2008/03/23

بيض بالجنبه القريش


كااااااااااان يا ما كااااااااااااان زماااااااااااااااااان يجى من اكتر من عشر سنين وفى تمام الساعه السادسه صباحا كل يوم

كنت انا تقريبا فى رابعه ابتدائى عندما قرر ابى انه مش هيسافر تانى وانه هيفضل معانا احنا كبرنا خلاص ومحتاجين ابونا يبقى جنبنا


امممممممممممممممم ندخل بقى فى الموضوع

محمود اصحى يا حبيبى

حاضر يا بابا

هه ياله يا حبيبى اصحى

حاضر انا هصحى اهو يبدأ فى اللعب فى راسى

يالهه يا حبيبى اصحى ............

اقول فى نفسى ( مهو هيفضل يصحى فيا لحد ما اقوم مهو مش زى مااما شويه وهتزهق امرى لله اصحى)

اصحى فأجد اختى واخويه كلهم صاحيين ونبدأ الحفله

ابى بصوت بين العالى والنص نص يقووول ياله يا ماما هاتى الفطار

ولان امى اساسا مش معودنا على الفطار فكنا مش بنفطر انما ابى راسه والف سيف لازم العيال تفطر كل يوم وتصحى بدرى ولان احنا بنحب البيض فقرر ابى اننا نفطر بيض بس بالجنبه القريش عشان معذى


والنبى يا بابا بلاش تحط جبنه عليه

ازاى هوه البيض يبقى بيض من غير جبنه


ربنا يخليك مش بنحبه

هتحبوه ده طعمه حلو اوى

وندخل بسرعه المطبخ لنلحق كام لقمه بيض قبل ما تتحط الجبنه عليه

واخيرا يصل طبق الجبنه وطبق البيض ليبدأ ابى فى خلط الاتنين على بعض

تصرخ اختى مش هفطر

يقولها ابى لا يا حبيبتى بابا يزعل ومفيش عندنا حد يغضب على الاكل

نسمى الله ونعصر على نفسنا لمونه وناكل وامرنا لله عشان بابا ميزعلش
..

.

.

.

.

.
بعد عشر سنوات من القصه دى كان ابى توفى من ثمانى سنوات ..وتم الغاء وجبه الفطار ثانيه .. وتم الغاء وجبه الجنبه بالبيض لكن ظللت انا احب الاستيقاظ مبكرا ... احب المذاكره فى نفس الوقت الذى كان يحبه ابى

.

.

.

فى صباح قريب جدا قلت ما اعمل لنفسى فطار قمت وجهزت البيض وعملت فطار وبعد لقمه او اتنين قلت ما احط عليه جبنه الله البيض بالجبنه ده طعمه حلو اوى ..ازاى مكنتش اعرف قيمته؟؟!! ...ازاى كنت برفض اكله ..دا انا كنت غبى اوى؟؟!! ..

دا الذ اكله فى الدنيا

دى الوجبه دى موجوده فى كل مواقع الجيم

وكمان فى المواقع الطبيه الاستفاده من الكاليسيوم والبروتين الى فالبيض لا يتم باحسن احواله الا اذا اضفنا عليها كميه من الجبنه القريش

الله يرحمك يا بابا يا ترى فى ايه تانى مكنتش اعرف قيمته ؟؟؟؟؟؟؟؟؟؟؟؟؟؟


متنسوش تقولى رايكم فى التصويت الى فى الجنب ... انتوا عارفين ان انا متواضع ومحبتش اشكر فى المدونه هسيبكم انتم تشكروا فيها

هناك 52 تعليقًا:

رئـــــيسـة حزب الأحلام يقول...

السلام عليكم
تعيش وتفتكر وفعلا فى حاجات كتيرة منعرفش قيمتها الا ماتغيب عنا

دكتورة سنان يقول...

لو البيض بالجبنه القريش هيخلينى اتخن هاكله صبح وضهر وبليل ويمكن اعمله ع العصير كمان
على فكره بموت فى الجبنه القريش
لما ملاقيش لب ولا سودانى ولا فاكهه بحبها اجيب طبق جبنه واكله :))
بس مجربتهاش ع البيض بصراحه
قولى لو بتخن اجربها وربنا:)
تعيش وتفتكر ياحوده

Bongo يقول...

بيض بالجبنه !!!

لأ دي وصفه جديدة , اول مرة اسمع عنها .. :D

بس احساسي بيقولي ان طعمها مش هيكون لذيذ , لأنك لما دوقته زمان مكانش بيعجبك و لا بيعجب أختك

انما لما دوقته بعد ما باباك توفي - الله يرحمه - رغم انه طعمه وحش بس فكرك بحاجه باباك كان بيحبها و بيحب يدوقهالكوا
فعلشان كده حسيت انها اجمل اكله في الدنيا

ربنا يرحمه :)

Bongo يقول...

صحيح , التصويت اللي علي الجنب ده متنوع جداا و فظيع
و بيتيح كل الأختيارات :D

و اجمد حاجه فيه طبعا التوااااااضع :D

لأ بجد
بيفكرني بالأنتخابات في مصر :D

Marwa Friday يقول...

صباح الفل يا بطوط
إزيك يا محمود.. أخبارك ايه؟
والله فكرتني
ده أنا كمان إلى الآن ما بحبش آكل القريش مع البيض المقلي بتاتا!.. باحب آكل ده لوحده وده لوحده ههههههه
الله يرحمه والدك
تعيش وتفتكر الأيام الحلوة
حاسة بيك..
تحياتي

كلاكيت تانى وتانى يقول...

تعرف ماما مقررة علينا الجبنة القريش بالطماطم والكمون من وانا صغيرة وانا بأكلها لولادى الان
اسم مدونتك لذيذ وكان نفسى ادقراها بس الظروف أخرتنى
نحياتى

الفارس الملثم يقول...

ههههههههه

هو البيض يتاكل من غير جبنة برده .

تصدق والدي الله يرحمه برده كان مقدس عنده انه يصحينا بدري عشان نفطر معاه واهم حاجة كوباية اللبن انا عشان اقبل اشربها لازم تكون مع الشاي ..

الواحد لما يفتكر الايام دي يحس اد ايه هو مكنش مقدر قمتها ..

سلام يا محمود

nigro يقول...

بص بقى أنا كل لما أدخل و ألاقيك كاتب موضوع عن والدك أسرح في عالم تاني و أنسى الموضوع كان بيتكلم عن إيه
أصلك بتكتب عن باباك بطريقة طفولية كده
بتخليني أعيش حالة غريبة كده فيها سِنه حزايني شوية
واخد بالك من سِنّه دي
زي العسل يا محمود
رحم الله أباك

nigro يقول...

خد يا محمود تعالى هنا
تعالى ما تخافش مش هعملك حاجة
بقولك تعالى
إيه اللي أنا قريته في الاستفتاء اللي في الجنب ده
أنا لسه قريه حالاً
بشويش كده علشان محدش يسمعنا
انت عايزني أكتب الاختيار إننهوووه
أصلهم صعبين قوي
يخرب عقلك ..انت مشكلة

Empress appy يقول...

الله يرحمه اولا والدك ويغفر له
ثانيا جرب البيض المسلوق بالبطاطس هههههه مش عارفه ايه علاقتهم ببعض بس بحبهم بجد
بص يا محمود كتير قوى بنتمرد على حاجات وهى قدامنا ونكون مش عاوزينها بس مع مرور الوقت بنكتشف ان ده عند وخلاص
فعلشان كدهه انا دايما بقول نسمع كلام اهلينا يا بطوط
غيركده بقى ملاقيش عندك وصفه تخلينى احب الخضار اصل ماما غلبت معايا ونجحت فى اقتحام معدتى بتلات انواع بس ومش قادرة علىالباقى خخخخخخخخخخخخخخخخ

بطوط حبوب يقول...

رئيسه حزب الاحزان
وعليكم السلام
اهو ده الى عاوز اقوله
نورتينى
-----------------------------------
نوسه

البي بالجبنه يخليكى تتخنى؟؟؟ امممممممممم
هههههههههههههههه
مش عارف ابويه توفى قبل ما يقولى
بس جربى مش خسرانه حاجه
بس المفروض الاسنانجيه كلهم رفيعين
هههههههههههههههههه

-------------------------------
بونجو

لا والله لذيذه جداااااا انا زمان محبتهوش غبااااء عيد عنك انما دلوقتى واخده عن حب

ومش هتلكم عن التصويت عشان متعتبرش دعايه واثر على رايك انا عايزك تختار بمنتهى الحياديه
هههههههههههههههه
---------------------------------

مروه

نورتينى رغم انك متسجله غياب الرمه الى فاتت بس بجد نورتينى

وجربى حطى البيض ع الجبنه هتلاقى عملك مكس جامد انا كنت بقول زيك لحد لما جربت

---------------------------------

كلاكيت تانى

انا بحس اننا مش بنحب الاكل انما بنحب الذكرى اكتر ولا انتى ايه رايك؟؟

--------------------------------

الفارس الملثم

اهو انت كده فهمتنى يامان
الواحد بين وقت والتانى بيحب يفتكر الايام دى بيطلع منها اكيد بحاجه
نورتنى

---------------------------------

نيجرو

انا بكتب عن والدى بطريقه طفوليه لانى مشفتوش وانا كبير بحس انى برجع بالزمن وانا بكتب عنه الله يرحمه
ولمحه الحزن دى ياعالم يمكن تعرف سببها فى بوست تانى


موضوع التصويت انت عارف ان انا متواضع محبتش اشكر فى مدونتى قلت اسيبكم انتوا تشكروا هههههههههههههه
وبينى وبينك علم على كل الاختيارات اصله ينفع تختار اكتر من اجابه
----------------------------------

ابى

اجمل وصفه عشان تحبى اى حاجه اهلك بيقولو لك عليها هى انك تحبيهم اوى اوى
هتحسى بطعم الاكل اختلف عندك اوى
انا مكلتش البيض بالجبنه القريش الا كده
وهجرب البيض ابو بطاطس ده ما انا قلبت المدونه ابله نظيره
هههههههههههههههههههههه

rona يقول...

والله فعلا محدش يعرف قيمه الحاجه غير لما تروح البقاء لله فى والدك وربنا يرحمه يارب

HeBa يقول...

محمود

أول مرة أسمع حكاية الجبنة بالبيض دي

أنا بقى وأنا صغيرة كان بابا يصر على أني أشرب معلقة العسل الصبح مع أني مكنتش بحبه

ربنا يرحم والدك ويغفر له

وايه التصويت الجامد

الاختيارات محيرة جدا الصراحة

ka2en Makboot يقول...

السلام عليكم

الله يرحم والدك ويغفر له ويدخله فسيح جناته.

ماما برضو تعز البيض بالجبنة القريش بس انا مابحبهاش عملت اخترع جديد بيض مقلى بالجبنة الشيدر والفلفل الرومى ههههه تحفة اوى ابقى جربها

تعز برضو الخس والخيار وشرب اللبن والكاكاو والفاكهة وخصوصا تفاحة كل يوم المقدسة

ربنا يحفظها ويبارك لى فيها مش عارفة من غيرهم هنعيش ازاي

تحيـــاتى

مي بهاء الدين يقول...

أنا كمان أبويا توفى وكان دايما ينصحني أكل خضار..وانا لايمكن أبدا
بعد كده عرفت ان الخضار حاجة لايستهان بيها
الله يرحمهم جميعا
اعمل حسابي المرة الجاية في طبق البيض أبو جبنة
:)

عبده الرايق يقول...

انا صوت بعلو صوتى
وقلت رأيى
فى الاستفتاء اللى انت عامله
لكن ده استفتاء باااااااااااااطل
رغم انى اديتك صوتى لنمره 2
ولقيت 44 فى الميه معايا
بس بقول باااااااااااااااطل
لان كاتب كله حلو
افرض انا عايز اقول حاجه تانيه اختار ايه ؟؟؟؟
عموما انا صوت واخترت
ومستنى المكافأه
خليك جدع بقى وابعتها
ماعلينا
عارف انك هتطنش
عموما
الله يرحم والدك
هو احنا كده بنعرف قيمه الواحد لما يرحل عن دنيانا
وياريت كل اصحابك يعرفوا ان رأى الاب هو الصواب
لانه اخذ من الحياه خبراتها
شوفلى معاك ساندويتش بيض بالجبنه
بس يكون بيض بلدى وجبنه براميلى
وازازه ميه معدنيه لو سمحت

Desert cat يقول...

الله يرحم والدك
ثم ايه التصويت اللى انت عامله ده
ده ياراجل ولا انتخابات الحزن الوطنى
انا مش هصوت ده انا هروح الطم واجى

yasmin al-ashry يقول...

بجد بجد .. فعلا يعني .. دمك خفيف جدا
ولو حد سألني عرفتي ازااي.. هقوله .. الجواب باين من عنوانه .. واول متدخل كدة على ايدك اليمين فوق هتبص تلاقي يفطة كدة مكتوب عليها حاجة .. هتلاقي قمة التواضع الي شفته في الدنيا بصراحة .. ايييييييييييييييه ده ؟؟!!

ثانيا بقى ندخل في المهم
الي متعرفوش بقى ان الجبنة بالبيض دي من احلى الاكلات عندي .. ولو باباك - رحمه الله - كان عرف كدة كان زمان مكانتي عنده كبيره

فعلا يا اخي الكريم زي مقلت في حاجات كتير الواحد ميعرفش قيمتها الا لما يفقدها .. ممكن يكون حاسس انها دايماله او هتكون معاه على طول ..
" لو دامت لغيرك .. ما اتصلت إليك "

بوست بجد رائع .. احييك يا دكتر .. وأتمنى ان تسعدني زيارتك في اقرب وقت .. دمت مدونا

Unknown يقول...

اولا
رحم الله والدك
واسكنه فسيح جناته
ولا تنسى بره بالدعاء له
.............
أما عن البيض بالجبنه
فانا ماجربتوش قبل كده
وان شاء الله اشوف هوه حلو ولا لا واقولك
وبعدين كالسيوم ايه وبتاع ايه
انت هاتعمل علينا دكتور سنان
:)

Mafrousa يقول...

بطوط تعيش و تفتكر ... و ربنا يرحمة يا رب
انا عمرى ما جربت البيض بالجبنة ..ز بس برضه والدى الله يرحمه كان بيحب يحط الجبنة على البيض......
باين عليها مفيدة انا حجربها

بطوط حبوب يقول...

رونا
فعلا الواحد فى حاجات كتير اوى مش بيحس بقيمتها غير لما يفقدها

تحياتى ليك
------------------------------------
هبه

الاختيارت محيره؟؟ انا كنت عايز اخليه تصويت صعب بس انتى قدها وقدود
هههههههههههههه

---------------------------------


كائن مائى
نورتينى وحلو الاختراع ده
مش عارف ليه الناس كلها فى البوست ده عماله تقولى اختراعات ؟؟؟؟؟؟ شكلى هعمل غسيل معده بعد ما اخلى التعليقات بتعتكم هههههههههه

----------------------------------

عبده الرايق
التصويت باطل ايه ياعمنا دا انا حطه اهو على عينك يا تاجر والفرز الكترونى بدون تدخل اى بشر ولا محابه ولا اى حاجه وصدقنى انا قلقان على نتيجه التصويت ياترى الناس هتقول ايه هههههههههههههه
وانسى مفيش ساندوتشات هنا
بعد الى انت قلته
-------------------------------
ديسرت كات

انتوا بس عشان مش واخدين على انتخابات ديموقراطيه بتشككوا فى انتخاباتى انما هى نزيهه نزيهه يعنى

-------------------------------

ياسمين العشرى

اولا شكرا ومش عارف اقول ايه - اصل انتى عارفه ان انا متواضع -
ومش خفيف اوى يعنى تقدر تقولى لماضه ولماضه عن لماضه تفرق ولا ايه ؟؟؟؟؟
-------------------------------

انا انسان

جرب بس وانت تدعيلى وان كان ع الكاليسوم بسيطه كل البيض وسيبك من الكالسوم عشان متقولش عامل دكتور هههههههههه

--------------------------------

واحده مفروسه جربى وقوليلى

مدحت محمد يقول...

الله يرحم والدك
بس سيبك من الجبنة بالبيض
ده فى حاجات كتير جدا انا معرفتش قيمتها
غير بعد وفاة والدى الله يرحمه برضه
منها تحمل المسئولية
منها الاعتماد على النفس
وحاجات كتير اوى
ربنا يرحم ابائنا وامهاتنا
كما ربيانا صغارا
تحياتى

د/اجدع بنوته يقول...

ربنا يرحمه

وتعيش وتفتكر فعلا

بس لا ياعم صعب اوى بيض ع الجبنه القريش دى

ع العموم بالهنا والشفا

شهرزاد يقول...

هههههه
ياه البيض وحشني أوي من ساعة أنفلونزا الطيور ماباكلوش تقريبا
بالهنا اولشفا

wael يقول...

الله يرحمه
حسيت انك بتتكلم عن والدي الله يرحمه بردو
سرد ممتع يا دكتور
انا بكالريوس طب
ندخل في الموضوع بقا انا دخلت على مدونتك عشان مدخلتش على اي مدونه في التاريخ وملقتس سيادتك فيها
هههههههههههههههههه
الله يرحمه تاني

حنة يقول...

ازاي يا بطوط ما كنتش بتحب البيض بالجبنة القديمة دهروعة والله يرحمه باباك كان مية مية .. وتعرف بقى انا هاعمل الفطار النهاردة لولادي كده ، بيض وجبنة قريش

صيدلانيه طالعه نازله يقول...

انا بقى بموت فى البيض بالجبنه و

البطاطس المحمره بالجبنه و اى حاجه

بالجبنه و احنا اطفال بيبقى عندنا

عند من غير سبب مجرد اثبات ذات و خلاص

بس اما نكبر و نبدأ نفكر نلاقى اننا

حرمنا نفسنا من حاجات كتير حلوه من

غير قصد لمجرد اننا نقول لا و بس

تعيش و تفتكر و كل سنه و انت طيب

الـسـيـدة نـون يقول...

تصدق يا محمود
بابا برضه هو اللى علمنا طريقة اكل البيض بالجبنة
وهى فعلا بيكون طعمها حلو جدا
ربنا يرحم والدك
وياريت يا محمود لو تبتدى انت تلم اخواتك وتعملهم بيض بالجبنة اه منكم تفتكروا ايام حلوة عشتوها مع باباكم ومنمها تستفيدوا من القيمة الغذائية للوجبة
وبالنسبة للتصويت
واضح انك ديمقراطى جدا
انا ياسيدى علشان اجبر بخاطرك اخترت كل ما سبق
ههههههههههههههههه
بجد تصويت دمه خفيف جدا
تحياتى ليك
اختك خيخة

Abo 7anf يقول...

على فكره من مقرا الموضوع
وانا والدى من صغرى بياكلنى بيض بالجبنه القريش
بس عندك حق
سمعت مثل بيقول
البعيد ديما مرغوب
وبجد فكره حلوه

Soooo يقول...

ربنا يرحم والدك برحمته يارب

تصدق فعلا انا ماحسيتش بقيمة نصايح امي الله يرحمها غير بعدين

ربنا يرحم موتانا يارب .. ويجمعنا بيهم في جنة الفردوس الاعلى بصحبة سيدنا محمد عليه الصلاه والسلام





سلاموووووووووووز

مجداوية يقول...

رحم الله والدك رحمة واسعةوأسكنه فسيح جناته ,,اللهم آمين ,,أنا اشتركت فى الاستفتاء مع انى مش معايا بطاقة انتخابية عشان كده صوت لكل ما سبق طالما مفيش مفر ولازم تكون تحفة ورائعة واعتقد ان الاستبيان ده بعتهولك الحكومة عشان تشوف الشعب مبسوط ولا لأ ,والشعب مبسوط جدا والحياة رائعة وتحفة ومفيش حياة احسن منها ولا حكومة أحسن منها وكل ما سبق ,,طمن الحكومة الشعب مبسووووووووط وطاير من الانبساط ,,أنا حاجرب البيض بالجبنة القريش يا صابت يا حاعمل بيض لوحده لكن أكيد حأدعى لوالدك بالرحمة ,تحياتى وتقديرى

Noha El-arabi يقول...

الله يرحمه
تقريبا مش البيض بالجبنة الحاجة الوحيدة الجميلة اللي عاملها
تخيل
جابك انت كمان للدنيا
صباحك فل

بطوط حبوب يقول...

مدحت محمد
الواحد فعلا مش بحيس بقيمه الحاجه الا لما يفقدها
شرفتنى بالزياره يا دوحه

************************************

د اجدع بنوته

والله حلو جربيه بس دا اختراع من ابو البطابيط حاجه حلوه يعنى


**********************************

شهرزاد

البيض مفيش منه خطر طالما بيستوى الخطر انه يتاكل قبل السوا انتى بتكليه ازاى ههههههههههههههههه

*********************************

د وائل

نورتنى وان شاء الله مش اخر مره

*********************************

حنه

الواحد كان عبيط بعيد عنك وبالهنا والشفا

*********************************

صيدلانيه طالعه نازله

لا مش للدرجادى الجبنه حلوه اه بس مع البطاطس والحاجات التانيه دى غريبه
ابويا لو شافك اكيد كان حبك

*********************************

خيخه

حلوه فكره ألمهم دى مهم ملومومين خلقه محدش لسه مشى هههههههههه والتصويت مثال للديمقراطيه ومش تخلينى اتكلم عن نفسى لان انا متواضع

********************************

ابو حنف
شرفتنى بالزياره بس المثل ده مينطبقش على البهبهين لاننا بنحبهم كده كده

******************************

سوووووووو

وانا برضه بس كويس اننا حسينا احسن منبى جبله شوفتينى واسعدتنى تعليقاتك على البوستات القديمه

*******************************

مجداويه

التصوريت ديمقراطى ومش هقبل الطعن فيه ومن حق كل الزوار الابداء برايهم
هههههههههههههههههههه

*********************************

نهى العربى

انتى الى جميله ياقمر انا وشى احمر بجد اصلى بتكثف

أشرف حمدي يقول...

ياااااااه
فكرتني بمقال جميل جدا للدكتور ميشيل حنا منشور في كتابه الجديد (عالم كلينكس) عن اللفت المخلل
نفس القصة
كان لما بيجيب سندوتشات فول ومعهاها مخلل بياكل الجزر والخيار ويرمي اللفت ومرة قال طب ما أجرب ؟ وبقى مدمن لفت دلوقتي
بيقولك في المقال لازم نجرب الحاجات اللي اتعودنا علي اننا نكرها يمكن نحبها (وده غالبا)
حاولت أعمل كده مع السبانخ وفشلت .
تحياتي علي البوست الرائع ده

Unknown يقول...

احنا مش بنحس بقيمة ما لدينا الا بعد ان نفقدة

انين الحزن يقول...

عامل ايه ياحوده

عارف انا ابويا بردك بيعمل كدا بيض وجبنه وانا مش بحبهم بس مطره اكل اصله بردك بيقعد يقولي علي الفوايد بقه وبتاع

سلامووووووووز
وزة

منوفيـــايــة يقول...
أزال المؤلف هذا التعليق.
موناليزا يقول...

ربنا يرحم والدك ويسكنه فسيح جناته
افتكر الحاجات اللى كان دايما بينصحك بيها وانت كنت بترفضها من غير حتى ما تفكر وابدأ اعملها
دى خبرات فى الحياة ومينفعش نعديها كده

الجواز و سنينه يقول...

بيض بالجبنه
احلى زكرى من والدك رحمه الله و ادخله فسيح جناته
بصراحه زعلنى اوى البوست ده و ملائنى شجن و عندى كلام كتير مش هاقوله علشان ما اعيطش

Unknown يقول...

تعيش وتفتكر.ز أسلوبك جميل ومعبر أثر فيّا كمل على كده علاطول
بقولك ايه مينفعش أبقى من ضمن البطابيط أصحابك؟

simple girl.. ..simple dream يقول...

حاجات كتييير اوى مش بنعرف قيمتها غير بعد مرور الزمن
ربنا يرحم والدك ويرحم موتانا جميعا

المـــفـــــــقــــــــوعـــــة مــرارتـهــا يقول...

الله يرحمه كان قلبه عليكم
بس ايه ياعم التواضع ده
الأختيارات كلها يإما تحفة أو رائعة أو تحفة ورائعة مع بعض او كل ماسبق
تصدق احلي استفتاء اتحط في مدونة
واهو كدة ضمنت ان مافيش حد يعكنن عليك برأيه
ياااعم علي الذكاء

yamen يقول...

الله يرحم والدك

انا اول مرة ازور مدونتك
بس بجد استمتعت
علي فكرة انا خريج 2005 من نفس كليتك-بضم الكاف وتشديد اللام والياء عشان الكلية اللي من غير تشديد بتبقي في ضهر الواحد علي الجنبين وماحدش بيتخرج منها-
و طبعا كنت من الناس الناصحة اللي بتقول "اهم حاجة العملي"

سعيد بزيارة مدونتك
تحياتي

بطوط حبوب يقول...

د اشرف فنان مصر الاول ودكتور مصر التانى
حلو اوى الى انت فهمته من البوست معنى جديد غير المعنى الى الكل قال عليه وهو ان دايما الكبار بيعرفوا اكتر
وجرب تانى مع السبانخ اوعى تسيبها دى كلها حديد والحديد غلى انت عارف بكره مش ستلاقيه
نوتنى وشكرا لوصف البوست انه رائع
*******************
ايويه
اضم راى ليكى

**********************

انين الحزن

الحمد لله كويس انت عامل ايه؟؟
ياوزه حبيه وخليه بمزاجك ههههههههههههههه

**************************

الجواز وسنينه

ابقى فضفضى ى بوست كامل اجمل حاجه فى التوين انك بتعرف تفضفض


**************************

ايمن بدر

شكرا لوصف اسلوبى انه جميل وانت يامان من البطابيط اصحابى يااااااه احنا نطول

****************************

سيمبل جيرل

اضم صوتى لصوتك

***************************

مفقوع مرارتى من حماتى

ههههههههههههههه
صوتى بايه؟؟ انا قلقان منك؟؟ هههههههههههههه بس مش هتقدرى تعكننى على

************************

يمين

ههههههههههههه كلنا هذا الرجل وشرفتنى بالزياره ان شاء الله متكنش الاخيره

امواج يقول...

44 تعليق يامفترى
بس انا مقدرش اكل بيض مع جبنه اموت ياخبر صعبه قوى



الله يرحمه يامحمود

يظهر فعلا مش بنعرف قيمة حاجه غير لما نتحرم منها

تدوينتك المره دى قريبه من تدوينه كتبتها ..... ذكرى برده جميله بس مكنتش البيض بالجبنه القريش كانت طريق المدرسه

الله يرحمه

sebofy7alo يقول...

ههههههههههههه
الحقيقة مش ممكن اكل بيض من غير الجبنة الرومي ومجربتش القريش دة ,على كدة دة عايز رغيف لية مواصفات معينة
بيض +الجبنة الرومي+الجبنة القريش+الرغيف اللي مش مدعم =أحطهم فين.

أسلوبك لذيذ أوي وحبقى أجيلك علشان أخلع.

Asmaa mahaba يقول...

يااااااااه باباك الله يرحمه بيعمل زى ما بابا بيعمل معانا بالظبط...
وفعلا كتير الاهل بينصحونا باشياء ومنعرفش قيمتها غير بعد فوات الاوان او لما نكون كبرنا خلاص
تحياتى ليك سومه_87

همس الاحباب يقول...

تعيش وتفتكر
دايما الاباء بيعرفوا اكتر من الابناء مش كده
تحياتى وتقبل مرورى

سهر الليالى يقول...

رحمه الله على والدك
وقد ايه مشاعرك دى جميلة اوى

فعلا أحيانا مبنحسش بقيمة نصايح أهالينا إلا لما بنجرب بنفسينا تلاقى الواحد فينا لما حد منهم ينصحو بنصيحه مش ماشية مع اللى مطلسم دماغه عليه يقوم نااااافش ريشة كدة ويقول اصلهم مش حاسين باللى أنا فيه دلوقتى ولما بيلم ريشة أحيانا يكتشف مدى صحه كلامهم وياريته كان سمع الكلام

بس أحيانا لا
ههههههههههه

تحياتى بجد على البوست الحلو دة

بطوط حبوب يقول...

امواج دا خداع بصرى دول مش 44 ولا حاجه هههههههههههههههه
البيض بالجبنه اجمل اكله ممكن تكليها وجربى وهتندمى ههههههههههه
اجمل شئ فى الدنيا الذكريات اظن ان هى الى بتخلى للمستقبل طعم
الله يرحم والدى ووالدك وكل اموات المسلمين
*********************************

سيبو فى حالووو

بيض +الجبنة الرومي+الجبنة القريش+الرغيف اللي مش مدعم = الحق اتصل بمستشفى القصر العينى
ههههههههههههههه
انت بس عشان عنيك حلوه نورتنى

******************************************
سومه_87
الله عليكى انتى جبتى من الاخر اباهتنا بينصحونا بحاجات حلوه كتير بس احنا غباااااااء بقى بعيد عنك

*******************************************
همس الاحباب
سعيد لمرورك تحياتى
********************************
سهر الليالى

ايه حكايه الريش دى ؟؟
على اساس انك فى مدونه بطوط
ههههههههههههههههههههه
تحياتى ليكى

حمامة يقول...

على فكرة هو فعلاً طعمه حلو
لان البيض بطبيعته بيكون فى شوية زفارة
فالجبنة بتضيع الزفاره دى

marwa mahdy يقول...

من وقت للتاني بحب أقرا البوست
ده ,
يمكن بيخليني أحس بقيمه حاجات عندي
دلوقتي مضايقه منها وكمان بيفكرني
بحاجات نفسي ترجع تاني أيامها
.