رسالتى الى زعبلتى

"A Scout is trustworthy."

** زعبله دى تبقى ( ريم بنت اختى ) لو عاوز تعرف اكتر ادخل هنا**

زعبلتى العزيزه معرفش انا هبقى خالو كويس ولا نص نص .. لكن ليكى عليا اعمل معاكى زى ما الناس دى عملت معايا.

ليكى عليا اعمل معاكى زى ( ستى ام محمد) اول ما كانت تشوفنى كانت تحسيسنى انها من اخر مره انا كنت هنا وهى كل ما تلاقى حاجه حلوه  تخبيها ليا ,, عشان اول ما آجى تديهم ليا ,, الحاجات الحلوه دى مكنتش بتبقى حاجات خرافيه ولا حاجات انا مش بشوفها ,, كانت بتبقى فاكهه مثلا او حلويات ,, وكان اكيد بيبقى عندنا منها ,, بس (ستى ام محمد) كانت بتحسيسنى انها خبت ليا احسن واحده وكانت تيجى تقولى
" مرضتش اخلى اى حد ياكلهم غيرك ..وكلهم قعدوا يقولوا اشمعنى وانا ولا عبرتهم "

(سيدى على ) كان بيدينى فلوس لما بيشوفنى بس انا كنت بحب احساس ان (ستى) خبت ليا احسن حاجه عندها ,, ليكى عليا اعمل زيها.

عارفه كمان فى العيد هديكى عيديه كبيره ,, أكبر عيديه ,, زى ما كانت (خالتى هناء) ما بتدينى ..لحد النهارده اكتر هى اكتر خالاتى اللى بحبهم .. ولحد النهارده هى اول خاله بروح اعيد عليها رغم ان حوار العيديه خلص .

كانت ماما بتاخد منى الفلوس الكبيره (المجمده) عشان متضعش منى ومكنتش بستفاد بالعيديات الكبيره اوى .. لكن انا هديكى فلوس كبيره واديكى معاها فلوس فكه عشان لو ماماتك خدت الفلوس المجمده يبقالك حاجه تشترى بيها اللى انتى عاوزاه.

عارفه هعمل معاكى زى مين كمان؟؟ ..زى (عمو طارق ) و (جدو مصطفى) كل ما كانوا بيجوا كانوا بيجبلونا حاجه حلوه معاهم ..كنت بنتظرهم اوى وكنت بحبهم وانا صغير جدا.

وهعمل معاكى زى (بابا) و (عمو موسى) كانوا بيهرونا لعب واحنا صغيرين ,, ويعملوا عقلهم بعقلنا ,, ويخترعوا لينا ألعاب ,, اه لما كبرت عرفت انها ألعاب معروفه بس كنت بفرح بيها اوى ايامها.

هعمل معاكى زى (سيدى على ) لما كان يجى يزورنا واشتكى له ان ماما ضربتنى ,, كان يعمل نفسه كأنه بيضرب ماما وكنت بحس ساعتها انى خدت حقى.

وهعمل معاكى زى (ستى ام محمد) لما قالت لماما " متضربيش العيال ادامى ,, تعالى هنا فى حضنى يا عين ستك " مش هنسى انا الحضن دا ابدا

هحفزك زى ما (بابا) كان بيعمل معايا لما قالى لو حفظت خمس اجزاء هديك جايزه ولما حفظتهم جه معايا الجامع يوم حفله التكريم - رغم انه يومها كان تعبان جدا - واخدت جايزه من الجامع 100 جنيه وادانى هوه 200 .. ال300 جنيه دول كانوا مبلغ خرافى وانا عيل صغير .. كانوا يشتروا جهاز اتارى ويجى 300 شريط له .(الاتارى دا حاجه زى البلايشتسن يابت يا زعبله اصل خالك عتيق).

ولما خلصت الخمس اجزاء قالى لو خلصت ربع يـــس~ هديك هديه تانى .. بس توفى الله يرحمه قبل ما اخدها.

وعارفه لما تكبرى مش هعمل معاكى زى (عمتو فريده ) كل لما اتصل بيها تقعد تقولى انت مش بتسأل خالص وتقعد تقطم فيا ,, رغم ان عمتى دى احن مخلوق على الارض لكن انا بزهق من تقطيمها فيا دا .(**تقطم يعنى لوم)

لكن هعمل معاكى زى (عمتو ايمان) لما بتصل بيها بتفرح وتنسى انى فعلا بقالى كتير مبسألش .

كمان هعمل معاكى زى (عمو احمد) لما بعمل حاجه غلط كان يقولى ايه الغلط اللى انا عملته ,, ويقولى انه كان عارف انه مكنش قصدى ,, لانى راجل ومتحمل المسئوليه ,, بس مينفعش تعمل كده تانى عشان , وعشان.

وهعمل معاكى زى ما (بابا) كان بيعمل معايا ,, ادام الناس كلها وأدام اصحابه كان يحسسنى انى ولد سوبر وانه بيحمد ربنا ان ربنا رزقه ولد زيي ,, ولما اعمل حاجه حلوه يحكيها لكل الناس .

عارفه هعمل معاكى زى ( ماما) ما بتعمل لما ببقى مخنوء .. بتبقى تعبانه ومش بستريح الا لما ببقى كويس.

وهعمل معاكى زى (عمو طارق) و(عمو موسى) و(عمو احمد) و(تيته سعاد) .. لما بيقعدوا يحكولى عن ذكرياتهم لما كانوا سنى .. من غير ما يطلعوا نفسهم سوبر ..بالعكس بيتعمدوا يقوليلى انهم وقعوا فى غلطات زى غلطاتى .. وانهم عرفوا الصح فيها متأخر.

عارفه كمان لما تحكيلى على حاجه مش هعمل معاكى زى ما (خالى) كان بيعمل معايا ويحسيسنى انها شغل عيال ,, لكن هعمل معاكى زى ما (عمو احمد) بيعمل بياخد الموضوع كأنه موضوع كبير وبجد وبيقولى رأيه.

عارفه لما تكبرى هعمل معاكى زى (خالى محمد) ادام الناس بيحترمنى اوى ,, ودا بيخليهم يحترمونى بزياده.

اه قبل ما انسى كده ومن اولها لو عملتى زى (مامتك ) وخليتى مفيش حد من اعمامك ولا اخوالك يبوسك وتعملى فيها كبرتى ..احب اقولك الكلام دا مش هيمشى عليا .. انا هبوسك لاخر لحظه فى حياتى.. ال ما بوسشى ال ..بلاش كلام فارغ. انا اساسا مش هعمل حاجه من اللى فوق دول الا انى ابوس. 

** (ستى ام محمد وسيدى على ) دول جدو وجدتوا من ماما كنا بنقولهم يا سيدى ويا ستى معرفش ليه .. انا قلت انوه عشان اللى هيستغرب من المصطلح

**(جدو مصطفى وتيته سعاد) جدو وجدتوا بابا وكنا بنقولهم تيته وجدو