2011/09/15

حب البلد بيعيش...لمّا يموت الجوع


الانسان مبيقدرش يبقى انسان الا بعد ما يقدر يشبع كل غرائزه الحيوانيه .. دى حقيقه مهما حاولنا نجملها او نصيغها باى شكل اقل حده.
متقدرش تمنع التحرش بنسبه 100% الا لو اشعبت الغريزه الحيوانيه اللى فى داخلنا .. عن طريق اباحه الجنس او تسهيل الجواز.
نفس الكلام دا ممكن يتقال على اضراب الدكاتره.
انا شخصيا واحد من الناس المتردده فى اخذ موقف من اضراب الدكاتره .. المستشفى اللى انا فيها مضربه واضراب كلى كمان .. ورغم كده انا وكتير غيرى لسه فى حيره.
انا بعترف وبصراحه وبوضوح انى بشتغل باستهتار شديد جدا فى المستشفى .. استهتار يضر بمصلحه العيان لاقصى درجات الضرر .
بس لو جيت تحلل ليه انا بعمل كده هحكيلك ايه اللى بيحصل بالظبط
العيان اول ما بيدخل عندنا بيدخل قسم التشخيص .. القسم دا اللى هيحوله لاى قسم تانى حسب حالته " حشو ,علاج عصب ,اطفال تركيبات, خلع"
ابسط ادوات التشخيص حاجه اسمها بروب ومرايه .. انا مش مسموح لى استخدم لكل عيان بروب لانى لو عملت كده بدل ال200 حاله اللى بنشتغلهم كل يوم هنشتغل بالكتير 30 حاله
البروب له ناحيتن .. ناحيه مصممه انها تكشف على الاسنان الاماميه وناحيه للسنان الخلفيه .
احنا بنستخدم ناحيه واحده بس للعيان وبنركن الناحيه التانيه على الحوض .. اللى هو اصلا ملوث ..بجانب انى لمسته بايدى الملوثه من العيان اللى قبله .. ومينفعش نستخدم البروب لعيان واحد لاننا كده هنقلل عدد العيانين ال30 للنص وباقى العيانين اصلا بنشخصهم بعنينا بس.
اذا قلنا ان دا بيحصل فى عياده التشخيص اللى هى  ( أ, ب) كمل على دا فى باقى العيادات.
انا شخصيا فى قسم الحشو بشتغل اى كلام .. احنا بنستخدم ارخص حشوه بلاتين فى السوق .. والحشوه دى بتبقى مفروله ومستحيل تعيش اكتر من سنتين تلاته من غير ما يتكون تحتها تسوس.
انا شفت بعينى فى محل مستلزمات اسنان والراجل ضربلنا الحشوه دى وفضلت تطلع هباب اسود كل ما نلمسها ودا معناه انها بتحلل شويه بشويه.
مهما انا عملت الحشوه دى بذمه .. هتعب نفسى فيها على الفاضى وهى كده كده هتبوظ.
الاطفال 80% بنعملهم خلع بصرف النظر عن الحاله تنفع حشو ولا لأ .. ودى جريمه... بس احنا بنعمل كده لسبب بسيط ان مفيش غير كرسى واحد فى عياده الاطفال ومينفعش امشى كل العيانين من غير ما اعالجهم .. لا هم هيسيبونى ولا قلبى هيطاوعنى اعمل كده فى طفل حتى لو كنت بضره على المدى البعيد ..لانى بالكتير مش هقدر اعمل حشو لاكتر من 6 حالات فى اليوم كله.
انا مبشتغلش بذمه لانى هتعب تعب مضاعف فى المستشفى لان النور اللى فى الكرسى سايب ومش بيتظبط واغلب الشغل شغال فى الضلمه ومش شايف .. وبعد التعب المضاعف وضهرى اللى هيتقطم لان الكرسى مش شغال بالكفاءه المفروضه ..  العيان مش هيستفاد منه لانى فى الاخر بحط له مواد هى اقل مواد فى السوق.
بتعب اكتر وهو بيستفاد اقل .
لو صممت الضرس بشكل عبقرى- واللى هو مستحيل يحصل من غير على الاقل نور وكرسى ابن ناس - وحطيت فيه حشوه سيئه الحشوه مش هتعيش .. العكس ممكن يعيش.
ضيف لدا انى لو تعبت فى حالات هتفشل كده كده .. لو كان عندى شغل بره ايا كان او حتى عياده هروحلها تعبان ومش هقدر اشتغل.


انا دلوقتى امتياز .. ومرتبى كله على بعضه 251 جنيه بعد شهرين ان شاء الله هستلم تكليفى وهيكون المرتب بتاعى الاساسى 151 جنيه وحوافز من 300% لـ400% يعنى دخلى هيبقى من 600 ل 700 جنيه تقريبا .
انا ليه مقلتش ان المرتب بتاعى هيبقى من 600 لـ700 جنيه من الاول وقلت لك الاساسى كذا والحوافز كذا .. دا مش عشان اقلل من حجم المرتب والله .. لكن لأن اصحابى اللى فى تكليفهم السنه دى حوافز شهر 1 بيقسموا انهم لسه مخدوهاش .. يعنى من شهر 1 لحد النهارده كل اللى بيقبضوه 151 جنيه .. هى الحوافز مش هتروح عليهم وهيخدوها تدريجيا .. بس انت فاهم يعنى ايه هو عايش بقاله كام شهر ب151 جنيه؟
دا غير ان التكليف بيكون غالبا فى اماكن بعيده .. يعنى تبعد عن اهلك وكمان متقدرش تفتح عياده لانك مش مستقر فى مكان .. وفى الاخر تاخد مرتب اى كلام.
انا مش عارف اشوف الطب كمهنه انسانيه لانى احتياجاتى الاوليه مستحيل هتتحقق بالمرتب دا .. مش عارف اخاف على مصلحه المريض لان مصلحتى مش متحققه .. ولان مستحيل مصلحته هتتحقق مهما اشتغلت كويس طالما كل الادوات اللى بشتغل بيها مش شغاله.
الدكاتره عموما اللى بيشتغلوا فى المستشفيات بيتقال عليهم مش بيفهموا حاجه فى الطب ... والاغلب ان الكل بيشتغل باستهتار لانه عارف انه مستحيل العيان هيحصل على نتيجه كويسه فى الامكانيات دى.
النتيجه ان الخدمه اللى هتاخدها فى اى مستشفى حكومى هتبقى خدمه سيئه .
والدكتور عشان يبقى دكتور شاطر ان مكانش غنى ماديا اصلا مستحيل يقدر يحضر ماستر او زماله .. لانها بتوصل لارقام فلكيه 30 الف واكتر.
بالمناسبه الدكاتره اغلبهم اغنيا جدا ودول غالبا بيقدموا على اجازات او استقاله او على الاقل نص مرتب او بيسافر .. وفى منهم اللى بيفضل فى وزاره الصحه وبيشتغل باستهتار وبيحضر بعدم انضباط لكل الاسباب اللى فوق دى .. لانه بيشوف انه ملوش لزمه اتعب كل التعب دا من غير نتيجه
بالمناسبه متتعاطفش معايا انا الحمد لله وفضل من ربنا دخلى كويس بره وزاره الصحه :) بس عشان دخلى يبقى كويس محتاج اولا يكون حظى كويس وربنا يوفقنى والحاجه التانيه محتاج اشتغل حوالى 14 ساعه فى اليوم.

الحيره بقى فى حوار الاضراب .. هى الاجابه على الاسئله دى هل دا وقته وحال البلد الكل عارفه؟
والسؤال التانى : هل من حقى اقول للعيان لانى مش عارف اعيش ولانى كده كده هعالجك اى كلام فى اى كلام فانا خلاص مش هعاجلك وأتألم او متتألمش مليش دعوه؟
طب ما انا برضه عاوز حقى .. ومش هشتغل ولا هعرف اشوف الطب كمهنه انسانيه الا لو قدرت اشبع احتياجاتى الحيوانيه الاول؟
انا شخصيا مش عارف وان كنت مضرب مع المضربين بحكم ان المستشفى كلها مضربه اصلا وقافلين الابواب ومبندخلش ولا عيان للمستشفى اصلا.

هناك 7 تعليقات:

AHMED SAMIR يقول...

معقول انت بعد كل اللي كاتبه دة مش مضرب من زماااااااااااااااااان...؟؟
يا خبر ابيض

زهرة الضحا يقول...

هو ليه الكل كده
بس عندك حق المفروض لما الانسان يكفي نفسه هيعرف يدي اللي حواليه

انا طول حياتي مؤمنه اني لازم أشتغل الحاجه اللي بحبها علشان أعرف أنتج و أطور

بس للأسف مش عارفه أشتغل الحاجه دي و بشتغل شغل تاني و بقيت فيه زي الناس اللي كنت بنتقدها داما

الناس اللي بتروح الصبح تقعد علي مكتبها متعملش حاجه لحد ما تروح
و اللي بتقبض في أخر الشهر و مش عارفه يتقبض ليه

الناس اللي دايما حاسه بفضي
بس هو أنا السبب في ده الله أعلم

ممكن يكون علشان أنا بشتغل في مجال مش بتاعي
أو دا يرجع إن عندنا اللي بيشتغلوا لازم يكونوا ذكور علشان يطلعوا المحطات و من كتر ما كنت بعمل مشاكل إني عايزه أشتغل برده موصلتش لحاجه
بس هنعمل إيه
رينا يكتبلنا الخير و يخلينا تشتغل حاجه تانيه و نشتغل فيها بجد

sony2000 يقول...

يالله

عندك حق فكل كلمه قلتها

طب الاوضاع دي هتتحسن امتا بما ان كل حاجه بيظه كدا:(

غير معرف يقول...

{ وَقُلِ اعْمَلُوا فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ وَسَتُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُمْ بِمَا كُنْتُمْ تَعْمَلُونَ }

مها- مشربية

غير معرف يقول...

بجد يادكتور انت عقدتني اكتر من منا متعقده :D
انا دلوقت ف تانيه اسنان بغض النظر عن ان المستشفى بتاعت الكليه ضايعه اساسا وتقريبا مفيش تعليم والواحد كان حاطط امل ان مع الخبرة والممارسه لما هيشتغل هيعوض النقص الدراسي اللي احنا فيه ده ..
انا مع اضراب الدكاترة لان الاضراب ده لمصلحتهم بردو .. هما من حقهم انهم يتعالجوا ف مكان نضيف مينقلهمش امراض .. ومن حقنا اننا ناخد فرصتنا اننا نفيد البلد ف المجال اللي ربنا يسرنا اننا نخدمها فيه

marwa mahdy يقول...

m3aak en wad3 el se7h fe masr zeft 2na 2sht3lt 2 years we 3arfh 2ad eeeh btkoon nefsk te3ml 7agat kteeer bs 3la 2ad le7afk b2a lkn mawkfe men el 2draab fe 2i keta3 mesh wade7 sa3at ba2ool mesh wa2to 5ales l2n el balad mesh na2sa we lma el magls el 3askry la mo2a5zh bysbt 3aba2o el syase fe 2daret 2i 2zmh ba2ol 3alia we 3la 23da2y we lazem 2drab ,,,

emmy يقول...

ضغطت عالجرح يا دكتور جرح كل واحد عنده ضمير بيشتغل في وزارة كله ماشي بالتساهيل - وزارة الصحة سابقا
مش بالصدفة ان الحال يكون كده لا يمكن تكون صدفة عالعموم املنا ان بكره يكون افضل لو بكره ده جه قبل الضمير ما يموت!!!!!!!!!!!!!!