2008/02/29

لما يبقى عندى امتحان

طقوس لما يكون عندى امتحان - زى بكره كده يعنى- ادعولى
اى حد يجى بتنا ممكن بسهوله - لو يعرفنى - انه يعرف اذا كان عندى امتحان ولا لأ
كل عشر ثوانى اخرج من الاوضه
كميات الشاى والنسكافيه والحلبه والقرفه واى حاجه غير المذاكره والسلام
التتنيح ودام التليفزيون
الاستهبال ودام الكمبيوتر
-------------------------------------------
لو قاعد معايه فى الاوضه هتلاقى حاجات تانيه
كل الكتب الى الصوره دى على سريرى
الكتب هتلاقوها { الاعمال الكامله فاروق جويده الجزء التانى, الاعمال الكامله الابندودى , نهايه التدريب , حاشيه البيجورى , الوجيز فى اصول الفقه , الباعث الحثيث , مجله العربى , تذهيب البغا , اشواق بوذا , وشويه كتب تانيه صغيره } على فكره باقى الكتب فى المكتبه بس السرير مش هيشلها الله يرحم ابى كان عامل مكتبه عملاقه بس انا مش بقرا الا الكتب الى بشتريها
بالاضافه الى الكتب الى تحت السرير وكتب الماده الى عندى امتحان فيها طبعا
الموبايل بقى هتلاقى عليه
{كل اناشيد مشارى , قرءان بصوت مشارى , اناشيد ابو خاطر والخطب الجديده للشيخ رسلان والشيخ ابو اسحاق والشيخ حازم شومان }
لو حاطط ودنك على باب الاوضه هتسمع كل شويه صوت منهم وساعات هتسمع صوتى وانا بذاكر
ضيفوا لكل ده كميه النوووووووم الى بتزيد للضعف
الموبايل مش بيبطل رن طووول الليل كل واحد عايز حاجه ابتداءا من الامتحان على ايه ؟, وفين؟ , والساعه كام؟
الى ايه المهم ؟ وانا لسه ما ذكرتش يا بطوط اذاكر ايه ؟
ثم السب واللعن فى الكليه والى دخلوها والى عايزين يتعلموا
الحاجه الوحيده الى هسبكم تتخيلوها هو موقف امى من كل دا ؟؟؟
ال بالحق حد عنده لبن زياده؟؟ اصلى عايز اعمل شاى بلبن بس مش لاقى لبن تفتكروا اعمل ايه
والكيك الى امى عاملاه كمان خلص يعنى مش هعرف اذاكر يرضيكوا ده؟؟؟؟؟؟

2008/02/28

لم جعلت الامر بلا ثغرات??!!

لا شئ يخطر بباله الان سوى هى وكيف سيعيش بدونها ولكنه ابى ان يكلمها - ولا يريد ان يناقش الاسباب -....... لكنه كان يريد حل لا يوجد به اى ثغرات , لذا جلس فى حجرته يعصر افكاره لكى يصل على هذا الحل.
بعد ساعات او ربما دقائق قال لنفسه {حسنا لا يوجد الا اغبى حل ولكنى سأفعله طلما انه أأمن الحلول}
بسرعه جرى الى محفظته ليرى كم تحتوى من النقود
قال لنفسه {حسنا النقود هنا ستكفى لما كنت افكر فيه .......
فقط!!!
  • اممممممممم سيعنى هذا اننى سافرض الطوارئ
  • الذهاب يوميا للعمل سير على الاقدام - ليست مسافه طويله فقط 15 كيلو
  • الغاء وجبتى الافطار والعداء والغداء وساكتفى بالعشاء فقط
  • , لا سجائر
  • , وحتى كوبايه الشاى التى اشربها فى العمل سالغيها
بسيطه عندما ارجع من الشغل تعبان سانام حتى اوفر طاقتى وبالتالى اوفر كميه الاكل التى اتناولها ..
بسرعه لبس ملابسه وخرج ..
ذهب الى اقرب محل اتصالات ممسك بيديه موبايله -الذى اهداه له اخوه حتى يستطيع ان يطمأن عليه-هو موبايل من طراز متقدم ما كان يحلم ان يشتريه بمرتبه هذا ولو بعد عشره اعوام..
اشترى من البائع خط جديد ..
نزع البطاريه من موبايله ..
وضع الخط الجديدواعاد تشغيل الهاتف ..
تأكد ان برنامج تسجيل المكالمات يعمل واتصل بها..
لم يرد عليها بالطبع ..
كل ما قالت الو........الوووووووو......... مش عارفه ايه المعاكسات دى ..
تأكد ان المكالمه تم تسجيلها ..
نزع البطاريه ووضع خطه القديم ..
وصل الهيدفون ..
واخذ الخط الجديد بين اصابعه ..
جعل يسمعها الو........الوووووووو......... مش عارفه ايه المعاكسات دى ..
يسقط الخط الجديد من ببين يديه لكنه لا يلاحظ ..
طوال الليل يسمع الو........الوووووووو......... مش عارفه ايه المعاكسات دى ..
الو........الوووووووو......... مش عارفه ايه المعاكسات دى ..
الو........الوووووووو......... مش عارفه ايه المعاكسات دى ..
عندما جاء الصباح اغلق صوت الموبايل وبدأ يكلم نفسه ..
يقول لا هى خائنه تركتنى فى وقت الشده ..
لكنى ما زلت احبها ..
لن اتصل بها وان انطبقت السماء على الارض ..
.
.
صوت فى داخله يقول له : لم جعلت الامر بلا ثغرات؟؟!!
ملحوظه : لو سمحتم اقرا التعليقات الى كتبتها - خصوصا التعليق التانى - لان واضح انى فشلت فى توضيح الفكره لان كل الناس بتعلق على حاجه تانيه خالص

2008/02/22

لا تستحلفى لى دا انا عملت الى على



من زمان من اول ما بدأت تدوين  وانا بشوف مدونات كتير بستحلف فيها البنات للولاد او بالاخص - عريس المستقبل - ويقعدوا يقولوا لما يجى هنعمل فيه وهنسوى فيه فعشان كده كتبت رساله لزوجتى فى المستقبل



اقولها ان لو اتاخرت مش انا السبب ......والله السبب اما امى واما عمى- اخو ابويه مش جوز امى ههههههههههههههه- احسن عمى جنب امى كده ممكن تفهموا غلط المهم انا عمال اتحايل عليهم- كل واحد لوحده ما انا فهمتكم بقى - يجوزونى ويصرفوا على وعليها وهم الى مش راضيين معرفش ليه
اما غريب تصرفهم بصحيح!!!!!!!! ملهومش حق؟!!!!!

المهم انا قلت اكتب لها انى مسكتش وانى حاولت وهحكى قصه واحده بس وفيها كفايه

لما كنت فى سنه اولى فى الكليه رحت قلت لامى عايز اخطب - ......... طبعا هى خدت الموضوع تهريج واقعدت تهرج
سبتها واتصلت بعمى يا عمى انا جايلك

اوك تنور يا محمود جاى امتى ؟ اقولك اتغدى معايا بكره بعد الكليه وبات هنا وابقى روح الكليه من عندنا علطول

اوك

المهم خلصت كليه ورحت له

بقوله عمى عايز اقولك موضوع بس متقولش لامى

ضحك وقالى ايه عايز تخطب؟؟؟!!!

قلتله اكيد امى قالتلك

قالى لا والله بس عمك دكتور فى الكليه - كليه هندسه- بقاله يجى عشرين سنه فبيشوف زيك كتير

المهم ايه رايك
اقولك على حاجه انا موافق روح قابل اهلها وانا اجى بعدك

انا قلت انت فاكر انك بتعجزنى طب والله لروح لاهلها

وفعلا رحت لامها - ابوها متوفى- وكان يووووووووووووم

امها كانت عامله حادثه الصبح وعنيها مربوطه يعنى شيفانى بعين واحده ............جابت لى إ زازه بيبسى صاااااااااروخ

الاول انا رحت قابلتها فى المستشفى ومن غير معاد

وهى دكتوره اسنان ومكنش فى غيرها فى الاوضه ست - وباقى الاوضه رجاله -وكانت بتخلع ضرس بس كانت مش عايز اقولكم بتعمل ايه تقريبا بتخلع بق العيان مش سنانه بس ..............انا قلت يا نهار اسود شكلها شريره يا عم الحج وكمان رابطه عينها يوم مش فايت شكله

بس والله كانت ست لطيفه خالص وقعدت تقولى يا دكتور - وانا فرحان اصلى كنت فى اولى ومكنش كتير بيقولوا لى يا دكتور - المهم قالتى من الاخر متكلمش بنتى وانت شكلك محترم وان شاء الله لو ليكم نصيب تتجوزوا

طبعا انا قلت يا شماته عمى فى

المهم هو اتصل بي قالى ها رحت قلت اه

قالى وقالوا لك ايه ................انا قلت مينفعش اقوله ان قفايا بيأمر عيش فقلت اشوف كده هيعمل ايه لو قلته اه

قلته قالوا لى تعالى انت واهلك

الراجل اتخض قالى لا دول عبط بقى يا بنى انا بعتك هناك عشان يرفضوك وتعرف انه مينفعش عايزها تيجوا منهم مش منى

طبعا انا زعقت واعدت اقول بصوت عالى انت كده بتحرجنى مع الناس وقلتى ليه اروح ومش شغل عيال ولن انسى لك هذا الموقف واقفل بقى

بس انا بعد ما رجعت من عند عمى رحت قلت لماما مش عايز تيجى ياااااااااختى انتى فكرانى من غيرك هحتاس لا والف لا
انا قلت لعمى وهو جاى معايا

طبعا اتصلت بيه وقالتله ازاى يا كتور تقول لمحمود كده

وهو يقولها يا ستى مقولتوش حاجه

وانا اقول قالى وبيضحك عليكى

تقوم تتصل تانى واتخانقوا جامد وانا مالى انا عايز اجوز وخلاص ان شاء الله يضربوا بعض مش يتخانقوا بس

نسيت اقولكم تفاصيل الحوار الى دار بينى وبين عمى

قالى بص يا محمود يا حبيبى بالعقل كده انت هتتجوزها ازاى دلوقتى هتصرف عليها ازاى

قلت له انت فاكر انى مفكرتش فى ده قبل ما اجيلك لا فكرت فيه كويس

بص يا سيدى انا مش لى ورث ابويه

قالى يابنى الفلوس ده هتحتاجها بعدين فى بدايتك حياتك انت عارف ان عياده اسنان بتكلف كتير

قلتله اصبر بس انا مش هاخد منهم كتير انا حسبتها الجوازه كلها مش هتكلف غير 25 الف - طبعا ده قبل الدهب ما يغلى الله يسامحهم ضيعوا على الفرصه اهو حتى لو كلنا فشكلنا الخطوبه كنت هكسب من فرق سعر الدهب - ومش هاخدهم على بعض

بص قول خطوبه هجيب دبله ومحبس وانسيال دول هيكلفوا قول 2.500جنيه شغال

قالى ماشى

قلتله طيب وسنيتن خطوبه كل مناسبه هشترى هديه متقلش عن 600 جنيه - شفتوا الكرم - فى عشر هدايا فى السنه يبقوا 6000 جنيه كمان شغال

وهو مش قادر يمسك نفسه من الضحك قالى شغال

قلتله طيب بعد السنيتن نتجوز ونجيب العفش والذى منه والشبكه قول يا سيدى كل ده هيكلف 20 الف مهو اهلها هيراعوا انى لسه فى الكليه

وبعدين اخد كمان 7 الف احطهم فى البنك كل شهر اسحب منهم بتاع 300 جنيه مش من فوايدهم عشان حرام - دا جنب مصروفى طبعا- فى 12 شهر فى سنتين برضه اهو دول بتاع 7 الف وبعدين اتخرج واشتغل

قالى بس دول اكتر من5 2 الف دول اكتر من 40 الف

قلتله يعنى مش مشكله كبيره واهو كده كده كانوا هيتصرفوا فى الجواز دا حتى الجواز بيغلى كل يوم

المهم هو مسك نفسه من الضحك بالعافيه وقالى الكلام الى فوق بقى

وخلص الموضوع سبحان الله

والله الواحد كان جامد بجد

اظن انا كده عدانى العيب وعملت الى على وكنت عايز اتجوز ومش قصدى اتاخر على الى هتبقى مراتى فلو سمحتى بلاش تستحلفى لى ولو عايزه رقم تليفون عمى وامى عشان تستحلفى لهم هبقى ادهملك لما اعرف انتى مين... كده عدانى العيب ولا ايه رايكم؟؟؟؟

2008/02/18

شئ منافس للونرار وبنشوفه كل يوم يبقى ايه؟؟؟؟؟ المترورار





من زمااااااااااان جدا وانا بقعد اتخيل ازاى الونرار ده بيشتغل يعنى بيضغط الملفات ازاى الملف تلاقيه على الهارد " القرص الصلب" بتاع 100 ميجا تقوم تدوس عليه كلك وبقدره قادر يتحول لشكل الكتب اللذيذه دى وينقص حجمه النص 1/2 او اقل


والونرار صاحب فكر اشتراكى معروف جدا فالملفات تدخله بكافه امتداها لتخرج جميعا بشكل الونرار وبامتداد واحد الا وهو rar
لا فرق بين اغنيه ولا فيلم ولاصوره او حتى فولدر فاضى الجميع امام الونرار متساوى جدااااااااااااا


الكل يدخل بفعل الضغط ليتحول وينصهر فى داخل الونرار


كم تمنيت ان يجعلوا الونرار شفاف عشان اعرف اشوف ايه الى بيحصل جواه


وفجأه اكتشفت انى غبى جدا


فانا ارى الونرار كل يوم وارى كيف يعمل وكيف ينفقص حجم الملفات للنص وربما للربع وربما لمفيش خالص


وانا على رصيف المتروو فى محطه انور السادات تحديدا جاء الالهام ............... الناس كانوا على "الرصيف الصلب"- بمساحه لا تقل عن 20 كم2 واذا فجاءه المترو يوصل لتجد كأن احد داس كلك عليهم ليصبحوا جميعا بامتدا واحد الا وهو مترورار وتجد ان المترو رار حولهم من 20كم 2 الى 1/2 متر ومش مربع


الغريب بقى ان لسه فى سؤال واحد مهم


هوالملفات بتبقى بتتسارع كده عشان تدخل الونرار اصلك لما تيجى تشوف النسخه المتطوره من الرنامج ده الى اسمها مترو رار تلاقى الناس كلها بتدخل بسرعه واندفاع شديد جدا ليس لهم هتاف الا عايزين نتحول لمترورار عايزين نتحول لمترورار............... بوم بوم........... عايزين متروار لتجد نفسك تسأل ببلاهه شديده يا ترى مين وراهم؟؟؟؟؟؟؟؟


بنفس استرايجيه عمل الونرار يعمل اخيه المترورار فتجد الناس جميعا تحولوا لشكل واحد لا تستطيع ان تميز بين مذكر ومؤنث انسه ومدام فالجميع فى المترو اسمهم عبد السميع "لذلك ينصح خبراء المترو انك لو راكب مع واحد صاحبك او حتى لو راكبه مع صاحبتك انك تعليمه علامه مميزه لانه جوه محدش بيعرف ابوه"


فكره عمل المترورار قعدت افكر فيها طول الطريق وطلعت بسيطه جدا


المترو ببساطه بيدخله جماهير الشعب المطحونه ليحولهم الى جماهير مصحونه ليستغل الفرق بين الطحن والصحن لاضافه مزيد من الجماهير


فاضل بقى كام سؤال شاغلين بالى جدا


هل الونرار عامل مكان للسيدات - يعنى لو منزل صور بنات حلوين -اطفال محدش يفهم غلط-هيحطهم فى حته لوحدهم ولا هيسبهم مع الملفات الغلسه اكله لحوم الصور؟؟؟؟؟؟؟؟؟؟؟؟


طب الى مش بيقطع تذكره فى الونرار بيدفع برضه عشره جنيه؟؟؟؟ ولا بيعلملوا فيه ايه ولا بيرموه من الونرار وهو ماشى


سمعتم عن ونرار اتحرق ولا خبط فى ونرار تانى اهو ده بس عيب المترو رار انه حوادثه مقارنه باخوه الونرا كتيره شويه


وعلى غرار اعلان التكييف شكرا لكارير انه اخترع لنا التكييف احب اقول شكرا لعم حسنى الى اخترع لينا المترورار


ملحوظه اخيره وانا راجع قلت ارجع بحاجه غير المترو لاكتشف اننا اول دوله فى العالم تعممم نظام الرار فى كل حته فى البلد فقد وجدت الاتوبيس رار والمكروباص رار وكل عائله رار يعنى بالصلاه على النبى البلد كلها بقت رار والى هيجى يتكلم معنا نص كلمه هنقوله " رار شعبك الاول وبعدين ابقى تعالى كلمنا" هوه ده دور الرياده للمصر ولا بلاش

2008/02/10

اكيد هى حاجه مهمه بس انا معرفش







رغم انى رحت الطريق ده كذا مره الا انى لحد الان مش حافظ كل تفاصيله


النهارده ركبت فى عربيه الى بتسميها اختى ( ام بق مفتوح) او عربيه رمسيس وطبعا الراجل كان مركب فيها بتاع 155.3 واحد بلا مبالغه وال.3 دى يعنى بعض راجل لان بقيته كانت بره العربيه زى دى بالضبط


المهم انا كنت راكب فى ضهر السواق


ولاحظت شئ غريب فعلا


ان فى فرق كبير جدا بين انك تشوف الطريق معدول وبين انك تشوفه وانت مقلوب


فقلت لنفسى الكلام الكبير ده والمعانى الكبيره دى اكيد هحتاج ليها فى يوم من الايام فاسجلها هنا


ايه رايكوا ؟؟؟؟؟؟ :D