2009/05/30

الظاهر ان انا شخصيه كرتونيه










د/محمود بحس انك شخصيه كرتونية".

يمكن يكون دا من اكتر التعليقات اللي ضحكتني لما  سمعت حد بيوصفنى بيها
والغريب كمان إن الحد دا بيمثل شريحة كبيرة نسبيا من الناس اللي اعرفهم وف نفس الوقت معرفهاش. وده اللي مخليني مستغرب وبفكر هو دا شكلي فعلا أدام الشريحة دي؟
نظريا ميفرأش كتير إن كان وصفها صح أو غلط... وعمليا خلاني أفكر شويه يمكن عمل لى حاله من التفلسف اللي ممكن ميكونش ورآها حاجه إلا مجرد التفكير
هي حد متابع مدونتي – على الأقل زمان- ويمكن هي اكتر
حد شاهد -لانها شافت اول بوست كتبته تقريبا والبوستات اللى بعد كده لحد وقت قريب - شاهد تطور واختلاف وتردد واضطراب أفكاري وبالتالي تعرف اسلوبى في التعبير عن الأفكار دي وشاهد دفاعى عن شئ وهجومه بعدها بفتره زي اى حد طبيعي.
حد شافني لايف مره أو أتنين في لقاء مدونين ... طبعا مكنش فيه وقت ساعتها للكلام المثمر - حلوه المثمر دى ؟ ... كان مجرد كلام في مواضيع عامه أو حتى كلام من عينه وأنت عامل إيه فى الدراسة؟؟ وإيه مشاريعك للتخرج؟؟ وربنا يوفقك ومخطط ازاى لمستقبلك؟؟ ..."مخطط دى مش نسبه للحمار المخطط خالص على فكره " والحياة عامله ازاى؟؟ .....الخ الحوارت دي.
حد عملت معاه شات يمكن مش كتير أوى ويمكن كلامنا كان مقتصر أوى أوى على ازيك وعامل إيه ... او لو سمحت عندى مشكله فى الجهاز ... او انا عايز صوره احطها للبوست لو ممكن تدوريلى
الكلام معاها هى بالتحديد – رغم تقارب السن جدا – دائما بالالقاب او على الاقل بالنك نيم ... وان كنت انا شخصيا مبحبش لا دا ولا دا فى الشات او فى اللقاءات الفيس تو فيس الا انى دايما بسيب الطرف التانى هو اللى يحط حدود واطار طريقه التعامل..... مبحبش اوش نفسى بالنقاش فيها وخصوصا انى كائن قادر على التكيف لأبعد مستوى.
التليفون يمكن مرتنين تلاته منهم مره كنت بسأل عن مضاد حيوي بديل عشان كان العيان غلبان والمضاد الحيوي اللى كنت هكتبه كان غالى وكنت عايز بديل له نفس الماده الفعاله.
دى خلفيه الشخصيه اللى قالتلى د محمود " مؤكده على استخدام اللقب" انا بحس انك شخصيه كرتونية أوى.
السؤال :الذى يطرح ويضرب نفسه ويقطع نفسه هو دا حلو ولا وحش؟
والسؤال التانى : هو انا شكلى على المدونه بيبان كده بجد؟
المشكله ان اللى يعرفونى بيقولوا ان اه فيه فرق بينى وبين المدونه .... بس انا اشبهنى فيها بنسبه 90% على الاقل ... ثم هى شافتنى لايف وكلمتنى شات ... انا بظهر كـ شخصيه كرتونيه فعلا.
حد تانى قالى فى مره انه متوقع انى قصير جداااااااااا ولى منقار او وشى يدى شكل منقار.... وكتير استغربوا أنى في أخر سنه طب أسنان وكان فاكرين انى فى ابتدائي.. بالكتير اعدادى
هو اسم بطوط بيخيل اوى كده
هو أنا شكلي في المدونة إيه بالظبط منك له لها ... أنا كده مش هعرف اتجوز...
انا هشترك فى برنامج اريد حلا والا هنتحر
وحالتى ميؤس منها ولا ايه النظام
D
 لو مش هتاخد راحتك فى التعليق وانت مسجل سجل بغير معروف وامضى فاعل خير
سؤال البوست انا مين فى الصورتين اللى فوق
واحب اقول ان خلاص فاضل شهر وراجعلكم يا بشريه وراقد فى مدونتكم لحد ما يبالنى اصحاب 
طول الشهر دا انا فى قفا دعوه اللى مش هيدعى يا ويله وسواد ليله وقد اعذر من انذر
 

هناك 17 تعليقًا:

pinky يقول...

hehhehee
anho soora ha?
el 2oola tab3an ya 3am dahab :)))

didi يقول...

والله يا بطوط يا اخويا سؤالك دا يحير كتير
وبعدين انا قبل كدا كنت متخيله شكلك بنى ادم يعنى
عادى
لا فيك حاجه زايده ولا حاجه ناقصه
ليك عينتين تحت جبينك في دماغك وفي حته بالضبط اسمها وشك
وليك مراخير زى بقية الخلق في نص المسمى بوشك
وليك بؤ بتاكل بيه زى البنى ادمين بالضبط

بس استغربت فعلا اما شوفت صورتك في الفيس سجق
ايامها كنت بلحيه
بس استغرابي ما دامش كتير
عموما الناس كلها وبالذات المبدعه بيكون لها شخصيه كرتونيه خفيه
وكل دا بيظهر من خلال ردود الفعل او نوع كتاباته
يعنى ممكن تكون وقت الجد جد جدا
ووقت الزنقه دمك خفيف جدا
ووقت الهزار محبوب جدا
فعشان كدا اللى شافك وقت الجد بس .. هتبقى بالنسباله كرتونى وقت الزنقه او الهزار

وكفايه عليك كدا لاحسن توه من فكرتى في النص
:D

helium atom يقول...

btoot...enta mosh ay 7ad men el sorteen.... enta "el senna el maska furshet senan"

bass :D

ya3ni ettamen 3la mosta2balk :P

وومن يقول...

بطوط انا جيت اهو تصور بقي بعد المدة دي كلها جييت

عارف يمكن انا أكتر حد ممكن يكون فاهم الحكاية دي علشان لو انت بحتحسس اللي قدامك أنك شخصية كارتونية

انا بقي بصدم اللي بيشوفني في شكلي لأن اللي بيقرالي بيكون متخيل اني أكير في السن أني اطول أكيد وأني علي الحقيقة أعقل بكتير
واللي صادم أكتر اني شكلي اصغر من سني الحقيقي بمراحل
دي بقي واحدة من مشاكل العالم الأفتراضي انك غصبن عنك بتقرا لحد وكتابتاتة بتكون في خيالك صورة افتراضية ليه وفي الغالب مش بتبقي صح
انت قولت ان المدونة 90% منك ده حقيقي ومش حقيقي لأن المدونة 90% من عقل وأفكار دكتور محمود فين الباقي بقي اللي بيكونوا شخصيتنا فين ردود أفعالنا فين انفعالتنا فين أنطباعتنا فين تعبيرات وشنا البوست اللي بنكتبة بيكون حالتنا العقلية مأثرة فيه علشان كدة مينفعش نقول ان كل البوستات دي جنب بعضها هاتبقي احنا لاء كل بوست فيهم لحظة أو تجربة احنا مرينا بيها وسجلناها
بس أنت برضة مقولتش ايه انطباعك انت عن التعريف ده لك يعني شايف الشخصية الكارتونية دي ايه ؟
شخصية هزلية - شخصية طيبة - شخصية خيالية
انت مقولتش في البوست التشبية دة ضايقك ولا لاء حسيت انه مجاملة ولا تقليل مش شأنك
وانا طبعا مش متابعاك والحقيقة اني قابلتك الأول وبعدين قريتلك فانطباعي بقي مختلف
بس حاسة ان التشبية ضايقك بالرغم انه ممكن يكون مجاملة يعني تقصد انك مثالي او نقي للدرجة اللي مش تخليك شخصية حقيقة لا تخليك شخصية كارتونية الأطفال يتفرجوا عليها علشان يتعملوا مثل عليا
مش شرط تبقي بطوط الكارتون ولو انه شخصية جميلة وفية طيبة وعطاء وصبر لو بصيت للهدف اللي ورا بطوط كشخصية مش انطباعنا عنه
رغيت كتير انا صح سلام

الفقيرة إلى الله أم البنات يقول...

كل اللى فى نفسى
ازيك يا بطوط
وازى اختك الجميله
سلم عليها وقول لها أم البنات بتسلم عليك
أكيد انت ان شاء الله اللى اقصده
مفيش دكتور اسنان اسمه بطوط حبوب إلا إنت
وبخصوص الاسم
أو التخيل خالص متقلقش مش شخصيه كرتونيه
واحمد ربنا مش عم دهب
هو بس بيدل على روح مرح لديك

Saturn يقول...

enta meen fe el etneen elly fo2!!! eh da homa msh nafs el 7ad!! ;P
batoot fe disney land we batoot fe el 2al3a-by the way enta bt5om ana 3andy nafs el sora de fe nafs el mkan- sada2 elly 2al enk caretoon character bas msh ldarga enk osayer we bmon2ar tb3an ;))l
mawdoo3 el sha5sya ba2a i agree enk 90% the same el 10 elba2y bas 3shan aslan 3'asb 3ank fe differences been el 7ya live we el 7ya online so, you know
konk cartoon character ba2a 7lw wla w7sh depends on el-character nafsha ya3ny 3'alban 7lw as long as you aren't el ta3lab el mkar or scar from lion king ;) ra3'eet kteer awy ana although i hate commenting in franco arab -just br5m 3alik- 3moman lak an taf5r aslan eny 3mlt comment hena -you know why- i guess you should write a post showing how much you're happy :P i know i know i made your day i know :D but don't thank me, it's what friends do
;)

كيــــــــــــارا يقول...

طبعا انا بتابع مدونتك بقالي كتير اوي علي الريدر يمكن مش برد لكن بتابع بوستاتك وهقول كلامها صح ميه في المية وهقول اني موش كنت متخيله ان شكلك كدا من بوستاتك
بس اكيد موش الشكل اللي موش يخليك تتجوز لا تتجوز وتجيب بطابيط صغنين كمان :)

ربنا يوفقك

Ma 3lina يقول...

هههههههههههههههه تصدق فعلا فيك شبه من بطوط :))

لا بجد الناس علشان متعودة على صورتك فى المدونة و اسمك فبيجلهم الفكرة دى مش اكتر .. طيب انا اقولكناس كتير كانوا فاكرينى نخينة و ماليش فى اى حاجة علشان ورة جارفيلد اللى قاعد قدام التلفيزيون ياكل بس

متخدش فى نفسك و ان شاء الله هتتجوز متخفش :((

maha zein يقول...

فين دقنك

مش فارقة معايا انت مين

فين دقنك

ليه حاطط صورتك دي
ومش حاطط صورتك بدقنك
وهي اصلا فين دقنك

تفتكر الصورة دي ممكن تبسط زوارك
ولا هي دي الصورة اللى عاوز تظهر بيها

بردو هقولك فين دقنك

بطوط حبوب اللى في عقلي واللى شفته لايف بردو
هو محمود الشخص الواثق من نفسه الظريف الشاطر و المجتهد
واللى قبل ده كله في اطار هو مرسوم جواه ومتغلف بيه وهو مظهره المتدين وداخله المتدين
مليش دعوة بالداخل دلوقت ومش بكلمك عليه
كل اللى عوزة اقوله


فين دقنك

ضــى القمــر يقول...

بطوط

صورتك هى الصورة اللى تحت طبعا.
لأنى كمتابعه ليك دائما عمرى ما تخيلك بصورة عم دهب .
يمكن بتكتب بأسلوب ساخر احيانا .. لكن بيكون وراه فكرة عايز توصلها .. او حاجه عايز تقولها .
مشوفتش ولا مرة أنك شخصيه كرتونيه .
يعنى مش علشان اسمك فى المدونه كده يبقى لازم اشوف انك شخصيه مرحه طول الوقت وبس .
اعتقد ان الكلام ده رأيى ورأى اكيد ناس تانيه .
لكن الأهم من ده كله .
انت ليه مش ناقشت اللى قالك الرأى ده .. هو ليه شايفك كده ؟؟
علشان تفهم امتى بتكون د/ محمود .. وامتى بتكون عم دهب ؟؟
تحيتى لك يا د/محمود :)

دعاء مواجهات يقول...

بص بقى يابطوط وخدها منى كدة بدون اى مجاملة او حتى اى مزايدة - حلوة مزايدة دى - انت ميكس اة ميكس جميل اوى من حد جاد وحد دمة خفيف عارف امتى تهزر وامتى تكون جد وبرغم كل دا عقلك بيرصد اللى قدامة كويس اوى

دعنى اقتبس كلمة قولتهالى قبل كدة

متسألش حد عن رأية فية علشان ميقعدش يتفلسف ويقول كلام مش هيكون صح لان محدش بيشوف الإنسان أفضل نفسة ...

بيس يابطوط

اة ع فكرة

ميفرأش مبتتكتبش كدة يادكتور .. بتتكتب كدة ميفرقش مش عارفه هتتعلموا امتى ..

بس تعرف يامحمود كلامك دا ف حد ذاته بيبين اوى اهمية رأى الآخرين فينا مهما كنا واثقين من نفسينا ..

آه وكفى يقول...

بص هو ماشي معاك بطوط معرفش ليه
بس لأ الشكل الخارجي مش بطوط ممكن يبئى محمود مفيش مشكلة

حمامة يقول...

هههههههههههههههههه

اولاً ماشاء الله عليك ( بالنسبة للصورة يعنى )

اممممم انا عامة بحط للناس اللى بقرالها كده تصور

بس انت مش عارفه لأنك كنت حاطط صورتك قبل كده

اللى كنت فيها بدقن فيمكن ملحقتش اتخيلك

بس انا متخيلاك طويل ورفيع ودمك خفيف

بس معتقدش انى تخيلتك شبه بطوط خالص


ربنا معاك يارب ويوفقك ف الامتحانات ويسهلها

عليك يارب وترجعلنا بألف سلامة وتلبدلنا ف المدونة :D

marwa mahdy يقول...

hea ana w gayez ana hea..........
bos ya battot (ana lesa ma2oltsh 7aga bs lazem anadek be battot tol ma e7na fe el modwana)bos ya sede battot hwa ma7mod ,bet2der ta3ber 3an far7ek w 7oznek w 7obek 3an tare2 battot te2der kman tonkod , te7lm men 3er 7dod ,t2ol 7agat nas kteeer teftkerha gnon w kol dh w enta battot
ana sa7e7 mashoftkesh sha5sian bs aked hatkon a7san men battot we daheb w meky wel 7ag dezny nafso...........

الصقر الجرئ يقول...

بصراحة كدة وبكل وضوح انت عجبتني من غير ماشوفك ومدونتك بتعكس شخصيتك الطريفة الذكية وكذلك تحتوي على أشياء أنا مش عارف أجيبها منين؟!!! وعلى رأسها العداد اللي رصدني دلوقتي ...الى الأمام ياريس
زور مدونتي المتواضعة ربنا يكرمك

Randa El- Adawi يقول...

معتقدش ان بطوط كشخصية بتدل على الطفولة وبس
لكن كثقافة بطوط متعلق بانه كارتون للاطفال وللتسلية فطبيعى الارتباط دا يحصل بين كلامك وصورتك على المدونة بخلاف الواقع او صورتك الواقعية برا لاكثر الناس مشاهدة لك فى الامرين.

الانسان عادة له تلات صور:
صورة هو شايف نفسه بيها
صورة الناس شيفاه بيها ودى اللى هى بناء على الانطباع والخبرات بينهم
وصورة بيلجأ لها فى الازمات للدفاع عن نفسه.

Noha El-arabi يقول...

و تفرق معاك في ايه رأي الناس
مش انت شايف نفسك كده
و راضي
بس اشطة
كفاية
مقولتليش بقي ازيك؟ :)