2008/04/21

جدى ؟؟ ام جدتى؟؟!!

رغم ان جدتى توفت قبل جدى باعواااام الا اننى مازلت اذكرها جيدا.... حتى اكثر بكثير من جدى - رحمهما الله-




ربما لان جدتى كانت بارعه فى ايصال مشاعرها لى




جدتى حقا كانت بارعه




حتى انى مازلت اتذكر دفئ حضنها .. وهى تحاول ان تطبع على خدى قبله.. وانا عاندها .. وهى تصر.. ثم امسح القبله من على
وجهى .. لتحاول هى ثانيه



تعاملنى وكأنها طفله فى سنى..




اكتر حاجه فاكرها لما كنت بروح لجدتى البلد .. تدخل اوضتها .. وتجيب لى كام تفاحه على كام صابع موز على اى حاجه تانيه




ثم تغمز لى بكلتا عينيها .. وكانها تقول لى سر لا يعرفه غيرى




" بص يا حبيبى تيته عاينالك ايه .. دى كانت احلى تفاحه انا قلت اخليها لغايه ما انت تيجى تخادها "




بالطبع كنت اصدق ان جدتى احتفظت لى بافضل تفاحه ولم تعطها لاولاد خالتى الاخرين




" كلها بسرعه عشان اجيب لك باقى الحاجات الى عينهالك"
"كنت اصدق اننى افضل احفادها مثلما كانت دائما تقول لى"


عندما اقول لها " تيته انا خلاص مروح بقى عايزه حاجه"




تقولى " لا يا حبيبى سلم لى على ماما وربنا يخليك ويحفظك بلاش تتعبوا ماما"


حاضر يا تيته




طب خد وتعطينى جنيه او اتنين بالكتير اوى


وتقولى "هاتلك بيهم حاجه حلوه"




كم كانت هذه النقود القليله تسعدنى جداااااا كما قلت لكم جدتى كانت رائعه بحق




رغم ان جدى كان يعطى امى فلوس ربما اكثر بكثير من تلك التى تعطيها لى جدتى الا انه كان يعطيها لامى لم يشعرنى انه اعطاها لى
رغم انه كان يأتى لنا بالفواكه كثيرا اثناء زيارته لنا




لكنه لم يكن يحتفظ لى بافضل -هذه-الفاكهه حتى يعطيها لى




ربما قبلنى كثيرا .. لكنه لم يحاول ثانيه عندما امسح قبلته من على وجهى




ثم هو لم يكن يستطيع ان يعمل لى البيض بطريقه جدتى الخاصه - التى لاتعرفها امى حتى .




ربما كان جدى حنين جدا ... لكنه وبكل المقاييس لا يقارن مع جدتى


لم تكن جدتى تجلسنى لتنصحنى كثيرااا




لكنها كانت تقول لى انت راجل البيت دلوقتى يامحمود... انت الراجل يا حبيبى خلى بالك من ماما
...عايزاك يا حبيبى تطلع الاول



الاول حته واحده يا تيته




امال؟؟!! هو انا لى حفيد اشطر منك ..اذا مكنش انت الى هتطلع الاول امال مين الى هيطلع






اما جدى فكان يوجه لى نصائحه بطريقه مباشره ذاكر وبلاش لعب انت وراك ايه غير المذاكره




كان يحبنى بالفعل لكنها كانت رائعه وكانت تحبنى اكثر منه




حتى اننى لا اتذكر من جدى الا انه كان زوج جدتى , ولا ادعو له الا عندما ادعو لجدتى




** علمتنى جدتى ان فلسفه العطاء ان تشعر الناس انك تحبهم .. وهى كانت بارعه فى ايصال هذا المعنى لى




رحم الله جدتى وغفر لها - وجدى ايضا -

هناك 47 تعليقًا:

mady يقول...

رحم الله جدتك وجدك يابطوط
بتفكرني بجدتي بجد
مش مهم انت بتدي ايه المهم انت بتديه ازاي
هي كانت دايما تقولي كده

عصفور المدينة يقول...

رحم الله جدتك وجدك
وهذا هو الفرق بين الأب والأم أيضا

بس كل واحد له فائدة ويعوض جانب

اهو ده عيبه يقول...

اللهم ارحم اموات المسلمين جميعا

فعلا الواحد بتبقى ليه ذكريات حلوة قوى من الطفولة
وعموما فى اغلب الاحوال الجدات بيبقوا احن حبتين علينا

Abo 7anf يقول...

ازيك يمحمود باشا
والله انا بنلخبط بين المدونتين
ماعلينا
عارف اهم م انك بتاخد قد ايه
انت بتخدوا ازاى
لان فعلا العطاء مش قيمته
بطريقته
وربنا يرحم جدنك وجدك ويسكنهم فسيح جناته

صاحب المضيفة يقول...

رحم الله الجميع

جدتك وجدتي

جدك وجدي

كانوا علامات مضيئة في زمن لايعرف الصفاء ولا النقاء


رحم الله موتانا جميعا

عبده الرايق يقول...

طبعا زعلان على جدتك وفاكرها اكتر علشان الاتنين جنيه
والفاكهه
ومش فاكر جدك علشان كان بيدى الفلوس للوالده
شفت الفلوس هى المحور

فرنسا هانم يقول...

طبعا جدتك
ثم جدتك
ثم جدتك
ثم جدك
ده مش تحريف للحديث ولكن الجد والجده ابوين بالطبع

واحدة مفروسة يقول...

الله يرحم امواتنا جميعا....تصدق فعلا ان فلسفة العطاء انك تشعر الناس انك تحبهم....يااااااااه يا بطوط الجملة قويه جدا..

هبة المنصورى يقول...

بالرغم من إنى ماشفتش الجدين-الرجاله- وعشان كده مقدرش أعمل مقارنه بين الجد والجده زى ماأنت عامل إلا إنى باحس فعلاً إن الجدة هى الأحن وخاصة جدتى لأمى

ربنا يرحمهم جميعاً ويطول ف عمر اللى فاضله فتدعيلنا وتفكرنا بأمثال وحكم زمان وتعمل البيض المقلى بالوصفة السحرية وتدينا العيديات اللى بتحسس الواحد إنه لسه صغير ماكبرش أوى

واحدة مفروسة يقول...

بطوط ما تزعلش ليك عندى تاج...ادبست فيه و بما انك من القلائل اللى اعرفهم فى بلد البلوجريه.قلت اديهولك ...سلام

الفارس الملثم يقول...

دايما يا محمود بتطرح افكار عميقة حتي وان بدا شكل الموضوع بسيط , الفكرة اللي وصلتني , ان الحب اكبر وسيلة اقناع , وكمان مش بس مفروض تحب الانسان لكن الاهم توصله احساس الحب ده ...

تسلم ايدك يا محمود وبوست رائع

تحياتي

appy يقول...

مش هقولك اكتر من ان تيته او (نانا) زى ما بنقول لها عندها زهيمر وانا الوحيده اللى مش بتنسانى عارف ليه لانى فعلا بحبها من قلبى وهى بتحبنى جدا
بص يا دودو الستات حنينيين عن الرجاله فمشاعرهم بتوصل اكتر على الرغم من ان اللى مربينى جدو ابو بابا بس برضه كنت بحس بحب (نانا) ام ماما اكتر
ربنا يرحم موتانا ويشفى (نانا) اللى هى بتاعتى

aya يقول...

ياااااه يا محمود

فكرتنى بايام حلوة اوى
بجد ربنا يرحمهم
ويعفو عنهم

عايزة اقولهم بجد وحشتونى


ربنا يرحم كل امواتنا المسلمين

shahy يقول...

شايف الحب والحنان بيفضلوا محفورين ازاي
يالا اتعلم

ربنا يخلي كل الناس الحنينة ويرحم اموات المسلمين

تحياتي

NilE_QueeN يقول...

الانسان بيموت لما ينقطع ذكراه وتاثيره

ربنا يرحم جدتك ويجمعك بيها وبكل حبايبك ف الجنه

Wael يقول...

رحمهما الله
وصدق اللى قال
( اعز الولد , ولد الولد )

همسات دافئه يقول...

ربنا يرحمهم هم الإتنين أكيد هم الإتنين كانوا بيحبوك بنفس المقدار بس كل واحد ليه طريقته ذى ما انت قلت
فى حاجات بسيطه اوى بس بيكون ليها تأثير قوى جدا
فى ناس بتحب ذى جدك وفى ناس بتتقن فن الحب ...ذى جدتك
تحياتى:)
شيماء

ftafeet يقول...

الله يرحم جدتك وجدك يابطوط
وحلو اوى انك بتفتكرهم

انا بقى للاسف ملحقتهمش

واللى موجوده لحد دلوقتى انا بعيده عنها

بس انت حسستنى بيهم

شكرااا


نونااا

خبيب يقول...

رحمة الله عليهما معا

---

نقطة رائعة

وهكذا نصل للناس

---

بارك الله فيك

Tamer Nabil يقول...

فلسفه العطاء ان تشعر الناس انك تحبهم

كلامك عن جدتك فكرنى بجدتى الله يرحمها


ويرحم جدتك


ربنا يوفقك


تحياتى

د/اجدع بنوته يقول...

ربنا يرحمها

وانا كمان فكرتنى بجدتى

الساحرة يقول...

رحم الله جدتك

الست دايما بتبقي الحنيه عندها زيادة

شويه جدتي لا اتذكرها جيدا ولكني كنت دائمه النقاش معاهاوالذي يصل الي حد الشجار بس كنت بموت فيهاوامي تفعل مع اولادي

كل ما حكيته عن جدتك لدرجه انهم يحبونها


اكتر مني ساعات بغير منها هههههههههههههههههههههه

نوره الخشن يقول...

انت فظيييييييييييع انا اول مرة ادخلك بس بجد هاجي تاني انشاء الله

بس غريبة ماتزعلش مني يعني انا مدب اول مرة اشوف دكتور سنان دمه خفيف مع احترامي للجميييييع

Sally يقول...

بوست بجد تحفة
ما شاء الله
الله أكبر
بجد فكرتنى بجدتى كأنك بتتكلم عنها .. بس جدى برضه كان طيب وحنين اوى يمكن احن منها كمان كان بيحكيلنا حواديت ويخرجنا يفسحنا ويجيبلنا حب العزيز
الله يرحمهم يارب
جدتك وجدك وجدتى وجدى
ربنا يرحمهم ويغفر لهم ويعافهم ويعفو عنهم ويكرم نزلهم ويوسع مدخلهم

اللهم آمين
انا على فكرة برشح البوست ده لمدونة صحفية روشة " كل من دون فأبدع "

تحياتى لك ولها
دمت بخير اخى
سالى

Sally يقول...
أزال المؤلف هذا التعليق.
maha zein يقول...

ربنا يرحمهم
مفبش احلي من الجدود
بالزات اهل الام
وبعدين بيض ايه الي كانت بتعممله مش تقولنا الطريقة يا جدع
اشكرك علي تعليقك عندي
وانا رديت علي سيادتك
تحياتي

Ahmed Mubarak يقول...

الله تيته ديه كانت حنينه أوي .. وواضح انك كنت بتحبها

رحمة الله عليها

تحياتي

*سمر* يقول...

الموضوع ده بيفكرنى بعمتى ..لما دايما تقولى ان جدتى بتحبنى اوى ..بس هى اللى مش بتبين ..
وكمان فكرنى بصحابى ..لما بيقولوا على انى مبالغة ..علشان بحاول احسس كل اللى حوليا انى مهتمة بيهم ...

انا شايفة ان المشاعر الانسانية لا قيمة لها على الاطلاق ..دون التعبير عنها ..وكمان قلة التعبير عنها ..بيخلينا نفقد علاقات ..واشياء جميلة ممكن نحس بيها لو عبرنا عن مشاعرنا :)

sebofy7alo يقول...

رائع فكرة البوست جميلة جدا والحكمة اللي أنت ذكرتها في الأخر فعلا هي الخلاصة
وأعتقد لو سميت الموضوع دة بفلسفة العطاء أعتقد أنة أفضل لأنك لمست قلوب الناس وفكرتنا بجدودنا اللة يرحمهم جميعا وأنت بتحكي كادت دموعي تنزرف لما تذكرت جدتي.
الى الأمام دائما.

كائن مائي يقول...

السلام عليكم

الله يرحم جدك وجدتى وجدى وجدتى وكل اموات المسلمين

والله انا فى الواقع مااعرفش مين احن من مين جدى ولا جدتى

لان جدى ساب الدنيا من قبل ما بابا ما يتجوز ببتاع 14 سنه
وماحدش من احفاده شافه من اساسه خالص
غير صورة بطربوش كدا

قدمت نقطة مهمة اوى هى التعبير عن المشاعر , على فكرة ديه مشكلة كبيرة جدا انك تكون بتحب حد لكن مش قادر توصله مشاعرك صح.

تحيــاتى

Bongo يقول...

" كان يحبنى بالفعل لكنها كانت رائعه وكانت تحبنى اكثر منه "

رأيي ان مش بالضرورة جدتك تكون كانت بتحبك اكتر من جدك ,,

في اشخاص بيعرفوا يعبروا عن حبهم و في ناس لأ

يعني ممكن جدك يكون كان بيحبك زي جدتك او يمكن اكتر او اقل , انما معرفش يعبر عن ده بنفس الطريقة الجميلة الي عبرت بيها جدتك عن حبها

ربنا يرحمهم برحمته

Gannah يقول...

واضح ان جدتك رحمها الله كانت انسانة رائعة و لكن الفارق هنا هو الفارق بين الأم و الأب. الأم لا تخجل و لا تتردد فى اظهار مشاعرها بينما الرجل نادرا ما يُظهر مشاعره.
الحب و العطاء معانى جميلة. رحم الله جدتك و جدة
تقبل تحياتى

سهر الليالى يقول...

يااااااااه يا محمود
كلامك حلو اوى وابكتنى

نعم نحن محاطين بكثيرين يحبوننا وحدهم المحظوظون منهم من يستطيعون ان يعبرو عن ذلك الحب

ويختلف مفهوم الحب بين الناس فمنهم من يجده فى النصح والتوجيه او الشده وقد نكتشف بعد وقت انهم كانو محقون ولكن كانت تلك طريقتهم فى التعبير

لكن وحده الحب بالعطاء هو ما يلمس أكثر فيبقى خالدا

فكرتنى بجدتى ربنا يديها الصحه ويخليهالى أما جدى رحمه الله عليه فكان حنين هو كمان ودول لأمى وبحبهم أكتر بكتير لنفس السبب اللى ذكرتو

رحم الله جدتك وجدك أيضا

روز يقول...

ربنا يرحمها واموات المسلمين جميعا... شفت بقى يابنى ادى فرق الام عن الاب... يارب تاخدوا بالكوا بس وتعرفوا قيمتنا فى الدنيا

حمامة يقول...

ربنا يرحمها يارب ويرحم جدك
بجد عنيا رغرغت ..
على فكرة معظم الجدات بيكونوا احن من الجدود انا عن نفسى كده
تقريباً تيته - ربنا يديها الصحه-كانت ومازالت الى حد كبير بتعمل كده
وبرضه تجيبلى وتجيبلنا كلنا تفاح بس مش لازم احسن واحده وتدينى فلوس
بيكونوا حنينين اوى ..
ودايما بيبقى حضنهم دافى وريحتهم حلوة وبيتهم هادى ونضيف واكلهم اجمل اكل على الرغم سنهم اللى كتير مش بيسمحلهم انهم يعملوا حاجات كتير ..

ربنا يرحم من مات من اجدادنا وجداتنا ويدى الصحة لمن هم على قيد الحياة ..

:)

somaa mahaba يقول...

الله يرحمهم يا بطوط
بس ايضا دى طالعه ناشفه شويه منك
خلينى اقولك ان المراه تختلف عن الرجل فى كيفيه ايصال مشاعرها ولا يعنى ان جدك لم يكن يحبك...بس هو معرفش يوصلك دا
انا بقى جدى عندى اغلى من جدتى ؟؟
يوم ما مات حسيت ان ابى الحقيقى مات
وحتى الان بدخل البيت مش مصدقه انه مات مع انه توفى سنه 2003بس لسه حساه عايش فى البيت
موضوعك جميل تسلم
وربنا يرحم اموات المسلمين جميعا
انت مش ناوى تفوت تشوف التخريفه الخامسه ولا ايه فى مجنونه؟؟؟
تحياتى ليك سومه_87

Helium Atom يقول...

انت طيب اوى يا بطوط

(:

واحد من البلد دى يقول...

رحم الله جدتى-وجدى أيضا-.....تصور بقى إن الخاتمة دى أروع ما فى البوست...تحياتى يا جميل

مسلم يقول...

جميل قوي

بجد بطوط حبوب

بجد أنا إنبسط إني زرت مدونتك

بجد

Oma يقول...

rabna yer7mha w ye7sl eleha w yer7am gedak

gamela awe elzekryat de :))

بنت المسلمين يقول...

طب عايزة اعيط بقىىىىىىىىى

جدتك الله يرحمها اجادت فى تعليمك
و انت اجدت فى الفهم و التعبير
رحمهما الله كليهمااا
و بجدجزاااكم الله خيرا على المعنى الرااااااااااااائع

monaliza يقول...

ربنا يغفر لهما ويجعل مثواهما الجنة
وما اجمل ان يتوج حبنا للاخرين بكلمات وافعال تؤيد مشاعرنا وتخلد ذكرانا بداخلهم
مغزى الموضوع حلو جدا يادكتور
بالتوفيق دائما

راحــله يقول...

تدوينه تحفه والمعانى عميقه وبسيطه جدا فعلا الحب بالتاثير والافعال مش بالكلام واجمل عطاء عطاء الام والجده بجد هايل
ربنا يبارك فيك ويرحمهم جميعا

واحد من البلد دى يقول...
أزال المؤلف هذا التعليق.
مواطن مصرى نايم يقول...

الله يرحمهم
و يرحم جميع موتانا
انت عارف انا بقى
مشفتش و لا جدى و لا جدتى خالص
و مفيش صور ليهم
تخيل بقى الحزن
مفيش غير جدتى ام والدتى
هى اللى ربنا يخليها
هى الوحيدة اللى موجودة
ربنا يطول فى عمرها
سلامى ليك يا حودة
بوست فعلا له معنى
ـــــــــــــــــ
على فكرة انا مسحت التعليق اللى فات
عشان كنت مسجل بايميل خالى
واحد من البلد دى
كنت بعمل له حاجة
و نسيت اسجل خروج

nigro يقول...

واد يا دكتور محمود
إيه ده؟... انت هتعمل زي عواجيز الفرح
لا بيعجبهم العجب و لا الصيام في رجب
ما الراجل كان كويس معاك أهوه
بيبوس و بيدّي فلوس

عارف يا محمود بجد كأنك بتتكلم عن جدتي الله يرحمها كانت معايا كده بالظبط كانت بتحبني بزيادة عن باقي أحفادها
لدرجة اني احياناً كنت بتغرّ في نفسي

و كذلك جدي زي جدك.. بل بالعكس يا حوده عمره ما باسني مرة..و لما بآجي ابوسه بألاقيه متخشب كده و مفيش اي تفاعل
ده مش معناه إني جدي بيحبني اقل ما كانت جدتي بتحبني

بس هم دول الرجالة يا واد مابيعرفوش يبعبروا كويس عن ما يختلج في معاميق مكنون صدورهم من حب و عاطفةمع التأكيد التام على وجود هذا الحب و هذه العاطفة بس المشكلة في طريقة التعبير
ما انت راجل برده يا محمود
ولا انت بتعرف تعبّر
اصل أنا برده نيله قوي في الحكاية دي
اخزي الشيطان كده يا دكتره
رحم الله والديك و والديّ

صحيح... عندك واجب عندي روح استلمه
مع ان الظاهر كده انك مشغول و بقالك مدة ماردّتش على التعليقات
بس برده مش يرضيك انك تكسف اخوك
ولا يرضيك؟؟

pinky يقول...

this post made me cry..
I miss my grandmother
Allah yer7amhom. kano nas 7elween awi w kolohom 5eir
ya rab yer7am amwat el muslimeen gamee3an