2010/10/21

وداع .. قصه قصيره



بكره ميعاد السفر .. السفر اللى هيبعدهم عن بعض يمكن طول العمر .
الصبح لبس اشيك حاجه عنده ,, قرر انه يقابلها عشان يودعها اخر وداع , فى طريقه ليها افتكر السنوات الصعبه اللى مر بيها وهم سوا ..ابتسم اوى لما افتكرها وسط السنوات الصعبه دى , كانت هى النور اللى خلاه يقدر يستمر من غير ما ينهار , ابتسامتها الملائكيه اللى كانت دايما بتبتسمها كل ما الدينا تزداد سواد, وخفه الدم والتهريج والاستهتار بالمشاكل , كانت بتبقى اكسير الحياه اللى بيخليه يقدر يستمر , ياااااااااه اد ايه كان قدرهم متشابه.
بس هو النهارده فعلا اخر يوم هيشوفها فيه؟؟!!
نزل من عربيته على اول محل ورد , واشترى لها بوكيه ورد جميل , اول مره يشترى ليها ورد , قال لنفسه انها نازله مخصوص بعد الحادثه اللى حصلت لها , عشان بس تودعه , حس من جواه ان الورد اقل شكر ليها ممكن يقدمه... اقل شكر على حاجات كتير لازم يشكرها عليها.
اول ما شافته ابتسمت اوى , الورد دا عشانى؟!! .. اه عشانك هجيبه لمين اعز منك يعنى .. ابتسمت اكتر .. ابتسامتها بتخلى الدنيا تنور .. بتفكره بايااااااااام كتييير مروا بيها سوا ,, ايام كانوا بيبتسموا فيها بس عشان يقدروا يواصلوا .. لكن ابتسامتها المره دى صافيه ,, ابتسامه ملاك رغم ان جواها حزن , او انسكار فضل مطبوع من الايام اللى فاتت.
وحشانى !! وعارفه؟! هتوحشينى اكتر
ردت عليه بدلع : ليه يا وحش انت مش هتسأل عليا .. طب انا مخمصاك
هتوحشينى والله وهيوحشنى دلعك وخفه دمك .. وهيوحشنى اسمى الدلع اللى محدش غيرك بينادينى بيه .. لأ اكتر حاجه هتوحشنى  انى مش هشوفك كل ما احب .. قرب المسافه بينى وبينك كان بيحسسنى بامأن
عارفه؟ احنا ليه القدر حطنا فى طريق بعض بالصدف العجيبه دى .. يمكن لان كل واحد فينا كان محتاج ابتسامه التانى .. كان محتاج ضحكته اللى باينه صافيه لكنها بتدارى حزن السنين الصعبه اللى مرينا بيها
فاكره اتعرفنا ازاى اول مره؟
لما قلت لك انا حصل معايا كذا .. قلتيلى وانا كمان
قلت لك طب وحصل كمان كذا .. قلتلى اهلا وسهلا وانا كمان
قلت لك طب مش هتصدقى وحصل كذا .. قلتللى والله وانا كمان
طب اهلا وسهلا يا فندم انا فلان .. اهلا وسهلا يا فندم انا فلانه
طب هاتى رقمك بقى عشان نشوف هنتصرف ازاى
قلتيلى خد رقمى  عشان انا حبيتك كده لله فى الله

فطست من الضحك .. قالت له يا بنى انت تحفه والله العظيم .. ضحتكها لسه فيه طبعه الحزن اللى مش كتير بيشوفها .. الحزن اللى بيخلى عنيها تلمع فيزيد جمالها اوى .. ويزيد رغبتك انك تفضل باصص ليهم تشوفهم بيقولوا ايه؟

فضلوا يحكوا عن ذكريات الايام اللى فاتت,, كانت ايام مؤلمه اوى , بس وهم بيحكوا كانوا بيضحكوا اوى ,
ضحك انتصار على الايام , او كان  ضحك طعمه مر؟
محدش فيهم سأل نفسه هو ليه بيضحك اوى كده .. كل واحد فيهم كان زعلان انه يمكن دى تكون اخر مره يشوف التانى ,, كل واحد بيفكر هو بكره من غير التانى هيبقى طعمه مر برضه؟ ولا خلاص الايام الصعبه عدت ومش هترجع تانى؟!.
سلم عليها وهو ماشى , اول مره يسلم عليها بالايد , كان عاوز يحس دفى ايديها وتكون دى اخر حاجه تحصل بينهم قبل ما يودعها قالها بصوت واطى اوى "يارب الدنيا تطبطب علي قلبك بالراحه وانا مش موجود"
عنيها دمعت وهى بتقوله ربنا يوفقك يارب
لو عجبتك اعمل شير

هناك 22 تعليقًا:

كلمات من نور يقول...

أول زيارة و إن شاء الله تواصل دايم با بطوط ...جميلة قصتك غيها ذكريات كالكنز المخبأ بدوخلنا و أطلق عليه دوما ( كمز الذكريات ) تحياتي

غير معرف يقول...

واضح إن القصة القصيرة مش مقصوده لذاتها فى الكلام اللى فوق ده..
لكن واضح إنها زفرة مهموم ونفثة مصدور..

الحب الجميل يقول...

صباح الخيرات
يارب الدنيا تطبطب على قلبك براحه وانا مش موجود
جملة جميلة ومؤثرة اوى
والقصه كلها اجمل
اسلوب سلس ومنظم
تسلم ايدك يا بطوط
تحياتى

يوميات شحات يقول...

شكرا على القصة القصيرة

حنان الشافعي يقول...

حلوه قوووووووووووووي

mrmr يقول...

لذيذه ومنظمه وسلسه يا بطوط
ربنا يفرح قلبك

واحد من الناس يقول...

حلوه أوي

ومش عارف ليه لما خلصت حسيت إني عاوز أمد إيدي وامسكه وأقوله "متسيبهاش يا قفل ، وافضل جنبها طول العمر ، مش سهل الواحد يقابل حد يرتاحله كده تاني"

يمكن عشان اتعودنا ع النهايات السعيده

ويمكن لأن الفراق صعب أوي أوي أوي

عموما

أسلوبك جميل جدا ، ومسحة الرومانسيه الحزينه في كلماتك رائعة تأسر القلوب

شكرا لك

صيدلانيه طالعه نازله يقول...

ضحتكها لسه فيه طبعه الحزن اللى مش كتير بيشوفها .. الحزن اللى بيخلى عنيها تلمع فيزيد جمالها اوى .. ويزيد رغبتك انك تفضل باصص ليهم تشوفهم بيقولوا ايه؟


بصوت واطى اوى "يارب الدنيا تطبطب علي قلبك بالراحه وانا مش موجود"

المقطعين دول اجمل ما فى القصه
حسيتهم اوووى و عينيا دمعت اما قريتهم

يارب كلنا الدنيا تطبطب بالراحه

القصه جميييييله اوى يا بطوط
اسلوبك فيها اكتر من رائع

New Image يقول...

حلوة بجد ،، بس ايه حكاية صورة الفيل العجوز ده ؟؟؟

قهوة بالفانيليا - شيماء علي يقول...

انا مافهمتش القصة يا محمود ..!!
هي مشاعرها حلوة اوي و مشاعرها واضحة .. و جميلة و دافية جدا .
بس انا حاسة انها كانت في حاجة الى المزيد من الاحداث او التفاصيل.. فيها مساحة شوية للتفاصيل .
:)

babosha يقول...

دمعت وده تعليقى لان الوداع حاجة صعبة قوى احساسها حلو جدا ونفسى الدنيا تطبطب عليا وعليك وعلى كل الناس حاسة انك انت او على الاقل ده اللى جواك ربنا يوفقك

still-searching يقول...

صعب الوداع
رغم انهم على ما فهمت من القصة ميعرفوش بعض

بس اتجمعوا على أزمات وهيتفرقوا بعد ما الأزمات اتفكت

نا ضد الوداع ده
يا ريته يرجعلها تاني ويقولها رغم كل شئ هفضل معاكي

بس القصة فيها غموض جميل يخلي كل واحد يتخيل براحته ايه قصة كل واحد منهم وايه الظروف اللي قابلتهم لبعض

جميلة اوي واحساسها عالي

دمت دائما بود :)

نبض اسكندرية يقول...

الله ينور
جاية اسلم بسرعة مع اول زيارة ليا لمدونتك
ان شاء الله متكنش اخر زيارة
:))))

VOltaa يقول...

حقيقى تسلم :)

marwa mahdy يقول...

رائعه يابطوط فيها احساس عالي جدا.......ساعات كتييير الفراق بيكون قدر لابد منه.........
صوره الفيل ؟؟؟؟؟؟؟؟

kimo يقول...

اول زياره وابداع متألق
تحياتي لقلمك المبدع

كــركــبــة دمـــاغ ㋡ يقول...

حلوة قوي بجد


كل سنه وانت طيب وبالف خير وصحه وسلامة
وربنا يعود عليك الايام بكل خير وانت في احسن حال يارب

عيد سعيد عليك وعلى كل حبايبك يارب

(f)

richardCatheart يقول...

كل سنه وانت بالف خير وصحه عيد سعيد

z!zOoOo يقول...

ازيك يا بطوط

كل سنه وانت طيب يا ابو البطابيط

:))

عيد سعيد عليك

ربنا يوفقك

فاتيما يقول...

بطابيطوووو

اقلقتنى عليك بزيادة يا فتى

انتا فين
واخبارك ايه ؟


يا رب دايما بخير

انا عايزة اطمن عليك


بس

nour shahen يقول...

هايله يا بطوط برغم حزنها الشديد
بس لازم يبقى أمل اللقاء من جديد يصبر علي الفرفه والوداع

صوت المرأة الصعيدية يقول...

هههههههههههه
والنبي حلوة يابطوط
طلعنا مألفتيه لايك بعضينا أهو