2009/11/13

اعدل لى رِجْلك



اخر بوست كتته جالى عليه تعليق من نعكشه .. التعليق بتاعها كنت عاوز انشره فى بوست لوحده .. عارف انت لما تشوف كلمه تعجبك اوى وتعرف انك مش هتعرف تجيب كلمه بنفس الروعه دى .. كل اللى بيخطر فى دماغك انك تسرقها وكويس انها جت فى التعليقات يعنى محدش هيعرف
اهو دا اللى خطر فى دماغى بالظبط ...فالكلام اللى جاى دا كلامى ونعكشه ملهاش فيه اى حاجه وانتوا شاهدين
البوست اللى فات بتاعى كنت بحكى عن حاله ان عاوز ارغى من غير كلام .. عاوز اقعد اتكلم مع حد وفى نفس الوقت مقولش ولا كلمه. قامت بقى نعكوشه دخلت وكتبتلى تعليق بتقول فيه قولك

حضرتك محتاج رجل 

 أيوة رجل بكسر الراء و تسكين الجيم
مش رَجُل إنما رِجْل 

رجل حد صاحبك بيحبك او لو والدتك بتحبك تنفع برضو
تنام على رجلها
من غير ما تتكلم 

و كل لحظة وا لتانية تقول
عارف كذا كذا كذا 

اسكت مش كذا كذا كذا


طبعا انا اللى مغششها المعنى دا .. انا فعلا  محتاج رٍجل اعمل فيها زى ما نعكشه بتقول بالظبط وانا هعتبركم فى البوست دا رٍجل .. واللى يزعل يزعل بقى من نعكشه المهم

نزلت اسكندريه بعد النتيجه ما طلعت بكام يوم على اساس انى منها استجم ومنها اتدرب ومنها اشتغل .. كل الناس عماله تقولى يا بنى ايه اللى جاب اسكندريه فى دماغك ااساسا .. يعنى انت طول عمرك فى القاهره .. واكيد هناك الشغل احسن مليون مره وحتى مرتب اعلى ومصاريفك اقل واهو تبقى جنب اصحابك اقل حاجه
وانا معرفش ايه اللى كان فى دماغى غير انى ابعد عن كل حاجه ... عاوز اعمل فى حياتى ريستارت.
بالصدفه البحته اعرف حد فى اسكندريه وهى كمان صيدلانيه - لو عرفتوا اساس معرفتى بيها هتقولى سبحان الله - المهم اتصلت بيها ازيك واخبارك ... بصى انا عاوز انزل اسكندريه عندك شغل.
قالتلى  اتصل بفلانه - اعرفها برضه بنفس الصدفه البحته-

المهم اتصلت بيها وقالتلى ... تعالى انا هسيب الصيدليه اللى انا فيها كمان شهر.. تعالى ادربك وبعدين تشتغل فى المكان اللى انا فيه بجد هيعجبك اوى اوى
حلو اوى الشغل اتحل ناقص المكان ... عملت اتصالاتى انى الاقى مكان مش عارف...بس سبحان الله لقيت عمتى بتقولى فيه فلان هناك بيشتغل ومأجر شقه عشان بيشتغل هناك اتصل بيه وشوف لو عنده مكان.
وسبحان الله اتصل بيه ويطلع عنده مكان وهوووووووووب ارحل لاسكندريه.
اسكندريه بالنسبالى فسحه جميله .. بلد بحبها.. ويمكن بيزود حبى ليها ان كل اللى اعرفهم هناك ناس تتحب .. دا بجانب كل الاسباب اللى الناس بتحب عشانها اسكندريه
اوصل واروح على الشقه والاقى ساكن معاه اتنين ... اول ما يعرفوا اسمى .. ياخدونى بالحضن وازيك وعامل ايه رغم انى اول مره اشوفهم.
دا والدك الله يرحمه كان وكان .. وفضلنا طول اليوم نحكى على مواقف وجمايل ابويا الله يرحمه معاهم ... انا بستغرب من الراجل دا والله .. سبحان الله توفى بقاله كام سنه فوق من 12 سنه اهو ولسه الناس فاكرينه ... ومبيصدقوا يعرفوا انى ابنه عشان يقعدوا يحكوا عن هو عمل ايه معاهم ...ياااااااااه يا ابويا كل ما حد يحكيلى عنك افتكر كلمتك لما كنت بقولك هو الناس كلها تعرفك يابابا ... وانت بتقولى يا ابو حنفى  فاحفظ لنفسك  بعد موتك ذكرها فالذكر بعد الموت عمر ثاني... هو انت كنت عارف انك هتموت قريب ؟ والله بستعجب كل مره ..

عارف انا لما بروح اى حته وبمجرد بس انى اقول اسمك .. يتحول الكلام كله عنك .. يااااااااااه بس انت فيك شبه كبير اوى من ابوك يا محمود وسبحان الله طبعه بالظبط وواخد خفه دمه - طبعا دى حاجه تفخر بيها شيل الجمايل دى بس - طب والله يا ابويا انت بتحرجنى كتير اوى .. بعد ما بقول اسمى بالكامل ..بحس بمسؤليه تجاه اسمى دا .. ومواضيع كتيير بتتحل بعدها سبحان الله

المهم جيت ادفع الايجار حلفوا بالايمان الغلاظ انهم مش واخدين ايجار غير لما اشتغل ... يا شباب عيب .. اصلك متعرفش ابوك عملنا ايه وايه الله يرحمه وفضلوا يحكوا تانى عنك
 وسبحان الله انزل الشغل بقى -التدريب - مع الصيدلانيه اللى كنت بقولكم عليها .. اساسا هى شخصيه تتاكل اكل .. حد كده لما تشوفه لازم تحبه .. وتجربه الصيدليه دى  كانت تجربه تحفه.
اتعلمت منها كتير جدا .. كل شخص اتعاملت معاه هناك دماغ لوحده .. هى حد بيتوتر جدا وبيخاف على الشغل كأنه شغلها .. واللى بتاخد الشفت اللى بعدها شعارها فى الحياه اخربى يا دنيا اعمرى يا دماغى .. حاولوا بقى تتخيلوا كم المواقف اللى تموت  من الضحك اللى بتحصل كل يوم.
ولا عامل الديلفرى.
مره كان واقف والعيان جه وناقصه دوا هنجيبه من صيدليتنا التانيه .. وقلت له بص هنبعت لحضرتك الدوا على البيت ... يا احمد - بتاع الدليفرى- عارف العنوان .. رد وقالى اه دا الاستاذ بيجى كتير وانا عارفه
المهم جه الدوا .. روح بقى يا عم احمد .. خد الدوا فعلا وراح وقف بمنتهى البراءه ادام باب الصيدليه
لقيتها بتسألنى عم احمد وصل الدوا .. قلتلها اه خده بقاله كتير اكيد وصله .. المهم بسأل عم احمد انا مشفتكش اتحركت انت وصلت الدوا امتى ... بكل روح رياضيه عاليه .. ما انت مدتنيش العنوان يا دكتور .. يا بنى انا مش سألك انت عارفه ولا لأ قلت اه
قالى طيب خلاص بقى يا دكتور انا هفضل واقف ادام باب الصيدليه لحد ما ينزل وابقى ادهوله...
انا شخصيا فطست من الضحك على الموقف .. وصاحبتنا بقى بحكم توترها من الهوا فضلت تهرى وتنكت فى نفسها وكل تلات دقايق تنادى عليه كان يوم مسخره
واهو اول 15 يوم مشيوا زى الفل بس الدنيا اتكركبت شويه بعدها

اكمل ولا حستيوا بالملل ... اقولكم انا هكمل بعدين فى بوست تانى
سلاااااااااام



هناك 10 تعليقات:

sweet angel يقول...

تقريبا والعلم لله انا اول مره اعلق عندك

sweet angel يقول...

وتقريبا بردو والله اعلم انا اول تعليق
يعني عملت انجااااااااز

sweet angel يقول...

نعلق بقى
اولا ربنا يرحم والدك ويجعل كل ده في ميزان حسناته
ثانيا
واضح جدا جدا جدا ان ربنا بيكرمك علشانه
ربنا ييسرلك كل امورك
ويرضى عنك ويزكي نفسك
تقبل مروري
تحياتي

سومه...مجنونه فى بلد عاقل يقول...

اخويا اما بيعمل كدا ويعتبرنى رجل ويعقد يحكيلى بصبر اصبر اصبر واخرى معاه نص ساعه وايدى تكتم بقه مخى بيوجعنى :)))
بس هو عموما انت اخدت وقت اقل منه :q
فى انتظار باقى القصه
والانسان اللى بيتقى اللع فى عمله ربنا ديما بيباركله
ربنا ينجحك يا محمود يا رب وتشتغل شغلنتك بقى الحقيقيه ممكن تسميها يوميات اسنانجى فى صيدليه :)

همس الاحباب يقول...

ربنا يوفقك يا دكترة
وبالتوفيق دائما
وربنا يرحم والدك لانه ونعم الاباء
تحياتى لحضرتك

lily يقول...

حمدلله ع السلامة يا Doctor
ايه كل الغياب ده ؟
فكرة ان الواحد يبدأ حياة جديدة بمكان جديد فكرة جامدة ، حضرتك فكرت out of the box
بالتوفيق

غير معرف يقول...

مالييييييييييش دعووه
انا عاوزه الباااااقى وااااااااااااء
اصل انت يا دكتره بتغييييييب اوووى
على فكره انا اول مره ارد على بوست ليك بالرغم من انى متابعه المدونه بقالى اكتر من سنه
بس قولت بقى لااااااااااازم اتشجع واكتبلى كلمتيييين
واللى شجعنى اووووووى انى هرد على بوست بتتكلم فيه عن والدك خصوصا انى لما قريت بوست ليك اسمو جبنه بالبيض تقريبا عنيا دمعت ولحد دلوقتى فكراااااااه اووووى
عااارف انا جدى عامل زى واالدك . الله يرحمهم ويغفر ليهم ويسكنهم الفردوس الاعلى اللهم امييين
كان راااااااااجل غريييييييييب كان دايما مبتسم كانت الناس لما تشوفو جاى من بعيييد على العجله يجرو عليه علشان يسلمو عليه كنت بمشى معاه وانا ماسكه ايدو (وانا مكملتش العشر سنسن) احس ان ايدو حنينه اووووووى حتى الحنيه كانت بتبان فى مسكت ايدو لايدى
كان مدرس رياضياات... تلاميذه دلوقتى بقو ماشاء الله رجااااله بس حتى الان بيجو يسلمو على جدتى وعلى خااالى ..... بجد بستغرب اووى بقول الناس دى كانت بتعمل ايييييه علشان الناس تحبهم كده وتفتكرهم بالشكل ده
ده الاخ دلوقتى بقى يدارى من اخووووه وهو ماشى فى الشارع لو شاف اخوه صدفه
بجد لو تعرف يا ريت تقولى الناس دى كانت بتعمل اييه ؟؟ كانو زيينا كده؟؟؟؟
بصراااحه ......... معتقدش!!!!!!
يلا ما علينا
مستنيه منك البااااااااقى ومتغبش يا دكترره

بطوط حبوب يقول...

اصدقائى الاكثر من الاعزاء تعليقكم هذه المره اسعدنى فوق ما تتخليون

ربنا يخليكم ليا يارب

عصفور طل من الشباك يقول...

حاسة إن الحقيقة إننا محتاجين قلب يضمنا ويحس بينا

pinky يقول...

فاحفظ لنفسك بعد موتك ذكرها فالذكر بعد الموت عمر ثاني.
3agbani awi