2008/04/08

مش مصر طلعت مش امنا؟؟

بصوا أنا خطرت في دماغي فكره جامدة بجد

الفكره إلى اوحى لى بيها يوم الاضراب رغم أنى بشوف الحكاية دي كتير بس الفكرة خطرت في دماغي يوم الإضراب بس

انا يومها كان عندي امتحان وطبعا رحت الامتحان ما أنا معرفش الدكتور إيه وجه نظره في الإضراب

المهم وأنا راجع من الامتحان قلت يا واد يا محمود روح وسط البلد شوف فيها إيه دلوقتى

ومشيت في شارع القصر العيني

من بعييييييييييد تشوف الشارع كأنه اسود مره واحده تقعد تسأل نفسك ليه متعرفش

المهم أنا قلت ده أكيد رمز إن إلى هيمشى في الشارع ده ليلته هتبقى سوده ومنيله

بس مشيت

لقيت ودام دار الحكمة كوووووووم سواد لما وصلت لهناك عرفت انه إيه؟؟

عليكوا نور أكيد عرفتوها عساكر امن مركز

اه مركز مش مركزي طب مركز ليها معنى مركزى ايه معناها

عشان مطولش عليكم العساكر كانوا مالين وسط البلد , وشارع القصر العينى كله

مرودم عساكر اه والله العظيم بتكلم بجد

عساكر كتير اوى

أنا اتلغبطت قلت هو الحكومة إلى اعمله مظاهره ولا الشعب

يعنى مين مخنوق من مين؟؟؟

المهم بقى الفكرة إلى خطرت في دماغي

ان الناس بدل ما تعمل مظاهرات تتصل بالحكومة تقولهم لو سمحتم إحنا عايزين نعمل مظاهره

يقوموا يجيبوا العساكر ويبدأوا يهتفوا – العساكر - وخلاص وكفى الله المؤمنين القتال

ثم ان عدد العساكر اكتر من عدد الشعب

يبقى بدل ما نتعب الشعب ونقرفه ونتعب الحكومة وتقرفنا , وكمان طالما الحكومة كده كده هتبقى اكتر من الشعب هناك وكمان الحكومة مش هتفذ اى حاجه كده كده

يبقى بلاها الشعب وتعيش الحكومه

اهتف معايا يامواطن منك له له لها

تعيش الحكومة ويسقط الشعب

تعيش الحكومة ويسقط الشعب

ومن مكانى هذا اطالب ان العساكر هى إلى تعمل المظاهرات كنوع من تريح الشعب وتريح الحكومه واهو كله فى الاخر فى الكلتش

وبعدين مصر امهم هم مش امنا احنا ولا ايه


هناك 55 تعليقًا:

nigro يقول...

بما ان دي تهييسة
فليس على المهيسين حرج
أنا سمعت الحوار ده النهاردة الصبح


الأول: كنت فين يا مصر لنا انضربت على قفايا؟
التاني: كانت واقفة وراك


تهييسة برده يا محمود
بس في السليم
سلام يا دكترة

فرنسا هانم يقول...

مصر امنا ؟؟؟؟؟؟؟؟؟؟؟؟؟؟؟؟
بطوط انت اتجننت ؟؟؟؟؟؟؟؟؟؟؟؟؟
احنا ضيوف عند الحكومه صاحبه البلد ومصر امها لوحدها
والحكومه لقيتنا فى الشارع وربتنا تشكر على كده
وفكره المظاهرات اللى هتعملها الحكومه باطله
لان الحكومه والعساكر هيطالبوا بالعكس
هيطالبوا بزياده الاسعار

Lobna Ahmed Nour يقول...

good idea

lonely يقول...

أنا بطالب بخروج الانجليز من مصر
ويعيش الهلال مع الصليب

عايزين نخرج الاستعمار علشان نعيش احرار
بس ليه العسس بيلبسوا اسود؟؟
يكونشى تعبير عن الندم ولا بيتفائلوا بيه
ولا علشان اللون الاسود ينفع يتلبس على اى حاجة وشيك وكده

ياريت السؤال ده حد من مجلس الشعب يجاوب عليه

وتعيش مصر كوول ومستقلة

فاتيما يقول...

و النبى يا بطوط بلاش الأفكار دى ...
ماهم عملوها يا بنى سنة 86 ..
و كانت أيام غبرا برضو ...
انت متصور ان أحمد سبع الليل لسه موجود ؟
دانت متفائل قوووى

khobayb يقول...

هههههههههههه

صح

أنا معاك .. قلبا وقالبا

وهما يكفوا إن نصهم يعمل مظاهرات ، والنص التاني يضرب النص الأولاني اللي بيعمل مظاهرات

كده على الأقل يبقى الاتنين متسلحين ، والاتنين بيضربوا ، مش واحد يضرب والتاني ينضرب !!

---

يا راجل .. دفعة 26000 عسكري عشان المحليات والإضراب ؟!!!

حاجة تجيب المرارة

همسات دافئه يقول...

عندنا على باب الجامعه ياعينى كان شكلهم يقطع القلب كل واحد حاطط ايده على خده ولا لاقى حد يلطش فيه ولا بنت يعاكسها
بس سيبك انت
المهم ان المصريين عرفوا يعترضوا ويقولوا لاء عرفوا يتحدوا على حاجه واحده ولو فشلوا المره ده هينجحوا المره الى جايه
سلامى

مها يقول...

"أنا اتلخبطت قلت هى الحكومة اللى عاملة مظاهرة ولا الشعب؟؟ يعنى مين مخنوق من مين؟؟؟"
~~~~~~~
جملة عبقرية يا بطوط .. لخصت لنا الليلة كلها فى سطرين .. عبقرى وجن كالعادة !!

بس أنا رأيى بدل ما الشعب يتصل بالحكومة يقولها تعمل المظاهرة بداله ، الأحسن إنه يتصل بيها يقولها إنه هيعمل المظاهرة فى ميدان التحرير وبعد كدة يروح عاملها فى "بطن الزير" ...


ههههههههههههه

Empress appy يقول...

مش كده عيب بقى مش بنقول مصر هى امى
طيب مش نحترم امنا ولا ايه
ههههههههههه
بص يا دكتور بطوط تهيس واحده صحبتى سالتنى قبل الاضراب بيوم قالت الشوارع عندنا زحمه مليانه مخبرين وعساكر وظباط كل ده والاضراب لسه عليه يوم
قولت لها يا عبيطه ما هى الحكومه هتضرب بس لازم تضرب قبلنا علشان عيب هى تتساوى بالشعب ولا ايه لازم يتنكوا علينا ويبقوا قبلنا فهمت ليه كانوا نازلين قبلها
وعموما صح فكرتك وانا معاك فيها يسلم دماغك يا بطوط

Foxology يقول...

ههههههههههههههههههههههههههههه

والله فكرة جامدة واهو بدل ما العساكر يفضلو منقوعين فى الشمس من غير شغلة ولا مشغلة يعملو اى حاجة يجددو نشاطهم بيها :))

تحياتى

simple girl.. ..simple dream يقول...

لا يا بطوط ولا مؤاخذة
دى بلدى وبلد اولادى

لا مش توريث ولاحاجة
انا ديموقراطية

بس بجد دى بلدنا احنا
بس احنا قصرنا فى حق نفسنا بسكوتنا
بس خلاص الناس فاقت ومش هتسكت عن حقها بعد كدة

Moony يقول...

فكرة فعلا
واهى الحكومة والشعب يتفقوا على اى حاجه !!!

Mafrousa يقول...

فكرة رائعه.. بس تصدق و تآمن بالله.. العساكر بتوع الامن المركزى دول اغلب من الغلب نفسه...كاتمين باحبة عينى فى قلبهم .. و حاضر ..... و نعم.. و خلاص..

Mafrousa يقول...

تكمله.. مصر ام الدنيا بحالها.. انت عاش فيها و لا ايه..كل اللى يهج من بلده و يجى على مصر يقولك .. مصر ام الدنيا..

الساحرة يقول...

تصدق هي فكرة حلوة

احنا نقولهم عاوزين نعمل اضراب

بكرةيقسموة بعض نصهم عساكروالنص التاني
قله مندسه مئجورة

يعملوة المظاهرة الاتنين يخلصوة علي

بعض ونستريح منهم

وبعدين مين قالك انك مصر امنا

خدعوك فقالوا

sebofy7alo يقول...

حكومة اية اللي أنت جي تقول عليها أنت عارف قبل بعد الشعب فيييييييييييييييييييييين.

Unknown يقول...

تعيش الحكومة ويسقط الشعب

بطوط حبوب يقول...

نجرو

ربنا يجعلنا دايما فى السليم
انا عايز اعرف مصر كانت واقفه وشايفاه وهو بيضرب على قفاه
ولا هى الى ضربته؟؟!!!

ههههههههههههههههههه

*****************************
فرنسا هانم

اما احنا طلعنا ناس شريره اوى اوى
يعنى الست - الحكومه - تعملنا كل ده واحنا ولا يطمر فينا
اخص على ده شعب

******************************

يونيك

شكرا
******************************

فاطمه
حلوه اللون لاسود ده تصدقى فعلا ممكن تكون مقصوده
دمووووووووع الندم تاتاتا تا

وانتى اكول ( ضيغه افعل من كول )

******************************

فايتما

معلش انا امى ومش فاهم اى حاجه من الكلام ده انتى مش بتكلمى عم المثقف

نورتينى

******************************

خبيب

تجيب المراره؟؟!!
ماشاء الله ماشاء الله هى لسه مجتش؟؟!!

وقشطه عليك

******************************


همسات دافئه

المصريين عرفوا ؟؟!! مش عارف ليه اشك فى ده

******************************

مها

ههههههههههههههههههههه

بطن الزير انا خايف يبجوا بطنه
ههههههههههههههههه

خلينا فى السليم احسن
******************************

ابى

ههههههههههههههههههه
طبعا لازم الحكومه تضرب اولا
انا حاسس ان قفايا لسه احمر لانها ضربت الاول
ههههههههههههههههه

******************************

فوكسولوجى

شفت يامان ولسه كل ما تفكر فى الفكره اكتر كل متلاقى فيها مميزات اكتر واكتر واكتر


******************************

simple girl.. ..simple dream

امممممممممممم اهو ده عيبه
معلش انا مش متوقع ان فكرتى تنجح بنسبه 100%

نورتينى


******************************

مونى

لا احنا هنلغى فقره الشعب هتبقى حكومه وبس

******************************

واحده مفروسه

انا بحس اننا بننطق مصر ام الدنيا غلط
هى بتتقرى مصر ...( سكوت) ام الدنيا
والمعنى فى بطن الشاعر

******************************
ساحره

ههههههههههههههههههههههه
والله برضه فكره

******************************

ابو حنفى

نورتينى

******************************

ايويه

قشطه عليكى

مواطن مصرى نايم يقول...

انت لقيت
انت مش ابنى
حسن يوسف هو اللى ابنى
بعيدا عن جو اللمبى
غصبا عنهم دى امنا

مصر .. التلات أحرف الساكنة اللي شاحنة ضجيج


زوم الهوا وطقش موج البحر لما يهيج


وعجيج حوافر خيول بتجر زغروطة


حزمة نغم صعب داخلة مسامعي مقروطة


في مسامي مضغوطه مع دمي لها تعاريج


ترع وقنوات سقت من جسمي كل نسيج


وجميع خيوط النسيج على نبرة مربوطة


أسمعها مهموسة والا أسمعها مشخوطة


شبكة رادار قلبي جوه ضلوعي مضبوطة

حاسوباتيه يقول...

هههههههههههههههههههههه عندك حق والله فكره رائعه رائعه بدل وجع الدماغ والناس تتعور والشوارع تتبهدل الحكومه هي الي تعمل علشان السلامه والامن برضو وبعدين يعني هي كمان من حقها تعمل مظاهرات عادي يعني من حقها تنفس على نفسها شويه ويطلعوا في الشوارع حقهم يا جماعه الناس مخنوقه على طول هههههههه ربنا يستر على البلد دي

غير معرف يقول...

هههههههه


انت دماااااااغ ... آ ه و الله


المهم .. فى حاجة مش فاهماها فى البلوج دا ... يعنى ايه "كلو فى الكلتش"

و ايه تعريف الكلتش فى هذه الجملة ... لانى حاسة انها دايقتنى شوية

غير معرف يقول...

بس كدة ممكن يكون فيه اضراب ديلفيرى .. او مظاهرة ديليفرى؟!!!!!


يعنى ممكن يكون فيه شركة مخصوصة للاضراب و المظاهرات ز الاعتصامات ... نتصل بيهم ..و هما يبعتوا ناس تهتف ..و الناس دى هيا اللى تتسجن و تضرب


و لا ايه؟

Noha El-arabi يقول...

يا سبحان الله يا اخي في مختلف الكليات كان فيه امتحانات في اليوم ده شكلها مقصودة و الله اعلم
بالنسبة لمصر اللي هي يقال و العلم عند الله انها مرات ابونا بس انا شايفة انا احنا اطفال لقطاء في البلد ده يعني هي اويانا بس مش امنا
تخيل انا مش عارفة اكتب عن الاضراب ده كلمة واحدة حاسة بلغبطة فظيعه

خمسة فضفضة يقول...

السلام عليكم ورحمة الله وبركاته

علي رايك احنا نروح ونتعب نفسنا ليه ، احنا بس نقول عاوزين مظاهره يوم كذا في الحته الفلانيه تقوم الحكومه مشكوره تعملها، وكل واحد يقعد في بيته بلا قلة مظاهرات بلا قلة قيمه

:-)

عبده الرايق يقول...

انا معاك ان العساكر هما اللى يعملوا المظاهرات
ويقسموها فريقين
فريق بالشورت الابيض وفريق بالشورت الاسود
والفريق اللى بالشورت الابيض يعمل المظاهره
والفريق اللى بالشورت الاسود يضربه بالقنابل والنار
وبكده نتخلص من الاتنين

منوفيـــايــة يقول...

تعيش الحكومة ويسقط الشعب
والله فكرة حلوة جدا""
بس بيتهيألى انها مش هتعجبهم
اصلهم مش هيلاقوا حد ينضرب كده
وبعدين مين اللى هيتمسك برضو
لاء لاء الموضوع عاوز يتظبط
اعملنا اجتماع وانت ترقصه
تحياتى يا بطوط

الـسـيـدة نـون يقول...

عجبنى اوى وصفك للأمن بأنه أمن مركز مش مركزى

ست البيت يقول...

بص يا بطوط ،،،
موضوع الاضراب انضرب في محافظات مصر واسكندرية لأنه استعدولوا قوي لأن زي ما انت عارف اسكندرية معقل الاخوان
انا بقى كان عندي سيمينار يومها
نزلت لاقيت ميدان الرصافة عليه عربيتين أمن مركزي
عموما انا خرجت من السيمينارما لقيتش حاجة دا غير ان بعض الشركات في اسكندرية عملوا عليها حصار ممنوع الخروج علشان محدش يشارك في الاضراب
****************************
موضوع مصر هي أمهم دا من حقهم
واغنيهالك كمان
دا حقنا نضرب كلنا
ومصر أمهم مش امنا
أمنااااااااااااااااااا

Unknown يقول...

طبعا اقتراح مقبول واللى موافق عليه يتفضل برفع يده.. موافقة
وأنا بالأصالة عن نفسى وبالنيابة عن المدونين امثالى قررنا النظر بعين الاهتمام إلى هذا القانون ودامت لنا مصر آمنة مستقرة
جميلة يا محمود واستنى الجديد بتاعى

Abo 7anf يقول...

بطوط باشا
يسيدى انا شفت الامن دا اكتر من اى شئ
عندنا فى المحله من يوم الاضراب الصبح
ومن قبل ميحصل لسه اى شئ
والامن كان اكتر من المواطنين
وحصل الحصل
يسيدى مش مشكله لانهم فعلا اكتر مننا

فاتيما يقول...

يا سى بطوط
انا قصدى احداث الامن المركزى ..
كانت فى يوم كدا أغبر سنة 1986 لما العساكر بتوع الامن المركزى فى القاهرة عملوا ثورة على أوضاعهم و خربوا القاهرة و حصلت فيها مهازل ..
ادت بالجيش ان ينزل للشوارع و لأعادة الهدوء مرة اخرى للشارع ...
كان فيه حظر تجول بعد المغرب تقريبا
و المدارس و الجامعات أخدت اجازة ..
أسال والدك و والدتك عنها هما هيفتكروها كويس ...
بس

غير معرف يقول...

تصدق فكرة حلوة
لبقوات تعمل مظاهرة والشعب ينزل ضرب فيها نغير الادوار مرة واحدة في حياتنا
فكرتني بصورة العساكر المساكين اللي ظهرو في النشرة
وكانو يقطعو القلب
ولا كاني في 75 مواطن ليهم اصابات خطيرة
ولافي اتنين ماتو من المواطنين
يعيني عليك يازمن
متنسانيش بلعيش والحلاوة بقي لما اتكل
سلام يابطبط
بطابيطو ترمس

واحد من البلد دى يقول...

يا عم بطوط.دول بوظوا دماغ العيال فى المدارس...الواد من دول أول ما دخل من باب البيت أمه بتزعقله ....راح ضاربها بالقلم...بتقوله ليه كده يا ابنى؟؟؟قالها ما انا عرفت الحقيقة خلاص....عمالة تقوليلى طول عمرك...انا أمك انا أمك..ويتضح فى النهاية إن مصر هى أمى...ومش بعيد بكرة_ومع إزدياد البطالة_نجد إعلان يقول.....(المعلم عمبوكة العكر...لعمل جميع أنواع الإضراب...إضراب شعبى_إضراب عمالى_إضراب جامعى_إضراب منزلى)ملحوظة....يوجد لدينا عمل إعتصام بإسعار خاصة)....موضوعك هاااااااااايل

المـــفـــــــقــــــــوعـــــة مــرارتـهــا يقول...

إيش جاب لجاب ياعم ... هو أحنا لينا بركة إلا الحكومة وفرمانات الحكومة ... ربنا يخليها للشعب عشان تهد حيله

بطوط حبوب يقول...

بصوا انا علقت على كل الناس وللامانه ماعادت اخر اربعه
بس النور قطع
تقولى ايه اكتر حاجه تكرهها
اقولك ان ارجع اكتب حاجه تانى
معلش بقى المرادى

رئـــــيسـة حزب الأحلام يقول...

السلام عليكم
ادة هى مصر مش انا امال ام مين الواحد فى البلد دى اصلا بيحس انة مواطن من الدرجة العاشرة ويلا بس نثبت على العاشرة

غير معرف يقول...

ههههههههههههههههه
اخر تهيس يابطوط
كويس انك ملقتش دبابات ومدرعات
اصل الحكومه كانت مجهزه نفسها للاضراب
ولا كان 6 اكتوبر هيبعث من جديد
والحج انس القي بجهازه الاعلامي
كان عامل شغل جامد بعد وقبل الاضراب
حلوه حكايه العساكر يعملوا مظاهره دي
عشان يبقي عجن منه في تبقي في بيتها

*سمر* يقول...

جامد جدا الكلام يا محمود :)

على رأيك مهو هو ده اللى فاضل ..
بس احييك على الفكرة ..بجد حلوة جدا
انا برده كان عندى امتحان ..وللاسف رحت ..بس برده كنت مضربة عن اى شىء ..الا الامتحان D:

هبة المنصورة يقول...

على رأيك
كله بقى ف الكلتشه

عاجبانى أوى فورمة صحابك البطابيط.. مدمنة فيونكات أنا.. عارف فكرتنى بقصيدة لشاعر إنجليزى كان مظبط سطورها على شكل طائر والواحد كان بيحاول يقراها بسرعة ويقفل الكتاب بإحكام عليها أحسن تطير.. فخد بالك من فيونكة صحابك.. الجو هوا جامد اليومين دول:)

مصطفى فتحي يقول...

جميل اسلوبك يا محمود

موناليزا يقول...

ايه الكلتش دى يامحمود؟
يعنى كانوا بيضحكوا علينا طول السنين لما قالوا مصر هى امى نيلها هو دمى
طب انا مين امى؟

بطوط حبوب يقول...

رئيسه حزب الاحلام
وعليكم السلام
هههههههههههههه
هنثبت ان شاء الله

***************************

مادى

اهو ده الى بقوله من الصبح يبقى فى بيتها

نورت

***************************

سمر

انا كان عندى امتحان ومكنتش مضرب فكره ان الشعب كله يضرب مش مقتنع بيها

***************************

هوبه

نورتى المدونه

والفيونكه كانت صدفه بجد
بس حلوه اوى الملاحظه بتاعتك
هاخد بالى متخافيش ونورتينى
خافى انتى على فيونكاتك
***************************

موناليزا

طلعوا بيضحكوا علينا بس تصدقى مصر ممكن تكون امنا مهى مستحمله كل ده مننا محدش يعمل كل ده الا قلب الام

***************************

مصطفى فتحى

شكرا يا زوووووووووق

Bongo يقول...

ايه ده .. ايه ده
احنا هنهزر و لا ايه !!



لأ انا عندي فكرة احسن

احنا نعرف الناس اننا في نيتنا نتظاهر و هما يتخيلوا المشهد و اهو نستريح و نريح العساكر الغلابة و الحكومة ترتاح مننا و منهم ههههههههه

Asmaa mahaba يقول...

واهو على راى سى عادل اومام
اللهم اكسيهم وعرينا
بس فكره جامده وانا عندى فكره اجمد
ممكن نلبس الشعب امن مركزى وكله لخابيط خخخخخخ ونبرجل الحكومه ونخليهم يضربوا فى بعض
تحياتى ليك سومه_87

الفارس الملثم يقول...

تصدق يا محمود بجد عندك روح سخرية ملهاش حل ههههههههه ..

بس تصدق فكرة بجد يعملوا وزارة يسموها لشئون الاضرابات والمظاهرات , واي حد مزنوق في مظاهرة يتصل بيهم وهما يبعتولوا فرقة مدرعة من عساكر الامن المركزي وهما ياخدوا السبوبة دي كعمل اضافي بس طبعا لازم يحاسب الاول..

فعلا كم فيكي يا مصر من مضحكات ولكنه ضحك كالبكاء..

تحياتي
محمد

غير معرف يقول...

ويبدأوا يهتفوا – العساكر - وخلاص وكفى الله المؤمنين القتال

اهى دى اكتر حته عجبتنى... على فكره انا برده كان عندى شبه امتحان كده فى اليوم ده... السكشن 150 حضر منه 30 بس... المعيد وهو بياخد الغياب قالنا منوريييييييين....وبعدين ازاى مش امنا..انت بتتكلم فى السياسه ولا ايه...لااااااااااا دى امنا وعلى راسنا من فوق وعيش وربى العيال فاهم؟؟؟

انجلز يقول...

هههههههههه
ممكن نعقبهم ونمشى كلنا وميلقوش حد يحكموا وبكدا بدل ميكون طوائف الشعب عمال وفلاحين وفئات هيبقى ظباط ومخبرين وحزب وطنى

Unknown يقول...

هى قطعة الأرض الى من صنع ربنا الى أسمها مصر امنا فعلا و ووطنا ومالناش وطن غيره

لكن فعل البشر هو خلانا نحس للحظات انها مش امنا مش عاوزين يفرقوا بينا و بينها اكتر من كده

تحياتى

Gannah يقول...

اخى العزيز بطوط
فكرة جديدة و مبتكرة احنا شعب مبتكر و افكاره ملهاش نهاية بس اسمحلى مصر فى الظروف الحالية مرات ابويا القوية المفترية وكله من الحكومة اللى اعيش و اشوف فيهم يوم
تحياتى

أحمد خفاجي يقول...

مصر أمنا وأمهم بردو
بس إحنا من أب وهما من أب تاني
لأن مصر في شبابها كانت مزواجه
وجار عليها الزمن وإغتصبها حمار
عشان كده الجيل بتاعنا شويه بطئ الفهم ودا سر إعتراضه علي التوريث ..فيه حد يعترض علي حاكم جاهز ومجرب ..اوه يا عم بطوط
#############
يشرفني زيارتكم لمدونتي
matpool..maktoobblog.com
والإستماع إلي شعري علي يو تيوب
youTube-khafagyah's channel

(احمد سكر ) يقول...

تحياتى بطوط

اول مره ادخل عندك

مدونه دمها خفيف

امممممممممممم

وبلاش كلام فى الملوخيه

اللى هى سياسه عندنا يعنى

تحيااتى
احمد سكر

بطوط حبوب يقول...

بنجو
ههههههههههههههه
والله فكره جامده مووووووووووت
وبعدين نسمع فى الاخبار ان فى ناس اجرحت وناس اصابت عادى برضه عشان منبقاش اتحرمنا من حاجه
ههههههههههههه
**************************

سوما

هههههههههههههه
لا دى فيها جنحه مينفعش نلبس لبسهم انتى هتدوينا فى داهيه شكلك

**************************

الفارس الملثم

الناس كلها اقاتحرت افكار جامده انا هبعت البوست ده لامن الدوله وهى تعمل الواجب
ال وزراه ال
ههههههههههههههههههههه

**************************

روز

ما انا عايش اهو بس العيال يجوا وانا اربيهم
هههههههههههههههه
بلاش تقلبى المواجع

**************************

انجلز

مينفعش يا مان
هى مش امنا اه هى مرات ابونا بس عمرى ما هسيبها

**************************

عاليا حليم

متفق معاك جدا
بس انا بهيس بس

**************************

جنه

تعيشى وتشوفى فيها يوم
ربنا يديكى العمر
ههههههههههههههههه

**************************

احمد خفاجى

احنا من اب تانى
امممممممممممم يبقى عشان كده بقى
نورتنى

**************************

سكر

مش هتكلم فى حاجه يا مان انا ساكت اهو

د/اجدع بنوته يقول...

هو مين اللى عامل المظاهره اه

الشعب ولا الحكومه

هههههههههههههههههههههههههههه

ولما مصر مش امنا اومال ام مين ولامؤاخذه

بنت مصريه يقول...

انا كنت ف كليه البنات ولما كان يحصل اى مظاهره فى اى كليه تانيه كانوا يوقفولنا عساكر الامن المركزى
بجد يا بطوط بيتميزوا بكميه غباء رهيبه
كانوا ف اى مظاهره ييجو يعاكسوا البنات بعد المظاهره حتى معاكستهم غريبه نوعا ما
تلاقى عسكرى الامن المركزى اللى بيعاكس من جوه العربيه عشان الظابط ما يشوفوش
اول ما يشوف البنت يقول_بس بس_اول ما البنت تبص تلاقيه بيضحك ضحكه بلهاء مصحوبه بحول فى العينين مع بعض الاندهاش
اكيد الحكومه مختراهم كده لاسباب معينه لايعلمها سوى الحكومه

امواج يقول...

والله يابطوط كلامك كله حكم