2010/09/04

قلق خفيف


 افضل طريقه بحب اكلم بيها شخص اول مره اشوفه .. انى اتكلم معاه وكأنى اعرفه من مليون سنه واضحك واهرج معاه عادى جدا - الفرق الوحيد انى ببقى مصمم احافظ على الالقاب حتى لو كان اصغر منى - ويمكن دا اللى خلانى انا وهو نشعر اننا اصدقاء رغم اننا فى الواقع مش اصدقاء.
القصه بدأت انه دخل مدونتى .. اعجب بيها وبشخصى على حد تعبيره .. وكان محتاج مساعدات معينه فى مدونته .. طبعا على اد ما اعرف قدمتها له.
كل اللى دار بنا حوار شات وحيد .. طلب بعدها رقم تليفونى .. عرفت من حوار الشات الوحيد اللى دار بنا انه عنده مشاكل .. المشاكل الطبيعه اللى عند شاب عدى ال 30 ولسه متجوزش ... ولسه مستقرش فى حياته بأى شكل.. وقصه حبه الوحيده بتعانى مشاكل كبيره وغالبا هتنتهى .
توقعت انه اخد رقم تليفونى مش عشان شايفنا اصدقاء .. مش عشان معجب بشخصيتى اللى تصور انه يعرفها من المدونه .. توقعت انه خد رقم تليفونى لانه نفسه يحكى مع اى شخص فى العالم .. شخص ميكونش يعرف عنه اى حاجه الا الحاجات اللى هو هيحكيها بس .
يمكن فهمت كده لانى احيانا بحس انى محتاج لدا اوى .. محتاج احكى لحد من غير ما يكون مكون صوره عنى .. محتاج ارسم صوره لشخص عنى باى شكل .. مهو انا اشكال كتير مش شكل واحد .. وكل اللى اعرفهم يعرفوا " محمود واحد بس " رغم انى انا كذا محمود.  
عارفين انتوا الشعور دا؟
احيانا بحس انى محتاج اتكلم بـ محمود جديد غير محمود اللى انت تعرفه .. لكن مبعرفش اتكلم بمحمود الجديد دا لانه ممكن يكون صادم ليك .. ثم لانه جزء بس من محمود مش محمود كله... وانا زى اى شخص طبيعى مش عاوز كل الناس يعرفوا كل اجزاءى .

توقعت انه محتاج يتكلم معايا وانه ممكن يختلق مشكله غير المشكله اللى هو فيها اصلا .. احيانا الواحد لما بيرسم نفسه كـشخص جديد بيصنع معاها مشاكل جديده .. بعيده اوى عن مشاكله .. يمكن ساعتها بيبقى محتاج ان حد يطبطب عليه بالكلام اكتر من انه محتاج يحكى مشاكله .
كتير اوى الواحد بيبقى محتاج انه يتكلم .. مجرد يتكلم مع حد يطبطب عليه .. هو مش محتاج نصيحه وخصوصا انى اصغر منه بكتير .. هو بس محتاج يتكلم .. مش محتاج حتى يقول الحقيقه ..مجرد رغبه انه يتكلم.. انا بدعى انى اكتر شخص فاهم الشعور دا.

تعمدت انى مسألش عن الاسم ولا عن الدراسه ولا الشغل ولا اسأل اى سؤال ممكن يخليه يحس انه مضطر يرجع لشخصيته الطبييعه .. ومكنتش بسمع كلامه بتركيز كبير .. مكنتش عاوز ادى لنفسى فرصه لتحليل كلامه ولا تحليل شخصيته من الكلام دا .. كنت عاوزه يفضل مجهول بالنسبه ليا زى ما هو كان عاوز زى ما خمنت.
من كام اسبوع اتصل بيا .. قالى انه عنده ورم .. واحتمال يكون الورم دا خبيث .. صوته كان مريض اوى ومصدوم اوى وخايف اوى .. بس كان زى اى حد فى مكانه عامل نفسه  صابر ومتماسك .. انا برضه كنت بتكلم معاه ببساطه شديده .. كأنه قالى ان عنده لوز او الزايده .
اتعلمت انى اتكلم عن الامراض ببساطه من عمى الجراح ..هدوءه بيخلينى اهدى .
لكن اللى له الفضل الحقيقى انى اتعلم الهدوء دا واحد صاحبى لما قلت له ان عندى برد جامد .. فضل يقولى فى وشى الحمد لله الذى عافانا مما ابتلاك به ..يا نهار وحاسس كمان باحتقان فى الزور ربنا يشفيك يااارب وكل شويه يتصل يطمن عليا ويقولى انت فعلا شكلك لسه تعبان اوى .. رغم ان كلامه كان بيعكس بشكل او بأخر قلقه على بس انا حسيت انى هموت بعد ما شفته.. لدرجه انى زعقت فى وشه وقلت له يا عم انا عندى برد .. وهبقى قرد بكره متخافش.
كلمته عن الورم انه حاجه تافهه اوى .. سألته فين مكانه .. وقلت له ان المكان دا حتى لو الورم خبيث وان شاء الله ميكونش كده فالمكان دا نسبه النجاح فيه 100% ومش بيرجع تانى .
رغم الثقه المفرطه اللى كنت بكلمه بيها كنت عارف انى بكدب .. والمكان دا بالتحديد نسبه النجاه من الورم لو خبيث ما تزيدش عن 23% ودا فى الدول المتقدمه وان بنسبه اكبر من 80% فى الدول الناميه المريض بيموت قبل خمس سنوات .
رغم ان صوتى مكنش فيه ولا لمحه قلق  .. كنت بتكلم معاه ان عنده حاجه اقل خطوره من اللوز  .. الا انى كنت هموت من القلق .. فتحت المراجع اللى عندى ونزلت مراجع من على النت عشان اشوف تشريح المنطقه دى .. خمنت كل احتمالات الاورام اللى ممكن تبقى هنا وايه اكبر ورم فيه نسبه نجاه .. لمده اكتر من سبع ساعات متواصله بذاكر كل التشخيصات المحتمله فى حاجه زى دى .. الدكاتره دايما بتقول للعيان كلام يفهمه مش بتقول له تشخيصه اللى بيبقى مكتوب فى الكتب والمراجع .. ومطلوب منى احول الكلام اللى قال له الدكتور لتشخيص حقيقى .. فضلت ادور عن  افضل اماكن علاجه .
كنت قلقان وكأننا اصحاب؟ .. أو كنت قلقان ان حد صغير ممكن يجيله مرض زى دا ؟... خوفى كان انعكاس خوفى على نفسى؟ ولا هى رحمه ربنا وضعها فى قلوبنا؟  لحد دلوقتى مش عارف مبرر قلقى المبالغ فيه دا .
قلت له ان ربنا جاب له مرض تافهه وصغير زى دا عشان يشغله عن مشاكله .. قالى زى بوست مجرد ميعاد .. قلت له بالظبط .. حسيت ان انا اقنعته وحسيت ان صوته بقى احسن ..وحسيت ان انا بقيت الكبير وهو الصغير .. وانه متعلق بكل كلمه بقولها وكأن فيها الامل .. وكأنى انا اللى بعالجه مش الادويه .
انا اللى قلقت باقصى ما يمكن .. طول اليوم بكلم ماما عنه .. كل ما اكلم حد اقوله يدعيله .. ولولا انه بيقرا مدونتى كنت كتبت عنه فيها.
امبارح اتصل بيا وقالى انه خلاص طلع ورم صغير وحميد وانه غالبا هيخف بالعلاج بس .. فرحت اوى بدا .. بس قررت اقطع علاقتى بيه .. حسيت ان فعلا دورى انتهى .. او حسيت انه لازم يخترع طريقه غير الطريقه دى عشان يلاقى حد يطبطب على جراحه
او حسيت انى من كتر القلق كنت هموت وانى مش قادر اكلمه تانى .
حسيت انه محتاج حد يقعد قصاده يتكلم معاه .. مش مجرد شخص مفيش بنهم اى شئ مشترك .. لا المكان ولا السن ولا الخبره .
صديقى المجهول حمد لله على سلامتك .. لكن صدقنى باقى اوجاعك محتاجه صديق بجد مش محتاجانى انا.
شكرا على الايام اللى فاتت اللى خلتنى اشوف نفسى بشكل تانى.. واللى هتفضل تجربه محفوره فى ذاكرتى طول العمر .. بس بجد ونصحيه من شخص بيحبك انت محتاج لصديق بجد .. صديق تبكى بين ايده , وتسأله عن رأيه فى مواضيعك , ويقف جنبك , صديق يشوفك وتشوفه.. لكن الصداقه البعيده اوى دى صدقنى مش كفايه.

هناك 14 تعليقًا:

mrmr يقول...

شئ جميل انك تحسس اللى قدامك انه مش غريب عليك ويبقى صوتك فيه نبره ترحيب لانه يعطى انطباع جميل للى قدامك ويحسسه براحه نفسيه

انا مش شايفه مشكله انه يلاقى صديق يسمعه من بعيد لبعيد مجرد انه يسمعه ويطبطب عليه كفايه لو انت مضايق ده شئ يرجعلك لكن من رايي انك تستمر معاه لو هو حابب كده وانت مش مضايق منه

وفى نفس الوقت نصيحتك له انه يدور على صديق يشوفه ويبقى قريب منه فدى نصيحه جيده لكن فى بعض الاحيان بيبقى فى مشاكل نفسيه تمنعه من القرب لاى شخص او احساسه بصغر النفس ده احساس صعب جدا

كل سنه وانت طيب

أع ـقل مـ ج ـنـونــة يقول...

البوست دا صعب اوي

فيه حاجات كتيرة مني !

واضح اننا كشخصيات طبيعية " يمكن طبيعية ! " .. بنعاني من المشكلة دي اننا بنحتاج حد نتكلم ونفضفض معاه من غير مايصدمنا باي شئ يخلينا نندم اننا حكينا ليه !

حمدالله علي سلامته .. اتألمت أوي عشانه !

احساس صعب اوي والشخصية دي رغم محاولة تماسكها الا انه فعلا قوي جدا ..

ربنا يحميه ويشفيه من كل مرض ويحميه من اي شئ وحش

انا شايفة انكو ممكن تكونو اصدقاء كويسين جدا

مش شايفة عشان العلاقة بدأت علي المدونة وانه كان محتاج حد يفضفض معاه متكونوش اصدقاء !

ممكن تكون صداقة قوية

متتخلاش عنه .. ايوة انا شايفة انك لو سبته هتكون بتتخلي عنه !

خليك جنبه ومعاه .. الشخص دا انا حاسة انه محتاج صديق جدا

جايز ملوش اصحاب .. مش موضوع انه عاوز حد يفضفضله وخلاص !

خليك جنبه .. وخليه جنبك

وحبو بعض ف الله لو هو شخص محترم !

وكل سنة وحضرتك طيب وبخير ^_^

عمرو يسرى يقول...

بوست صعب الرد عليه
نصيحتك له بانه يكون له صديق حلوه
لكن فيها ايه ان تكون انت الصديق الثانى له وتقرب منه اكتر خصوصا ان تصرفك معاه تصرف صديق بجد فلماذا قررت الانسحاب مافيش مشكله ان الواحد يكون له اكثر من صديق
صديق يناقشه فى مشاكله
وصديق يفضفضله بدون مايرد عليه
الانسان محتاج لاكتر من صديق
او صديق واحد يعرف امتى يناقشه فى مشاكله وامتى يسيبه يفضفض من غير مايناقشه

دنيا....اوحياة يقول...

حالة انسانية عبقرية جدا ..احيك على قدرتك في التعبير عنها ...والحالة دي بتمر كتير اوي بس قليل اللي بيعرف يقدمها زي ماعملت
..
كنت بعتقد لما بحس بالحالة دي ..اني مجنونة وبحس بحاجات مش موجودة اصلا...لكن اعتقد ان دي ملكة مش عند اي حد او جايز يكون قدرة على رحمة الغير وقرايتهم ...قبل اي تصرف وقبل اي كلمة ..
..
وكله بثوابة ..
:)

غير معرف يقول...

بوست تعيشه وانت تقرؤه ...أحييك

maryoma_sultan يقول...

بجد يا محمود مش عارفه ارد اقول ايه بس انا بجد فعلا بحس الاحساس ده ساعات من كتر مابكون متضايقه بروح المسجد اى مسجد واقابل اى واحده واتكلم اتكلم فى اى موضوع مش لازم الحاجه اللى مضياقنى بس مجرد انى اتكلم حتى لو حفضل انكت واتكلم فى كلام ضحك وهزار ببقى مبسوطه جدا لو سبت انطباع انبساط للى قدامى او احس انى بسطته ده بيخلينى انسى زعلى وضيقى

FAW يقول...

(يمكن فهمت كده لانى احيانا بحس انى محتاج لدا اوى .. محتاج احكى لحد من غير ما يكون مكون صوره عنى .. محتاج ارسم صوره لشخص عنى باى شكل .. مهو انا اشكال كتير مش شكل واحد .. وكل اللى اعرفهم يعرفوا " محمود واحد بس " رغم انى انا كذا محمود.
عارفين انتوا الشعور دا؟احيانا بحس انى محتاج اتكلم بـ محمود جديد غير محمود اللى انت تعرفه .. لكن مبعرفش اتكلم بمحمود الجديد دا لانه ممكن يكون صادم ليك .. ثم لانه جزء بس من محمود مش محمود كله... وانا زى اى شخص طبيعى مش عاوز كل الناس يعرفوا كل اجزاءى )


بجد أول مره حد يعبر عن النقطه دي بشكل يعجبني قوي كده
أنا عن نفسي فيا خمسين مصطفي , و خمسين حد أعرفه كل واحد فيهم يعرف مصطفي منهم , مش نفاق أبدا , بس حرية تعبير , أنا شايف إن ده الشخص و الزمن و المكان اللي أقدر أكون فيه ((كده))
أنا شايف زيك بصراحه إنه المفروض ينهي صداقتكودي و يدور علي صديق حقيقي , مهما كانت صداقتكو مريحه , وأعتقد إن هو كمان هيبقي عايز كده بمجرد إن مشكلته إتحلت
كل سنة و إنت طيب . .

ranim يقول...

حسيت وانا بقرأ البوست ده حسيت ان الكلام طالع من قلبحضرتك حسيت ان كل كلمة فيه صح وامبسط كمان لما طلع ورم مش خبيث وبجدلقيت فيكل كلمة في البوست مواجها ليا تقريبا عجبني اوي وامبسط اوي وشكلي هعيش هناكام يوم لحد لما اخلص البلوج تحياتي بجد اووووووووووي
تحياتي مبتسمة دائما

قهوة بالفانيليا - شيماء علي يقول...

مش هاقيم موقف الشخص اللي بيختار ناس ميعرفهومش و مش هبتدي أحلل تصرفاته .. لأن مش دة الهدف :)

انا هتكلم عن موقفك انت ..
عن شهامتك الحقيقية و احساسك بالمسؤولية ناحية حد ماتعرفهوش ..
:)
أكثر الله أمثالك .. و ربنا يشفيه و يشفي كل مريض .

babosha يقول...

انا شايفة انه ممكن تكونوا اصحاب وتكملوا اصحاب مع بعض مش لازم عشان هوه اتكلم معاك يبقى مش عنده اصحاب ممكن يكون زى ما انت قولت انه كان محتاج حد ميحسش انه اتعرى قدامه حد ميعرفهوش بس طالما انك حسيت بيه كده يبقى ممكن تكونوا اصحاب بجد مش عيب وبجد انت انسان هايل انك جواك كل المشاعر دى وانت ليك حرية الاختيار طبعا اذا كنت تكمل معاه صداقة ولا لا بس انا من رايى تكمل وربنا يكرمك ويوفقك انت تستاهل كل خير

شمس النهار يقول...

مش عارفه اقول لك ايه
مش حاسه القصه اوي
حاسه انه اشتغلك مش عارفه ليه

المهم
كل سنه وانت طيب وعيد سعيد عليك

تحياتي

أم الخــلـود يقول...

اصحى يا نايم ووحد الدايم

أرجوا من المدونين الموقرين أن يضعوا شعار الحملة واسمها فقط فوقها

(حملة الجسد الواحد)

في الشريط الجانبي لمدوناتهم كدلالة على وحدة صف أمة محمد

http://dndanh111.blogspot.com/2010/06/blog-post_14.html

ومن أجل قيام الولايات المتحدة الإسلامية

http://dndanh111.blogspot.com/2010/06/blog-post_17.html

جعله الله في ميزان حسناتكم .. آمين

بنت الغربة يقول...

اولا كل سنه وانت طيب
وعيد سعييد عليك
القصه دى محزنه ليكم انتم الاتنين
اولا لصاحبك المجهول ده ...لأن زى مانت قلت احيانا الواحد بيحب يبعد عن شخصيته الحقيقيه شويه...
ويعمل صداقات بطريقه مختلفه ...لناس يطبطبوا عليه مش اكتر..من غير مايعرفوه ويحكموا عليه...
بس صعب قوى حد يخترع مشاكل وأزمات..
لأنه حتى لو اخترع مشكله بيبقى ليها
مرجع عنده ولو بشئ صغير..
لان اللى بيكدب او بيألف بينسى كتيير هو قال ايه او ألف ايه..
عموما كونك قررت تقطع علاقتك بيه دى حاجه تخصك..بس افتكر دايما انه لو كان لقى صديق حقيقى يطبطب عليه ..ماكانش راح يدرو على صديق
نت او شات...مايعرفوش وماشافهوش...
تحياتى وسورى للاطاله

غير معرف يقول...

بجد كتابات حضرتك ملهاش حل ..
وفعلا الاحساس ده عرفت توصفه حلو اوي انك عاوز تتكلم مع بني ادم ميعرفكش عشان اللي حواليك حاطينك ف خانة معينة ويستغربوا لو طلعت براها ..
وكمان حكاية المشكلة الصغيرة دي فعلا لما بكون للواحد مشكلة كبيرة مضايقاه اول ما بيفضفض تلاقيه بيمسك الحاجات التانية الصغيرة ويخليك تحس انها فعلا حاجة منغصة عليه عيشته مع انها مش مشكلته الحقيقية..لانه غالبا لو اتكلم ف المشكلة الحقيقية هيتقلب طفل صغير ولن يتمالك نفسه من البكاء.
نفس احساس لما تقعد جنب حد ف المواصلات وتلاقيه عمال بيحكي ويسترسل في قصصه ومشاكله ولا يربطكما ببعض اي شئ..
تحياتي في رعاية الله
امة الله..على فكرة انا عملت اكونت على بلوجر بس نسيت الباسورد كالعادة..بس هعلق برضو ولو من مجهول