2008/07/29

تاجات وربنا معانا


**ملحوظه مهمه اهم من البوست


انا مبعرفش اجاوب على التاجات وبحس نفسى غلس وانتوا بتحسوا انى بختصر الاجابه .. رغم انى والله مش بختصرها انا بس مببقاش عارف اجاوب.. انا مش بحلل شخصيتى ومبعرفش اتكلم عنها .. ومعرفش الناس بتبصلى ازاى؟؟ بس اعرف انى محبوب وسطهم.... بحس كده من عيونهم وكلامهم


مش بعرف اجاوب على الاسئله الى بتحطك فى موقف معين وعايزه تعرف تصرفك هيكون ايه ... لانى بتصرف بتلقائيه غالبا.. فممكن الاجابه تختلف باختلاف الوقت ..انا باختصار مبحملش هم فى حياتى والحياه سهله


نيجى بقى للبوست
دلوقتى انا عندى تاجات كتيره اوى اوى هو الحمد لله انهم متشابهين وتقريبا هم تلاته بس متكررين وانا هقول الناس الى مررت لى التاج والى انساه معلش انا اسف


سمسمه ( بحبك يامصر)


سارة على (براءه)


جاليرى


ومها زين ( انها الحياة)


نسيت حد؟؟ المهم انا هدخل كله فى بعضه وبعضه فى كله عشان اعرف اتهرب من اى سؤال

:)

اذكر 6 اسرار لا يعرفها من يقابلك لاول مرة


الى هيقابلنى لاول مره ممكن يفتكر ان نظرى ضعيف ... لانى لابس نظاره :)
بس انا نظرى مش ضعيف دا مينص نص وانا بلبسها بس عشان الكمبيوتر والوسامهD:


تانى حاجه للى هيقابلنى لاول مره وهى لا تقل اهميه عن الاولى ان الى هيشوفنى الصبح بدرى هيلاقى عينى خضرا وممكن يفتكر ان ده لو عينى الطبيعى .... بس احب اقوله ان عينى لونها بيقلب ( اه والله مش بهرج) وهى لما بصحى من النوم واوقات الاجهاد بتبقى خضرا انما هى عسلى D:


تالت حاجه لو حد قابلنى اول مره وقالى اسمه ... هيبقى فاكر انى خلاص عرفته .... بس لو سألنى بعد دقتيقن هيلاقينى طبعا مش فاكره ... لان ذاكرتى فى الحاجات دى ضعيفه جداااااااااااااااااا جدااااااااااااا D:


ايه تانى؟؟ ممكن اقوله للى يقابلنى اول مره بصوا فعلا معرفش الناس بتاخد انطباع ايه عنى اول مره بتشوفنى؟؟ انا بسيط جدا وسهل اوى انك توصل لاغواره


صعب اتنرفز ومش سهل ازعل


بحب الناس وسهل انك تحس بكده من اول مره


وببقى خجول لما بكلم ناس معرفهاش بس لو احنا فى جروب وانا اعرف كذا واحد ببقى عادى يعنى


بحب التهريج جداااااااااا جداااااااااا وبعض الناس - حتى الى يعرفونى كويس - بيتهمونى انى مستهتر من كتر التهريج بس اعمل ايه فى نفسى ..انا بحب الضحك ومش شايف ان فى حاجه ممكن تخلينى اضايق.. ومش بحب اقرف نفسى واشيل نفسى هموم قبل معادها


لما حد بيشوفنى مش قلقان قبل الامتحان , قبل النتيجه , او قبل اى حاجه مهمه بيتأكد بالنسبه ليهم شعور انى مستهتر او مكبر الجمجمه ....بس انا بقول لنفسى انت هتلقلق ليه قبلها لما يجى لا قدر الله وحش ابقى ازعل انما متقرفش نفسك دلوقتى ..ولما بيجى وحش بقول لنفسى ياعالم مش يمكن انت عملت احسن ما انت متخيل ..ولما بتظهر النتيجه بقول يعنى الزعل هيفيد بإيه دلوقتى؟؟ D:


الى بيناقشنى فى اى موضوع - وانا بمل من النقاش - ممكن يحس انى متفق معاه فى وجه نظره لسبب انى فعلا بزهق ومش بحب اتناقش - دا غير النت بالمناسبه بالى طويييييييييييل فى النقاش جدا ومعرفش ليه ؟؟


**********************************


من انت؟


تلاقى الاجابه فى شمال المدونه من فوق


بطاقتى الشخصية


اسمى محمود
طالب فى اخر سنه طب اسنان القاهره
ومن قويسنا منوفيه

تاريخ ميلادى 31/3/87


ماهى احلامك؟


حلمى ابقى كويس فى كل حاجه ........ وكويس جداااااا


من اقرب شخص ليك؟


كل اصحابى .. محدش عنده تدوينه منهم فمش هتعرفوهم فبلاش اكتبهم بقى D:


اية معنى السعادة ؟من وجهة نظرك حاسس انك سعيد ؟


السعاده انك تبقى راضى عن نفسك .. وحاسس ان ربنا راضى عنك


امتى حسيت انك ظلمت انسان ؟ولية ؟ محتاج للحظة غفران منة ؟


مفتكرش انى حسيت الاحساس ده قبل كده .. انا لسه

21سنه ملحقتش اظلم حد D:


بتعمل اية لما تكون مضايق بعد ما تصلى ؟


انا مش فاهم السؤال ... يعنى ايه مضايق بعد ما تصلى .. يعنى مكنتش مضايق وبعد ما صليت اتضايقت ؟؟ ده مش بيحصل
معرفش بس لما يكون مضايق بنام واهرب


امتى حسيت انك اتظلمت ؟ولية ؟



زى ما قلت انا لسه 21 سنه لا ظلمت ولا اتظلمت لسه بدرى اوى على الكلام ده - على فكره دى فلسفتى فى الحياه دايما بقول لنفسى كده يا بنى انت لسه بدرى اوى على ما تزعل .. وعلى ما تحس بالظلم والكلام الكبير ده


اية اكتر احساس بيراودك هذة الايام تجاة نفسك والاخرين ؟


احساس كويس


امتى ممكن تتنازل عن حق من حقوقك ؟ والسبب ؟


لو حسيت انى بخسر من اعصابى عشان اطالب بحقى اكتر من الى بخسره لما بسيب حقى ده

هناك 36 تعليقًا:

maha zein يقول...

شوف الراجل
وقال عينه خضرا وبتكوب بنفسجي
طب بذمتك ينفع يعني
تبقه عامل الجو ده كله ومتقولش
عندك كام صفة يا رب يبقوا فعلا متواجدين عندك علطول
هو انك مش بتتنرفز
ولا انك بتزعل بسرعة
جدع يا بطوط
وبعدين جديدة دي انك من قويسنا المنفوية
عارف بزعل اوي لما بحس ان احد المدونين الي بتابعهم مش من القاهرة
بحس انهم فى غربة
مع انهم في بلدهم
لكن انا ببقه وزاهم كلهم من القاهرة
ومن شبرا كمان
نسيت يا جدع تمرر التاج ده للناس
كلت انت السؤال ده
باين علي شخصيتك فريش وسعيدة علطول
برغم ان ممكن يكون واها حزن
الا ان السعادة بتترسم علي وشك قبل الحزن
ربنا يسعدك

Mahmoud البطراوى يقول...

مها انا طول الدراسه فى القاهره اعتبر مقيم هناك من 5 سنين

والتاج انا لم امرره لاحد لان كلكم جاوبتوه خلاص :)

سارة علي يقول...

ازيك يا محمود
اية دة واللهى مصدقتش انك جاوبت على التاج بتاعى كنت بكتب بوست المسلسل بتاعى وببص لقيتك نزلت البوست دة كدة تمام التمام
واجاباتك شفافة وشخصيتك زى الفل
تحياتى ليك بس صحيح دة مش هعتبرة بوست جديد دة حل واجب بس ههههههههه

ست البنات يقول...

عجبتني جدا الأسئلة
والأجوبة
واقعية وبسيطة ومعبرة
بجد بجد دكاترة الأسنان ليهم مستقبل
يارب تتخرج على خير :)

سارة علي يقول...

محمود
الا صحيح انت لية مسحت البوست اللى قبل دة بتاع السلام تصدق لسة واخدة بالى دة كان بوست حلو

kochia يقول...

حلو موضوع النظارة بتاعة الشياكة دي
وحلو اوي برده حكاية اجهاد عنيك اللي بيخضرها ده

فعلا حاجات مش ممكن حد يعرها بسهولة بس انا كدة هعرفك

اجاباتك لطيفة اوي
وان شاء الله تفضل سعيد دايما

تحياتي

semsem يقول...

اولا اجابات لطيفه من هنا لبكره
انت بتزوغ من اجابات كتيييير بس ما علينا ياعم بطوط
شخصيه جميله بالطبع
ربنا يوفقك
اختك سمسم

Empress appy يقول...

بس احب اقوله ان عينى لونها بيقلب ( اه والله مش بهرج) وهى لما بصحى من النوم واوقات الاجهاد بتبقى خضرا انما هى عسلى


لا هى بتلمع يا محمود علشان كده بيتهيأ لاى حد انها خضرا او لابس عدسات
ده نفس اللى بيحصل معايا
وبعدين مش قوى كده يا توم من غير بصل انت ههههههههههههههههههههههه

د/اجدع بنوته يقول...

انا عكسك بصراحه

عمرى مااتنازل عن حق ليا حتى لو هموت فيه

اما بقية الاجابات ف الجون

تحياتى

وها ايه اخبار النتيجه

ويارب تكون عملت كويس ف الامتحانات

Mafrousa يقول...

الى بيناقشنى فى اى موضوع - وانا بمل من النقاش - ممكن يحس انى متفق معاه فى وجه نظره لسبب انى فعلا بزهق ومش بحب اتناقش -

-------------------------------
هههههههههههههههههههههههههههههه
و لحقت نفسك على طول
---------------------------------
دا غير النت بالمناسبه بالى طويييييييييييل فى النقاش جدا ومعرفش ليه ؟
------------------------------
هههههههههههههههههههههههه

صباح الصباح يقول...

يا بطبط انا بس ليا كومنت صغنن..
لما تكون متضايق ما تنامش وتهرب عشان انتا كدة هتصحى اسوا من الاول.. بجد عن تجربة
ما شى يا بطبط باشا وتقبل مرورى يا ريس

Mahmoud البطراوى يقول...

سارة على
وانا اقدر كجاوبش هههههههههههههه
ايوه انا الى زى الفل الى بتقولى عليه ده
ههههههههههههههههههه
بجد ربنا يخليكى

-------------------------------------------------

ست البنات
الاسئله اجباريه مش انا الى مألفها

تفاءلت اوى لما قلتيلى ان دكاتره السنان ليهم مستقبل
شكرا ليكى

-------------------------------------------------
ساره على

مش عارف مكنش عاجبنى

-------------------------------------------------

kochia

هتعرفونى كده ؟؟ دا لما تشوفونى بقى ههههههههههههههههههه

شكرا لمرورك

-------------------------------------------------

semsem

والله مش بزوغ يمكن مش بلاقى اجابه
بس انا المره دى لقيت
بلاش احباط
:)

-------------------------------------------------
ابى

لا مش بتلمع هى كده
وانا حلو اومور
واقدس الحياه الزوجيه
عندك عروسه
ههههههههههههههههههههههههههههه

ماشى ياابى ليكى نص يوم

-------------------------------------------------

د/اجدع بنوته

لا انا مش بحب اتعب دماغى ولا اعصابى
بس مش بتنازل عن حقى لاقل وجع دماغ
انا بقول اتنازل عنه لما احس انى هخسر من اعصابى اكتر

وانا نجحت معرفتيش
ههههههههههههههههههههههه
انتى عملتى ايه؟؟

-------------------------------------------------

واحده مفروسه

والله بجد
دا الى بيحصل
ههههههههههههههههههههههههه

رصيف نمره خمســــــه يقول...

حلوة اجاباتك

هههههههههه عنيك بتتلون طيب

سلااااااام

سارة علي يقول...

جيت ارزل وارخم واقولك فين البوست الجديد هههههههههه انا حاسبالك من امبارح وزى ما قولتلك دة بوست تاجات ومش محسوب
كل شوية كدة هاجى ارخم هههههه
سورى على الرخامة
تحياتى

سمر الشافعى يقول...

عنيك الصبح بتبقى خضرا واخر النهار عسلى اممممممم غريبه الحاله دى مخادناهاش فالكليه هههههههه

عندك كام صفه ماشاء الله ربنا يديمهم فيك بس حته انك مش بتقلق عالنتيجه دى غريبه شويه يعنى عمرك النوم ماطار من عينك ليله الامتحان وفضلت رايح جاى عالحمام دا احساس مر بيه كل طالب فالدنيا يابنى

تحياتى ليك دايما

بس صحيح فين البوست اللى فات ولا انا كان بيتهيالى

oRiGiNaL HeArT يقول...

اول مرة اقرا تاج والاقى اللى بيجاوب بيقول انه مش عصبى ولا بيتنرفز بسرعة
كويس اوى انك تحافظ على اعصابك

وبالنسبة للنضارة :))

الاجابات مختصرة اوى على فكرة

Unknown يقول...

حلو دة والله بس عارف بعد ماقريت حسيت ان الناس بيقولوا عليك مستهتر عشان فلسفتك غريبة وعالية جدا واكتر حاجة عجبتنى انك حاسس انك لسة صغير لا ظلمت ولا اتظلمت يعنى مش عايش دور الضحية ودى حاجة كويسة قوى بجد....هو انت جايب منين الثقة دى فى ان بكرة احسن؟؟

صاحب المضيفة يقول...

نعم يا اخوياااااااااااااااا


من قويسنا


ومش قايل لحد دلقوتي


دا انت جاري بقى


انا من قويسنا برضو


ربنا يهديك يا عم ومش قايل لحد دلقوتي


ياريت اعرفك بقى يا جميل قريب جدا




تحياتي

صيدلانيه طالعه نازله يقول...

يظهر انك بتلبس النظاره مش عشان تحمى عينك من الكمبيوتر لا عشان الحسد عشان امكانياتها الجباره الاوتوماتيك
جديده حكايه العينين اللى بتقلب دى
بس دى امكانيات متميزه حتساعدك مستقبلا فى حاجات كتيييييره قوى
اما اول اما شفت تاريخ ميلادك اكتشفت انى من امهات البلوج سبوت
ههههههههههههه

رئـــــيسـة حزب الأحلام يقول...

ههههههههههههههههههههه
حلوة عينك عسلى وبتقلب
ماشاء الله إجابات جامدة أهو أيه لازمتها الملحوظة الاولانيه
تحياتى لك

Ahmed Fahmy يقول...

هههههههههههههههههههه
ربنا معاك
جامدة اجاباتك جدا و يا رب تفضل فرحان و تحب الضحك علاطول و متشيلش هموم خالص
تحياتي

Ahmed Mostafa يقول...

عجبتني الاسئلةوالاجابات
حاستها صريحة اوي

مدونة عيش وحلاوة

Unknown يقول...

باين من اجاباتك انك حد حبوب فعلا

Mahmoud البطراوى يقول...

رصيف نمره خمسه

شكلك معترضه؟؟!!

ماشى سلااااااام

-------------------------------

ساره على

على معادنا ان شاء الله
هههههههههههههه

--------------------------------

سمر الشافعى

لا اصلى واثق فى نفسى
هههههههههههههه
البوست الى فات مكنش عاجبنى شلته

-----------------------------

oRiGiNaL HeArT

شفتى انا دايما متميز :)
اجاباتى مختصره؟؟ اوعى تقولى كده بيخادوا اى حد يقول كده
انتى حره
:)

----------------------------------

enjy

مش حاسس انى لسه صغير بس حاسس ان لسه بدرى على ما الكلام الكبير ده يحصل
:)
شكرا ليكى
رديت عندك فى موضوع الثقه ده
---------------------------------

صاحب المضيفه

انت كمان من قويسنا
اكيد انا اعرفك .... طيب لو ممكن نتكلم علىالميل بقى ايميلى فى البروفيل تبعاتى


---------------------------------

صيدلانيه طالعه نازله

هتساعدنى عينى فى ايه؟؟
ربنا يسهل
هههههههههههه
لا انا كبيييييييييير اوى دا انا من 87 ولسه عايش

----------------------------------

رئـــــيسـة حزب الأحلام

شكرا ليكى يا سلوى بجد
وشايفه ان الملحوظه الاولى ملهاش لزمه
حاجه ساقعه هنا للهانم لو سمحت
بجد رفتعتى روحى المعنويه
اصلهم كلهم بيقولوا الاجابات مختصره
ال مختصره ال

-----------------------------------
A7MeD F@hMy

ربنا يخليك ونورتنى

----------------------------------

ahmed afandy

ربنا يخليك

------------------------------------

عاليا حليم

ربنا يخليك

سارة علي يقول...

انااااااااا جيت
اية اتخضيت هههههههههه فاكرنى هسيب المدونة واروح اتعالج من الضغط والسكر طب ومين يرخم عليكم يعنى هههههههههه
فاصل
وكمان قاولون يلهوى دة انتوا عاوزين تخلصوا منى ههههههههه واية تانى ؟؟؟؟؟ دة انت تلاقيك قولت خلاص بقى لا هتنزل بوستات تانى ولا هنقرالها حاجة ههههههههه مخطط ارهابى
لا بس انا طلعت عيلة ورجعت ونزلت بوست كمان
الافين البوست الجديد ؟؟؟؟؟؟؟؟
تحياتىىىىىىىىىىى

RASHA يقول...

بطوط صفاتك حلوة زيك واجمل حاجة انك مش بتضايق ولا بتزعل ولا بتشيل هم ده يمكن عشان انت لسه صغير شوية ولسه مشتغلتش واحتكيت بالناس عموما يارب تفضل كده على طول وايه موضوع عينيك ده بجد اول مرة اسمع عن حاجة زى كده اشكرك على حل الواجب تحياتى

مواطن مصرى نايم يقول...

لا و الله يا عم مش بنحسك غلس و لا حاجة
لان هى التاجات كده ما فيهاش اى ابداع لانك مربوط بالسؤال بس انت بتضحكنى و الله ساعات باجاباتك
على فكرة انت كان ليك تاج عندى فى البوست اللى قبل الاخير
اعمل نفسك مش واخد بالك
(بجد مش بهزر)
هههههههههههه

و السؤال ده معناه يا سيدى

بتعمل اية لما تكون مضايق بعد ما تصلى ؟

يعنى لما بتكون متضايق بتعمل ايه
جاوب بحاجة غير انك بتروح تصلى يعنى
لان دى حاجة اساسية

اى خداموووز
لما تحب اشرح لك تاجات ابقى قولى
ما تيجى تاخد عندى كورس تاجات
اصل يا ابو حنفى طالع عينى تاجات
لسه مجاوب اربعه فى بوست واحد اتغسلت فيهم
هههههههههه

تحياتى

اسلام

Noha El-arabi يقول...

بتنسي الناس
يالهوي
طيب امشي انا و آجي بعدين و لا ايه؟؟
بس عارف حوار الوان العنين ده فعلا فعلا
مبيحصلش
:)
و 21 سنة بس و انا اللي فاكراك
يلا ما علينا عشان الضيوف بس

هبة المنصورة يقول...

أنا برضه بانسى أسامى الناس بس عمرى مانسى الوشوش.. يعنى مرحلة مش متأخرة أوى م الزهايمر
خليك كده على طول يابطوط.. قالبها تهريج.. خدنا ايه م الجد غير وجع القلب؟؟

Maha Shahen يقول...

جميل جدا انك بتتمتع بلونين للعين
يلا ربنا يباركلك فيهم برغم انها سابقه غير معتاده ولكن يسئل في ذلك الاطباء
وبما انك بتحب تختصر فأحنا كمان نقول انك بتتمتع بروع دعابه هايله وكمان مكبر دماغك علي الاخر يا بطوط فعلا
لا بتفكر في امبارح ولا بكره طبعا كل شيء قدر ولكن لازم تفكر يمكن يكون فى تقصير او شيء من الانسان
وعامة انك متحملش هم شيء جميل ربنا يديم عليك سعادة قلبك
ربنا يوفقك

عيله مفتريه سابقا يقول...

والله يا بطوط انا زعلت قوى انك مجتش يوم التبرع
لا بجد زعلت
لالالا بجد انا زعلت متحاولش

بص يا قمر انت يا كتكوت ، مش عارفه انا حسيت من كلامك كده

بت يا آبى كومنتك تحفه ، ال توم من غير بصل ال

نرجع لبطوط ، بجد انا حبيت ادخل مدونتك من اللى سمعته الناس كلها كانت مستنياك يا راجل

بس اقولك ايه كلامك فعلا نقى حسيت انك طفل لسه بدرى عليه لما يخطئ

يلا يا بطوط يارب عينك تبقى زرقا يا سيدى ولا يهمك

سلامى

nigro يقول...

واد يا محمود
انت ماجتش ليه يوم التبرع؟
مقلّق من موضوع انك تقابلنا في الحقيقة؟
معندكش حق يا محمود
معندكش حق خالص
خايف من إيه يعني؟
على فكرة انا برده كنت كده زيك
لكن حسيت إني ممكن أخسر كتير لو مش أخدت الخطوة دي
وبالفعل تحقق إحساسي
الناس اللي قابلتهم يا محمود مدوناتهم ممكن تكون شوية مش مصوّراهم صح
أو مقيّداهم شوية
إنما هما
اشخاص غاية في الروعة و الجمال
جمد قلبك يا ابني

و يا سيدي يا سيدي على موضوع النضارة و الوسامة و الحركات
أنا برده زيك تقريباً
بس أنا بقى يا معلم
-7

):
):
):
):


يلا سلام

غير معرف يقول...

السلام عليكم
أولاً اذيك يامحمود يارب تكون بخير
أنا جاية عشان أعرفكم بمجلة علّي صوتك
أصدقائنا وأعزائنا المدونون

الآن

مجلة علّي صوتك
مجلة المدونين
منهم وإليهم
لينكها http://3allisotak.net/

Mahmoud البطراوى يقول...

سارة على
حمد لله على سلامتك

-------------------------------

shasha

لا ان شاء الله لو عندى مليون سنه رضه هكبر دماغى محدش بيموت من الفرح الناس بتموت من الزعل
ولا ايه؟؟
-------------------------------

مواطن مصرى نايم

ربنا يخيليك لينا يا مفهمنا ومهنينا
روح يا شيخ ........ وخلاص

ربنا معاك

نورتينى بجد وفرحتنى يا اسلام بيه

-----------------------------------------

Noha El-arabi

حوار العين ده بيحصل بجد
والله

يا بنتى انا واااااااااااحد وعشريييييييييين سنه
مش 21 سنه عادى كده
:)

نورتينى
-------------------------------
هبه المنصورى

انا بنسى الاسامى والاشكال بقول بيتهيألى شفت الشكل ده قبل كده:)

بس انتى فين مختفيه بقالك فتره ليه؟؟
-------------------------------
nour shahen

ربنا يخليكى يااااااارب اروح انا فين من رقتك دى
بجد
تحياتى ليكى
-------------------------------
عيله مفتريه سابقا

انا كنت خايف ان حد يزعل
غيرها فى خيرها
بس انا لقاءات المدونين دى ليا عليها تحفظ عشان هشرحه فى مره ان شاء الله
ربنا يهسل فى مره تانيه
-------------------------------
نيجرو

ارسلت لك ميل

غير معرف يقول...

اوكى ..

مش عارفة .. بس بحس انى مش عاوزة اعرف معلومات عن شكل اصدقائى على المدونات ... لانى بحس انى تقريبآ فاهمة هما بيفكروا و بيحسوا ازاى ..و دا كفاية اوى عليا


موضع ان عنيك لونها بيقلب ... عادى بتحصل .. رغم انى مش متاكدة اوى

p:

كمان نسيت تقول انك عندى اوى .. واللى فى دماغك فى دماغك

P:

Mahmoud البطراوى يقول...

يا واااااااااد يا عاقل