2011/05/20

نور


رغم انى بحب الحركه دى لما مخى بيعملها , بس المره دى انا منزعج منها ، بحب مخى لما بيضيف للاحداث الواقعيه شويه تفاصيل ويشيل منها شويه تفاصيل ، يعملها حكايه ممتعه احيانا ، حزينه ، او حتى مضحكه ، يقلبها بوست ويكتبها فى المدونه ، بعشق قلب الحياه لبوست ، وبحب مخى لما بيغير الواقع ويعيشنى الحاله اللى هو عاوزها ، بس المره دى انا نفسى اتغلبطت ، ايه الاحداث الواقعيه فى القصه وايه التفاصيل اللى اتضافت عليها عشان تبقى قصه .
نور؟ هو انا فعلا قابلت بنت اسمها نور؟ وفعلا بتشتغل صيدلانيه فى المستشفى عندنا؟ ونور دى عامله ازاى ؟ جميله؟ الجمال دا انا عارف انه من التفاصيل اللى مخى ممكن يكون اضافها بس الاكيد انها كانت جذابه ،، جذابه لدرجه انك تحس انكم اصدقاء من زماااااان. او تحس انكم لازم تبقوا اصدقاء .
هى نور فعلا شخص بجد؟ اللى فاكره والاكيد انه حصل انها كانت موجوده فى اجتماع الاطباء ، كانت مرحه ودمها خفيف بشكل يخليك تحس انك تعرفها من زمان ،، هو انا كنت اعرف نور من زمان ولا دى كانت اول مره فعلا اشوفها
يومها قلت لها متعرفيش مكان كافيه كويس؟ اصل دا اول يوم ليا فى المستشفى وعاوز اروح كافيه اشرب اى حاجه ؟ يومها ركبت معاها العربيه ،، ممتعه الرحله فى صحبه نور ، مضحكه الرحله فى صحبه نور ، بتقدر تخلى كل الكلام مبتسم وبيضحك، اول مره اشوف الكلام نفسه وهو بيضحك ، او ممكن متكونش دى الحقيقه ودى مجرد تفاصيل مخى ضافها لما قررت اكتب عنها.
يومها اتكلمنا عن اضراب الدكاتره ،، كنت رافض فكره اننا من حقنا نضرب ،، احنا زى الجيش وزى الشرطه مينفعش نضرب ،، نور احنا كان المفروض نكون اول ناس تقول احنا هنشتغل بنص الاجر عشان بلدنا ،، وهنوفر الامكانيات فى المستشفيات من نص اجرنا دا ، احنا كان لازم نكون اول ناس تقف مع البلد لحد ما البلد تقف على رجلها ، كانت عنيها بتلمع وانا متحمس فى شرح وجه نظرى ،، يمكن مكانتش بتلمع مش فاكر ،، بس الاكيد ان التفاصيل الصغيره دى هيكون فيها شويه تغييرات عن الحقيقه.
ويومها كمان سالتنى ؟ محمود انت بتحب؟ او حبيت قبل كده؟ .. رغم ان السؤال فى الطبيعى يخلينى استغرب انها تساله .. الا انى جاوبت وكأن دا الطبيعى انها تسأل .. نور عندها الملكه دى .. انها تخلى الحاجات اللى مش عاديه تبدو منطقيه جدا بالشكل دا  ، او يمكن انا كأنى كنت شايل جوايا حاجه وعاوز اطلعها

هى نور فعلا كده؟ ولا انا اللى قررت ارسمها هنا كده ؟ ولا انا اللى محتاج لوجودها كده فخليتها كده؟
بحب اوى لما حد ينادينى ويقولى " محمود" مبقتش بحب بطوط ، وبحس ان "دكتور" بتبقى رسميه اكتر من اللازم .. عشان كده كنت مبسوط لما سالتنى محمود انت حبيت قبل كده؟
يومها قلت لها يااااااااه يا نور .. انا مريت بتجربه زمان ايام الكليه رغم انها كان لازم تبقى تجربه مؤثره الا انها كانت تجربه انتهت يوم ما انتهت ... عارفه يا نور انها انتهت من غير ما تسيب اثر كبير وانا لحد دلوقتى مستغرب من دا.
ومريت بتجربه حديثه مش عارف انتهت على ايه .. اللى فاكره انى قابلت باباها وقالى انت استعجلت انتظر شويه.
يومها نور استغربت من رد باباها وقالتلى يعنى ايه استعجلت ؟؟.. ويومها حكيت لها تفاصيل اكتر .. من النادر انى احكى لاى حد تفاصيل اكتر .. بس نور بتعرف تخليك تعمل كده من غير ما تحس
يومها قالتلى محمود تحب تسمع الحقيقه من اختك؟... قلت لها اه احب ...قاتلى القصه دى خلاص انتهت بس انتوا مأجلين انكم تنجرحوا لبعدين .. ويومها انا سرحت فى معنى الجمله وبعدين نسيتها.
يوم ما نور جاتلى العياده كانت زياره غريبه .. اول حد اعرفه معرفه شخصيه يجى هنا ،، ويقولى الله عيادتك جميله ربنا يبارك لك فيها ويوسع رزقك وابقى افتكرنا ياعم.. مقدرتش تنسى حته المرح بتاعتها حتى وهى بتدعى .. هى نور عملت كده فعلا؟ هو اصلا فى حد اسمه نور انا اعرفه؟ ولا انا محتاج حد كده فرسمته وكتبت عنه وبحكى لكم عنه كأنه كان موجود فعلا ؟
فاكر انها قعدت على الكرسى وانى اشتغلت ليها سنه محتاجه تركب فوقها تركبيه ، وانتظرت يومها لحد ما اخدت لها المقاس وصبيت فيه الجبس .. انتظرت لحد ما نشف واخدته عشان هى اللى هتوديه للمعمل بنفسها
يومها اتكلمنا فى الاضراب برضه واتكلمنا فى هتعمل ايه مع باباها؟
معملتش حاجه يا نور كل حاجه زى ما هى .
صعبان على اوى انت يا محمود فى القصه دى ؟ البنوته كمان صعبانه عليا
عارفه يا نور  انا متأكد ان الدنيا هتبقى احسن ،،  .. على فكره انت بجد تستاهل من الدنيا كل خير والله يا محمود
عارفه كمان يا نور ايا كان انتى شخص بجد انا قابلته او رسمه رسمتها وعشت فيها بخيالى.. شكرا على الكام كلمه اللى قلتيها .. وشكرا على انك بتنادينى بمحمود .. انا كان واحشنى جدا محمود .

هناك 9 تعليقات:

marwa mahdy يقول...

نور عملت كده فعلا؟ هو اصلا فى حد اسمه نور انا اعرفه؟ ولا انا محتاج حد كده فرسمته وكتبت عنه وبحكى لكم عنه كأنه كان موجود فعلا ؟
انا عاوزه نور انا كمان يامحمود......بوستتت أكتر من راااااائع العادي بتاعك يعني

FAW يقول...

جميل قوي الكلام ده يا محمود :)

ايام الضحك والدموع يقول...

السلام عليكم:
ممتعة جدا, وفكرة تغير الواقع عجبتنى جدا.

تحياتى

فاتيما يقول...

يا بطوط
يا حبوب
يا غــالى
يا قلب الكريستال الشفاف

التدوينة شبههك قوى
حيرانة و طيبة و محبطة
وشايفة خير ف قلب الوجع


اما عن نور ؟!


فبإختصار ....

النور مكانه ف القلوب يا بنى

بس كدا

قلب ينبض لله يقول...

طيب انت حيرتنا دلوئتي
هو في حد كدا فعلا واسمه نور ولا مفيش
:D:D:D

نركز بئي شوية كدا ونظبط الدنيا البوست الجاي علشان مانتوهش منك تاني
:D

علي فكرة...انا حبيت نور
:)

Ramy يقول...

(:


ماشى يا محمود

عارف أنا من كتر ما أتكلمت أنما بس عنها

خفت الناس تفتكر ان مفيش حد اساساً (:

mrmr يقول...

انا جايه بس ادحرج المسا على الناس الكويسه

اقعد بالعافيه

ست البيت يقول...

عارف لما حد يقولك زي بلال فضل انت بتكتبني ؟
ساعات الواحد بيحتاج يكونوا الناس في حياته فبيكتب عنهم وقتها متقدرش تعرف حقيقة من خيال ...دا الوقت اللي بيختفي فيه الجدار اللي بيفصل الحلم عن الحقيقة

محمود انصحك بزيارة طبيب نفسي او اقلك عدي ع الغزالي
ايه النكد اللي ع الصبح دا بتقلب عليا المواجع ليه انا ؟ عملتك حاجة
عقبال ما شوفك يارب مشرف في القفص ومحتاس ببنوتة قمر زي الواد عكرووت ...على فكرة جاب مريم عقبالك يا رب
وربنا يخليلنا نور

sony2000 يقول...

ياعم ياعم يااااااعم
ربنا يسهلو

الهي يارب
الهييييييييي

يرذقك بنور واحسن منها
علشان انتا تستاهل كل خير
اهوووووووون

بس بجد مش تنسانا فالسنان
ماشي:))