2008/08/05

قبل رمضان شعبان .. تصدقوا؟؟


كواحد عادى جدا بنتظر رمضان ..... وخصوصا لما بحس انى فعلا بعيد عن ربنا فى الفتره دى .... فببقى منتظر جدا رمضان بكل روحانياته

السنه الى فاتت بالتحديد بدأت أغير وجه نظرى دى

وبدأت اعتقد انى فعلا كنت غلطان وانى مش بستفاد برمضان زى مالمفروض انى استغفاد منه

غيرت تفكيرى السنه الى فاتت .... وخصوصا فى ايام العشر الاواخر

الجوامع بتكون مليانه فى التراويح وفى القيام

بس كان معانا واحد فى الاعتكاف شخص تحبه من اول ما تشوفه .... لما صليت جنبه من اولما الامام قال ( بسم الله الرحمن الرحيم) وانا حاسس بدموعه

حاسس بيه بينتفض ... رغم انه مش بيطلع صوت نهنه

واحنا بليل بعد ماالناس خلصت صلاه ومشت ومبقاش فاضل غير المعتكفين رحت وسألته

بصراحه انا كنت محتقر نفسى جدا ... الراجل ده بيبكى من اول الفاتحه ... بحس فيه بصدق عالى اوى

المهم رحت وسألته ؟؟ ...

هو حضرتك بس انا عايز اسألك سؤال.. انا كنت بصلى جنبك ويعنى حصلت حاجه كده

اتفضل

هو بصراحه انا مثلا ممكن ابكى فى الصلاه ... لما اسمع ايه عذاب ... لما اسمع ايه تخوفنى رغم ان حتى ده مش بيكون كتير ومش دايما .... يمكن فى رمضان بس ..... أو لو صليت فى مره كده بليل ركعتين ولا حاجه وكنت حاسس انى عايز ابكى .. وكل ده قليل جدا جدا جدا ,....انما حضرتك ما شاء الله يعنى ...........؟؟ ,وذنوبك مش اكتر مش ذنوبى انا عارف نفسى ....

قالى بص انا هقولك على كلمه واحده لو عايز تحس بالخشوع...الحكايه شغل سنه ... او بلاش شغل سنه ... هو شغل فتره

انا منصت جدا له

هفهمك اكتر ... انت لازم تشتغل على قلبك طول السنه ... متتوقعش انك ممكن تحصل على نتيجه سريعه فى رمضان ... لازم تاخد بالك من قلبك طول السنه ... مش عمال تقتل فيه ... تقتل فيه .... وعايزه يقوم يصحى دلوقتى ... صعب جدا يا ......

اه نسيت اقول لحضرتك اسمى محمود

تشرفنا يا استاذ محمود الى عايز اقوهولك انت طبعا عارف حكم التباكى فى الصلاه

قلتله اه لو ظهرت (نهنه) او حروف زى( ااااه) و(أوووووه) و(ايييييييه) وكل (حروف التسهيل) دى .. تبطل الصلاه

طبعا الا لو خرجت غصب وكان بكى من الخشوع ... مش تباكى

قالى طيب احنا حودنا بالموضوع بعيد ... الى عايز اقولك عليه باختصار ... انك لازم تستعد لرمضان قبلها بفتره

دا لو عايز يكون قلبك فى رمضان شفاف اوى ... وتستفاد منه اوى

ومتنساش ان شهر شعبان ده شهر تأفيل الحسابات ... الاعمال بترفع فى شعبان فـ انت لازم على الاقل تشتغل على قلبك فى الشهر ده

الحوار ده افتكرته ... وحبيبت انقله ليكم يمكن حد يستفاد منه حاجه

انما وللامانه انا كاتبه عشان انا عايز اكتبه وافتكره وارجع له كل شويه


الموضوع ببساطه ان الراجل ده لفت نظرى انى لازم اوى اوى استعد لرمضان عشان اعرف استفيد منه .... لازم اوى ابدأ اقرا قران من شعبان على الاقل ...لازم ابدأ اصلى بليل ... اتعود اقعد فى المسجد لفتره طويله ... اتعلم اتصدق ... اتعلم كل حاجه انا عايز اعملها فى رمضان

لو عايز تخرج من رمضان بروحانيات عاليه ... وتستفيد منه اوى ... وتاخد فيه حسنانات كتيره اوى ... اظبط قلبك قبل رمضان

لو عايز تقرب لربنا اوى اوى اوى لازم تبدأ قبل رمضان بفتره ...و رمضان يساعدك انك تزيد

ربنا يكرمه يااااااارب فعلا استفدت منه كتيييييييييير اوى وربنا يعينى يااااااارب

هناك 45 تعليقًا:

د/اجدع بنوته يقول...

بحجز وراجعه

oRiGiNaL HeArT يقول...

ياااه شعبان جيه خلاص واحنا مش واخدين بالنا
اللهم بلغنا رمضان !
بجد الكلام اللى قاله الاخ دة صح جدا
مينفعش طول السنة نعد نعصى ربنا ونيجى فى رمضان نبقى عاوزين ميبقاش علينا ولاذنب ونبقى بقى فى افضل حالة ومطيعين لربنا
هو فعلا كثرة الذنوب تميت القلب فاللى بيعد بقى وناسى نفسه طول السنة مش هيقدر يحيه بين يوم وليله عشان كدة لازم الواحد يبقى دايما قريب من ربنا عشان لما يجى رمضان نقدر نزود الطاعة ونبقى اقرب من ربنا وربنا يتقبل منا اعمالنا ويرضى عنا
لكن لو عملنا رمضان هو الشهر الوحيد للعبادة فاكيد مش هنقدر نعبد ربنا بجد
مش هنقدر نطوع قلبنا شهر واحد فى السنة ونكون فيه كما يحب الله ان نكون
موضوعك جميل
واتمنى لينا كلنا الصلاح ورضا ربنا
جزاك االله خيرا على التذكرة

د/اجدع بنوته يقول...

اللهم بلغنا رمضان يارب

وجزاك الله خير ع الحديث ده

يارب كلنا نقرب اوى م ربنا ف الايام دى

عالم ماريونت يقول...

هتكلم تاني في اللي اتكمت فية عندمدونة سمسم:
مشكلتنا مش في رمضان
مشكلتنا اننا بنطلع من رمضان نلاقي الدنيا بيس والحياة كووووول والكحك والبسكوت
للأسف بننسى كل اللي عملناه في رمضان
يا جماعة رمضان فرصة هاااااااايلة لجمع الحسنات
بس برضة الاستمرار بعد رمضان دليل على ان ربنا تقبل مننا العمل الصالح ده
نفسي نبقى طاهرين اوي من جوة كدة زي ما بنكون في رمضان
وبجد نفسي حد يساعدني في ده
ربنا يوفقك اول زيارة ليا وانشاء الله اعود تاني

Mahmoud البطراوى يقول...

د/ اجدع بنوته

اللهم امين
------------------------------------
oRiGiNaL HeArt

الله عليكى فهمتى الليله كلها
ربنا يتقبل منك ياااااارب
------------------------------------
يوميات نائمة في الأرياف

هى دى فكره كلام الراجل بالظبط
اننا نفضل واخدين بالنا من قلبونا طول السنه لو عايزين قبلنا يفضل موصول برينا
واننا مش نبنى كل حاجه على رمضان وحتى لو هنعمل كده فبرضه عشان نستفاد من رمضان لازم نشتغل من قبلها

تحياتى ليكى

Maha Shahen يقول...

السلام عليكم ورحمة الله وبركاته
ربنا يبارك فيك وليك يا محمود
بجد موضوع هايل وجميل انك اثرت النقطه دى بس احنا مش شرط نبدأ من شعبان ولا من رمضان زي ما الراجل كان بيقول قلبك لازم تدربه من بدرى ولازم تستمر علي كدا احنا مش بندربه علشان ياخد الدورى ويكسب المطش فيبطل لا دا احنا بندربه للنهايه لحد ما يقابل ربه فيدخل جنته
للأيمان حلاوه والله يا جماعه بتفرح القلب لو فيه هموم الدنيا بتمحيها وتلاقي بس الفرحه اللي منوره قلبك وتحسسك انك بتحب كل الناس اللي ماشية علي الارض بتحب التراب اللي انت بتدوس عليه بتحب بكل كيانك كل ذره في الكون وبتشوف بعنيك كل شيء وكانه جديد والملل بيهرب منك مبيعرفش ليك طريق ابدا
كل رمضان وكل سنه وانت طيب يا بطوط وربنا يجعل ايامك كلها سعاده وايمان وعمل صالح يا رب ونشوفك مع الحبيب المصطفى يا رب على باب الجنه

رئـــــيسـة حزب الأحلام يقول...

موضوع جميل وبجد نصايح جامدة اوى
وربنا يجعل شهر رمضان شهر خير علينا
ونقدر نكفر عن ذنوبنا
الف تحيه لك

سمر الشافعى يقول...

بطوط

ربنا يارب يجعل البوست دا فى ميزان حسناتك وربنا يكرمك انك فكرتنا بحاجه زى دى فالوقت دا

خمسة فضفضة يقول...

السلام عليكم ورحمة الله وبركاته

ماشاء الله ماشاء الله
لافض فوك يا محمود
الكلام ده صحيح ميه في الميه وحسيته السنه اللي فاتت واللي بسبب زنقة الشغل فيها الواحد كان غفل شويه عن قلبه وما استعدش كويس لرمضان ، صحيح كنت باجتهد فيه زي كل سنة بس صدقني ما حستش بالحلاوة بتاع كل سنة ومهما كنت باصلي ولا بقرا قرآن كان برضو عندي احساس اني مقصره

من الآخر كنت حاسه ان نفسي بقي قصير اه ما تستغربش ماهو الموضوع بيبقي عامل زي تدريبات النفس بتاع السباحه واللي بتخلي السباح يبقي نفسه طويل ويقدر يعوم مسافات اكبر من غير ما نفسه يتقطع


يارب اللهم بارك لنا في شعبان وبلغنا رمضان وتقبل منا صالح الاعمال


سلام

فاتيما يقول...

الله يفتح عليك يا محمود
ربنا يقدرنا جميعاً على كدا
يا رب

آه وكفى يقول...

والله الواحد ساعات بيكون جبله جبلنه يا بطوط وقرفان من نفسه

Empress appy يقول...

والله يا محمود جسم اقشعر قشعريره من كلامك وكلام الراجل بجد
يا رب ميجعلناش من اللى قلبه مات

بقولك ايه ابقى ادخل مدونة بيكيا كدا وسادنا فى الموضوع اللى عملينه هناك ومعرفش تساعدنى ازاى هو كده وبس

سارة علي يقول...

ازيك يا محمود
فعلا الواحد مفروض يبدامن دلوقت المهم احنا بدانا فى جروب مدونتنا نور الجنة الصيام متنساش يوم الخميس صياااااااااام
صحيح انا عجبنى البوست اوى وعاوزة انقلة مدونة نور الجنة ممكن اعملةكوبى وانشرة هناك ؟؟؟؟؟؟؟؟
ربنا معاك وجزاك اللة كل خير
صحيح بوست "لعلنا نعتق من النار " حلو اوى
تحياتى

سارة علي يقول...

صحيح يا محمود قبل ما انسى
انا ظبطت المدونة وخليت الخط واضح وكل حاجة ... ادخل كدة شوفها وقولى رايك كان فى مشكلة عندى فى جهازى .... صحيح متنساش تحط لينك المدونة عندك عشان ناس كتير تزورنا ... صحيح عاوزين نشاط انا نزلت بوستين ..... عاوزاك تنزل بوستات من عندك ...... صحيح عاوزين ننزل على المدونة اناشيد

محمد فاروق الشاذلى يقول...

ما شاء الله عليك يا محمود
ربنا إن شاء الله هايكرمك بسبب الموضوع ده.
وتخيل إن شاء الله الحسنات اللى هاتخدها لو واحد بس عمل باللى إنت نبهتنا ليه دلوقت.

سعدت جداً بالموضوع ده
أشكرك بشدة

غير معرف يقول...

سلااااااااااااااام عليييييييييكم
ايون كده ربنا يكرمك
بقالى كتير عمالة اقول خلاص ابتدا وقت الاستعاد و من بدرى كماااااااااان
من رجب

فى شيخ قالى
اللى مش بيعمل دراسة جدوى استعدادا لرمضان من العامم اللى قبله يبقى يسلملى على نفسه
انا صرراحة قلتله الله يسلمك
بس فعلااااااااااااا
لازم يبقى قبلها بفترة
بقالى اسبوعين عندى ميل رائع كان نفسى ابعتهولكم كلللللللللكم بس اللغة فيه بايظة
ربنا يكرمك يا رب
و يا رب كلهم يقروه هنا
لانهم هناك مقروش حاجة
ربنا يجزيك كللللل خير
و يتقبل يا رب

Unknown يقول...

السلام عليكم ورحمة الله وبركاته
الله كلام جميل وعاقل وموزون كمان
جزاى الله هذا الرجل كل الخير
وجزاك معه احسن الجزاء
فالدال على الخير كفاعله
كقول رسول الله
صلى الله عليه وسلم
ورمضان كريم

NilE_QueeN يقول...

كلامك اثر ف احساسي اوى

انا بحس باحراج كبير لما بكون بصلي ف الجامع وعمو الشيخ عمال يعيط وانا معدل تاثير القران عندى ضعيف

فعلا كل ما الانسان بيكون نضيف كل ما بيكون اقرب لربنا

انا علاقتى بربنا الحمد لله طول السنه بتبقي كويسه مبيختلفش فيها ف رمضان الا موظبتي على التراويح وبتمني انى اتعود على قيام الليل عالطول

وفقنا الله واياك لما يحبه ويرضاه و جعل مثوانا ومثواك جناته

رصيف نمره خمســــــه يقول...

جزاك ربنا كل خير على التزكرة دى بجد احنا فى اشد الحاجة اليها

احنا المفروض نستعد من زمان وطول السنة للشهر الكريم ده

اللهم بلغنا رمضان يارب العالمين

سلام

Princesa ... WHiSPeR يقول...

اولا جزاك الله كل خير على الموضوع والتذكره الحلوه دي

ثانيا ماهو فعلا ماينفعش نكون بنغلط لحد قبل رمضان بيوم ولحد روؤية الهلال وبعد كده نقول احنا لازم نكون مثلمين صح في رمضان
طب ازاى
ماهو انا لو هنافق قلبي مش هينافق

انا حسيت فعلا المعني ده اوى السنه اللى فاتت
لاني كنت بحاول اقرب من ربنا قبل رمضان بحوالى شهرين تلاته
لقيت رمضان ليه طعم تاني خالص خالص

ربنا يقدرنا على صيام رمضان صيام الخواص
ويقدرنا اننا نفضل قريبين منه حتى بعد رمضان

غير معرف يقول...

جزاك الله خيرآ ..

ربنا يكرمك يا بطوط

اللهم بلغنا رمضان

كل عام و نحن الى الله اقرب

(:

Asmaa mahaba يقول...

ازيك يا بطوط معلش على التاخير دا
دا انا فاتنى بوستات كتير بس ان شاء الله حقراهم
كل عام وانت اللى الله اقرب ومن النار ابعد والى الجنه اقرب
هو نا ليا وجهه نظر بصراحه فى موضوع رمضان دا الناس زمان كانت بتحارب فى رمضان واعظم الاعمال اتعملت فى رمضان عز الصيام احنا اصبحنا دلوقت نقلل العمل ونكثر العباده مع ان العمل فى حد ذاته عباده
وبقينا نكسل ونقعد نعد ساعات الصيام وامتى حنخلص دراسه ولا شغل ونرجع ننام لحد ما نفطر
اعتقد فى رمضان لازم جميعنا نجتهد فى اولا اتقان العمل ثانيا اتقان العباده
والاتنين مفيش شىء فيهم ييجى على التانى او ياثر فيه بالسلب
وناخد دفعه من رمضان لباقى السنه
وموافقاك اننا نتزود قبل ما ييجى رمضان عشان نزود اللى بنعمله اكتر
حكايه الخشوع دى الحمد لله الواحد دمعته قريبه بزياده وكتير ما شاء الله الحمد لله الواحد بيكون خاشع فى الصلاه والقران بس المشكله فى اننا رغم دا لسه بنغلط اخطاء رهيبه فى حق ربنا وفى حق نفسنا
ربنا يهدينا جميعا
تحياتى ليك سومه_87

زى الهوا يقول...

ربنا يكرمك يارب , تصدق إن الموضوع دا حركنى وشكل حضرتك هتاخد حسنات علشانى كمان , ربننا يرقق قلبنا , ويجعلنا ممن يبكون خشية من الله

*الطالبة عفو الله *زوزو يقول...

ما شاء الله عليك اخ محمود فعلا البوست هايل و جا في وقته
احنا لازم نشد الهمة يا جماعة و الله بقينا ضعيفين اوي و منساقين مع الشهوات و المعاصي ربنا يهدينا و يرحمنا برحمته
كل سنة و انتم طيبين و الى الله قربين
بارك الله فيك اخي محمود

دعاء مواجهات يقول...

ياارب يعينا ياارب يامحمود

بجد بشكرك على نقل الحوار دة


لانة يخلى الواحد يلتفت للصح ويفوق بقى

ربنا يهدينا جميعا ويعيننا

تحياتى

maha zein يقول...

الله
كنت هعيط
بجد
فعلا انا عن نفسي بعيدة عن ربنا الفترة دي
بس ربنا يعيني واقرب
انا فعلا هحاول ائهل روحي لرمضان
بجد كلماتك حلوة
هتثاب عليها
وهتفيدنا
البوست ده حلو اوي
حسيتك طيب اوي فيه
ونقي
وشفاف
اللهم بلغنا رمضان
واعفو عنا واعتقنا من النار
امين

سارة علي يقول...

محمود
انا ظبطت المدونة تانى ادخل كدة شوفها شكلها هيعجبك ولا لا ؟ قولى رايك
انا عملت زى ما قولتلى جمعت كل المدونات مع البراءة عشان محدش يتوة ونلاقى ناس تزورنا هناك
تالت حاجة انا هعمل برضوكونترول لبوستات والنشر عشان عندك حق لازم ندى فرصة للنشر بس ازاى نعمل اعلانات وتنوية لكل بوست قولى ؟
رابع حاجة اة اعملنا شعار كدة حلو وانا هناقش الكلام مع بقية الجروب بتاع نور الجنة بس مستنية سمسمة ترجع بالسلامة للتدوين واطمن عليها
خامس حاجة شوفلنا موضوع السايد بار بتاع مواقع الشيوخ
يلا بقى سلام
تحياتى

Mona Shereif يقول...

ازيك يا بطوط
ليه مش بلاقى لينك المدونه بتاعتك فى البروفايل بتاعك بجد بحاول اوصل لها مش عارفه والحمد لله انى وصلت بس بعد لفه كبيرة اوى

المهم
الحمد لله انى وصلت على الموضوع ده
والحمد لله برضه انى فعلا بدأت استعد ليه وربنا يبلغنا رمضان يارب

ربنا يجزيك خير على التذكرة دى حتى لو كنت بتفكر نفسك بيها وخلاص المهم انك كمان فكرتنا

تحياتى

قررت أكون عانس يقول...

كلام جميل


الصحابة كانو بعد ما يخلص رمضان بيدعو 6 شهور ان ربن يتقبله منهم و النص التانى فى السنة يدعو ان ربنا يبلغهم رمضان

جزيت خيرا ع التدوينة الجميلة

Unknown يقول...

انا علقت على الموضوع دة مرتين وفى كل مرة التعليق مش بيظهر......
يارب يبلغنا رمضان ويديك ثواب التذكرة

مواطن مصرى نايم يقول...

اللهم بلغنا رمضان
بجد بجد بجد
انا نفسى رمضان يجى باسرع وقت لانى بنسى الدنيا كلها فيه
مفيش مجال للخنقة و التعب النفسى
بجد اللهم بلغنا رمضان
بوست جميل يا حودة
تحياتى يا دكتره
اسلام

بث تجريبي يقول...

السلام عليكم
عاوزة اشكرك على البوست دا وعاوزة اشكر كام بلوج تانى
ابتدتوا يتشغلوا على تحضير الناس لرممضان
وعلى فكرة اللى عجبنى فى كلامك
انك مش كتبت الكلام اللى حافظينه وكل المشايخ بيرددوا فيه ليل نهار
لا انت ذكرت موقف ممكن الواحد يستفيد منه اكتر من اى خطبة .

ربنا يعود رمضان علينا بخير ويارب ينقى قلوبنا.

سلاموز.

Mona Shereif يقول...

تمام لقيت المدونات دلوقتى فى البروفايل

انا عملت تحديث يا بطوط
ولقيت رد على القصة ياريت اعرف رأيك
بس ضرووووووورى
والله مش قادرة اهدى ولا مرتاحه من ساعة ما قريت تعليقك
ياريت بجد تطمنى

غير معرف يقول...

ربنا يكرمك
بس
:)

مجلة الأم الصغيرة يقول...

استفدت أوي من كلام الشخص اللي حكيت عنه و الدال على الخير كفاعله ..ربنا يباركلك يا رب .. اللهم بلغنا رمضان

مدحت محمد يقول...

على فكرة الموضوع ده قريته لحضرتك فى نور الجنة

ولما فتحت مدونتك قريته تانى

كل لما اقراه احس جدا بروحانيات الشهر الفضيل ده

اللهم بلغنا واياك رمضان يارب العالمين

موناليزا يقول...

ربنا يعيينك ويعيننا جميعا على صيام رمضان وقيامه

Hosam Yahia حسام يحيى يقول...

يااااااارب نوصل رمضان قبل مالقطر يفوتنا

ka2en Makboot يقول...

ربنا يجزيك خير يا محمود عن التذكرة
اللهم أحي موات قلوبنا واغفر لي ولوالدي وللمسلمين والمسلمات يوم يقوم الحساب .

فعلا لازم نستعد نفسيا وروحيا قبل رمضان علشان نغتنم ايام رمضان ونفوز بالثواب والمغفرة

اللهم اجعلنا من عتقاء رمضان

ريمان يقول...

السلام عليكم

موضوع جميل تسلم ايدك

اللهم بلغنا رمضان

تقبل مرورى

Zanooba (Zeinab sab9n) يقول...

اولا انا بحييك على الموضوع ..وزاك ربنا عنا كل خير ...و إنشاء الله أستفيد منه و فعلاً القلب الشفاف ده محتاج شغل

Ghada , Rofayda يقول...

اللهم بلغنا رمضان و كل المسلمين يا رب..

مرور اول و ان شاء الله لن يكون الاخير ..

انا كمان علي فكره اكتشفت الموضوع ده .. ان لازم يكون في استعداد لرمضان .. بمعني ان مش اول يوم في رمضان ندخل علي الصيام و علي القيام و التهجد و قراءه القران... لا لاااااازم من قبلها وطبعا عشان الكسل "حاليا" يبقي قبلها من شعبان علي الاقل ..

يا رب ظني بك انك لن تضيعني ..
يا رب بلغني رمضان..

تحياتي علي التذكره .. و التدوينه

Nairy يقول...

اعاني من مشكلة دينية شديدة للاسف طول عمري خصوصا ف السنوات الاخيرة

ضمير عدم المؤاخذة بيستهبل بيهمس ويشاور من بعيد قبل الغلط اللي انا عارفاه كويس ....ويرقع بالصوت الحياني ويلم عليا اهل الحتة بعد الغلط بثانية واحدة

بتحمس اول اسبوعين بالكتير من رمضان وف العشر الاواخر وبنسى نفسي طول السنة....وارجع اقول انا رمضان الجاي لايمكن اضيعه وهاستعدله من بدري وعمره ما بيحصل ...رغم اني طول السنة عارفة ان رب رمضان هو رب كل الشهور


السنة دي ربنا كرمني ووقعت ف ايدك ع البوست الرائع دة

بدأت رمضان من اول ما قريته وناوية اكمل طول السنة كلام رجالة المرادي

كتر الف خيرك وربنا يديك على قد نيتك يا بطوط الكمشان ف نفسه

r يقول...

ى المقال دا انا استفدت منه فعلا لان فعلا الحكاياه دى بتتكرر معايا فى رمضان فى صلاه التراويح وتفضل البنات تعيط وانا مش عا رفه اندمج فى الصلاه اوى لصوتهم بكاهم العالى ومحاوله استحضار الخشوع فى الصلاه
ربنا يكرمك ويكرم الاخ المصلى التانى لان فعلا انا كنت قريت قبل كدا ان دا بيسموه قسوه القلب زى ما الاستاذ دا قال قتل القلب بحاجات تانيه
ربنا يعينا يا رب فى رمضان
سلمت

Mahmoud البطراوى يقول...

مرضتش اعلق لان معنديش كلام انا بس كنت بنقل حوار وانتوا ما شاء الله فهمتوا كل حرف فيه

جزاكم الله خيرا