2011/06/09

العيان بيصحى 2


لما كتبت من يومين عن المشهد اللى حصل فى اول مره ادخل فيها اوضه عمليات بجد .. ناس كتير خدت فكره ان الدكاتره بيتعاملوا ببرود وقسوه قلب .. وجالى تعليق ان الجراحين دول جزارين .. والحقيقه عكس كده تماما.
الطب مهنه زى كل المهن .. فى ناس عندها قلب وناس غليظه القلب زى اى حاجه تانيه .. لكن انا بعتقد ان ممارسه الطب لازم بتزرع الحنيه فى قلب الدكتور.
يعنى الدكتور اللى لسه قلبه قاسى .. اظنه كان هيبقى متوحش لو كان اى حاجه تانيه غير انه يبقى دكتور .. وانه الطب رقق من قلبه بنسبه كبيره.
نرجع تانى للعمليه .
ناس كتير بتتخض لما تسمع ان الدكتور خرم بـ( الدرلر) الشنيور عشان يثبت مسامير .. وكان بيثبت المسامير كأنه بيثبتها فى خشبه.
الشنيور دا ساعه لما بيخرم بيطلع دخان كأنك بتخرم فى خشبه وبيبقى فى مساعد واقف جنبه بينزل محلول عشان درجه الحراره مترتفعش .. وبعدين يثبت المسامير بمفك شبه المفك الصليبه .. والمسمار وهو بيدخل بيعمل صوت طق طق
انا عارف ان المشهد دا يبان لك مرعب .. لكنه فى الحقيقه مش بالرعب دا .. الحقيقه ان كل شئ بيحصل متوقع وبالتالى معمول حسابه .. فمفيش داعى للقلق ولا للتوتر .. الدكتور بيشتغل بهدوء وبراحه لأنه عارف انه محتاج عشان يثبت الشريحه عشان يثبت بيها الغضمه اللى اتكسرت فى الجمجمه .. فهو لازم يحط مسامير .. وعشان يثبت المسامير فهو لازم يخرم بالشنيور لان دى الطريقه الوحيده لتثبيت العضم.. ولانه متوقع ان هيطلع دخان وهترتفع درجه الحراره فيخلى المساعد بتاعه يصب محلول على الجرح .. وصوت الطق طق بتاعه المسامير وهى بتتثبت دليل انها داخله فى عضم كثافته كويسه يقدر يستحمل الشريحه.
ايه اللى ممكن يخليه يقلق او يتوتر طالما العمليه ماشيه بالشكل اللى هو متخيله .. ويمكن عشان كده لحظه التوتر الوحيده اللى حصلت .. هى لما حس ان العيان بدأ يفوق ..دا شئ مش المفروض يحصل .. ساعتها الدكتور لأنه عارف انه بيتعامل مع روح مع كائن حي بيتوتر.
منساش ابدا جمله قالها ليا رئيس قسم الجراحه فى المستشفى اللى عمى الله يرحمه كان فيها .. لما كنت بقوله يا دكتور هو مش ممكن نخوض المغامره وندخل اوضه العمليات يمكن يكون فيها الامل بدل ما حاله عمى بتسوء كل يوم عن اليوم اللى قبله 
الدكتور يومها قالى جمله عمرى ما هنساها " الشطاره يا دكتور مش انى ادخل بعمك اوضه العمليات واخرج من غيره ,, الشطاره ان وانا داخل ابقى عارف انى هخرج بيه"
 اهل المريض بيبقوا قلقانين عشان مش عارفين ايه بالظبط اللى بيحصل .. بيبقوا متخيلن ان الدكتور داخل يقطع ويلزق فى لحم قريبهم .. والحقيقه مش كده 
انا شخصيا بتصادفنى حاجات وانا بخلع ضرس مثلا .. فالعيان يسمع صوت طق فيحس ان فى مصيبه .. وانا بالعكس لما بسمع صوت طق ببقى عرفت ان خلاص الضرس ساب من عضم الفك ودا مؤشر يخلينى ارتاح مش اقلق.. على الرغم من انه بيرعب العيان.
الدكتور لو شاطر فهو لازم يبقى فاهم هو يعمل ايه وبيعمله ليه .. وطول مهو فاهم مش بيبقى قلقان ولا متوتر .. كانه بيعمل اى عمل روتينى .. لكن لما الدنيا بتمشى فى اتجاه عكس اللى هو عاوزه .. ساعتها بتلاقى اوضه العمليات خليه نحل والكل متوتر وبيحاول يتنقذ المريض باى شكل.
وعلى رأى دكتور الجراحه اللى عندنا: ان العيان يموت على الطربيزه" سرير العمليات" فأقل وصف ممكن يتقال انه محطم لاعصاب كل فريق الجراحه.
هدوء الدكتور - الشاطر اللى عنده قلب ضمير - دليل ان كل شئ على ما يرام .. مش دليل انه معندوش قلب.

هناك 4 تعليقات:

nigro يقول...

اللهم إني مش عارف أشكرك إزاي إني ماطلعتش دكتور

Unknown يقول...

لما عملت عملية في رجلي من خمس شهور .. عملتها بمخدر نصفي ..
و فعلاً سمعت الدريل و المسامير و صوت ربط المسامير :)
الطب مهنة جميلة :)
أنا أحترم الأطباء

موناليزا يقول...

لما حد يحكى على المسامير والشرايح اللى بتدخل الجسم طبيعى الانسان العادى الجاهل بعلوم الطب يتخض

كنت بحشى ضرسى فى الفك العلوى ولقيت الدكتور جاب حاجة كدا ودخلها وقعد يربط بالمسمار تقريبا عشان يضمن ان الفم بفضل مفتوح طول الفترة اللى هو بيشتغل بيها ولانى كنت متبنجة محستش بحاجة ولا حطيت فى دماغى
لكن بعد ما خلصت كانت بنت خالتى معايا وهتعمل نفس الموضوع وشوفت العملية من اولها:)

بس سؤالى بقى هو ربط المسمار فى إيه؟؟
والجهاز ده اسمه ايه؟

msct يقول...

بالمناسبة عند تركيب المسامير بواسطةالscrew driveيتم عمل tappingبواسطة اداة تشبه المسمار لكن بها شق بالمنتصف لكى تحفر مجرى حلزونى حسب نوع العظام سواء كانت عظام اسفنجية كعظام مفصل الفخذ او الكاحلcanselous bone او عظام هقشرية cortical boneولذلك فالصوت العالى الذى يسمعه مريض البنج النصفى هو صوت انزلاق يد الطبيب المغطاة بالقفاز الجراحى والملوثة بالدماء على يد المفك ولسماع نفس الصوت قم بادارة يدك المغطاة بالقفاز اللاتكس على اصبع اليد الاخرى العارى