2010/01/06

هتبقى قضيه .. مش هتبقى كدهوا




من يومين كده خرجت مع ناس اصحابى ..بس هم اصحاب بعض اكتر ما انا صاحبهم ... والخروجه دى فجرت فى دماغى كام حاجه عشان كده قلت احكيها لكم.


عارفين السؤال اللى دايما بيدور فى ذهننا لما بنقابل ناس واحنا لسه منعرفش بعض اوى؟؟ ..السؤال اللى هو يا ترى الناس دى شايفانا ازاى؟ .. شيفانا حد دمه خفيف وكويس ولا حد غلس ويابااااااااااااى عليه؟!.


اعتقد ان كلنا بيدور فى ذهننا السؤال دا ( والقضيه دى بتشغل تفكيرنا دايما).. لدرجه ان فى ناس بتيجى تسأل .... انت شايفنى حد غلس؟!! ولا ايه رأيك فيا؟!! .. وغالبا بيكون ردك ..لأ والله يا فلان انت عادى يعنى .. شخص كويس(دى الاجابه المحفوظه غالبا فى المواقف دى).


ورغم انى الحمد لله كائن اجتماعى.. وكمان لحد ما - ربنا انعم عليا بنعمه انى شخص محبوب وبيعرف يكون صدقات بسرعه مع الجميع- او نعمه انى حاسس بكده .. مش المفروض ان سؤال زى دا يشغل تفكيري (بس يمكن قضيه الرغبه فى ان شكلنا يبقى حلو هى اللى بتطرح فى دماغنا الاسئله  دى بطريقه لا اردايه)

ايا كان هو كان يوم جميل .. رغم انى مكنتش مشارك فى كل فاعلياته بقدر ما كنت سرحان فى (هو انا شخص مرغوب فيه هنا ولا لأ؟)... ودا ادانى  شعور انى فعلا غلس.. 
المهم

(قبل المغرب بربع ساعه افتكرت )
- يا نهاااااااار انا مصلتش العصر ..سألت اكتر واحد عارف المنطقه فين اقرب مسجد هنا؟
الكل ضحك انى بسأل فلان ومكنش فى وقت عشان نقعد نهرج لان خلاص مكنش فاضل غير ربع ساعه والمغرب هيأذن
المهم جريت عشان العصر ميضعش .. وسألت ووصلت للمسجد الحمد لله كنت متوضى فلحقت العصر فى اخر نفس.


لما رجعت بقى  بدأ التهريج من عينه ايوه يا عم .. وعمنا الشيخ والكلام المشهور دا
..أنا بقى استغربت لانى كنت حاسس انى عملت جريمه وهم بيتكلموا وكأنى عملت عملت بطولى 
- عمكم الشيخ!! .. على فكره انا كنت بصلى العصر مش السُنه .. العصر اللى هو العصر .. الصلاه بتاعه المسلمين يعنى مش بتاعه الملتزمين .. اش حال اننا قاعدين على الكافيه مع بعض وانا يا دوب لحقت العصر فى اخر اربع دقايق
أبويا - الله يرحمه - لو عرف هيتبرى منى .
اللى خلانى استغرب انهم بيتكلموا على انهم مش بيصلوا خالص ..  وانا ما بينى وبين نفسى مبتصورش ان فى حد مابيصليش خالص .. اسوأ شخص ممكن يجى فى خيالى ..اللى بيجمع مثلا الصلوات كلها ويصليها باليل .. بقول ميعرفش يعنى ان الصلاه لازم تتصلى فى وقتها انما ان حد ما بيصليش خالص... ما بيخطرش فى بالى ان فى شخص كده.
عارف ان اكيد فى اشخاص كده .. بس زى ما انا عارف ان فى شواذ مثلا .. بس عمرى ما شفتهم .. حاجه عارف انها موجوده وموقن بكده .. بس ناس غيرنا اللى بتشوفهم مش موجودين يعنى ومتاحين للكل.


القصه دى خلتنى اسرح بينى وبين نفسى فى حاجه تانيه خالص ( غير موضوع انا شخص مرغوب فيه هنا ولا لأ؟ )
الحاجه التانيه دى حتى لو هتبان بعيده عن الموضوع بس هى اللى فكرت فيها فى الوقت دا اللى هى (هو اصلا يعنى ايه حد ملتزم؟ او متدين؟)
فرق كبير اوى بين انك تعمل الفروض , تقرا قرءان كل فين وفين , تقول ذكر كل فين وفين 
وبين انك تكون حامل قضيه .. مشفق على اللى مش حاملنها .. وشاغله تفكيرك طول اليوم .
لو مثلا شفتونا وانا واصحابى قاعدين مع بعض .. تقدروا تقولوا وبلا مبالغه ان ما بين كل جملتين لازم تكون فيه  جمله ( اما بقى انا جالى عيان النهارده ) يمكن لأن كل واحد فينا شايل قضيه نجاحه .. أو قضيه طموحه .. فعشان كده بيتكلم عنها طول اليوم.
 معرفش ايه اللى حصل خلانى اسرح وافكر فى الموضوع دا
موضوع ان الواحد جه الوقت انه يشيل قضيه .. قضيه هو ملتزم بسلوكه وعباداته واهتماماته ولا لأ ؟ .. هو فعلا شايل قضيه انه لازم يبقى ملتزم ولازم يقرب لربنا ولا لأ؟ .. ولا بس الناس واخده عنه الفكره دى والواقع بيكذب ؟؟ ...ولا هو بس بيمثل انه شايل القضيه دى وفى الحقيقه هو لا شايلها ولا نيله ؟
الواحد جه الوقت انه يشيل قضيه طموحه  وانه لازم يبقى دكتور شاطر وشاطر جدا وجدا جدا كمان  مش مجرد دكتور؟
وتتحول الحاجات دى اللى واحد بيتعامل معاها (كدهوا)  لـ هم الواحد يشيله ويفضل مهموم بيه وعنده رغبه فى تطويره طول اليوم؟
زى ما هو شايل قضيه ( هو انا شخص مرغوب فيه ولا لأ؟ )
يمكن البوست بدايته ملهاش علاقه بنهايته ... بس انا اللى فجر فيا التفكير اللى فى نهايه البوست هو بدايه البوست - معرفش ازاى - عشان كده قلت احكيلكم الموضوع من اوله.
يارب 2010 تبقى سنه ان كل واحد فينا يعرف ايه القضايا اللى هو عاوز يشيلها .. وعاوز يتعامل معاها كقضيه .. وانها تستحق تبقى قضيه .. بدل ما هو كل حاجه فى حياته بيتعامل معاها ( كدهو )
تحديث : انا غيرت طريقه التعليقات عشان المشاكل اللى بتواجه البعض
بقت الطريقه التقليديه .. اللى اساسا مبيعرفش ازاى يعلق يدخل هنا

هناك 25 تعليقًا:

غير معرف يقول...

حلوه فكره البوست بس المهم الموضوع ميقفش على البوست يعنى فعلا تبدا تتبنى قضيه تعيش عشانها وتقابل ربنا شايلها
انصح نفسى واياك طبعا مش انت لوحدك
ربنا يوفقنا جميعا

روز

мαησηα يقول...

انا تهت منك ع فكرة قرب قبل الاخر كده بحبتين هههههه

بس الخلاصة انت قلتها ف اخر كلمتين

وجميل جداااا انك تكون حامل لقضيةمعينة بشرط تكون هادفة والا سبحان الله هيبقى ايه الفرق بينا وبين الحيوانات

موضوع الصلاة انت عملت زى انا اتربيت من صغرى ع ان اللى يفكر يفوت صلاة ده يبقى عمل جرم شنيع وكنا بنتعاقب ع تفويتها

اتصدمت لما لقيت ناس معايا ف الشغل شفتهم وقابلتهم وعادى كده بياكلوا ويشربوا ويناموا دون ادنى تفكير ف انهم اصلا مقصرين ف حق ربنا

ع فكرة لما بكون ف مكان ف ناس او ف زيارة لبيت حد واقولهم عايزة اصلى بتهاجم بردو يظهر اننا اتربينا ع حاجةمخالفة لقوانين البيئة ولا ايه ؟؟ ههههههههههه
بس مابقاش يأثر فيا الموضوع ده وبقيت بتقبله بصدر رحب

بس جملة واحدة بقولها لو انا مت دلوقتى مش هتنفعونى

اللى هتنفعنى صلاتى بس وبسكت بقفلهم يعنى اصلى غلسة هههههههه
ربنا يهديهم يارب

بوست جميل يا بطوط ولو انه لغبطتنى شويتين

ويكا يقول...

اتمنى ان اغلب شباب مصر يفوق بقى كده ، ويفهم اللى انت بتقوله ده . لان للاسف لو بصيت بتعمق هتلاقى ان مشكلة مصر الاساسيه ابتدأ من صناع القرار انتهاء بالشعب هيه الغياب عن الاهداف الحقيقيه واصل القضيه .

تحياتى

Unknown يقول...

معتقدش ان المقالة(بين قوسين البوست)هتأثر علي اللي المفروض انك بتوجه ليهم الكلام إلا نفسك ... بغض النظر عن ان مفيش ترابط بين أي من أفكار المقال لكن ببساطة الإنسان اللي عايش من غير قضية ده,,,ده يبقي مصري غافل تافه...والأغلبية كده والأغلبية منهم مش هيشوفوا مقالتك(أو أي مقال هدفها التغيير الإيجابي للفرد)بالطريقة اللي تخليهم يتغيروا

Mahmoud البطراوى يقول...

روز

اشكرك يا روز على تعليقك وخصوصا انه تقريبا الوحيد اللى عاجبه البوست لحد دلوقتى
ربنا يوفقك يارب
:D
***************************************************
๓คภ๏ภค
مش قاصدين نلغبطك والله يا فندم
الفكره انى كنت كاتب البوست كأنه فضفضه عن يوم حصل معايا حكيت تفاصيله والافكار اللى تولدت بشكل او اخر من التفاصيل بس واضح انى فشلت فى توصيل دا فشل ذريع

****************************************************
ويكا

تحياتى لك الحمد لله انه وصلك المعنى اللى كنت بقوله
اشكرك يا ويكا

****************************************************
BISHR2038

البوست مفيش فيه ترابط عشان هو بوست مش مقال :D
يعنى بحكى فيه حاجه حصلت والافكار اللى تولدت من اللى حصل دا
ممكن ميكونش فى ترابط بينهم عشان كده هو بوست

:D

موضوع ان حد يتأثر او لأ
زى ما انت قلت انا بكتب لنفسى اكتر ما بكتب لغيرى
وكتير قريت كلمه غيرت تفكيرى ولو لحظه
اتمنى دا يحصل فى بوست اكتبه

شكرا لنقدك الهادف وفعلا انا متفق معاك ان البوست اتكتب وحش
ووحش اوى كمان
على وعد ان البوستات الجايه تتلافى الفشل دا
اشكرك وتحياتى لك

منوسى يقول...

بجد الموضوع مسني قوي يمكن عشان حاجة حصلت من كام يوم خلتني اعيد التفكير في نفسي هو انا برجع لورا ولا بتقدم؟
يعني المفترض اكون ختمت القرآن مش لسه ف أوله.
يعني الذنوب والمعاصي اللي كنت بعملها زمان وتبت عنها ما ينفعش ارجعلها مينفعش اجيب من الأول ابدا. ناس كانوا معايا سبقوني وانا محلك سر على فكرة انا كمان سألت نفسي السؤال دا.
هو أحنا فعلا ملتزمين؟؟ هو عشان واحد صلى الفجر يعتببر نفسه ملتزم وكلامه صدق
وهو الفيصل والحكم ؟ وواضح ان اللي حصل كان رد عليا
وكمان البوست دا رد عليا امتى حشيل الأمانة.
ربنا يستر لأن الواحد لو ما شلهاش بالأدب بيرغم وآه آه لو بالرغم دي
ربنا يهون علينا الدنيا ويغفر لنا ما لا يعلمون

Unknown يقول...

بص أنا أحب أشكرك علي تقبل رأيي مع إني كنت حاسس إنه لاذع حبتين بس ماشاء الله انا شايف مدونتك ليها جمهور(بمقاييس المدونات)وإن مجرد رأي واحد زيي مش هيفرق كتير...بس زي مانت قلت ان احنا لازم نتغير وهنتغير بجد لو كل واحد قال اللي عاوز يقوله وعمل اللي المفروض يعمله...وأكيد مستني كل المواضيع اللي جاية وإن شاء الله هتكون مفيدة أكتر وأنا واثق من ده

نعكشة يقول...

ألموضوع كبير

ومحتاج تفكير
وغربلة
وتمحيص

مش هنا بقة
في مخي

عامة

سلامٌ عليك

اقصوصه يقول...

موضوع ان احنا مرغوبين او لا

في الوسط اللي احنا فيه

موضوع يثير التساؤل فعلا

بس اعتقد بهالحاله

لازم الانسان دايما

يفكر بطريقه ايجابيه

ويعطي دعم معنوي لنفسه

عشان يزيد ثقته بشخصيته :)

اهم شي نكون نتصرف بطريقه صحيحه

ما نجرح حد ما نأذي حد

ولو حد احتاج لمساعدتنا

ما نقصر معاه،يعني نسوي اللي علينا

وبعد ما نخلص نطنش اكبر تطنيش

لان مب حلو بعد ان احنا نعطي راي

الناس اهميه كبيره

لا ان انته اللي تحدد منو انت

مش الناس هي اللي تقدر تحدد

او بمعنى اخر لا تعطي هالحق للناس

هذا حقك انته بس :)

من حق كل منا انه يحكم على نفسه

لان كل واحد فينا

ادرى بنفسه من الناس:)

تفسلفت عليكم انا صح؟

marwa mahdy يقول...

el post gamed gedaan ya battot 2na shayfa eno mtrabet gedaan ,e7na benhtm fe3lan el nass shayfana ezay we sa3at kteer ben3ml 7agat momken nkon mesh moktn3een beha le mograad enena ne3gb 7ad ,zay ma fe nas kteer bet7awel t2ool enha moltzma we hea ymkeen 2a2el men el 3ade el modo3 bel nesba leha manzrha 2odaam el naas mesh fe3laan kadia sha3la balha enha terde rabna ,,,,yarab fe3lan ykon zahrna zay da5lna .....

Mahmoud البطراوى يقول...

منوسى
اولا شكرا على كومنتك وفعلا الحاجات اللى بتقوليها فى الكومنت هى اللى كنت عاوز اوصلها بالظبط

شكرا ليكى

***************************************************
BISHR2038
احب اشكرك على شكرك بس
مبدئيا عشان مكنش بدعى غير اللى بعمله وعشان شكرك ميكونش غلط
رغم انى بهتم جدا بالكومننات وفعلا بتبقى عزيزه على اوى

بس انا مش مؤمن بحريه الرأى فى مدونتى
المدونه معموله عشان يتكتب فيها اى كلام يعجب صاحبها ( دى فلسفتى عن التدوين)
وعليه فهى مش جرنال , ولا كتاب بشتريه , ولا بيدخل ليها بفلوس , ولا بتتفرض علي حد
كل دا بعتبره انه بيدينى الحق لحذف اى كومنت -مش عاجبنى -فيه نقد سواء هدام او هادف
اللى بيقرا عجبه الكلام الفراغ بتاعى بيس جدا
مش عاجبه فيبقى عارف انه جه بمزاجه ومدفعش حاجه ... فبكل بساطه يمشى .
انا احيانا بس بسيب الكلام النقد عشان انا ببقى مقتنع بيه
وياريت محدش ياخد كلمى على محمل سئ
الموضوع مش اكتر من فلسفه ف الحاجه اللى بعملها
شكرا لك
***************************************************
نعكشة
اتمنى دا يحصل.. ويجى بفايده
وعليكم السلام
***************************************************
اقصوصه
ايه فيصل الحكم على طريقتنا هل هى صحيحه او لأ؟
اظن انها تكون مقبوله من السواد الاعظم من الناس اجابه مقنعه للسؤال دا
وبالتالى يبقى السؤال السواد الاعظم دا شايفنا ازاى؟
دى نقطه
النقطه التانيه ايا كان احنا شايفين نفسنان صح ولا غلط فاحنا بنحب نتعامل مع الناس اللى شايفنا صح ... ودايما بيشغلنا السؤال هل احنا بنتعامل مع الشخص اللى شايفنا صح ولا ننسحب احسن

تحياتى لك ولتعليقك الرائع
***************************************************
marwa mahdy
انتى الاجمل يا فندم
وبجد كومنتك من اكتر الكومنتات اللى بنتظرها ربنا يكرمك يارب

ويكا يقول...

بطوط

ياريت تقرى الموضوع اللى انا كاتبه عندى حاليا وتقولى رأيك

سلام

على فكره انا مش شايف ان مقالك مش مترابط ولا حاجه بالعكس . انا كنت ماشى معاه كلمه كلمه وكأنى كنت معاكم ، او انا اللى حصلى الموقف نفسه.

ست البيت يقول...

ohjuuuuuuuuuuuuuuuu
القطة يا بطوط لسه عندي
على فكره دي غالية لأنها قطة ماما
بس هي تعبت مننا ومن القطط
فلازم نضحي بحد
هي شكلها بتفضل تضحي بيا
بس على مين
الله يكرمك شوفلي صرفة لجولي
لو مش عارفة كلم سوووو
هو كان عاوز قطة
على ما اذكر
مستنية رد سيادتكم
دمت بحفظ الرحمن

صباح الصباح يقول...

ساعات لما ابعد عن الصلاة كتير الدنيا بتسود فى وشى

الصلاة طعمها جميل جدا واقدر اقول بكل ثقة انى مش باكون سعيد الا وانا محافظ عليها

غير معرف يقول...

صلي ع النبي
اولا سنة جديدة يا رب سعيدة عليك وعلى كل اللي حواليك
ثانيا دايما كده في بداية كل سنة او من رمضان لرمضان او من عيد ميلاد لعيد ميلاد تلاقي الواحد بيجدد نيته في الدنيا والعيشة والحياة والهدف وعلاقتنا مع ربنا والناس وكده

أهم من كل ده.. نكتب اللي نفسنا حققه ونتفرج على نفسنا ف آخر السنة وصلنا لإيه

بطووووووووووط.. ربنا يوقفك وينجحك ويكرمك وينور طريقك ويملاه بط وسنان وكماشات ^_^

مها ميهوووو

Dr.karim elaraby يقول...

الحوار ده فعلا بيشغل الواحد كتير
انا قصدي علي حوار الصلاة
بس انت يمكن الشاذ عندك انك تلاقي حد قاطع الصلاه خالص
انا بقي الشاذ عندي اني الاقي حد من اصحابي بيصلي (غير في وقت الامتحانات)
وربنا يهدينا ويهدي الجميع

Mahmoud البطراوى يقول...

ويكا
شكرا على الدعوه
انا قريت البوست وعجبنى بس معرفتش اعلق

تحياتى لك

***********************************************************

ست البيت

لما انا اعوز ميبقاش عندك
انتى عاوزه تخلصى منها انا مبقاش عاوز
بس المره دى انا عاوز بس مش هعرف انزل اسكندريه
:-S
الحل ايه
************************************************************

صباح الصباح

ميزه الطاعات عموما هو اللذه دى

تحياتى لك
************************************************************
أحسن تـستاهـل

متفق معاكى جدا
عاوزين نعدى مرحله الكلام للافعال

ربنا يكرمك يارب يا مهاا ميهووووووو

عاجبنى الاسم جدا على فكره :D

************************************************************

The dentist

انا مش بقول دا الشاذ انا بقول انا بتعامل مع الناس على انهم لازم يكونوا بيصلوا

حتى لو مشفتهمش بيصلوا بعتبر انهم بيصلوا اكيد فى البيت او بيجمعوا الصلوات بليل

تحياتى لك

-_- يقول...

الشباب بقى مغيب
ربنا يعينهم

Mahmoud البطراوى يقول...

نورتنى يا مان

غير معرف يقول...

اهلا

طوبه فضه وطوبه دهب يقول...

اكيد لازم يكون لكل واحد فينا قضيه انا عن نفسى ليا قضيه واحده كل لما اقولها قدام حد يضحك عليا وبمناسبه الانطباع الاول عنى انا عرفاه عشان كدا ما بشغلش بالى بيه لانه ديما ما بيكونش فى صالحى رغم انى عكس كدا لكن اللى بيعرفنى بعدها بيعرف حقيقتى اوى ودا اللى يهمنى اللى هيكمل معايا مش اكتر البوست جميل اوى وكفايه انك تكون خرجت منه بشىء مفيد

لــــ زهــــــراء ــــولا يقول...

اول زياره لفت نظرى اسم المدونه لسبب بسيط وهو ان اسم الدلع بتاعى بطوط وكمان لانى من عشاق شخصية بطوط
اولا كلامك حلو بجد ومن غير مجامله اسلوبك شيك جدا جدا فى الكتابه يا دكتور محمود
انت عارف يعنى ايه حد ملتزم انك تعرف الفرق بين الحلال والحرام انك تكون نفسك يعنى مش تقعد تتكلم على الدين وانت ابعد ما يكون عنه
مره كنت مع ناس وواحد فيهم عامل نفسه مثقف وقعد يتكلم على الشيوعيه وازاى اهل البيت وعلى بن ابى طالب واهل العراق واللى معايا قاعدين منبهرين بالشخص العبقرى اللى بيتكلم انا بقى قاعده ابص له وخلته يكمل كلامه وكل واحد قاعد يقول يا ما شاء الله انت فيسلوف انت مثقف كده يعنى
قولت له ممكن كلمه بسيطه حضرتك الاول لازم تعرف ان فى فرق بين الشيعه والشيوعيه والفرق بينهم مش كتير يعنى تقدر توصل له بتاكسى .........
مش عارفه انا خرجت من الموضوع الاصلى تقريبا فيرس ههههههههههههه
ان شاء الله لى عوده مرات اخرى
تسلم الايادى


زهراء

غير معرف يقول...

رااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااائع بكل المقاييس

و ثري و من اروع ما كتبت
و بجد بجد جزااااااااااااااكم الله خيرا

Moony يقول...

للاسف في ناس مخها في الضياع...الحمد لله اننا مبنتعرضلهمش كتير

عايزه أشتغل يقول...

زورو مدونتى الجديده