2010/12/17

عشان خاطرى متستسلمش


ولما جيت ازورك فى المستشفى .. كان نفسى اشوف اللى بشوفه فى عينك كل مره .. قلق وأمل ..لكن المره دى اول مره اشوفك خلاص قررت تستسلم .. وكأنك نسيت حاجات كتير حصلت زمان ..وايه يعنى الحاله اتطورت ؟ .. وايه يعنى الكبد اللى عندك من يجى 40 سنه ..بقى كانسر ..ما انت طول عمرك كنت بتستحمل وبتتعالج .. بتخاف شويه وبتقلق لكن كنت دايما متمسك بالامل.
اول مره اسألك هو انت قررت تعمل ايه دلوقتى يا عمى .. كنت بسأل عشان تقولى اسماء الدكاتره اللى هتروح لهم .. او اوبشن العلاج اللى هتختاره؟.. لكنك فتت قلبى لما قلت لى انك قررت خلاص تستسلم.

طب بلاش عشان خاطر اى حاجه او اى حد .. عشان خاطرى انا ..عشان خاطر "على " اخوك التوأم متستسلمش ..عشان خاطر الحضن اللى اديتهولى وقلت لى انى اغلى عندك من جمال ابنك .. وسكت شويه وقلت لى والله انت اغلى عندى منه .. عشان خاطر وصيه ابويا ليك ..وعشان خاطر البيوت اللى مفتوحه بحسك ..عشان خاطر اليتم اللى محستش لسه بيه وهحس بيه اوى بعدك ...عشان خاطرى افضل قاوح فى الدنيا ومتستسلمش.

فاكر لما عملت حادثه والعربيه اتقابلت بيك ودخلت فى عربيه نقل؟ .. ساعه ما شفت العربيه انا وبابا الله يرحمه حمدنا ربنا انك خرجت منها بالسلامه .
عارف ان بابا الله يرحمه كان بيعيط ايامها بالدموع -وبينكر انه بيعيط لما نقوله انه كان بيعيط - عشان كان هيموت من القلق عليك .. لما شفناك ايام الحادثه كنت مبتسم اوى وفرحان ..رغم ان دراعك كان مخلوع ساعتها .. والكبد مكنش مستقر ... يومها حسيتك كنت بتضحك على الموت .. أمال ايه اللى حصل؟ ..طب  بحق اللى نجاك يومها ..ابوس ايدك ما تستسلمش
فاكر يوم لما بابا مات .. يومها انا كنت عيل صغير .. وانت حضنتنى وقلت لى ربنا يبارك فيكوا .. فاكر انت " النص حضن دا" اصل ساعتها كان دراعك مخلوع برضه وكنت رابطه بجبيره ..عارف انى لسه بحس بالحضن دا اوى .. يومها قلتى انك كنت عاوزنا نقولك يا بابا .. وبعدين غيرت رأيك .. مش عاوزكم تنسوا "على" .. ويومها قلت لى انت دلوقتى بقيت راجل البيت يا محمود وانا عارف انك هتكون عند حسن ظنى .. كنت بتخبى دموعك اوى وانت بتقولها ..ربنا يقدرنى واعمل وصيه " على" واخد بالى منكم.
يومها كان اخوك التوأم مات .. كنت حاسس ان نص روحك راح منك .. بس كنت حاسس انك لازم تعيش عشان تنفذ وصيته وتاخد بالك من ولاده ... بحق اللى اداك القوه دى ايامها ..بحق وصيه "على" متستسلمش
انت فاكر ان احنا كبرنا؟ وان الوصيه اللى وصيهالك ابويا انت خلاص عملتها؟ .. والله يا عمى دا احنا عيال ومبنعرفش نتصرف ..طب ما انت عارف؟ .. متقولش انا خلاص دعاء اتجوزت وانا بقيت دكتور .. والله لسه بنحتاجلك ..  طب انت فاكر لما دعاء اتخانقت مع جوزها؟ .. يومها اتصلت بيك وقلت لك انا مش عارف اتصرف اعمل ايه .. كنت محتاس زى اى عيل مش عارف يتصرف ..انت مصدق انى بقيت اطول منك؟ .. انا لو كنت اتصرفت من دماغى كان يمكن المشكله- اللى اتحلت بعد اما اخدت رأيك - لسه قايمه لحد دلوقتى .. بحق وصيه ابويا ليك اوعى تستسلم دلوقتى.
فاكر لما كنا بنتكلم من كام اسبوع .. وكنت بتقولى ان الواحد مهما كبر بيفضل مش مصدق انه خلاص بقى عنده 60 سنه وانه جد .. طب ايه حصل؟ ..اخر مره شفتك قلت لى عارف؟ انا دلوقتى بقيت حاسس بالستين سنه كلهم .. وشريط احداث بيمر عليا ..دول كلهم كام اسبوع قوام بقيت ستين سنه؟ طب ما نت طول عمرك بتقاوح فى الدنيا .. ما تقاوح المره دى عشان خاطرى

لقيتك بتعيط لوحدك كده وبتنكر انه كنت بتعيط .. بابا الله يرحمه كمان كان بيعمل كده ..عارف انا برضه بعمل كده .. تعرف انى ابتسمت رغم انى اتأثرت لما لقيتنا كلنا شبه بعض اوى كده.
ابتسمت كمان اوى لما عرفت انك بتصحى بليل وتقعد تصلى .. ماما وبابا الله يرحمه برضه بيعملوا كده .. انا والوحيد اللى مش بيعمل .. طب اقولك على حاجه انا خلاص هصحى اصلى بليل وادعيلك وهعيط اوى واتوسل لربنا اوى انه يبارك لك فى عمرك.. بحق الحسنات اللى انت كنت بتقولى من يومين انك حاسس انها مش هتقضى .. بحق الطاعات اللى انت لسه قادر تعملها .. متستسلمش .
بحق التريقه اللى بتتريقها علينا لما نعمل حاجه غلط .. بحق الحب اللى بنحبهولك انا واخواتى.. والنصايح اللى لسه بنحتاجها منك ..بحق الحاجات اللى بنا متشابهه اوى ..متستسلمش .
بحق حاجات كتير كتبتها او مكتبتهاش دلوقتى ..متستسلمش ..متستسلمش.

هناك 13 تعليقًا:

sony2000 يقول...

بطوط
انا يمكن مااقدرشي اقول حاجه
ولا اي كلام هيقدر انو يعمل حاجه
غير اني كنت فيوم من الايام زيك كدا
كل اللي هو عوذوا بس
انكوا تكونوا حوليه
دا اللي اقدر اقولوا
لان مهما اتقال......ومهما اتوصف
مش قد ماالواحد يكون فنفس التجربه...او يعيشها
ربنا معاه ويشفيه يارب

شمس النهار يقول...

ربنا يرزقه الشفاء

ربنا يخفف المه

وربنا معاكم

كلمات من نور يقول...

أسأل الله الكريم رب العرش العظيم أن يشفيه شفاءا تاما لا يغار سقما و أسأل الله لكم الصبر و أن يربط على قلبك يا بني

عاشقه الرومانسيه يقول...

عشت كل كلمه قلتها فى مرض بابا ووفاته
وحاسه بوجعك قوى علشان عمك
ربنا يشفيه يارب ويكون فى احسن حال
ويرجع ينور حياتكم بضحته من تانى

خالص دعائى

still-searching يقول...

ربنا يخفف عنه ويشفيه

أسأل الله العظيم رب العرش العظيم أن يشفيه

موناليزا يقول...

بغض النظر على انى ماسكة نفسى من العياط بالعافية بس لو قرأ كلامك اكيد مش هيستسلم
قوله الكلام ده لو هو مش هيقرأه
خليه يحس ويعرف غلاوته عندكم وهو مش هيستسلم
مين ممكن يستسلم ووراه قلوب سانداه ومحتاجاه وعايزاه يكمل معاهم

ربنا يشفيه ويطمن قلوبكم عليه

nour shahen يقول...

ربنا يشفيه ويعافيه ويباركلك فيه حاول توصله الكلام دا صدقنى هتكون خير عون ليه
اوقات بنفقد الأمل ونفتكر انها النهايه لكن لما بنلاقى ناس بتحبنا بنأييدنا واقفه لسه معانا بتطلب عونا بنرجع نلاقى الطريق
ربنا يخفف عنك ويرزقك الخير

ليس فقيرا من يحب يقول...

يااااااااااااااه يا حوده

ياااااه عليك بجد

عشناها مع عمى الله يرحمه وعشناها مع عمتى بس خفت الحمد لله

عشنا العذاب والالم النفسى والمشاعر دى كلها عشنا لحظات الانكسار والالم والامل
والخوف وحتى النهايه عشناها

انا مش لاقيه تعليق على البوست
انا كمان هاصلى بليل وادعى ربنا يشفيه شفاءا لايغادر سقما ولا الما

z!zOoOo يقول...

انا يمكن حسيت الحاجات دي كلها

مع والدي الله يرحمه

وعمتي الله يرحمها

بس في صمت

لكن فعلا زي ما قالوا الاخوه الي قبلي

خليكم جنبوا علطول

ماتخليهوش يختلي بنفسه كتير

عشان مايفتكرش ألمه

ويتسلل اليأس والاستسلام جواه

وإدعيله قوي من قلبك ومن قلب اخواتك

وإفتكر دايما إن الي عايز ربنا هو الي هيكون

وربنا دايما بيقدرلنا الخير لإنه عالم بينا اكتر مننا وارحم بينا من نفوسنا

ربنا يشفيه ويعافيه ويقومهولكم بالسلامه

ويبارك في عمره

هون علي نفسك

بإذن الله خير

ابقي سلم علي عمك بقي

ديه أمانه

قولوا واحد من إصحابي بيسلم عليك

:)

فاتيما يقول...

انا موافقة على كلمة كلة كتبتها موناليزا


لازم عمك يقرا الكلام دا يا بطوط
لازم يشوف اللى انتا مش قادر تقوله قوى قصاده عشان دموعك بتغلبك او الكلام بيهرب اول ما تبصله


الكلام مكتوب هيوصله
زى ما وصلنا كلنا وهز قلوبنا
وحسينا ازاى بتحبه وهوه راجل عظيم
ربنا يشفيه وياخد بيده
ويعدى المحنة
وميستسلمش

ربنه يثبته

ويثبتك انتا كمان

خلى بالك من نفسك
يا قلب كريستال شفاف

مدونات من اجل التغيير يقول...

ربنا يشافيه و يعافيه يا رب

اسأل الله العظيم رب العرش العظيم ان يشفيه


الله يخليلكم لبعض و يجمعكم عن قريب ان شاء الله

__________________
نتمنى تواجدك معنا في تجمعنا الجديد مدونات من اجل التغيير

شمس النهار يقول...

مش لاقيه حد يطمنا عليك وعلي المريض

يارب يكون خير ان شاء الله

بندعي من قلبنا انه خير

غير معرف يقول...

يارب يشفي عمك
ويقوم بالسلامه وترجع تحس بحضنه جواك تاني