2010/09/23

رِجل تحكى عليها

مصدر الصوره


عارف ايه ميزه انك تحب حد؟
اعتقد ان اهم حاجه انه يكون عنده رِجل مريحه .. وايد تعرف تلعب فى شعرك وانت بتحكى .. مش شرط يكون حكيم او ذكى .. بس لازم وحتما ولابد يكون بيعرف يسمع .. يمكن عينه تتملى بالدموع وانت بتحكى ,, يمكن وشه يبتسم ويقطع القصه فى نصها ويقولك انه بيحبك ,,  وبعدين يسكت وبعدها يقولك عارف انت جميل اوى  طب اقولك على حاجه ؟! انا بحسد نفسى انى قابلت واحد زيك .
او  يمكن يقول يااااااااااااه كل دا حصل ...وانت تبتسم وتقوله اصبر بس لما اكملك الحكايه
اكتر اشخاص علاقتى بيهم اتطورت اوى وبقوا اصدقائى المقربين .. عرفتهم فى لحظه ضعف ليا او لحظه ضعف ليهم .. استعملت رجلهم او استعملوا رجلى .. ابتسموا اوى وانا منهمك وانا بحكى مصيبه .. ابتسامتهم خلتنى اضحك من قلبى وانسى المشكله .. واحكى المشكله وكأنها مضحكه .. هز كتفهم وانا بحكى وهم مهتمين يسمعوا تفاصيل اللى بحكيه , خلتنى احس براحه ان فى حد ممكن يشيل معايا شويه .. كلمتهم اللى مستحيل تكون مؤثره فى حل المشكله كانت ايد بتطبطب على قلبى .. ايد كنت بحسها ناعمه.لحظات المشاكل بتقرب الناس لبعض.
 
انا عاوز ابقى بالنسبالك الرِجل دى!!
الرِجل اللى لما بتتعبى مش بتلاقى مسند مريح اكتر منها عشان تحكى ,, يمكن مش هيبقى عندى حلول  .. يمكن معرفش اساعد .. لكن على الاقل هتحسى ان فى شخص مهتم بيكى ,, على الاقل انا هحس انى ممكن اقدر اسعدك ,, يمكن كل اللى اعمله انى هبتسم وأقولك انى بحبك ,, بحبك اوى ,,ما انا فعلا بحبك اوى ,, ويمكن أقعد زعلان لحد ما المشكله يبقى ليها حل .
عارفه ؟ حتى لو  معرفتش اعمل كل دا .. على الاقل فى اللحظه دى - لحظه ضعفك وانتى بتحكى و لحظه ضعفى لو مكنش بايدى الحل - هتخلينا نقرب لبعض . الناس بتحب بعض فى اللحظات دى وانا عاوز اعمل حاجه تخلينى احبك اكتر ما بحبك.
انا عاوز احبك اوى .. عاوز اكون كل حاجه ليكى وعاوزك كل حاجه ليا .. عاوز اكون الرِجل المريحه اللى بترمى راسك عليها وقت التعب ,, وعاوزك تكونى الرِجل اللى اجرى عليها ...ومعملش حاجه غير انى ادقق اوى فى ملامحك .. واقولك عارفه؟ انا كنت تعبان قبل ما اجى لكن دلوقتى مش عارف انا كنت جاى ليه؟

بزعل اوى من نفسى لما بحس انك فى مشكله .. ومكنتش اول رِجل تجرى ترمى راسك عليها ,, بكره نفسى انى رغم الحب دا كله .. مش عارف اوصلك اد ايه انا بحبك ,, ومليش دور فى تخفيف اى احساس سلبى بتحسى بيه  ,, وبكره تقوقعك على نفسك فى لحظات المشاكل.

بحس انى مش عارف اوصل احساسى ليكى ,, وبحس انك مش  عاوزانى احبك :(... بحس انى كائن مش مفيد.

طب اقولك على حاجه؟ جربى كده تسيبى نفسك ,, جربى لما تتعبى تتصلى بيا وتقوليلى انك عاوزه تشوفينى دلوقتى ,, محتاجاك ضرورى اتكلم معاك ,, جربى احكى معايا وعنيكى فى عنيا .. وجربى تبكى لو حسيتى وانتى بتحكى انك محتاجه تبكى..جربى متحبسيش دموعك .. جربى تبقى على طبيعتك ومتخافيش من حاجه
اقولك ما تجربى تحيبنى اوى وتسبينى احبك اوى .. صدقينى انا عاوز احبك اوى ..عاوز احبك اوى اوى اوى  .. جربى تحكيلى وتسبينى اسمع يمكن ابقى رِجل مريحه .. او على يمكن احبك وتحبينى اكتر

أهداء اللى صديقى (هـ.أ) الذى اوحى لي بالمعنى وطلب منى صياغتها بالكلمات.
اتمنى اكون عرفت اقول اللى هو عاوز يقوله .
وشكرا له لمشاركتى فى احاسيسه الرائعه تلك
شكرا لك صديقى العزيز

هناك 15 تعليقًا:

عروستى يقول...

بوست و كلام رائع فعلا

VÖltaa يقول...

حقيقى كلام ..حقيقى جداً !

حلو بجد

أنا - الريس يقول...

ربنا يجمع المحبين بالزواج والعمل الصالح قادرر يا كريم

عندما تكون ميمى وحاجات كتير مع بعضها كده يقول...

ساعااات كتيير بحس انك بتتكلم بلسان حد اعرفه كويس ..بجد بوست فوق الرائع

Unknown يقول...

بص انا هقولك حاجة
لو بتحب فعلا هتلاقيها بتجرى اوتاماتيك لك وتجى فجاة تحكى وتلجأ لك خاصة لو كانت مؤمنة انه يعتمد عليك

بس مسألة وقت او خجل يزول قريبا


اصغت مشاعر صديقك بجمال
وحب

تحياتى لك

فاتيما يقول...

ايه يا محمود
حرام عليك يا شيخ

عرفت تقول اللى هوه عاوز يقوله ؟



دنتا عرفت تقول
اللى انا عاوزة اقوله يا بنى


و اللى عاوز يقوله
كل محب و عاشق
حبيبه عامل بينه
و بينه جدار
و سد


و غالبااااا
السبب فى ذلك
ما مر بيه هذا القلب مسبقاً
او الناس النيلة
اللى حظه العثر وقعهم ف سكته
او الظروف اللى اتربى عليها
و خلته مبيعرفش
و مبيقدرش يطلع ببساطة
من ورا الستارة


طب والحل ؟


زى ما إيناس الجميلة
قالت



الوقت
كفاية وطريق ينمشى فيه

بس جنب الوقت
يفضل الحب الجارف
و الأتنين سوا
يخلوا الفطرة ترجع تاخد طريقها
و تخلى المشاعرالصادقة تكبر
و تطغى على أى خوف
و حزن سابق
او لاحق



انتا كتبت كام جملة
ف التدوينة دى
انا شخصياً
بستخدمهم ف يومى خمس عشر مرات
و حاسة بصاحبك جدا
و عارفة يعنى ايه تحب حد
لدرجة ان الحياة بكل ما فيها
تتلخص فيه هوه
و فى الرغبة ف اسعاده
و مش مهم انتا
و لا بكرة
و لا أى حاجة


ربنا يسعد صاحبك
يا بطوط
و يخليه رجل
و كتف
و حضن
لصاحبة النصيب دى

خالص ودى
يا أجدع دكتور سنان ف مصر
و الدنيا بحالها

FAW يقول...

برغم اني مش قادر ابلع كلمة (رجل) دي . .
بس الله عليك فعلا بجد . .

Unknown يقول...

:)
جميل البوست دة ..
هو لسة في مشاعر يا محمود و لا انقرضت !!
لسة في ناس بتحس ؟؟
بجد ؟؟
أرجوك قول لي .. عشان انا متلخبطة و مش عارفة أجاوب !!

ميشوو يقول...

إحسااااااس جميييل جدا لدرجة أتمنيت إني في اللحظه هذي اكون بحب حد بس للأسف مافيش

الله عليك وعلى صاحبك يابطراوي ‏:‏)‏

ربنا يبعت لكل مصاب بفراغ عاطفي حد ينتشلو هع

babosha يقول...

البوست جميل زى ما عودتناوقدرت تعبر عن كل انسان جواه مشاعرحلوة وحقيقية ومش لازم تكون الرجل دى لانسان فى بينك وبينه علاقة خاصة يعنى مش لازم تكون مشاعر بين راجل وامراة ممكن تكون رجل اى حد بيحبنا بجد والاهم يكون صادق معاناميكنش الاحساس ده كاذب ربنا يوفقك ويجمعك انت واللى بتحبها على خير انشاء الله

Adabclub يقول...



السلام عليكم
ماشاء الله

مدونة اكثر من رائعة والله

اردت فقط ان اسجل مروري من هنا

مدونتي هنا



noora يقول...

كلام رااااائع واكيد رح يعجب صاحبك
اذا ما اعجبه اعطيه خبطة عالدماغ هدية مني انا عشان يصحصح ويقرا البوست تاني
^____^

Remas يقول...

البوست دا راااااائع بمعنى الكلمة

انا قريته مرتين

حسيت كلامك طالع من القلب

بجد كانا نفسنا نكون للى بنحبهم الرجل دي ويكونو هما الرجل

عجبتنى اوى الكلمات اللى قلتها والتعبيرات اللى استخدمتها

ربنايقرب كل محب ممن احبه ياااااارب

البوست بدون مجاملة رائع فعلااااا

dr_tweety يقول...

مش عرفه اقولك ايه بس بجد مفتقده كلامي معاك اوي في بدايه البوست حسيت ان الكلام ده علينا لانك كنت اول واحد بلجاله لما كانت بتبقي فيه عندي مشكله وخصوصا مع خطيبي ,بجد يمكن ده اقرب بوست ليا حسيت بيه اوي وحسيت بكل كلمه فيه لاني لما كنت بسمعك حتي لو انا عرفه اني مش هحل المشكله بس كفايه اني كنت بقلب الدنيا كوميدي وبجد بجد اول مره احس بمعني الاخوه مع اعتراضي ع العلاقه بين الولد والبنت... وفين الي انت كنت قايلي عليه ؟؟؟؟ياتري فاكر وعوزه اقولك شد حيلك يلا وجهز نفسك لان بنتي في الطريق صحيح انا مش عرفه لسه هي بنت ولا ولد بس المهم لما اجيب بنت هجوزهالك وابقي حماتك

dr_tweety يقول...

ع فكره يمكن يكون هو ده لانك كنت قايلي حاجه قبل كده