2010/01/25

الانتشار بيجيب العار



دا الجزء التانى من البوست دا .. فى ايطار الاحتفال بتلات سنين تدوين.


قررت بعد نصيحه ( مروه جمعه) انى انتشر فى المدونات بقى بكل انواعها ( سواء كانت بتكتب بالعربى او بالانجليزى ) وبكل مواضيعها ( سواء كانت ساخره او شعريه او ادبيه او اى بتنجان والسلام ) ....ولانى حافظ مش فاهم فطبعا كان لازم تحصل مواقف زى اللى هحكيها دى.



انا الحمد لله اكيد بعرف اقرا اى بوست بالانجلش .. بس الغريب بقى انى مبعرفش اعلق بالانجلش .. ومتسألش ازاى هى الفكره اولا ان ايدى مش واخده على زراير الكيبورد بالانجلش .. ثانيا انى فعلا مبعرفش اعبر الا بالعربى .. وتالت حاجه انى ممكن اقعد نص ساعه اقول هو احنا بنبدأ بـ اسم وبعدين فعل ولا فعل مساعد .. وبعدين بنحط ايه بعد كده بنحط ايه ...بعد كده .. وببقى فى حيص بيص .. لذا فانا بعلق بالعربى عند اى حد ومليش فيه.
وعادى جدا بدخل مدونات اجنبيه واسيب تعليقى بالعربى .. مهى مروه قالتلى انتشر ومحددتش انتشر فين وانا اتكسفت اسألها الصراحه.
وانا مش هدخل اقرا وامأأ عينى وفى الاخر ومسبش كومنت .. مهو مروه قالت لازم تنتشر ولا انا غلطان.

ومدونات بقى كده كل التعليقات اجنبيه والبوست اجنبى وانا مليش فيه .. احلى كومنت باحلى عربى - وبالعاميه كمان - عشان لو راح لجوجل او اى موقع ترجمه ووقف على شعر راسه عمره ما هيعرف انا كنت كاتبله ايه... بس واجبى يحتم عليا انى اعلق يفهم اللى يفهم وميفهمش اللى ميفهمش.

بس تصدقوا بقى ان فعلا جالى مدونين اجانب يعلقوا عندى .. وساعتها حسيت انى وصلت للعالميه .. طبعا كان كل تعليقهم بيدور حوالين nice post او ثانك يووو .. بس يعنى معلش انا بتحدى اى حد جاله تعليقات من مدون اجنبى على بوست عربى وبالعاميه .. عشان تعرفوا احنا مين يعنى ولا مؤاخذه .احنا مش اى حد يعنى بالصلاه على النبى.

مره تانيه وانا فى مرحله الانتشار دى .. قريت بوست فى مدونه نفترض مثلا انها اسمها ( قصص مجدى) دا اسم افتراضى .. المهم كان كاتب بوست انه فقد صديقه .. والبوست يقطع القلب بجد .. وانا قريته واتأثرت اوى وحطيت مدونته فى الفيفوريت .

هو البوست كان غريب شويه بس انا بسلامه نيه عديته يعنى وجايز وبتحصل .. كان بيحكى ازاى لما كان بيتأخر بيتصل بيه .. ولما يرجع ياخده بالحضن وينزل بوس فيه .. وبيغير له هدومه بنفسه .. ويكويها .. وانا بقى عمال اقول فعلا هو دا الصديق الصح
ودخلت كتبت له كومنت ان فعلا هو دا الصديق الصح  .. وياريت كل الاصدقاء يعملوا فى اصدقائهم.. زى ما صديقك دا بيعمل فيك
وخرجت من المدونه وانا حاسس انى راضى عن نفسى لانى ارسيت وأكدت على ضروره الصداقه فى الحياه.
قوم ايه بقى الاقى الواد الناقص شاذ .. وصديقه دا مطلعش صديقه زى ما انا فاهم دا طلع حاجه تانيه خالص ..وانا اللى حاطه فى الفيفورت.وال ياريت الاصدقاء يعملوا فى اصدقائهم زى ما بيعمل فيك ال

انا وشى احمر لما اكتشفت .. واللى يغيظ ان مدونتى كانت لسه فى الاول خالص فمكنش عندى مواضيع كتير فى المدونه ولما تعمل بحث فى جوجل كان بيجيبلك تعليقاتى فى المدونات لان مفيش بوستات لسه.
ورحت شلت الكومنت من هناك وقفلت المدونه وارجع اسرش فى جوجل الاقيه بيودينى للبوست بتاع الواد وانا الطم ... وجوجل يطلع لى لسانه
ومن كل قلبى بدعى عليك يا جوجل فاضحنى من اول يوم ( ارجع للبوست دا).
بعدها بكام يوم واحد صاحبى( جمعاوى) راح حضر لقاء مدونين .. وبعد الكلام اللى كل الناس بتقوله لبعض لما بتيجى تحكى على لقاء المدونين واللى دايما بيبدأ بأنا شفت فاتيما ( بجد فايتما دى تتاكل اكل شخصيه جميله اوى وطيبه وتحس انها اختك بنتك مامتك الصغيره شغال برضه ) لحد ما يقول وشفت آبى ( البت دى جدعه اوى ) وخالد همس الاحباب ( تحس انه اخوك) وطبعا صباغ (شخصيه جميله اوى وصورنا كام صوره)
دا الكلام الطبيعى اللى هتقوله لما تيجى تحكى عن اى لقاء مدونين .. وطبعا صاحبى قال كده بالحرف وبعدها قالى وقابلت ( مجدى)
انا بقى بازبهلال .. قابلت مجدى؟ 
- قالى اه 
وخدته بالحضن وبوسته؟
-اه يا بنى دا شخصيه زى العسل
مجدى!!!
-اه مجدى انت تعرفه
لا والله ولا اعرفه ولا كلمته ولا حتى علقت فى مدونته ولا حطتها فى الفيفورت
-فيه ايه يا بطوط انت اتهبلت يا حبيبى ولا  ايه
اولا متقولش حبيبى بعد ما قبلت مجدى ثانيا مجدى دا شاذ
-شاذ ايه يا بنى دا كان جاى هو وبنته


المهم هو طلع مجدى غير مجدى ولحد دلوقتى بنتريق على بعض بقصه مجدى دى طبعا احنا بنتريق باسمه الحقيقى مش مجدى يعنى ما علينا



بعد ما خرجت من عند مجدى على طول ... دخلت مدونه ( لكل من هو مثلى) وشدنى اسمها جدااااا .. وبعد تلات تعليقات اكتشفت ان مثلى مش يعنى شبهى زى ما انا كنت فاهم .. ومش هشرح.

وانا بقى فى مرحله الانتشار دى شفت واحده - واضح انها كانت هى كمان فى مرحله الانتشار- وكنت كل بوست لا اسبقها بتعليقى لا تسبقنى بتعليقها.
وكان فى حرب بين مدونتين ( مدونه اخوانيه , ومدونه عدوه للاخوان) وهاريين بعض شتايم ... وانا كنت خدت قرار معلقش عند الاتنين .. لا الاخوان ملايكه زى ما مدونه الاخوان بتقول .. ولا شيطان زى ما( عدوه الاخوان) بتقول.. بس البنت دى بقى كانت بتدخل تعلق عند الاتنين ... وتاخد كل واحد على قد عقله.
لحد ما وقعوا فى بعض وكتبوا بوستات شتيمه فى البت دى .. وكتبت هى بوستات شتيمه فيهم وكانت واقعه جامده مظنش حد خد باله منها الا انا بحكم انى متابع التلاته.. وان كان نفسى ادخل اهدى النفوس واقولهم يا اخونا والله الموضوع ابسط من كده هى بس فى مرحله الانتشار.

فى حفله توقيع مدونات مصريه للجيب .. اشتريت الكتاب ووقعلى عليه ناس كتير من اللى كاتبين فيه .. ولقيت امى جايه ووشها كله ابتسامه كده ... محمود مين فلانه وفلانه اللى جايبن لك هديه كتاب دول.
فى بنات جايبنلى كتاب هديه؟؟ من بقك لباب السما يا ماما بس مين دول.
امى لقت على الكتاب بنتين موقعين - رغم ان كان فى ولاد برضه - قام قالت دا الواد انحرف من على النت وعرف بنات ...واللى يغيظ ان الكتاب كان بـ4 جنيه .. يعنى اول ما حد يتهمنى ان بنت جايبالى هديه تبقى بـ4 جنيه وكمان اتنين مشتركين فيها. آدى اللى خدناه من التدوين... ولغايه دلوقتى امى مصممه ان بنتين جابولى الكتاب دا هديه

يومها قابلت مروه واشرف توفيق ... صاحب اكتر مدونه دمها خفيف على النت .. ولما قالى ازيك يا دكتور كنت هموت من الفرح .. مش عشان قالى يا دكتور انا عديت مرحله التعقيد دى من زمان - ممكن ابقى احكيلكم عليها بعدين- بس عشان طالما قالى يا دكتور يبقى عارف مدونتى وعارفنى وبجد كنت فى قمه السعاده يومها وكانت بدايه صداقه يارب تدوم.
وعرفت يومها انى اخيرا مدونتى اشتهرت وخصوصا ان الصباغ حط المدونه فى الفيفورت عنده ودا كان دليل انى اشتهرت رسمى



اكتر حاجه استفدتها من ايام التدوين الاولى .. انى لما يجيلى دلوقتى تعليق من مدونه .. لسه بتكتب فى البوستات - مش فى الكومنتات- (هههههههههههههههه) بعد كل حاجه تضحك .. ومش مستخدمه ألوان- بالمناسبه احسن واحد بيستخدم الالوان سوووو - ولا مقسمه البوست لفقرات.. فعلى طول اعرف انها لسه مدونه فى مرحله الانتشار وبفرح بيه وبيفكرنى اوى بايام زمان.. وتعليقه بعتبره مش دليل على اى حاجه الا انه جاى يقولى انه عمل مدونه.
 ******************************
تحديث

وأخيرا وبعد طول انتظار ..أحمد الصباغ - رضى عننا وقرر -ينزل في معرض الكتاب ان شاء الله بكتاب
الضرب في الميت

وصوره الكتاب اهى



مبروك يا ابو حميييييييييييييد اكيد الكتاب هيكسر الدنيا مش محتاجه كلام وعقبال العروسه يارب


هناك 34 تعليقًا:

pinky يقول...

انا عاوزة اضحك و اقول نايس بوست بس هتقول عليا فى مرحلة الانتشار ههههههههههههههههههههههههههه

Sarah el eskafy يقول...

هههههههههههههههههه
انا هضحك بس مش هنتشر
وهطلعلك لسانى لانى بيجيلى مدونين اجانب
وعمرى ما دخلت عندهم
وده معناه ان هما اللى بينتشروا:D
اول مرة اعلق عندك على فكرة بس مدونتك دمااااااااااغ

مي يقول...

اجمل بوست لاجمل بطوط
العار فعلالالالالالال
اولا البوستات اللى بالانجليش الاكشن ماليش فيه

مجدى بقى موتنى من الضوحك ياخرابى شفت اهى دى اخرتها واقولك بلاش السكة دى خطر يابنى بس احب فيك انك حونين فعلا الاصدقاء لبعض بس ياخوفى بقى لو كان حبك يابطوط ده انت كنت اتكتب فيك شعر (((:

فعلا مرحلة الانتشار دى زى مرحلة المراهقة بالظبط
انا بقى مش هنسى كل ما اجى اكتب (ههههه) افتكرك لدرجة كنت كاتبها فى التعليق مسحتها عشان فاكرة انك قرتلى بوست وقلتلى نفس الكلام وفعلا كلامك مظبوط لدرجة انى قريت عند حد جديد كده قلت ايه الهبل ده وقعدت اضحك
ودى اول حاجة اتعلمها منك عقبال ما اتعلم ازاى اخلع سنان بقى


انت جميل جدااااا يابطوط ومبدع اكتر
ومبروك للصباغ على كتابه الجديد

ستيتة يقول...

طب انا اعمل ايه دلوقت؟
عاوزة اضحك قد عشر كومنتات بس
هههههههههههههههههههههههههههههههههه
اعتبرني بنتشر وماله
هههههههههههههههههههههههههههههههه
يا ولاد انتشروا المدونة مدونتنا

مع تحيات خالتك نوسة

الشعب لابد له من حكومه تشكمه يقول...

بص هقولك انا قاعده ماسكه ايدى بالعافيه ومش عاوزه اقول (هههههههههههههههههه)
لتقول عليا زى العكسرى الاخضر كده بينتشر ويتوغل.

بس لما لقيت دكتوره ستيته قالت انتشروااااا وبتضحك ,
قلت انتشر انا كمان ههههههههههههههههههههههههههههههههههه..
واحده كمان سيبونى انتشر براحتى ياجماعه
هههههههههههههههههههههههههه..

يااااه دا الانتشار حلو:)

يلا كفايه انتشار لحد كده:)

** موقف مجدى ده موتنى من الضوحك.

تسلم يابطوط افندى.

Mahmoud البطراوى يقول...

pinky

انا عارف انك انتى بالذات عمرك ما هتمرى بمرحله الانتشار
انتى اكتر شخص بيكتب لنفسه فى الدنيا دى

نورتينى

***********************************************

Sarah el eskafy

مدونين اجانب على بوست عربى وبالعاميه؟؟
اتحداكى طبعا
نورتينى باول زياره
:D

***********************************************
مي

الجميله جداااااا

تعليقك بينور مدونتى يا فندم ... ويارب دايما اقدر اكتب بوستات تعجبك
موضوع مجدى كنت عارف انك هتفرحى فيا بس ماشى مردودالك

وربنا ييسر واعلمك الخلع بس مش خلع السنان الخلع بمعناه الاشمل
:D

نورتينى يا مى

***********************************************
ستيته حسب الله الحمش

ههههههههههههههههههههههه
يا فندم حضرتك المدونه وصاحب المدونه تحت امرك - مجرد مجامله مش عاوز تلاكيك :P
وانتشرى براحتك - دى بقى مش مجامله دى بجد

نورتينى يا دكتوره بجد
***********************************************
الشعب لابد له من حكومه تشكمه

لأ انا عدلت فى البوست عشان محدش يمسك ايده
خليتها (ههههه) فى البوستات بس مش فى الكومنتات بيس كده

نورتينى بجد

مها يقول...

هههههههههههههههههههههه
سلام جامد فحت "لكل من هو مثلي" مغرم بمدونتك الأروع على النت رغم أنف جوجل اللئيم

وينتشر.. ويتوغل.. ويموت من الضحك ويستمر ويستمر.....

صيدلانيه طالعه نازله يقول...

ايييييييييييييييه ده اخيرا فتح

احمدك يارب

البوست ده فكرنى بايام الكفاح دى بس انت

اكبر منى بسنه و اوعى تفتح بقك

انت اكبر منى يعنى اكبر منى صح و لا لأ

بس انا من يوم ما دخلت التدوين و انا

بجد متابعه كل البوستات بتاعتك و لغايه دلوقت

و على فكره انا برضه باقرا البوستات الانجليش و معرفش ارد عليها

يعنى لست وحدك

Asmaa mahaba يقول...

حتعيش وتموت وانت بطوط

Unknown يقول...

خايف أكتب تعليق لاحسن تفتكرني بنتشر زي الأميبا وان ده قدم من أقدامي الكاذبة
بين قوسين(هههههههههههه)
أنا بعتبر نفسي لسه مبتدئ ومع ذلك مفيش مانع لما أشوف مدونات تانية وأتعلم منهم وإنت من المدونين اللي بحب أقرأ ليهم وأتعرف علي أسلوبهم في التدوين
ربنا يكرمك ونجاحك يكبر ويتعدي حدود المدونة والإنترنت يارب

R-H-S يقول...

ههههههههههههههههه
مرحله الانتشار دي زي مانت قولت انه ممكن ميكونش فاهم الموضوع او البوست اللي انت بتتكلم فيه ويقوم هو يقولك بوست جميل والله , كلام رائع , ياريت تزورني والكلام دا

مبحبش اعلق عند حد انا مش فاهم هو عاوز يقول ايه ومينفعش حد يعلق عند حد بالجمل المتكرره اما اذا كان هيضيف كان بها

طيب دلوقتي انت انتشرت نعمل ايه احنا بقي ههههههه هه؟

Che يقول...

طيب انا عندى كذا مشكله ... اولا انا بكتب هههههه فى البوستات ... ثانيا انا بكتب من غير تلوين للفقرات ولا فصل
بس بالنسبه لمسأله ههههه لقيت ناس كتير بتكتب كده ليها سنين يعنى عدوا مرحله الانتشار ( مش هقول انا اللى عديت مرحله الانتشار ) ... مسأله التلوين برضه اعرف ناس بتكتب من غير تلوين منهم زيكا صدقينا المشترك و برضه بيكتب من 3 سنين زيك يعنى عدا برضه مرحله الانتشار
و اخيرا ... ههههههههههه

faisal يقول...

مبروك يا دكتور يا جميل، شردت لعالم التدوين كله وفضحتنا ولا فضيحة الشيخ حسني في الكيت كات بس بأسلوب مجرم زي العسل قتلنيييي من الضحك
اللذيذ جدا ان كل "المجهولين" اللي ذكرتهم انا عارفهم واحد واحد :)))
إييييه، الله يرحمك يا عم مجاهد
ربنا ما يحرمنا منك :)

AHMED SAMIR يقول...

يا نهااااااااااااااااار ابيض
انت اتكحرت جامد جداااااااااا

Unknown يقول...

هههههههه لزوم الانتشار الأول
حسيت من البوست اللى فات انك هتركز عليها ،،، أنا فاكر طبعاً أول تعليق على مدونتى من الراجل الجميل أحمد سلامة مستر كافييه ،، فعلاً طعمه مختلف تماماً بغض النظر عن مضمونه وتقرباً كده انه يستاهل مشقة الانتشار ،، تسلم ياجميل على العرض الشيق ده :))

يــوم جــديد يقول...

انت كده صنفت المدونين لمنتشرين وغير منتشرين بناء على هههههه وألوان وتقسيم فقرات ؟؟؟
وأي حد من دول هيعلق عندك لمجرد إنه عمل مدونة مش لأنه عجبه الموضوع ؟؟

أنا مش شايفة كده أنا بلاقي في ناس منتشرين جدا لكن مش بتعرف تقسم فقرات ولا بتستخدم ألوان وساعات الموضوع بيكون تكنولوجي بحت

وفي ناس مش منتشرين وبيقسموا الفقرات وبيستخدموا الألوان ومش بيقولوا هههههه :)

بصرف النظر عن كل ده فمدونتك متميزة وخفيفة الروح والظل
واستمتعت بقراءة تدوينات زي( مدونة بطوط الإباحية)وبعض تدوينات تانية

منــار فايد يقول...

بطوط اللي مش حبوب
كنت هستفزك واكتبلك بوست مش عربي
بس قلت بلاش
يجيلك الضغط وانت على وش جواز كدا

تقريبا بقى انت اتنشرت فعلا بكل الطرق
وبكل المشابك اللي في الدنيا
وقطعت حبل الغسيل في الاخر من كل الانتشار

انا بقى مستغربه ولا مالوش لازمه الاستغراب اني والحمد الله عمرت مادخلت مدونات مشبوهه زي معاليك
مش عارفه ليه
اكونشي لسه ماانتشرتش؟

Mahmoud البطراوى يقول...

مها
هههههههههههههههههههه
سلااااااااام جامد فحت لاجمل مها فى البلوجر
واللى قاعد حاطط ايدى على خدى نفسى ترجع تكتب تانى عشان نرجع نتمتع تانى
تحياتى لكى
****************************************************************
صيدلانيه طالعه نازله

هو مفتحش معاكى عشان انا كنت بعمل ايديت فى اللحظه اللى كنتى بتعلقى فيها معلش دى غلطه مطبيعه

الاول قبل ما اعترف مين اكبر من مين دا هيأثر على فرصتى فى الجواز
انتى عارفه انى اقدس الحياه الزوجيه واشارك فى الاثاث.

وبعدين بغض البصر مين اكبر انتى جالك كومنت من شخص اجنبى على بوست عربى وبالعاميه.
يبقى تعرفى بقى حضرتك بتكلمى مين وتشعرى بالفخر انك بتدخلى مدونتى العالميه كده عادى من غير تذاكر ولا اى حاجه ( متواضع انا اظن)

تحياتى ليكى يا دكتوره وبجد منورانى دايما.
****************************************************************
سومه...مجنونه فى بلد عاقل

هعتبر دا مدح :))
****************************************************************
BISHR2038

عيب تقول كده يا بنى ... انت واحد من اللى بنتظر كومنتهم بجد
اجمل ايام التدوين دى وانت مبتدأ حاول تفتكرها وتكتبلنا عنها بوست ممتع احسن من دا
تحياتى لك

****************************************************************
عاوز اصحي

المشكله ان الواحد احيانا كتير بيضطر يروح يعلق عند حد لانه بيعلق عندك كتير
بس فعلا التعليقات بالجمل المكرره دى بتخنق نسبيا بس الواحد بقى بيشوف من دا ومن دا
يا اما دقت على الراس
نورتى يا باشا
وانتشر براحتك دا مدونتك واكتر
****************************************************************
Che
لكل قاعده شواذ يا عمووووووور
بس زيكا بيقسم البوست لفقرات .
وانت يا كبير مش محتاج انتشار انت الانتشار يجيلك بنفسه
ههههههههههههههههه
نورتنى يا كبيير

****************************************************************
Ahmed Faissl

ربنا يخليك يا جميل
انا شردت لنفسى مش للتدوين كله اكيد انتوا عندكم قصص الذ من دى
بجد نورتنى وسعيد جدا بكومنتك
****************************************************************
A.SAMIR
محدش بياكلها بالساهل يا دكتور :D
****************************************************************
ـ-ـ- أحمد عبد العدل-ـ-ـ
والله يا دكتور سعيد بكومنتك جدا
اول كومنت دا مش بيتنسى ولو بعد 100 سنه
بيكون له طعم تانى
وانا كنت حابب اوى اكتب بوست عن الايام دى رغم انى محكتش كل حاجه عشان ميطولش البوست
تحياتى لاوع دكتور وكاتب فى الدنيا
****************************************************************
يــوم جــديد
انا طبعا متفق معاك فى كل النقط دى
بس دا تقسيم بمجرد النظر ( كده كده البروفيل - لو مظبوط - بتاع اى شخص بيقول هو بدأ تدوين امتى)

نورتنى وشرفتنى بالزياره
****************************************************************
منــار فايد

لو كل الناس مرت باللى بقوله يبقى لزمته ايه البوست
تحياتى لك
:D

Mahmoud Ahmed يقول...

ههههههههه
حلو البوست ده و الله
اسلوبك جميل
و حلوه مرحله الإنتشار ده
^_^
بس هو ليه الناس بتجري على الإنتشار ده
انا بدخل مدونات كيتر و بقرا تقريبا معظم البوستات فيها
بس مش بعلق الا على المفيد
عجبني طريقه التقديم و طريقه العرض و الله
بحب انا الأسلوب ده
واول مره اشوف ولد يتكلم بيه
و عجبني اكثر انها من دكتور
زميل مهنه يعني
مع اني مش بحس ان الدكاتره دمهم خفيف يعني ^_^
وانا من ضمن الدكاتره برضه ^_^
بحس دايما دمنا تقيل برضه ^_^
شكلي عبيط ولا حاجه
ههههههههههه

мαησηα يقول...

ههههههههههههههههههههه موتنى من الضحك يا محمود الله يسعدك

ع فكرة بقه انا كان بيجيلى تعليقات بلغات غريبة اشى عبرى ع المانى ع تركى ع لغات معرفتهاش

والمشكلة ان البوست اللى بيقروه عربى عربى يعنى

ومارحتش علقت عند حد تعرف كده قعدت 1.5 محدش بيعبرنى وانا عارفة انى لازم اروح اعلق علشان يجوا عندى كنت مكابرة اوى

وقلت لازم اثبت نفسى هههههههههه

وفعلا والله مابقتش بعلق غير لما الناس علقت عندى

تعيش وتنتشر ههههههههه مش قادرة بجد ابطل ضحك

كل سنة تدوينية وانت طيب يا بطوط يا حبوب

سارة درويش يقول...

هههههههههههههههههههههههههههههههههههههههههههههههههههههههههههههههههههههههههههههههههه
بجد هيجرالي حاجة من كتر الضحك
بالذااااااات ع مجدي هههههههههه مصيبة بجد

انا واحدة قالت لي لازم تنتشري بردو بس ماقالت ليش ازاي
وقالت لي روحي عند مدونات الناس وانا اقول طب منيييييين اجيب الناس ؟
بعدين بقيت اعمل سيرش بالبروفايل
اياااااااااااااام وليااااالي وشهووووووووور

وشوفت اعاااااااااااااااجيب بجد
حاجات كده زي مجدي بس انا كان بيطلع لي بناتي

ورابطة عاشقي منى ذكي
وناس مااااااااتت واستناها ان تيجي تعلق ابداااااااااااً
وكل ماتعجبني مدونة اكتشف ان دا كان اخر بوست ههههههههههه بجد شوفت ايام فحلقي
وف الآخر اللي خلاني انتشروااااااااا اوي الفيس بوك والايميل
كل خمس دقايق كنت برمي لينك مدونتي للناس ع الماسنجر لما اتخنقوا مني

كل 3 سنين وانت طيب يا بطووووط :)

سفروته صغنتوته يقول...

هههههههههههههههههههههههه
كنت عاوزه اعلق بلانجليزى ..... بس قولت لا خلينا بالبلدى كده احسن
دى ايه رحله اللانتشار الجااااااااااامده دى
ده انا مخلتش ولا بوست حتى الاجانب ههههه
وتلاقيهم هما كمان كانو فرحانين لانهم بردو بيقولو ان مدونتهم وصلت للعالميه حيث انك بالنسبالهم واحد اجنبى داخل وعجبتو المدونه والبوست بتاعهم ههههههههه واهو كلو بيطلع فى الغسيل
نيجى بقى لمجدى وكل من مثله هههههههههههههههههههههههههه
حاله مجدى اكيد كانت تصعب على الناس كلهاا هههههه ازاى صديقه العزيز يسيبو لوحدو كده من غير كوى ولا غسيل ولا .......... وطبعا مجدى وكل من مثله
رينا يديم عليك مرحله الانتشار يا دكتره ونشوفك بقى كده من النجوم اللى بيطلعو فى التليفزيون وبيتكلمو عن مدوناتهم بقى كده ومامتك تشوفك وانت فى الجهاز المرئى .. بس ساعتها ابقى قول اسمى هههههههههه
بالمناسبه بقى استغلك كدكتور مش مدون اصل انا استغلاليه :)
مافيش حل لوجع ضرس العقل ده :)

Mahmoud البطراوى يقول...

سبايدرمان spiderman
اولا انا سعيد ان المدونه عجبتك
ثانيا : انا برضه مش عارف ليه كلنا بنجرى ورا الانتشار دا بس دى حاجه طبيعه اظن كلنا بنحب نلاقى ناس تقرلنا
وبامناسبه انا بعقتد ان الدكاتره هم اخف الناس دما :))
سعيد جدا بمعرفتك يا دكتور تحياتى لك
****************************************************************
мαησηα

مانونا اطلعى بره المدونه ... دا بدل ما تيجى وتقوليلى انت فعلا اشتهرت لما جالك مدونين اجانب جايه تغظينى :((
ماشى ماشى
هههههههههههههههههههههه
نوريتنى يا منونا هانم ربنا يخليكى ليا يااااااااا رب
****************************************************************
سمو الأميرة سارة
ههههههههههههههههههههههههههههه
انا عارف ان كل واحد فينا لو فتح فى الحكايات فى مرحله الانتشار دى هيطلع ميت بوست تحفه احسن من دا
:))
وانا لسه عندى مواقف على فكره بس كفايه اللى كتبته

تحياتى ليكى يا سمو الاميره :P
****************************************************************
سفروته صغنتوته
نبدأ بالاستشاره ... الحل الوحيد لوجع ضرس العقل انه يتخلع لسبب انك اصلا مش بتستخدميه فى الاكل وكمان علاجه رخم ( تقدرى تعتبريه زى الزايده .. ملهاش لزمه بس اول ما بتسبب ضرر بنعمل عمليه الزايده) دا افضل حل لضرس العقل اى ضرس تانى لأ بيس؟

وسعيد ان البوست عجبك ويارب اللى جاى كمان يعجبوكى
ونطلع فى التفزيون سوا عشان امى تيجى تجرنى من شعرى على الهوا :D

wafaa يقول...

ااااااااه موضوع "مثلى" ده بالظبط حصل معايا وللاسف كنت اديت عنوان المدونة دى لكذا حد من اصحابى على اساس بها انها حاجة جامدة وال ايه يطلع كده كده
وكانت فضيحة بين اصحابى اشتغلونى كام شهر بالموضوع ده

غير معرف يقول...

ماشاءالله عليك يادكتور
انا اول مرة اعلق عندك بس مش اول مرة ادخل وكل مرة ابقى نفسى اعلق لكن معرفش بس قلت اجرب المرة دى
انا عاوزة اقولك ربنا يبارك فيك ويوفقك فى دراستك وحياتك المستقبلية العملية والاجتماعية باذن الله
بجد مدونتك من اجمل المدونات اللى انا دخلتها وعلى فكرة كمان عشان تفرح اوى انا اول مرة اعلق عند اى مدون يالااديتك شرف كبير اهه اى خدمة
barby

الجواز و سنينه يقول...

يا نهار ضحك
بقى الانتشار يعمل فيك كل ده يا بطوط
و لا الاخوان و اعداء الاخوان
يا نهار ابيض
بس ايه وقعتك فى الشواز وجدى و مثلى
صحيح إلا مثلى دى
ههههههههههههههه
ده انت بطوط حبوب و طيوب كمان
ياسيدى كل سنه و انت طيب و الحمد لله انك عديت مرحله الانتشار بدل الفضايح دى كلها

لــــ زهــــــراء ــــولا يقول...

حبيت اقول سلام عليكم بس من غير خلع دروس هههههههه بقى الانتشار بيجيب العار؟ ان شاء الله مدونتك تنتشر انتشار الاعصار والكل يعرفها ويدخلها ليل ونهار بس من غير خلع درس كلام جد مش هزار هههههههههه

Zika يقول...

ياض يا دكتور
انت ممتع :D
اي والله البوست لذيذ فششش غل بجد يعني

صاحب المضيفة يقول...

فين ياواد سيرة خالك في وسط الناس دي

كده ينفع يعني

بدل ما تعمل لي بوست لوحدي كده تيجي تنساني ومش تعمل لي اي ذكر في المدونة

عموما لما اشوفك بس

:):):):):)

وسلم لي على الانتشار

ويتوغل ويتنشر ويتنشر ويتوغل

ويكا يقول...

ههههههههههه
اجمل خاجه فى البوست ده انه من اول البوست للكومنتات نفسها
الناس كلهم دمهم خفيف جدا ، وبصراحه بالاخص (كالعاده ، الشعب اللى عايز يتشكم ، و ستيته حسب الله الحمش وصيدلانيه طبعا .
وبابا وماما بالاسكندريه ، وكل الاهل والاصدقاء بالساحل الشماى .... وتوتو ونوتو فى بلاج المعموره ........

عموما ، موضوع مجدى ده عجبنى

بصراحه لذيييييييييييييييذ

Sonnet يقول...

May I invite you to check this link
http://shayunbiqalbi.blogspot.com/2010/01/blog-post_28.html
قال تقرير صادر عن منظمة الضمير لحقوق الإنسان المختصة بالمخاطرالبيئية والصحية الناجمة عن القصف والغزو كشفت أن حوادث الأطفال الذين ولدوا مع تشوهات قد ارتفعت بشكل ملحوظ في قطاع غزة.

starfire يقول...

هههههههههههههههههههههه
انا بضحك بس عشان اعرفك انى عملت دونه
و حتى لسه مش دخلت مرحلةالانتشار

بـسـمـــة صـــــلاح يقول...

عجبني اوي الكلام اللي قبل الكومنت دا
************

بوست لذيذ أوي
ماشاء الله على روح حضرتك
والمدونة حلوة تبارك الله...

أول مرة آجي وهحاول متكونش الأخيرة
اتبسطت بوجودي هنا بجد

تحيـــ سفيرة السعادةـــاتي(:
بسومة النعومة

لاسع افندى يقول...

طبعا لانى اول مره ازورك
يبقى طبيعى انا فى مرحلة الانتشار
بس بجد مدونتك جميله واسلوبك حلو

ده تالت بوست اقراه...هكمل قرايه بس مش هعلق والا ابقى بطبق نظرية الانتشار الرأسى واعتقد ان احنا محتاجين اكتر للانتشار الافقى

نسيت اشرحلك الانتشار الافقى والرأس
الانتشار الافقى ده اللى حضرتك بتحكى عنه
اما الانتشار الرأسى ده لما تنشن على مدون وتروح تعلق على تلات اربع بوستات مره واحده ده معناه انك بتنتزع منه زياره وتعليق عندك


اسعدنى الوجود هنا

تحياتى