2012/09/08

اكتئاب الخطوبه





انا لازم اعترف ... انا مصاب بمرض " اكتئاب الاختيارات " كل ما كان في خيارات متاحه ادامى اكتر كل كانت فرصه اصابتى بالاكتئاب اكتر.
الموضوع بيبدأ ان الخيارات تكتر .. افكر فيها وافكر فى ازاى هتغير مسار حياتى كلها .. يبدأ مخى يدى اشاراه لقلبى انه يدق الدقه الرتيبه الممله دى ... وفى النهايه اكتئب.

مش عارف المشكله بتبدأ منين لكن يمكن لأنى كائن روتينى لاقصى درجه .. بكره التجديد الحاد فى حياتى ..يمكن اقبل بقليل من التجديد التدريجى والمرحلى .. لو فى حاجه بتسعدى ممكن اعملها مرات ومرات ومرات بنفس الطريقه .. خلفيه الويندوز , ثيم الموبايل  من الحاجات اللى عمرى ما غيرتهم .. ولو اخويا غيرهم بحس بشويه تململ لوقت طويل وبعدين اعتاد على الثيم الجديد واصمم على عدم تغييره ,لو اتنقلت كنبه من مكانها فى البيت , غيروا سجاده فى البيت مش بحس بفرحه الحاجه الجديده بالعكس بحس بازعاج لكام يوم لحد ما اخد على الوضع الجديد
انا شخص روتينى جدا بدرجه عنيفه.
وانا بحالى اللى انا فيه دلوقتى مستريح .. بروح الشغل مش كل يوم لكن بروح على الاقل 3 او 4 مرات كل اسبوع , بروح عيادتى كل يوم بعمل نفس اللى بعمله كل يوم ,, ويوم الجمعه بخرج اتفسح واشوف اصحابى . كل اسبوع بعمل كده بالظبط.

اكتر شئ ازعجنى الفتره اللى فاتت .. هى قرار امى وزنها انى لازم اخطب .. الفكره لا تبدو سيئه بالنسبه لى فى حد ذاتها .. لكن تغيير استايل حياتى اللى بيبدوا الاسوأ لى على الاطلاق . انا عندى اسأله كتير مش عارف اجابتها اصلا .. وحاسس باكتئاب لانى مكنتش مخطط حياتى تمشى بالشكل دا.
ازاى ممكن اقعد مع بنت مره او اتنين او تلاته واقرر انى هعيش معاها العمر كله؟ .. ايه اللى ممكن يبهرنى فيها للدرجه دى؟ ولا اصلا مش المفروض انبهر؟
ايه اصلا الحاجات اللى بتفرق معايا فى الحكم على اى بنت او اهلها؟ وايه اهميه اصلا انى احكم على اهلها؟ .. ايه الحاجات اللى بحبها اصلا ؟؟ وهل مطلوب منى اصلا انى انبهر ولا مطلوب انى احس انها مقبوله , ولا المطلوب انى افرح اول ما اشوفها؟

كانت اول تجربه ليا النهارده .. خرجت منها وانا مكتئب .. البنت ما شاء الله جميله .. اهلها طيبين .. بس مش شايف فيها حاجه تشدنى انى افضل جنبها .. مش حاسس انها واو او انها حتى مفيش زيها او اللى زيها نادر .. بالعكس شايف ان فى منها كتير .. انا مش عارف ايه اللى بقوله دا .. وهل مقدمه البوست دا هى السبب .. احساسى انى هغير سيستم حياتى هو اللى بيخلينى مش حاسس انى فرحان وبالتالى مش حاسس انى عاوز اكمل او اروح لهم تانى؟
انا منزعج وحاسس انى غير ناضج وغير مؤهل لخطوه كبيره زى دى .. وكاره الطريقه ويمكن طريقه انى اعرف البنت ونبقى اصدقاء قبل ما اروح اتقدم بقيت متعقد منها من تجربتى الوحيده اللى مريت بيها ؟
باختصار انا مكتئب ومش عارف ليه  ومش عارف اخرج من المود دا ازاى :(

هناك 14 تعليقًا:

MEROOooOOoo يقول...



على فكرة أنا زيك كده .. مش بحب التغيير وبتوتر وبخاف منه
و كمان دايما بقول لأصحابى لما بيدعولى بالزواج
(الاضراب عن الجواز حلو أوى .. ادعولى دعوة تانية )

بس فيه حد منهم قالى جملة
لما ربنا بيريد كل حاجة بتتغير

عجبتنى أوى الجملة دية

صلى صلاة استخارة
وسيبها على ربنا
لو ليكم نصيب مع بعض هتلاقى كل حاجة جواك بتتغير

هبة فاروق يقول...

حضرتك مش روتينى بس
حضرتك مطيع وهادى ومنظم وتحب يكون كل شىء فى حياتك على أكمل وجه
ينقصك شىء من الجنون والتمرد
لا تتزوج لان من حولك يريدون
لا تحاول ارضائهم على حساب نفسك فتبحث بعد الزواج عن الحب وقد لا تجده

شمس النهار يقول...

النصيب غلاب

اعتقد زي ماتعتقد
وافضل اتكلم زي ماتحب
في النهاية النصيب غلاب
والبنت المكتوب تبقا زوجتك موجوده ولما تيجي الساعة هتلاقي نفسك
عكس كل كلمة كتبتها هنا
ونقول يارب

أم .. بوبه يقول...

السلام عليكم ورحمة الله وبركاته

بحب أنا الكلام فى مواضيع الخطوبة والجواز دى

صلى على النبى ... عليه الصلاة والسلام

موضوع الروتين ده بصراحة زى ما بتوصفه كدة ممكن يقلق شوية ... لأنه حاليا مقتصر على شوية حاجات مفيش منها ضرر وتأثيرها بيكون عليك انت لوحدك

المشكلة الكبيرة فعلا لما بتكون مرتبط بزوجة وكمان أطفال شبعانين روتين وطهقانين منه بحكم الروتين اليومى .. وبيكونوا نفسهم فى اللى يكسر الروتين ده مش يتمسك بيه أكتر

بس احساسى بيقولى إنك ممكن تكون قابل للتغيير بس مترجعش تتمسك باللى انت غيرته وتخلق منه روتين تانى .. علشان كدة الحياة هتبقى صعبة


ثانيا ... مش شرط تعرف الإنسانة إللى هترتبط بيها قبل الجواز بفترة .. مش دايما بتنفع الطريقة دى
وبردوا مش دايما بيفشل جواز الصالونات

بس نصيحتى فى جواز الصالونات إن فعلا أول مقابلة دى بتكون مهمة وإن محصلش فيها الإنبهار إللى بتقول عليه ده ممكن يكون شئ مش مبشر شوية .. لأنه من وجهة نظرى الإنبهار هو أو خطوة فى طريق الحب لازم حاجة فى الشخصية اللى قدامك تفاجئك تخبطك كدة وتخليك تصحصح وتبقى حابب ترجع تشوفها تانى وتتكلم معاها تانى حتى لو كانت الحاجة دى مجرد حرف عندها عجبك طريقة نطقها له بس المهم إنها شدت إنتباهك فى حاجة


وطبعا علشان مبقاش سطحية أهم حاجة طريقة التربية والدين ثم الدماااااااااااغ ثم الدمااااااااغ إللى هتكمل معاها حياتك

أنا عن نفسى وصفت أول مقابلة بينى وبين جوزى وأبو عيالى دلوقتى .. بإننا مكوناش بنتكلم إحنا كنا بنلعب ماتش بينج بونج كنت لو وقفت عند كلمة فى جملة ومش عارفة أكملها كان هو بيكملهالى .. ولو لاقيته سكت وبيفكر شوية كنت بخمن هو عايز يقول إيه .. النتيجة فى الأخر إن إحنا الإتنين إنبهارنا بدماغ بعض . حسيت إنى إستمتعت بكلامى معاه وهو كمان والكلام طبعا كان بعيد عن الحب والمشاعر .. لأننا كنا لسه مش عارفين بعض .. بس إللى فرحنا اننا حسينا إننا لاقينا بعض .. يارب أكون قدرت أوصلك قصدى بعد كمية الرغى دى

وأحب أختم كلامى زى ما قلتلك مدام شمس .. لما تلاقى البنت اللى انت متخيلها وتحس انك بجد عايزها هتكسر الروتين ومش هتخاف من أى تغيير ومفيش حاجة هتقدر تسعدك غير وجودك معاها وبعدكم عن بعض هو الشئ الوحيد إللى هيضايقك وهيحسسك بالتوتر .. وهتبقى عكس كل إللى بتقول عليه ... وأخيرااااااا صلاة الإستخارة ثم صلاة الإستخارة ثم صلاة الإستخارة .. وسيبها على الله هو العليم القدير

P A S H A يقول...

وسع صدرك المشوار لسه طويل يا دوك
:)

Mohamed Taher يقول...

بطوط كلنا كده
انا كمان بتلخبط وبتوتر جدا اول ما يتفتح اي كلام عن الخطوبة والجواز والتجهيزات فيهم
بالنسبة للبنت انت مش مطالب انك تنبهر بيها عشان الانبهار اصلا صفة عقلانية وانت مش عارف انت المفروض تحبها ولا المفروض تفكر فيها بعقلك
مش هتعرف تنبهر بيها وانت على حسب كلامك قبل كده معايا مش بتدور على بنت دماغها كويسة انت الصفة دي مش فارقة معاك فسيبك من جو انك تنبهر بيها

انت بس محتاج تخرج من الجو القديم دا يعني مش الصح انكم تروحوا تتقابلوا في البيت قابلها في اي مكان برا مع اختك واختها
واطلب انك تقابلها اكتر من مرة
وصلي استخارة ولو من نصيبك اصلا والله لو جالك اضطراب الدنيا كله هتلاقيك في الاخر لابس فيها

انا حره يقول...

نصيبك هيصبك وساعتها ولا هتفكر ولا هتكتئب ولا اى حاجه هتلاقك راح تشترى الدبل وتعمل لولولولوى فررررررح وتبقى اتدبست رسمى فهمى نظمى مع احلى نصيب ان شاء الله

safa7_karmooz يقول...

طب انت كأنت يعنى مش هتتعب زوجتك المستقبلية والله وهتريحها :D
غيرك الروتين ده مش موجود فى قاموس حياته ..وبالنسباله مشكلة فمابالك لما "هى"بسلامتها تيجى هعمل ايه -_-

بص انت لو مش مقتنع بحاجه متعملهاش .. الاهل بيحبوا يشوفونا متجوزين بدرى من باب "الاطمئنان" بس انت لو حاسس انك عاوز تتجوز اقدم على الخطوة دى عشان من جواك تبقى عارف انت عايز ايه :)
وربنا معاك

اسراء يقول...

ربنا ييسرلك الخير و يشرح صدرك أعرف هذا الاكتئاب المصاحب للتفكير فى موضوع جدى :| ودا طبيعى جداً وبيكون هو االعلامة اللى بتقولك كمل لما بيختفى بعد صلاة ستخاره كده ولا مكالمة ولا موقف بينكم بس متكتئبش لأن:
"لو ليكم نصيب مع بعض هتلاقى كل حاجة جواك بتتغير"
و رد ام بوبة شافى ما شاء الله قالت اللى كنت عيزه اقوله

Heba Moo'nis يقول...

ايه ده؟ يعنى مش انا الى كده بس فى الدنيا
فى غيري كمان
انا حسة كل كلمة بتقولها وعايشاها
ولو لقيت حل ابقى قولي يمكن الاكتئاب ده يروح

غير معرف يقول...

محمود
عوزه اقولك ان دي حاله طبيعيه كلنا مرينا بالمرحله دي انا كنت لما اشوف عريس كنت محتاره وخيفه مش عرفه هشوف فيه ايه يخليني اكمل معاه حياتي وكنت بصلي استخاره بلاقي الموضوع مش ماشي بعرف ان ده الخير وفعلا كان بيجيلي اكتئاب لدرجه اني بعد ما قعدت مع شويه ناس في فتره قصيره اكتئبت جامد وطلعت رحله علشان اغير جو فالموضوع وما فيه انك تصلي استخاره ولما تروح لنصيبك هتلاقي حاجه بتشدك ليها متعرفش ازاي ولا ليه ولا امتي وهتلاقي كل حاجه بتمشي وهتلاقيك اسعد واحد ف الدنيا ونفسك تخطفها ومتستناش ونفسك توريها للعالم كله وتقول دي خطيبتي صلي انت بس صلاه استخاره وربنا يوفقك ...اما اشوف بقي هعرف انزل الكومنت زي ما علمتني زمان ولا لا اصلي بقالي سنتين معملتش كومنت وبجد فرحتلك جدا جدا وربنا يوفقك وع فكره انا dr tweety

Mahmood البطراوى يقول...

د تويتى :) ليكى وحشه من هنا لعندك والله :)
ومتقلقيش الكومنتات كلها بتوصل طالما عملتى كومنت بطريقه صح :)

غير معرف يقول...

طيب عندي سؤال فاكر اخر مره اتكلمنا قولتلي انك هتكتب بوست عندي ياتري فاكر ولا انسيت؟؟؟؟؟؟dr tweety

غير معرف يقول...

اه نسيت اباركلك ع العياده ده الي فهمته من المدونه بس عوزه اعرف انت ليه انت واخر ايمان سبتو بعض ؟؟؟؟ وبقولك مش لازم تعرض كومنتاتي رد بس خصوصا الي بسالك فيها عن اي حاجه صحيح واختك دعاء عامله ايه وبنوتتها اخبارها ايه كبرت ولا لسه؟بس بجد نفسي اعرف انت وايمان سبتو بعض ليه فضوووووول بقي