2009/02/10

انتوسيد ..هيخلى الفالنتين عيد

 شايف واحد مستغرب من العنوان .. لعلمكم بس انا عامل البوست دا خدمه ليكم لا ابتغى بيه غير وجه الله وانتوا الى هتحكموا فى الاخر
الاول هسألك سؤال
هديه الفالنتين ايه هى الشروط الى لازم تحققها؟؟ء
اولا لونها يبقى احمر .. شريط انتوسيد لونه احمر
حبذا لو كانت مفيده .. مفيش افيد من كده
تعبر عن الحب والخوف على الى بتحبه ...احكموا انتوا بقى
 
اه انتوسيد وإلا الفالنتين مش هيبقى عيد
شفت انت اقراص بحلاوه اقراصه ... شكل شريط دوا بحلاوه شريطه ...دا الود ود اتبنى صاحب الشركه .. لولا انى عايز الى يتنبنانى اساسا
ولتفهم روعه هذا الانتوسيد اليك الاتى
مره فى ذات المراير واحنا كده فى اخر الشهر .. قلت يا واد القرشنات الى معاك مش هتنفع تجيب اكل من بره .. لازم وحتما ولا بد تتطبخ
وزى ما قلتلكم قبل كده انى معنديش اى مشكله بتاتا فى انى اطبخ  بالعكس .. ابسيوليتلى .. المشكله كلها انى اكل الى بطبحه ...... وهذا لو تعلمون عظيم
المهم عشان مطولش .. قولوا طول.
قمت وطبخت وعادى بقى وعصرت على نفسى ليمونه من الكبيره .. وكلت ...لحد كده تمام ؟؟
نازل انا بقى اتغندر بعد ما كلت ومليت بطنى بكل ما لذ ولم يطيب .. ونازل .. نازل ... نازل .. اصلى ساكن فى الدور التامن بقى نازل لوحدها متقضيش
المهم وصلت للشارع والاقى ودامى بنتين كده .. ما شاء الله شبه جوز خالتى ولابسين بادى لونه اخضر فى اصفر الالوان الغبيه الى كانت طالعه موضه السنه دى
ولسه بقول لنفسى اللونين دول شبه الاسـ ـ ـ ـ ـ ـهال

وهوووووووووووووووووب ااااااااااااااااه بطنى بطنى باطنىىىىىىىىىى
يا نهار زى بعضه ... دا لسه هطلع لحد الدور التاااااااااااااااامن عشان الحمام
من وجع بطنى بقى  طلعت زى الرهوان .. وعند كل بسطه سلم بقى اقعد استريح وانهج .. وعايز الحق ادخل الحمام والحاله بقت كرب ....واكافح ....واصعد... واصعد
بين وجع بطنى .. ووجع رجلى
واخيراااااااا  دخلت الشقه ودخلت الحمام ... وانا اشهد ان دخول الحمام مش زى خروجه ابدا ابدا ابدا
عدلت بقى هدومى .. وقلت انزل تانى ...(مش فاكر انا كنت رايح فين اساسا)ء
نزلت لحد تحت .. وخدوا بالكم -ان نزلت تحت - خمس حروف فى الكتابه ... انما دنياااااااااااااا فى الفعل
ما علينا
نزلت لحد تحت .. لقيت برضه نفس البنتين بنفس البادى بنفس اللونين ... وهوووووووووووووووب بطنى صوتت
واطلع ..هاها ... اطلع  هاااااااااااااااهااااااااااااا.. اطلع  يا الهوووووووووووى
ومش قادر .. ولو حد من الجيران فتح الباب.. يادى الكسوووووووووف ... اعمل نفسى بربط الجزمه او بعمل اى حاجه .....واقوم.... واطلع ...واطلع بايدى ورجلى.... وبطنى مش راضيه تسكت
دخلت  الحمام بقى وخلاص.. وعدلت هدومى وقلت بقى خلاص لازم وحتما ولا بد انزل اشترى انتوسيد
انتوسيد الى مشفتش حد كتب عنه شعر ... او حتى نثر.. رغم انه وبلا منازع افضل دوا فى السوق عالم ناكره للجميل انما انا هخلد اسمه بالبوست دا
وهقول انه افضل من كل الادويه .. افضل من ادويه السكر والضغط والكله والكبد .. وهأطالب من مكانى هذا انهم يحطوا صورته على  الجنيه الى شبه الدنانير بتاعه زمان

انا بقى نازل عشان اشترى شريط انتواسيد.. وناوى انزل مغمض عينى احسن البنتين يكونوا واقفين تحت
وخلاص عديت العماره وماشى بكل جساره رايح للصيدليه
واوبس بطنىىىىى مش قاااااااادر .. وهنا وقفت لحظه
ودامى حل من اتنين اما انى اخاطر واذهب للصيدليه .. ودى مخاطره كبيره
او انى اجرى انقذ الموقف
وهنا اخذت قرار حاسم ومانع انى استمر ولا اتزعزع
ودخلت للصيدليه وبكل جساره ... اول ما شفت الراجل كنت عايز اوطى على ايده ابوسها واخده بالحضن  شريط أ أ أ .. أنتو...سيد.... لا لا لو سمحححححت
الراجل بسرعه ادانى الشريط بلونه الاحمر الرائع واقراصه المش عارف لونها ....الجميله وبلبعتلى حبتين من غير ميه .. وهاتك يا جرى لانقاذ الموقف
وطلعت .. طلعت.. طلعت .. طلعت ووصلت اخيرا فى النهايه
اول حاجه فكرت فيها - عشان تعرفوا ان اصيل - انى اخد كام صوره مع انتوسيد .. وتانى حاجه انى ارش مايه على البنتين الى تحت البلكونه 
مايه لونها زرق عشان الباديهين يبوظوا وننقذ بطن المجتمع كله
انتوسيد هيعمل ايه ولا ايه
تقلى بقى طب ايه علاقه دا بالعنوان
اقولك باينه جدا
هديه تنفع للفالنتين ... ولنها احمر - عشان محدش يتلكك - وموفره .. ومفيده وخصوصا للى ساكنين فى الادوار العليا - اظن انت بنفسك شفت الفايده- اوعى تنكر ربنا يحاسبك
ودا اقل واجب اقدر اقدمه لانتوسيد الذى لولاه لاصبت بشلل رباعى .. من كتر الطلوع والنزول .. وكرشه نفس تكاد تصل لغيبوبه مستمر .. بس ربنا ستر

تنويه للاصدقاء خلاص انا سبت الشقه وانا الان فى الدور الارضى رغم انى كنت مصمم ادور على شقه تحت الارض بتمن ادوار .. تعويضا للايام الخوالى بس ملقتش غير ف الارضى 
:p

هناك 24 تعليقًا:

انا حره يقول...

هههههههههه

انا من رايى ان البنتين التكنى كالر دول مكانوش يستاهلو ميه زرقه تترمى عليهم

تؤتؤ ابسولوتلى

دول يستاهلو حاجه تانيه ريحتها يعععع خالص هههههههههه

الحمد لله الحمد لله معنديش اللى يجيبلى انتوسيد ولا حزمه فجل حتى هبيييييييه دنياااا

بس كل سنه وانت طيب يابطابيطووووووو وبلاش تاكل من اكلك تانى عشان خاطرك هههههههههههههه

mohamed ghalia يقول...

يانهار ألواااااااااااااااان
دا العلم نور يا أولاد أول مرة اعرف الفايدة العظيمة دى للأنتوسيد
عندك حق يابطوط دى أحسن هدية ممكن تيجى بمناسبة عمنا الفلنتين
واهى الدنيا تبقى احمر فى احمر

Dr tweety يقول...

بجد البوست تحفه وخلتنا بجد ناخد بالنا من حاجات مهمه في حياتنا مكناش وخدين بالنا منها ...ولازم الواحد يمشي بشريط انتوسيد علشان ميضمنش الظروف..بس المفروض الواحد يقعد في البيت ,علشان يعمل حسابه بدل مايخرج ويتبهدل ويرجع ويكافح ويقعد يصعد يصعد يصعد ...وعلي فكره نزلت اربع حروف مش خمسه

حاسوباتيه يقول...

ههههههههههههه انتوسيد يا مفتري يلا كله احمر مش هيبان وسط اللون الاحمر الطاغي وكل سنه وانت طيب

خمسة فضفضة يقول...

السلام عليكم ورحمة اله وبركاته

هههههههه
كل ده عن الانتوسيد

امال هاتقول اه علي الستربتوفنيكول كبسول واهو برضو احمر في ازرق فاينفع عشان تقدمه هديه منها انك جبت حاجه حمرا عشان الفالانتين وكمان زرقه عشان الحسد 2 في 1 يعني

ملحوسه / حباية الانتوسيد لونها بيج
:)))))))))))



سلام

احساس طفلة محبة للرومانسية بس واقعية يقول...

هاهاهاهاهاهاهاهاها

كويس انك جبت شقة ارضى
اكيد اكيد هتنفع
اذا كنت بتعمل لنفسك اكل كتيير

انتوسيد فى الفلانتين
مش عارفة اقول اية ؟!

صيدلانيه طالعه نازله يقول...

على فكره انا حاطبع البوست ده و اعلقه على باب الصيدليه و اجيب كميه و احطها فى كل الفاترينه زى بتوع الدباديب اللى كل فتارينهم بقت حمرا اليومين دول و اهى طريقه للترويج برضه
و شكرا على الفكره يا جميل
و مبروك الشقه
و على فكره فى كمان ستربتوكين لون تغليفه اخضر ينفع فى عيد الفلاااااااااااح
هههههههههههههههههههه

صاحب المضيفة يقول...

ومال لو كانوا تلات بنات ولا اربعة كنت عملت ايه


:):):):):)


سلام يا صاحبي ومش تنسى الفلطاين بالانسوسيد بقى كمان
:):):):):):)

la Princesa ... WHiSPeR يقول...

انا جه يا بشر
ازيك يا بطوط
وحشتني المدونه خالص خالص خالص
اولا مبروك على الشقه بتاعت الارضي
ثانيا بجد ماعرفتش ابطل ضحك انا وماما على البوست العجيب ده

اقولك انا موافقه على فكرة الانتوسيد كهدية للفلانتين ههههههه
اي حد يجيب اي هدية وخلاص
اشمعنى انا البلد كلها لونها احمر مره واحده كده ولا اللي طفح فيها بركان هههههههه

اني واي الف سلامه عليك وهنيئا الشقه الارضي

يلا تشاو :)

Abo 7anf يقول...

السلام عليكم

بدهين خضر يعملوا كدا
بس فكك الانتوسيد جامد
و ادعيلى بس الاقى مخلوقه مناسبه
وانا ههريها انتوسيد
و يجرى الحب فى المجارى

حمدالله على السلامه

قلب الأسد يقول...

ههههههههه .. مسخرة !!! .. على فكرة الأصفر و الأخضر حلوين بس اللي يعرف يلبسهم صح
:))

عالم حبيب يقول...

هههههههه الله المستعان

شفاك الله وعافاك


ملحوظة زغنطوطة يابطوط .. احنا كمسلمين لا نحتفل بعيد الفلانتين اللي هو كما يقال انه قسيس .. وحياة المسلمين كل يوم حب .. الله يملأ بيوت المسلمين بالسعادة يارب العالمين

آه وكفى يقول...

ههههههههههههههههههههه

تصدق فكرة .. واقتصادي كمان مش هيندفع فيه كتير
لأ والاجمل انه مغلف ججاهز مش لسه هنلف وبتاع
برافو يابطوط مبسوطة منك انا استمر .. لدرجة اني لو اي وحدة قالتلي جالي في الفلانتين شريط انتوسيد هقولها عليكي وعلى بطوط p:
بس فيه مشكلة انت مش واخد بالك منها انك لو سكنت تحت الارض بتمن ادوار هتقابلك مشكلة الطلوع برضو بس وانت خارج من البيت مش وانت مروح البيت :)) فهمت؟!

Teawater يقول...

هههههههههههههههههههههه
لا اكيد مش هاجامل
بس بوست دمه خفيف بجد وارجوك بقا تشيله
ههههههههههههههه
يعني عشان مطالبش باعتقاله اه
مينفعش كده البنات يشوفوا البوست ده هيقتلوك
ههههههه
عشان هم اساسا بيموتوا في الدباديب
تقبل زيارتي الاولى

صبرني يارب يقول...

انتو سيد يا مفتري

طب بالنسبه للاستربتو كين لونه اخضر تفتكر ده ينفع هديه امته

ما تقولش عيد العمال بقى عشان ده انا باجيب فيه مفتاح انجليزي

بطوط حبوب يقول...

انا حره
ههههههههههه

انا قلت اكتفى بالميه الزرقا دى مبدئيا

وان شاء الله يجيلك هديه السنه الجايه
الى بعدها
الى بعد الى بعدها
ربنا يدكى العمر والصحه
:D

************************************
Dr tweety

نورتينى يا دكتره
انا هدفى لفت الانمتباه للاشياء الهامه
ليس اكثر

:)
************************************
حاسوباتيه

لا دا بالعكس دا هيبقى مميز فى وسط الاحمرات
كهديه ليها قيمتها

:))

نورتينى

************************************
خمسة فضفضة

وعليكم السلام ورحمه الله وبركاته

انا معرفش البتاع دا بس اهو ينفع ف عيد الحب الجاى
بس المهم لون الشريط


سلاااااااام

************************************
احساس طفلة محبة للرومانسية بس واقعية

قولى موافقه

انتوسيد ميه ميه

:))
نورتينى بجد

************************************
صيدلانيه طالعه نازله

تعليقاتك دايما بحس انها احسن من بوستى

عيد الفلاح دى جامده بجد
هههههههههههههههههه
نورتينى

************************************

صاحب المضيفة

لو كانوا اربعه مش عارف كنت هعمل ايه
اهو ربنا ستر الحمد لله

************************************
la Princesa ... WHiSPeR

سلميلى على ماما جدا وبجد انا سعيد انها ضحكت عندى بجد حصلى البركه

ومتقلقيش السنه الجايه
الى بعدها
الى بعد الى بعدها
يجيلك هديه
:P

بطوط حبوب يقول...

Abo 7anf
وعليكم السلام

هههههههههههههههه
ربنا يوفقك يا مان
ولما يوفقك اوعك تعمل بنصيحه الانتوسيد

( قام بهذه التجربه خبراء مدربين ارجوك لاتجرب هذا فى المنزل)

:P

*******************************

قلب الأسد

ههههههههههههههههه
مش عارف بس انا شايفهم لونين اغبيا جداااااااا

:)

نورتينى

**********************

عالم حبيب

واضح انى بتريق وواضح انى ضد عيد زى دا او غيره

شكرا ع النصيحه وجزاك الله خيرا

************************

آه وكفى

ههههههههههههههههههههه
نورا انتى مشكله بجد

*************************

Teawater

هههههههههههههههههههه

لا ما انا مكنش قصدى انتوسيد من غير دبدوب
طالما فيها اعتقال بقى

يا هلا بيك ويارب تشرفنى دائما

*******************

صبرنى يارب

بذمتك كلامى مش مقنع؟
:))

كلاكيت تانى وتانى يقول...

ارجو نشر الايفنت لديك على مدونتك والدعوة لحضور الحفل بين كل المدونين وذلك لتأييد المدونات المشاركات فالحدث ويشرفنا حضورك
حفل توقيع العدد الثالث من سلسلة مدونات مصرية للجيب
كتاب "أنا انثى " ..لمجموعة من المدونات النساء

أول كتاب يناقش اهتمامات المرأة بقلم مجموعة من النساء ويطرح القضايا للنقاش

ضيفة شرف الحفل ..(غادة عبد العال ) صاحبة مدونة ..عاوزة أتجوز..والتي صدر لها كتاب بنفس العنوان عن دار الشروق

ومن المشاركات في كتاب ..أنا أنثى
نوارة نجم
اسر ياسر
ايناس لطفى
نرمين البحطيطى
شمس الدين
د . رشا عبد الرازق
بيلا شريف
مكسوفة
بسمة عبد الباسط
مريم الغنيمى
إيمان نادى
زهراء امير بسام
آية الفقى
مروة السيد
أميرة محمد محمد محمد
فاتيما
مذكرات عانس
نرمين البحطيطى
سلمى أنور
انجى سمراء النيل
سارة ابراهيم على
سمر مجدى
مروة النجار
شيماء حسن
نسرين عبد النعيم
د.مرام محمود
ايناس لطفى
نجلاء الشربينى
محاسن

يصاحب الحفل عرض فيلم قصير و==================================
المكان
المركز الثقافى الدولى
17 ش السد العالى ميدان فينى الدقى
الشارع المقابل لشيراتون الجزيرة
اقرب محطة مترو انفاق محطة الاوبرا
الزمان
يوم 3 مارس الساعه 4.30 عصرا

عصفور طل من الشباك يقول...

على الرغم من إن البوست ده وجع لي بطني بس الشيء الوحيد اللافت للنظر هي الألوان المبهجة اللي طالعة موضة وعلى رأي جدتي الحبيبة في تعليقها على بنطلون أخي الجينز المقطع "دي إيه الموضة المهببة دي"

Heba يقول...

ألف سلامة عليك

ومبروك على الشقة الأرضي

ربنا تاب عليك من الدور التامن

«۩AhMeD 3LLaM۩» يقول...

ههههههههه
ارحم نفسك وعيش في الشارع
هتكون جمب الصيدليه وفي نفس الوقت مش هيوكن فيه سلالم من الاساس وبعيدن ايه الصفار الي في المدونه ده كله

سومه...مجنونه فى بلد عاقل يقول...

ههههههههههههههه
ازيك يا بطوط انت لسه زى ما انت ابعد ابعد والاقيك زى ما انت ...عموما يوم الفالنتين محتاجين دواء حصبه مش انتوسيد عشان الحمار اللى بيضرب فى الناس..
فكرتنى مره زمان كنت فى صيدليه بشترى دواء برد دخلت بنت صغيره وكانت مرتبكه جداا وبسرعه سالت الدكتور (عندك اسهال)
:))
البنت يا عينى من كتر تعبها طلبت المرض مش الدواء:)
حكايتك فكرتنى بمنظرها تانى
مبروك الشقه الارضى
سومه

نهر العاص يقول...

مبدايا انا بتنرفز من اللون الاصفر بشددددددددددة مهو طبعا لازم تاخد علبة انتوسيد بحالها هما البنتين دول سبب المصايب بس واللهى كنت بدل ما ترش ماية زرقا كنت ترش مبيد حشرى مش كفاية لابسة اصفر هههههههههههه موضوع رائع يا دكتور بجد بس بالنسبة لهدية الفلنتين الا ماشفت راجل واحد ماسك فى ايده ورده بيهديها لخطيبته ولا قرص انتوسيد حتى انا عن نفسى كل فلنتين هنزل اشترى هدية لنفسى ولا ازعل نفسى

غير معرف يقول...

Howdy just wanted to give you a brief heads up and let you know a few
of the pictures aren't loading correctly. I'm not sure why but I think its a linking issue.
I've tried it in two different internet browsers and both show the same results.

Here is my homepage :: click next