ليها حل.
وبعدين انتى لو جيتى تشوفى اهم الاسباب اللى بيرفض عشانه الاهالى .. بيكون غالبا للابن هى رغبه اهله فى انهم هم اللى يختاروا له العروسه .. مينفعش يختار لنفسه ..او اعتراضهم على طلبات اهلى البنت حتى لو يقدر يجيبها .. لكن بيحسوا انهم طمعانين فيه .. ولو للبنت فبيكون السبب انهم عاوزين العريس يجيب لبن العصفور وكأنهم هيتجوزوا ويموتوا .. لازم كل حاجه تبقى موجوده من اول اوضه الاطفال لحد البامبرز وخلافه عشان لما يبقوا يخلفوا يبقى كل حاجه موجوده.
لكن بحل كتب الكتاب الاول ...خلاص بقى امر واقع والكل لازم يتصرف من خلاله ...اى اهل يقولوا اى كلام ملوش لزمه يبقوا عارفين انه مينفعش ... وان من الاخر احنا جايين ليكم عشان الشكل الاجتماعى لكن دى حياتنا واحنا اخترناها وخلاص.
بس هو  قرار لازم تتحمل عواقبه .. قرار بالحجم دا لازم كل طرف يبقى اولا متأكد انه الطرف التانى ينفع .. ويسأل عليه وميكتفيش بالعواطف بس .. وياخد رأى ناس اكبر منه فى الشخص التانى .. ويسأل نفسه مليون مره هو ينفع زوج ولا مينفعش .. مش كل صديق او حبيب او زميل شغل ينفع زوج ولا كل صديقه او حبيبه او زميله شغل تنفع زوجه ..دى حاجات محسومه.
الحاجه التانيه انهم لازم يكونوا مستعدين بالحد الادنى للمعيشه ويبقوا عارفين مادياتهم كويس جدا فى حاله الاهل اعتبروا دا عقوق وضربوا كرسى فى الكلوب
حاسس انها الجريمه المتكامله .. ايه رأيك انتى بقى وافتينا ماجورين 
فجاء رد نهى كالتالى :)
وجهة نظري في حوار الجواز ده
عشان الناس بتهلك فيه كتير
دلوقتي هل البلد دي فيها مشكلة جواز؟
اه فيها
سببها ايه؟
بالنسبة للطبقة المتوسطة الدنيا اللي انا انتمى ليها، المشكلة دايما في الاهل، فيه كمية اساطير مسيطرة ع الناس، رهيبة جدا و تقريبا هي السبب في الجواز و الطلاق سوا
يعني لغاية دلوقتي اللي بيتعرفوا على بعض عن طريق النت غير معترف بيهم، في حين انها طريقة زي اي طريقة و اعتقد انها مش حتكون اسوأ اطلاقا من اللي بيتعرفوا اول مرة في الصالون ادام الجاتوه و الحاجة الساقعة، و لو على السؤال في اي حالة ممكن تدور على التاريخ الجنائي بتاع اي طرف من الطرفين
كمان مشكلة المهر، الشبكة، القايمة، العفش،...الخ، و لو وقفت على دماغك و قلت امال انتوا ابتديتوا ازاي، يقولك ملكش دعوة و انا عارف مصلحتك، و اللي بالمناسبة مش مقنع بالنسبة لي حد عارف مصلحتي اللي انا مش شايفاها و المفروض اني اشتغل عليها معاه و احققها!!!
و القايمة اللي اساسا عادة لو البت مش طايقة العيشة بترميها في الزبالة و تخلع أو هو يقرفها عشان يخليها تخلع برده، انما ازاي نعمل حاجة غير ما عملت سنية و فتحية و حسنات و ام السعد؟؟؟؟ عيب
ده جبن اجتماعي بحت و حفرة تاريخية الاهالي واقعين فيها
تعالى بقى لكمية المشاكل الناتجة عن الحوارات الفكسانة دي
اولا الشباب يا حيتعقد يا حيتحرش يا حينحرف، و البنات يا اما حتبقى بوز يا اما حتتجوز واحد كل همها انها تحلبه في الفلوس، اما بقا فكرة ان شاب يتجوز من طبقة اقل منه ماديا عشان يقدر يكون في المكانة الاعلى و يعرف يجيب ع الطلبات دي، فكرة سخيفة جدا، عشان الجواز ده اقتناع روحي و فكري و عقلي و مليون حاجة تاني، ازاي بقا حعمل كل ده مع واحدة انا اختارتها لمجرد اني مش عارف اتجوز اللي اقتنعت بيها، و بعدين بيسألك ليه العيال بيطلعوا معقدين و الراجل مش بيطيق مراته بعد كام شهر، و ان الطلاق كتير
عشان معظم الجوازات حاليا اللي عاوزة تتم، اللي بيريح فيها الواد و البت دماغهم انهم بيسمعوا كلام دادي و مامي بالملي، يا كده يا حيركنوا، او يعدوا يهلكوا في خناقات لا حصر لها، عشان كل واحد حاطط في ذهنه شخص معين، و قابل بقا كمية الاتهامات المبنية على الحوار ده، و انتي مش متربية و بتصيعي من ورانا، و انت عاوز تعادي اهلك عشان حتة بت طب عليا الطلاق من امك ما انت مجوزها و لو وقفت على شعر راسك...
ثانيا، لو بيحب واحدة معينة و ابوها نفخه حيروح يدور على اي واحدة كحلة يطبخ فيها العيلين و خلاص شكرا على كده و اهه يبقى عف نفسه و جاب العيال اللي امه حتموت عليهم و كفا الله المؤمنين شر القتال، فين بقا حوار نظام الاسرة اللي احنا يا عيني ميتين عليه في المجتمع و خايفينه يضيع، دي اسر مشوهة اصلا
لمحبي التفاؤل طبقا و الالوان و كده انا عارفة الكلام ده مبيعجبش ناس كتير، بس انا مقتنعة ان ربطة العيال جنب اهاليهم بعد ما يبقوا شحطا دي اساسا بتموت فيهم الاعتماد على النفس او حتى قوة الشخصية، و بالتالي فعلا مبيعرفوش يفتحوا بيوت
الاهالي كمان بيبصوا اتجاه واحد، انت دينيا ملزوم بالطاعة المطلقة ليا الا في الشرك بالله، و بما اننا في 2011 و ابوك مش حيدخل يقولك اعبد تمثال العجوة اللي انا جبته، يبقى نتكلم في مستوى اعلى شوية، و هو انت ليك حرية اختيار اد ايه، و الفرق بين النصيحة و الاجبار، و الابتزاز العاطفي بتاع لو عملت كدا قلبي و ربي غضبانين عليك ليوم الدين....
عشان كده فكرت لو خمسين جوز، واحد و واحدة، عاوزين يبدأوا حياتهم بشكل متوازن و ناضجين فكريا و ماليا كفاية انهم يفتحوا بيوت، يروحوا يتجوزوا و يتخلصوا من العنب العنب العنب و القايمة و زفة التكسيات و ينشئوا بيوت و يا ريت يتفقوا مع بعض يعملوا كده في يوم واحد عشان تبقا صدمة للمجتمع الساذج اللي نايم في العسل و مش راضي يحل حاجة و مطلع عين اللي جابونا بس
الفكرة دي لو بدت خيالية لكن انا شايفاها حتتحقق يوم ما
طبعا فيه حاجات المجتمع مبيبصش ليها الا بقلم على وشه، يعني الاب مبيعرفش انه ابنه مدمن غير و هو عنده اوفر دوز و فاضله عشر ثواني و يودع، بالظبط كده حوار البرامج و و النبي سهلوا الشروط و خلوا العيال تتجوز بدل العرفي، و ان ابنك و بنتك بيتفرجوا على افلام من وراك عشان حاجتهم الطبيعية اللي انت فاكر انك مانعها، مش جايب نتيجة بقاله زمن، يبقى لازم قلم و لا مش لازم ؟؟
اما بقا اللي حيقيس على الناس كانت بتتجوز زمان ازاي يروح يرجع زمان و هو يستريح 
ايه رأيكم بى فى الليله كلها :)

هناك 8 تعليقات:

زهرة الضحا يقول...

الــــــــــــــــــه :)
والله انا دايما بقول ان مرحلة الخطوبه دي حوار فكسان و انها مشاكل و خلاص
و انا و للأسف مجربه الحوار ده
بس مش عارفه هل دا حل واقعي ولا جنان

بجد تحياتي علي موضوع انا هموت و انفذه :)

بت خيخة وأي كلام يقول...

بص يا بطوط


الفكرة دى تجنن
لو فعلا الطرف التانى يستحق عن جدارة انك تشتريه اوي كدة
لدرجة انك تكتب كتابك عليه بدون علم اسرتك فى اول الامر

اصل فعلا مش اى حبيب ولا اى زميل ولا اى صديق ينفع يكون زوج يتحمل معاك مسؤلية الحياة الجاية

يعنى لازم الواحد يحسبها صح اوى

ولو الطرف التانى كويس وينفع يبقى شريك حياة بجد
ويتحمل مسؤلية
يبقى قشطة
وكل واحد يشوف مصلحته




حلو الموضوع ده


سلام
اختك خيخة

Haytham Alsayes يقول...

100 لايك ياحوووودة

هو دة الكلام متفق معاك تماما
اصل المجتمع دة متربي علي زمان
وزمانا غير زمانهم واساسا يعني احنا متمرمطين عشان تتجوز بتحس انك عملت معجزة من معجزات الزمن الخارق
علي ايه كل دة

ويعني ياخي تحس يقولك الدين وكدة
دين ايه اذا كان الدين يعني قالك سهل شروط الزواج ولو محصلش انك تخفف الشروط تكن فتنة في الارض
والفتنة ادينا شايفينها وعايشينها

بجد الموضوع دة مهم
وزى ماقلتوا كدة المجتمع عاوز قلمين تلاتة علي وشه
ورأى انك تجيب الشوز وعلي دماغه


حلو الموضوع ومهم في نفس ذات الوقت


تحياتي

banota moshagba يقول...

انا معاك جدا فى الفكره دى بس لازمن شويه اختبارات كده للطرفين عشان متبقاش تدبيسه من كل النواحى

فاتيما يقول...

معاك يا بطابيطو
الف ف المية

الحكاية عاوزة ثورة
زى ثورة يناير كدا
و عاوزة حلول غير تقليدية
هيقابلها غالبا ثورة مضادة
تغلب فلول مبارك وحياتك ف شدتها

بس طبائع الأشياء بتقول
ان التغيير هو الشىء الوحيد الثابت
ف هذه الدنيا
وبالتالى لازم هيحصل كدا
انتوا جيل الثورة يا بنى
وربنا ينفخ ف صورتكم
يلا شدوا حيلكم وانتزعوا هذا الحق
عشان اطمن ع الواد يوسف
ان قلبه ف يوم ..لو حب
مش هينكسر بسبب الظروف
والتقاليد البالية ...

خالص ودى يا أجدع دكتور سنان ف مصر

the girl in the mirror يقول...

أنا أول واحدة من الخمسين جوز اللى انتوا اتكلمتوا عليهم .. على فكرة انا واللى بحبه فكرنا فى الموضوع جديا من ساعة ما اهالينا طلعوا تربنتين اللى جابونا علشان نتنيل نتخطب أصلا .. فكانت النتيجة اننا بقالنا سنه بنرقص عالسلم .. لا اتخطبنا وطبعا مسبناش بعض زى ما بيحلموا ..

أنا دايسة يا جماعه انتوا حددوا الزمان والمكان واخطرونى ينوبكوا فينا ثواب

Mahmood البطراوى يقول...

زهرة الضحا.
يعنى نعتبرك من الفدائيين اللى هيشتركوا يا زهزه ولا لأ
نكتب اسمك ولا فينا من حركات العيال :P
************************************
بت خيخة وأي كلام
اهلا خيخه سعيد انه عجبك الموضوع وموافق على كل الاحتياطات اللى بتقوليها وشايفها ضرويه جدا طبعا
تحياتى ليكى
*************************************

Haytham Alsayes
بيس يا مان
دايس معانا يعنى :)
************************************
banota moshagba

يعنى انتى معانا ولا هتشجعى من بره :)
اصلها تفرق :)
************************************
فاتيما
انا بموت فيكى :) بس كده :)
************************************
the girl in the mirror
وكمان اسنانجيه :D
زميل كفاح يعنى
يا بنتى هنكمل الخمسين بس وهنتفق على ساعه الصفر
متخافيش فرجه قريب :)

غير معرف يقول...

اولا ازيك يا اسن بطوط ف الدنيا: ثانيا يارب تكون فاكرنى انا مريومه سلطان كنا اتكلمنا قبل كده ع مدونتى واتناقشت معاك ع انى بب واد وبابا رفضه واتخطبت لواد تانى بس فضلت احب الاولانى برضه بس الحمد لله وقبل كتب كتابى من الاولانى بتلت ايام دخلت المستشفى ف كومه ضغط و الدكتور قال انها نفسى واخيرا بابا اقتنع وفك الخطوبه ووافق ع خطيبى وده بعد خناقات دامت اكتر من ست شهور ومن غير مااطول عليك (ياريته ماوافق) لو كنت عارفه مدى قله القيمه اللى حتحصل لخطيبى بعد الخطوبه اكنه ابن البواب اللى تعدى ع حرمه بيت الباشا وحب بنته والله لو كنت عارفه كنت عمرى مادخلته بيتنا لان اصعب احساس انك تشوف اللى بتبه بيتقل منه عشان خاطرك وتسأل نفسك ياترى ايه اللى مصبره ع كل ده ساعات كتير بعرض عليه كتب الكتاب بس الصراحه هو بيتمنى بس خايف من ابويا جدا جدا خايف من رد فعله جدا وبصراحه مش بنتناقش كتير بس ياريت والله يا بطوط ياريت خصوصا انى زى ماانت عارف منتقبه وهو مش بيشوفنى اصلا وممنوع الزيارات او الخروجات ربنا ييسر بس بجد شكرا ع المجهود الرائع