2011/12/31

اتناشر الا دقايق .. مكسب وخساره


السنه اللى فاتت كانت عامله زى حظك اليوم " ستصادف نجاحا باهرا فى حياتك العمليه , وفشل ذريع فى حياتك العاطفيه , وربما ستخسر اعز الناس اليك "
اهو دا اللى حصل بالظبط والحمد لله .. عشان كده مقدرش اقول انها كانت سنه سعيده او حزينه .. هى كانت سنه محوريه اتبدلت فيها كل المعطيات اللى كنت داخل بيها فى 2011 لمعطيات جديده تماما فى 2012
السنه بدأت انى شفت فى نفسى حاجه جديده انا معرفهاش فى نفسى .. انا عارف انى خواف ويمكن كتير ببقى جبان ... اظن اى واحد والده يتوفى وهو صغير بيبقى فيه العيب دا .. انا اول مره اشوفنى شجاع كان يوم 28 يناير .. انا خفت اول كام دقيقه بعد صلاه الجمعه وانا خارج من مسجد الاستقامه فى الجيزه ... بس لما الضرب اشتد ولقيت مليون واحد جنبى .. الشجاعه مُعديه .. حسيت ساعتها انى ممكن ابقى شجاع وكانت دى بدايه كويسه ...الرائع فيها انها غيرت نظرتى لنفسى.. واظن ان مدين لليوم دا وبالايام اللى نزلت فيها بعده بشئ جوايا اتعلمته... وزى الكل كنت متفائل بالسنه الجديده... وزى الكل لسه بطمن نفسى وبقول ان شاء الله ربنا هيتمها على خير

السنه دى كمان فرقت معايا فى الكارير بتاعى .. اتعلمت فيها كتير وربنا مَنّْ عليا فيها .. اظن ان انا بقيت أشطر وثقتى فى نفسى زادت كتير .. والحمد لله قدرت وانا فى بدايه حياتى كده انى افتح عيادتى والحمد لله بقت شغاله كويس ..ودخلها بقى مستقر بشكل كبير الحمد لله.

وخسرت فيها عمى الله يرحمه .. تانى مره اعيش شعور اليُتم ... ولاول مره احس انى فى الدنيا لوحدى .. ماشى فيها كده بصدرى ومفيش حد اتسند عليه .
وحشنى اوى الضحك والهزار والتريقه بتوعه ... انا فاكر انى كتير ايام ما كان فى المستشفى اروح اقف ادام الباب ومدخلش "كانت ممنوعه الزياره" مجرد وقفتى ادام الباب وانا عارف انه جوه كان بيريحنى ..ومجرد تصور انى ممكن اخسره كان بيملئى بالرعب ...بس حتى الوقوف ادام باب اوضته من غير ما اشوفه بقى رفاهيه لا املكها .. انا بقيت بكره الموت اوى .. القلب مبقاش حمل فراق لحد تانى ... انا عاوز ابقى اول واحد يموت فى كل اللى بحبهم .. مش عاوز اجرب شعور الخساره دا تانى

خسرت فيها " ليلى " ... كان درس قاسى اوى وساب فى القلب علامه .. بس مش عارف انا اتعلمت منه ايه؟! ...كل اللى اعرفه انها اكتر مخلوق بعد عمى انا حبيته فى حياتى .. رغم انى عارف انى استسلمت ومقاوحتش الدنيا ... انا خلقى ضيق اوى ومش حمل حروب طويله ... ومقدرش احارب الكل ...وعشان كده خسرتها ... انا عارف ان انا ظلمتها باستسلامى .. رغم انها عمرها ما ظلمتنى ... انا بلوم نفسى كتير على كل خناقه صغيره اتخانقنا فيها ... هى مكانتش تتستحق كده هى  كانت تستحق اللى يرسم كل يوم على وشها بسمه .
رغم انه فات شويه وقت كتير .. بس لسه بتوحشنى ولسه بشتاق لصوتها... وفى نفس الوقت كل ما بفتكرها ببتسم وبدعى لها ... ولحد دلوقتى مش شايف ومش هعرف اشوف غيرها ...بمنتهى البساطه بحبك يعنى " ليلى" 
ولحد دلوقتى بفتكر جمله قلتها لها " انا عاوز احبك ,, ولو فشلت القصه عاوز اتألم ,, وساعتها كل ما هفتكرك مش هزعل بالعكس هبتسم ,, مينفعش اسمك يرتبط غير بالبسمه "

اللى بفطس من الضحك ان السنه دى وبعد التجربه دى ما خلصت بنتين هم اللى يجوا يقولولى انهم بيحبونى .. انا اول مره بنت تقولى انها بتحبنى اصلا ... واللى يحصلى ساعتها انى افضل احلم ب " ليلى" كام يوم بعدها واصحى كل يوم وحاسس بلمسه ايدها .. واصحى اسأل نفسى هو فى حب غير " ليلى"... وامسح تليفون البنت وابطل اروح المكان اللى ممكن اشوفها فيه .. وامسحها من النت او احطها فى جروب ميشوفنيش اون لاين.

وخسرت فيها اصدقاء افتراضيين .. مسحونى او مسحتهم بسبب الاختلاف فى وجهات النظر عن الثوره ... بدأت احس ان محدش فينا قادر يستحمل مجرد وجود وجه نظر مخالفه له ... بعض الصداقات دى زعلت على خسارتها وبعضها فرحت ان دا حصل .

وعرفت ان تجار المخدرات ناس طيبه اوى ... وعندهم كرم حاتمى .. هبقى احكيلكم ازاى دا حصل لما احكى لكم مغامراتى مع سواق التوك توك اللى بتحصل كل يوم فى رحله ذهابى للعياده والعوده منها.

انا طلعت من السنه دى برغبه انى احب كل الناس ... واتعود انى ابعد عنهم ... لان الناس اللى حبتها من غير ما اتعود ابعد عنهم ... لما القدر بيبعدهم القلب مش بيتحمل :(
ربنا يجعلها سنه سعيده علينا كلنا وتكون فى طاعه وتبقى فى ميزان حساتنتا مش سيئاتنا اللهم امين
ويعدل حالنا وحال البلد :) ويسقط حكم العسكر :D

هناك 14 تعليقًا:

Meryem Lamzarraf يقول...

Reading you.. It's a big pleasure :)

انا حره يقول...

كل سنه وانت طيب يامحمود سنه سعيده عليك

marwa mahdy يقول...

رائع جدا يامحمود لخصت كل حاجه ببساطه واحساس وعجبتني اوي "انا طلعت من السنه دى برغبه انى احب كل الناس ... واتعود انى ابعد عنهم"

candy يقول...

يارب الأيام الجاية تكون كلها مكسب

اللى وقفت عنده ليلى ..

ربنا يجمع شملمكم على خير تانى ، بيصعب علىّ الحب :'(

زهرة الضحا يقول...

علي قد ماعجبني البوست لسردك أحداث سنه بطريقه بسيطه و مشوقه و سريعه
علي قد ما وجعني لما حكيت عن حبيبتك
و زعلت منك
ممكن علشان شوفت نفسي فيها
و إفتكرته بكلامك
نفس الفعل و رد الفعل :)
ربنا يداوي جرحك و جرحها و جروحنا جميعا
و ربنا يكرمك في السنه دي بكل خير
و يجعلها سنه سعيده علينا

واحدة كدة يقول...

يا ليــــــــــــــــلى
شوفى بطوط بينده :)

ازاى لما تتكلم عليها كدا ميجيش فى بالك ترجع اللى كان و تصلح كل حاجة ؟!؟!

متقولش اللى اتكسر مبيتصلحش .. لا بيتصلح

يا رب يا ليلى تكونى عارفة العنوان هنا ! :)


مش هقولك كل سنة و انت طيب .. هقولك كل سنة و انت مع ليلى

أخر حاجة ... لو بنت قالتلك انها بتحبك .. حاول ترد بطريقة هادية و مهذبة .. عدم ردك عليها هيجرحها و يوجعها ... كفاية عليها وجع الرفض

غير معرف يقول...

daymn your blogs bt-athar fya!

bs aham 7aga enk rag3t el blogger " batoot 7aboub " tany :D :D .. 3agbny el theme el gdeed btw, .. Happy New Year ya batoot

شمس النهار يقول...

:)))
عجبتني اوي حظك اليوم دي
فعلا هي كانت كده
:)))
موضوع عمك ده كأنك بتتكلم عني مع بابا كنت عاملة زيك كده والدكتو داخل العناية كان يقول لي انتي ليه واقفة كده مش هينفع تدخلي اقول له مش عايزة انا كده مرتاحة مابقدرش اروح هو حاسس بيه الحيطة والباب مش منعنا من بعض
في اليوم قبل الاخير وكان يوم جمعة يوم 26 يناير وهو داخل الساعة 9 الصبح قال لي تعالي معايا دخلني وقال لي هسيبك لحد صلاة الجمعة ونبه علي التمريض يسيبوني
وفضلت قاعدة معاه جنب السرير وهو مش علي وش الدنيا بس اتكلمنا مع بعض بطريقتنا وكان حاسس بيا ولما سألته انت حاسس بيا ضغط علي ايدي ماصدقتش قلت له لو حاسس بيا دوس علي ايدي ضغط تاني
قريتله قران كتير ودعيتله كتير
وجه الدكتور قالي اطلعي بقا علشان نشوف شغلنا وارجعي وقت الزيارة
شكرته ودعيتله
وقعدت بره استني الزيارة
خرج الدكتور لاقاني ضحك وقال لي يارب بنتي تحبني زي مابتحبيه كده قلت له حبها زي ماهو بيحبني
الله يرحمهم ويدخلهم فسيح جناته
اما موضوع الحب الحب الحقيقي بيجي مره واحدة بس انتهي بالجواز ماشي ماانتهاش بالجواز بيفضل هو ده الميجور والميجور مابيتكررش
---
كل سنة وانت طيب ويارب حياتك تبقا جميلة وسعيدة
:))

sony2000 يقول...

ربنا معاك
ويكرمك بكل خير يارب

غير معرف يقول...

قراة موضوعاتك ممتعه يادكتور
اسلوب رائع وانا شخصيا بحب الطريقه دى فى السرد اوى
متغيبش علينا فى الموضوعات الجديده
كل عام وانتم بخييييييييييير


روز

givara يقول...

فى البدايه كل سنه وانت طيب
الجميل فى الموضوع انك لخصت أحداث سنه فى كلمات مبدعه سلسه
منتهى الشجاعه ان تعرف قدر نفسك
كلماتك فى منتهى السلاسه والروعه
خالص تقديرى واحترامى

واحد من الناس يقول...

ويعدل حالنا وحال البلد :) ويسقط حكم العسكر

آمين يا رب :)

بوست جميل

البقاء لله أولا

طبعا اللي بنحبهم صعب أوي فراقهم

وجايز مكانهم يفضل فاضي طول العمر مينفعش حد يملاه

لكن الحياه مبتقفش ، وبتشغلنا غصب عنا ، وبتنسينا غصب عنا برضه ، بقولك كده بعد أربع سنين من وفاة والدي الله يرحمه ، عمري ما نسيته ، وعمر ما حد شغل مكانه ، ولا أصلا فيه حد ينفع ياخد مكانه ، أو يبقالي زي ما هو كان ليا ، لكن الحزن مبقاش زي الأول ، بنستسلم في الآخر لحقيقة "إنك ميت وإنهم ميتون" ، وإن دي سنة الحياه


بالنسبه للحب ، مش عارف هتقدر تصدقني والا لأ لو قلتلك برضه بننسى - إلى حد ما - لو النهارده بتفتكرها كل ساعه وبتحنلها كل ساعه ، بكره هيبقى كل يوم ، وبعده هيبقى كل أسبوع ، وبعدين حب جديد ، أو ع الأقل عشره ، وبيت وأولاد وشغل ، هيبقى مفيش وقت للحنين والشوق والحب "القديم"

معلش طولت في الرد

لكن البوست جاي ع الجرح :)

سلام

راحــله يقول...

تدوينة جميلة ...ويسقط يسقط حكم العسكر :)

وصف الاحساس يقول...

كل سنه وانت طيب ولو انها متاخره
الله يرحمه عمك ووالدك كلنا بنخاف من الموت ومن الفراق بس فكر فيها بطريقه تانيه جاير هو يكون افضل له بنعيم اﻻخره من هم الدنيا
انما ليلي ففي حياه كل انسان حلم ما اكتملتش مﻻمحه وطالما وضعك استقر لو تحافط علي ليلي وترجعها ارجعلها ما تقدرش حاول ما تفتكرهاش ﻻنه كل ما بتفتكرها هي بتفتكرك ومش بتقدر تنسي
طالما ما قدرتش تسعدها ما توجعهاش سيبها تقدر تعيش من/غيرك
يارب تكون سنه سعيده علي مصر كلها
تحياتي