2008/08/24

حقك على راسى

قابلت النهارده خالد همس الاحباب وسكر
وقبلهم شفت التعليقات الى جت لى على البوست الى فات
وفى الوسط التعليقات والحوارات الى جت شات
ولأنى بحترم كل الى بيدخل هنا قررت اشرح الى كنت عايز اقوله فى نقط
وياااااااارب اعرف اوصل الى عايز اقوله وكمان ده يمكن يعرفكم بيا اكتر

خالد قالى ان بعض الناس افتكرت من اسلوب البوست ان يوم اسكندريه انا محبتهوش
واكدت له واقسمت له- والقسم عندى غالى- ان الكلام ده ملوش اى اساس من الصحه.. وانى استمتعت جدا
قام سألنى سكر وقالى امال بس ايه الى انت كنت كاتبه ده

قلتله انا نقلت للناس مشاعر واحد بيكتب بقاله سنيتن و اول مره اشوف مدونين فى الواقع

الناس كانت تلات اقسام من وجه نظرى
ناس مش متابع مدونتها اوى( عرفتها لاول مره .. شخصيات زى العسل وتدخل القلب بجد)
ناس متابع مدونتها وشفت لهم صوره( اجمل بكتير من الصوره .. وسعيد اننا بقينا اقرب)
ناس متابعها اوى وعمرى ما شفت لهم حتى صوره( اتفاجأت بيهم)

وقلت انطباعى كل كل فئه من دول

يمكن مكنتش موفق فى اخيار لفظ "صدمه" .. الى كنت اقصد بيه مفاجأه كبيره
زى لو لقيت "عادل امام " ماشى فى الشارع واجاى ياخدك بالحضن ويبوسك .. وينادى عليك باسمك .. تتصدم .. تتفاجأ .. تتـ .... مش عارف
اهو هو ده الشعور الى كنت بعبر عنه بكلمه "اتصدمت" على اعتبار انه شئ مش متوقع

اليوم كان ممتع فعلا وحكايه النوم والكشرى واسكندريه الصغيره
دى .. كانت تهريج كنت بقوله طول اليوم معاهم والى حضر طبعا فهم
بس والله -غير حانث - فعلا انا استمتعت وانبسط باليوم ... وزعلت انى معرفتش انقله لكم بالشكل الى كنت عايز اقوله
*****************************************
التدوين من وجه نظرى فى كلمتين اتنين بس ... قول الى انت عايزه
قول الى انت حاسه

ملكش دعوه برأى حد غيرك ... ومتقلش كلام انت مش مصدقه ... (كوبى) الى انت عايز تقوله بالظبط ومن غير تذويق ... واعمل له( بست )فى المدونه

التدوين من وجه نظرى هو تأريخ لبعض الاشياء الى عايز آأرخها... يمكن بعد عشر او عشرين سنه احب اشوف انا كنت بفكر ازاى فى الوقت ده

عشان كده بضحك احيانا .. وببكى احيانا ... وبشكى احيانا .. ومش واضع نفسى فى اطار
هقول هنا ان انا بحب ... وهقول بطلت احب ... وهقول نفسى الاقى حد احبه
هقول انا عايز ايه احيانا ؟؟ ... وهضحك على حاجات عملتها غالبا لانى بحب اعمل كده
المدونه يهمنى فيها انى اكون صادق ... لانى بكتب لنفسى .. وبحب اوريكم الى كتبته لنفسى ده
وببقى سعيد انى اسعدكم ....او انكم تحبوا الى بكتبه

******************************************

احيانا بفشل زى البوست الى فات
واحيانا بنجح زى البوست الى قبله
وفى كل الاحوال انا بجد بحبكم كلكم وبحترمكم ومش عايز حد يزعل منى
*************************************
بعض الناس غضبت من الجمله دى
غالبا إن شاء الله هاجي يوم الساقية لانى هكون يومها في القاهرة ... وغالبا برضه هيكون أخر لقاء تدويني هحضره .... لانى مازلت اشعر إن العلاقة عبر الشاشة لها مميزات تفوق ميزه أن تقابل أشخاص رائعين كالذين قابلتهم أمس





ورغم اننى لا افهم وجه الاعتراض فيها ... واظنها ايضا حريه شخصيه
لكن بالفعل هذا قرار ليس نهائى.. حتى انا قلت " غالبا " مش اكيد
وكمان ملوش علاقه بموضوع اسكندريه خالص بجد والله
وسكر قالى النهارده مش هتقدر متجيش
:D
*****************************************
الى زعل من الصوره بقى حقه على راسى

‏هناك 61 تعليقًا:

la Princesa ... WHiSPeR يقول...

انا جه
اول تعليق :)


هو انا كنت سامعه كلامكم بس ماكنتش عايزه اتدخل
انا ماشفتش البوست زي ماهم شافوه خالص
بالعكس انا شايفه ان البوست ده بالظبط هو نفس كلام البوست اللى فات بس يمكن يكون خانك التعبير

بس خلاص

تشاو

mohamed ghalia يقول...

يادكتور بطوط متقلقش إحساسك وصل
الناس كلها بتحبك وفهموا الكلمة صح بس هما بيدلعوا عليك شوية
كل سنة وإنتا طيب يا مان
دمت بود
تحياتى

mohamed ghalia يقول...

نسيت أقول إنى تانى تعليق يلا ياعم متنساش الجمايل دى
سلام

Helium Atom يقول...

انت كدة صح


بس لسة متلخبط ... حاسة ان فى كركبة فى دماغك (بس الكركبة دى مش بتكون موجودة الا عند الناس الكويسين ..لانهم بيحاولوا طول الوقت يوزنوا الامور عشان مش تطلع برة حدود الصح)



عارف لما حد بيكتب اللى هوا حسه وبس؟ ... لما تقراله تبقى مصدقه اوى .. وتتقبل كلامه بكل المتناقضات اللى فيه


ربنا يوفقك يا ابنى

NilE_QueeN يقول...

حصل خير

الموضوع بسيط

appy يقول...

وانا فهمت ده بس كنت بنكش فيك يا ابنى
نورت القاهرة بس انا كان ورايا غسيل يا خويا مقدرتش اجى لو كنت جيت مكنتش عرفت اروح شغلى تانى يوم اصل اختك اللى هى سيادتى بتغسل كل شهر مرة هههههههههه

Noha El-arabi يقول...

و الله كلامك معقول و زي الفل
و من حقك تتصدم و تتفاجأ و تفرح و متعجبش بحاجات كمان
انت فعلا عرفت تعرف التدوين صح اوي اوي
تحياتي ليك يا دوك

قلب مصرى يقول...

بطووووط
أيوة كده وضح للناس الأمور بدل سوء الفهم ده، انت إنسان جميل قوى وسعدت جداً بلقائك يوم حفل التوقيع وأتمنى إن شاء الله نتقابل تانى.

nour shahen يقول...

انا فهمت قصدك من البوست
كان لازم هما كمان يفهموك اكتر او بنفس الطريقه لأنهم شافوك عارفين انت مين وبتتكلم ازاى .. مش عارفه يمكن هما كانوا منتظرين كلام جميل ومرتب وبس
بس انا شايفه انك كتبت بأسلوب جميل قوى مفيهوش اى زعل لأى حد
حسيتك بس زي اللي مخبوط علي راسه ومتلخبط بس كان بيقول كلام عن فرحه بقلبه
ربنا ما يجيب سوء ظن يا رب ويفهموك صح
خالص ودى وتقديرى

ROSE يقول...

اليوم انبارح كان حلو ولا يوم اسكندريه كان احلى P:
D:
لقيت شقه؟

همس الاحباب يقول...

ههههههههههه
ههههههههه
مفيش فايدة فيك يا بطوط
يابنى ما انا قولتلك فقرة النوم دى مشكلة كنت ناوى ارميك فى النيل علشان تنام براحتك لحد قويسنا
يا عمنا احنا متفهمين الموقف وكنا شايفين الفرحة فى عينيك بس حصل سوء فهم من بعض الاشخاص
انت عارف لو حصل نقد منك للاشخاص كان عادى وانتقبله برده ويادكترة منور اسكندرية والقاهرة
والمنوفية هههههههه
بس واضح ان بعض الكلام عليه جمرك فى المنوفية فعلشان كده متحفظ شوية
بس بجد سيبك انت والله انت عسل وبطوط برده
انشوفك امتى بقى
تحياتى اخى العزيز

نهر الحب يقول...

السلام عليكم ورحمة الله وبركاتة
اولا انا سمعت عن لقاء اسكندرية
وقد اية انتم كنتوا فرحانين ببعض واللقاء كان ممتع وكمان لقاء ساقية الصاوى ونادى المهندسين مع بابا ابو خالد وعسقول
وكان نفسى اكون موجودة لكن ان شاء الله المرة الجاية اغلس عليكم واجى
بابا بيقول انك شخصية هايلة
فحبيت ادخل اقرأ افكراك وفعلا ما شاء الله عليك
بالتوفيق يارب
رمضان كريم

صباح الصباح يقول...

على فكرة يا بطبط انا شفتك امبارح فى الساقية وكنت قاعد وراك.. بجد عجبنى هدوءك وتصرفاتك الهادية الراقية..
معايا هنا فى الشغل واحد صاحبى شبهك بالمللى ومتدين جدا جدا وعشان كدة انا باكن لة وانت كمان كل الاحترام

موناليزا يقول...

جميل توضيح وجهة نظرك واعتذارك لمن فهمك خطأ
بس من غير زعل انا كمان اتخضيت من صورة البوست اللى فات

سمر الشافعى يقول...

نورت المحكمه ياباشا

كل سنه وانت طيب يابطابيطووو

mostafa rayan يقول...

بص بقي يا نجم انا شايف ان العلاقو وش لوش احسن بكتير قوي من علاقة التدوين دي
انا في المدونة بعرف افكارك لكن في الواقع بشوفك وانت بتتكلم وانت بتتصرف وانت بتضحك وانت غضبان باخدك كلك كدة على بعضك وفي ناس في الحقيقة افضل كتير من المدونة لقاء المدونين كان طبيعي لأكتمال التواصل اناعرفت دماغك وان الأوان اني اشوفك على بعضك
- انا روحت يوم الساقية مش عارف اذا كنت موجود ولا لاء
بس ان شاء الله نتقابل قريب تاني واشوفك
اخوك : مصطفي

mostafa rayan يقول...

انا قرأت البوست اللي فات معاك ممكن يكون اسم المدونة مختلف عن شكل صاحبها الخارجي في نظر الناس بس اكيد دة له معني عنده هو
انا اتعرضت للموقف دة امبارح يوم الساقية لما واحدة بصيتلي بصة غريبة كدة لما عرفت ان اسم مدونتي (ابداعات شاب ثائر ) هي لاقت شاب كويس ولابس كويس ومسرح شعره - مهضوم يعني - وصورة الثورا في نظرها زي جيفارا شعره منكوش ودقنه طويلة انااخدت الموضوع عادي قوي وضحكت وانا بقولها لاء ماهو انا ثائر بس على نضيف
الأحسن اننا مانخليش الصدمة دي تحصل او نخفف منها ونتعامل عادي
تحياتي ليك مرة تانية

سومه...مجنونه فى بلد عاقل يقول...

هعهعهع هعععععع
انا مش فى الناس دول ولادول ولادول ولادولهم
والمرسى ابو العباس فهمتك وحياه سيدى شبل فهمتك
لا اله الا الله تصبح على خير يا بطوط وليك عندى تاج انتظره فى القريب العاجل
انا بقى مروحتش الساقيه روحت اسكندريه يوم نصيف يمكن نبيض شويه والواحد كان امله كبير فى نزول البحر لحد ما لقيت واحده ست بتغسل هدوم ابنها اللى عامل فيها لامؤاخذه فى البحر والبحر منتن ومبقاش فيه موجه
قولت عليا وعلى الشط ولو نزلت البحر ابقى حماره
بالنسبالى اسكندريه اما رحتها كانت شمسيه وكراسى مكسوره
تحياتى ليك سومه_87

مؤمنه يقول...

السلام عليكم ورحمة الله وبركاته
حصل خير
وكل عام وانت بخير والى الله اقرب وفى طاعته ادوم
ورمضان كريم عليك وعلينا
والسلام عليكم ورحمة الله وبركاته

aya يقول...

نحنوووووووووود

ازيك يا دكتور
والله واحشنى جدا

اخبارك ايه

وبجد كان نفسى اشوفكو اشوف اخبار العملى معاك ايه ؟

ياربت كون بخير يا محمود
وصدقنى محدش هيفهمك غلط لانك انسان طيب ومعلش ساعات كده بيحصل سوء تفاهم كده وبيعدى على طول على طول


كل سنة وانت طيب يا نحنووووووووووود رمضان قرب

عايزة فانوس يا محمود بقى


كل سن وانت بخير يا دكتور

بطوط حبوب يقول...

a Princesa ... WHiSPeR

احييكى انك شفتى البوست بطريقه تانيه
فى ناس كتير زعلت فكنت مضطر اشرح تانى

تحياتى لذكائك
:)
**********************************
mohamed ghalia

ماشى يا عمنا
ومش ناسى جمايلك
*********************************
Helium Atom

هيليوم .. مش بحب حد يقعد يحلل فى شخصيتى
رغم ان تحليلك صح وانا لسه دماغى مكركبه

ربنا يوفقك انتى كمان
:)
*********************************
NilE_QueeN

انا بقول كده رضه
*********************************
appy
لما كله فهم كده امال مين الى مفهمش
:D
بقى تفضلى الغسيل على يا آبى
لن انسى لك هذا الموقف

بطوط حبوب يقول...

Noha El-arabi

ربنا يخليكى يا رافعه روحى المعنويه

قلب مصرى

انا والله كنت اسعد
انت انسان يتقل بالالماظ
هو قيراط الالماظ دلوقتى بكام؟؟
:D
=================================
nour shahen

والله انا احترت
البوست الاول كله زعل
التانى كله بيقول انه كان فاهم
شكلى انا الى عبيط
هههههههههههههههه
ربنا يخليكى يا نور ياااارب
تحياتى لك
=================================
ROSE

يوم امبارح كان حلو جدا وكان فيه ميزه ان كله مشغول
:D
وملقتش شقه
بس جتنى فكره احول اسكندريه وااجر شفه هناك
دوريلى على شقه هناك بقى
:D
==================================
همس الاحباب
شوف الراجل الى بيهرج
وايه جاى يضحك
اخرج ياعم انت من هنا عشان هرش ميه وهغرقك وانت حر

وجاى تغلط فى المنوفيه بدل ما تيجى شايل كفنك
لانك انت اساسا السبب فى البوست ده الى مطلعنى زى العبيط لافاهم الناس فهمت ايه وانا فاهم انا عايز اقول ايه
روح يا شيخ .... واوعى تيجى
:D

ال انت عسل يا بطوط ال
جاى تقولها .. ل من فضلك متقلهاش
ومش فاكر باقى الاغنيه
==================================
نهر الحب

بابا ابو خالد مجامل جداااااا وهو شخصيه زى العسل ربنا يبارك فى عمره ياااااااااااارب
وان شاء الله متنكش اخر زياره

رمضان كريم

بطوط حبوب يقول...

صباح الصباح

مصر فيها اتنين شبهى
يبقى لازم البلد دى تتقدم وتوصل لل .. لل .. للقمر شغال؟؟
ربنا يخليك ويكرمك بس ليه مدتنيش فرصه نتعارف على بعض
ان شاء الله تيجى فرصه بعد كده
نورتينى وان شاء الله دايما

===================================
موناليزا
يبقى
حقك على راسى
:)

===================================
سمر الشافعى

وانتى طيبه يا قمر

===================================
mostafa rayan

انا متفق معاك فى كل ده
بس هل ده ضرورى؟
فاكر لما اسامه منير جت صوره على النت
كل الناس اتخضت واظن شعبيته قلت لفتره
وفى ناس العكس
السؤال بقى ايه الى يريحك انت؟؟
:)

نورتنى
===================================
سومه...مجنونه فى بلد عاقل

انى منتظر تاجاتك يا سماسم الى هتدوينا فى داهيه
ربنا يستر

هههههههههههههههه
من واحد واتنين يؤدى الى
ان اسكندريه كوفى شوب وقلعه وشمسيه وكرسى

تحياتك خديها بدل ما نجيب تحيات جديده احنا منايفه وعيب
:)
===================================
مؤمنه
وعليكم السلام ورجمه الله وبركاته
رمضان كريم
===================================
aya

يااااااااه يا بنتى انتى فين؟؟
العملى شغال ربنا يستر فاضل عشرين يوم ونشوف

هو ده اخر بوست شفتيه؟؟
كل سنه وانتى طيبه
ومفيش فوانيس
معندناش بنات تشيل فوانيس
بنت ادب!!!

عالم حبيب يقول...

بطوووووط

ما شاء الله عليك حبيبي .. مدونتك زي العسل

أول مرة لي أتشرف بدخول مدونتك الجميلة دي .. وأول بوست اقرأه هو البوست ده .. يمكن ما قدرتش افهمه بشكل كامل لأنه متعلق باشياء اخرى

لكن في حاجة وقفت عندها

وغالبا برضه هيكون أخر لقاء تدويني هحضره .... لانى مازلت اشعر إن العلاقة عبر الشاشة لها مميزات تفوق ميزه أن تقابل أشخاص رائعين كالذين قابلتهم أمس

شوف حبيبي انا قابلت ناس كتير من اللي اتعرفت عليهم في الانترنت .. مش عن طريق المدونات لأني بصراحة كنت بعيد عن عالم التدوين .. لكن عن طريق البالتوك وغرف المحادثة .. من دول كتير .. فلقيت ان المقابلة على ارض الواقع بجد جميلة .. الانترنت عالم الخيال .. لما تشوف الناس على ارض الواقع غير

أتمنى ان شاء الله نتواصل على خير ولما ارجع مصر ربنا يقدر لي اللقاء مع الأحبة جميعا

محب الخير لك : حبيب

Gelaan يقول...

مش شايفه اى غلط في كلامك
انا قرات البوست الى فات وبجد استمتعت اوى باسلوب السرد بتاعك وبجد حسيت روح حلوة في قلب الكلمات وبين السطور عرفت اد ايه انك بتحب الناس دي بجد
انتا حد كويس وكلامك مفهوم اوى
غالبا كلمه صدمه بتخلينا نحود لجهه تانيه
بس مش عارفه ليه انا اما قراتها مش حسيت كدة
وع كل حال انتا وضحت اوى كلامك في البوست دة ويارب يجمعنا دايما في الواقع وفي الجنه
وكل سنه وانتم طيبين ورمضان كريم
تحياتى واحترامي

maha zein يقول...

امممممممممممممممممممممم
بيتهيقلي قلت اللى جواك
ووضحت لنا كان قصدك ايه
الكل كده فهم
وخلاص
محدش يكلم بطوط تاني بقه
فينش
بعدين يا بطوط مينفعش متجيش اي لقاء وانت موجود هنا
مينفعش اصلا
بجد مينفعش
بطوووووووووووووووط
قول اللى نفسك فيه
وعبر
كوبي بيست
ومش مهم مين يفهكمك اذاي
الاهم انك لو حسيت ان الناس مفهمتكش
ابقه اكتب بوست وسميه حقك علي راسي
ماشي
ماشي
تحياتي يا محمود
واكتب كل اللى نفسك فيه
سواء بتحب بتكره بتعيط بتضحك
خلي مدونتك منفسك
والا هتتخنق
يلا يا برنز
تحياتي ليك تاني

سومه...مجنونه فى بلد عاقل يقول...

فيك الخير يا بطوط انك رجعتلى التحيات تصدق بايه كنت بدور على اتنين جلد وبوش عريض ومنغير رباط
طلعت بلديات صحيح

د/اجدع بنوته يقول...

معاك حق جداااااا

ويمكن انا زيك بالظبط

اللى بعرفهم ف العالم الافتراضى

بحب افضل اتواصل معاهم ف العالم الافتراضى

لم تعترينى الى الان جرأه قهر العالم الافتراضى

والانطلاق مع ابطاله ف العالم الحقيقى

وانا فاهمه انك مكنتش تقصد انك محبتش اليوم

تمام بطوط عبرت عن حجات كانت جوايا فعلا

تحياتى

دكتور حر يقول...

دايما مزعل الناس كده


لكن فعلا


مبسوط جدا اني شفتك
ومبسوط بصحبتك في الطريق كمان


ربنا يكملك بعقلك يا محمود يا خويا


:))))

(احمد سكر ) يقول...

بردوووووووو مش هتقدر

وهفكرك فى اول لقاء للمدونيين

ياحبيبى دا عالم سحرى

وانت دخلته بمزاجك

وابقى قابلنى لو قدرت

يامحمد عاوز ااقلك حاجه

انى احبك فى الله

وهى ابلغ من اى كلام

احمد سكر

ضى القمر يقول...

اخى بطوط

أولا أسمحلى ان اكون اوضح معك قليلا ..

أراك قمت بعرض تبريرات عن وجهة نظرك .. ولو انى ارى ان كلامك لم يكن به يا يغضب احد .. فالمقالة السابقه كانت أول مقالة أقرأها لك .. ومنها فهمت ما قصد احساسك واحرفك .. مابالك بأصدقائك المتابعين لك ويعلمون جيدا ما هو احساسك وتفكيرك ..

أخى الكريم ..

لقد قلت وجهة نظر تحترم . وكنت تختار ألفاظك بحكمه بالغة .. ربما فقط البعض كان يحتاج لتوضيح اكثر .. لكن لا تحمل نفسك أكثر من طاقتها .. لقد كتبت الموضوع الحالى بحرفه اكبر واكبر واوضحت وجهة نظرك أكثر وأكثر ..

واعتقد بعد هذه الكلمات ستجد الدعوات من الكل كثيرة لك لحضور اللقاءات ...هههههههههه

تحيه لك ولما قرأت من أروع احاسيس صادقه بحق هناا .

واخيرا أتمنى منك زيارة مدونتى واخذ الواجب التدوينى الذى وجهته إليك ..

هيا سريعا .. سأدخل مرة أخرى للتصحيح ..

تحيه معطرة من القلب لك :)

بذرة امل يقول...

عجبنى اوى رايك عن المدونة
تقريبا ده كان هدفى فى بداية التدوين
هى تأريخ للاحداث اللى بمر بيها
على فكرة مدونتك بسيطة اوى واجمل حاجة فعلا انك تحس بصدق الكلام
تحياتى

سارة علي يقول...

ازيك يا محمود
اسفة اوى على عدم متابعتى لمدونتك وكتاباتك بسبب بعدى عن التدوين الفترة اللى فاتت
بس ممكن تقولى اية سبب اختفائك من نور الجنة ؟؟ انا واللهى اخدت فترة مكنتش متابعة التدوين خالص بسبب ظروف بس رجعت اية لما صدقت مدونش يعنى هههههههههههه
بجد يا محمود لو مكنش عندك مانع يعنى ارجع دون فى نور الجنة رمضان كريم
بالنسبة للبوست معرفش بس اكيد فى فرق بين متابعتك للمدونين على شاشة وكى بورد وبين انك تشوفهم على الحقيقة
تحياتى

بطوط حبوب يقول...

عالم حبيب
ربنا يخليك ياااااارب دا بس من ذوقك

وان شاء الله متكنش اخر مره تزورنى فيها

الموضوع ده مازال وجهات نظر
انا نفسى كل ساعه بقرار
بس متنكرش ان كل حاجه ليها ميزتها

ربنا يكرمك ياااااااااارب
===================================
Gelaan

دا بس من ذوقك
===================================
maha zein

نورتى المحكمه
وابقى اقرى الكومنت ده قبل ما تكونتى تانى
دا انتى دخلتى قلبتى المدونه لما قرلايتى البوسيت الى فات
وكمان ياريت عندك حق
لا دا بالغلط
ياله انا مسامحك بس هاتى 5 جنيه
:D
===================================
سومه...مجنونه فى بلد عاقل

يا سومه انتى مش زى اى حد
انا بعاملك معامله المنوفى لاخوه
:D
====================================
د/اجدع بنوته

صدقينى كل حاجه ليها مميزيتها
===================================
دكتور حر

تصيحيح بس يا دكتره
هو مش دايما انما غالبا
:D
ربنا يكرمك ياااااااارب
==================================
(احمد سكر )=

شكلك هتطلع صح
لتس ويت اند سى

احبك الله ...ويعلم الله كم هى محبتك فى قلبى

بس انا اسمى محمود :D
====================================
ضى القمر

هو فى حاجه بس
التعليق باللغه الفصحى ده بيخلينى احس ان الكلام كبييييييييير
:D
ربنا يكرمك يااااااااارب
===================================
بذرة امل

كلنا هذا الرجل
شرفتينى بالزياره
===================================
سارة على

معلش انا اسف
مش هقدر ارجع لمدونه نور الجنه
انما لو كتبت حاجه وعجبتك ... لو طلبتى تنشريها هناك مش هرفض

وعود احمد

Sourah يقول...

بصراحة يا عم بطوط انا شايفة ان حبيبك يهضملك الزلط و عدوك يتمنالك الغلط ..
و علشان اللي بيقرولك مش اول مرة يقرولك ، يعني اكيد بعض من ملامح شخصيتك يكون اترسم في ذهونهم من خلال كلامك ، و عشان زي ما قولت المدونات دي عشان نكتب كل اللي حاسينه بحلوه و برمه ، انا شايفه اني دي رؤيتك يا عم الدكتور ، و عادي يعني ، انت لا جرحت في حد و لا عيبت في حد ، بس برضه بقوللك كويس انك بادرت بالاعتذار و اشتريت خاطر صحابك ، و لو ان من التعليقات ما حدش زعل و لا حاجة ..


انطلق يا دوك و متعنا اكتر بكتاباتك ..
و خر الكلام سلااام ..!!!

رضوى يقول...

بما انى مش موجودة فى الموضوع من الأول

بس هقول كلمتين

دى اول زيارة ليا فى المدونة وجميلة جدا ماشاء الله

تانى حاجة بعد سنة ولا سنتين لما يكون كل واحد فيكو اتجوز ولا راح اشتغل برا ولا أى حاجة
هتفتكروا الموقف ده بحلوه ووحشه وتقولوا يااااه كانت أيام جميلة

:):)
مع تحياتى ::panadol extra

shaimaa samir يقول...

السلام عليكم..
(ابتسامة عريضة)
فى البدء
كل عام وانت الى الله اقرب
وعلى طاعته ادوم
ولسنة نبيه اتبع

ثانيا
من الواضح اننى لم ازرك فعلا من قبل
مدونتك دخلت معايا فى مدونة تانية
بس خيرا ها انا هنا الان
ولكن لا انكر قرائتى لاسمك فى تعليقاتك عند المدونين الذين اتابعهم
اما عن التدوينة السابقة والحالية
ليس لى تعليق على تكوين الالفاظ وخلافه
المهم انك اقسمت بانبساطك وهذا يكفى
لا ادرى لماذا قررت عدم تواجدك فى اى لقاءتدوينى!!
تفسيرات تلك الكلمة عندى لها الكثير
ولكن اامل ان يكون قرارك هو الاصوب لانك الاعلم بك!!
رائع تلك الجلسة التى تود ان تجلسها معك وكلنا نحتاجها...
شىء اخير...
كثير من المواقف التى تمر بنا
وكثير من التعليقات التى نسمعها
وكثير من ردود الفعل الذى نلقاها
هذة الاشياء الثلاثة
اعتقد انها ستكون للطرفين
الطرف القائل
والطرف المتلقى
فى النهاية
على الرغم من اننى لااتواجد فى تلك اللقاءات
الا ان طلب ابو خالد عندى له معنا كبير
لذا انا بصدق استمتعت باليوم
واستفدت....
جزاكم الله خيرا
كل التقدير والاحترام لشخصكم

Two in One يقول...

جميل تعريفك للتدوين انه تأريخ الحاجات اللي عايز تأأرخها

اما عن تصنيفك لردود افعالك تجاه اللي شوفتهم وانك بتفضل انك تشوف جمال الارواح عبر الشاشة فده حرية شخصيا انا شخصيا مااقدرش ادلى بدلوي في البوست ده ولا اللي قابله لاني مش بحضر لقاءات تدوينية ولا بفضل التاجات ولكن باستمتع بقراءة فكر الاخر من خلال بوستاته

كل سنه وانت طيب

ســــلام

ضى القمر يقول...

بطوط

خلاص مش هتكلم بالفصحى .. ولا تزعل :)

المهم ليك عندى واجب تدوينى .. ليه ما اخذتوش ؟؟

يارب تفتكر وتدخل وتجاوبه .. ليه انا اللى ادبس فيه لوحدى

:)

قطرات من شواطئ الحياة يقول...

جميل أوي التدوين من وجهة نظرك و تبريرك لكلامك اللي فات
بس عندي ملاحظة صغيرة على السطر اللي تحت اسم المدونة عشان خاطر صلاح جاهين
البيت بيقول (يا طير يا "عالي" في السما طز فيك)

تحياتي لك و كل سنة وانت طيب بمناسبة شهر رمضان !

فاتيما يقول...

بطوط
يا حبوب
ازيك يا دكتور
أنا أزعم إنى فهمت البوست السابق كويس
و لما قريته إفتكرت قصيدة لصلاح عبدالصبور الله يرحمه عنوانها
أجافيكم ... لأعرفكم
كلامك فكرنى بيها قوى
طبعاً وصفك للمشوار
بإنه كام مكان و بس
إدى إنطباع إنك كنت عاوز تلف إسكندرية كلها بس إتقيدت فى مكان واحد و دا معجبكش قوى
كمان تصنيفك للناس
اللى قابلتها كان واضح و إنت ذكرت أسماء بعينها و عبرت عن مشاعرك تجاه رؤيتها
بينما إنسحب لفظ الصدمة على كل من لم تذكر إسمه
فالموضوع إلتبس على اللى قرى البوستات التانية اللى تناولت اللقاء
و طبعاً فى بالهم إستغربوا
بطوط قصد مين بإنه إتصدم فيهم ؟
و مين دول اللى ليهم أضرحة فى السعودية ؟
و بعدين الجمل النهائية بتاعة وقفتك مع نفسك عشان تعرف إنت فين و رايح فين إدت إنطباع إن اللقاء
كان هايف
و ممل
و أقل من توقعاتك قوى لدرجة إنك راجعت روحك فى التواجد وسط العالم دى
و كمان خدت قرار إنك متقابلهموش وجهاً لوجه تانى عشان اللقا عن بعد أفضل بكتير من مشاهدتهم رؤى العين ...
طب يعنى إدينى عقلك و قولى ؟
هتقولى دى تفاصيل دقيقة قوى و الحكاية مش بالكلمة
هقولك لأ طبعاً كل حرف بيتكتب بيفرق
إنت بتكتب لناس الكتابة جزء من يومهم و حياتهم مش ناس سهلة ...
كنت متوقع إيه يا بطوط ؟
حكاية أجافيكم لأعرفكم دى مش واضحة للعيان كدا ...
خصوصاً إن فيه حاجة إنت يمكن مش واخد بالك منها و مهمة جداً ....
المدونين دول مش ناس عادية كدا
دى ناس على مستوى فكرى و ثقافى متميز
التدوين وسيلة أساسية عندهم للتواصل مع ناس آخرين متوافقين معاهم فى الفكر و العقل
و بالتالى وجودك كمدون فى هذا العالم اكسبك دور يمكن متكونش واخد بالك منه قوى يا بطوط
يعنى رأيك فى المدونين اللى قابلتهم مش هيتاخد على إنه رأى تدوينى بحت بتأرخ بيه لنفسك فقط
لااااا
إنت بتأرخ لكل اللى بيقرالك
و بالتالى لما تيجى مثلاً تكتب البوست
دا كل اللى بيقرالك هيبقى عايز يشوف الناس دى بعيونك
دى مسئولية مرعبة يا بطوط
جايز إنت مش عاوزها و لا هماك و لا كنت حاططها فى دماغك من أساسه لأن طبيعتك مبتحبش حد يملى عليك أرائك
بس الأسلوب و فقط هوه اللى بيدى احياناً شكل مختلف تماماً
عن اللى كنت قاصده
المهم على رأى سكررررر
دا عالم سحرى و مش بالساهل تعرف تفلفص منه
و على رأى الصباغ
دخول التدوين مش زى خروجه
يعنى إنت إتمسكت يا حبوب
و وقعت و لا حدش سمى عليك
لأ
كلنا هنسمى و ميهمكش حاجة
و أرجو ميكونش كلامى رخم و ضايقك
كان ممكن مقولشى حاجة بس أنا بنقلك إنطباع جالى أنا شخصياً اول مرة قريت البوست و قبل حتى منت تعدل فيه فى الآخر
و قعدت أقول لروحى أنا كنت محبطة قوى كدا و يا ريت مكنش شافنى احسن
و جالى إحساس إنك منبسطش خاااالص
بس مدام إنت صريح و بتحب أقصر الطرق يبقى أقول رأيى
و الرزق على الله
كل سنة و إنت طيب
و رمضان كريم عليك يا حبوب

مها يقول...

إنت بتأرخ لكل اللى بيقرالك
و بالتالى لما تيجى مثلاً تكتب البوست
دا كل اللى بيقرالك هيبقى عايز يشوف الناس دى بعيونك
دى مسئولية مرعبة يا بطوط
========
اسمحى لى أن أختلف معكى يا فاتيما
هذا تحميل للموضوع أكثر من حجمه الحقيقى واستخلاص من كلام بطوط أكبر مما كان يقصده من خلال طرحه للفكرة..
نحن يا عزيزتى أكثر نضجاً من أن نحكم على البشر بعيون صديق رآهم لأول مرة.. وأعتقد أن بطوط حين أبدى رأيه فى بعض المدونين كان معنياً بالدرجة الأولى ليس بوصف الأشخاص ولا الحكم عليهم بقدر ما كان معنياً بمقارنة صورتهم فى مخيلته قبل أن يراهم وصورتهم بعد اللقاء.. وهو نفسه يعترف إنها مجرد انطباعات أولى - قد لا تدوم رغم أنف الإعلان الشهير - وعلى ذلك فإنه لا حرج علينا إن نحن ناقشنا فكرة اللقاء فى الواقع مقارنة بفكرة اللقاء الأثيرى ، ولندع شخوص المدونين جانباً لأننا ببساطة لم نلتقيهم وبعض منهم لم نقرأ له أساساً أو نرى صورة له.

ونشكر بطوط حبوب على طرحه لهذا الموضوع فى أول مرة .. وتوضيحه لبعض الأشياء التى أسيئ فهمها فى تانى مرة ..
واعطاء جزء كبير من وقته للرد على التعليقات فى المرتين..

وأقفل المحضر فى ساعته وتاريخه

بطوط حبوب يقول...

Sourah
هو بصراحه كل الى اعترضوا على البوست كانوا من فئه ( حبيبى) بس الظاهر حصل سوء تفاهم

رغم انى كنت متوقع ان من متاعبتهم لى هيفهموا كل حرف

حصل خير
تحياتى لمرورك الكريم

=======================
رضوى
يا دكتوره المهم انك لحقتى الموضوع حتى لو مش من الاول :D

انا متفق مع كلامك وعشن كده بأرخ كوبى بست

=======================
shaimaa samir
وعليكم السلام
( ابتسامه مش عريضه اوى ) :D

بس زيارتك ليا اسعدتنى جدا
جدا
جدا
وكل سنه وانتى للجنه اقرب

حضور لقاءات التدوين .. مازلت اقران بين مزايا خيالى ومزايا الحقيقه
لعل احدهم يفوز
:D

جزاكى الله خيرا
=======================
Two in One

الله عليكى
بجد تعليقك يمثل وجه نظرى فى حاجات كتير
وجه نظرى لحد الان
ربما تتغير

كل سنه وانتى طيبه
======================
ضى القمر

:)
هجاوب التاج متأخر شويه
معلش
اصلى مش بحب التاجات اوى
:)

=======================
قطرات من شواطئ الحياة

بيت جاهين الظاهر والله اعلم فيه قولان لاهل العلم
:)
هشوف الموضوع ده حاضر

تحياتى لك وشكرا على رأيك

اسكندراني اوي يقول...

محصلش حاجه يا دكتره
كل سنه وانت طيب ولك كل التحيه وخالص الدعاء

بطوط حبوب يقول...

فاتيما
======
القاعده المعروفه جدا بتقول
رأى واحد شافنى مره واحده غلط
سواء كان ايجابى او سلبى

رغم ان القاعده دى ملهاش محل من الاعراب فى موضوعى لانى اساسا مقلتش رأيي فى حد
انا قلت شعورى ( ومش فى حد ) انما فى حالات
وقسمت الحالات الى (ناس اعرفها , معرفهاش , اعرفها وشفت صورتها)

الى بيقرا لى المفروض عارفنى وده بيدنى مساحه من الحريه ( حتى لو اتكلمت عن اشخاص )
بس مش عارف ايه الى حصل??

على العموم حصل خير وانا قلت اوضح وجه نظرى اكتر .. لان فى كتير مفهموش البوست وكنت مضطر اشرحه

تعليق ( مها ) ممكن يوضح كلامى ده اكتر
هو وتعليق ( Sourah ) باستثناء اول سطر
الجزء الخاص بليه انا (بدون) اظن انه شرح حاجات كتير برضه

رغم انى اضايقت جداااااا ان فى ناس زعلت وتصورى انى بكتب لناس ( مش زى اى ناس) وكمان يعرفونى وبيقروا لى
ان كل ده يدينى مساحه كبيره اقول احساسى بصدق من غير ما اضطر اشرحه
على العموم بجد اسعدتنى رؤيتك ... وتعليقك
رغم لمحه الحزن التى تظهر فى تعليقى

بطوط حبوب يقول...

مها
===

عجز لسانى عن شكرك


------

اسكندراني اوي

بدور على لنك مدونه حضرتك بقالى كتير مش عارف اوصل

حضرتك شرفتنى بالزياره وشكرا على اليوم الجميل الى فات

Soooo يقول...

تصدق حلو حوار انك تعمل بوست عشان تشرح بوست

انا بافكر اعمل مدونه عشان اشرح مدونتي

وبعدين ايه ده
لا لا لا
يعني انت بتقول انك...
لا لا لا
وبعدين تيجي تقول...
لا لا لا
وازاي اساسا تقول...
لا لا لا
وأي دمعة حزن
لا لا لاااا

======
بص يابو البطابيط .. ارتبط مرادف صدمه عندنا انها صدمه مش ظريفه او حادثه وطلعت فوق شجره مثلا
عشان كده الناس استغربت الموضوع ككل
كنت ممكن تقول اتفاجأت مثلا او اندهشت
دي بتحمل المعنى الكويس والمعنى اللي مش كويس
بس كويس انها طلعت كويس
وانت كويس
طب كويس





سلامووووووووووووز

Sometimes يقول...

على فكرة يا بطوط انا كنت فاهماك
بس ده معانه ايه بقى انا ذكية ولا ايه
هههههههههههههههههههههههههههه

لا بجد انت عندك حق
كل سنه وانت طيب

جمعاوي يقول...

السلام عليكم بطوط

ومتشكرين على التوضيح

بس هوه ده اللى عندى فى حاجة تاني

كمان انا حاسس انك مش عاوز تسمع منى حاجة اكتر من كده كفاية فاعد فى وشك خمس ست ساعات يعنى كفاية كده وقتك انتهى يلا سلام
ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

بطل ضحك يلا سلام

دعاء مواجهات يقول...

اولا كل سنة وانت طيب

ثانيا بجد انت يامحمود

بتدلل انك حد جميل اوى وبيراعى مشاعر غيرة

ودة ميزة مش ف كل الناس

انا سعدت بلقائك جدا

واتصدمت فيك بصراحة......

ههههههههههههههههههههه

طلعت اجمل مما كنت متخيلة

مقصدش شكلا طبعا ولكن روحا وخلقا

دمت بخير

وياارب نشوووفك ديما على خير

سلاام

عيله مفتريه سابقا يقول...

بطوووووووووووووووووووووط ازيك يا دكتور

هى كلمة اتصدمت ممكن تكون اتفهمت بالمعنى العكسى للى انت تقصده

بس عادى يعنى يمكن عشان الناس بتحبك

سلامى ليك
وكل سنة وانت طيب
رمضان كريم

t3ban يقول...

قول الي انت حاسه
فعلا هو التدوين
حاسه

(احمد سكر ) يقول...

حووووووووووووودا

الغلطه مش مقصوده والله

اصل انا ولادى محمد ومحمود

وكتير بغلط فيهم
هههههههه

وانا باعتبرك واحد منهم

فا متاخدشى على غلطى

كل سنه وانت طيب يادكتووووور محمود

واتجدعن علشان احشى ضررروسى


احمد

بطوط حبوب يقول...

soooo
ايه رأيك يا بوس على الحوار ده
كل مدونه انزل لها بوستين اشرحهم
:D

=====

خلاص بقى
مدرتش الى جرى
مش انا خلاص
فهمت غلطى
:D
نورتنى يا فنان

---------------------------------------

Sometimes

البوست ده كله بيقول انا فاهم
ههههههههههههههههه
كل سنه وانتى طيبه وفاهانى كده ع طول
من البوست الاول قبل الشرح
:D

---------------------------------------
جمعاوى

ايه ياعم انت
متدينى صورى وجوباتى ونخلص من العلاقه دى
جاى تضربنى فى المدونه
ماشى يا سيدى تشكر
:D
-------------------------------------
دعاء مواجهات

اه انا حد جميل :D
اهو انتى الى عرفتينى على حقيقتى بس انا مبحبش اشكر فى نفسى
هههههههههههههههه

ربنا يخلييكى ياااااااارب

يااااااارب اشوفك على خير برضه :D

شكرا لمجاملتك الرقيقه يا اجمل دعاء فى الدنيا
-----------------------------
عيله مفتريه سابقا

ياااااااارب اكون وضحت بس
اصلى حسيت انى مطلوب حيا او ميتا
شكرا للمرور
-----------------------------
t3ban

مش كده برضه!!
يبقى احنا متفقين
تحياتى لك
-----------------------------
(احمد سكر )

لالالالالا انت كنت نسيت اسمى
ربنا يخليلك محمد ومحمود ياااااااارب وتفرح بيهم
بس انت نسيت اسمى ليه؟؟

هه اعترف
على فكره انا كنت فاهم انها غلطه كيبورد بس كنت بصلحها للناس تتلغبط ;)
طبعا اوعى تصدق
تحياتى لك بجد

مها يقول...

بطوط

مصطفى قفل المدونة والتعليقات!!!!
هو كويس؟؟

كل سنة وكلكم طيبين ورمضان كريم

dina seliman يقول...

اولا انا معاك جدا انك لما بتتعود على حد من غير ماتشوفه بتبقى راسم له صوره من خلال كلامه
ومش معنى صوره انها حلوه او وحشه
المعنى ان انت بتحس انك قابلت حد تانى
ومهما حاولت تأقلم نفسك
وبتقدر كمان تحس منه انه شافك حد تانى
ده شعوور عند الكل

عموما عالم النت لما يتحول للحقيقه ع دى خطوه جريئه بس هتفرق كتير بعد كده
وهتكسر حواجز نفسيه اكتر

وتعليق على البوست اللى فات
اسكندريه لسه كبيره والله ماكشتش ولا حاجه

همس الاحباب يقول...

هههههههههههههه
كل سنة وانت طيب
ورمضان كريم
انا بضحك على ردك على تعليقى بصراحة
يلا روح نام

سومه...مجنونه فى بلد عاقل يقول...

هههههههه جامده يا بطوط

سومه...مجنونه فى بلد عاقل يقول...

اخجلتم تواضعنا يا اخويا فى الوطن

سومه...مجنونه فى بلد عاقل يقول...

هى دى الاخوه ولا بلاش

غير معرف يقول...

It's a shame you don't have a donate button! I'd without a doubt donate to this excellent blog! I suppose for now i'll
settle for book-marking and adding your RSS feed to
my Google account. I look forward to fresh updates and will share
this website with my Facebook group. Chat soon!


my homepage :: click here