2008/02/29

لما يبقى عندى امتحان

طقوس لما يكون عندى امتحان - زى بكره كده يعنى- ادعولى
اى حد يجى بتنا ممكن بسهوله - لو يعرفنى - انه يعرف اذا كان عندى امتحان ولا لأ
كل عشر ثوانى اخرج من الاوضه
كميات الشاى والنسكافيه والحلبه والقرفه واى حاجه غير المذاكره والسلام
التتنيح ودام التليفزيون
الاستهبال ودام الكمبيوتر
-------------------------------------------
لو قاعد معايه فى الاوضه هتلاقى حاجات تانيه
كل الكتب الى الصوره دى على سريرى
الكتب هتلاقوها { الاعمال الكامله فاروق جويده الجزء التانى, الاعمال الكامله الابندودى , نهايه التدريب , حاشيه البيجورى , الوجيز فى اصول الفقه , الباعث الحثيث , مجله العربى , تذهيب البغا , اشواق بوذا , وشويه كتب تانيه صغيره } على فكره باقى الكتب فى المكتبه بس السرير مش هيشلها الله يرحم ابى كان عامل مكتبه عملاقه بس انا مش بقرا الا الكتب الى بشتريها
بالاضافه الى الكتب الى تحت السرير وكتب الماده الى عندى امتحان فيها طبعا
الموبايل بقى هتلاقى عليه
{كل اناشيد مشارى , قرءان بصوت مشارى , اناشيد ابو خاطر والخطب الجديده للشيخ رسلان والشيخ ابو اسحاق والشيخ حازم شومان }
لو حاطط ودنك على باب الاوضه هتسمع كل شويه صوت منهم وساعات هتسمع صوتى وانا بذاكر
ضيفوا لكل ده كميه النوووووووم الى بتزيد للضعف
الموبايل مش بيبطل رن طووول الليل كل واحد عايز حاجه ابتداءا من الامتحان على ايه ؟, وفين؟ , والساعه كام؟
الى ايه المهم ؟ وانا لسه ما ذكرتش يا بطوط اذاكر ايه ؟
ثم السب واللعن فى الكليه والى دخلوها والى عايزين يتعلموا
الحاجه الوحيده الى هسبكم تتخيلوها هو موقف امى من كل دا ؟؟؟
ال بالحق حد عنده لبن زياده؟؟ اصلى عايز اعمل شاى بلبن بس مش لاقى لبن تفتكروا اعمل ايه
والكيك الى امى عاملاه كمان خلص يعنى مش هعرف اذاكر يرضيكوا ده؟؟؟؟؟؟

هناك 25 تعليقًا:

HeBa يقول...

ربنا يوفقك بكره

بس ركز أنت بس وربنا هيكرمك إن شاء الله

طقوسك في الامتحان مختلفة عني

استحالة كنت اقرا حاجة قبل الامتحان غير المادة اللي همتحن فيها

لأني غالبا مكنتش بذاكر غير قبل الامتحان بحاجة بسيطة جدا

بس أنا كنت كلية نظرية فمكنتش فارقة كتير يعني

تمنياتي لك بالنجاح والتفوق إن شاء الله

rona يقول...

لا نفس طريقه المذاكره مبنصدق نضيع وقت ههههههههههههههههههههههههههههههههههه

حمامة يقول...

هههههههه

يخرب عقلك انت بجد مشكلة
هو فعلاً الواحد ايام الامتحانات
بيعمل حاجات غريبة اللى يقفل لعبة ف الفيديو جيم واللى يشوف افلام اجنبية تحفة عمره ما شافها واللى يحب جديد ويتنح بالساعات كده زيي :D
بجد بنبقى مشكلة ايام الامتحانات

ربنا معاك يابنى ويوفقك يارب انت وكل اللى بيمتحنوا

:)

قبلة الحياة يقول...

هههههههههههههههههه

بطوط ربنا يوفقك يارب وترفع راسنا كدا وتجيب تقدير كبير

السرير والكتب بتاعتك دي رجعتني لايام الشحططة والمذاكرة والكتب اللي كانت بتنام في حضني كل يوم

بجد ربنا يوفقك يارب الله يكون في عونك يا ابني وفي عون مامتك صراحة

انا لما بيكون عندي امتحان كان بيكون في اعلان حاله طواريء الكل يسيب لي البيت ويمشوا محدش بيكون طايقني صراحة

المهم ركز انت وشد حيلك
ربنا يوفقك

دعاء مواجهات يقول...

يا إبنى دى احلى ايام انا خلصت دراسة من 8 شهور وحاسة ان حياتى انتهت علشان كدة قررت اكمل دراسات عليا ه فية أحسن من الدراسة وأيام الدراسة

Empress appy يقول...

اممممممممممم اقولك ماما بتعمل ايه
بتمسك ايد مقشه وتجرى وراك فى البيت يا قاعده بتدعى لك والله يكون فى عونها هى برضه
بس ركز يا عمنا فى المذاكرة
طيب اقولك على سر انا لما كان بيبقى عندى امتحانات كل شويه ادخل اخد شاور ههههههههههه معرفش ليه لدرجه ان ماما تقولى انت هتبوشى الله يخرب بيت الامتحانات على سنينها

الفارس الملثم يقول...

انا بالنسبة لي كانت المشكلة في حكاية النوم لانب ببقي متعود انام بعد الفجر ولازم اصحي بدري عشان الامتحان والساعة البيلوجية بتبقي في حالة توهان واول يوم عادة تقريبا مش بنام

طبعا حكاية شتيمة الكلية ونظام التعليم كله ده اساسي عشان نطلع الخنقة من المذاكرة

ربنا يوفقك بس لما تخلص قولنا سبع ولا قطة

son's egypt يقول...

السلام عليكم
ربنا يوفقك في الامتحان
وكل واحد اكيد ليه بردو طقوس في الامتحانات بس بتختلف من شخص لشخص

غير معرف يقول...

ده انت فعلا فاضى بقى

نزلته هنا وهناك مع ان ده مش بيحصل فى كل البلوجات

ربنا يوفقك عشان تخلص امتحانات وتعلمنى اعمل بلوج سبوت زيك
روز

المتمردة يقول...

اكيد خلصت امتحانات واناجاية متاخر
ع فكرة انا كدة لما باجى اذاكر وشوفت ورق مترتب معرفش اذاكر لازم يكون الورق كله مفرود ومنعكش وورق كتير وكتب كتيير عادة بقة ربنا ميقطعها ربنا مع الجميع .تحياتى

غير معرف يقول...

هههههههههههههههههه
كلنا بيبقي لينا نفس الطقوس الغريبه دى في الامتحانات انا بقي ايام الامتحان اسيب المكتب خالص واقعد على سريرى وطبعا اطلع كل الكتب والورق اللى يخص الماده كل حاجه منعكشه كده واجيب نتيجه قديمة او ورق كارتون جامد اسند عليه في الكتابه يعنى ههههههه انت بقي استغنيت عن كده وبتسند في الكتابه على البطانيه والكمبيوتر في اوضتى كل نص ساعه اروح اقعد عليه اقول خمس دقايق بس تغيير وانسي نفسي عليه يالله ربنا بيسترها


تمنياتى ليك بالنجاح والتوفيق

Desert cat يقول...

ربنا معاك ويوفقك يا محمود
ومتنساش تطمنا عليك

مها يقول...

كلنا هذا الرجل يا محمود
الظاهر تحت الضغط العصبى بتاع الامتحانات بنميل للهروب لحد الازمة متعدى ..مش للمواجهة عشان نخلص منها على خير .. والحاجة الغريبة إن المسألة برضه بتخلص على خير رغم الميول الهروبية دى .. ورغم إننا بنعشق فكرة المذاكرة على آآآآخر لحظة !! ربنا معاك انشاءالله .. وإدينى انت بس "العلوان" وانا "أشيع" لك علبتين لبن ماركة "صحتك فى العلبة دى أيام الامتحانات" ..وقوم ذاكر بقى وألا أقولك .. قوم نام .. أصل اللى ذاكر ذاكر يا بنى!!
ههههههههههه

فرنسا هانم يقول...

لا ده انت جاى على طمع بقى
لبن و كيك
لا
الحكايه مش حكايه مذاكره بس
على العموم
لو دول ناقصين
ولا يهمك
خالتك فرنسا هانم
تجيبلك كل اللى ناقصك بس تذاكر
وتبقى شاطر

ملك الكبدة يقول...

ربنا يوفقك

Unknown يقول...

ربنا يوفققك ان شاء الله

عبده الرايق يقول...

ربنا معاك ويوفقك
وركز انت فى المذاكره
ولو كان ياسيدى على الكيك سهله واللبن سهل
احلى كيك وانضف كرتونه لبن لك
اييييييييييييه ؟؟؟
مين اللى هيدفع ؟؟؟؟؟؟؟؟؟
لا معطلكشى
سلام

حاسوباتيه يقول...

ربنا معاك عارف فعلا كل حاجه بتحلو في عين الواحد يو م الامتحان زي التلفزيون بيكون جميل قوي يومها وحتى البرامج التافهه جميله اي حاجه تبعد عن المزاكره جميله وحلوه
ههههههه
بالتوفيق شد حيلك

بطوط حبوب يقول...

هبه
على فكره برضه بتوع الكليات الى مش نظريه بيذاكروا ايام الامتحانات ههههههههههههههه
-----------------
رونا
قشطه عليكى
------------------
حمامه
ربنا يخليكى وانا مشكله امال انتى ايه هههههههههههههه
-------------------
قبله الحياه

الحمد لله حصل خير
----------------
دعاء مواجهات

ربنا يوفقك
--------------
ابى
انتى قاعده معانا؟؟؟ ههههههههههههه

---------------------
والفارس الملثم
سبع يا ملعم ان شاء الله

---------------
سونس اوف ايجيبت
الف شكر ع الزياره
-----------------
بنوته مصريه
هههههههههههههههههه شغال
------------------
المتمرده
المهم انك جيتى ههههههههههههههه
-------------------
ديسرت كات
الحمد لله ربنا ستر
--------------------
مها
بالضبط هو الهروب عيال عايزه الحر ق
هههههههههههههه
-----------------
فرنسا هانم
شكرا يا خالتى وهم ناقصين ولا كلام ع الفاضى
----------------
ايويه
ملك الكبده
ربنا يوفقكم
---------------------
عبد الرايق
خلاص يا ملعم اشترى من عندنا احسن هههههههههههههههههه

------------------
حسابوتيه
يبقى انتى اكيد فى مصر

ميّويه يقول...

ههههههههههههههه
انت لو تشوف منظر اوضتي أيام الدراسة كلها مش الإمتحانات بس ..حيغمي عليك

بوست حلوووووووو

أشرف حمدي يقول...

يخرب عقلك
انت ما شفتش سريري بقى على أيام الامتحانات
انا كنت بنام ع الكتب بالمعنى الحرفي :) على فكرة كل سراير وغرف طلبة الأسنان زي بعض مع تفاوت كمية الكتب والملازم انما هي هي طبيعة الكركبة
فكرتني بأيام المذاكرة والاستعباط ع الكمبيوتر :) صدقني انت بتعيش أجمل أيام حياتك دلوقتي .
خش ذاكر بقى :)

helium atom يقول...

بطوط.. انا كمان عندى المجلد التانى لفاروق جويدة

بس لازم لازم لازم تجيب المجلد الثالث .. لانه بمنتهى البساطة رااااااائع

انا جيبته السنة دى من معرض الكتاب فى سان مارك

بطوط حبوب يقول...

ميويه

كويس انى مشفاتهاش بس خلاص انا اتوقعت هههههههههههههههه
********************************
د اشرف

تعظيم سلام لكل بتوع اسنان

******************************
هيليوم اتوم

انا عندى التلات مجلدات بس ده الى كان ع السرير

نورتونى

Nairy يقول...

فبراير 2008 دة...كنت بمتحن برضك وعندي نفس الاعراض بتاعت الكتب والروايات والاشعار اللي بتطلع ...قولت افلسع ع الكومبيوتر حبه تفاريح ...لقيتك مفلسع ف المدونة بتاعتك بالصدفة وعلى حظي اول مرة اقع ف البوست دة بالذاااات


كان عاجبني الكلام وعمالة اضحك اني مش لوحدي بعدين فجأة...

** الامتحان على ايه ؟, وفين؟ , والساعه كام؟
الى ايه المهم ؟ وانا لسه ما ذكرتش يا بطوط اذاكر ايه ؟
ثم السب واللعن فى الكليه والى دخلوها والى عايزين يتعلموا
الحاجه الوحيده الى هسبكم تتخيلوها هو موقف امى من كل ؟؟؟**

والله بطني وجعتني لما قريتها وبتوجعني تاني دلوقتي بردو كل ما افتكر...دايما بأتصل بأصحابي اسألهم نفس الاسئلة واقولهم داهية ف العلام ع اللي عايز يتعلم الواحد يتجوز ويقعد ف البيت بقى كفاية علينا لحد كدة

ولا موقف امي ...ياديييين النبي ...بلاش فضايح

احمد ربنا ان مامتك بتعملك كيك اصلا

بالمناسبة...الازرقاني الحليوة دة جويدة صح؟..عندي المجلد الاول فقط وكام ديوان منفصل...بموت ف الجدع دة

*ملوحوظة على جنب

افتح مكتبة باباك الله يرحمه...الكتب القديمة ليها طعم تاني خالص وبتحس انها كائن حي اليف بيوفي لذكرى صاحبه للابد

ممكن تلاقي رسمه صغيرة ف الهامش او اهداء من حد ف اول صفحة
تاريخ شراء الكتاب والامضا تحته في الصفحة الاولى
تعليقات وسط السطور او ورقة مكتوب فيها ملاحظات بين الورق
لو لقيت طرف الصفحة متني كعلامة...المسها بأيدك افردها واتنيها تاني...وقول ابويا لمسها مكان ما انا حاطط ايدي دلوقتي

ربنا يرحم الجميع

غير معرف يقول...

انا