2009/12/05

لو عاوز تشتمنى




بقالى كام يوم من ساعه ما رجعت من اسكندريه وانا مش لاقى حاجه مفيده اعملها 
 وزهقت من الفيس بوك ومن رش المايه ادام المازنجر ( سواء كان ياهو او هوت ميل )  وزهقت من نفس الكلام المكرر مع نفس الاشخاص المكررين.

لذا قررت اعمل زى اى شخص مهم 
واكتب بوست لو نفسك تسألنى اى سؤال؟
لو فى حاجه نفسك تعرفها عنى ؟

  لو زعلان من موقف حصل منى ؟ ونفسك تسألنى عن وجه نظرى؟

لو نفسك تقولى رساله ؟
لو عاوز منى خدمه ؟
لو بتدخل مدونتى ومش بتعلق ( او بتعلق بغير معروف ) فرصه تكتبلى اسمك من باب انى احس انى شخص مهم ؟
وفرصه نبقى اصدقاء سواء فى المازنجر او فى الفيس بؤ

لو نفسك تشتمنى برضه شغال ؟ 
نفسك تقول انى احسن واحد فى الدنيا اوك ؟
عاوزنى  احكيلك سيرتى الذاتيه ماشى برضه؟
المهم اى حاجه تتجدد يعنى بدل الملل دا ولا انتوا شايفين ايه؟
وانا هقعد زى اللى شايفنها فى الصوره كده واجاوب على كل الاسئله ... 
او امسحها :P

وشكرا لجميع مقدما :D

هناك 33 تعليقًا:

ايوشة يقول...

انا جاية علشان اعلق لاول مرة انا تقريبا علق مرة هنا انا زرت المدونة كتير بس بصراحة مكنتش بعلق متعرفش يمكن غلاسة منى :)
او يمكن علشان مكنتش اعرفك غير لما عرفتك على الفسبوك
بس مش عايزة اقول حاجة تانية غير اجرة التاكسى اللى جابنى لغاية هنا عليك

ايوشة يقول...

فين التعليق اطلع بالتعليق راح فين :(

๓คภ๏ภค يقول...

انا مش زعلانةمنك ولا اى حاجة خالص انا جاية اقولك انى بحب مدونتك دى جداا وربنا يوفقك ويكرمك واشوفك احسن دكتور بطوط ف الدنيا قول امين

بس عندى سؤال مين دى اللى انت هتقعد زيها دى هههههههههه

asmaa يقول...

هههههههههههههههه يا عينى يا بطوط دا انت واقع خالص يا ابنى ربنا معاك:q
اخرتك بسنت وضاياستى يا بطوط
ما تيجى يا ابنى تساعدنى فى الجروب اللى طلعان عينى فيه دا شويه شويه حبوس رجل الناس عشان تعمل خير يا سنه سوخه يا جدعان
وبعدين انا دعيتلك فى الحج تتجوز ونخلص منك انت لسه متجوزتش ليه ايه اللى مقعدك ولا الدعوه راحت فاشوش واضح انها متحوشالك ليوم القيامه:) ياله ملكش نصيب بقى يا بطوط

بطوط حبوب يقول...

أيوشه

نورتى المدونه يافندم
وسواق التاكسى واقف بره عاوز حسابه انا قلتله استنى هى هتخرج دلوقتى
:D
*********************************

منونا

يا هلا يا فندم

الحمد لله انك مش زعلانه .. ربنا يكرمك يارب ويوفقك انتى كمان
ويسعدك دنيا اخره

الصوره فيها بسنت اللى فى المسلسل الكرتونى بسنت ودياسطى
وانا هقعد زيها عشان ارد على المعجبين :D


*************************

سومه

سومه انا هسيب الجهاز لمحمد اخويا دلوقتى لما ارجع نبقى نشوف حوار الجروب دا

بس بالحق انتى كنتى بتحجى فى السويس ولا فى الدمام ؟
انا بس عاوز اطمن على الدعوه موقفها ايه دلوقتى؟
:D

سومه...مجنونه فى بلد عاقل يقول...

انا روشدى سرحان اباظه اناشدكم من حزب الشمال الاطلنطى ادفع المليون تعاطفك وحده موكفايه

سومه...مجنونه فى بلد عاقل يقول...

هههههههههههه لا بحج فى الصين يا بطوط حتخلينى اشد فى شعرى لحد ما ابقى قرعه عشان تستريح

صيدلانيه طالعه نازله يقول...

انا بقى زعلانه منك لانك مردتش على البوست اللى فات انا كنت مسافره و حامووووووت و ارجع عشان اشوف رديت ازاى على كل الحريم اللى طحنت فيك دى بس يظهر انك خوفت و تراجعت و انا اعتبر السكوت علامه الاسف

مي يقول...

انا بقى ناويالك يابطوط تعالى يامعلم جالك الموت ههههههههههههههه
هسأل شوية معلش اصلى لتاتة يابنى ورغاية مووووووت
ومصدقت بصراحة
لو حبيت توصف نفسك فى جملة هتقول ايه؟
لو طلبنا منك نحن سكان الارض انك تروح القمر وتاخد 3 حاجات بس معاك هتاخد ايه ؟وليه
هقولك كذا كلمة وتقولى اللى يخطر على بالك لما بتسمعهم
قلم
طيور
بطوط
مدونة

نفسك بكرة تعمل فى ايه لو ربنا ادانا طول العمر ويقصد ببكره المستقبل ؟
حاسة انى طولت عليك يابطوط بس لو عايز جزء تانى مفيش مانع يابنى زكاة عن نفسى هههههههههههه
سلام يادياسطى يوه قصدى بطوط

sakayar يقول...

يا عيني يا بطوط يا حبوب ... تعال يا ابني هاخدك بالحضن تعال .... ده م الوحدة يا عمنا ولا من روتين الحياة ولا من إيه؟؟
كنت بدخلك اقرالك وكنت بعقلك يا بني

ابقى اطلع ع البحر طول ما انت ف اسكندرية ... بحر اسكندرية ميتعوضش حتى لو ف عز الشتا
دمت جميلاً وخفيف الظل
:)

واحدة مفروسة يقول...

بص يا بطابيطو
انا مش حقولك انك بتفرسنى ولا اي حاجة
و لا حقولك عندى استفسار
و لا عندى سؤآل اسئلة
ولا عاوزة اعرف اي حاجة عنك علشان مش اتفرس
بس ممكن
يعنى لو ممكن و لو مافيهاش اي فرسة
نظرا لظروف الزهق
اقعد جنبك و اشوف اللى حيجيلك و اشوف حترد عليهم ازاي
هههههههههههههههه
اهو تسلية :P :-))))))))

بطوط حبوب يقول...

سومه
عارفه لو اى حد غيرك قالى كده هفتكره بيهرج انما انتى شريره وتعمليها تفجرى المدونه .
ابوس ايدك خدى الدهب اللى فى المدونه والياقوت وسبينى اعيش


واعى تشدى شعرك جامد اكيد هتحتاجيه فى يوم . او حد هيحتاجه مثلا يعبر عن اختلافه معاكى فى وجهات النظر فيشد شعرك وكده
:D
*******************************************
صيدلانيه طالعه نازله

والله كنت ناوى ارد بس قلت هقول ايه .. ثم يا فندم انا فى داخلى معترف ان الولاد اندال وعاوزين الدبح - ودا ما يغيرش فى الحقيقه بتاعه البنات - من الاخر احنا كلنا عاوزين ربنا يخدنا
:D

وطبعا انا خفت يكسروا المدونه فقلت اسكت احسن
وخفت لو اصريت على وجه نظرى اعنس :D

***********************************************

مى
اولا تشكرات يا فندم على تعليقك
والاجابات اهى يا ستى

اوصف نفسى فى جمله
دماغ كبيره وضحكه واسعه ووقت الجد بعمل كأنى مش واخدها جد لكن انا واخدها جدا :D

قلم : بحب الكائن دا لدرجه انى مبعرفش امشى من غير ما يكون معايا واحد ... واحيانا بحس انه افضل وسيله عشان افكر
طيور : يا سلام على الروقان
بطوط : هو انا فيا شبه منه ولا لأ؟
مدونه : نفسى اصاحب كل واحد بيدخلها.
بكره ؟ : نفسى اكون أول شخص فى حديث انما الدنيا لاربعه نفر

الحديث هتلاقيه هنا
http://hadith.al-islam.com/Display/Display.asp?Doc=2&ID=40366&SearchText=%C5%E4%E3%C7%20%C7%E1%CF%E4%ED%C7%20%E1%C3%D1%C8%DA%C9%20%E4%DD%D1&SearchType=exact&Scope=2,11,5,16,6&Offset=0&SearchLevel=Allword

بس يا ستى :D

********************************************
سكيار

يامان والله زيارتك اسرتنا اخر حاجه .... وللاسف الاسيف هو الروتين والملل دا الراجل يخرب بيتهم قول امين

عن جد سعدت بزيارتك واضافتك يارتنى كتبت البوست دا من زمان :D

********************************************

مفروسه هانم

بيتك ومطرحك يا فندم ... اتفضلى ورزقى ورزقك على الله :D

هبة المنصورى يقول...

:) ربنا يبعد عننا الملل والكسل وقلة الحيلة

على فكرة اللي ف الصورة بسنت.. أزعل لو ماتعرفهاش!

بطوط حبوب يقول...

هوبه
نورتى المدونه يا فندم

ربنا يخليكى وياااااارب انتى كمان وكل اللى بنحبهم


الصوره انا قلت انها لبسنت فى تعليقى على ๓คภ๏ภค
.
اكيد عارفها يعنى :D

غير معرف يقول...

حبيبي يابطه


فييييييييييييييييييييييييين يااااااااااااااااد


حاجتييييييييييييييييييي


شوفت ازاي مسيحلك علي النتتتتتتتتتتتتتتتتتت

اي خدمه يا باشششششا
حبيب قلبي
الللا بالحق يابا الحاج بطبوط يعني اييييييه بااااااااااااااااااااااااشا و الف تحيه للناس اليه ميه
ميجو حبيب قلبك طبعا

همس الاحباب يقول...

اولا : كل سنة وانت طيب
ثانيا : نفسى اشوفك وانت قاعد زى الست اللى فى صورة كده
هيبقى منظرك تحفةبجد
اه بالمناسبة انتى مختفى فين
مش خلصت يا بنى دراسة
وبتشتغل مش بنشوفك ليه
والله ليك وحشة يا بطوط يجى كده قد بريزة لب
سلام يا دكترة

Zika يقول...

بطوووووط
انا جاي عشان اقولك
فينك ؟
ماحدش بيشوفك ليه ؟

الشعب لابد له من حكومه تشكمه يقول...

احم احم 1,2,3.
لا انا بجرب بس المايك:)
بسم الله الرحمن الرحيم,,,

انت صوعبت عليا بصراحه وانا باه من الناس اللى بتابع فى صمت,,,اقرا واخرج جرى زى اللى عامله عمله وخايفه حد يقفشنى:)
تقولى طب مش بتعلقى ليييييييه؟
سؤال وجيه ويفرض نفسه على موقع الاحداث,,,

امممممممممم مش عارفه فى ناس بتابعها فى صمت وخلاص,,وبحس انه مش مهم يعرفونى المهم انى عارفاهم:)

موناليزا يقول...

أنا بحب مدونتك ومتابعاها رغم ان تعليقاتى فيها قليلة
أصل دمها خفيف :)

بطوط حبوب يقول...

حبيبى يا ابو الامجاد
حاجاتك مازلت فى الحفظ والصون
تريث فقط :D

**********************

همس الاحباب

حتى هذه اللحظه انا مش عارف انا بعمل ايه ..... دا ثالثا

ثانيا بقى .. مش هنولك المنظر دا ابدا

اولا بقى : وانت ستين طيب يا فندم
والله ليك وحشه مووووت ...

************************

زيكا
والله يا زيكا ما عارف انا بعمل ايه بس الدنيا مش مظبوطه عندى معرفش ليه
اراك قريبا يا صاحبى

************************

الشعب لابد له من حكومه تشكمه

يا مرحبا بيكى من غير ما تعليقى مره
ومرحبا بيكى وانتى بتعلقى تلات مرات
:D

************************

موناليزا

عاجز عن الشكر :D

جمعاوي صاحب "عيادة أسنان" يقول...

السلام عليكم يا ريس

بجد وحشنى جدااااااااااااااااااا وحمد لله على السلامة والقاهرة نورت يا باشا ومنتظر زيارتك يا عم الريس

محمود انت كويس ؟؟:)

فراشة يقول...

أولا كدا دي أول زيارة

اسم المدونة عجبي قوي اصلي كنت بحب بطوط وميكي هههههه

وثانيا كدا اسم البوست شدني

ثالثا انا بحب طب الاسنان جدا كان نفسي أدخله

ويارب اكون ضيفه خفيفه

المعلم محمد صاحب المطعم - طعمية سخنة يقول...

طيب الاول نبدا نضرب و نحلي بالشتيمة
ازيك يا باشا
اخبارك ايه ؟
شكلك كده زيي مليت من المسنجر
حاول تغير النشاط لكافيهات قهاوي غرز
لان مع الاستمرار في المسنجر هتحس بملل
خصوصا لو ليك تاريخ حافل في المسنجر زيي
احم 8 سنين بمعدل اكتر من 10 ساعات يوميا و تشمل ايام الامتحانات و العطلات الرسمية
حاول تسيب المسنجر شوية و تتعلم حاجة جديدة زي فوتوشوب او اي برنامج تاني

تحياتي

نعكشة يقول...

طيب نظراً إن حضرتك تبحث عن التجديد
وانا صراحة صراحة قبل الموضوع دة مكانش عندي اي ميول اني اعرف حاجة زيادة عن اللي حضرتك بتكتبها عن نفسك

ليه حضرتك مثلاً مثلاً يعني

متكلمناش عن تأملات حضرتك لما بتقعد كدهون مع نفسك
تبص على الشجر
او بتبص عالسما
كلمنا عن الالوان اللي حضرتك بتحبها
وليه اللون دة بالذات اللي بتحبه
وجهة نظر حضرتك في الهواء

اية احسن طريقة لعمل ال .....
مش عارفة اية مكان النقط
بس اكيد حضرتك بتعرف تعمل حاجة احسن من غيرك

فيدنا علمياً
شوية معلومات طبية عن السنان

و ازاي نفرق بين معجون سنان و التاني
وازاي نحافظ على سنانا
و الافضل نخلع سنانا لو تعباناولا نحشيها
وازاي نتعامل مع الام الاعصاب
بكلام مش مبعجر عشان نفهمه


اي بتاع

دعبس كدهون جوة نفسك
و اكيد اكيد اكيد
هتلاقي موادييع جديدة

بس بالاصالة عن نفسي
انا في احيان كثيرة بحب اقرا كدهون وامشي
ومبحبش اتمغول في شخصية الكاتب كتير يعني

بث

سلامٌ عليك

غير معرف يقول...

اولا السلام عليكم ورحمه الله وبركاته

ثانيا احب اهنيك على اختيارك لبسنت كفتاه غلاف للبوست بتاعك...... انا من اشد معجبى بسنت وبنساء كفر ابو عجوه (بورتو ابو عجوه) وده لان والدى بيحب دياسطى ومن المتشددين ليه وانا من انصار بسنت .... عاملين حزب فى البيت :)

ثالثا انا بدخل البوست ده بغير معروف لانى اصلا مش بعرف ازاى بيكتبو اسامى ... يعنى اكتب الرد وبعدين ارسلو وخلااااااص...... مش بعرف فى التكنولوبيا دى خاالص

رابعا بقى انا بدخل المدونه دى بقالى اكتر من سنه وشخصيتك كما اعتقد بتفكرنى بشخص ما .. مش عاوزه افتكره .....وكل شويه اقول مش هدخل علشان اسلوبك بيفكرنى بالشخص ده الاقينى دخلت وكمان بدات ارد
غاويه تعب ولا ايه بقى مش عارفه :(

خامسا بقى بصراحه بتعجبنى اوووووى اووووى البوستات اللى بتتكلم فيها عن والدك ربنا يرحمه ويغفر له
احساسك بوالدك كل كلمه قالهالك وانت صغير تعبيرك عنه

سادسا بقى مش فاهمه ليه اول ما بدأت اكتب ردود انت بطلت ترد .... يعنى اخر اتنين مش رديت فيهم !!!

بس انا بقى نفسى اسال سؤال محيرنى وعاملى كلكيعه نفساويه

هو انت ليه كتبت البوست ده؟؟؟؟؟؟؟؟؟

وبس كده ...
معلش بقى الرد هيكون من غير معروووووووف الى ان اتعلم اكتب الاسم هنا

بطوط حبوب يقول...

المعلم محمد صاحب المطعم - طعمية سخنة

ابو حميد ازيك يا بوب ايه اخباراتك انا الحمد لله زى الفل ولا تنقصنا الا رؤيتك يا زعيم

وبجد انت خدمتنى خدمه جامده ... فكرتنى بنصيحه نصحها واحد ليا قبل كده
لازم تنتج عشان متحسش بالملل

تشكر يا بوب

على فكره انا مش بهرج انا فعلا هنزل فوتوشوب وهنزل حاجتين تلاته كده كنت عاوز اتعلمهم فعلا
*******************************
نعكشة

انا هجاوب على اللى اعرف اجاوب عنه وهعمل نفسى مختش بالى من الباقى
بيس؟

مفيش فروق بين معجاين السنان -العاديه -تماما ... كلهم طالعين من برطمان واحد والفرق فى الاسم التجارى
انما المعاجين بتاعه التبييض او الاسنان الحساسه دى بقى فى فروق بينهم وبين المعاجين العاديه يو جت ات؟

خلع السنان بقى بيعتبروه عاهه مستديمه فى اروبا والدول المتقدمه ... وممكن الدكتور تحاكم فيها لو مكنش فى اسباب مقنعه للخلع ... والحفاظ على السنه حتى لو كانت مجرد جدر حاجه مش هتعرفى قيمتها الا لو عندك 50 سنه ومش عارفه تاكلى

الالم السنان التهاب زى اى التهاب فى الجسم ... بس لانه مفيش مساحه عشان السنه تورم - زى اى حته تانيه فى الجسم - فبيضغط على العصب والاوعيه الدمويه وبيسبب الاللم ... القرنفل مفيد بس الحل الوحيد فى الحاله دى هو دكتور السنان عشان يفتح الضرس ويعمل مساحه للورم عشان يخفف الضغط على العصب والاوعيه الدمويه - ويعمل علاج عصب او حشو جذور.

الشجر والسما بقى ... بتأمل فيهم كل فتره طويله ومشعارف بقول لنفسى ايه ساعتها

نورتينى يا دكتره :D

وعليكم السلام ورحمه الله وبركاته

******************************

غير معروف

اولا وعليكم السلام ورحمه الله وبركاته

ثانيا : شكرا ويارب كل الصور تعجبك :D

ثالثا اللنك دا فيه الطريقه اللى تعلقى بيها باسمك
http://batoot7.blogspot.com/2009/01/blog-post.html

رابعا : يعنى انا حلو ولا زفت :-S

خامسا :اشكرك دا من ذوقك

سادسا : خلاص هرجع ارد تانى من اول البوست دا

سابعا : مش لاقى حاجه اكتبها :D
شرفتينى :D

المعلم محمد صاحب المطعم - طعمية سخنة يقول...

طيب كويس اوي
نزل الفوتوشوب و ابدا اتعلم
و اللي تتعلمه قولي عليه
عشان انا كمان عاوز اتعلمه كويس هههههههههه

واحد من البلد دى يقول...

السلام عليكم

ازيك يا بطوط يا ابنى(ظهر محنى وصوت خفيض مع استبدال حرف ال(ز)ب(ج)معطشة)على اعتبار انى عجوز بالنسبة لك..

كنت بازورك بس وعندك حق فى الحالة دى على فكرة.
الواحد بقى بيحس بملل ليه كده..
يمكن علشان البلد هى هى...تيجى نسمى نفسنا ليبيا مثلا.
يمكن يبقى حالنا احسن.
هههههههههههه

تحياتى يا بطوط يا ابنى
مش قادر اتكلم اكتر من كده علشان(الشكر)باين عليه عالى ومدوخنى..

شلام بقى

بطوط حبوب يقول...

جمعاوى

معلش يا مان مختش بالى وانا برد فى التعليقات الظاهر انى بحب جديد

وعليكم السلام ورحمه الله الاول
والله انت اللى واحشنى موتين :D
اراك قريبا يا بوب
****************************************
فراشه

اسف انى اتأخرت فى الرد على كومنتك
يارب متكونيش زعلتى يارب

ويارب تعجبك المدونه دايما

****************************************
المعلم محمد صاحب المطعم - طعمية سخنة :
ادعيلى انت بس :D

*******************************************
واحد من البلد دى

وعليكم السلام
واضح ان الحاله ليبيا دى منتشره اوى

ههههههههههههههههههههه
واحشنى يا مان

mohamed ghalia يقول...

يابطوط انا عايز اشتم واقول حاجات كتير بس محتار أبدا بإيه
أقولك روح ربنا يسامحك هههههه

شباك موارب/منار يقول...

انا اول مرور ليا في مدونتك
يجعله عامر علطول....
شكلها حلو كدا ومنور
وعليها نور من ربنا

قريت ع السريع ماكتبت
اتمنى مزيد من التواصل
وليكن بيننا كونكت

بطوط حبوب يقول...

mohamed ghalia
قول يا ابن خالتى قول وتأكد انك فى قلبىىىىىىى
هل انت من المؤيدين لمدونتى ام انت لا قدر الله من المعارضين

وتذكر انك فى قلبى :P

********************************

شباك موارب/منار

اول مره تيجى مدونتى وتفوت كل البوستات وتدخل فى لو عاوز تشتمنى
امممممممممممممم شكلنا هنتعب بعض
ههههههههههههههه
بهرج طبعا انتى تنورى فى حته وان شاء الله نتواصل :D

غير معرف يقول...

ههههههههههههههههههه
والله حلوة اوووووووووي