2010/10/14

انا لست لى

امبارح قريت الكتاب الرائع للكاتبه الاروع "نهى العربى " كتاب " اربعين سنه طالب " الكتاب لسه تحت الطبع .. بس انا عشان ايدى واصله قريت الكتاب وهو لسه تحت الطبع.:D
اللى هقوله ملوش اى علاقه بالكتاب لكن الكتاب فكرنى بيه.
يمكن اكتر جمله شدتنى فى الكتاب وهى بتتكلم عن الثانويه العامه وبتوصفها  " لا أبالغ حين أصفها بالفترة النقية المليئة بالأحلام و الآمال.... كل شئ كان يبدو واضحا، أهدافنا كانت واضحة، نسير لها بعزم و دأب شديدين، تلك الأهداف التي صارت مشوشة بعد أن تقدمت بنا السنوات و حتي التخرج من الجامعة .... تخيل أنك تدرك حلمك و أنت مازلت صغيرا غضا و تفقده أو يفقدك حين يجب البدء بتنفيذه!!!!"
يمكن الجمله دى رغم انها فى مقدمه الكتاب خالص الا انها كانت ماشيه معايا طول ما كنت بقرا الكتاب ... انا كمان فاكر الايام دى اوى .. فاكر اد ايه انا كنت عارف اوى انا عاوز ايه .. حتى لو كنت اجبرت فى الاخر على اختيارات تانيه .. بس انا فاكر انى كنت ساعتها عارف اوى انا كنت عاوز ايه.
يمكن لان ايامها كان تفكيرى بسيط اوى .. مجتمعى اصلا ساعتها كان صغير جدا جدا .. مفهوم الالتزام كان بسيط اوى ساعتها .. انى اراجع على حفظى للقران , اصلى الفرض بفرضه فى المسجد , امسك نفسى ومزعقش لما ماما تقولى ما تقوم تذاكر , وممكن كل فتره طويله جدا اتصفح كتاب رقائق وكان غالبا كتاب الداء والدواء لابن القيم "
كانت قله الادب مفهومها بسيط جدا برضه " العيال اللى قليله الادب هى العيال اللى بتشتم شتايم بالاب والام وبتمشى مع بنات او على الاقل بتقف ادام مدرسه قويسنا الثانويه بنات يعاكسوا "
مفهوم النجاح انى اجيب اعلى من 95% دا يضمن لى اى كليه هندسه فى اى حته فى الجمهوريه .. ولو فكرت ادخل علمى علوم فدا على الاقل يضمن لى مكان فى القطاع الطبى على حسب تنسيق السنه اللى فاتت.
اظن انى ايامها كانت اهدافى واضحه اوى وكنت عارف عاوز ايه ... طول اليوم ماسك الاله الحاسبه وبحسب لو نقصت فى الماده دى درجتين ودى تلات درجات ودى درجه .. يبقى انا كده اجيب %96 .. طب قول كمان درجه مش متوقعه .. ابقى %95.5 ازاى ابقى ملتزم اكتر .. كان انى اراجع على كم اكبر من القران كل يوم , واصلى السنن , وقبل ما انام اصلى ركعتين وادعى ... عارفين ايامها كنت ببقى عارف اوى انا عاوز ادعى بإيه؟ .. يمكن دلوقتى بفكر اوى قبل ما ادعى اى دعوه وبعدين اقول يارب يسرلى الخير وخلاص.
الواحد من كتر ما هو مش عارف هو عاوز ايه .. بقى يخاف يدعى بحاجه معينه .. لانه عارف ان بعد ساعه هيبقى عاوز الحاجه التانيه وبيدعى بيها.
فى الايام دى مكنتش بسمع مشايخ خالص .. يمكن لانهم مكنوش متوفرين زى الدرجه دى .. كان كل فتره طويله ممكن اسمع حاجه للشيخ وجدى غنيم ..لكن انا بحس انى كنت فى الفتره دى ايمانى اعمق .. كنت متعلق بربنا اوى وسايبها على ربنا اوى .. وكنت بعمل اللى عليا برضه .. بس ساعتها كان عندى ايمان كبير ان اللى عاوزه ربنا هو اللى هيكون .
مكنتش اعرف ايامها الخلافات بين السلفيه والاخوان والصوفيه ولا الخلافات العقديه بنا وبين الشيعه ,, ويمكن دا كان بيخلى الجدال مع اى حد ملوش لزمه لانى اصلا معرفش حاجه ,, لكن دلوقتى الايمان قل اوى رغم ان المعرفه زادت مقارنه بالوقت دا بطريقه مهوله.
كان بالنسبالى النجاح يعنى اجيب اكبر من 95% لكن دلوقتى وبعد تخرجى من الكليه بسأل نفسى يعنى ايه ابقى نجاح؟ مش بلاقى اجابه.
رغم انى كنت دايما بجيب الدرجات النهائيه فى الرياضيات والفيزيا .. ودرجات اقل نسبيا فى الاحياء .. الا ان اهلى اصروا انى ادخل علمى علوم .. عشان تبقى دكتور والطب احسن من الهندسه .. وبغباء منقطع النظير بضرب نفسى عليه بالجزمه دلوقتى .. سمعت الكلام .. ومن ساعتها بقى مطلوب منى ادرس دراسه مش راكبه على دماغى وكمان انجح فيها لانها بقت حياتى مش مجرد دراسه .. ويمكن عشان كده اتعقد مفهوم النجاح فى دماغى.
فاكر فى الثانويه العامه حبيت بنت كانت بتاخد معايا درس .. حب مراهقه صرف .. كان حب بالنظراتى والصمت الرهيب ,, وكنت راسم حياه لينا .. انا هدخل هندسه , وهى طب بشرى وفرق السنيتن او التلاته دول اكون انا استقريت فى الشغل واتجوزتها ..ياااااااه على البساطه ... المضحك انى مدخلتش هندسه ودخلت طب اسنان .. وهى دخلت تجاره .. مخدتش تفكير منى القصه دى كأنى كنت متأكد انها هتحصل زى ما كنت برسمها .. مكنتش مشغول ابدا بازاى دا هيحصل  ..  رغم انى لو حبيت دلوقتى فاللى بحبها هتاخد وقت اطول بكتير .. لان الحسابات بقت معقده اكتر مبقتش بالبساطه دى .


الحياه بقت اشد تعقيدا اوى من ايام زمان .. رغم ان الواحد مكبرش اوى لسه .. بس الاحلام اتعقدت مبقتش حلم بسيط عارفه وعارف هوصله ازاى .. والايمان ضغف وقل ..حتى بقى مفهومه ضبابى احيانا .. لسه بصلى الفرض بفرضه فى المسجد .. يمكن مراجعتى على حفظى قلت كتير اوى عن زمان لدرجه انى بقيت ناسى اكتر ما انا حافظ  .. ولسه بمسك نفسىلما ماما تقولى حاجه ومش بزعق .. بس لسه مقتنع ان ايمانى زمان كان اعمق بكتير... مبقتش مجرد الحاجات دى اللى بتزود ايمانياتى زى زمان.




الكتاب بتاع نهى خلانى احن اوى للايام اللى كنت عارف اوى انا عاوز ايه .. ومتأكد يقينا انى هوصله .. لكن دلوقتى لا عارف انا عاوز ايه ولا هوصله ازاى ولا امتى اقدر اعتبر انى نجحت او فشلت
بجد يا نهى ربنا يسامحك على الكتاب اللى موتنى من الضحك .. وفى نفس الوقت خلانى احن اوى لحاجات يمكن انا بقيت بعيد اوى عنها ونفسى اقرب منها تانى
ياريت كل واحد فى كومنته يكتب ذكرياته اللى طلع بيها بعد قرايه البوست دا 

واللى عجبه البوست يبقى يشيره بقى فى صفحته على الفيس :)

هناك 24 تعليقًا:

FAW يقول...

يا راجل بقي 95 كده ناجح بس !!!
أمال 82 دي تبقي إيه !!
أنا عارف جدا إحساس إنك تدخل مجال مالوش أي علاقه بيك وهو ده اللي أنا بعاني منه دلوقتي , بس الأمل في ربنا كبير إن الواحد في النهاية يحقق اللي نفسه فيه . .
وفعلا الحياه زمان كانت بسيطه قوي وجميله قوي , والحب و الأحلام الطفوليه دي من أحلي الحاجات أيامها . .
تحياتي .

star in the sky يقول...

حرررررررررررام عليك

ايه ده بس

انا مش عارفة ايه اللى جابنى هنا اساسا

ده انا حياتى متقلبتش ولا اتبهدلت الا من وقت الثانوية الزفت دى

وقتها كان عندى شوية احلام واول مرة يبقى عندى احلام وبرده لاول مرة اضحى عشانها ياااااااااه ده انا تعبت نفسيا اوى ايام الثانوية عامة عشان كلية الالسن و برده مدخلتهاش بسبب انى سمعت كلامهم وصدقته
وكان عندى مفاهيم عن الطالب الشاطر بقى مكنتش بفكر فى النجاح قد ما كنت بفكر انت ده حد شاطر وده لا كان عندى مفاهيم عن اللى بيعمل كده كويس كده وحش
اينعم كان عندى حاجات كتيرة خايفة منها ودلوقتى بعد ما فهمت بقيت الامور ابسط من زمان
اممممممممم حياتى بدات مع الثانوية عامة وانتهت بنهاية الثانوية عامة
يمكن ده اللى مخلينى مش فاكرة غير مرحلة الثانوية عامة

نكد صح اهه خد شوية من اللى فكرتنى بيه

اممممممممم لا لا لا لا استنى تصدق فى حاجات افتكرتها من ايام اعدادى اه ايام زمان كنت بعشق الهندسة الوراثية وكنت فاكرة انها تبع كلية الهندسة او قلت هدرس طب نفسى واستحمل كلية طب اللى هتوجع بطنى
بسبب طبيعة الكلية لغاية ما اتخصص بقى
بس اصلا الاحلام دى اتبخرت لما دخلت اولى ثانوى وشفت الكيمياوقررت ان اكمل ادبى

ايام اعدادى كانت كل وقتى فى الروايات بتاعة المدرسة قريت كل انواع المغامرين الخمسة والاربعة والتلاتة وكان فى اتنين كمان
ومن احلى ذكريات ابتدائى واعدادى بتاع الجرايد كنت اروحه له دايما ومعايا دلوقتى بالميات مجلات و روايات

اممممممم استنى افتكر شوية
بخصوص الدين والصلاة بقى كان كل ما يجى حد يحفظنا قران احلى حاجة انه هو اللى كان بيطفش بسببى انا واخواتى مع انى كنت اهدى واحدة فيهم بس برده كان بيتنرفز منى هههههههههههههههه والصلاة لها حكايات معايا اول مرة بدات اصلى وسنن ايام ابتدائى واما وقعت ع رجلى وجبستها من وقتها بطلت صلاة معرفش ليه ورجعت فى اعدادى وتقريبا اتحسدت وقتها وقفت فترة ورجعت تانى حاجة كده تلخبط

الاخلاق كنت بشوف البنات اللى مش بتحترم الاستاذ فى الفصل وتقعد تشاغب وتضحك بصوت عالى ومتسمعش الكلام او تتكلم بطريقة مش حلوة دى مش كويسة ومش اكلمها او ايام 3 اعدادى ربنا بلانى بفصل كل اللى فيه كل شوية استدعاء ليهم وكانوا لما يكون مفيش استاذ يقعدوا يرقصوا وقال ايه مرة واحدة سالتنى ليه مش بكلم حد منهم يلا الحمدلله سنة عدت

امممممممممممم اكتر حاجة مش بحب افتكرها فى الفترة دى ان صحبتى الوحيدة بجد يعنى شوف انا عندى 18 سنة مبعزش حد قدها ومعداش حد عليا فى حياتى زيها لو تطلب ايه هسمع كلامها علمتنى حاجات وحطت اسس فى حياتى وربنا لغاية دلوقتى بعملها من يوم ما اتعلمتها منها بحترمها وبسال عليها دايما اللى دمرنى وقتها ان انا عرفتها ايام اولى اعدادى اتعارفنا انا و2 تانى وكنا شلة بس هى الاقرب ليا وشوية مواقف وهوب اتخاصمنا فى الترم الاول او التانى تقريبا وفضلت معايا فى نفس الفصل وكمان 2 اعدادى و3 اعدادى وانا بشوفها كل يوم ومش قادرة اكلمها وصعبان عليا اننا مش صحاب موقف خصامنا من المواقف اللى دمرتنى وقتها

انا رغاية مش كده :D

مش طول الكومنت مش فكرت اراجعه الله يكون فى عونك لو قدرت تقراه كله
:)))))))))

هجرى قبل ما اضرب

mrmr يقول...

فعلا زمان كان الواحد يرسم ويخطط لحلمه ويحاول يحققه

انا كنت عارفه هدفى وحياتى ح تمشى ازاى والحمدلله الهدف تحقق وده بفضل ربنا طبعا

واللى مقدرتش فى يوم على تحقيقه احققه فى بناتى باذن الله

زمان كانت الحياه بسيطه وجميله للغايه وكان الواحد بقدر استطاعته بيحاول يحقق حلمه لكن دلوقتى ومع مرور الزمن بقى الحلم من الصعب تحيقه وده بسبب الظروف الاجتماعيه اللى شيفنها

ربنا يكون فى عون الشباب

ربنا يوفقك

عمرو يسرى يقول...

مش عارف اقول ايه يمكن لان الفتره ديه ماكنتش بحلم بحاجه حتى لما جبت 72% ماكنتش بحلم بحاجه ولما جبت ورقه اختيارات الكليه سبتها فى البيت وقلتلهم املوها وقبل المعاد يخلص اخدها وسلمتها من غير معرف كتبوا ايه اصلا يمكن اول مره اقراء الاختيارات لما سمحت الملف بعد لما اتخرجت
طب انا عارف صعوبه انك تعيش بدون حلم وده طبعا اللى انا بعانى منه حاليا بعد السنيين ما فات ومرت
يالا امشى قبل ما اتشتم

sony2000 يقول...

بص ياااااااااعمونا
تعالي لمدونتي احثن واقرا اللي كتبتوا عن دا:)

ميشوو يقول...

يااااه يابطراوي ليش تخلينا نتذكر غصب انا كنت نسيت كل دا

اكثر حاجه تغيرت على هيا من ناحية الدين كنت بحفظ قرأن وكنت دايم بأقول لامي تسجلني بحلقات تحفيظ بس دراستي كانت العائق وحتى الصلاة قبل كنت كثير بإم صديقاتي بمصلى المدرسه

كنت بس عايزه اكون قريبه من ربنا وخلاص


اما الدراسه فكنت عايزه بس النسبه اللي تفرح ماما وبس تصدق يا بطراوي اني مكنتش عارفه انا عاوزه ايه بعد الثانويه

اذكر يوم ما طلعت نتايج الثانويه مكنتش فرحانه لحد ما سألت ماما اذا كانت فرحانه من نسبتي ولا لأ لما فرحت هيا انا فرحت وقعدت اهيييص

كان مفهوم النجاح صغيييير جدا اما دلوقتي بقى حاجه ثانيه خالص لدرجة اني بفكر اتخرج من الجامعه وادور عن اللي انا عايزاه ‏:‏)‏

Haytham Alsayes يقول...

ياااااااااه ياحودة

كل دة كانك بتحكي قصة حياتي
انا برضه كانت الاحلام واضحة وبسيطة ومفيهاش اي تعقيد
وكان الايمان مرتفع جدا عن دلوقت
كانت ايام جميلة
دلوقت الحياة صعبة مش عارف اشتغل ايه وازاى
احلامي كتيرة ومتشابكة
مش عارف انفذ حاجة
حاسس ان الدنيا بحر واسعك زى مابتديك
بتمنع عنك
وزي ما بطمنك بتغدر بيك في الثانية اللي بعدها

بجد اثرت عندى شجون نحو الماضي
ومخاوف نحو المستقبل المجهول
بس عموما كله بيد الله وحده
روح ياشيخ الله يسامحك


تحياتي يادكتور محمود

Ramy يقول...

د/ بطراوى

اول زيارة و بأذن الله مش أخر

اللى لفت نظرى للمدونة و الموضوع سونى 2000

بجد الموضوع هايل جدا

و عندك حق على فكرة فى كل اللى قلته

ما كنا عليه و ما أصبحنا

و ما بين الأثنين من احداث

و تأثير كل شيىء من دة كله علينا

بجد بوست يدعوا للتفكير فى الذكريات

بتأثرها فينا

(:

معلش يمكن منفذتش طلبك

بس علشان اليومين دول بس مضغوط فى الشغل

بس باذن الله هعمل و اقلد سونى فى انى اعمل بوست كدة زيها (:(:

شكرا ليك

ربنا يوفقك دايما

أميرة جزر الأحلام يقول...

بعيد طبعا عن ايام الثانوية العامة واحلام الثانوية العامة / اكتر حاجة بتضحكنى كل ما افتكرها اول يوم رحت فيه الجامعة عشان اقدم ورقى
رجعت البيت قعدت اعيط ومفيش على لسانى الا كلمة واحدة :
انا مش عاوزة اروح الكليه عاااااااااا
كانت دنيتى صغيرة
البيت وبابا وماما واخواتى
والمدرسة واصحابى .. وبس تقريبا
بس كنت عيشاها وقبلاها
لكن لما روحت الجامعة اتخضيت .. !!
من الزحمة .. والناس .. والاختلاط .. وكل حاجة
لقيت نفسى مش عاوزة كل ده وخايفة منه
بقيت بقول لماما انا مش داخلة كليات خالص .. ويا أعيد الثانوية العامة تانى ، يا أقعد فى البيت ومتعلمش تانى

VOltaa يقول...

قلبت المواجع ياجدع ربنا يسامحك

:)

عندما تكون ميمى وحاجات كتير مع بعضها كده يقول...

يااااه بجد اد ايه بسطتنى بالكلام الى انت كاتبه ده اد ايه فكرتنى بايام كنت فاكره نفسى خلاص نجحت وحققت اكبر حاجة وهكمل الطريق للاخر بس فجاه لما اتخرجت من الكلية الى نفسى فيها بعد مجموع كبير فى الثانوية حسيت انى كنت فى حلم حلم حلو نفسى يتكرر تانى

ايثار يقول...

للاسف أنا حتى موصلتش لمرحلة ثانوي
بس أعتقد إن أنا حاليا في أولى اعدادي عايشة كتير من الحالة الدي مع بعض الاختلافات
من نحيت الايمان فأنا دلوقتي في درجة عالية من الايمان بطريقة غيرت في شخصيتي كتير
لكن بختلف معاك في نقطة النجاح لان الدراسة جزء جانبي من حياتي والنجاح مش بيقتصر عليها لوحدها
وبجد لحد دلوقتي مش عارفة انا عايزة ايه؟
مع إني مقتنعة إن مفيش انسان مش عارف هو عايز ايه وعارفة إني عارفة أنا عايزة ايه بس مش عايزة أعترف
من ناحيت الدعا فمبفكرش قبل ما ادعي كتير عشان بس أقولك إني عارفة أنا عايزة إيه بس بستهبل:)

تحياتي

babosha يقول...

هوه انت قاصدها معايا يا بطوط كل ما ادخل الاقى بوست يقلب المواجع ويقلبلى دماغى الايام دى كانت جميلة قوى بجد كانت فيها براءة ونقاء وطهارة من كل حاجةكانت الصداقة والناس اللى حواليك هما المجتمع بتاعك وفاكرة لما كنت ارجع من المدرسة مقهورة لان مليش فى الرياضيات ولا الفيزياء وفى اولى ثانوى كانت المواد دى اجبارى فكنت ارجع مقفولة لانى مش فاهمة حاجةبس كنت يلاقى حاجات تانية كتير حلوة لبس المدرسة الكحلى والمشى مع صاحباتى الصبح لحدالمدرسةوالرغى عن كتاب قريناه او عن حاجة مش فاهمناها فى مادة من الموادوالاحلام كانت بسيطةقوى اما حب المراهقة كان المستر بتاعى وكنت بعمل اى حاجة عشان الفت نظره لدرجة انى حبيت المادى بتاعته قوى وبقيت مدرسة لنفس المادةكانت ايام جميلة ورايقة وهادية ومكنش فيها الغل والحقد بتاع اليومين دول ولا الغش والكدب والنفاق والايمان فعلا كان عالى قوى ربنا يسامحك وجعتلى قلبى بس بوست جميل جدا

شروق يقول...

محمود ,, أنا مش هجامل ولا بثبت حضور
لأنى اصلاً معرفكش فالسببين بلا هدف , دى أول مرة أقرالك حاجة , وأول مرة أعلق على مدونة ..
يمكن لأسباب كتير منها إن أنا و نهى صحاب وأنا حاسة الكلام اللى هى كاتباه بجد لأنى عشت حاجات شبهه من بعد مرحلة التوهة لأنى زيك و زيها زمان كنت عارفة أنا عايزه إيه و كنت عارفة هعمله إزاى و برضه كان تعلقى بربنا أعمق و دلوقتى بصلى و الإحساس ضايع منى و مش عارفة ألاقيه , بقرا و فاهمة أكتر و مع ذلك مش عارفة أجادل , متأكدة من حاجات إنها الصح لكنه إحساس مش قادرة أدعمه بحجج !
و كأنك كل ما بتقرا زيادة دماغك بتخرب زيادة لأنه أصلاً كله عكس كله و الواحد معتقده بيتوه ف الزحمة دى ..

و مع إنى دخلت كلية باختيارى لكنى مش متأكدة إنى اخترتها عن علم , ومع إنى حابه دراستى و لكنى أتمنى أدرس حاجات تانى , باختصار أنا مش لاقيانى بالضبط , مش عارفة أنا هكون أحسن ف أنه سكة , شايفانى ف حتت كتير و كلها مشوشة
اختصاراً إنا الجملتين دول
"الواحد من كتر ما هو مش عارف هو عاوز ايه .. بقى يخاف يدعى بحاجه معينه .. لانه عارف ان بعد ساعه هيبقى عاوز الحاجه التانيه وبيدعى بيها.

والايمان ضغف وقل ..حتى بقى مفهومه ضبابى احيانا .. لسه بصلى الفرض بفرضه فى المسجد .. يمكن مراجعتى على حفظى قل...ت كتير اوى عن زمان لدرجه انى بقيت ناسى اكتر ما انا حافظ .."

مش عارفه أختم و لا أقفل الكلام لأنى معنديش هدف بس انت قلت قول اللى ف قلبك :)

تحياتى

Amr Hassan يقول...

احلام واضحة؟ انا حصلي العكس تماماً لما بقيت شايف احلامي كلها مهزوزة مشوشة، متعلقة على خيوط مش عارف مربوطة فين حتى..
يمكن ده مش شعور عام، بس ثانوية عامة شوهت روحي تماماً. انا قبل ثانوية عامة كنت شخصاً اخر كلياً. خرجت منها محطم، غير مبال، فاقد الروح. ميت بشكل او اخر. مع اني في النهاية انتهيت في الكلية اللي كنت عايزها. طلعت هي كمان من اسوأ الحاجات اللي حصلتلي.
ممكن تقول ان ثانوية عامة كانت بداية shitstorm لسه مش عارف هاتخلص ولا ﻷ. تقريباً هي دي الحياة اللي ماكنتش متوقعها.
انا مفتقد نفسي أوي.

Marwa Mahdy يقول...

البوست جميل جدا يابطزط وكمان عجبني كلمات محمود درويش عوضني شويه عن غياب صوره توضيحيه للبوست انت عارف طبعا تاريخي مع الموضوع ده ......
المهم انا مش مستغربه من فكره ان فتره الثانويه كانت احلامنا بسيطه لدرجه اننا كنا بنحلم بعد الحلم هايحصل ايه عالمنا كان محدود والعوائق اللي شايفنها او تقريبا مش شايفنها كانت مسهله الموضوع ده عادي كل مانكبر كل ما ادراكنا للعالم اللي راسمينه في خيالنا يختلف لحد ماتعيش الواقع اللي في الغالب مؤلم وهنا بقي الحلم اللي بجد الحلم اللي محتاج خطه وصبر وامل وقدامك تحديات كل عوامل الحلم موجوده لكن زمان حلم حلم يقظه يعني خالي من البهارات......بالنسبه لذكرياتي ساعتها موضوع الاله الحاسبه ده كنت فعلا بعملوهههههه

ليس فقيرا من يحب يقول...

يااااااااااااااااااااه يا واد يا دكتور
والله كأنك بتتكلم بلسانى

ياربى نفس الاحداث نفس التوهان ونفس
بساطه الحسابات مع انى اعتقد انى مازلت بابص للحياه من نضارة ورديه وباحل المشاكل حلول نظريه رومانسيه هبله ملهاش اى علاقه بالواقع يمكن دى الحاجه اللى مش اتغيرت فيا
برده حسه ان علاقتى برنا بقت اضعف وبرده بعد ما كنت تميت حفظ القرءان وكنت براجع نسيت كتير جدا منه

وبرده الاله الحاسبه فى ثانوى اخدت منى راقات وانا عماله احسب فى الدرجات

وحتى درست فى مجال عمرى ما حبيته ولا ارتحتله

كل الحاجات بتاعت زمان وكل الاحلام الورديه زى ما تكون اتبخرت وتلاشت ومبقاش غير حياه كئيبه ممله مفيهاش روح

مش لاقيه كلام بقى كفايه كده

sony2000 يقول...

عملت ذيييييييييييطه اهووو
ههههههههههههههههههههه

still-searching يقول...

قلبت عليا المواجع اوى

فعلا كلنا كان كل واحد جواه حلم ومؤمن بيه جدا
وبيشتغل على اساسه
محدد كل حاجة وحاسبها بالورقة والقلم

للاسف اول ما دخلنا الكلية اتصدمنا بكل شئ على ارض الواقع

كلنا احلامنا اتحطمت قدام صخرات الواقع والحياه

وبعد ما خلصنا واشتغلنا كمان مش بقينا بس معندناش حلم او هدف
بقينا معندناش مبدأ ماشيين عليه واهي عيشة وعايشينها وخلاص

مش جاية عشان اكئب أي حد بس حبيت أفضفض بحاجة لمستها البوست بتاعك

nour يقول...

ياااااااااااا..انا اول مره ادخل المدونه دى ودخلتها صدفه وانا بعمل سيرش على حاجه..ومش عارفه مين صاحبها ولا نظام التعليق ايه ولا اى حاجه بس اللى اعرفه .. انى وانا بقرا موضوع "انا لست لى " عيطت كتييير جدااا وانا بقرا كل كلمه لانهافيها كل حاجه عايزه اقولها بالظبط ورسم لتفكيرى وحياتى تماما..حلو اوى لما الواحد يلاقى حاجات جواه مش عارف يطلعها مكتوبه قدامه فى كلمات.. بجد جزاك الله كل خيير انك خلتنى اعرف
"هو ايه اللى حصل ؟ وايه اللى اختلف "
شكراااااا جداااا وواضح ان المدونه حلوه لانى بصراحه مقريتش غير الموضوع ده ومش عارفه احكم.. بس اكيد هتصفح فيها اكتر ومتأكده ان ان شاء الله كل الكتابات هتكون مستواها عالى كده ..ربنا يوفقكو ..على فكره انا فى نفس ذات طب الاسنان اللى فى الحدوته ..وده أثر فياا اكتر كتيير لما قريت للاخر

امة الله يقول...

انا كنت معدية بالصدفة..
الموضوع اثر في اوي وكان لازم اسيب تعليق..
انا ما صدقت خلصت من ادمان الفيس.
بس اكتشفت ان المدونات دي عالم تاني خالص ربنا يستر ومتقلبش ادمان هي كمان.
اقولك بقى ايام الثانوية العامة الهدف فيها كان واضح فعلا وتحقق بحمد الله.
بس الواحد كان حاسس انه ميت في السنتين دول مكنتش بروح مدرسة خالص وطول الوقت في البيت مش بنزل غير للدروس ومكنتش بشوف حد ولا كنت بتفسح مش عارفة صحيح ايه جو الكابةاللي كنت فيه ده.
وبالنسبة للناحية الايمانية اعتقد ان دلوقت-ولله الحمد احسن بكتير-لان ايام الثانوية كان الواحد من الدرس للبيت والمذاكرة ..وشه في الكتاب ع طول واسرتي مكانتش ملتزمة اوي وكمان مكانش فيه قنوات دينية ولا نت ولاحاجة خالص..انما دلوقت في الكلية..وده غالبا لطبيعتها انك كل يوم بتتعامل مع الموت -اتعرفت على اصدقاء كتير متدينين ..وبحمد ربنا كل يوم انه وفقني لاني ادخل الكلية لاني عرفت فيها بنات بمية راجل ..
صحيح الواحد مقصر جامد في حفظ القران وساعات في السنن بس على طول بلاقي اللي بيشدني تاني.وكمان بتحس باحساس لذيذ اوي..احساس ايماني عالي لما تكون مذاكرتك عبادة . الايمان مش بطول الصيام والقيام او حفظ القران..الايمان اخلاق وعمل .الايمان ده حالة روحانية عالية تؤثر في نفسيتك وتلاقي نفسك مستريح ومتطمن طالما انت بتعمل اللي عليك منتش خايف من بكرة ولا قلقان لان رزقك اتقسم..
بس طبعا لازم يبقى فيه هدف مش متصورة ازاي حد ممكن يعيش من غير حلم يحققه مهما كان الموضوع صعب..لازم اجيب ورقة-لا اوراق وقلم واحدد اللي انا بحبه وانا شابف نفسي فين في المستقبل واصدق اني قادر فعلا احقق ده..لان انت اكيد فيه شيء معين انت متميز فيه حاول تكتشفه بسرعة وتحدد اهدافك واولوياتك وتبدا فورا تجهز له..صدقني بجد هتندم جامد على الوقت اللي ضيعته وانت عايش من غير هدف.وهتلاقي ناس سبقوك ليه.مع انهم مش احسن منك بس انت اللي مكنتش حاطط ف بالك الموضوع من الاول..يعني اللي طلع معيد واتعين في الكلية ده..احتمال كبير انه مش اذكى منك لكن هو من ساعة ما دخل الكلية وهو حاطط في دماغه الهدف ده واشتغل فيه بجدية..
هو اتعين معيد وانت اتعينت ع القهوة مستني الوظيفة واتمرمطت.
انا سرحت جامد يلا كفاية كده وشكرااا

امة الله يقول...

انا كنت معدية بالصدفة..
الموضوع اثر في اوي وكان لازم اسيب تعليق..
انا ما صدقت خلصت من ادمان الفيس.
بس اكتشفت ان المدونات دي عالم تاني خالص ربنا يستر ومتقلبش ادمان هي كمان.
اقولك بقى ايام الثانوية العامة الهدف فيها كان واضح فعلا وتحقق بحمد الله.
بس الواحد كان حاسس انه ميت في السنتين دول مكنتش بروح مدرسة خالص وطول الوقت في البيت مش بنزل غير للدروس ومكنتش بشوف حد ولا كنت بتفسح مش عارفة صحيح ايه جو الكابةاللي كنت فيه ده.
وبالنسبة للناحية الايمانية اعتقد ان دلوقت-ولله الحمد احسن بكتير-لان ايام الثانوية كان الواحد من الدرس للبيت والمذاكرة ..وشه في الكتاب ع طول واسرتي مكانتش ملتزمة اوي وكمان مكانش فيه قنوات دينية ولا نت ولاحاجة خالص..انما دلوقت في الكلية..وده غالبا لطبيعتها انك كل يوم بتتعامل مع الموت -اتعرفت على اصدقاء كتير متدينين ..وبحمد ربنا كل يوم انه وفقني لاني ادخل الكلية لاني عرفت فيها بنات بمية راجل ..
صحيح الواحد مقصر جامد في حفظ القران وساعات في السنن بس على طول بلاقي اللي بيشدني تاني.وكمان بتحس باحساس لذيذ اوي..احساس ايماني عالي لما تكون مذاكرتك عبادة . الايمان مش بطول الصيام والقيام او حفظ القران..الايمان اخلاق وعمل .الايمان ده حالة روحانية عالية تؤثر في نفسيتك وتلاقي نفسك مستريح ومتطمن طالما انت بتعمل اللي عليك منتش خايف من بكرة ولا قلقان لان رزقك اتقسم..
بس طبعا لازم يبقى فيه هدف مش متصورة ازاي حد ممكن يعيش من غير حلم يحققه مهما كان الموضوع صعب..لازم اجيب ورقة-لا اوراق وقلم واحدد اللي انا بحبه وانا شابف نفسي فين في المستقبل واصدق اني قادر فعلا احقق ده..لان انت اكيد فيه شيء معين انت متميز فيه حاول تكتشفه بسرعة وتحدد اهدافك واولوياتك وتبدا فورا تجهز له..صدقني بجد هتندم جامد على الوقت اللي ضيعته وانت عايش من غير هدف.وهتلاقي ناس سبقوك ليه.مع انهم مش احسن منك بس انت اللي مكنتش حاطط ف بالك الموضوع من الاول..يعني اللي طلع معيد واتعين في الكلية ده..احتمال كبير انه مش اذكى منك لكن هو من ساعة ما دخل الكلية وهو حاطط في دماغه الهدف ده واشتغل فيه بجدية..
هو اتعين معيد وانت اتعينت ع القهوة مستني الوظيفة واتمرمطت.
انا سرحت جامد يلا كفاية كده وشكرااا

امة الله يقول...

انا كنت معدية بالصدفة..
الموضوع اثر في اوي وكان لازم اسيب تعليق..

فعلاايام الثانوية العامة الهدف فيها كان واضح وتحقق بحمد الله.
بس الواحد كان حاسس انه ميت في السنتين دول مكنتش بروح مدرسة خالص وطول الوقت في البيت مش بنزل غير للدروس ومكنتش بشوف حد .
وبالنسبة للناحية الايمانية اعتقد ان دلوقت-ولله الحمد احسن بكتير-لان ايام الثانوية كان الواحد من الدرس للبيت والمذاكرة ..وشه في الكتاب ع طول واسرتي مكانتش ملتزمة اوي وكمان مكانش فيه قنوات دينية ولا نت ولاحاجة خالص..انما دلوقت في الكلية..وده غالبا لطبيعتها انك كل يوم بتتعامل مع الموت -اتعرفت على اصدقاء كتير متدينين ..وبحمد ربنا كل يوم انه وفقني لاني ادخل الكلية لاني عرفت فيها بنات بمية راجل ..
صحيح الواحد مقصر جامد في حفظ القران وساعات في السنن بس على طول بلاقي اللي بيشدني تاني.وكمان بتحس باحساس لذيذ اوي..احساس ايماني عالي لما تكون مذاكرتك عبادة . الايمان مش بطول الصيام والقيام او حفظ القران..الايمان اخلاق وعمل .الايمان ده حالة روحانية عالية تؤثر في نفسيتك وتلاقي نفسك مستريح ومتطمن طالما انت بتعمل اللي عليك منتش خايف من بكرة ولا قلقان لان رزقك اتقسم..
بس طبعا لازم يبقى فيه هدف مش متصورة ازاي حد ممكن يعيش من غير حلم يحققه مهما كان الموضوع صعب..لازم اجيب ورقة-لا اوراق وقلم واحدد اللي انا بحبه وانا شابف نفسي فين في المستقبل واصدق اني قادر فعلا احقق ده..لان انت اكيد فيه شيء معين انت متميز فيه حاول تكتشفه بسرعة وتحدد اهدافك واولوياتك وتبدا فورا تجهز له..صدقني بجد هتندم جامد على الوقت اللي ضيعته وانت عايش من غير هدف.وهتلاقي ناس سبقوك ليه.مع انهم مش احسن منك بس انت اللي مكنتش حاطط ف بالك الموضوع من الاول..يعني اللي طلع معيد واتعين في الكلية ده..احتمال كبير انه مش اذكى منك لكن هو من ساعة ما دخل الكلية وهو حاطط في دماغه الهدف ده واشتغل فيه بجدية..
هو اتعين معيد وانت اتعينت ع القهوة مستني الوظيفة واتمرمطت.
انا سرحت جامد يلا كفاية كده وشكرااا

امة الله يقول...

انا كنت معدية بالصدفة..
الموضوع اثر في اوي وكان لازم اسيب تعليق..

فعلاايام الثانوية العامة الهدف فيها كان واضح وتحقق بحمد الله.
بس الواحد كان حاسس انه ميت في السنتين دول مكنتش بروح مدرسة خالص وطول الوقت في البيت مش بنزل غير للدروس ومكنتش بشوف حد .
وبالنسبة للناحية الايمانية اعتقد ان دلوقت-ولله الحمد احسن بكتير-لان ايام الثانوية كان الواحد من الدرس للبيت والمذاكرة ..وشه في الكتاب ع طول واسرتي مكانتش ملتزمة اوي وكمان مكانش فيه قنوات دينية ولا نت ولاحاجة خالص..انما دلوقت في الكلية..وده غالبا لطبيعتها انك كل يوم بتتعامل مع الموت -اتعرفت على اصدقاء كتير متدينين ..وبحمد ربنا كل يوم انه وفقني لاني ادخل الكلية لاني عرفت فيها بنات بمية راجل ..
صحيح الواحد مقصر جامد في حفظ القران وساعات في السنن بس على طول بلاقي اللي بيشدني تاني . الايمان مش بطول الصيام والقيام او حفظ القران..الايمان اخلاق وعمل .الايمان ده حالة روحانية عالية تؤثر في نفسيتك وتلاقي نفسك مستريح ومتطمن .
بس طبعا لازم يبقى فيه هدف مش متصورة ازاي حد ممكن يعيش من غير حلم يحققه مهما كان الموضوع صعب..لازم اجيب ورقة-لا اوراق وقلم واحدد اللي انا بحبه وانا شابف نفسي فين في المستقبل واصدق اني قادر فعلا احقق ده..لان انت اكيد فيه شيء معين انت متميز فيه حاول تكتشفه بسرعة وتحدد اهدافك واولوياتك وتبدا فورا تجهز له..صدقني بجد هتندم جامد على الوقت اللي ضيعته وانت عايش من غير هدف.وهتلاقي ناس سبقوك ليه.مع انهم مش احسن منك بس انت اللي مكنتش حاطط ف بالك الموضوع من الاول..يعني اللي طلع معيد واتعين في الكلية ده..احتمال كبير انه مش اذكى منك لكن هو من ساعة ما دخل الكلية وهو حاطط في دماغه الهدف ده واشتغل فيه بجدية..
هو اتعين معيد وانت اتعينت ع القهوة مستني الوظيفة واتمرمطت.
انا سرحت جامد يلا كفاية كده وشكرااا