2009/02/10

انتوسيد ..هيخلى الفالنتين عيد

 شايف واحد مستغرب من العنوان .. لعلمكم بس انا عامل البوست دا خدمه ليكم لا ابتغى بيه غير وجه الله وانتوا الى هتحكموا فى الاخر
الاول هسألك سؤال
هديه الفالنتين ايه هى الشروط الى لازم تحققها؟؟ء
اولا لونها يبقى احمر .. شريط انتوسيد لونه احمر
حبذا لو كانت مفيده .. مفيش افيد من كده
تعبر عن الحب والخوف على الى بتحبه ...احكموا انتوا بقى
 
اه انتوسيد وإلا الفالنتين مش هيبقى عيد
شفت انت اقراص بحلاوه اقراصه ... شكل شريط دوا بحلاوه شريطه ...دا الود ود اتبنى صاحب الشركه .. لولا انى عايز الى يتنبنانى اساسا
ولتفهم روعه هذا الانتوسيد اليك الاتى
مره فى ذات المراير واحنا كده فى اخر الشهر .. قلت يا واد القرشنات الى معاك مش هتنفع تجيب اكل من بره .. لازم وحتما ولا بد تتطبخ
وزى ما قلتلكم قبل كده انى معنديش اى مشكله بتاتا فى انى اطبخ  بالعكس .. ابسيوليتلى .. المشكله كلها انى اكل الى بطبحه ...... وهذا لو تعلمون عظيم
المهم عشان مطولش .. قولوا طول.
قمت وطبخت وعادى بقى وعصرت على نفسى ليمونه من الكبيره .. وكلت ...لحد كده تمام ؟؟
نازل انا بقى اتغندر بعد ما كلت ومليت بطنى بكل ما لذ ولم يطيب .. ونازل .. نازل ... نازل .. اصلى ساكن فى الدور التامن بقى نازل لوحدها متقضيش
المهم وصلت للشارع والاقى ودامى بنتين كده .. ما شاء الله شبه جوز خالتى ولابسين بادى لونه اخضر فى اصفر الالوان الغبيه الى كانت طالعه موضه السنه دى
ولسه بقول لنفسى اللونين دول شبه الاسـ ـ ـ ـ ـ ـهال

وهوووووووووووووووووب ااااااااااااااااه بطنى بطنى باطنىىىىىىىىىى
يا نهار زى بعضه ... دا لسه هطلع لحد الدور التاااااااااااااااامن عشان الحمام
من وجع بطنى بقى  طلعت زى الرهوان .. وعند كل بسطه سلم بقى اقعد استريح وانهج .. وعايز الحق ادخل الحمام والحاله بقت كرب ....واكافح ....واصعد... واصعد
بين وجع بطنى .. ووجع رجلى
واخيراااااااا  دخلت الشقه ودخلت الحمام ... وانا اشهد ان دخول الحمام مش زى خروجه ابدا ابدا ابدا
عدلت بقى هدومى .. وقلت انزل تانى ...(مش فاكر انا كنت رايح فين اساسا)ء
نزلت لحد تحت .. وخدوا بالكم -ان نزلت تحت - خمس حروف فى الكتابه ... انما دنياااااااااااااا فى الفعل
ما علينا
نزلت لحد تحت .. لقيت برضه نفس البنتين بنفس البادى بنفس اللونين ... وهوووووووووووووووب بطنى صوتت
واطلع ..هاها ... اطلع  هاااااااااااااااهااااااااااااا.. اطلع  يا الهوووووووووووى
ومش قادر .. ولو حد من الجيران فتح الباب.. يادى الكسوووووووووف ... اعمل نفسى بربط الجزمه او بعمل اى حاجه .....واقوم.... واطلع ...واطلع بايدى ورجلى.... وبطنى مش راضيه تسكت
دخلت  الحمام بقى وخلاص.. وعدلت هدومى وقلت بقى خلاص لازم وحتما ولا بد انزل اشترى انتوسيد
انتوسيد الى مشفتش حد كتب عنه شعر ... او حتى نثر.. رغم انه وبلا منازع افضل دوا فى السوق عالم ناكره للجميل انما انا هخلد اسمه بالبوست دا
وهقول انه افضل من كل الادويه .. افضل من ادويه السكر والضغط والكله والكبد .. وهأطالب من مكانى هذا انهم يحطوا صورته على  الجنيه الى شبه الدنانير بتاعه زمان

انا بقى نازل عشان اشترى شريط انتواسيد.. وناوى انزل مغمض عينى احسن البنتين يكونوا واقفين تحت
وخلاص عديت العماره وماشى بكل جساره رايح للصيدليه
واوبس بطنىىىىى مش قاااااااادر .. وهنا وقفت لحظه
ودامى حل من اتنين اما انى اخاطر واذهب للصيدليه .. ودى مخاطره كبيره
او انى اجرى انقذ الموقف
وهنا اخذت قرار حاسم ومانع انى استمر ولا اتزعزع
ودخلت للصيدليه وبكل جساره ... اول ما شفت الراجل كنت عايز اوطى على ايده ابوسها واخده بالحضن  شريط أ أ أ .. أنتو...سيد.... لا لا لو سمحححححت
الراجل بسرعه ادانى الشريط بلونه الاحمر الرائع واقراصه المش عارف لونها ....الجميله وبلبعتلى حبتين من غير ميه .. وهاتك يا جرى لانقاذ الموقف
وطلعت .. طلعت.. طلعت .. طلعت ووصلت اخيرا فى النهايه
اول حاجه فكرت فيها - عشان تعرفوا ان اصيل - انى اخد كام صوره مع انتوسيد .. وتانى حاجه انى ارش مايه على البنتين الى تحت البلكونه 
مايه لونها زرق عشان الباديهين يبوظوا وننقذ بطن المجتمع كله
انتوسيد هيعمل ايه ولا ايه
تقلى بقى طب ايه علاقه دا بالعنوان
اقولك باينه جدا
هديه تنفع للفالنتين ... ولنها احمر - عشان محدش يتلكك - وموفره .. ومفيده وخصوصا للى ساكنين فى الادوار العليا - اظن انت بنفسك شفت الفايده- اوعى تنكر ربنا يحاسبك
ودا اقل واجب اقدر اقدمه لانتوسيد الذى لولاه لاصبت بشلل رباعى .. من كتر الطلوع والنزول .. وكرشه نفس تكاد تصل لغيبوبه مستمر .. بس ربنا ستر

تنويه للاصدقاء خلاص انا سبت الشقه وانا الان فى الدور الارضى رغم انى كنت مصمم ادور على شقه تحت الارض بتمن ادوار .. تعويضا للايام الخوالى بس ملقتش غير ف الارضى 
:p

2009/02/02

كفايه ان انا موافق




امبارح اتصلت بيا تاخد رأيي فى مشروع عريس جديد ... هى مش تاخد رأيي تاخد رأيي بس اهى بتسمعه


وهى من معرفتى بيها - القويه على ضعفها ... والعميقه على سطحيتها
هى .. جميله كـ ملكه جمال السويد , بيضاء كجبنه دومتى , رقيقه وناعمه زى ارنب صغير لسه بيبى , نشيطه زى فلاح قريتنا , وذكيه كعالم فيزياء انجليزى , حنونه كجدتى , مرحه كـ خوخه فى عالم سمسم , ورزينه كـ طمطم فى بوجى وطمطم ,مؤدبه ولبقه كـ موظفه خدمه العملاء فى اتصالات , متحمله المسئوليه كـ الاخ الاكبر بعد وفاه ابوه , طموحه كـ نمله عايزه تطلع الجدار , لما بشوفها بفتكر (الاستاذ ارنوب) فى حكايات جدتى بنظارته التى تزيده وسامه ووقار
 .
كانت بتسألنى عن رأيي فى ارتباطها بشاب والى فهمته منها
انه .. اسمر كـــ ليله شتاء من غير قمر ,اسنانه بيضاء كـ قلب مؤمن تائب , مؤدب كـ أمير مخرجش من قصره الا يوم ما شافها , وجنتل مان كـ أخر رجل فى العالم , من اصل كـ أمير تركى , متفاهم كـ دكتور طيب فى الجامعه , رومانسى كـ ميكى ماوس , وميسور الحال كرجل مستعد للجواز من بكره , فى عينه كلمه بحبك , وعلى وجهه ابتسامه تكشف ما لو صرح به مش هتديله الا بالجزمه
 .
ولانى عارف موقف ( الاستاذ ارنوب ) فى فلسفه الارتباط فى حكايات جدتى دار بنا الحوار الاتى ... ولأنى اصلا بحب اخبار الجواز عموما معرفش ليه ؟؟ جايز بحس انه خلاص بقى هيجى على الدور ... فكنت متولى مهمه اقناعها

الخلاف بنا ممكن تلخصيه فإنى شايف انه المفروض الولد اساسا يتجوز بالكتير بعد الثانويه واهو يبقى تقريبا عرف مستقبله ولو نسبيا , والبت بالكتير بالكتير يعنى فى تانيه تالته ثانوى
طبعا ( ارنوب هانم) مش مقتنعه بده وده الحوار الى دار بنا


ازيك يا بطبط
الحمد لله يا ارنوب هانم ايه اخباراتك؟؟
الحمد لله .. بص يا سيدى فى واحد متقدم لى
بجد؟؟ قشطه خير
المهم بعد ما وصفته وحكت لى عن ظروفه وانا سألت عن شويه تفاصيل
طيب يا بنتى دا جامد جدا موضوع السمار ده مش مهم اوى ...ابقى حطى كريم اساس غامق شويه يوم الفرح وخلاص ( مبتتفرجيش على امينه شلبايه ولا ايه؟) ... او اعتبرى نفسك بتبصى له من ورا إزاز فاميه ...بطلى تلاكيك
 
ههههههههههههههههههه ... لأ مينفعش ...... ثم انا لو خلفت اولاد شكلهم وحش مش هألكلهم وهسبهم كده جعانين طول اليوم
يا بنتى يبقى اى حد يديهم البزازه وخلاص
هههههههههههههههه انت هتهرج من اولها؟؟
طب ليه يا بنتى مش اخيرا بقى جه الفارس على حصانه الاخضر الى بتنتظره كل البنات؟؟
لأ انا مبفكرش كده ثم هو حصان ابيض... انت عندك عمى الوان يا ولا ايه؟
يا ستى ابيض اخضر أهو حصان وخلاص ... المهم يخطف قلبك وتحسى انه الحد الى لازم تتجوزيه
يا بنى انا مبفكرش كده انا عايزه اساسا اجوز بعد عشر سنين
بعد ايه؟؟ مش سامع ؟؟ الظاهر حد دخل فى الخط الوووووووووووو ارنوب هل تسمعنى
بطل استهبال يا بطوط طبعا اقل حاجه عشر سنين لحد ما اثبت نفسى


ههههههههههههههههههههه تثبتى نفسك يا بنتى بسيطه جدا انتى فاكره انا انا كنت هوافق انك تتجوزى من غير ما تثبت نفسك ... بالعكس ... ابسوليوتلى ..انتى  لازم فعلا تثبتى نفسك
واثبت نفسى ازاى ؟؟ 
انتى توقفى كده ودام مامتك بنظره كلها شك وريبه ...يا حاجه انا مين؟؟
هترد اكيد وتقولك  .. انتى اتهبلتى يا بنتى
امممممممممم اذا انتى  بنتها
بنفس النظره ترجعى تقوليها لأ بجد انا مين
هتقولك ارنوب  يا حبيبتى انت خلاص اتهبلتى بجد ؟؟
امممممممممم اذا انتى ارنوب  وابنتها وهو المطلوب اثباته وممكن تجربى مع باباكى واخواتك وكده



يا سلاااااااااااام؟
انتى فاكره ان دا كفايه  ... بالعكس ... ابسوليوتلى ... انتى بعدها  تدخلت كده الاوضه بتاعتك ومعاكى المصحف وحطيه على عينك واحلفى انك ارنوب ... وطالما انتى مش بحلف كدب فبكده انا اثبتى نفسك

يوووووووووووه يا بنى انا اقصد ان يبقى لى اسمى ؟؟
معلش اصلك لسه صغيره ...انا هفهمك ينوبنى ثواب ....لعلمك انا بقالى تلات تشهر مبرضاش حد يقولى ,يا دكتور, يا استاذ  ,ولا حتى ياوااااااااااااد اى حاجه من دول منعتها دلوقتى لازم يبقى لى اسم .... كله بيقولى يا محمود ... امال ايه انتى فاكرها سايبه ... دا حياه او موووووووووووت انتى ممكن تعملى كده برضه

مش بقولك انك طفل ....بس على العموم هو فى ميزه وعيب- بجانب السمار ده
هاااااااااااااا؟؟ 
...الميزه .. انه هيجى كل اسبوع يوم او اتنين .. لان شغله ظروفه كده
دا العيب قصدك ؟؟
لأ الميزه


على رأيك ...اهو احسن حتى تبقى فاضيه طول الاسبوع .. أقولك ابقى اعملى مدونه , روحى نادى , حطى ماسكات ... بقى دي ميزه بالزمه ..ما علينا طالما انتى شايفاها ميزه


هو كل الى فى دماغك حكايه الماسكات دى؟؟

ايوه يا بنتى دا اهم فقره اساسا فى الجواز ... هو الواحده بتتجوز ليه غير عشان تحط ماسكات طول اليوم  
وانا بقى ارجع من الشغل بقى لو تعبان اقولها .... حرام عليكى يا مفتريه خلصتى الخيار الى فى التلاجه كله .. منك لله
ولو كنت فراحان ومبسوط .. اقولها يااااااااااه يا حبيبتى الخيار عليكى يجنن
فتحتى نفسى ع الجواز حرام عليكى
تعرف والله انت طفل

هههههههههههه  رغم انى فعلا بتكلم بجد  طب والعيب؟
انه اكبر منى بعشر سنين
اوبس ... فعلا كتير
كتير ايه يا بطوط دا صغير على جدا
اه فعلا صغير ... ازاى انا مختش بالى؟؟
انت بتتريق؟؟
ليه لا سمح الله ... اوعى توافقى على حد اكبر منك باقل من 359 سنه ....أقولك هاتيه من دار مسنين... على رأى امى البنات بقت عايزه قطع رقابتها
اتلم يا بطوط
 اسكتى دا انا كده ملموم  خلى بالك انك بتكلمى انسان عنده مراره

يا بنى انا مبقتنعش ان الراجل يكون اكبر من الست باقل من كده عشان تحس انها مع حد متحمل المسئوليه وعاقل وبيفهم .....ثم كمان انا لسه عايزه اعمل الماستر بتاعى ودراساتى وابحاثى الى انت عارفها .. وشغلى ومش مستعده اهد كل طموحى كده عشان ال ايه اتجوز
طب ما تتكلموا فى الحاجات دى وشوفى رأيه
هو غالبا موافق .. هو متفاهم جدا اصله
طب يا بنتى خلاص انتى اصلا عمرك مهتلاقى حد يهاودك كده احمدى ربنا بقى...و كفايه ان انا موافق


طالما انت موافق هفكر .........لووووووووووووووووول......بس برضه الجواز هيقلل الطموح وكده وكمان انا مش عارفه مش حاسه انى عايزه اتجوز دلوقتى



هنا بطوط اغمى عليه 



واستمر النقاش بنا لمده طويله دون ان يقتنع اى منا بفلسفه التانى 
ومازال العريس منتظر الرد - بجد كان الله فى عونه- ومازالت مقتنعه فى داخلها انها مش لازم تتجوز قبل عشر سنين ... الظاهر انها مصممه متتجوزش الا لما تعمل طقم سنان عند بطوط  للعلم انا بنبه اهو هتدفعى زيك زى اى حد عشان يعنى لو طمعناه من اولها لأ

ومازالت مقتنعه ان بطوط لسه طفل وكل الى عايزه انه يتجوز واحده عشان يبقى عنده كائن فى البيت ويكتشف الزراير الى بتشغله والى بتطفيه طب تصدقوا انه فعلا سبب كافى
:)