2009/03/13

الحل الخبور لمشكله المرور


فى دوله ما (مش مصر خالص على فكره ) عندهم مشكله فظيعه ف المرور .. تقدروا تقولوا البلد كلها واقفه .. اى حد عايز يروح مثلا - لميدان الجيزه او شارع فيصل او دار السلام او كوبرى الجامعه او بولاق - ( تشابه اسماء مش اكتر ) فلازم يعمل حسابه ان المتر - دا غير الكيلو متر - هيقطعه فى ساعه على الاقل
المهم انا عرفت من مصدر مطلع ف البلد دى .. ازاى رئيس وزائهم ( مش اسمه نظيف على فكره) فكر ف حل للمشكله دى 
والمصدر المطلع دا نقلى الحوار الى دار بين رئيس الوزرا وبين نفسه ( عشان تعرفوا المصدر بتاعى مطلع اد ايه واليكم ما حدث بينه وبين نفسه ..

شعب غبى غبى غبى .. ربنا يخده كله يااااااااارب .. واقفين فى الشوارع طول اليوم وعاملى زحمه وخلاص .. 
والى يغيظ انه بيطالب الحكومه بحل المشكله  .....اولا مال الحكومه ومال الزحمه ف الشوارع شعب بجد موارهوش غير وجع القلب
ثم مين السبب ف المشكله دى ؟؟ الحكومه ؟؟ ولا الشعب .. بمنتهى  البساطه شيل الشعب من الشارع تتحل مشكله الزحمه
شيل الحكومه من الشارع.. ولا حد هيحس باى فرق دا يمكن المشكله تتعقد اكتر
ما علينا لازم آجى على نفسى وأحل المشكله لأم الشعب دا ..  اموت واعرف اصلا مين اللى قال انها مشكله........انا عن نفسى شايف ان الزحمه فيها رزق...
اه طبعا فيها رزق وربنا ما يجعلنا قطاعين ارزاق
الزحمه دى مش موفره فرص عمل للشباب ... موفره ولا لأ محدش يقدر ينكر .. اللى بيبيع مناديل واللى بيمسح ازاز العربيات ... عمل دا ولا ؟؟ شباب دول ولا لأ
ثم ان الزحمه ممكن تكسب رحله عمره ...لو المواطن شغل اذاعه القران الكريم طول اليوم ف العربيه .. هيسمع على ما يوصل- ان وصل - على الاقل كل يوم جزئين فى شهر يبقى سمع القران مرتين .. يعنى بتاع تلات اربع سنين بالكتير ويكون ختم القران ويدخل اى مسابقه ويكسب عمره .. وياعالم يمكن يكسب حج
واللى ( استغفر الله العظيم ) بيمسع اغانى .. اهى فرصه للترويج لازاعات الاغانى وبعيدين يتصلوا بـ0900 ومين عالم يمكن يكسبوا اى حاجه
والزحمه كمان بتقلل فرص الطلاق والخلافات العائليه ... لان مفيش وقت .. نص اليوم ف الشغل ونصه ف المواصلات يتخانقوا امتى؟؟ .. ودا كمان بيقلل الكثافه السكانيه - على المدى البعيد - لنفس السبب و .... الخ الخ من الفوايد
بس هو شعب فقرى ومش مقدر النعمه الى هو فيها .. وهيفضل يتبطر لحد ما تزول من وشه .. النعمه اللى العالم كله بيحسده عليها
طب وحياتك يا دى الشعب لحل لك المشكله .. انا كنت عايز انعمك لكن انت مبيطمرش فيك 
وقعد رئيس الوزرا يكتب قرارت لحل المشكله
اولا : رفع سعر البنزين ... بدل ما الشعب عمال يتصرمح بالعربيه وعامل زحمه
ثا نيا : رفع سعر السولار.... وابقى ورينى بقى مرتبك ازاى هيقضيك مواصلات بس ياااااااابن الشعب ... لو عندك اربع ولاد ف الكليات والمدارس ..متوسط الواحد 2 جنيه مواصلات .. دا غيرك .. يبقى 300 جنيه كل شهر بالصلاه على النبى .. يبقى تغزى الشيطان وتسيبك من الشغل ( لانه ملوش لزمه بالمناسبه ) وتقعد العيال من التعليم ( لانى مش هعرف اشغلهملك

ثالثا: الى هيعمل اى حاجه بعربيته ف الشارع - عشان انا مخنوق من الشعب كله - يدفع غرامه خمس الاف جنيه وسجن شهر .. اهو يرحنا الشهر دا من الزحمه الى هو عاملها
رابعا :.. يبقى معاك مثلث وشنطه اسعافات ... وقبل ما تجيبهم ما شوفش وشك ف الشارع
ولو المشكله برضه متحلتش يبقى نلجأ لاخر قانون وهو
خامسا : العربيه الى يعدى عليها خمس سنين تتعدم هى وصاحبها
والله المستعان وعليه التكلان وبالله التوفيق





هناك 23 تعليقًا:

احساس طفلة محبة للرومانسية بس واقعية يقول...

هاهاهاهاهاهاها
تشابة اسماء بس
واخيرا طلعت الزحمة مفيدة كمان يا بطوط
هاهاهاهاهاهاها

لا بجد الشعب يتحمل بعض من المسؤلية
مفيش حد بيمشى فى الحارة بتاعتوا وتلاقى كل واحد عايز يسبق اللى قدامة
ومحدش بيدى اشارات شمال او يمين وبيكسر وخلاص

اى نعم الطرق اصلا معمولة بطريقة (جميلة) جدا منقدرش نقول غير كدا
بس برضو انا شفت الفرق بين التزام الناس برة مصر
والتزام الناس فى مصر بتعليمات المرور والسواقة وشتااااااان بين الاتنين

اسلوبك رهيب يا بطوط
تقبل مرورى

Mafrousa يقول...

هههههههههههههههههههههههههههه
ايون عندك حق يا بطوط
شعب وحش وحش وحش وحش

انا حره يقول...

بطوط

انت بتذاكر ولا مفضى نفسك لعمل دراسه مبدئيه عن الزحام وتأثيره على كل من الشعب والحكومه

ركز يابابا

ركز فمذاكرتك وابعد عن الكلام الكبير دا عشان اخرته مش حلوه

هتتنفخ

حواء يقول...

هههههههههههههههههههههه
ايه ده
نسيت تقول ان من فوائد الزحمه كمان إن المواطن هيعقد مع اخوه المواطن فين غير في الزحمه والاشارات
هفكر واجبلك فوائد تانيه للزحمه


وبعدين اسمع كلام انا حره
لحسن ( تت......... ) ههههههههههههههههههههه

mohamed ghalia يقول...

والله يابطوط انت خسارة فى كلية طب اسنان
وأنا من موقعى هذا بنادى إنك تمسك إقتصاد البلد دى
عندك أفكار إقتصادية هايلة(يالهوووى)ده كفاية ياراجل انك كسبت الناس وبعدتهم عن الخلفات فى زحمة المروو
طيب لو ادنالك كام مشكلة هتعمل فينا ايه
قدم إستقالتك من اسنان وخليك فى وزير الإقتصاد أنا عارف انها حاجة مش قد المقام بس تعالى على نفسك شوية

بذرة امل يقول...

هههههههههههههه
فعلا وجهة نظر تحترم جداً
مش بعيدة فعلاً تكون الحكومة بتفكر بالطريقة دى
بس لو هى بتفكر بالطريقة يبقى لازم اصدق نظرية المؤامرة
تحياتى

Asmaa mahaba يقول...

ههههههههههههههههههههه انت بتهرج اكيد
ايه الابداع دا يا بطوط مكونتش اعرف ان القاهره حتعمل فيك كدا...
كل دا عشان سنه فيها امال احنا نعمل ايه ننتحر
على فكره وانا صغيره كان عندى اختراع عربيه برجل طويييييييييييييله عشان تعدى من فوق العربيات فى الزحمه
تفكير اطفال بقى معلش...
سومه

صيدلانيه طالعه نازله يقول...

و الله ما قصرت عداك العيب و قزح احنا فعلا شعب عينه فارغه و ميملاش عينه غير التراب
الباشا نظيف اصلا عمره ما يغلط ابدا
و بعدين لو لاحظت هو كده حل مشكله الكثافه السكانيه بطريقتين ان فى الزحمه لو حصلت حادثه عربيات الاسعاف مش بتعرف توصل من الزحمه و بالتالى المصابين بيموتوا و كمان الست و لا الراجل اما يفضلوا نص اليوم شغل و نص سواقه مش حيبقى ليهم نفس يتشاقوا و و بالتالى مفيش خلفه و لا عيال
هااااااااااا ازيك بقى
هههههههههههههههههههههههههه

Empress appy يقول...

بما انى صاحبه بطوط عربيبتى يعنى ههههههه
ومتقوليش غيري اسمها بقى علشان مش هينفع انا حاولت اناديها باسم تانى مردتش عليا خالص
المهم احب اقولك ان فعلا ساعات مشكله المرور سببها الشعب والناس جرب تسوق وانت تعرف بجد مفيش صبر ملغي من قاموس حياتهم خالص يا ابنى والله

Unknown يقول...

يخرب عقلك يا ابني ايه الكلام الكبير اوي اوي ده
ده انت حليت ازمة المرور والسكان وكله لوكشه واحدة
طب بما انك حلال العقد كده يبقي خلاص بقا
خد عندك مشكلة الميه هتحلها ازاي بقااااااا
بس بجد حل منطقي يا ريت توصي المادر المطلعة بتاعتك دي تشوف لنا حلول لباقي المشاكل
بس انا اول مرة اعرف اننا شعب مش حاسس بالنعمة اوي كده

الضاحكون يقول...

هههههههههه
هههههههه
ده من ايه يا اخى
اوعى تقولى سنانك كانوا واجعينك انا اعرف دكتور شاطر قوى فى الاسنان اول حرف من اسمه بطوط
انت قلت فيها طب مهما فعلا ناويين يعملوا كده فى الشعب
مستعجل قوى يا خويا
برده هتتنفخ
هههههههههه
تحباتى
خالد همس الاحباب

ماء تشرين يقول...

هههههههههههههه
والدوله الجامده دى فين بقه
يااااااااااه
لاسف عندنا قصدي معندناش من العقول دى كتير

غير معرف يقول...

gaaaaamed gedan asnan fe3lan feha mobd3en,3andek 7lol la2i moshkela ,ana 5las 7abet el za7ma lema feha men fwa2ed 3azema ,mokne3 ya batot...........

مها يقول...

هههههههههههههههههههههههههههههه
العربية اللى يعدي عليها خمس سنين تتعدم هيا وصاحبها؟؟؟؟ طب عن اذنك بقا أما ألحق أبيع عربيتي قبل عشماوي المرور ما يحول أوراقي ورخصتها للمفتي


ههههههههههههههههه

غروب يقول...

هههههههههه

مش ممكن واضح انك وااااااصل

انت جبت المعلومات دى منين ؟؟؟؟

لالا الواحد يخاف منك بقه انت تبع الحكومه ولا ايه؟؟؟

ولا تبع اللى تبعه؟

بجد فعلا المواصلات بقت شئ بشيع جدا

ربنا يرحمنا

والحلول بجد اسوا من المشكله نفسها

البوست دمه خفيف خالص

maha zein يقول...

ماشي ماشي

بقه نظيف بيقول واللى بيسمع اغاني استغفر الله العظيم

ولا انت يا جدع
عموما افكار نيرة
وفعلا كلام موزون

شيل ده من ده يرتاح ده عنده اصلا

كل سنة وانت طيب
اخبار نتيجة الامتحان ايه؟

صاحب المضيفة يقول...

ايه ياعم الحلول الناجعة والفالحة دي كلها


فعلا

انها حقا عائلة محترمة تلك التي أنت سليلها

:):):):):):)


سلام يا صاحبي

غير معرف يقول...

هاي بطبوط انا قاصداها بطبوط لان عندي اخويا محمد دلعه بطوط ولما نحب ندلعه زياده نقوله بطبوط عجبتني مدونتك عموما وفكرتني مش عارفه ليه بأحلى ايا م عمري ف الجامعه مع اصحابي من كلية طب اسنان عين شمس حسيت ان مدونتك لمست وتر كان مستخبي جوايا من زمان ياريت نكون اصدقاء على فكره انا دخلت مدونتك بالصدفه لاني كنت بابحث عن مدونة بطوط اخويا بس ع العموم شكرا جدا

المـــفـــــــقــــــــوعـــــة مــرارتـهــا يقول...

احنا شعب فعلا ابن شعب صحيح مابيطمرش فينا ناس مابيعجبهاش العجب يعني السادة الوزرا يقطعوا نفسهم يعني والا ايه جاتنا نيلة علي مخنا الضباب

Mahmoud البطراوى يقول...

احساس طفلة محبة للرومانسية بس واقعية

يا هلاااااااا دايما تلحقى اول تعليق ودا شئ بيسعدنى جدا جدا

بس انا شايف بصرف النظر عن التهريج ان اى غلطه يغلطها اى مواطن فبرضه اللى مش بيحاسبه هو اللى الغلط عليه
الحكومه وظفيتها انها تحاسب اللى يغلط او تقدمه للى يحاسبه انما انا ملتزم وغير لأ وكله بضميره دا يبقى هبل جداااااااااا

دمتى بود

////////////////////////////////

واحده مفروسه

انا برضه بقول كده
هههههههههههههههههههههههه

////////////////////////////////

انا حره

وانتى مالك يا غلسه

////////////////////////////////

حواء

هى فايده كبيره طبعا ان المواطنين يقعدوا مع بعض

هههههههههههههههههههههه
ولسه اكيد ياما فيه فوايد واحنا مش عارفين

شكرا لمرورك

////////////////////////////////

محمد غاليا

يا بنى اسكت احسن يسمعوك عندى ميرضوش يخرجونى ويحولوا ورقى لاقتصاد وابدأ من الاول
اهو كلامكم دا اللى جايبلى الفقر :P
دمت بود

////////////////////////////////

بذرة امل

ههههههههههههههههههههههههه
محدش عارف هى بتفكر ازاى بس كلها اجتهدات :P

////////////////////////////////

سومه

قاهره ايه اللى تعمل كده ما اانا فيها بقالى خمس سنين
بس فكره العربيه حلوه جدااااااااا تفكير كبار صحيح
:P

////////////////////////////////

صيدلانيه طالعه نازله

انا لمحت لموضوع الشقاوه دا من غير ما اصرح
:P

تعليقك كل مره بحس انه احلى من البوست يخليكى ربنا ليا
قولى امين

////////////////////////////////

آبى

يا بنتى مهى غلطه اللى سايب اى حد يغلط ومش بيحاسبه برضه
مينفعش كله وضميره
ولا ايه؟
////////////////////////////////

اسماء

يا بنتى انا محلتش ولا نيله انا بس بجتهد افهم فكر الرجاله اللى بيحكمونا وربنا يستر

غير معرف يقول...

ههههههههههههههه
ههههههههههههههههه

بجد فوائد تجنن

دي الزحمة نعمة وليها فوائد كتير واحنا مش عارفين

والصراحة الحلول ختيرررررة بالذات بتاعت اعدام السيارة وصاحبها اهو يقضوا على الكثافة السكنية ههههههههه

هههههههههههههه بوست يجنن

Mohamed Nagah يقول...

الناس بقت كتير اوى

الحل بقا الناس دى تهاجر


______
دعوه لزياره منتدى البيت العربى للتصميم
مفيش زحمه هناك ولا حاجه
http://mohamed-nagah.com/vb/

عبد الحميد محمود يقول...

اهو الواحد يتعلم الصبر شوية

وممكن يخلص شغله أو يعمل مقابلاته في العربية

وممكن كمان

يركب ستارة !!

أو زجاج عاكس

ههههههههههه

والله احنا شعب زي الفل