2010/03/02

أرجوك لا تحبنى


بقالى كتير اوى مرحتش ساقيه الصاوى .. النهارده وبعد يوم شغل متعب قلت اروح هناك اقعد شويه .. مكنش فى دماغى لا احضر حفلات ولا حوارات .. كل اللى كنت عاوزه بعد يوم شغل طويييييييييل وممل انى اقعد شويه على النيل.
قعدت على طربيزه وكان قدامى بنت وولد بيتكلموا مع بعض .. البنت مكنتش محجبه  وطول الوقت بتعلب فى شعرها وملامحها هاديه اوى وتحس كده انها سرحانه وهى بتتكلم كأنها بتفكر فى حاجه .. والولد متنرفز ومخنوء وعاوز يولع فيها وفى الساقيه وفى نفسه والله اعلم.
سمعت جزء من الحوار بالصدفه .. بس بينى وبينكم بعد كلمتين بس قعدت وركزت وكان نفسى اشارك فى الحوار لو ينفع.
= كانت بتقوله : ممكن اطلب منك طلب
-قالها :انت تأمر يا فندم 
= قالت : له ممكن متحبنيش؟
لحد هنا ومكنش الولد اتنرفز كان لسه كووول وعادى .. ولحد هنا وانا بدأت اركز عشان الحوار شدنى الصراحه رغم انى عارف ان كده غلط .. بس الحوار شدنى اعمل ايه.
-المهم هو رد عليها بهزار : جايه تقولى دلوقتى بعد الفاس ما وقعت فى الراس.
= قالتله : على فكره والله انا بتكلم بجد .. عارف ؟ انا عمرى ما كان ليا اصدقاء قريبين منى زى ما انا وانت قريبين من بعض .. وعارف كمان انا مستعده اعمل اى حاجه عشان مخسرش الصداقه دى ..وهزعل اوى اوى لو خسرتها.
- ايه علاقه دا .. بانى احبك او محبكيش
= عارف ؟! ايه اكتر حاجه بتخلينا اصحاب من وجه نظرى .. هى اننا مش بنفكر نحب بعض .. ببقى معاك على راحتى كأنى مع واحده صاحبتى .. واظن انت كمان بتكون على راحتك كأنك مع ولد صاحبك .. لكن لو بقى فى مجال اننا نحب بعض .. صدقنى المساحه اللى بتحرك فيها كأصدقاء هتقل.
تعرف اقولك على حاجه؟! انا وانت مقتنعين اننا مننفعش لبعض ..طب فكر معايا بالعقل احنا ننفع لبعض؟

- ثوانى بس .. انا صدر منى حاجه ؟ حسيتى انى بعاملك بطريقه مختلفه عن زمان ؟ انا قلت لك انا بحبك ؟ او حتى لمحت ؟ ايه المبرر انك تقولى كل اللى بتقوليه دا ؟ ثم ليه انا بضيق مساحه الصداقه اللى بنا؟
عارفه اقولك على حاجه طالما فتحتى الموضوع .. انا مسألتش نفسى -سوؤال بجد- اذا كان ينفع نرتبط ولا لأ
انا اه سألت نفسى فى معرض الكلام معاها بس مكنتش بحسبها بالظبط .. وكل اللى طلعت بيه اننا اه ننفع لبعض .. بس محتاجين نقعد ونتناقش.
بس اقولك على حاجه انتى اكتر واحده عارفه انى اصلا دلوقتى مش بفكر فى الارتباط باى واحده ..انا كل اللى شاغل ذهنى دلوقتى انى اثبت نفسى ... ويوم ما اجى افكر - بصراحه - مش مستعبد افكر فيكى.
=  عارف ؟! انا بقالى فتره شايفه فى عينك انك عاوز تقولى انك بتحبنى ..وحسيت انى خفت على صدقاتنا دى لو انت جيت وقلت لى اللى شايفاه فى عينك دا ..وصدقنى ساعتها مش هينفع نبقى اصدقاء تانى.
- عاوز افهم ايه المشكله .. بفرض انى جيت قلت لك انا بحبك .. وانتى قلتى لأ مش هننفع لبعض احنا مننفعش اكتر من اصدقاء .. ايه اللى يخلينا ساعتها نخسر بعض .
= بس انا عاوزاك تبقى مقتنع اننا مننفعش لبعض ؟!! طب ايه بيخليك تحس اننا ممكن ننفع لبعض؟
- ملكيش دعوه انا مقتنع بـ ايه او مش مقتنع بـ ايه؟ انتى ليكى دعوه بتصرفاتى معاكى؟ انا بعاملك كـ أيه؟
= اصلى بجد مش عاوزه افقد صداقتى بيك ابدا .. وخايفه اخسرك .. خايفه تنسى اننا مننفعش لبعض وتحبنى .. وخايفه انى ساعتها اجرحك .. انا بجد محتاجه ليك كصديق .. وبجد اى حاجه بنا غير كده هتفشل.. ارجوك خدنى على اد عقلى وقولى انك مش هتحبنى.
( تليفونى رن وفضلت اتكلم مع واحد صاحبى يجى تلت ساعه ..الله يخرب بيت اللى رخض دقيقه المحمول ..وطبعا ضاع عليا جزء كبير من الحوار بس وصلت وهو)
- بيقولها : بصى انا معنديش مشكله .. انا عارف احنا بالنسبه لبعض ايه .. وننفع نبقى لبعض ايه .. وعلى الاساس دا بتصرف .. لو شايفه ان فى حاجه بينا مش مريحاكى ..فانا خلاص وصلت لى وجه نظرك .. ولو حتى مش عاوزه الصداقه دى .. فأنا عقلى كبير وهيتقبل رأيك دا.. بس قوليلى رايك وخلاص لأنى بجد بجد زهقت.

انا فضلت مندهش من الحوار 
عمرى ما شفت واحده بتقول لواحد لو سمحت متحبنيش .. عشان انا محتاجه ليك اوى نكون اصدقاء طول العمر .. ومحتاجه اكون على راحتى معاك .. ولو كان فى احتمال نحب بعض مش هكون على راحتى دى اوى .
واندهشت اوى  اوى انه فضل مصمم انه يقولها وقت ما احس انى انجزت شويه فى طموحى مش مستبعد افكر فيكى .. والمشاكل اللى انتى شايفاها ان شخصيتنا مش هتركب على بعض .. ممكن ساعتها نقعد ونتكلم فيها.
اندهاشى كان انه مقلش اه وحاضر وخصوصا انها واضح انها مقتنعه انهم مينفعوش لبعض
عموما انا قلت افكر معاكم فى الحوار دا بصوت عالى عشان مش عارف افكر فيه لوحدى.
وممكن تقروا البوست دا كمان انا كنت كتبته زمان اوى بس اظنه هيفيد فى الموضوع كلك هنا 
انا اسف معلش كتباتى خدت منحى تانى بقالها كام بوست 
مش عارف ليه بس اكيد هتتعدل يعنى بعد شويه

هناك 28 تعليقًا:

UncŁē Sam يقول...

غريبه
بس بجد كلام جميل
تقبل مرورى
وتحياتى

Sara at home يقول...

صراحة هيا عندها حق
الصداقة ابقي واغلي من الحب من وجهة نظري
تقبل مروري

مي يقول...

شايفة البنت صريحة اوى مع نفسها عااااادى جدا وبتحصل يابطوط ساعات البنت بتحس انها محتاجة لصديق مش حبيب صديق تحكى له تفضفض معاه يمكن الحبيب هتكون متحفظه معاه شوية عشان مينفعش تقول كل حاجة لانه هياخدها بمحمل تانى
هى مش عايزة تخسره كصديق لانه فهمها وهى مرتاحة كده وحاسة ان الحب هيقيدها وناس كتير صحاب وبعد الحب فشلوا مع بعض
هو حبها وده واضح من كلامه بس هى صريحة مع نفسها وصارحته لانه فعلا الصداقة بتتحول لحب لكن لو حب صعب يرجعوا تانى اصدقاء
هى صح لانها مش عايزة تخدعه وتوهمه
تحياتى يا بطوط

Sarah Sobhi يقول...

انه لعبط!!!!

هو بصراحة النظرية دى موجودة
هى قصدها- حسب النظرية- ان مدام هم اصحاب يبقى كل واحد ممكن يتكلم براحته عن حد معجب بيه,حد بيفكر يحبه ,او يعمل حاجه مكنش ممكن يعملها لو كانوا مرتبطين

انت عارف المرتبطين بيبقى كل واحد شايف فى التانى فارس او فتاة احلامه و مبيقبلش غلطة
لكن الاصحاب مبيفرضوش على بعض قواعد عادة

هو بقى ليه موفقهاش لانه ببساطه بيحبها و متخيل ان فى الوقت المناسب هيقنعها انهم ينفعوا لبعض..ايوه مدام بيقول هنتناقش يبقى هيقنعها
P:
بس انا كنت عايزة اعرف مينفعوش لبعض ليه..مش كنت تركز يا بطوط!!
بعد كده تقفل موبيلك لو سمحت عايزين نسمع D:

لكن برضه ارجع و اقول انه لعبط!!!!

Unknown يقول...

ما زالت سلسلة البوستات اللى شايفها فى غاية الأهمية ،،، على فكرة مش بسبب مضمونها كأحداث لكن فعلاً طريقة عرضك لها أكتر من رائعة ببساطتك المعهودة
قرأت البوست ده و البوست القديم و المضمون من و جهة نظرى ان مفيش حب أو صداقة بين ولد و بنت ،، دى فطرة و الدعوات اللى بتقول عادى بتحاول اختراق الفطرة اللى ربنا خلقنا عليها ،،، لو ينفع كان ربنا موضعلناش خطوط فاصلة ،،، فى البوست ده أعتقد ان البنت أكثر ميولاً للولد رغم كلامها بدليل احتياجها ليه للدرجة دى ،،، لخبطة
تقديرى

marwa mahdy يقول...

البوست لذيذ جدا كالعاده,
بس كنت بقراه باندهاش ,!!,صداقه بين بنت وولد اصل الصداقه دي يعني اول ماتعب من حاجه أجري أكلم صاحبتي وأحكيلها كل حاجه بقي بدون احراج وده اكييد مش بيحصل لو كان ولد مهما كان

في زماله صح وعلاقه محترمه وفيها معزه بجد ممكن تكون بيين البنت والولد طول ما انا عارفه حدودي وهو عارف وكمان عارفه بعامل مييين بالظبط.
البنت بتقول عاوزاه صدييق بس انا شايفه انها بتحبه لكن ظروفها مش ماشيه مع ظروفه والدنيا مش تمام وعقلها بيقول لاء للموضوع لكن هي مش عايزه تخسره بردو ومش عارفه هي عاوزه ايه
موضوع الصداقه ده مش مقتنعه بييه,
بس فرضا انها قربت من حد اوي وهي عارفه ان الموضوع مش هاينفع لازم تبعد وماتدديش لنفسها مبررات انها تعرفه

أحمد عبد الحميد يقول...

بطوط... رأىشخصى.... مافيش صداقة بين ولد وبنت
شكرا

ديدي في غيبوبه يقول...

وانت ما شاء الله مااااتبع الموضوع
يعنى اجدع واحد يلمع أُكر
:)

الموضوع دا بيتكرر كتير يا بطوط يا اخويا
انا فاهمه وجهة نظرها
لانها بتفكر انها لو حبته .. هتخبي عليه حاجات كتير تحت اسم ( انه ممكن يزعل منها او يتدايق ) وبعدين فيها ايه يعنى .. انها عايزاه صديق بجد .. يوقف جمبها ويساندها عن طيب خاطر .. مش مضطر عشان هي تخصه واسمه من اسمها واداء واجب والسلام
انا شايفه انه مش عيب
انها تختار صديق وفي .. لبااااقي العمر

تقبل مرورى وتحياتى ليك

فاتيما يقول...

انت بتعتذر ليه؟؟



طب مش دى المشكلة
الحوار دا هوه المشكلة
و اتحلت خلاص الحمدلله


عارف ليه؟؟؟


عشان هيا بتحبه قوى
بس مش عارفة مكانتها
عنده ايه بالضبط


و مع انها مرتاحة جدا معاه
لكن عايزة تتأكد
من ان تعلقه بيها
يوازى درجة تعلقها مش أقل


و رغم إن برستيجها
ناقح عليها قوى
الا إنها قررت فى لحظة تهور تسأله
و اللى يحصل يحصل


وعشان مينفعش تقوله
فى وشه بحبك
واوعدنى متبعدش عنى مهما حصل
فجبتها بالعكس
كنوع من المناورة
عشان ينطق و يقول
و يطمئن قلبها



متستغربش منها
هيا بتعشقه
و مش عاوزة تصحى فى يوم
متلقيهوش فى حياتها لأى سبب



و كمان متستغربش منه

هوه إتفأجا
بإنه مضطر يصرح بمشاعره
فى وقت مكنش مستعد فيه لذلك



الأتنين خلاص كشفوا ورقهم
و ربنا يسعدهم


متفقة مع الأراء
اللى بتقول
مفيش صداقة بين رجل و ست
فيه زمالة و اخوية و جيرة
زى بينى و بين زمايلى ف الجامعة
و الشغل و اخوية مع اغلب المدونين اللى بعرفهم و جيرة العمر مع ناس بقالهم فى حياتى زمن


لكن الاحتياج العاطفى
اللى ظهر فى الحوار دا
بيقول انهم بيحبوا بعض


بس بيقاحوا
و خبرتهم اقل
من انهم يقولوا لبعض
بصراحة كل حاجة
من غير مقدمات
و خطط
و مناورات زى ما قولتلك


و لو انى ضد تلميع الاكر عمومااا


بس انا كمان
بحب ابص على أى إتنين
بدون ما يحسوا انى واخدة بالى منهم
اصل فيه ثنائى كدال
بيبقى شكلهم حلو قوى
بحب اشوف نظراتهم لبعض
و اخمن مشاعرهم
و مين بيحب التانى اكتر و هكذا


و بختم غالبا
بنفس الجملة اللى كتبتها فوق


ربنا يسعدهم



سلااااااااام
يا اجدع دكتور سنان فى مصر

sony2000 يقول...

هي خيفه يامحمود
خيفه من انها ممكن تخسره فعلا لو حبو بعض لان تقريبا كدا كل قصص الحب بتبوظ فالنهايه وهي عوذه حد جنبها علطول
هما عرفين بعض ولولا انها عرفه انه بيحبها مكنتش قالتله الكلام ده ولا ايه
فبتقوله من اولها يااصحاب علشان فيوم منخسرش بعض يلأ
تقبل مروري وتحياتي

صيدلانيه طالعه نازله يقول...

انا كمان رأيى زى فاتيما بالضبط
هيا بتحبه فعلا بس عايزه توصل انه هو اللى يقول

بس برضه باختلف مع ابو حميد
الصداقه الحقيقيه السليمه بين ولد و بنت موجوده و الله بس لو توفرت ليها اساسيات و محددات معينه
و بتدى مساحه حريه و فضفضه و بوح اكتر من البنت للبنت او الولد للولد
لانها بيدخل فيها منطق الغيره

هبة المنصورة يقول...

على فكرة القعدة ف كافيه لوحدك أو مع حد مش بيتكلم كتير خطر.. لإن على كل ترابيزه حدوته وف أغلب الأوقات الواحد بيتشد وبيبقى عايز يسمع ويعرف أكتر.. كمان فيه شخصيات من أول نظرة كده بتستفزك
ده اللي حصل معايا لما قعدت آخر النهار ف كافيه اسكندراني.. يحجبنا عن الداخل لوح زجاجي ومن وراه شدني كبل له ملامح أجنبية .. وعلى اليمين كبل تاني مصري صميم ولو إن البنت معرفتش أشوفها كويس من الراجل لإنه كان ضخم جداً ومليان وبصراحة لو كانوا لسه مخطوبين كان هاين عليا أقولها ليه بس تعملي ف نفسك كده؟ وع الشمال واحد قاعد لوحده وعمال يشرب سيجارة ف التانيه -كنا قاعدين أوتدور بقى فواخد راحته- وبيفكر.. وله نفس ملامح الممثل الأصلع ده اللي كان ف "تيتو" و "بلطية العايمة" .. واضح إنه كان مستني ساعة الصفر عشان يفجر المكان... وكمان خدنا بالنا من سائحة عمرها لا يقل بأي حال م الأحوال عن 65 سنة وكانت مصيفة-هو توب بنص كم وجيبه شورت فضفاضه- ودي شفناها ف مكتبة اسكندرية وبره ع الكورنيش وأخيراً ف الكافيه.. عارف أنت الكومبارس اللي بيدخل يمين وبعدين يلف ويطلع م الشمال وممكن تشوفه ف كذا مشهد م الفيلم؟ كانت هي دي
شفت بقى .. حواديت الترابيزات دي عمرها مابتخلص.. هي وحواديت المواصلات :)
بس ايه بقية الحوار هنا؟
معرفتش هيتقابلوا تاني امتى؟

أحــوال الهـوي يقول...

ايه الغريبه المريبة في الحوار ده

لو ان الصداقة تنفع بين الولد و البنت بدون قيود كنت اندهشت لكن الواضح مش واضح

بس سردك للقصه هو اللي عاجبني
حتي لو اختافت في المضمون

تحياتي

غير معرف يقول...

شكلها بتحبه اووى ومحتاجة له اكتر

يمكن مفيش صداقة بين ولد وبنت
بس الصداقة عامة بتكون افضل من الحب

masry يقول...

يا عم البنت شايفه ان الواد مش من مستواها او منمره علي واحد جامد اخر حاجه ومش عايزه تصدم الغلبان وشايفه انه وقع وهي عايزه تتسلي حتي اشعار اخر

ستيتة يقول...

فكرتني بصلاح جاهين لما خلى سعاد حسني تقول لأحمد زكي متحبنيش بالشكل ده
قال مبحبكيش بالشكل ده
ردت اهو قالي مش بيحبني يا ناس يخلصكم كده :)

غير معرف يقول...

هل ممكن يكون فيه صداقه بين الولد والبنت ؟

اكيد ممكن وتكون اقوى بمراحل واكثر خصوصية من الصداقه بين ابناء الجنس الواحد

ايه الفرق بين الصداقه والحب بين الجنسين؟
ما هو الاتنين حب بس المفروض ميكونش معاها اشتهاء للطرف الاخر يعنى علاقه على المستوى العاطفى والانسانى بس

هل فعلا العلاقه دى ممكن تتحقق على ارض الواقع يعنى يكون حب قوى بدون رغبه؟

ده ممكن بالنسبه لطبيعة البنت هى ممكن تنشئ فى حياتها علاقه بالشكل ده لكن ده يكاد يكون مستحيل بالنسبه لطبيعة الولد

ايه اللى يخلى البنت تضطر للجوء لهذا النوع من العلاقات؟

لان الشخص اللى هو الصديق مكانش من البدايه فتى الاحلام وماتشدتش ليه ومرت او بتمر بقصص وهو جنبها وبتحكى معاه وبتزيد علاقتها بيه على مستوى الصداقه ولما بتخلص كل القصص بتلاقى نفسها محتاجاه اوى لكن متقدرش تفكر فيه بشكل مختلف

او لان فيه عوائق واضحه فى قناعتها هى الشخصيه تخليها تفكر فيه كشريك لحياتها

هل دى علاقه طبيعيه او صحيحه ؟
طبعا لا
من ناحيه لعدم امكانية تحققها بالنسبه لاحد الطرفين وهو الولد

و من ناحية لانها هتشوه علاقة الارتباط الحقيقى فى حياة البنت لان لو ظهر فنى الاحلام المنتظر مش هيبقى توام الروح اللى يملا دنيتها هيبقى فيه دايما شاطئ تانى بترتاح فيه

شفـقــة و إحســــان يقول...

والنعمة دى بنت غبية وهو حد لاقى حد يحبه اليومين دول
دى فقرية
بس تعالى هنا يا بطوط انت بتتجسس على الناس ولا ايه
هههههههههههههههههههه

z!zOoOo يقول...

السلا عليكم

اولا ازيك يا بطوط

يارب تكون بخير

وانا فعلا شايف إن فيه أكتر من تعليق صح

لكن برضه انا ليا تعقيب صغير

طيب اولا هي لو بتحبه قالتله كلام زي كده ليه


مش افضل تحتم حبها وتستني إن هو الي يفتح الموضوع طالما هي حاسه بحبه ده

ثانيا : لو هي شايفه إن صداقتهم هتدوم لأخر العمر احسن من الحب

ورغم عدم إقتناعي بموضوع الصداقه بين الراجل والست والعلاقه ليها فعلا اشكال ومسميات اخري او علي الاقل شايفها بمنظور تاني

لكن هل مثلا لو إتجوزت هتفضل محتفظه بالصداقه ديه او جوزها هيوافق علي كده

وابقي من هنا ورايح بطل تتصنت

D:

عشان كده هيحطوا السيخ المحمي ف صرصور ودنك

D :D:

ربنا يوفقك

تحياتي

Kiara يقول...

اللي يحس حب من نظرة عين حد يبقي بيحبه

دي واقعه فيه اصلا وتعبت من الانتظار ومن انه يتكم فتهورها وصلها انها تنكشة بالطريقة دي

دي كانت بتنكشه نكش

واضحه جدا

عصفور طل من الشباك يقول...

إنت عارف يا محمود البوست ده فكرني بقصيدة نزار اللي غنتها ماجدة الرومي "كن صديقي"

على الرغم من احترامي الشديد لعقلية الولد والبنت دول فأنا مش مقتنعة أوي بموضوع الصداقة بين الولد والبنت إلا في إطار محدد، وأهم نقطة في الإطار ده هي عقلية الولد والبنت دول قبل عقلية اللي حواليهم من أهل ومجتمع وناس

وأفضل قصص حب وأفضل زيجات هي التي تبنى أساسًا على صداقة متينة

أنا احترمتها، بس ما فهمتش هي ليه بتسبق الأحداث، حسيت إن المشكلة عندها هي

متهيألي إن هي اللي بتحبه أو خايفة تحبه، أو عايشة صراع بين قلبها اللي على وشك الحب وبين عقلها اللي شايف إنهم ما ينفعوش لبعض

هو كان واضح أكثر منها

هو سايب كل حاجة بظروفها هو دلوقتي مش بيحبها لكن في نفس الوقت لو حبها ما عندوش مشكلة نقعد ونتكلم

عارف يا محمود أنا ليه بعض الأشخاص اللي ممكن أعتبرهم أصدقاء سواء من أقاربي أو زملائي في العمل بس كان أهم عامل مشترك ما بينهم نقطتين:

إنهم غالبًا أصغر مني وبالتالي بيتعاملوا معايا على أساس إني أختهم الكبيرة، وده كان بيخليني أكثر اطمئنانًا

إني لي صاحبتين هما الأقرب لقلبي بشكل مش بحتاج فيه لحد تاني، هما دول اللي ممكن أحكي لهم عن كل حاجة بدون رتوش أو خجل أو خوف وبطريقة أنا واثقة إنهم هيفهموني بيها


إنت إيه رأيك

أسماء حسين يقول...

بجد هى غريبة شوية رغم انها المفروض صح
صحيح كلامها فيه صراحة كويسة بس كونها تفتح كلام عن حبه ليها أصلا عامل زى اللى بيلفت نظر حد وكمان طلبها مش محتاج أفورة ومن حيث الزاوية اللى عرضت بيها الكلام اللى سمعته حسيت كانى قاعدة وسامعة معاك..ولاحظت انها بتكرر وتافور كتير دة فى حد ذاته ادانى احساس انها بتختبر حبه بطريقة ذكية شوية
هى صداقة الجنسين مش مرفوضة ولا حاجة طالما عندنا الوعى والنضج الكافى لاحترامها ويكون ليها حدود تقف عندها
لكن كل الامر ان زى ما لكل قاعدة شواذ فى ناس مش بتعرف تاقلم نفسها مع الصداقة المشتركة وبيفضلوا يعاملوا الطرف التانى على انه شريك محتمل دايما
سلاامى

pinky يقول...

sa3at kteer awi el bent betda5al nafsaha fe 7agat hya msh 3awzaha 3shan msh 3arfa tetkalim zay el bent dee. y3ny betb2a heya moktn3a en da maynf3sh leeha, w 3arfa kida, lakin betseeb nafsaha, msh 3shan bet7bo. 3shan msh 3arfa tetkalim w teb2a saree7a kida zyaha. wel a5er el mawdoo3 bey5las la2ino kan lazim ye5las.
w betban el bent enaha tahya w msh 3arfa hya 3awza 2e. w byb2a la fee magal la l7ob wala li sadaqa

nice post

ست البيت يقول...

أولا الحدوتة تنفع تتعمل فيلم قصير
اسمه صدعني من فضلك
او حاوريني يا ويكة
أولا بما هو معروف عني في العالم التدويني إني أرهابية قديمة
ومتحذلقة وتفزلكة ورجعية لورا ستين مليون دشليون سنة
ما فيش الهبل اللي الأخت بتقولة دا
هي شاربة شاي باللبن ؟
لعل وعسى يعني

الفكرة ان البنت دي بتتفرج ع أفلام كتير
ومهما حاولنا نغير الأمر
ما فيش صداقة بين واحد وواحدة وارتياح وكلام لا مؤاخذة لا يودي ولا يجيب
كلام أهبل ملخص القول انها في حالو مراهقة أو فراغ عاطفي
وأنا مش بكره في حياتي غير الناس دي
اصلها بتكون مريضة
وعاوزة تعمل فيها حالة
واللي يضحك الامورة دي يوم ما تفكر وتقول يا جواز تتجوز جواز صالونات
يا بني في الحياة ياما حتشوف بس المشكلة أن الحياة فعلا نمطية أكثر من اللازم أو احنا اللي نمطيين أكثر من اللازم

غير معرف يقول...

بقالك كتير مروحتش ساقية الصاوي ؟

انا عمري ما روحتها . !!

أما بقا عن صراحة البنوته .. و الواد بيقولها بعد ما الفاس وقعت في الراس .. يا عالم بقا هي عملت فيه ايه . شربته حاجه صفرا يمكن ؟؟؟؟؟

ربنا يعافينا ..

هههههههههههه



اول مره ازورك و ان شاء الله أكيد مش الأخيره و اسمحلي أرخم و أقرأ شغلك اللي فات

و اتمنى تشرفني و تعلق على شغلي هنا

http://ahmedabdulmohsin.blogspot.com/2010/01/blog-post_25.html

من مزكرات فتاة يقول...

قد تنمو الصداقه لتصبح حبا
لكن لا يمكن ان يتراجع الحب ليصبح صداقه
مستنيه مرورك على مدونتى انا والله مش ناويه ادى عنوانها لحد من اصحابى قبل اما اعرف رأيك فيها
متهيألى ده سبب كافى يدفعك لزيارتها
فاضللى شويه واوطى على ايدك ابوسها

دنيا....او حياة يقول...

ههههههه ...جمييييييل جداااا ..بيحصل معايا رمي الودان ده رغم انه مش صح ..بس عموما
القضية دي للاسف بشوفها كتير وكتير بيعتبروها عادي جدا ...وانا لااحب خلط الامور ...وانا من ضمن الناس اللي لاتعترف بمعني الصديق والصديقة ..افضل ان اقولها " زميل وزميلة " ..لا اعترف بالبنات اللي بيبقو عندهم انتيم ..لاني لم ارى ولد عنده انتيمة ...
ولو حصل للاسف تنتهي دائما ..بهذا الاضطراب ..لا هي عارفة هي عايزة حبيب ولا هي عارفة هي عايزة اخ وصديق..
:) :)

ميشوو يقول...

يااااهـ دي البنت بتلف وتدور عشان يتقدم الولد بسرعه هههههههههههههههه

ربنا يوفقهم :)