2011/06/01

لا سعيدا لا حزينا


عارف لما تبقى فى البحر ولابس مايوه واسع اوى .. والمايه بتدخل جوه المايوه .. المايه بتاعه البحر دايما بتبقى دافيه .. عارف انت بقى الحاله دى ..وعارف التفكير او لحظه التأمل اللى بتجيلك ساعتها .. اهو دا الشعور اللى انا حاسس بيه طول اليوم .. كل حاجه مريت بيها النهارده كنت شايفها من بعيد وكأنى مش بطلها .. كنت بشوفها بعين شخص متأمل وهو قاعد فى البحر ولابس مايوه والمايه بتدخل جوه المايوه .. حاجات كنت عاوز اصورها واجى هنا بسرعه اكتبها .. وكل الحاجات اللى كانت موجوده فى الذاكره عندى كنت عاوز اخرجها وابروزها وارجع تانى اكتبها .
بس ساعه لما جيت اكتب لقتينى بسأل نفسى سؤال صعب .. سؤال هو اللى هيتوقف عليه انا هختار انى صوره من الصور دى واطبعها واحمضها واجى انشرها هنا ..هو انا دلوقتى سعيد ولا حزين ؟ بحب ولا مبحبش؟ محتاج اضحك ولا اعيط ؟
يمكن يكون السؤال سازج بس فى الحقيقه هو مش كده .. انا فعلا اكتر شعور اقدر اقول عنه انه مسيطر عليا هو شعور انى مش عارف هو فى ايه بقى؟
احيانا بحس شويه انى ندمان
طب عارف ايه اكتر حاجه دلوقتى ندمان انى معملتهاش .. انا كان نفسى اوى اخد رأى عمى الله يرحمه عن رأيه فى والد "ليلى " كنت محتاج اقوله انا خفت من ايه لما قابلته وكنت عاوزه يفكر معايا .. انا حاسس ان لسه كان فى كلام كتير بنا -انا وعمى- مخلصناهوش .. انا واحشنى اوى اننا نقعد نتكلم واخد رأيه بس فى كام موضوع
والحاجه التانيه اللى ندمان عليها اوى .. كان يوم اول عمليه عملها عمى .. كان على لسانى اقوله عمى انا بحبك اوى .. بس خفت يعيط لما اقوله كده .. وخفت يقلق .. كان بيعيط كتير اوى فى الايام الاخيره ..وانا كمان كانت دموعى على باب عينى فمرضش اقوله كده .. قلت هبقى اقولها لما يقوم بالسلامه .. انا ندمان اوى انى ملحقتش اقوله انى بحبه اوى .. تفتكر هو عارف انى كنت بحبه اوى ؟

كمان امبارح  اول مره اقول "لليلى" انى بحبها وابقى حاسس وانا بقولها ان فى حاجه غلط ..  اقل مره ابقى حاسس انى بحبها وانا بقولها.. مش عارف ليه ورغم ان دا مش منطقى ومفيش سبب مادى له بس انا بدأت احس ان فى حاجه غلط بعلاقتى بـ ليلى
بقيت حاسسها ابعد وانا كمان مبقتش متفهم حاجات كنت متفهمها زمان .. كمان بقى خلقى ضيق وبقيت بكره ان يبقى فى مشكله .. انا عموما بدأت احس ان خلقى بقى ضيق اوى وبدأت احس ان فى حاجات كتير مش عاوز فيها مشاكل وعاوزها تخلص بالشكل اللى انا عاوزه وخلاص.
ما كفايه كتابه كده النهارده ونكمل بكره احنا هنروح من بعض فين :)
البوستات الجايه غالبا هتمشى فى نفس الخط دا .. انا قلت انوه بس عشان انا عارف ان فى ناس مش بتحب البوستات اللى شبه دى .. فقلت اقولهم من الاول :)

هناك 8 تعليقات:

سوبيا يقول...

هو عارف

ايام الضحك والدموع يقول...

السلام عليكم
أولا نصيحة منى حاول تخرج نفسك من الدائرة اللى انت عايش فيهالو تقدر تسافر فى مكان فيه بحر سافر ,اجلس فى مكان فيه زرع,اوبعد صلاة الفجر امشى كتير.
تحيتى
ودعواتى .

حَـبآيـۃْ.بـטּـدۉڷ يقول...

هُو كُلنا مَحبُوسينْ فـي نَفس
الإزازَه ولآ إيه ؟! :DD

فِعلاً .. هُو أكيدْ عارفْ ..
مِش شَرطْ تقولهْ .. أحياناً كتيره الأفعالْ بتبقى أفضلْ من 100 كلمة حُبْ ! :)

خِيرْ .. إن شاء الله ..:):)

غير معرف يقول...

:D
انا بردو دلوقت مش عارف
مش عارف مش عارف ايه بالظبط
بس انا مش عارف

حاجة خاااااااااالص

براءة

Mahmood البطراوى يقول...

سو بيا
:)
************************************
ايام الضحك والدموع
وعليكم السلام ورحمه الله وبركاته
شكرا بجد على النصيحه والنهارده كان احسن بكتير من امبارح :)
************************************
حَـبآيـۃْ.بـטּـدۉڷ

خير ان شاء الله :)
**********************************
براءه
مش مهم خالص على فكره :D

غير معرف يقول...

السلام عليكم ورحمه الله وبركاته
اولا البقاء لله... انا لسه عارفه دلوقتى بس... ربنا يرحمه
عارف انا كمان محتاجه ادون كل يوم..محتاجه يكون معايا جهاز تسجيل فى كل وقت ...كلام كتير بيمر فى خيالى وبكتب مواضيع فى زاكرتى طول اليوم ...تدفق غريب لافكارى.. لكن للاسف مش بيكون فى وقت اجيب ورقه وقلم واكتب...ولما بيجى الوقت وامسك القلم بيكون كل حاجه راحت ... لو كل حاجه كتبتها فى وقتها بتطلع احلى ...بيكون الوحى موجود وموود الكتابه عالى...وده سبب انى مش بكتب بقالى اكتر من سنه

فى انتظار باقى التدوينات

روز :)

غير معرف يقول...

ياااااااااااااه براءه ظهرت.... والله الف شكر ليك يادكتور انك خلتنى اشوف كلامها بسبب البلوج بتاعك
روز

غير معرف يقول...

المشكلة مش انى الناس اللى بنحبهم يموتوا من غير ما نقولهم ان احنا بنحبهم
المشكلة الاكبر اننا ما نتعلمش ان احنا نلحق اللى لسه عايشين ونبيلهم ان احنا بنحبهم بالفعل قبل الكلام
لما بابا تعب كان نفسى قوى اقوله انى بحبه بس مقولتهاش ***لما مات ندمت قوى انى مقلتش الكلمة ده
وللاسف مازالت مش قادرة اقولها لاهلى دلوقتى بس بحاول على قد مااقدر ان كل تصرفاتى معاهم تبينلهم انى بحبهم
بس ده مايمنعش انهم نفسهم يسمعوا الكلمة ده زى ما بالظبط مااحنا نفسنا نسمعها منهم