2008/08/16

عريس؟؟.. يبقى سيبونى عليه


الموضوع فعلا بسيط يا اخونا بس لازم تمشوا على القواعد
وبما ان انا الكبير ... فكــ واحد خبره فى الموضوع ده قلت لازم اكتب خبراتى عشان مبقاش حرمتكم من اى حاجه
طبعا لان اختى بتتخطب من وانا فى اعدادى(فى كليتنا قبل سنه اولى) .. فكونت خبره من ازاى تتعامل مع الخطيب الجديد.
ضيف لده جه لاختى من اول عم عبدو البقال .. لحد سفير مصر والسودان وعشان كده جت اول قاعده
اولا : المعاد لازم يكون بعد صلاه المغرب
تقولى ليه؟؟ .. اقولك انا
لو طلع العريس يخنق وملوش اى لزمه فتقوم انت تنقذ اختك او بنتك
وتقوله .... ما تقوم نلحق صلاه الجماعه
طلع العريس فله وشمعه منوره.. تقول لنفسك ... وقت العشا ممتد
وطبعا ده مفيد عشان تبتذ اختك ..
تبصلها كده بطرف عنيك وتقولها ( كله بالعين) .. والله اسيبك قاعده معاه- دا لو انت شايفها مخنوقه يعنى -
تقوم هى بطرف عنيها برضه تقولك .. والله هتشتغلك خدامه لمده اسبوع بس خلصنى منه خد دهبى وفلوسى وجوهراتى ومشى الراجل ده
تقوم انت تقولها .. انا بقول نديله فرصه
تقوم هى ( كله بالعين ) تقولك هولع فيا وفيك وفيه لو ما مشتهوش من ودامى حالا
وتبدأ المفاوضات العينيه - نسبه للعين - بينك وبنها وممكن تاخد منها امتيازات كتيره جدا
طبعا لو حاسس انها موافقه ممكن تقولها بالعين برضه.. انا بقول نروح نصلى
ثانيا : تقعد انت يا بوب - لو كنت اخوها او يا عمو لو كان حضرتك والدها - الاحترام حلو برضه - ودام العريس بالظبط
وتستمتع بقى بانك تبص له وهو بيحاول يبص بطرف عينه ليها وانت بتكلمه
صدقنى احساس بالغباء لا يوصف ..

ثالثا: اياك تقع فى شر اعمالك

مره جه لاختى عريس ماشاء الله ولا قوه الا بالله
هو طولى حوالى اربع مرات والعرض عرضين ... اساسا هوا الكلام وهو خارج من بقه ممكن يكسر الشقه
وكان بيتصل ياخد معاد .. بس صدقونى انا لو فى نص جسمه .. عمرى ما اخد معاد انا اجى وافرض شروطى كمان

هو اتصل بينا .. ممكن اكلم دكتور محمود


المهم خد معاد .. وانا معرفش انا هشوف ايه بقى
جه اليوم الموعود .. دخل وانا قاعد كمشان فى الانتريه .. لا بنطق ولا بتكلم

دخلت ماما يومها .. قعدت تتكلم معاه .. ( رغم انى الطبيعى لو حد مش عارفينه زى ده انا بتكلم معاه الاول وبعدين بقى يتكلم مع اختى وكده) انما انا بصراحه خفت اقول كلمه كده ولا كده يقوم يطربق الشقه
امى عماله تتكلم .. وانا عمال اتوسل لعم عصام ( امام المسجد ) - فى سرى -انه يأذن العشا بقى
خايف امى تغلط بكده ولا كده يقوم يكسر عفش البيت كله بقبضه يده


المهم بعد ما مشى اختى قالت طبعا مستحيل اتجوز ده
قلتلها ايه ؟؟ بتهرجى .. وده مين هيقوله انك رفضاه .. معنداش بنات تقول لأ .. هتتجوزيه يعنى هتتجوزيه
اختى قعدت تبتز فيا .. مش انت الى بتعمل وتسوى وتقول .. روح بقى يا فالح قوله اننا مش موافقين .. خليه يعجنك
انتى بتتكلمى بجد يا حبيبتى ونور عينى.. هوا انا ليا اخوات غيرك .. دا انتى الشمعه .. اطلبى اى طلب الا انى اقف ودام ضلفه الباب ده واقول لأ
انا كده بجرح كرامته ورجولته .. ومعرفش هو ممكن يعمل ايه.. تسيبى اخوكى ودام القطر يا مفتريه


صدقونى الراجل ده اتصل وقلتله وانا برتعش اننا رافضين .. بس لو كان جه وسألنى وجه لوجه .. كنت هجوزهاله ان شالله يحصل ايه

رابعا : مش كل الناس بتفهم

فى عريس مثلا جه لاختى .. معرفش اساسا جاى ليه؟؟.. اولا من غير ميعاد .. امى كانت فكراه من شكله كده واحد صاحبى بيته قريب مننا.. فمش لابس لبس خروج يعنى
فدخلته .. انا معرفوش .. لقيته

بدأ بمقدمه .. طبعا انا عارف ان الانسه ما شاء الله جميله ومن بيت كريم ومن عيله .. واخواتها ما شاء الله يشرفوا .. واعمامها حاجه ترفع الراس فعلا ما شاء الله .. وخالها فعلا ربنا يخليه لكم

شوفوا بقى كل المقدمه دى .. يعنى عارف احنا ايه كويس اوى اهو
كنت عايز اقوله طب بذمتك انت ؟؟ ايه المبرر ان احنا نوافق عليك؟؟
فعلا فعلا مفيش تكافئ تماما.. بس اديه بيحاول
والغلاسه بقى انه اترفض تلات مرات .. اخرهم الجمعه الى فاتت


خامسا :سيب اختك تتكلم مع العريس
عشان تعرف انت تشرب العصير وتاكل فاكهه من بتاعه الضيوف
:D

سادسا : عيب اختى انها بتدور على حد بعقلى وذكائى ووسامتى وعبقريتى واخلاقى وتربيتى
... رغم انى غلبت اقنعها ان مفيش زيي بس مش عارف اعمل ايه؟؟

متنسوش تدعولها ربنا يرزقها بحد كويس عشان هى تستحق بجد
ربما للحديث بقيه
:D
الموضوع كان المفروض غير كده نسبيا بس الرقابه حذفت منه معلش

هناك 69 تعليقًا:

NilE_QueeN يقول...

ووانت عديت الموضوع على الرقابه ليه

الموضوع جميل اوى

Maha Shahen يقول...

جميل جميل جدا يا بطوط هههههههه
هايل فعلا اسلوب كتابه رائع ومميز
لا وخبره كمان
ربنا يرززق أختك بأنسان صالح يا رب يكرمها ويحافظ عليها
ويرزقك ببنت الحلال ونشوفك بعد الخبره دى هتروح لأخوها ولا لباباها تقوله ايه , متنساش تنشر لينا الحوار بقى
تحياتى ليك ولقلمك الرائع

Empress appy يقول...

انت فزيع دى مامتها داعيه عليها اللى هتأخدك دى ههههههههههههههه

بجد ربنا يكملك بعقلك يا محمود وربنا يا رب يرزقها بابن الحلال الكويس المحترم اللى يصونها
وربنا يستر انه ميكونش واخد منك جنانك

Asmaa mahaba يقول...

الاول

Asmaa mahaba يقول...

ييييييييه يبقى الاول مكرر

Asmaa mahaba يقول...

ههههههههههه سبحان الله موضوعك متزامن مع عرض بلو ويف عندى فى المدونه بيقولى ابيض الشقه 4 اوض وصالتين وهو يتجوزنى شكله عاوز يدخل فى تحدى سومه باينه ناوى على خرابها او تقريبا طمعان بعد ما ابيض الشقه عمرى الافتراضى يكون انتهى ويورث

Asmaa mahaba يقول...

كدا بوظتولى الكارسى وكسرتوها امبارح عليكم تلاته جنيه واتربعين قرش خمسه وستين تعريفه حق الازاز المكسور

Asmaa mahaba يقول...

ما انت اخ ميه ميه اهو
ههههههه اما ييجى اختك عريس ولا تعوزهوش صدره لاختك التانيه ينوبك ثواب

Asmaa mahaba يقول...

لعلمك الحجم الكبير من الرجال بيبقوا طيبين جداااا
اه والله دى حقيقه
قولى يا بطوط هو الراجل اللى كان ضخم ولا انت اللى بطوط بحق؟؟؟

Asmaa mahaba يقول...

بتهرجى .. وده مين هيقوله انك رفضاه .. معنداش بنات تقول لأ .. هتتجوزيه يعنى هتتجوزيه
ههههههههه طيب كنت ناديلى اجيلى بالفرش اسعفك ادى للراجل وشين دوكو تمام

Asmaa mahaba يقول...

على فكره انا ححرص على ان اخويا ميقراش نصايحك دى ههههه عشان انا بحب الغتاته يعنى بحب اخويا يكون غتت وانت كدا زرت وخففت

Asmaa mahaba يقول...

الميه
المتين
الخمستاشر
بوممممممم

Asmaa mahaba يقول...

انا شوفت الموضوع دجخل فيه امبارح الروس الكبيره قولت اجرى

Asmaa mahaba يقول...

حسنى تبارك
اقبضوا عليه
دا تبع التنظيم المفشكلونى
قائد كتيبه دعبس المدعبس يتامر على الحكم متخفى فى زى بطه

غير معرف يقول...

هههههه

ربنا يرزقها الزوج الصالح اللى يستاهلها ويكرمها يابطوط ...

ويرزقك انت كمان الزوجة الصالحة ..:)

محمد فاروق الشاذلى يقول...

السلام عليكم ورحمة الله وبركاته
أولاً طول فترة قرأة البوست وأنا مش عارف أمسك نفسى من الضحك، والحمد لله إن أختى إتجوزت وبابا كان موجود وشال هو الليلة.
ثانياً: إن شاء الله أختك تلاقى اللى زيك أو أحسن لأن (بفضل الله) المسلمين لسة فيهم كتير ناس كويسين قوى.

مها يقول...

خامسا :سيب اختك تتكلم مع العريس
عشان تعرف انت تشرب العصير وتاكل فاكهه من بتاعه الضيوف
==========

كدة عمرك ما هترضى تجوزها لحد ابداً .. هههههههههه
ك

سمر الشافعى يقول...

ههههه الحمد لله الذى عافانا احسن حاجه ان معنديش اخوات ولاد ياحللولى هقعد بقى براحتى مع خطيبى من غير ماحد يغمزلى بعنيه ولا برجليه حتى وكمان هاكل كلللل الجاتوه واشرب كل العصير لوحدى يوو قصدى انا وخطيبى يعنى ايه الطفاسه دى

انا على فكره بدات اشك فى زوق اختك بقى تسيب راجل طويل عريض المنكبين شلولح وعاوزه واحد شبهك بيفكر من دلوقتى ازاى يغتت على مراته

البوست بجد حلو اوى ربنا يسعدها ويرزقها باللى يستاهلها وانا كمان هههههههه ويرزقك انت باللى تشحططك ان شاء الله ههههههه لا متزعلش دا انت تستاهل كل خير والله يامحمود بس انت استهدى بالله ومتبقاش متسربع عالجواز كدا مش لما تجوزنا احنا الاول وتطمن علينا وتشوف ولاد ولادنا وبعدين تفكر فنفسك

AHMED SAMIR يقول...

ايه يا دكترة الخبرات الجامدة دي
سمعت ان اسامة كنير قلقان منك وخايف على برنامجه

Asmaa mahaba يقول...

نسيت اقولك ربنا يفك ديقه كل البنات يا رب
امش قولتلكم حنفى شاحح فى السوق

Asmaa mahaba يقول...

ديقه ههههههه اسمها ضيقه
ولا اسمها ايه كله من تاثير الضرب على القفا فى البوكس امبارح

مها يقول...

إ إلى سومة مجنونة
؟؟؟؟ 13 تعليق على بوست واحد!!! هو فيه إيه

مواطن مصرى نايم يقول...

يا باشا ربنا يكرمها بإذن الله
الجواز دا رزق
و اكيد رزقها ان شاء الله فى حد يكون يستاهلها
بس بالنسبة للراجل الضلفه
هو شافك بعد الموضوع ده
هههههههههههههههههههه

PrInCeSS BeRy يقول...

ههههههههههههههه حلو اوى التصرفات بتاعتك فى التطفيش دة انت اخ جامد وربنا يكرمها ويوفقها

Mahmoud البطراوى يقول...

NilE_QueeN

اصلى خفت اجى اكحلها اعميها
:)
وبعدين انا راجل حمش
لازم استأذن الاول
:)
-----------------------------------------
nour shahen
اوعى تكونى بتجاملينى؟؟
ربنا يخليكى يااااااارب

انا قلقان الى بعمله فى الناس يطلع عليا لما اجى اتجوز
ربنا يستر
:)
-----------------------------------------
appy

لا ما انا هديها خصم كبيييييييير
:)
ال تاخدنى ال
كيس بطاطس انا
هههههههههههه
-----
جنانى؟؟
الحق عليا ان بنصح اخواتكم وابهاتكم عشان تختاروا العريس السليم
استغلى خبرتى
-----------------------------------------
سومه...مجنونه فى بلد عاقل

ال الاول ال؟؟
مخصوم من حسابك الف جنيه وتلاتين قرش عشان بتزورى
ولا اقولك ملكيش حساب عندنا واخبطى راسك فى الدهان الجديد
:)

واعى تقبلى العرض
لازم يجى ويقعد وتمارسوا معاه نصايحى
خليكى واعيه
-----
ماشى يا سماسم انتى بس تأمرى
تاخدى الضلفه ولا عايزه حد سميتيك؟؟
كله موجوده
:)

هو الحجم الكبير طيب
بس لو قال يا شر محدش هيعرف يكلمه
:)

وبعدين هو مش حجمه كبير دى عضلات

مكنتش اعرفك انك موهوبه فى التبيض المره الجايه بقى اجيبك

-----------------------------------------

همسة قلم

ربنا يكرمك ياااااارب وشرفتنى بالزياره

-----------------------------------

قلب مصرى

وعليكم السلام ورحمه الله وبركاته

بجد فاتك نص عمرك
متعه انك انت تنفذ الخطوات دى بنفسك
:)
ياله خيلكك فاكرها لما تجوز بناتك بقى

اسعدتنى بالزياره

----------------------------------------

مها

هههههههههههههههه
ما انا اكل , شارب , عصير , جاتوه , وزيارده خبره
طب اجوزها ليه؟؟

الخط الدبل ده انا معايا براءه اختراع له
:)
-----------------------------------------
سمر الشافعى

انا قررت انه لو جالك عريس انى اجى معاه
عشان اتأكد ان والدك هيعمل الىانا قلت عليه
:)
ربنا يسعدك ياااااارب ويرزقك بالعريس الى يعدى كل الاختبارت
:)
-----------------------------------------
A.SAMIR

بطوط جاى وبقوه
لا تقولى اسامه ولا بتاع
انا خلاص بقيت خبره كبييييييييييره
طب بجد اسامه عنده نص خبرتى
سامعك بتقول لأ
اجابه صحيحه
-----------------------------------------
مها
احتلال بعيد عنك
حكم القوى
-----------------------------------------
مواطن مصرى نايم

امممممممممممم
تفتكر ممكن يشوف الموضوع
تعرف بجد بجد
لو شافه معرفش ممكن يعمل ايه
بس اظن البلوجر هيقفل

-----------------------------------------
PrInCeSS BeRy

احناا بنعمل الى علينا
:)
نورتينى

غير معرف يقول...

هههههههههههههههههههههههههههههههههه
يا نهااااااااااااااااارك

بس تصدق؟
و الله جو جميييييييييل
ربنا يعلم الاوقات دى بتبقى عاملة ازاى
بس الجو اللى وصفته ده جميييييييل بجد

ربنا ما يحرمها منك
و يرقق قلبك عليها دااااااايما

و يقر عينها بمن يوقدها و تقوده للجنة ان شااااء الله

اقرا تانى عشان اضحك شوية بقى

Unknown يقول...

يا محمود يا عزيزي
بعض من كلامك ده هو اللي مخليني عاوز أتجوز واحدة مايكونش لها أخوات ولاد
أصل بيني و بينك كده أكره ما عندي إن واحد يحاول يركبني في الكلام
لما بيحصل حاجة زي دي
بيبقى سنته سوده مقلمة بكحلي محروق كارف على أسود برده
يعني لو حصل زي كده مثلاً و أنا رايح أتقدم لواحدة يبقى لازم يجيبوا حد في القعدة علشان يلم قطع غيار البني آدمين اللي هتترمى و الدبش اللي هيطلع مني
و بس

-------------------------------
على فكرة يا دكترة أنا باستخدم متصفحين نت
Netscape & Firefox
بس طريقة التعليق القديمة كانت سهلة و سلسة و أفضل من دي (ده بالنسبة ليا)
-------------------------------

و يجعله عامر




يلا سلام

nigro يقول...

التعليق اللي فوق ده بتاعي

رصيف نمره خمســــــه يقول...

ههههههههه ايه ده يامحمود

الطويل العريض ده مدكش علقة حلوة كده ولا دى الرقابة شالتها

اه ياعينى غلبت تفهمها انها مش هتلاقى زيك فى وسامتك واخلاقك (انت عندك حق)

يااااااارب ارزق هاله اخت بطوط بحد كويس وميكونش يشبه محمود ههههه

تحياتى

صاحب المضيفة يقول...

والله والله


اخلاقك وتربيتك ووسامتك وذكائك


كل ده مرة واحده


صدق اللي قال صحيح


ولد مخول



يابني كل الصفات دي تلاقك واخدها من اخوالك العظام وعيلتهم الطاهرة

انت فاهمني طبعا ومافيش احلى من ألاطة .....


ههههههههههههههههههه


ربنا يرزقك ويرزقها أحسن ناس ياعم


سلام يامان

ست البيت يقول...

بطوووووووووووووط بطابيطو
الكلام الج امد دا يا بطوط
دا انت طلعت مدينة البط كلها
اقولك لو جالي عريس وواخد بالك من حرف الامتناع دا
لازم وحتما وضروري نعت لبطوط يقعد معاه
دا انت حدودتة يا د. خفة الدم دي كانت فين ؟
يارب يرزق الواد اخويا بشقة محترمة اونا اباصيهولك على الصالون عدل
ومعاه علبه محترمه من مانا كمان...
احنا يعني عندنا ام بطوط وما اخت بطووط

ربنا يرزقها زوج صالح ..دي نفس مشكلتي انا عاوزة واحد زي اخويا -اللي حعبعتهولك على الصالون- ربنا يزقكم بالزوجات الصالحات ..
دمت بحفظ الرحمن ولا تنسانا من صالح دعاءك يا أخي

semsem يقول...

اولا ربنا يرزقها بالزوج الصالح اللى يصونها ويسعدها
والبوست لذيذ اوى ياعم بطوط بجد

Noha El-arabi يقول...

ليك يوم يا محموووووووووووووود و تقعد نفس القعدة و يتمارس عليك نفس الطقوس
:)
ساعتها حافرح فيك
P:
ساعتها مش حتلاقي وقت تاكل حاجة

الـسـيـدة نـون يقول...

انا عمالة اضحك
وبعدين انفجرت فى الضحك على خامسا اللى انت كاتبها دى

ربنا يسعدك يارب
وعن قريب نسمع خبر جواز اختك
بس نصيحة من واحدة خيخة متجوزة

قول لاختك تييثىىىىىىىىىىىى ولا تتسنعى

يعنى تريثىىىىىىىىىىى ولا تتسرعى

بس خلاص
اللهم بلغت اللهم فاشهد

سلام
اختك خيخة

MY FATE يقول...

هههههههههههههههه
اللى يعيش ياما يشوف
بس أنا فعلا لو جالى عريس هاتكسف أرفض وخصوصا لو كان زى الأستاذ اللى ممكن يكسر الشقة ده عشان كده عيب أصلاااا الواحد برضه لازم يخاف على عمره
وربنا يبعت لأختك عريس سكون ابن حلال كده
سلام

Asmaa mahaba يقول...

انت رايك كدا يا بطوط حاضر من عينى الاتنين ايوه كدا يا شيخ عدل التعليقات زى ما كانت

Asmaa mahaba يقول...

بطوط انت حاطط الميل يعنى حينفع للدليفرى
طيب سته كيلو برنجان من فضلك

Asmaa mahaba يقول...

طيب مفيش كارت ولا حاجه يمكن الواحد يحتاجك برضوا نموسه محتاجه طقم سنان ولا عيل من العيال اتكعبل راسه اتبطح
كارتك عليا خلص انت وقولى اعمليلى كارت يا سومه وانا اعملك كارت ميه ميه وارخص من المطبعه كمان ومش حاخد منك مصنعيه عشان تعرف بس المجدعه

Asmaa mahaba يقول...

هههههه تخيلت منظرك دلوقت وانت ماسك كروتك بتوزعها وتقول محسوبكم عجوه فى الخدمه ديما

Asmaa mahaba يقول...

الف مين اللى بتطالبنى بيهم دول تعالى فتش البيت لو لاقيت جونيه حلال عليك مش عاجب روح اشتكينى بس كدا بتوع القسم حيتلخبطوا يعنى منوفى ومنوفى طيب يجاملوا مين مصيبه ليقفشوا مواطن يا عينى ويدفعوه الفلوس

Mahmoud البطراوى يقول...

انت يا كابتن يالى بتلعب بطل لعب هنا عشان هنرش مايه

غير معرف يقول...

انت؟

انت ... تحفة ....هههههه


عارف؟

انا لو واحد صاحبك .. حاتصل بالعرسان اللى اتقدموا لاختك دول - و خصوصآ عمو العريس ضخم الجثة- و اوريلهم انت كاتب عليهم ايه

وابقى فرجنى بقى هاتفلت من ايديهم ازاى ... و ازاى هاتعرف تبتز اختك المسكينة تانى


ربنا ما يمكنك على حد ...هههههه

وبعدين سنة ماسكة فرشة اسنان ..وقاعدة على كرسى الصالون فاطسانة و بتكلم العريس .. ايه اللى متوقع منها ؟... بيتهيألى حضرتك متخيل الصورة

غير معرف يقول...

ربنا يفرح قلب اختك .. و يكتبلها السعادة طول حياتها

(:

Mahmoud البطراوى يقول...

بنت المسلمين

هو كان بوست جامد بس الله يسامح الرقابه
حذفته

ربنا يكرمك يااااااارب ويحقق امانيكى
--------------------------------------
ňįĝŗő

انت عامل ايميلين؟؟
انا برضه بستعمل الفايرفوكس
بس الناس عندها مشاكل فقلت اريح نفسى
وارجع كل شئ تانى
--------------------------------------
رصيف نمره خمســــــه

مهو مشفنيش الحمد لله

ربنا يحقق كل احلامك ياااااااارب

--------------------------------------
صاحب المضيفة

فكرتنى يا باشمهندس

ابويا له باقى من المهر مكنش خده قاله خدوا من اخوالك

ممكن
ربنا يكرمك يااااااارب ويرزقك
--------------------------------------
ست البيت

احنا منتظرين اخوكى يلاقى شقه
:P
هههههههههههههههه
اوعى يروح لحد تانى
انا لازم امارس طقوسى
وليكى انتى ديس كوند هناكل الفاكهه ونسبهم يتلكلموا
اوك؟؟

ربنا يرزقك زوج صالح يتقى ربنا فيكى
--------------------------------------
semsem

ربنا يكرمك يا سمسمه على الكومنت الصغير ده
--------------------------------------
Noha El-arabi

ربنا يستر
بس انا بقيت خبره واظن انى اسد فى الحديد دلوقتى
:)

--------------------------------------
بت خيخة وأى كلام

اصلك متعرفينيش
يا بنتى انا بلسم البت هتعنس لو فضلت تدور على عريس بنص موصفاتى
طب دا كفايه انى متواضع
:)

وتم ابلاغ النصيحه
ربنا يكرمك ويجازيكى خير عنها ان شاء الله
--------------------------------------
MY FATE

ههههههههههههههه
هتتكسف ولا هتخاف؟
شكراعلى الزياره


سومه...مجنونه فى بلد عاقل

لا مفيش دلرفيرى ولو فيه مش هوصل ليكى

وصممى ليا كارت يا سومه
انتى بقيتى سبعه صنايع ولا ايه؟؟

-----
انا هعرف اخد حقى منك ازاى
خافى ع نفسك
--------------------------------------
Helium Atom

فرشه ماسكه سنه؟؟

ولا سنه ماسكه فرشه
يا بنتى والله انا كائن حى
والله والله
بجد
صدقينى

واعى تتصلى بحد من العرسان انا كنت بس بهرج
احسن حد يروح بجد

ربنا يسعدك يااااااارب ويحقق امانيكى

هبة المنصورة يقول...

حلوة أوى التدوينه دى.. متقسمة ومتنظمة وبتوضح الدروس المستفاده من أكتر من قعده
ربنا يرزقها اللى يستاهلها.. وربنا قادر ودود حليم كريم.. ندعى احنا بس من قلبنا ونصبر.. بكرة تفرج.. ولما تفرج ابقى فرحنا معاكو

ابو اعصار يقول...

ههههههههههههههه
انا مش عارف اكتب تعليق من الضحك اسلوبك رائع
بس في حاجه ان كذا واحد بيقلي ان معظم اللي رايحين يتقدموا بيبصوا للسقف كان ضايع لهم معزه في السقف ايه السبب

فاتيما يقول...

أضحكتنى يا فتى
إيه يا يطوط شغل الإبتزاز الإحترافى دا
ما شاء الله
أنا بضم صوتى لصوت اختشى خيخة فى حكاية تييييييييثى دى ...
و بعدين هيا هتلاقى فى وسامتك و شياكتك و اخلاقك و الحاجات دى فين صحيح
ربنا يكرمها إن شاء الله
و يكرمك إنت كمان باللى يكتب فيك بوست بصفتك عريس أخته
تحياتى يا محمود و كتر خيرك ضحكتنى

ماء تشرين يقول...

جميله التدويينه ومعلش بقه ضريبة الاخوه
تحياتى

غير معرف يقول...

طبعا اكيد انت لمل تعرف مين اللي بيعلق هتطير من الفرحة


وبعدين هتقف مع نفسك وتقول ....ده مين اللي جابه هنا ده

مين اللي عرفه طريقى

وعلى ما تفوق من خواطرك الكتيرة دي
تبدأبقى تقرأفي التعليق

بس انا مليش تعليق اقوله

غير :-لو انت معملتش الكلام ده

تبقى مش محمود البطراوي اللي اعرفه

وخلينا على اتصال يا ريس
سلام

مها يقول...

ههههههههه
شكله احتلال فعلاً .. أنا بقول تعمل حركة مناورة وتفتح بلوج جديد كدة وكدة وتسيب المحتل هناك يعلق براحته وترجع لنا هنا تانى ..

=========
========
========

بالتلاتة آهو عشان الاختراعات ما تدخلش على بعضها.. ههههههههههه

كلبوزة لكن سمباتيك يقول...

خفة دم عالية و سلاسة و صدق

فكرتني بالذي مضى

تحياتي

ميرام يقول...

ههههههههههه
بجد تحفة اسلوبك ماشاء ااالله
المهم خلي بالك لحسن أختك تقرا البوست ...
ساعتها ياويل عروستك (:
هيبقى فيه بقى فحص شعر وأسنان ..
وكل االلي قلبها يحبه ..(:
تحيــــاتي لقلمك الساخر ..(:
ولك..

Asmaa mahaba يقول...

فليشهد الجميع لو مت او اتدهست او اطخيت او اتهرست او اتكعبلت او اتشنكلت ان بطوط هو الفاعل الحقيقى خد بالك يا بطوط انا ورايا رجاله ياكلوا عسليه اه انا بحذرك

بذرة امل يقول...

ربنا يرزقها يارب بزوج صالح
اهم حاجة يكون شبهك بالضبط اديها امل اكيد فى كتير ناس كويسة لكنهم مستخبين فى جزيرة لوحدهم هههههه

Mahmoud البطراوى يقول...

هبه المنصورى

دا بعض ما عندكم يا فندم مهو الواحد لازم يتعلم

والى يفرح الاول يفرح التانى اوك؟؟
:D

----------------------------------------
ابو اعصار

مجاش من الى بيبصوا فى السقف دول
لو جه حد هسألوهولك انت تأمر

ههههههههههههههههههه

----------------------------------------

فاتيما

ههههههههههههه
تفتكرى ممكن حد يكتب فى بوست
هو الى بنعمله فى الناس هيطلع علينا ولا ايه

:)

ربنا يستر

ربنا يكرمك ويخليلك يوسف وتفرحى بيه
ونشوف البوست الى فيه
:)

----------------------------------------
ماء تشرين

انا الى باخد ضريبه من هى
هههههههههههه
تحياتى ليكى

----------------------------------------
جمعاوى

ابو علاء الجامد
عرفت هنا منين؟؟ يا خلبوص
هههههههههههههه
وداخل تسيح كده ع طول

:)

----------------------------------------
مها

ما انا برضه عامل كده فى صفحتها

ههههههههههه
وحلو احترام حقوق الملكيه الفكريه

:) نورتينى يا احلى مها فى الدنيا

----------------------------------------
كلبوزه لكن سمباتيك

ربنا يخليكى دا من ذوقك بجد
----------------------------------------
ميرام

انا شفت مدونتك بجد تحفه
النت مهنج شويه ولما يفوق هروح اقلب فيها كلها
تحياتى لقلمك الرائع

---------------------------------

سومه

ولسه
:)
----------------------------------
بذره امل

ربنا يخليكى ياااااااارب

Dr ayman يقول...

ياريت حضرتك تزور الفهرس تانى للاهميه

اتمنى منكم الدعم للموضوع

http://kinawy.blogspot.com/2008/08/blog-post_11.html

دكتورة سنان يقول...

تؤتؤ عندنا النظام مش كده خاااالص مااالص .. عندنا مامة العريس بتيجى تعاين البضاعه الاول .. ممكن ودى فى مرات قليله تبقى جايبه المحروس معاها العرير يعنى والعروره بقى تدخل وهيا لابسه اللى ع الحبل وتفضل قاعده مؤدبه ومربعه ايديها ووشها فى الحيط قصدى فى الارض .. عن نفسى فى التلات مرات اللى جالى عرسان فيها قبل خطيبى الحالى كنت بقف ورا الستاره ابص بص وهما داخلين لو لقيت الواد مزه يعنى بدخل.. لو لقيته اى كلام بدخل بس ضاربه وش جبس ولو مامته واخده بالها من نفسها وضاربه شعرها ولا لابسه لبس مش من سنها بهررب بردو
وبس كفايه كده ايه الرغى اللى انا فيه ده

Lady E يقول...

ربنا يبارك ليك في أختك
ويقدرلها ولبنات المسلمين الخير

مها يقول...

هههههههههه
عامل كدة فى صفحتها؟؟!!!!!
بطوط مش بيسيب تاره ابداااا
جامد يا مان

ست البيت يقول...

بطوط ،،،

والله كل ما اقرا البوست اضحك ...
كده تبقوا متجمعين في اسكندرية وما اشفكوش
أمال لما إن شاء الله تتجمعوا في الحرم حتعملوا ايه ؟
حترموني من العبارة ؟
ولا تسلموني لممدوح اسماعيل ؟ ما هو كده كده حياخد براءة
تخونك علبة الجاتوووووو يا بطوط
مرة تانية محدش يقولي انكوا في اسكندرية
انت عارف البط في بلدنا بيتعمل فيه ايه...
ومن غير سلام هه
دمت بحفظ الرحمن

Hosam Yahia حسام يحيى يقول...

هههههههههههههههه

ماشاء الله اسلوب حضرتك جميل يادكتور

كل سنه وحضرتك طيب

Ahmed Fahmy يقول...

ههههههههه
بطوط حبوب ابو فرشة هه؟ مش اللي شفناه
:D
ههههههههههههه
ايه الكارثة اللي انا شفتها دي عايزة حد زيك
ههههههههههههه
ربنا معاها يا عم بطوط
قال حد زيك قال
هههههههههههه
ربنا يوفقها يا رب و تلاقي حد زيي انا
هههههههههههههه

بجد ربنا يوفقها و تلاقي اللي بتحلم بيه
تحيااااااااااااتي

حمامة يقول...

ههههههههههههههه

اول ما قريت البوست ده
افتكرت على طول يوم ما غراب جه البيت عندنا :D
كان يوم جبار ولا حد اتكلم ف اى حاجة
ولا حد عارف يقول نص كلمة
وف ثانية الفاتحه اتقرت ههههههههه

ربنا يرزقها الزوج والذرية الصالحة يارب :)

oRiGiNaL HeArT يقول...

انما انا بصراحه خفت اقول كلمه كده ولا كده يقوم يطربق الشقه
امى عماله تتكلم .. وانا عمال اتوسل لعم عصام ( امام المسجد ) - فى سرى -انه يأذن العشا بقى




بص هو من اول هنا وانا جاتلى هستيريا ضحك
استنى لما اقرا البوست بقى واجى اعلق
ههههههههههههه
ههههههههههههههه

oRiGiNaL HeArT يقول...

ربنا يكرم اختك ان شاء الله وتلاقى الانسان اللى بتتمناه ويقدر يسعدها

تعليقى بقى على البوست الكميل دة
<
<
<
هههههههههههههههه
هههههههههههههه
ههههههههههههه

Nairy يقول...

اولا===وقت العشا ممتدوطبعا ده مفيد عشان تبتذ اختك===

امووووت ف النصاحة دي...التوقيت رائع والابتزاز اكتر من رائع..اول مرة اسمع عنهم ....وحتة المفاوضات العينية دي كاتبها بحرفنة معلمين بصراحة ملعووووبة

ثانيا===وتستمتع بقى بانك تبص له وهو بيحاول يبص بطرف عينه ليها وانت بتكلمه صدقنى احساس بالغباء لا يوصف== =

لا وكل كلمة منك تقوله ..خليك معايا يا كابتن...انت يا عم بص ف ورقتك ...اللي هايبص جنبه هاندبسله العروسة ف هدومه وهو خارج ونعمله محضر غش....شكله قفا جدا ...لانه متوقع انه محدش شايفه وهو بيبص رغم ان كل اللي قاعدين مستنيين امتى هايبص؟...لا واختك بقى ايه ...هاتقولك دة قليل الادب بيبص ...ولو مش بص هاتقولك دة معندوش نظر ومش بيحترم شخصيتي ولا عاملي وجود ومش بيبصلي ليه وهو بيتكلم فاكرني كرسي؟


ثالثا===هو طولى حوالى اربع مرات والعرض عرضين ... اساسا هوا الكلام وهو خارج من بقه ممكن يكسر الشقه وكان بيتصل ياخد معاد .. بس صدقونى انا لو فى نص جسمه .. عمرى ما اخد معاد انا اجى وافرض شروطى كمان...هو اتصل بينا .. ممكن اكلم دكتور محمود===

فكرتني بمسرحية سك على بناتك....هذا هو الموعد المتفق عليه مع كريم بتاع ستة كيلو سمك وجمبري وعبد الموجود موجود؟...ومين فيكو ابو نادية؟...انا امها ..ايه؟...لا حنفي حنفي...حنفي هو ابو نادية ....روحي يا بنتي هاتي لعمك جيركن ماية وشوال السكر وكل الشاي اللي في البيت...وقمع عشان يعرف يشرب

ها بقى يا بطوط؟ نكشته ولا هو اللي نكشك؟


رابعا===اولا من غير ميعاد .. امى كانت فكراه من شكله كده واحد صاحبى بيته قريب مننا.. فمش لابس لبس خروج يعنى
فدخلته .. انا معرفوش .. لقيته

بس اديه بيحاول والغلاسه بقى انه اترفض تلات مرات .. اخرهم الجمعه الى فاتت===

كان جايب ف ايده ايه وهو رايح يخطب؟...اكيد بوكيه برسيم محطوط فيه تلت خيارات واكلهم لوحده قبل ما ينزل


خامسا===عشان تعرف انت تشرب العصير وتاكل فاكهه من بتاعه الضيوف===

والجاتون اللي بيبقى محطوط عليه يافطتين ....ممنوع الاقتراب او التصوير ...وممنوع لمس المعروضات

مش قولتلنا التجهيزات اللي بتحصل ف البيت ليه لاستقبال العريس المنتظر؟
اكيد حاجة كوميدي جدا بأسلوبك دة -فكرة بوست اهو ايدك على حتة بخمسة-

سادسا بقى بالنسبة لمواصفات سوبر مان اياها واهمها التواااضع- بأمارة التصويت الله ينور يعني-...فكرتني بالبوست بتاع وهيا بتنقي الايشارب

ربنا يوعدها بأيشارب ابن حلال تكون قماشته كويسة مش بتوبر ويكون من غير ترتر ولا خرز ولا خرج النجف ...عشان واضح انه هايتغسل كتيييير


سابعا كركعت ع البوست بعلو صوتي ولميت عليا البيت
الفكرة اللذيذة والاسلوب الرائع والعرسان التحف بذات اللي اترفض تلت مرات دة عجبني اوي ...ما تبعته نتفرج والنبي

تسلم ايدك يا بطوط محمود جرعة ضحك كبييييرة عادت بضغط الدم وفقعة المرارة الي معدلاتها الطبيعية

لما البوست تحفة كدة بالرقابة امال من غير رقابة كنت عملت فينا ايه يا دوك؟


تسلم ايدك تاني يا عم...لامؤاخذة ع الرغي

malakel-janna-paradise يقول...

جميل اوى و ربنا يرزقها الزوج الصالح و يكملك بعقلك و يرزقك بنت الحلال اللى تهديك

سلسبيل يقول...

----------------
سادسا : عيب اختى انها بتدور على حد بعقلى وذكائى ووسامتى وعبقريتى واخلاقى وتربيتى
... رغم انى غلبت اقنعها ان مفيش زيي بس مش عارف اعمل ايه؟؟
----------------
هههههههه لافعلا الله يكون ف عونها حقيقي مسكينه..لا حاول تقنعها انها ترضي باللي ربنا يبعتهولها وامرها لله بقي عشان لو استنت حد زيك هتستني كتير..

بص يادكتور محمود يابني
انت ممكن تاخد فيلم عريس من جهه امنيه
اتفرج عليه تلات اربع خمس مرات
وحاول بقي تطبق اللي عادل امام عمله ف شريف منير بالحرف
بس اهم حاجه
ماتعملش كده ف ضلفه الباب اللي انت قلت انه جالها ده
عشان ساعتها ممكن نخسرك وتبقي بطوط متعور مش حبوب
او لو حظك وحش..تبقي بطوط سابقا

وربنا يخليك لاختك ويخليهالكو..ويرزقها بابن الحلال اللي يستحقها ويفرحكو بيها

علي فكرة مدونتك عجبتني وشكلي كده هاجي هنا كتير
خاصه اني بحب بطوط اصلا..وهروح اقرا مجله ميكي بعد ماكتب الكومينت ده
تحياتي يادكتور

نهر العاص يقول...

االحمد لله ان اخويا نايم عشان ميقراش النصايح الكريمة بتاعتك(بالعين)
هههههههههههه ربنا يرزق اختك بالزوج الصالح اللى يصونها ويحافظ عليها