2011/01/22

بحبك يا ريس


يا ريس انا حبيت اكتبلك كلمه حب .. كلمه حب خاليه من النفاق ومن التزويق .. حب حقيقى وربنا الاعلم .. حب مش عشان الضربه الجويه ولا السياسات الرشيده ولا حتى حب عِشره ..  حب مش فردى دا حب بيشاركنى فيه مئات المصريين اللى بيركبوا المترو كل يوم .. مش حب عشان المترو انشأ فى عهدك يا ريس .. مش بقولك حب ملوش اى علاقه بالمصلحه .. لكنه حب نوع خاص.
عارف انت يا ريس شعور المواطن اللى ركب المترو من اى مكان .. والمترو زحمه موووووت .. ومن جواه قلبه بيدق وبيهتف باسم مبارك .. ايوه مبارك المحطه .. يووه قصدى محطه مبارك .. المحطه اللى هينزل فيها ناس كتير اوى زى ما يكون التتار نازلين من المترو ..وبالتالى احتمال كبير كرسى يفضى .. وبكده المواطن اللى واقف بقاله عشر محطات مثلا ورجله ورمت  بيستريح ويقعد بعد يوم تعب طويل .. عارف انت يا ريس لحظه ما بتظهر محطه مبارك .. الناس كلها بتفرح اوى ومن جوه قلبها بتحب مبارك .. المحطه.
سامع واحد بيقولى مهو يا فالح المترو بيرجع يتملى تانى فى نفس المحطه .. احب اقولك يا ريس والشهاده لله ودى سمعتها بودنى والله ... اول ما الناس نزلت من المترو والمترو فضى لمده ثوانى لحد ما الناس تركب .. اول ما فضى سمعت واحد بيقول ربنا يخليك يا مبارك .. واول ما اتملى تانى سمعته بيقول الله يخرب بيتك يا رمسيس**. .. الناس بقت تعشق مبارك المحطه (والانسان) .
تعرف يا ريس الناس مبتزعلش ان لو عدد المتروهات زاد واعطالها قلت ومواعيدها اتظبطت .. مش هيبقى فى زحمه فى مبارك قصدى فى محطه مبارك ..الناس بتنسى دا .. ومش بتفتكر غير انها اخيرا لقت كرسى تستريح عليه .. والكرسى دا لقته فين غير فى مبارك .
مره شفت واحد كان بيكلم حبيبته , خطبيته , اى حاجه فى التليفون .. وواضح انه كان نفسه يقولها انه بيحبها ..حس فى لحظه شوق وهو بيسمع صوتها انه عاوز يقولها بيحبها .. بس المترو كان زحمه وكان مكسوف يقولها كده ادام كل الناس .. سمعته يا ريس وهو بيقولها بحبك فى الكام ثانيه اللى وقف فيهم المترو فى محطتك .. وشفته بيبص على اسمك اللى مكتوب فى المحطه وبيتسم وكأنه بيقولك شكرا
متقلقش يا ريس .. الواحد دا مفكرش فى انه محتاج شغل بمرتب كويس عشان يعرف يتجوز البنت دى مفكرش فى العيش ولا فى السكر ولا فى اى حاجه غليت وصعّبت عليه المهمه وطولت عليه المشاور.. مفكرش انه محتاج يوفرلها حياه كريمه .. متخافش يا ريس هو مزعلش منك .. انا عارف ان كل اللى كان محتاجه انه يقولها بحبك ..وقالها فى مبارك  ثم هو الناس خدت ايه من الجواز ..كفايه اوى انه قالها بحبك وانه معرفش يقولها غير لما انت جيت .. ايوه مبارك المحطه

وفاكر شكلى انا وانا شايل البالطو الابيض كل يوم .. ورايح الكليه .. فاكر انى كنت بفرح اوى وانا بقعد فى محطه مبارك .. فاكر انى كنت بحب مبارك المحطه  .. عمرى ما فكرت انى هخرج من الكليه فاكتشف ان تلت تربع دول العالم عاوزانى اعمل معادله عشان مش معترفه بشهادتى ولا بوقوفى فى المترو كل يوم .. وحتى لو كنت فكرت فى دا برضه كنت هفرح بقعودى فى المترو كنت هحب اسمك كل اشوفه وربنا يبقى يحلها لما اتخرج

وبنات كتير فرحت لما جت مبارك المحطه .. كان فيه ولد قليل الادب بيتحرش بيها .. ولما جه مبارك المحطه اتخلصت منه ..اما انها نزلت او هو نزل .. وفرحت اوى لما جه اسمك .. فرحت فرح حقيقى .. ومفكرتش ان لو فى قانون الناس بتحترمه مكنش فى شخص تجرأ على كده .. مفكرتش غير فى ان حبها ليك زاد لانك خلصتها منه .. من غير ما تعمل حاجه .. غير انها جت فى مبارك المحطه.
وواحده ست اتخطف منها كيس فى مبارك والحرامى جرى .. ولقينا الست بتموت من الضحك .. الكيس مكنش فيه غير سندوتشات والحرامى فكر انه فيه فلوس لانه كان ملفوف بشكل يوحى انه فيه فلوس .. الضحكه دى مجتش غير فى مبارك ..وطبعا محدش فكر ان الحرامى دا كان ممكن يسرق حاجه بجد مستغل الزحمه الرهيبه والامن القليل .. الناس ضحكت وفرحت ودا محصلش غير فى مبارك
عارف يا ريس وانا راكب القطر ورايح اسكندريه .. كان جنبى شخص غلس جدا جدا .. كان نفسى جدا ينزل .. وخطر فى دماغى انى محتاج دلوقتى مبارك .. والوحيد اللى جه فى دماغى فى اللحظه دى .. قلت لو مبارك هنا كان احتمال كبير الراجل دا ينزل فى المحطه واستريح منه .. وتصدق وتؤمن بايه .. انه لما نزل فى طنطا كان نفسى يغيروا اسمها ويسموها مبارك .. عشان يفضل طول العمر مرتبط اسمك عندى بالراحه من اى شخص غلس يغلس عليا فى المواصلات.

فى مبارك مليون فرحه حصلت .. ومليون ضيق اتزال ..اه البلد حالها متعدلش .. لكن على الاقل الناس استريحت ولقت مكان تقعد فيه.
وعشان كده يا ريس حبيبت اقولك كلمه وفاء .. انا بحب مبارك .. مبارك المحطه
وكان نفسى أسألك مبارك المحطه تحب تقول ايه لمبارك الانسان :)
** محطه مبارك بتطل على ميدان رمسيس .. وعشان كده فى ناس بتسميها رمسيس

هناك 21 تعليقًا:

Ramy يقول...

هههههههههههههههههههههههههههههههههههههههههههههههههههههههههههههه

تصدق نظرية برضه

ربنا يخللنا مبارك المحطة (:

صيدلانيه طالعه نازله يقول...

مبارك المحطه و لا مبارك البلد
حدد لو سمحت
تصدق ضحكتنى وانا مش كان ليا نفس

mrmr يقول...

هههههه
ربنا يديم المحبه (:

شمس النهار يقول...

هو كمان بيحبك اكيد

ومش انت بس بيحبنا كلنا

بس تصدق علي رأي رامي نظرية برضوا

أع ـقل مـ ج ـنـونــة يقول...

تصور ....
نظرية تحترم ^_^

لماضة يقول...

فقري

شوارعي يقول...

فعلاً أنت وضعت إيديك على مصدر فرحة للعشب المصري الأصيل...
والمفروض كلنا نقول دلوقتي بصوت عالي
"بنحبك يا مبارك" :...المحطة :)

موقع البوابة الالكتروني يقول...

تحية:
تمت الإشارة إلى هذه التدوينة على موقعنا على الرابط التالي:
http://bit.ly/h8TT5y

فاتيما يقول...

يا خرااااااااااشى
يا لهوى
عليك يا محمود
ليه كدا بس يا بنى ؟!!!


اهو كل ما هنزل المحطة دى
هفتكر التدوينة دى
واضحك لما الناس كلها
تقول عليا مجنونة ويودونى العباسية عجبك كدا ؟!!!!


خلاث مليش دحوة هقولهم
ان الدكاتور نحنود ابو البطابيط
هوه السبب ف المخولة دى
فيسيبونى علطوووووول
صح؟!

:)))))
ربنا يسعدك ويفرح قلبك يا شيخ

غير معرف يقول...

لاء لاء لاء معجبنيش...طلعت اوت منك المره دى

روز

غير معرف يقول...

لاء لاء لاء معجبنيش...طلعت اوت منك المره دى

روز

امل يقول...

عمرى ما فكرت انى هخرج من الكليه فاكتشف ان تلت تربع دول العالم عاوزانى اعمل معادله عشان مش معترفه بشهادتى ولا بوقوفى فى المترو كل يوم .. وحتى لو كنت فكرت فى دا برضه كنت هفرح بقعودى فى المترو كنت هحب اسمك كل اشوفه وربنا يبقى يحلها لما اتخرج
------------------------------
حتي عندكم .. يا مصر .. إحنا كنا بنستورد التعليم منكم (اليمن)..
طبعاً إحنا استوردنا .. وطورنا..
لذلك قريباً سيتخرج طالب الثانوي وهو ينافس الأمي في عدم القراءة و الكتابة ..

امل يقول...

مبارك .. له معزة .. وغلااااااااااااوة خاصة .. وطبعاً بعد المقال زادت هذه المعزة
=========================
صدقنى انت ..
مش مضطر تجاملنى .. لانى عارف نفسى .. فمش هصدقك

ولا مضطر تثبت حضورك .. لان عداد المدونه .. كده كده رصدك

فلو هتعلق عندى -ارجوك- قول كل الى فـ نِفسك

-------------------
أنا كان نفسي أقول أن بطوط فعلاً حبوب .. بس خلاص بطلت
..ولا يمكن إني فعلاً قلت !!

لاتــــي Lati يقول...

زي عادته بطوط الحبوب..
وجهة نظر فيها نظر..
اصل بعد كدا ميش حاينفع نستحمل
الاسم دا أكثر من كدا.
فيه شي استغفر ربي، بيفور الدم
ومابيطنمشي خالص.

خلاااااااص
فور دمي اهو اوام ..

Mafrousa يقول...

هههههههههههههههه
عيد مبارك يا محمود
ههههههههههههه

غير معرف يقول...

ثقافة الهزيمة .. أنها حقا عائلة محترمة‏

فى 6 فبراير 2011 نشرت شبكة الأخبار الأمريكية CNN كشفت صحيفة الجارديان البريطانية نقلا عن محللين مختصين بشؤون الشرق الأوسط قولهم أن ثروة الرئيس المصري حسني مبارك بلغت نحو 70 مليار دولار، جزء كبير منها موجود في بنوك سويسرية وبريطانية، أو على شكل عقارات في لندن ونيويورك ولوس أنجلوس، أضافة إلى ممتلكات خاصة على طول شاطئ البحر الأحمر، وقال تقرير أن المصدر الرئيسي لهذه الثروة هو أطلاع الرئيس على صفقات أستثمارية حققت مئات الملايين من الدولارات لمصر، ولهذا تم نقلها إلى حسابات سرية في بنوك أجنبية، أو أستثمارها في البورصات العالمية والعقارات، وأكد التقرير أن علاء وجمال مبارك هم إيضا من أصحاب المليارات، ونقلت الصحيفة عن أماني جمال، أستاذة العلوم السياسية في جامعة برينستون، قولها أن ثروة العائلة تتراوح ما بين 40 و 70 مليار دولار، وهي أرقام تقارب ثروات بعض من زعماء دول الخليج، الغنية بالنفط...

باقى المقال ضمن مقالات ثقافة الهزيمة بالرابط التالى www.ouregypt.us

VÖltaa يقول...

مبارك المحطة ولا الكفر ولا البلد

ههههههههههههههههههههه

ضحكتنى ياجدع

دودو يقول...

تصدف انا كنت بفرح بيها برده بس لانها نظيفة اوى دون باقى المحطات الى فوق الارض
تعددت الاسباب والحب واحد

غير معرف يقول...

ثقافة الهزيمة .. العتبة الخضراء

و تقول الحكومة المصرية التعيسة أنها تسعى لبناء أربع محطات نووية بحلول عام 2025، على أن يبدأ تشغيل أولاها في 2019 ، وأن يضيف البرنامج النووي الجديد ما يصل إلى 4000 ميجاوات !!! علما بأن تكاليف بناء 4 مفاعلات نووية حوالى 20 مليار دولار.

و نشرت جريدة المصرى اليوم فى 20 سبتمبر 2010 تصريح د.حسن يونس وزير الكهرباء و الطاقة جاء فيه سيتم إيفاد 67 مهندساً مصريا إلى كل من الولايات المتحدة، وروسيا، وفرنسا، وكوريا الجنوبية، للتدريب على التكنولوجيا النووية. وبالفعل هذا مفيد لأرسال الأصدقاء و المعارف فى رحلة مدفوعة الأجر على حساب الشعب المصرى الفقير.

..تكلفة مفاعل نووى جديد يبلغ 5.52 مليار إيرو ، و 300 من مراوح توليد طاقة الرياح تنتج ما يعادل مفاعل نووى و تتكلف 900 مليون إيرو فقط!!!

باقى المقال ضمن مقالات ثقافة الهزيمة بالرابط التالى www.ouregypt.us

فربنتح يقول...

مخهه مثقف بالظرافة هههههههههههههه حسوا بفلسطين مره قبل ما البلد تنقلب

فربنتح يقول...

مين الظريف اللى قاعد يقول ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه