2008/09/18

الدور التامن ..... ان ان اااااااااااااااااه

طبعا انا مدين للكل بالاعتذار عن عدم متابعتى مدوناتكم طول الفتره الى فاتت .. بس طبعا انت عارفين ظروف رمضان.. وبصراحه انا كنت ناوى انى استمر فى الغباب لحد اخر رمضان بس حصلت ظروف هتخلينى اغيب اكتر من كده فقلت اجى اسلم عليكم واشرحلكم الظروف وهنيالك يا فاعل الخير والثواب

الموضوع ببساطه شديده هو انى بقالى فتره بدور على شقه .. مفروشه فى القاهره.. عشان بقى الدراسه
وكل ما اشوف حد اقوله ادعيلى انى الاقى شقه كويسه ورخيصه وقريبه وبنت ناس
وطبعا المعادله دى صعبه جدا .. واللمشكله ان معانا واحد كل ما نشوف شقه يقول ... لأ يا بطوط دى غاليه اوى .. عايزين حاجه ارخص.. وطبعا عينى وعينيه بتطلع فى اللف والتدوير والكلام مع السماسره


المهم بركه دعاكم .. وواضح انكم دعيتوا كتير اوى اوى خالص
لاننا لقينا شقه قريبه بالعرض .. بعيده بالطول

الشقه قريبه جدا من الكليه ( بالعرض)
انما هى  فى الدور التامن .. ومن غير اسانسير( ده الطول حضرتك)

فبعد ما عينى طلعت على ما لقينا الشقه ... دلوقتى بقى مش عينى بس الى هتطلع عشان اعرف اوصل للشقه
دا عينى ورجلى وكلى هيطلع اساسا

الموضوع
اننا رحنا للسمساسر قلنا طلبكم عندى
شقه شرحه وبرحه .. ومفروشه اخر احاجه .. وفى الدور الخامس .. ومش عايزه نص كلمه

يااااااااه ما انت كريم يااااااااارب اكيد دى بركه دعا امى

لتتحول الشقه البرحه الشرحه .. لشقه اوضتين ومفيش صاله
او صاله واوضه .. يعنى الصاله فيها سراير ومفروشه كأنها اوضه نوم
ويتحول الدور الخامس بقدره قادر ... الى التامن .. رغم انى مصمم انه العاشر

اتصل بامى اقولها تبطل تدعى .. هنروح فين تانى بعد التامن؟؟!!!
:)

بعد بقى ما اخدنا الشقه لقيت السمسار بيقلع كده الجلبيه فى الشارع
انا قلت هيعمل ايه؟؟
قالى يا دكتور عندى حبه وجعانى جدا متدينيش لها علاج

قولت له والله انا اسنان ... اسناااااااااااااااااااااااااان ....والمصحف اسنان .. لانى اتعقدت اسنان
قالى مهو انتو برضه بتبقوا عارفين

قلتله لا مش عارفين .. لما يجى دكتور محمد ابقى اسأله ( دا محمد زميلى .. بس ممكن يفتى شويه .. اهو يعرف اسماء ادويه على الاقل 

المهم طبعا الشقه مفيش فيها كمبيوتر ..واكيد انا مش هنزل ال 8 ادوار عشان اروح نت  .. انا اه بحبكم بس الصراحه مش للدرجاى


:)

اضافه ان السنه الجايه دى بجد بتمثل لى اهميه خاصه .. ويكاد يكون متوقف عليها انا هشتغل دكتور .. ولا هشتغل اى حاجه تانيه
وده بجد

دعواتكم لى فى العشر الاواخر بقى جامد
وربنا يعينكم يااااااااااااارب
وان شاء الله هتواصل مع الناس الى اعرفهم بس هبقى مقل شويه سامحونى ... وبنا تليفونات للناس الى اعرف رقمهم .. والى عايز رقمى يبعت ميل بقى :)

سلام 
 

هناك 35 تعليقًا:

AHMED SAMIR يقول...

الف مبرووووووووووك يا دكترة
معلش بقى التامن رياضة برضة
تحياااتي

محمد فاروق الشاذلى يقول...

إن شاء الله تعدى السنة اللى فاضلة دى على خير وتبقى دكتور كبير ويبقى عندنا واسطة لأسنانا.
والدور التامن دى مشكلة قوى أهى رياضة برضو وربنا يكرمك إن شاء الله

مها يقول...

مبروووووووووك يا بطوط

معلش بقا الحلو ما يكملش
ما هو مش معقول ف مصر هتلاقى كل حاجة جامدة آخر حاجة بالطول وبالعرض :)))


وأكيد كلنا هندعيلك فى العشر الأواخر وعلى طول ان شاءالله..

ربنا يكرمك ويسعدك وتحقق كل اللى بتحلم بيه

Princesa ... WHiSPeR يقول...

ياعيني يا بطوط
التامن مره واحده
بس المهم العرض سيبك من الطول ده هتنزل هي مره واحده بس فى اليوم
مبروك على الشقة وان شاء الله تطلع وشها حلو عليك فى الكليه وتعرف ذاكر فيها بنفس
:)

Sourah يقول...

اخي الفاضل بطوط ..

ماتتسورش فرحتي اد ايه لما لاقيت بوست جديد منك ، وكل اما اشوف البوست اللي فات ، افتكر انك معتزل التدوين عشان رمضان ، ادعيلك و اقول ربنا يعينك.
فرحت اوي بأخبارك دي ، واضح ان الوالده كانت بتدعيلك ربنا يعلي مراتبك ..
انت بأه الفترة الجاية تديها فيتامينات ، و ابقى حط كرسي في الدور التالت , وممكن كنبة على الخامس ،تاخد بأة السلم واحده واحده..
و على فكرة خللي بالك من البواب ، الموضوع لو بدأ كده اعرف انكو مش هتخلصوا ، قال على رأي المثل : من ورا الفلاح طريق بابه يا طول عذابه :))

لا طبعا بهزر ، دي عون للغلابة ، و كمان تجرب عمليا المستقبل و الكشف و لوازم الدكترة بأه ..
ربنا يعينك و يوفقك ، و يسدد خطاك ، وشد حيلك ، عشان يشرف الاطباء لما ينتسب ليهم دكتور مسلم فاضل زيك ..

و اخر الكلام سلااااام ..!!

(احمد سكر ) يقول...

ربنا يوفقك يادكتره

وخالى بالك

انا مستنى الشهاده بفارغ الصبر

عاوز احشى ضرسين

دمت بكل الود

احمد سكر

غير معرف يقول...

السلام عليكم بطوط باشا

والف مبروووووووووووووووك الشقة يا باشا وربنا يعينك يارب وبدل قريبة من الكلية يبقى كله يهون ان شاء الله انا موجود ى الكلية من السبت هاشوفك واللا ايه؟

دمت لنا بخير وطبعا انا مش هاقولك اسكن معاك هههههه ده التامن ياعم

يلاسلام

Maha Shahen يقول...

الف مبروك على الشقه والاستقرار وكان الله فى عونك بجد انا لما كنت برجع تعبانه كنت بزهق اطلع الدور التانى فما بالك بالثامن بجد انا حاسه بشعورك جدا
بس مش خايف ندعيلك للدراسه تطلع زى الشقه هههههههههههه
ربنا يوفقك ويكرمك ويقويك الفتره الجايه وتحقق كل اللي تتمناه من كل الخير واكتر يا رب
هتوحشنا اكيد ولكن ليك عذرك وهننتظرك ترجع لينا متفوق كعادتك

خالص ودى واحترامى

Asmaa mahaba يقول...

ازيك يا بطوط
انصحك تنزل فى سبت خضار حيكون اسهلك او تتعلم الطلوع على المواسير
عموما هو باين السنه دى حتكون اعتقال لكل الناس يعنى كلنا حنتهرى ربنا معاك ويهديلك الحال

Nairy يقول...

احنا نقلب ف القديم اللي احلى وروح شوف بنفسك وامرنا لله بقى

:)

شد حيلك ..ولو نفسك اتقطع جربوا السبت...حطوا جنزير بدل الحبل والسبت بيستحمل وبيشيل مش تقلق...انت وصاحبك تتفقوا انت تروح الكلية يوم واليوم التاني تشد اخوك وهكذا والتقدير اقسموه بالنص

D:

بالتوفيق يا بطوط محمود

صاحب المضيفة يقول...

الدور التامن احسن من الأول يا بطوط باشا



ربنا يعينك على طلوعه بقى


:D:D:D:D:


سلام يا جميل

دعاء مواجهات يقول...

والنبى ياابنى قاريه البوست من امبارح

بعد ما نزلتوا بنص ساعه
بس النت وعمايلو بقى

عموما

ربنا يعينك ياعم بس انت طلعت ....

ولا بلاش بقى هو لاواحد هيشتم فى نفسه

بقى مش هاين عليك تنزل تروح سيبر علشان لامدونين حبايبك

ابقى اسال وطمننا عليك ديما

يادكتور

بس الاقوللى

انت متأكد انو العااشر....

ههههههههههههههههههه

حلوة حتة اتصل بأمى أقولها تبطل دعا دى

بقى دى اخرتها مع الست الطيبه

مااشى انا حقولها

..........

سلااام

HeBa يقول...

ربنا يعينك

وإن شاء الله يكون عام دراسي موفق

وتحقق كل اللي بتتمناه

شد حيلك يا دكتور

ما يطلعها إلا رجالها

رمضان كريم

هبة المنصورة يقول...

مبروك الشقة يا محمود
ولو إن أنا عارفه يعنى ايه تبقى ف التامن ومفيش غير السلم تطلعه.. أصل احنا ساكنين ف التامن ولما الأسانسير بيعطل بنحاول ننزل مرة واحدة ف اليوم نجيب فيها كل حاجه وبعدهاننعزل عن الدنيا تحت

شكراً على كل تعليقاتك فى مدونتى.. ومعلش قفلت التعليقات لإن الواحد عايش يومين كده مع نفسه ومش فاضيه أرد.. باقول أولى الواحد يتفرغ للعبادة فى الأيام الجميلة دى.. ماتنسناش فى دعواتك.. وربنا يبلغنا ليلة القدر.. قول آمين

Unknown يقول...

ههههههههههه
ربنا يوفقك مبروك على الشقة
وصدقنى ممكن يكون لها فايدة 0000
نفسك يطول شوية ههههه
ربنا معاك وبالنجاح ان شاء الله
رمضان كريم

اسكندراني اوي يقول...

المهم انك لقيت حاجه واهي طلعه واحده للتامن في اليوم ما تضرش
ربنا معاك ويقويك وعاوزين نسمع عنك كل خيييير

Fahd يقول...

طيب ادعي بقي للي لسه مش لاقي حته شقة

واهو انت بقيت من الناس اللي فوق

غير معرف يقول...

سلام عليكم
على فكره مش هتقدر تغيب كتير عن هنا
كان غيرك اشطر
وبعدين انت قلت قبل كده انى مش هاجى كتير وبتروح شويه وبترجع تانى
ربنا يوفقك ويبلغنى واياك ليله القدر

هوه صحيح السنين اللى فاتت كنت بتبقى فبن ايام الكليه... اصل كنت بتدخل وبنشوفك عادى ايام الدراسه ايه الجديد يعنى السنه دى؟

سارة درويش يقول...

هههههههههههههههههههههههههه ع فكرة انا اختى لما بتدعي لحد الدعوة بتيجي بالعكس فبقولها دايما تنسى ان ليها اخت لما تيجي تدعي هههههههههههههههه .. الله يكون في عونك ع فكرة هتتعب في الاول بس لما رجلينك تتعود ع المشوار ان شاء الله هتحسها عادي جداً وبعدين دا كويس علشان ما يجيلكش ضيوف كتير اريح لك بجد ههههههههه

Miss. Sosa يقول...

يا نهار ابيض الثامن !!

لا ده صعب اوي اوي اوي

هي شقة ذات حدين

اولا هتبقي في العزلة فوق وهتكسل تنزل فهتقعد تركز وتذاكر

بس انت مضطر يوميا تقريبا تنزل علشان الكلية والتامن ده صعب اوي اوي


عموما الله يعينك ويمكن ربنا اراد لك كدا علشان يقطع عليك كل الطرق للهروب من المذاكرة

ربنا يوفقك وتطلع طبيب مش دك تور

ســــــلام

اهو ده عيبه يقول...

ازيك
ربنا يوفقك يارب ويجعلها سنة خير ونجاح
ومعلش استحملوا الدور الثامن ربنا معاكم
وان شاء الله متغيبش علينا كتير

صيدلانيه طالعه نازله يقول...

كل سنه انت طيب يا بطبط
بقى بتقول انا بحبكم اه بس مش للدرجه دى ماشى يا عم على الشهامه الجامده دى و ربنا معاك انشاء الله السنه دى و تبقى بتاع سنان قد الدنيا
سلااااااااااام

Mona Shereif يقول...

كل سنة وانت طيب يا بطوط
معلش انا جيت متأخره
هو انت خلاص استقريت فى الشقه بتاع التامن دى خلاص؟
ربنا يوفقك
فكرتنى لما كنت بشتغل فى المدرسة واوضة الكمبيوتر فى السادس
هههههههههههههههههههههه
ايااااااااام
خير

المهم كل سنة وانت طيب

مها يقول...

كل سنة وانت طيب يا بطوط
كان عندى امل تعبرنا قبل العيد

واضح ان الدور التامن أقوى من الصداقة وأقوى من الأيام ..
هههههههههههه


عيد سعيد يا بطوط حبوب

Noha El-arabi يقول...

يعني هو انا ارجع التدوين تمشي انت
احنا حنعد نجري ورا بعض
انت غريب... غريب يا محموووووود
انا خايفة بس شبابك يروح في الدور التامن يا ضنايا و ترجع تدون متلقيش حيل
عموما ربنا معاك، مصلحتك اولا طبعا
زي بتوع الضرايب كده
بس برده حترجع يا باشا
كان غيرك اشطر
ابقي فوت في اي وقت بقي انت عارف العنوان
:)

HeBa يقول...

كل سنة وأنت طيب

عيد سعيد عليك إن شاء الله

والسنة الجاية يكون ربنا تاب عليك من الدور التامن

nigro يقول...

ابو البطابيط
إزيك يا دكترة
أخبارك إيه؟
كل سنة و انت طيب
التامن يا محمود؟
التامن
عادي يعني و فيها إيه؟
طيب ما أنا هاسكن في الدور الأول
شفتني اشتكيت ولا قلت بم


كل سنة و انت طيب يا محمود
تقبّل الله منا و منكم



يلا سلام

ست البيت يقول...

كل عام انتم بخير يا ابو البطابيط
مبروك على الشقة
يارب عقبال التخرج والجواز قادر يا كريم اجوزك انت واخويا العكروت في يوم واحد
عموما ابتعلي تلفونك نطمن عليك
marwa.elswify@gmail.com
وربنا يوفقك وتلفوني على الفيس بوك

كل عام وانت بخير
دمت بحفظ الرحمن

Asmaa mahaba يقول...

انت ايه كل دا محبوس فى الدور التامن يادى الخيبه يا بطوط

mostafa rayan يقول...

عيد سعيد وبالتوفيق يا نجم

Mahmoud البطراوى يقول...

احمد سمير

شكلك فرحان فيا يا دكتره
لنا الله
:)

*******************
قلب مصرى

ربنا يخليك ياااااااااارب دايما تصبرنى

******************

مها
ربنا يكرمك يااااااااااااااااااارب وكل سنه وانتى طيبه
*****************
la Princesa ... WHiSPeR

ربنا يخليكى يااااااااااارب واهو الصبر مفتاح الفرج

******************
Sourah

كومنتك من اكتر الكومنتات الى بتسعدى

دمتى رائعه

*************
سكر

اصبر انت بس

:)


جمعاوى

وعليكم السلام انا عايز حد يسكن معايا
غلاسه بقى
*******************
nour shahen

انتوا بتحشونى اكتر والله ومش بقدر اغيب كتير بس الظروف
معلش
****************

سومه...مجنونه فى بلد عاقل

الوحيده الى حاسس انها فرحانه فيا
:)

***************
Nairy

القديم والله احلى بجد انا نفسى مش عارف اكتب زيه تانى

بالتوفيق

****************

صاحب المضيفة

شكلك فرحان يا خالو

*******************

دعاء مواجهات

اتحسبتلك اولى ولا يهمك

******************

Heba
ربنا يخليكى يا ياااااااااارب

**************

Mahmoud البطراوى يقول...

هبه المنصورى

شكرا على تعليقاتى

يا بنتى انتى الى شكرا على انك انتى بجد


*************

نهر الحب

نفسى هيطول امممممممممممممممممممم تصدقى احتمال؟؟

:)

هههههههههههههههههه

********************
اسكندرانى اوى
شكرا يا باشمهندس ربنا يخليك لينا يااااااااارب ويكرمك دايما

***************

fahd

ربنا معاك

************
روز

السنوات الى فاتت مكنش فى مدونه .. مجتش غير اخر سنتين
السنه الى فاتت كنت فاضى جدا والى قبلها كنت عامل عبيط وعشان كده فضيت السنه الى فاتت

كل سنه وانتى طيبه
**************

سمو الأميرة سارة

هههههههههههههههههه حلو الدعوه بالعكس دى
احسن ما تيجى بزياده
:)

******************

Miss. Sosa

ربنا يخليكى ياااااااااااارب ويعنى

*****************

اهو ده عيبه

ربنا يوفقك دايما ياااااااااارب


*****************

صيدلانيه طالعه نازله

نفسى اخدكم رحله من الدور التامن للارض عشان تعرفوا يعنى ايه التامن

هههههههههههههههههههههه

ربنا يكرمك يااااااااااارب بس بجد غيابى مش بايدى

*****************

Sometimes

كل سنه وانتى طيبه

لا لحد الان مستقرتش فيها ربما جد فى الامور امور ربنا يسهل

***************

مها

الدور التامن اقوى من الصداقه

لكده للواحد هيختفى
:)
كل سنه وانتى طيبه

****************

Noha El-arabi

انا مش عارف ادخل مش غايب بمزاجى

*****************
ňįĝŗő

كل سنه وانت طيب وفعلا بتتعب ربنا معاك

هههههههههههههههههههههه
************************
ست البيت

كل سنه وانتى طيبه
وجارى ارسال الرقم


*****************
سومه
محبوس حبسه سوده لنا الله

*******************

مصطفى
وانت طيب

حمامة يقول...

انا اه بحبكم بس الصراحه مش للدرجاى


هههههههههههههه

صريح صريح يعنى

ربنا معاك يارب ويوفقك وتخلص على خير
وتبقى دكتور كبير

:)

أحلى حياة يقول...

ههههههههههههههههههههه

"شقه قريبه بالعرض .. بعيده بالطول"
جامدة اوي دي بجد
D:D:

وصحيح خلي طنط توقف الدعاء فورا، طبقة الاوزون مش ناقصه
D:D:
كفايه ماتبسطهاش اكتر من كده ههههههه

غير معرف يقول...

Magnificent beat ! I would like to apprentice while you amend
your website, how can i subscribe for a weblog website?
The account helped me a appropriate deal. I were a little bit
familiar of this your broadcast provided bright clear concept

Also visit my page: page next