2010/08/20

انا حلوه خالص


ايها الشعب البلوجرى الحبيب 
انا عارف ان الموضوع دا ميناسبش رمضان .. بس والله انا اتحطيت فيه وقلت لازم وحتما ولابد اشرككم فيه واخد رأيكم
ومش عاوز حسد ولا قر ولا نق
واى ولد يقرا البوست دا ميقعدش ينفسن بقى
الحاجات دى ربنا بيسرها لعباده الصالحين بس مش لاى حد يعنى
اللهم لا رياء :P
انا جالى اضافه على الفيس بوك-طيب الله ثراه - وعاوز اخد رأيكم اوافق ولا لأ؟
ودى السيره الذاتيه بتاعه البنت اللى بعتتلى الاضافه

أول حاجة
Hiiiiiiiiiiiiiiiiiiiiiiiiz all
أنا ****من القاهرة بحب الأغاني أوي
بحب تامر حسني
بحب نانسي عجرم
وهيفاء وهبي
انا في كلية طب جامعة القاهرة أهي هانت أربت أخلص :P
بحب السباحة و الرقص
بحب أصحابي أوي كلهم
و في ناس كدة مميزة عندي يعني :P :D
مش هطول عليكو بقى بس اكيد شفتو انا حلوة ازاي
شاااااااافين
حبيبي سوماااااا
****
واحشني أوي
S ♥ H

انا والله العظيم ما بهرج انا فعلا جالى اضافه كده ودى السيره الذاتيه بتاعتها بجد
السؤال بقى للاخوه بتوع القصر العينى .. يا شباب انا لسه متخرج السنه دى البنات دول كانوا فين؟
يعنى دا يرضى حد اول ما اتخرج الاقى رقص ,سباحه ,تامر ,نانسى ,اغانى احمدك يااااااااارب
طب كل دا كان فين؟
كان فين
:((

السؤال بقى دلوقتى المفروض انا اعمل اجنور للاضافه دى ولا ابعت 
معاذ الله انه ربى احسن مثواى؟

وبعدين سوماااا سايبها كده ليه .. تضيف ولاد الناس اللى مستعدين ينحرفوا فى اى لحظه وماسكين نفسهم بالعافيه
ليه كده يا سومااا عيب كده بجد

اللى محيرينى بقى البنت حاطه صورتها وهى لابسه هايكول  .. ودا غريب الصراحه
وفى على الحيطه صور بنات بقى طبعا اكيد يعنى .. فى واحده مش باين منها الا دراعها
انا الفضول بقى هيموتنى واعرف دا دراع مين؟
هيفا , دينا , روبى , نانسى؟ ولا حد من عظام السباحين؟
نفسى اعرف هى بتحب ايه اكتر من ايه لانها تفرق فى قرارى ان كنت هقبل الاضافه ولا لأ؟

دلوقتى انا اللى غايظنى اننا فى رمضان ..وهى كده بتحرجنى .. دلوقتى الشياطين متسلسله .. ومش هعرف لو قبلت الاضافه اقول الشيطان ضحك عليا وانا اللى ضعيف :((

وبعدين دى اضيفها فى بروفيلى ازاى؟ .. دا بكره الصبح هلاقى كل الولاد اصحابى بايتين هناك .. وانا بروفيلى زحمه؟
طب دى اعملها بروفيل مخصوص مثلا  .. الرقص والسباحه اكيد مش بيحبوا الزحمه .. ولا اعمل ايه انا

وبعدين ساعتها بقى تحصل بنا المنافسه اللى دايما بتحصل فى المواقف دى 
يا ترى مين هيكون من الناس 
"و في ناس كدة مميزة عندي يعني :P :D"
وهيبدأ ساعتها صراع الذكور حول الانثى اللى بنشوفه فى حديقه الحيوان 


طبعا انا مش هعرف ادافع عن نفسى واقولكم محدش ياخد عنى فكره وحشه
انا بعد الاضافه دى مش هعرف ارفع عينى فى عين حد تانى انا عارف:)

لو قبلتها هبقى فى نظر كتيييييييييير  واد منحرف ..ولو رفضتها هبقى فى نظر كتييييييييير برفس النعمه
عشان كده انا قررت انى مرفضش ولا اقبل واسيب الاضافه دى ... كل يوم اروح اشوفها واعض على شفايفى ندما  واقول .. 
مهو لو مكوناش فى رمضان
مهو لو بروفيلى مكنش زحمه 
مهو لو مكنتيش بتحبى سوماااااااا
:D
افتونا مأجورين اضيف ولا ما ضيفش :)) .. دا احنا هنشوف ايام على الفيس بوك دا 
ملحوظه : انا اكيد مفيش احتمال اوفق انا كاتب البوست للتهريج
هو انا يعنى لو هوافق هسيح لنفسى كده

هناك 40 تعليقًا:

Kiara يقول...

هههههههههههههههههههههههههه


دماغ دماغ

لا ياعم مش تقبل انت في رمضان


بس السؤال

هي هتفرق !

مهو لو قبلتها بردو بعد رمضان

هيبقي الشيطان انتصر عليك يعني انت خسرت وهو كسب ؛)

رمضان كريم

دنيا الحياة.... يقول...

ههههههههههههه
انا ممكن اعزمها على بريل ...ممكن يفرق كتير ...وبعدين شياطين ايه المسلسلة ..هي الشياطين عندها بطالة زينا ...هههههه
...
في الموقف ده بقى لا تستفتي قلبك ..:D
وكل سنة وانت طيب

ليس فقيرا من يحب يقول...

ههههههههههههههههههههههههههههه

وربنا انت مسخرة يا جدع انت

مش ممكن بجد

خلاص انت تدى للشيطان فرصه كده وتشوف الموضوع هيعمل ايه

ههههههههههههههههههههههههههههه

وربنا يقدم اللى فيه الخير

بس بردو الواد سوما ده انا متغاظه منو ملهوش حق خالص

انت بتعرف تحلى الموقف وتضحكنا بجد

يارب يسعدك دايما

ويكا يقول...

نعممممممممممممممممممم

ايه التهريج ده

مش لاعب

بقى انا ظاهر فى الريدر عندى ان الموضوع من تلت دقايق بس نازل

فأفرح واقول اخيرا قفشت حد لسه كاتب تدوينه حالا ، علشان ادخل اسيب تعليق (حجز مقعد يعنى اولانى) على ما اقرا براحتى بعد ما اطمنت انى اول تعليق، اجى الاقى اتين معلقين؟!!!!!

كيارا ودونيا او حيااااه
طب ازاى

مليش دعوه مش لاعب

يعنى قروه وعلفوا فىا اقل من تلت دقايق ساعت ما بطوط نزلوه بالظبط ،لاااااااااااا
اكيد فيه كوسه
انا مضايق
ومغلول بصراحه

ويكا يقول...

3 كمان ، وانا بكتب التعليق يكون تعليق تالت نزل

لااااااااااااااا

انا اشعر بعقدة الاضطهاد

Zika يقول...

فيه واحد صاحبي انا وانت لو سمعك وانت بتقول انا طبعا مش هاقبل
هاينفخك

عارفه ولا مش عارفه :D

دنيا الحياة.... يقول...

ههههههههههه هو اللي بيعلق في الاول بياخد كام؟؟؟؟

ويكا يقول...

خلاص قريت البوست بعد ما احتليت حضرتى مقعد متأخر فى السينما

المهم

بص ياعم

دى واحده ، بتحب ناس مخصصين من اصحابها ، ولابسه هاى كول (مع انك ما جبتش سيرت انها لابسه حاجه تانى ولا اكتفت بالهاى كووول بس )بس ما علينا.

بص يا بنى

انت بتعتهالى ، وانا هجرس الموضوع ده بتأنى ، لغاية ما يوفقنى الله فى الوصول لحل فيه ساعتها ممكن افتيك.

وان كان ساعتها فتوتى مش هتجدى بقى خلاص ، بس يبقى عملنا اللى علينا برده.

اما موضوع سومه
فدا اكيد الواد سومه العاشق بتاع احمد مكى ، ولو تفتكر المشهد ده بتاعه لما كان قاعد مع حبيبته ومشيت مع واحد تانى وسابتها

انا خايف لا يكون انت الواد التانى ده.
تبقى مصيبه ، وساعتها اكيد هتضطر تكملها باقية الطقم بتاع الهاى كووووول

ويكا يقول...

دنيا او حياه

انا برده مشض هجاوبك الا ما افهم انتوا عملتوا الحكايه دى ازاى

انا هتشل ....
واااااا ... واوواواواواااا

Kiara يقول...

ههههههههههههههههههههههههه


ابدا انا كنت بس قاعده علي الريدر وقت اما البوست ظهر

ادي كوول الحكايه وعامة اعتبر نفسك الاول وانا مش موجوده خالث

ويكا يقول...

يا كيارا
الموضوع مش موضوع انى اعتبر نفسى اول تعليق او انك كأنك مش هنا خالث

الموضوع موضوع ان انتوا الاتنين حطمتوا طموحى واى امل كان جوايا انى ابقى فى يوم من الايام اول تعليق.....

ايه ده ..... انا شكلتى اتأثرت بجد ولا ايه ...... انا حاسس ان الدمعه هتفر من عنيا......

الله يسامحكم ......
الله يسامحكم......

انا حاسس احساس ان "انت مش ابنى ... حسن يوسف هو اللى ابنى ...... انت لقيييييييييييييط"

Helium Atom يقول...

هههههههههههه... طيب ممكن تعرفني علي سوما?!

Kiara يقول...

اهئ اهئ اهئ


عااااااااااااااااااااااااا

صعبت عليا خلاص مش هرد الا لما تكون اول تعليق ^_^

أع ـقل مـ ج ـنـونــة يقول...

ههههههههههههههههههه

مساء التشررررررريد

ايه دا كله

يا خرابي ع الشوباب المنحرفة

اللهم اني صايمة :D

ايون ما الصيام ليل ونهار

الله يسامحها ويسامح سوما اللى سايبها كدا :D

ياساتيرررررر ع البنات ؟

اوعي تقبلها بعد رمضان

ويارب البنات تتلم بئة بدال ماهما فاضحينا بعمايلهم دي :@

رمضان كررررررريم

adel يقول...

بص
1-انت في رمصان
2-انت كبرت علي الحاجات دي

3-انا مش صايم
ابعت البروفايل يابطوط و انجز بقي
:))

فاتيما يقول...

ههههههههه

اضحك الله سنك يا بطابيطو


و انا قولت الفيسبوك دا
ويحييييش
و مبحبووووش
عشان المناظر دى


بس البت برضو غلبانة
و ملهاش ذنب
اخص عليه هوه

سوما الخااااين


بوست اكتر من رائع

كل سنة و انتا اجدع دكتور سنان
ف الدنيا
مش مصر بس

غير معرف يقول...

انا كنت عارفك من زمان انك انسان ملتزم وربنا يصلحنا جميعا مش عاوزيين ننسي ربنا ياجماعه عيب حكايات الاختلاط دي ربنا يصلح امتنا

مها يقول...

صيام ايه اللى انت جاي تقول عليه؟؟
البوست دا فطـــّـرنا خلاااااص

ههههههههههههههه

شوف يا بطوط يا عزيزي
انا رأي انك تقبل الاضافة لسبب بسيط
هو انه اذا كانت دي العينة فما بالك بالمحتوى نفسه بقا؟؟ لازم الواحد برضه ياخد فكرة معمقة شويتين تلاتة عن الناس اللى من كوكب سوماااا اللى كلته الباروما
على اساس لما تقعد ف المحافل الـ
دا ولية
تقدر تدلي بدلوك على قاعدة متينة
من المعلومات الموثقة حضرتك

واقول قولي هذا واستغفر الله لي ول سوما

FAW يقول...

يا عم دي أكيد ولد و بيشتغلك , هي كلية طب دي فيها بنات أصلا , و تلاقيها والله واحد صاحبك ظريف . . إجنوووور وش

غير معرف يقول...

الاجابة رقم واحد
شكرا :)

اييه يا بنى ده بس

اشمعنى انت بقى عاااااااااااااااااااااااااااااااااااااااااااااااااااااااااااااا



عموما هو انا قفلت اكونتى ع الفيس من شىء شوية

انا قايم افطر يا عمى المغرب بياذن :)

Che_wildwing يقول...

لا لا لا
تضيف ايه ياراجل
انت تبعتلى البروفيل ده وانا اعرفلك اصلها وفصلها
وساعتها بس هعرف ازاي اخليك تندم
....
بمناسبة رمضان
كل سنة وانت طيب

سواحة يقول...

سؤال
فرضت انها من النوعية الوحشة
طيب مش ممكن تكون من النوعية الكويسة و اتعمل فيها مقلب ؟؟
و لا الصورة لا توحى بانها بنت ناس ؟؟
اصل م الى بسمعه من الناس فى الخارج
العيال فى المدارس بقوا بيردوا على بعض مش بالشتيمة و الضرب و الخناق
لا بالتجريس فى مواقع التعريفات المشتركة و ساعتها البوليس بيتدخل و بيجيب مين الى بيعمل اللاكونت باسم حد ثانى

بطوط مدام متعرفهاش
ركز فى المعلومات الى حاططتها عن نفسك فيها حاجة بتشد الناس الى بتقول ده واحد حيحب يدخل فى الزمرة ديه
و شكلك مدام بتسالل :-) ليه بيجيلك دعوة بالشكل ده
يبقى مش عارف ايه الى عندك بيشد البشر دول

الفتيس بوو ده مصيبة
خلى بالك من روحك و عقلك فيه

:-))
متخيلة اسمع فتوة قريب انه حرام الدخول على الفيتس ده فى رمضان

Mahmood البطراوى يقول...

كيــــــــــــارا
ورفس النعمه مش حرام ولا ايه :P
وبعدين المشكله مش ان الشيطان يكسب او يخسر
المشكله شكلى هيبقى وحش لو اضفتها من غير ما يوزنى :))

انا بهرج طبعا نورتى المدونه يا فندم
**********************************
دنيا....اوحياة
انا فطست من الضحك عند لا تسفت قلبك دى :))
ربنا يسعد ايامك يارب
******************************
ليس فقيرا من يحب
مهو الشطيان لازم ياخد فرصته
انا رأيي كده هنفضل نكبت فيه لامتى :P

***********************************
ويكا
يا بنى انت الاول انت بتهرج
كيارا الاولى :D

:))
انا مش مسمحولى اكتب اكتر من الهاى كول وانت خمن الباقى بقى
سيب لخيالك المريض العنان :)

نورتى يا ويكاا باشا

*************************************
زيكا
صاحبك دا هو الصديق المشترك الوحيد بينى وبينها :))

************************************
Helium Atom

سوما معرفش بيعرف يعوم ويرقص ولا لأ
اعرفك عليه على ضمانتك

وجايه تقوليلى انا اللى اعرفك عليه خلاص اللى اختشوا ماتوا
ما تعتمدى على نفسك انا هعشلك طول العمر يعنى :D

**************************************
أع ـقل مـ ج ـنـونــة

هههههههههههههههههههههه
يعنى مضفهاش بعد رمضان دا رأيك :(
وتفتكرى النعمه كده ما تزولش من وش الواحد :))

كل سنه وانتى طيبه ورمضان كريم

**************************************
adel

=))
صراع الذكور حول الانثى بدأ اهو
انا مش قلت مفناش من قر ولا حسد :D
وبعدين اللى اعرفه يا دولا انكم فى صيام برضه يعنى انت كمان مينفعش تضيفها
:))

*************************************
فاتيما
مهو سوماااا دا اللى فاقعنى الصراحه
تصدقى مش لاقيه فى الاصدقاء بتوعها :D

*******************************************

غير معرف
انا مش فاهم الكومنت انا اسف
البوست بنت ضافتنى على الفيس بوك وانا هرفض هو وصل لحضرتك غير كده؟

ربنا يهدينا يارب ويصلحنا ويسترنا

******************************************
مها
انا زعلان منك على فكره
ليكى وحشه جامده جدا وكل يومين تختفى
:((
ووجه نظرك فعلا صح
اذا كان دى بدايه القصيده اكيد الحاجات الحلوه جوه بقى :D

كل سنه وانتى طيبه ورمضان كريم :)

****************************************
FAW
احتمال كبير بس كل اصدقائها ولاد ومظنش ولد يعمل فى نفسه كده :P

*************************************
جمعاوي صاحب "عيادة أسنان"

الاجابه رقم واحد اقبل الاضافه
ورقم اتنين اقبل
انت اخترت واحد :)
شكرا لك
:D
****************************************
Che_wildwing

من الاول وانا عارف ان الكحكه فى ايد اليتيم عجبه
:D
وحشانى بوستاتك اللى دايما بقراها ومعرفش اعلق عليها واللى دايما بتغيب كتيييييييييييييييير اوى على ما تكتبلنا واحد
كل سنه وانت طيب يا باشا

****************************************
Wanda

سؤال؟
انتى تعرفى مين البنت دى؟
تعرفى توصلى ليها حتى بالسيرش؟
يبقى ميفرقش مع اى حد حكمى عليها صح ولا غلط او ان البنت المجهوله تماما كويسه ولا مش كويسه طالما حافظت على كونها تفضل شخص ممكن ميكونش موجود اصلا
المعلومات اللى متاحه لغير الاصدقاء فى بروفيلى انى فى طب اسنان القصر العينى وصورتى مفيش متاح غير دا :)

وبصى للبوست من الزاويه اللى انا كاتبه بيها
مجرد اضافه من شخص مجهول مثيره للضحك فضحكت عليها
لا بحكم على الشخص ولا اعرفه اصلا

كل سنه وانتى طيبه ورمضان كريم

Mafrousa يقول...

هههههههههههههه
يا بطبط
انت قلت الحل
انت سيبها متعلقة كده
و كل يوم ادخل اتفرج على الاضافة و طلع لها لسانك
ههههههههههههههههههههه
و بعدين سومااااا ده راجل؟؟؟؟ انت متأكد؟؟؟؟
هههههههههههههه
و بعدين الصورة اصلا ممكن ما تكونشي بتاعتها
على رأيك احنا حنشوف العجب مع الفيس بوك ده

اوع تضيف يا بطبط خليك قوى......اوع تفرسنى
:)))))

غير معرف يقول...

أوبااااااااا
الله؟؟ والله المفروض سوما ده يكتب عليها عشان يلم الدنيا كده .. دي النيلة ع البنات وسنينها
وهاي كول إيه اللي متصورة بيه؟
لأ
لأ
مش قادرة.. بص انت تضيفها تديها كلمتين وتدور على سوما تديه على دماغه

وبعدين تشيلها من عندك مرتاح البال والضمير ^_^

كل رمضاااااااان وانت جاااااامد يا جامد :))

مها ميهوووو

babosha يقول...

والله يا بطوط انت كاتب بوست جامد وانت بتقول الشياطين متسلسلة تعالى اسكندرية واتفرج على البنات والقرف اللى عاملينون ولا كأن فى رمضان وشهر عبادة ولا فرقة مع البنات والشباب بقت حاجة تقرف جدادى البنت دى ولا حاجة من اللى الواحد بيشوفها ربنا يستر علينا يا بطوط يا اخويا

Helium Atom يقول...

Babosha,

اي كلام علي بنات اسكندرية، انا حافجر المدونة بصاحبها
‏@‏:

pinky يقول...

نداااااااااء الى كل بنات الفس بوك
ارحموا بطوووط
رمضان كريم :)

ويكا يقول...

لا ياعم
لا خيال مريض ولا حتى سليم

الله الغنى ، هى ناقصه.

ربنا يخرجنا من البلد دى على خير

ههههههههههههههه
انا اخرى البوق بس ، لكن اكتر من كده حتى ولو بالخيال ، ما اعرفكش.

غير معرف يقول...

انه ربى احسن مثواى

هي وظروفها يقول...

محمود حبيبي وصحبي

بعد التحيه

اولا الشياطين المسلسله ف رمضان هم المرده الكبار فقط
والدليل علي ذلك ان الوسواس لا يتركك ف الصلاه ولا في اي وقت ف رمضان وبدليل ان ف حالات سرقه وقتل واغتصاب وقطع طريق ف رمضان بردو

اذن انت لو قبلت الاضافه دي هتبقي بتطاوع شيطانك وبما اني خايف عليك
ابعتلي يا صحبي البروفايل بتاع البنت دي وانا هتصرف معاه بس طبعا بالعقل وبالطريقه ومن غير ما حد يعرف ولا حس ولا خبر
انت عارف الواحد سمعته نضيفه وعايز يفضل نضيف
صياما مقبولا وافطارا شهيا
متنساش البروفايل يا حوده

мαησηα يقول...

ههههههههههههههههههههههههههههههههههههههههههههههههههههههههههههههههههههههههههههههههههههههههههههههههه

بضحك تانى انت بجد مشكلة يا بطوط بجد

ربنا يسعدك يارب البوست ده ضحكنى

جداااا كالعادة مش بخرج من هنا

غير وانا مبسوطة اوى

بص يا ابنى انت اركنها لاخر رمضان

وليك عليا اخترعلك اى حاجة

عندى يوم ماتقبلها

اخلى الناس تنسى تبص ع بروفايلك

نقوم نغطى ع العملة دى

ههههههه اخت جدعة انا صح ههههههه

سلم ع زعبلتى الجميلة

mrmr يقول...

يعنى انت مش عايز تقبل
ولا عايز ترفض
وعايز تسيب البنت معلقه لغايه ما يخلص ومضان
انا عندى حل
خلى السنه كلها رمضان علشان متفكرش تقبل
هههههههههه

بس كمان فى حل بجد
اضبط الماوس على الرفض وغمض عينك
واطلع على الرابععععع ودوووووس
كده تبقى قطعت عرق وسيحت دم

دى دعوه للضحك من القلب
http://jokes-egyptian.blogspot.com/

كل سنه وانت طيب

Unknown يقول...

:)
مصافحة اولى يا محمود ..
و ايه يعني ان البنت حلوة و امورة و مدركة لذلك ..؟؟
ايه الحقد الدفين دة !!
D:

غير معرف يقول...

ممكن يبقى مقلب وواحد عارفك عامله فيك...انا عملتها قبل كده مع ابن خالتى..تقريبا نفس الحوار مع اختلاف التفاصيل
حد بالك لتتبعت بعته حلوة...وتتلاغى ياعم ..وفى الاخر احلى خزوووق

أبو كريم يقول...

هههههههههههههههههههههههه

بجد عسل ودمك خفيف يا دكتور


اللهم اغزيك يا شوشو

تحياتى

عمرو يسرى يقول...

ههههههههههههههه
استفتى قلبك
بس هى جاتلك منين
ههههههههههه

MoLtO يقول...

سوما
هو نظمى ده سالت ايده خالص

Ranim Ayman يقول...

هههههههههههههههههههههه يمكن اولمرة ادخل هنا شدني اوي اسم البلوج فدخلت اقرأ ده كان اول بوست اقرأه حلوووووو اوي ضحكت طول ما انا بقرأ بجد عجبني بس رائ انك ترفض الاضافة علشان بعد رمضان الشيطين هتتفك وهتطلع علينا تاني وبعدان بلاش تقبلها احسن سوما يطلع عملك فخ هههههههههههههه بس فعلاشكله سالك ايده هههههههههههههه
تحياتي بجد
تحياتي مبتسمة دائما

فلاشه اربعه جيجا يقول...

انا عايز اقولك انى يمكن كتبت اول مدونه..و الوحيده برضه من سنه...و سيبت الموضوع دا خالص بسبب ان مفيش ردود

بس انا كمان قررت انتشر

برضه عايز اقول انى بقالى بتاع خمس ساعات على البلوجسبوت ...شويه اضحك و افطس على روحى من الضحك..و شويه ازعل و حالى يتقلب...من الكلام المؤثر

شكرا ليك و لك الناس اللى مهتمه انها تشارك احاسيسها معانا