2011/01/08

بطوطوليكس ونظريه التمويه


البوست دا بوست سرى جدا  .. انا هكشف فيه عن وثائق مهمه جدا اخر حاجه .. انا هكشفهاا بس عشان حق القارئ فى المعرفه.
السر الخطير اللى عندى وثائق تثبته - رغم انه مش محتاج وثائق - ان مصر هتدخل فى حرب مع دوله كبيره جدا جدا جدا .. دوله جامده التنين .. وعشان كده مصر بتستعد جدا وبكل قوتها - فى السر طبعا - عشان تحارب الدوله دى.
حد يقولى يا عم انت بتهرج اكيد .. اقوله يبقى كده المخابرات المصريه انتصرت طالما انت مش مصدقنى
بص انت ركز معايا للاخر وانا هثبتلك ان كلامى صح.
فاكر انت فى حرب 73 لما كان جنودنا على القنال بالجلاليب , والسادات ادى لبعض الجنود اجازه لرحلات حج او عمره , وفى كل خطابات السادات اننا هنتجه للتنميه الداخليه ومش هنحارب .. فاكر انت كل التمويه دا؟ .. كانت فكره المخابرات المصريه انها تحسس اسرائيل اننا مش هنحارب .. وهوب عبرنا القناه
اهو دا بالظبط اللى مصر بتحاول تعمله دلوقتى .. طبعا انا معرفش اسم الدوله دى بس عشان التمويه جامد جدا المره دى فانا متأكد انها دوله جامده التنين.
انتوا فاكرين يعنى حوادث غرق العبارات , وموت السياح ,والقروش اللى فى شرم , والانفجارات الطائفيه , وكبت المعارضه , وتزوير الانتخابات , والوكسات الاقتصاديه , والوكسات فى التعليم , والصحه  دى بجد وحق حقيقى؟
احب اقولكم لا بالعكس .. ابسوليتلى .. احنا دوله جامده جدا جدا .. لكن بنعمل كل دا تمويه.. دا مجرد تمويه يا اخونا .. ما انتوا فاهمين المصرى معروف بجبروته.
يعنى لما يطلع وزير الماليه على التلفزيون المصرى واسمعه صدفه بيقول اننا فاضلنا تلاتين قرش بس ونبقى اعظم دوله فى العالم اقتصاديا .. الراجل دا مش بيكدب يا اخونا .. دا بيقول الحقيقه .. بس عشان مخابرتنا اقوى مخلينا مش حاسين بدا .. عشان التمويه ينجح.
عشان كده الراجل دا لما كان بيتكلم على دعم الدوله للصحه وان العلاج فى المستشفيات الحكوميه هيفضل ببلاش .. وبعدها بيومين بالعدد والله الاقى الاسعار فى المستشفى اللى بشتغل فيها - الحكوميه - سعر العلاج الاقتصادى فيها يزيد للضعف والله مره واحده .. يبقى العيب مش فى الراجل ابدا ..دا كله تمويه يا اخونا

يعنى لما يطلع مسئول ويبان عبيط واهبل وهو بيقول الانفجار حصل بين جامع وكنيسه يعنى الهدف منه مش النصارى الهدف منه مصر كلها .. ويسيبه من الاسباب ومن علاج المشكله لو كان فى مشكله ويفضل يغنى تحيا مصر .. وينسى خالص ان الانفجار كان وقت القداس وان مفيش مسلم بيروح يصلى فى الجامع الساعه 12 بليل .. يبقى المسئول دا قاصد يظهر عبيط واهبل ..عشان الدوله الجامده اللى هنحاربها تحس ان المسئولين عندنا عبط وهبل فميخافوش منهم ... تمويه يعنى مش اكتر.

لما يبقى وظيفه وزير الصحه انه يعد الموتى والقتلى بس .. يعنى ايام انفلزنزا الخنازير كل اللى كان بيعمله يطلع يقولك مات كام واحد النهارده .. يبقى مقصود والغرض منه التمويه مش اكتر .. واساسا اساسا محدش بيموت ولا حاجه الناس دى بتمثل عشان العدو يبلع الطعم .. تمويه مش اكتر.

ولما يبقى وزير الداخليه لسه وزير بعد التزوير فى الانتخابات , وبعد الاحداث الطائفيه الاخيره , وبعد التعذيب فى السجون .. يبقى الناس اللى بيقولوا بتتعذب مش بتتعذب ولا حاجه دول بيمثلوا عشان التمويه مش اكتر.. ودا ينطبق برضه على الانفجارات.
ولما بيموتوا من التعذيب مش بيكونوا ماتوا ولا حاجه .. دى الحكومه بتسكنهم فى قصر جامد جدا فى حته سريه .. بتأكلهم ما لذ وطاب وهم راضيين وموافقين عشان التمويه ينجح 

مصيبه سوده لتكونوا فاكرين  ان الريس بتاعنا عجز فعلا وبقى شكله كبير جدا .. يا اخونا هو عامل شكله كده بس عشان التمويه .. والله انتوا ظالمين وربنا هيعمل فيكم كتير ..اخص عليكم بجد.
يعنى بذمتكم فى دوله فى العالم بيدخل فيها وزراء مجلس الشعب؟ .. وتبقى مش عارف وظيفه مجلس الشعب انه يراقب الوزير دا .. ووظيفه الوزير فى المجلس انه يراقب الباقى ولا مين بيضرب مين؟ .. لكن لما تفهم ان دا كله تمويه هتستريح والله
يا اخونا مصر لسه بخير .. بس كل اللى بيحصل تمويه مش اكتر .. صدقونى  .. والمسئولين اللى بيبانوا عبط وهبل دول للتمويه مش اكتر .. والمسئولين اللى بيطلعوا يقولوا اننا احسن دوله فى العالم دول بيقولوا الحقيقه بس المخابرات لسه مقالتش ليهم اننا داخلين حرب مع دوله جامده الاخطبوط فلازم يموهوا 
طب اقعدوا فكروا كده بينكم وبين نفسكم هتلاقوا الاستهبال اللى حاصل فى البلد دا اكيد يعنى معمول قصد وله حكمه .. ومفيش حكمه اكبر من انه تمويه واننا داخلين حرب جامده جدا ومحتاجين التمويه دا .

انا قلت انوركم على الحقيقه دى .. وطبعا مجبتش كل الحاجات اللى ممكن تتفهم فى ضوء نظريه التمويه دى لكن البركه فى ذكائكم بقى .. عشان الناس اللى بدأت تفقد الامل .. ترجع تانى تثق فى اننا دوله جامده جدا اخر حاجه .. وكل اللى بيشوفوه دا تمويه مش اكتر .. مش بقولكم داخلين حرب جامده جدا :)

هناك 14 تعليقًا:

Ramy يقول...

حاضر هقول

اهوا
ههههههههههههههههههههههههههههههه

عندك حق احنا شعب ظاااالم

ربنا ينصر الزعيم القائد

أنا - الريس يقول...

مااااااااشي يا عم الحاج
بس أنا اعتقادي إن خناقة جارتنا مع ولادها تمويه
وعلي فكرة بقي أنا ندل
وبتصل دلوقتي بأمن الدولة أبلغهم عليك .
عشان الأسرار دي المفروض متطلعش لحد .

سوبيا يقول...

الله يخرب بيوتنا احنا ياشيخ

احنا اللي بنعكنن عالزعما وبنضايقهم
واتاري كل دا كان لييه
قصدي كل دا كان تمويه

اللهم خد مننا واديهم
اللهم ...:D

شمس النهار يقول...

بس كده التمويه طول اوووووي
يابطوط

تفتكر الدولة اللي هنحاربهاااا دي بتدخل البلوجر

:)))))

موناليزا يقول...

يااااه
طمنتنى ياشيخ:)
يعنى مصر اليوم فى عيد:)

R-H-S يقول...

حرام عليك يا اخي
كدا تكذب الكذبة وتخليني اصدقها

sony2000 يقول...

لا يونكن
بجد
اوووووووه نو
انا كدا هفكر براحتي
بس خلاص

فاتيما يقول...

:)

الله يحظك يا محمود
تصور ولا كنا واخدين بالنا ؟!!!
طب يا شيخ طمنتنى
وانا كنت بقول برضو
ايشعقول


التدوينة جميلة
يعنى بوست ماركة
بطوط حبوب
:)

FAW يقول...

هو البوست ده فيه من وراه مغزي معين ؟
أنا حاسس إنه تمويه !!

دنيا الحياة.... يقول...

:D ههههههههه ضحكتني فعلا ..الله ينور عليك هو كله تمويه او استعباط ...وقريب هيقولولنا ان احنا عايشين في المثلث الارضي وان بتلاتة ساغ متزوقيني ياماما هي الدستور الحقيقي للبلد دي
:D

غير معرف يقول...

أمال صفوت الشريف الاهبل بيكسر التمويه ليه وبيقول اننا متقدمين ف كل المجالات؟ :)

mrmr يقول...

الله ينور عليك يا شيخ
اما انت فتحت عيونا بشكل
وانا قال ايه افتكرت كل ده بجد وبحق وحقيقى اتاريه تمويه
طيب اجرى اقول لجارتى ارمى زبالتك قدام شقتى ولا يهمك مدام ده كله تمويه
شكرا ليك يا ذووووق

دعاء مواجهات يقول...

ههههههههههههههههههههههههه

يخرب عقلك دا انت بقى شكلك اشتغلت معاهم فى مصنع الأسرار والعمليات كلها ياحويط ...

babosha يقول...

انا برضه مش بشرب اللبن تمويه ومش حتجوز تمويه وبقرا البوست ده تمويه انا حياتى كلها تمويه عاش الزعيم طول العمر يطول عمره وينصره على مين يعاديه هاى هيى