2008/08/10

خبر حلو .. والتانى على حسب

اعزائى المدوينين عزيزاتى المدونات ( حلوه الدخله دى ؟؟)

{عندى خبر حلو} ... و{خبر مش حلو, أو يكاد يصل لوحش عند البعض} ...... وقد يصل لروعه عند الاخر ..... ويبقى الاتنين- عنده - حلوين





ابدأ بأى واحد الاول ؟؟





انا بقول اخلى الحلو للاخر





الخبر الى على حسب ... ان اعمال السنه الى فاتت يا حلوين خلاص هترفع ... ومفاضلش غير اسبوع ... ربنا يٍطّلع على اعمال العباد فى الشهر ده

عن أسامة بن زيد رضي الله عنهما قال
قلت يا رسول الله لم أرك تصوم من شهر من الشهور ما تصوم من شعبان.. قال ذاك شهر يغفل الناس عنه بين رجب ورمضان وهو شهر ترفع فيه الأعمال إلى رب العالمين وأحب أن يرفع عملي وأنا صائم ... رواه النسائي والحديث صحيح





وللأمانه العلميه الاحاديث الى بتتكلم عن رفع الاعمال فى ليله النصف من شعبان ضعيفه بس فى كل الاحوال الاعمال بترفع الشهر ده وكل البلاوى الى عملناها والطاعات برضه هتطلع





ده الخبر الوحش او حلو على حسب كل واحد عمل ايه





الخبر الحلو بقى والى ممكن يغطى على الخبر التانى هتلاقوه فى الحديث ده

وهى ليله لا تلحقوا لا متلحقوش ...تناموا فيها انتوا احرار... تقوموا الليله كلها انتوا احرار برضه ... الى بياكل على ضرسه .. بينفع نفسه

الحديث اهو

قال رسول الله صلى الله عليه وسلم[ إن الله ليطلع في ليلة النصف من شعبان فيغفر لجميع خلقه إلا لمشرك أو مشاحن ] . ( صححه الالبانى)





هى ليله الجمعه .. الخميس بليل يعنى ..اوك؟؟!! ...تصوموا بقى 13,14,15 من الخميس للسبت وتقوموا ليله الجمعه

وامانه عليكم تدعولى ربنا يغفرلى



--------------------------------------

النهارده قابلت لاول مره فى حياتى مدون هو مصطفى (ساجى) صاحب مدونه (حلم وسط الضباب , ومدونه ازاز) مش هلاقى كلام اقوله عليه بجد شخصيه تتاكل أكل

اصلا كان فى حب من طرف واحد من زمااااااان ..... بس اخيرا حس بيا واتقابلنا وبجد شخصيه زى العسل

شكرا يا مصطفى على اليوم اللذيذ ده بجد وان شاء الله تترد الزياره


هناك 45 تعليقًا:

semsem يقول...

اول تعليق بحجز

semsem يقول...

الله يا بطوط جزاك الله كل خير
اجمل ما قراتلك بجد
ماشاء الله عليك واكيد كلنا صايمين وهدعى لك حااااااااااااضر امري لله بقى
:)
حلو اوى موضوع التعليقات ده
بجد حلو


جزاك الله خيرا ع التذكره ف ميزان حسناتك ان شاء الله
ويارب اعمالنا لما تترفع تشرف يارب اغفرلنا يارب

semsem يقول...

انا شوفت البوست اللى فات
بجد زاد احترامى ليك
ربنا يوفقك:)

kochia يقول...

اولا حكاية التعليق دي حلوة
هفكر اعملها

ثانيا بقي الموضوع جميل بجد والخبرين حلوين
جزاك الله خيرا

تحياتي

لماضة يقول...

يا خبر
قابلت حلم وسط الضباب
يا بختك يا عم طيب مش تقولي كنت بعتله معاك صينيه كنافه ولا حاجه
مشكرين يا عم على التذكره الجميله دي ان شاء الله صايمين معاك
ومدونة دكتور وائل بالصدفه انا شفتها امبارح ما شاء الله جميله جدا
وعملت التعليقات عندي كده عجبتني الفكره
مكنتش اعرف انك حاطتها هنا يا عفريت

ابو اعصار يقول...

اول زيارة لك صراحه مواضيعك متميزة وعجبني طريقه عرضك للخبر الاول
جزاك الله خير

ابو اعصار يقول...

والخبر الثاني عاوز له قعده لاحقا بشوفه

واحدة مفروسة يقول...

ازيك يا بطوط
انا لسة مش شوفت البوست اللى فات... اخبارك ايه؟؟؟
يا رب يغفرلنا جميعا و ينولنا كل اللى نفسنا فيه..على ان يكون اللى اللى نفسنا فيه لا يتعارض مع حبنا و طاعتنا لله
ان شاء الله حندعيلكك

صيدلانيه طالعه نازله يقول...

كل سنه و انت بالف صحه و خير و جزاك الله خيرا و انشاء الله حدعيلك و انت تدعيلى انى الاقى بنت تانيه تقعد فى الصيدليه بعد الندله اللى مشيت
و تكون امينه و كويسه
يللا بقى ادعى بسرعه

فاتيما يقول...

بطوطى
انا بشكرك
و بدعيلك
و بحقد عليك
بشكرك على التذكرة و ربنا يقدرنا جميعاً
بدعيلك عشان إنت إنسان جميل قوى و بتحاول تبقى اجمل و احسن و توزع دا على اللى حواليك
و بحقد عليك عشان شوفت مصطفى الروح الشفافة الحيرانة اللى بحس إنه زى إبنى كدا و بعتبره من اعز اصدقاء يوسف رغم إنهم ماشافوش بعض و لا أنا شخصياً شوفته و كنت بتمنى دا يحصل و محصلشى لحد دلوقتى ...
يا ريت لو بتكلمه ع الموبايل و لا حاجة تقوله فاتيما ام يوسف بتقولك أزيك يا غالى و عندنا لقاء للخير فى 19 رمضان للتبرع بإسم " بؤجة الخير " اللى فى مدونة بيكيا للبيع بتاعة آبى و قوس قزح ..
يا ريت يعمل فيا جميلة و ييجى أشوفه
لو مجاش خلاص
أنا عذراه
أصله روح حيرانة
و شفافة
و ربنا يبارك فيكما إنتو الأتنين يا محمود
و متنساش تدعى لإبن اختك الكبيرة بقى
الغلبان اللى إسمه يوسف
تحياتى يا حبوب

غير معرف يقول...

ماشى ياعم ... برده ربنا يكرمك
روز

ست البيت يقول...

سلام علكو با ابو البطابيط

جعل الله هذه التذكرة في ميزان حسناتك

appy يقول...

بطوط
الاخبار كلها جميله ربنا يكرمك
يا رب ويهدينى والاقى اسم تانى اسميك بيه ههههههههههههههه

كل سنه وانت طيب

سمر الشافعى يقول...

بالنسبه للخبر الاول فهوا مش حلو ابدا بالنسبه ليا وربنا يسامحنى على تقصيرى السنه دى

بالنسبه للتانى ربنا يكرم ونقدر نبقى من اللى هيتغفر ليهم فالليله دى بس متنسانيش يامحمود من دعائك وانت عارف هتدعيلى ب ايه

ربنا يكرمك على المواضيع الحلوه دى

تحياتى لبا
ربنا يكرمك على المواضيع الحلوه دى

تحياتى لبك

Nairy يقول...

ان شاء الله نصوم ونقيم الليل وندعي وربنا يتقبل ويغفرلنا جميعا

الحمد لله الصوم من العبادات السهلة جدا بالنسبالي والسهر بردو سهل ف الاجازة

انت ليك دعوة خصوصي عشان جمايلك اللي مغرقانا وانك كل شوية بتفكرنا بكل خير الحمد لله ...والله حسيت ان ربنا بيحبني وعايزني ابقى كويسة طالما كل كام يوم يخليني اقرا حاجة تفكرني بصالح الاعمال كدة
اول مرة اشوف في مدونة حد يعمل استفتاء عنها ويقول شفتوا انا متواضع ازاي...وف اخر الصفحة يقول القديم احلى وروح شوف بنفسك

بصمت بالعشرة ان المدونة اكتر من رائعة بكتير وان القديم احلى واحلى واحلى...كل اناء ينضح بما فيه ...المفروض تكتب بعد كل بوست حلويات كدة انه عمايل ايديا وحياة دقني بأمارة الداخلة التوحفة دي


كتر الف خيرك يا بطوط محمود

ادعيلك ربنا يزرقك بجارية تكون شيكولاتة ؟!!


D:

nour shahen يقول...

ربنا يبارك فيك ويجعل الموضوع الجميل دا في ميزان حسناتك يا رب
وجميل اننا دايما نفكر بعض ان مفيش وقت ويا رب نلحق نكتب حاجه تفيدنا قبل ان يغلق الكتاب ونعود الى التراب مش يفوتنا شعبان وبس
اللهم استرنا فوق الارض وتحت الارض ويوم العرض عليك وتقبل صالح اعمالنا واغفرلنا وارحمنا يا ارحم الراحمين

la Princesa ... WHiSPeR يقول...

انا جه

اولا البتاع بتاع التعليق ده لذيذ علشان النت بطئ اوى فمش هستني صفحه جديده تفتح

ثانيا جزاك الله خيرا على التذكره

ثالثا يا بختك اخدت ثواب كل الناس اللى كانت ناسيه :)

بنت المسلمين يقول...

سلام عليكم يا دكتور
احم
دكتور مناسبة اكتر بعد الصورة
الله يسامحك بقى
المهم

ربنا يكرمك يا رب على التذكرة
و يجعله فى ميزان حسناااااتك
مش تنسى تدعيلنا بقى

بطوط حبوب يقول...

semsem

اجمل ما قريتى لى ؟؟!! مدح ولا ذم
:)

شكرا على كومنتك
----------------------------------------------------
kochia
اولا سعيد ان طريقه الكونتات عجبتك انا مدين لدكتور وائل بالشكر

وجزاكى
----------------------------------------------------

لماضه

هو احتمال تشوفينا فى لقاء مدونين قريب قالى عليه انه برعايتك:)
----------------------------------------------------
ابو اعصار

ان شاء الله متنش اخر زياره وانا مستعد لاى استفسار
----------------------------------------------------
واحده مفروسه

ازيك يا مفروسه
بقالك كتير مش بتزورينى
:)
وبالنسبه للدعاء اللهم امين يااااارب
----------------------------------------------------
صيدلانيه طالعه نازله

كل سنه وانتى احلى واحلى
وتلاقى بنت او حتى شايب :)
ان شاء الله ربنا يحقق لك كل الى نفسك فيه ياااااارب
----------------------------------------------------
فاتيما

هسيب مصطفى يعلق
هو قالى انه هيعلق على كومنتك
----------------------------------------------------
روز
ويكرمك :D
----------------------------------------------------
ست البيت
وعليكم السلام
اللهم امين وينفعكم بيها
----------------------------------------------------
آبى

هههههههههههه اسم تانى ليا انا؟؟
طب حد يرد عليها بقى
هههههههههه
----------------------------------------------------
سمر الشافعى

مننساش ندعى لبعض
----------------------------------------------------
Nairy

بجد والله كل كلمه علقتى بيها عندى ادخلت فى قلبى فرحه
انا الى مدين ليكى بكتير وكتير اوى

هههههههههههه الاستفتاء جه كده عشان انا ديمقراطى ومش بحب اصادر الاراء

خلى الجاريه بينى وبينك مش كتير عارفين :)
----------------------------------------------------
nour shahen

يااااااارب يكرمك ياااااارب ويتقبل منك
----------------------------------------------------
la Princesa ... WHiSPeR

مبسوط انه عجبك
شكرا ليكى
----------------------------------------------------
بنت المسلمين

ههههههههههههههه خدى راحتك
هيليوم برضه اتصدمت وهى سبب البوست اصلا

Reem يقول...

بارك الله فيك على المعلومة القيمة دي

و ان شاء الله تكون طاعتنا غلبت سيئاتنا

سومه...مجنونه فى بلد عاقل يقول...

بص هو بالنسبه لرمضان كل عام وانت الى الله اقرب
وجزاك الله كل خير على الخبرين
بالنسبه للايميل مخبيش عليك مفهمتش اى حاجه بس برضوا جزاك الله كل خير
ملحوظه متحاولش تشرح تانى عشان مبفهمش بسهوله كدا
انا ليا ناس متخصصين فى الشرح ليا وبالهم طويل عليا هههههه مش اى حد يفهمنى
وجزاك الله كل خير
الا انت ليه غيرت التعليقات كدا كدا نصها مش باين عندى
تحياتى ليك سومه_87

ساجي يقول...

طايب

ساجي يقول...

الكومنت اللي فات ده كان بروفه
--
انا كنت عارف المضمون من بق بطبوط
بجد انت دماغ فقهيه ف السما
أمثالي مايعرفوش يتأقلموا معاها
كت بتلاحظ ده ف التتنيحه بتاعتي
بجد كان احلى لقاء تدويني حضرتو
انا بفكر أقطع العزله وأفقعك بوست تشريد
اه لو ليا أخت هجوزهالك ببلاش وربنا
-----
تجمع مدونين يعني تقطيع ف لحم مدونين بردو
لماضه وفاتيما ؛ جبنا سيرتكوا اوي
بكل خير طبعا
لماضه صنينه الكنافه وصلت متشكرين بجد
ونتقابل ف نادي الاطباء يا دكتره ان شاء الله
وطبعا هقضيها انا وبطبوط عند ستانلي بالليل
-----
فاتيما
كنت عندك من تلات تيام وقريت كذا بوست ورا بعض
ده عاده حميده جوايا لما بحن للوطن وأرض الام
ونزلت بعيني وقلبي لحد بوست التجمع الخيخاوي
قيت كل حرف ودمعت قولت ياريتني كنت معاهم
كان نفسي أشغل جزء من فرحتك اليوم ده اوي
كان نفسي ف سطر يقول ياريت مصطفى كان جه
بس ماعلينا انتي بردو ماما فاتيما
كلامك بلسم داوي كل جرح كان ف قلبي
وبعدين تعالي هنا يوسف ماعتش بينزل تصاميم ليه
انا عاوز أرغي معاه زي الاول
----
بطوط دونت تفتحت بقك انا بلطجت عل الصفحه
بس بجد انت كائن يـُشعر بالألفه أوي أوي
وكان يوم توحفه أصلا . مع اني صوتي مبحوح
بس ف وسط مجاهل قويسنا والغرزه اللي اترمينا فيها كان جو جميل بجد حبيتك أكتر من صاحبي الأنتيم
سلام بقه كفايه رغي ده بقه بوست مستقل

بطوط حبوب يقول...

Reem

ربنا يخليكى
وان شاء الله نكون اقرب لربنا كلنا
-------------------------------------------
سومه...مجنونه فى بلد عاقل

بصى يا سومه الايميل ميهمكيش انتى دا موضوع تانى خالص بجد

ودول الى كنت بشرح ليهم على فكره انا بتكلم بجد

معرفش بقى التعيقات فيها ايه؟؟
كل الناس عاجباها كده؟
هى عملت مشاكل عندك؟؟
مش فاهم منتظر الشرح :D

بطوط حبوب يقول...

ساجى
بص يا بوب انا قررت انى ارد على كل فقره لوحدها

--
الكومنت ده بقى مش بروفه دى اول فقره ركز

---

تعرف يا مصطفى بجد انا كنت ناوى انزل فيك بوست غزل عفيف
بس انت بتقول تشريد وانا شايف الشر فى عينك
فمن النهارده مفيش مدح
من النهارده فى تشريد

الى عايز يروح بركه السبع وبيدور على عربيه فى اتجاه مصر ومصمم انه ركب كده امبارح
المفروض ميجبش سيره التشريد دى على لسانه
ولا ايه؟؟
:D

-----
بتقول للماضه ايه ع الكنافه مش فاهم
لماضه انا مشفتش كنافه؟؟
الواد ده شكله كالها لوحده بجد

ان شاء الله اجى لقاء المدونين ده يوم التلات مع ساجى
بس هو الاتجاهات عندكوا سهله احسن يجى يروحنا يركبنا القطر الى رايح ليبيا ويصمم انه راكب كده امبارح

----
فاتيما
نص الكلام الى قاله مصطفى طول اليوم كان عنك
تفتكرى ليه؟؟
هو مفتقدك اوى
هو انتى بعدتى؟؟ الله اعلم

-----

والله يا ساجى انا صعب احب حد اوى كده من اول مره اشوفه
بس انتى حققت الصعب
اشوفك بقى يوم التلات
واعى تشرد لحد ما اشوفك
ربنا يخليك يا احلى مدون شفته

متفرحش اوى مشفتش مدون غيرك :D

ست البنات يقول...

شكرا على التذكرة يا بطوط
مسجات بأه علشان اللي عارف يفتكر ولي مش عارف يعرف
كل سنة وانت طيب

Heba يقول...

أولا كل سنة وأنت طيب

ثانيا جزاك الله خيرا

ثالثا بالنسبة للبوست السابق فعجبني جدا كلامك على نفسك وعرضك للموضوع وعجبتني فعلا نظرتك للأمور

تحياتي ليك وأتمنى أن كل الشباب يغهم جوهر الدين صح

رابعا وبالنسبة لموضوع ال 55 جنيه بتاع النت

فبص يا سيدي

في شركات بتقدم الخدمة وأكيد الراجل اللي عامل لك الوصلة مشترك في واحدة منها

فمثلا شركة TEdata بتقدم الخدمة دي وكل سرعة لها قيمة اشتراك شهري

وأقل قيمة هي 45 جنيه ودي للسرعة 256

وايجار الروترر بيكون 10 جنيه لما يكون فيه بورت واحد

يعني كله على بعضه 55 جنيه وبيكون فيه ليمت للتصفج والتحميل 2 جيجا بايت

وكل جيجا بايت ايضافي ب 10 جنيه

طبعا هي أغلى من الوصلة بس ميزتها أنك لوحدك على روتر ومحدش هيعمل عليك نت كت ويخنقك

ودي ميزة كبيرة

أنا شخصيا بفكر في الموضوع لإن الوصلة بقالها شهرين بايظة

سومه...مجنونه فى بلد عاقل يقول...

خانه التعليقات عندى مش ظاهر نصها يعنى بكتب ومش شايفه بكتب ايه بكتب كدا بالبركه فخمت ولانو

مواطن مصرى نايم يقول...

جامد الموضوع الاولانى اللى هو حلو جداااااااااااا
جدااااااااااااااااااااا
جزالك الله كل خير علية بجد رائع

اما بقى التانى فجامد جداااااااااااا
و بجربه اهوه

مها يقول...

بطوط

من فترة بافكر اننا نعمل جروب على الفيس بوك كمجموعة مدونين خلاص عارفين بعض وابتدوا يقابلوا بعض ;)
بجد هيبقى التواصل معاً ومتابعة انتاج كل مدونة بانتظام اسهل بكتير

يا ريت نعرف رأيك ورأى أصدقاءنا المدونين فى الفكرة
وأنا اول المتحمسين والمنضمين ليها فى حالة موافقة الأغلبية عليها
ويا ريت نبدأ بعدها فى اختيار اسم الجروب
ثم ندشن افتتاحه فى حفل مهيب
(ضليعة ف اللغة العربية انت عارف)

صاحب مدونة السعادة يقول...

عفارم عليك
اقصد جزاك الله خيرا
أول زيارة لي عندك
ذكرك الله بالخير
وأسلوبك عجبني أوي
شكرا على النصح في التدوينة
بس بصراحة
سأدعو لك على أمل أن تدعو لي...اتفقنا؟
أخوك:حبارير

بسنت يقول...

شكرا على التذكره يا محمود وربنا يتقبل منا ومنك ان شاء الله
كل سنه وانت بخير

حمامة يقول...

جزاك الله خيراً يا محمود :)
ربنا يرفع اعمالنا يارب ويتقبل منا
ويقدرنا ع الصيام يارب ويغفر لنا جميعاً :)

maha zein يقول...

ربنا يفيدك ذي ما فيدتنا
بس انا حسيت بالخوف
حسيت ان قلبي وجعني شوية
معرفش ليه
خايفة
كنت يمكن مقصرة السنة دي فى طاعة ربنا
بس ربنا بيرحم ويغفر
صح؟
انشاء الله خير
بردو شمة ريحة رمضان
الريحة حلوة اوي
وحسة بخير
بخصوص انك هتودي الحاجة لرساله الي عنكم
ده مش هيمنع انك بردو تبقه تيجي تساعدنا يوم الجمعة
يلا ربنا يكرمك
واشكرك علي المعلومات الحلوة
يمكن تكون سبب لان الناس تهتم اوي وتصوم
لان في كتير مكنوش يعرفوا الحديث ده
وبصراحة انا منهم
ربنا يكرمك ويعزك

عصفور المدينة يقول...

جزاك الله خيرا يا حبيب وبارك الله فيك الحمد لله ربنا فرجها

ايوية يقول...

جزاك الله خيرا وبارك فيك
وكل سنة وكل العالم بخير وسعادة وايمان

نوره الخشن يقول...

هيهيهيهيهيهييييييييييييييييي

حلوة لعبة التعليق الجديدة دي ياواد ياضكتور بطوووط .. لأ بجد عجبتني جامدة موووووووووز

بطوط حبوب يقول...

ست البنات

ان شاء الله
كل سنه وانتى طيبه
------------------------------
Heba

وانتى طيبه يا هوبه
وشكرا على الشرح التفصيلى بس 2 جيجا قليلين جدا

جارى الدراسه وبجد شكرا على الشرح
------------------------------
سومه

انتى الى قديمه
ال الانترنت اكسبلورر 6 ال
------------------------------
مواطن مصرى نايم

وجزاك
لو وقفت ودماك حاجه اسأل استشير
------------------------------
مها

نفرش الارض ورد ولا ياسمين
مها بذات نفسها عندنا
يا مرحبا يا مرحبا
فكره الفيس بوك دى موجوده بالفعل وفى جروبات كتيره اوى
انا ممكن ادلك على كذا جروب ان شاء الله
------------------------------
صاحب مدونه السعاده

اتفقنا
جزاك الله خيرا
------------------------------
بسنت

كل سنه وانتى بالف صحه
------------------------------
حمامه

وجزاكى

اللهم امين
------------------------------
مها زين

لازم تحسى بالخوف
ده شعور طبيعى
ربنا يسعدنا بالمغفره يااااااارب
------------------------------
عصفور المدينه

وجزاك
------------------------------
اويه
وجزاكى
------------------------------
نوره الخشن

يو ار ولكم

آخر العنقود يقول...

كل عام وانت بخير وطاعة
بلغنا الله واياك مان وهو راض عنا
فكرة البوست جميلة قوى ماشاء الله
والعنوان غير متوقع للى بعده
:)
بوركت اخى وبورك قلمك
وجزاكم الله خيرا
تقبل مرورى

NIDAAL PAL يقول...

بطوط حبوب : سمعت عنك كتير وقولت لازم اشوف المدونة دى
مع انى فاكر انى دخلت هنا قبل كدة .. المهم جزاك الله خيراً على البوست الجميل ده و نفع الله بك المسلمين و كل الادعية الى ممكن ادعيها ليك .. وربنا يجعلنا من عتقاء شهر رمضان يارب .. و فيه حاجة كنت عايز اكلمك فيها فى السريع كدة .. وهى صداقة الولد بالبنت .. انا مختلف شوية معاك فى النقطة دى بصراحة,لان فى رأى ان الصداقة بين الولد و البنت مافيهاش مانع مادامت هناك حدود و ظوابط و احترام للى ينفع والى ما ينفعش

NIDAAL PAL يقول...

و بالنسبة لللحية ربنا يبارك لك على تجميل و اعادة صورة الاسلام الاصلية التى هى الحب و التسامح و كل ده عن طريق خلقك وتصرفاتك و انت ملتحى بعدما شوه البعض القليل صورة الملتحين و المنقبات و المحجبات ورايى ان الاخلاق هى من اهم وسائل الدعوة مش انى اطلع اقول لا يجوز الخروج عن الحاكم .. طب مهو ساعتها هيبقى ده التخلف بعينه .. أهاا الظاهر انى خرجت بره الموضوع .. عموماً ربنا يبارك فيك و يثبتك وايانا

بطوط حبوب يقول...

NIDAAL PAL

اولا بجد شكرا للى سمعت منهم عنى ويارب يكون كان سماع خير

موضوع الصداقه بين البت والولد
ده الى اعرفه وممكن نتناقش فيه طبعا بس طبعا مش هيننع هنا

عمواما تحياتى ليك

ayman badr يقول...

قريت البوست اللى فات بجد كلام منطقى جدا يا محمود ويا ريت ناس كتير تفكر بالطريقة دى
وتانى حاجة انا قابلت مصطفى ساجى بجد شخصية لذيذة جدا مش باين عليه فى طب
جميل قوى اسلوبك فى طرح فكرة العمل الصالح
تحياتى

pinky يقول...

ana shoft el post da met2a5ar :(

غير معرف يقول...

Howdy! This is my first comment here so I just wanted
to give a quick shout out and tell you I genuinely enjoy reading your posts.
Can you recommend any other blogs/websites/forums
that deal with the same topics? Thank you
so much!

My webpage: move next