2009/12/30

مدونه بطوط الاباحيه




من زمان كده عرفت موقع بيعرفك اللى دخل مدونتك عن طريق مواقع البحث .. كتب ايه عشان يدخل مدونتك.
وطبعا بلاقى كلمات كتير منطقيه زى " بطوط " او اى كلمه ليها علاقه ببوست انا كتبته. لحد كده تمام جدااا .

اكتر حاجه بقى  بتغظينى لدرجه مبالغ فيها ان حد يكون بيدور على موقع اباحى ويقوم جوجل - اسم النبى حارسه وصاينه - جايبه زى الشاطر على مدونتى على اساس انه هيلاقى فيها كل ما لذ وطاب .
مفيش مشكله برضه بس انا نفسى  اقول لجوجل يا سيدى انا معنديش مانع تجيبلى الناس دى ... بس بصراحه يا جوجل -  لو تسمحلى اشيل الالقاب - انت بتجيب لى ناس زباله.

اه والله يا جدع .. انت لو جايبلى ناس بتدور على اوضاع عاديه فى قله الادب .. انا مكنتش هعترض ابدا .. بالعكس انا كنت هفرح .. ان فى شباب لسه مستقيم وبيدور على الحاجات دى عندك مش عند الغريب يعنى.
انما اللى بيغظنى منك انك بتجيب لى ناس بتدور على قله ادب وبقله ادب كمان ... كده والله كتير
يعنى مره لقيتك - الكلام لجوجل - باعتلى واحد بيدور على "جنس للمنتقبات" .. طب دا بزمتك يا جوجل- دا لو عندك زمه -  مش يستاهل تتف عليه وعلى اهله .. تقوم- انت اللى تجيبه مدونتى. سبت ايه للغريب .. طب ليه؟؟ قولى ليه وانا ارتاح؟

ولعلمك انا متغاظ منك مش لأنك جبته مدونتى .. انا متغاظ لانك مقولتليش الواد ده لقى اللى بيدور عليه ولا لأ؟ ولو لقاه يبقى ازاى يعنى ؟ ..ربنا يهديه ياااااارب .. بس شكله واد محترم حتى لما بيدور على قله الادب بيدور عليها بادب ربنا يقلل من امثاله يااااااارب.
وانت يعنى يا جوجل - لا مؤاخده يعنى - زى العبيط اى حد يبحث عن اى حاجه تروح تدورله .. وتدورله فى مدونتى كمان .. الله يسامحك يا شيخ روح.

وناس تانيه بتدور على حاجات اغبى بس مش هينفع اكتبها - الله يكسفك ياجوجل فضحتنى- المهم ان كلها اوضاع بتعبر عن انهم ناس مش طبيعيه.


ناس هتقولى طب ما دا حلو .... أكون سبب فى ان واحد عاوز يشوف حاجات - قله ادب - يقوم يدخل المدونه يمكن يضحك على بوست كتبته  او على الاقل يتلهى فى حاجه تانيه وينسى.
اوك دى وجهة نظر ... لو كان الناس اللى بتدور على المواقع دى ناس طبيبعه .. بقولك بيدور على "جنس للمنتقبات" .. دا اعمله ايه دا؟ وكمان انا مبقدرش امنع نفسى انى اتغاظ .. انك يا جوجل الوغد - بلا القاب بلا نيله - بتعتبر مدونتى مدونه اباحيه.
المهم انا مسكتش بقى .. كل ما الاقى كلمه زى دى واحد دخل بيها على مدونتى .. اروح للبوست واحاول اشيل الكلمه لو ينفع.

لدرجه انى شلت رباعيات صلاح جاهين - اللى فى السيدربار بتاعى على اليمين تحت خالص - .. بدل ما كنت كاتبها .. عملتها صوره .. لان كان فيها كلمه - دوروا عليها بنفسكم مش هينفع اقولها - العيال الواطيه - ربنا يهديهم - كانوا بيبحثوا عنها .. وجوجل - مشكورا يبعتهم على  مدونتى على اساس ان انا بتاع قله الادب كلها - شمت فيا الاعادى الله يسامحك.( للناس الفضوليه الرباعيه الللى بتبدأ بـ ياطير ياعالى فى السما )



واللى غايظنى اكتر انى والله لو فى صوره ممكن تعبر عن البوست وفيها واحده مش محجبه .. او حتى محجبه ولابسه لبس لا يليق بالحجاب .. مبحطهاش فى مدونتى ... هو الواحد ناقص ذنوب .
وجوجل بيعتبرنى مدونه اباحيه ..

لحد كده وكنت ساكت وراضى ومستحمل انما بقى اسمعوا الصدمه الكبيره اللى حصلتلى من يومين .


بطوط انا مش عارف ادخل مدونتك
 ليه ان شاء الله
 اخويا مسطب برنامج على الجهاز معرفش بيعمل ايه بس لما بتيجى مدونتك بيقفلها اوتوماتيك
طب اسم البرنامج ايه؟
انتى بورن
يانهار ملوش الوان .. انتى بورن مش راضى يدخلك مدونتى .. ليه ان شاء الله ... دا انا ابويا- الله يرحمه- لو عرف .. ممكن يموت فيها .. وامى لو عرفت هتطردنى بره البيت دا اكيد

( بمنتهى البراءه )هو ايه الانتى بورن دا يا بطوط
انا هترجملك وانت هتعرف يعنى ايه .. انتى يعنى ضد .. وبورن يعنى اباحيه او عاهره .. دا برنامج عشان اى حد يدخل موقع اباحى يقفله فى وشه
طب ودا مانعنى  من الدخول لمدونتك  ليه
انا بقى كنت فعلا فى قمه الكسوف والاحراج .. يعنى جوجل وكانت فى الخباثه .. انا الوحيد اللى بعرف اللى دخل مدونتى دخل ازاى .. انما توصل لانه يسوأ سمعتى ويحط اسمى فى برامج الانتى بورن .. لأ كده كتير بجد
المهم قعدت افكر هو ليه - الله يحرقه بجاز -قافل مدونتى
وبجد استغربت .. وبعدين عرفت ليه ويارتنى ما عرفت

 الفكره ان فكره برامج الانتى بورن كلها انها بتدور فى اسم لنك الموقع على كلمه من الكلمات المتخزنه عندها .. وهى معظم الكلمات اللى بتستخدم فى المواقع اياها ... حتى فى برامج منها مش بتفتح الهوت ميل عشان كلمه هوت متسجله عندها
وانا لنك مدونتى اسمه ايه batoot-haboob ..هو شاف boob  قال والله ما انت داخل .
boob دى يعنى ثدى بس باللغه الدارجه .. وبكده انا مدونتى بقت اباحيه رسمى
وعليه فأنا مضطر انى اقولكم انه ممنوع الدخول للى اقل من 18 سنه
انا قلت اكتبها بنفسى بدل ما الاقى جوجل كاتبها .. ومسيحلى كمان عند بتوع البلوجر وبالذات انهم اصلا اصحابه.. اذا كان سيحلى عند بتوع الانتى بورن - صوتى يا ما - يبقى هيقول ايه عليا لبتوع البلوجر.
لنا الله


بالمناسبه انا عملت جروب للمدونه على الفيس بوك

للاشتراك اضغط هنا


هناك 27 تعليقًا:

Helium Atom يقول...

ya 3eeni ya btoot!!! :))0

ana a5la2i msh tesma7 enni agi hena tani

مي يقول...

ههههههههههههه استغفر الله العظيم هو ده الوكر يا خويا
ولا بتاع المنقبات لا مؤدب بصراحة
والله واتصيت يا بطوط بلاش بقى حبوب لا يقرؤها حبوب منع الحمل ولا حاجة هههههههههههههههه
غير الاسم خليه الاسلام هو الحل

بجد بوست هاااااايل فظيع يعنى نشكر جوجل بصراحة

طب ده ينفع ادخله ولا ايه اصلى لسة بسنن يا دكتور
ولا هكون منحرفة وبدخل عالم بطوط الحبوب يالهووووووووووى


عثل يابطوط والنعمة تحياتى يا قمر

mohamed ghalia يقول...

الواد ابن خالتى انحراف ياجرعاااااااااااان
شكلك بتحول المدونة بعد مبنام وبتلعب بديلك يابطوط
هههههههههههههههه
خد بالك عشان فى مراقبة 24 ساعة بعد كده

نعكشة يقول...

:D

نمسح المدونة لوا اية
لحسن حد يقفشني دخلة المدونة يقول بنتهم انحرفت

:D

يلا خير

سلامٌ عليك

Empress appy يقول...

هههههههههه مش قولت لك غير اسمك من زمان اهو انا بعت العربيه بسببك واسمك جاب لك الكافيه احسن تستاهل

صيدلانيه طالعه نازله يقول...

و الله انا اشكر جوجل على خدماته الجباره دى و انه زاح الغشاوه من على عنينا و عرفنا حقيقتك المره
انا من ساع ما عرفت و انا منهاره
اكيد احنا كلنا بقينا بلاك ليست بسببك
ههههههههههههههههههههه
تعيش و تاخد غيرها

ويكا يقول...

والله مشكله .
بس عجبنى بصراحه الموقع اللى بيعرفك ، الناس اللى دخلت عندك دى جات ازاى .

ما تكسبشى فيا ثواب وتقولى ازاى بتعرفها ، لان انا اساسا ما بيدخلش عندى الا اللى داخل غلط.

ههههههههههه

Sweet Violet يقول...

ده انا كنت بتغاظ من جوجل و كنت غضبانه عليه بسبب الموضوع ده فعلا
اتضح ان فى ناس بتعانى بقى مش من جوجل بس لا و كمان البرامج
لالالالا الحمدلله ياعم ده انا افك غضبى عن جوجل احسن احصلك بقى
P:

Mahmoud البطراوى يقول...

Helium Atom

دا بدل ما تساعدينى على التوبه تتخلى عنى
:((
هى دى الصداقه فعلا :((

ماشى يا هيليوم

************************************************

مي

لو انتى اكبر من 18 سنه يفعى تدخلى عادى

الواد بتاع المنتقبات دا نفسى اعرف وصل لايه .. هموت من الفضول من يومها
:-S

****************************************************
mohamed ghalia

استر عليا يا بن خالتى
خالتك هتولع فيا لو عرفت
الله يخرب بيتك ياجوجل سودت وشى

****************************************************

نعكشة

وعليكم السلام ورحمه الله

هو عموما يا نعكوشه جوجل سجل انك بتدخل هنا .. فالانكار مش هيفيد
:D

****************************************************
Appy

واضح فعلا ان العيب فيا مش فيكى .. بس جوجل معترضش على بطوط جوجل معترض على حبوب :((

وبلاش البصه دى لو سمحتى يا آبى

:((

****************************************************

صيدلانيه طالعه نازله

طب لعلمكم انا لو اتمسكت هعترف على كل حاجه وهقول مين اللى كان بيدخل هنا ومين اللى مكنش بيدخل
هه بقى
وعليا وعلى اعدائى بقى
طالما بقت كده

:D

****************************************************

ويكا
الموقع اهو
http://www.statcounter.com/

Mahmoud البطراوى يقول...

Sweet Violet

هو انا خلاص بقيت عبره رسمى

حسبى الله ونعم الوكيل فيك يا جوجل ... انا اتفضحت خلاص ومش هعرف اتجوز بعد كده :((

ستيتة يقول...

ياللهول
يادي الجرصة ام حناجل
والفضيحة ام جلاجل
ياللمهزلة الأدبية
ان الله حليم ستار :)
مدونة بطوط الإباحية
ده حتى بطوط
اللي عنده سوسو وتوتو وفوفو وبيحب زيزي
يالهوي
امال مدونة ميكي يقولوا عليها ايه؟
ولا تان تان
ولا سمير

طب ده انت لازم تتدارى اليومين دول على ما نلم الفضيحة

Unknown يقول...

أموت وأعرف جوجل رد عليك في كل اللي انت قلتهوله ده ولا لا :D

Mafrousa يقول...

هيييييييييييييييييييييه
البوكس بتاع التعليقات ظهر

بقالى يومان بحاول مش عارفةادخل
قلت اكيداكيد انااقل من 18 سنة P:
المهم انا جيت اسلم و اقول كل سنةو انت طيب
او مش تركز مع عمك جوجل اصله كبر و خرف
سلام

NilE_QueeN يقول...

احب اريح ضميرك و اطمنك
انا كملت 18 سنه انهارده



بس يا تري ايه نظام الايام اللى فاتت؟؟

simply me يقول...

هههههههههههه
تعيش وتاخد غيرها
بس انا كده اخاف على مدونتى بقى
انا شيلت الشات بوكس من عندى عشان كنت بلاقى فيه ناس تعبانه كده برضه
معرفش بقى لسه بيدخلو ولا خلاص

سارة درويش يقول...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

اومال لو شوفت اللي جوجل بيحدفهم عليا يا بطوط

انا في واحدة عايزة تتخلص من جوزها جوجل حدفها عليا هههههههههههههه

Unknown يقول...

ههههههههههههههههههههه
وكمان كاتب الكلام بالاحمر
على كده وانا داخله مدونتك اقول ايه
اللهم اعوذ بك من الخبث والخبائث
بس جوجل ده عسل والله
ده انا بلاقي عندي انا كمان بس ربك حليم ستار

R-H-S يقول...

هههههههههههههههه
ايه العيال ولاد الفرطوس دول

دا علي كدا اللي هييجي يدخلي عندي هيدور في جوجل علي مخدرات محشش م الاخر

طيب وكدا مدونتك ممكن متتفتحش في الدول الخليجيه انت لازم تشوفلك حل في بوووب دي

تحياتي

Mahmoud البطراوى يقول...

ستيته حسب الله الحمش
والله يا دكتور مش عارف اقول لحضرتك ايه
انا بحط نفسى مكان ميكى وتان تان مبقدرش اتخيل
الحمد لله انها جت على اد كده
:(

************************************
BISHR2038

انا هقولك من غير موت
جوجل بعتلى امبارح واحد بيدور على شواذ :((

***********************************
واحدة مفروسة

كل سنه وانتى طيبه ياااااااارب
انا عجبنى حل ان جوجل كبر وخرف وعليه هكبر انا دماغى مش غير ما اخرف
:D

************************************
NilE_QueeN
اهو انا كده ضميرى استريح فى اللى جاى
واللى فات بقى ربنا يسامحنا كلنا

:(
*********************************
Bondoka

الشات بوكس محلوله انت يتقدر تمسح الكومنت الى مش عاجبك
انما الانتى بورن لسه قافل مدونتى لحد دلوقتى
:((

**********************************
سمو الأميرة سارة

هههههههههههههههههههههه
انا كده هخاف
انتى سفاحه الرجاله اللى بيقولوا عليها

:))

**********************************

لماضة

طب اعمل بس يا لماضه
انا خفت جوجل يسيح لى ويكتب على مدونتى كده
قلت اسبقه انا المره دى

وانتى داخله مدونتى قوليلى استغفر الله العظيم وادخلى وانتى متردده وخلاص
:))

نورتينى يا قمر

**************************************
عاوز اصحي

موضوع الخليج دا قلقنى بجد
مش عارف بس تغيير لنك المدونه حاجه مش سهله خالص

Unknown يقول...

ازيك يا بطوط اية اخبارك
والله انا اسفة على تقصيرى المستمر
لكنى قلت اعدى اسأل طلما انك مش بتسأل واقولك كل عام وانت بالف خير
ويارب اشوفك عندى فى اوتار قريب

نهر الحب

мαησηα يقول...

هههههههههههههههههههههه يالهوى ده مش انا لوحدى هههههههههههه اما انا بيجيلى حاجات ياربى كلها بردو من نفس النوعية والشاكلة

طيب انا ماعتقدش ان مدونتى فيها حاجة كده ؟؟

يمكن اقعد فصصلى عنوانها بقه يا بطوط وقولى يمكن الاقى حل هههههه

بس بجد بوست جميل وضحكنى جدااا كالعادة ربنا يسعدك يا بطوط يارب ويهنيك

мαησηα يقول...

اه نسيت اقولك ان اغلب اصحابى فعلا مابيدخلوش المدونة بسبب موانع المواقع الاباحية الله يكسفهم هيفتكروا فينا ايه بس

pinky يقول...

:)) ana shayfa el mawdoo3 comedy msh 3arfa leeh
yalla rabna m3ak :P

لــــ زهــــــراء ــــولا يقول...

جوجل ده مبيفهمش لان مدونة حضرتك مدونة راقية ومحترمة تسلم الايادي بجد

starfire يقول...

هههههههههههههههههههههه
فعلا شئ غريب
الناس دى بتستفاد ايه من انهم يشوفوا الحاجات دى
واحد قاللى قبل كده ان الواحد لما يشوف الحاجات دى بتظل معاه لمدة سنه بيفكر فيها
لحد لما يجيى عليه وقت انه يكون بارد مع مراته
مش حاسس باى حاجه معاها
و المشكله ان الشباب لما بيدور على الحاجات دى بيختار حاجات غريبه زى المنتقبات مثلا
ولو دخلت الشات هتلاقى الغريب و العجيب
واحد بيقول ممكن مدام محترمه للمتعه و هديه منى كارت شحن ب 50 جنيه

فتــافيت (رحاب الخضري) يقول...

loooooooooooooool

بلاش ههههههههههههه لاني عديت مرحلة الانتشار P:

ايه ده يا ابني ده انت مسخرة بجد (مسخرة مدح .. بس معرفش ايه نظامها في الانتي بورن بناتعك) هع هع هع .. ضحكات شريرة مستفزة

لا بس بجد انت اسلوبك حلو اوي
جاااااامد اخر حاجة

عارف انا عجبتني اوي ذكرياتي التدوين بتاعتك.. واحتمال اقتبس منك الفكرة.. بس يديني ويديك طولة العمر بقى.. لاني كسولة جدا.. انا عندي سنة وشهرين بس :)

بس حقيقي بجد.. البوستات اللي في السيدبار بتاعك ده وهمي بجد .. تحفة انت فظيع

انا لسه بضحك على فكرة

Unknown يقول...

يافضيحتك
أنا مش بحب أشمت في حد
بس لازم أقطع علاقتى بيك ياعم
أنا أخاف علي سمعة مدونتى :P :D :D