2008/04/16

انا الكبير .. واحكموا انتوا


بصوا انا فكرت كتير وقليل قبل ما اقولكم الى هقوله ده بس بجد الحق معايا واحكموا انتوا بنفسكم

الاول هقولكم مقدمه

جدى -من امى - الله يرحمه زمان لما كان بيجى لينا كنت تشوف ازاى امى بتعامله.. اولا كانت بتبوس ايديه ..وتقعد ترحب بيه جامد.. وعايز تاكل ايه يابابا , ونعملك ايه , وروح يا محمود هات كذا عشان جدك , واسكت يا واد واستكى يا بت عشان مضايقوش جدكم ...ولما تحس انه تعبان تقوله متدخل يا بابا تنام فى اوضه النوم ...وتفرش السرير باحسن فرش ..وتجيب له احسن بطانيه ..وحظر تجوال فى البيت كله وكردون ودام اوضه النوم- من غير امن مركز- عشان خاطر جدو ينام


ماشى انا مش معترض امى كانت بتقول عشان جدو كبير وبيتعب من اقل حاجه ومش عايزين نضايقوا ,... الولاد الحلوين يعملوا ايه لما جدو يبقى هنا؟؟!!


وانا زى العبيط اقول يبقوا مؤدبين


اوك مفيش مشكله حقه


جدو بقى كان يتكلم مع ماما يسألها عن سعر اى حاجه تقوله بكذا... يقولها دا انتوا ايامكو سوده يا بنتنى دا البتاع ده كان زمان

بكذا


طن الحديد مش عارف كان ب400 جنيه واللحمه كانت بتتباع بالرطل والرطل كان بقرش ولا حاجه زى كده


هنا بقى نقف واقفه - مش زى بتاعه عوكل - لا وقفه بجد


بصو بقى وركزوا اوى جدو توفى- وهو كام و 70 سنه - كان طن الحديد بكام كان 1300 جنيه- دا يجى من سبع سنين



يعنى من 400 ل 1300 تقريبا الحديد زاد فى عمر جدى الى ه حاجه و70 سنه زاد تلات اضعافه ----------- نسمى دى

واحد


انا شفت الحديد لما كان 1300 ودلوقتى بقى بكام 5800 يبقى زاد كام مره هنقول اربعه اضعاف ؟؟؟


يبقى انا عندى كام سنه؟؟


طرفين فى وسطين يا اخونا


يقولك انا عندى على الاقل كام وتسعين سنه


يعنى لازم امى تحترمنى اكتر من جدى.. انا مش واخد حقى يا جماعه.. ولا حد فيكم.. احنا لازم نطالب اهلينا بحقنا .. احنا مش هفيه.. فى استهبال بيحصل


وانا جبت لكم سلعه واحده لو جبت لكم باقى الكشف هطلع جدى مات وهو عنده 4 سنين وانا عندى 1400 سنه هطلع اكبر من احمس نفسه


انا بقى مسكتش ...لا !! ..انا صرخت وقلت عايز حقى مليش دعوه انا اطالب بالمساوه اشمعنى جدى - الى هو اصغر منى اصلا - يتعامل حلو وانا لأ


لقيت امى قالتلى لا يا فالح انت عشت فى عهد كم رئيس ؟؟


قلتلها واحد


قالتلى جدك عاش فى عهد تلاته يبقى جدك اكبر


هى قالت كده وانا بصراحه حسيت انى اتكبست وخصوصا انى متوقع ان جيلنا مش مكتوب له يشوف حد تانى هنعيش ونموت فى

ظل نفس ال... المهم


بس بعد تفكير عميق قلتلها بس استنى انا اعرف واحد فى امريكا عنده عشرين سنه وشاف تلات رؤساء يعنى جدى مات عنده

عشرين سنه يعنى انا اكبر منه بسنه


وبعدين انا وجدى عشنا فى عهد رئيس واحد فى ليبا يعنى هو شاف لليبيا رئيس واحد ومات وانا شفت رئيس واحد برضه لحد ما اموت


انا مليش دعوه الى هيقرب للباب وانا نايم هولع فيه

انا اكبر من جدى والاثبات موجود وهخده ناس متجيش بالذوق

اهتفوا معايا بطوط اكبر من جده بطوط عايز حقه بطوط اكبر من جده

ايها المدونين والمدونات اذا مات بطوط فكلم بطوط وصيه ليكم طالبوا بحقكم وربنا يعينكم

(طخ ...)

هناك 53 تعليقًا:

فاتيما يقول...

يا بنى ملهاش لازمة الحورات دى كلها
انت موش إسمك بطوط
انت عارف يبطوط دا عنده كام سنة دلوقتى حسب آخر عدد قريته لميكى و كانو بيحتفلوا فيه بعيد ميلاده ؟؟؟
كان عنده 58 سنة ...
يعنى داخل على المعاش اهو
و لسه خاطب الأنسة زيزى اللى أصلها ديزى
و عايش يربى ولاد أخوه المقاريض اللى موش عاوزين يكبروا
و لسه عاطل مبيركزش فى شغلانة
و الزمن واقفله مخصوص و لسه دمه خفيف و حبوب و الكل بيحبه
و ما زال الشخصية الاكتر شعبية فى عالم ديزنى حتى اشهر من ميكى ماوس
فيعنى تنجعص فى سريرك و محدش يهوب ناحيتك
و اللى يكلمك نص كلمة
إبقى طلعله أعداد مجلة ميكى
يتسلى فيها على مهله

Bongo يقول...

أنا كنت سايباك كويس في البوستات اللي فاتت :D

مالك يا بطوط ؟؟؟
حاسس بأيه ؟؟

انت اكبر من جدك اكيد
شوف انت شوفت كام مدونة في حياتك , و هو شاف كام ؟؟ :D


انت لازم تطالب بحقك و متسكتش عليه

و لو جرالك حاجه , ابقي عرفنا علشان نولع في المدونة ههههههه

Moustafa` يقول...

هههههههههههه
اشطات يا صاحبى
ايه القلق الأفحوانى ده
انت لعيب كبير
وحسبات دقيقه .. لأ منطق عالى عالى
وفى إضافات جديره بالإهتمام
بطوط .. ميكى
شفت كام دونه
عجبتنى الحته بتاعه الريس دى
على الحته بتاعه ليبيا
ادبك حلو أوى يا حوده
والمدونه بقى شكلها يفرح النفس
اولان وصور وأفلامانات شديده والله
تشكرات ع الدقايق الحلوه اللى قضتها عندك
واعذرنى ع الكام يوم نقاهه دول
اصل بينى وبينك الحكايه فيها مطلب نسائى بحت .. استر عليا بقه
يلا سلام .. احنا رجاله قوى.. ها

غير معرف يقول...

ايه المعادلة البايظة دى!


خلاص ؟... عمر الانسان بيتقاس بسعر طن الحديد؟!!!


انت كدة بتشقلب الدنيا .. معنى كلامك ان جدك كدة اكبر من جد مامتك
و بما ان جدك سكت عن حقه .. فحضرتك لازم تسير على خطاه و تقعد ساكت .. يا أما ربنا هايبعتلك حفيد لمض اكتر منك .. يطلع عليك البلوجات اللى اللى معذبنا بيها دى !!!


و بعدين يا اخى حرام عليك .. ناقصة انا حسبة بورما اللى انت عاملها دى؟

ارحمنا .. ربنا يرحمك

p-:

بطوط حبوب يقول...

فاتيما
ههههههههههههههههه
ما انا عارف ان الكبير كبير
بس انا بتكلم عن 1400 سنه انتى بتتكلمى عن 5
54 سنه
نورتينى بجد واقتراح اجيبلهم ميكى اقتراح جامد

****************************
بنجو

ههههههههههههههه
حلوه شفت كام مدونه دى
على كده انا اكبر منه بكتيييييييييييير
متخافش مش ساكت لا سكوت بعد اليوم

ههههههههههه ولعى فى المدونه واتكلى ع الله انتى لسه هتنظر

***************************

مصطفى

مش عارف فرحتى بوجدك اليوم لا تقدر بثمن
لو عندى عيال كنت دبحتلك واحد فيهم النهارده من كتر فرحى
ومنتظرين فتح الكومنتات يااااااارب يحصل ده بسرعه


***************************

هيليوم اتوم

لا يا فندم انتى فهمتى غلط
مش عمر الانسان بسعر طن الحديد خالص
انا بقول ان زياده الاسعار لما بتكون منطقيه عادى
جدى جدى الاسعار زادت طول حياته اربع اضعافها
وجدى كذلك
انما انا ولسه حياتى مخلصتش شوفت الاسعار زادت لاكتر من خمسه وست اضعافها

يااااااارب يكون المعنى وصل

وبعدين ان مكنتيش هتستحملى بطوط ؟؟ هتستحملى مين؟؟
هو الدنيا فيها كام بطوط

الساحرة يقول...

كل الهيصه دي علشان تنام


انت الكبير ياعم اوعي حد يزعلك
احسن حالتك بتبقي صعبه

ههههههههههه

لو علي حساباتك دي يبقي انا موت

من زمااااااااان

قيـ ـثارة يقول...

السلام عليكم ورحمة الله وبركاته
اولا دي اول زيارة ليا للمدونة
بدون مبالغة انا فعلا قريت كل البوستات
لما قرأتها كلها حسيت إنى بدخلها من زمان
ثانيا ماشاء الله اسلوبك وطريقة عرضك لأفكارك وذكرياتك جميلة وسلسه
يعنى تقريبا دلوقتى انا اعرف عنك كتير :)
ثالثا ربنا يوفقك في كليتك انا برضه اسمع انها صعبة جدا ربنا معاك
رابعا ان شاء الله دي اول زيارة ومش هاتكون الاخيرة باذن الله

تحياتى ليك

الفارس الملثم يقول...

ههههههه

ايه يا بني مالك بجد , ده كله من تاثير البوست اللي فات ..

دلوقتي ايه وجه اعتراض حضرتك , ان احمد عز الله يعمر بيته تسبب في رفع سعر الحديد كذا ضعف وعن ما حد من الشباب ايتجوز ...ولا ان الرئيس الله يطول عمره خايف يسيب الكرسي خوفا عليه من السرقة فالراجل بيقاسي بقاله اكتر من عشرين سنة وهو مضحي بسعادته عشان الشعب ..

ممكن افهم ايه سبب الهيصة دي كلها مممممم..

طيب سلام دلوقتي لغاية لما نشوف الامور اتطور لايه , شكل الحكاية اتكبر...

الميكروباص يقول...

بعد الشر عليك وربنا يديك طول العمر و العمل الصالح
لكن لو هقيسها بسعر طن الحديد يبقى انا عديت ال 100 سنه وعمري جري في البلد دي خلال سنه واحده 10 سنين
ربنا يعافينا

Empress appy يقول...

هى بقت كده
انت يا بنى بجد عبقرى انا قولت اسمه بطوط وضرس يبقى اكيد عبقرى ارحمنى يا رب انت مش عارف تاخد حقك
فبتفوت فى البيت
تصدق والله ماما لها الجنه بسببك انت بجانب عملها
طيب بزمتك انا يبقى عندى كام سنه دا لو انا حسبت هبقى سنى اكبر من خوفو نفسه سا نهار ابيض
عموما انا فتحت عياده نفسيه تعالى اعالجك لو اللى عامل فيك كده اسم عربيتى يعنى اممممممممممممم انا موافقه انك تغير اسمك وانت لا ههههههههههههههخخخخخخخخخخخخخ
لا بجد لو الحساب هيمشى كده يبقى فعلا ده ظلم اللى بيحصل لينا فى الارتفاعات اللهى ربنا يرفعهم عنده كلهم يا رب
قول امين ولو حصل ليه حاجه ميسدات بقى على مارينا

(احمد سكر ) يقول...

والله زى العسل يابطوط

وجهةنظر بردو

اننا نقيس عمرنا

بالاسعار

وبالرؤساء

تحياتى

احمد

shahy يقول...

هههههههههههههه
ههههههههه
هههههههه

اة يامزعج
ايوة مش محمود تبقى لازم تبقى كدة
كل دة علشان حقك في النوم
اوعى تكون كمان عاوز مامتك تبوس ايدك ههههههههه
اجري يا بطوط العب بعيد

تحياتي وسلام كبير اوي لمامتك وقولها قلبي عندك وربنا يكون في عونك ويقويكي على بطوط اللي دماغة عالية اوي

همس الاحباب يقول...

يا عم ولا تزعل نفسك انت اكبرمن جدك وربنا يديك طولة العمر وتعيش وتشوف اربع رؤساء كمان مع انى دى ما اضمنهاش بصراحة
بس تهييسة خفيفة ودمها شربات
تحياتى ليك ياللى اكبر من جدك
خالد

رئـــــيسـة حزب الأحلام يقول...

السلام عليكم
ازيك يابطوط اية الاخبار الموضوع جميل وقول للزمان ارجع يازمان
تقبل مرورى

بطوط حبوب يقول...

الساحره

لا كل الهيصه دى عشان اخد حقى؟؟
حقى ولا مش حقى
وكله بالقانوووووووووون

ههههههههههههه
نورتينى

******************************

سمسه

وعليكم السلام ورحمه الله وبركاته

اولا منوره وان شاء الله متنكش اخر مره
يااااااااااه قريتى كل مدوناتى الى قبل كده
اوعى اكون صدعتك
واهلا بيكى صديقه جديده

ثانيا مش عارف اشكرك ازاى
ثالثا تحياتى ليكى

******************************

الفارس الملثم

يعم يعنى يرضيك كده عايبز اخد حقى فى اى حاجه مش لاقى غير امى
بس برضه مش هسيب حقى
هههههههههههههههههههه
انا حاسس انه هيطور انها تطردنى من البيت

******************************

لورنس العرب

ربنا يديك العمر
بس من حقنا طالما كبرونا قبل الميعاد نطالبهم بحقنا
صح ولا ايه؟؟

******************************

آبى

بطوط وضرس؟؟
مش عارف اعمل فيك ايه
وماما ليه الجنه ان شاء الله بس تدينى حقى
انا عمال اطالبها هو اما نشوف هتعمل ايه؟؟

وبعدين الاوبشن ده للولاد بس مش هيطبق على البنات
هههههههههههههههه
ومش هغير الاسم وهعرف عنوان جراج بيتكم ومتعرفيش هعمل ايه فى العربيه
انزلى اقعدى جنبها عشان لو عرفت مكانها متعرفيش هعمل فيها ايه

******************************

سكر

والله انت الى زى السكر
امال نقيسها ازاى نسبهم يخمونا؟؟
وكله بالقانووووووووووووووون

تحياتى

******************************

شاهى

ليه مش عايزانى اطالب بحقى
حقى فى النوم
وبوس الايد ده هههههههههههه لا موصلتش للدرجادى
بس تسيبنى انام خلاص

وامى بتسلم عليك وبتقولك ادعى جامد

******************************

همس الاحباب

طوله العمر واشوف اربع رؤساء
اظن محتاج نبى يدعيلى مش مجرد راجل صالح

تحياتى ليك

******************************

رئيسه حزب الاحلام

ارجع يا زمان
يااااااارب يسمع الكلام

غير معرف يقول...

مش عارفه اقول ايه بس.الفكره ولو ان شكلها سطحى الا انى شايفاها بتناقش مشكله كبيره اوىىىىىى ببساطه شديده... ياسلام لو ناخد كل امور حياتنا ومشاكلنا بالبساطه دى ... هى المشاكل مش هتتحل بس يكفى انك هتعرف تتكيف معاها وتخرج من اصعب المواقف بموقف كوميدى على غير المتوقع

طبعا تعليقى مالوش دعوه بالموضوع كالعاده

تعرف انا جه فى بالى دلوقتى فكره بلوج عن التعامل مع المشاكل وعشان كده شلت جزء كبير من تعليقى هنا ..تانى مره تحصل على فكره اكتب تعليق ويطول منى اوى فأحذفه واقولك انى هكتبه فى بلوج

غير معرف يقول...

انت الكبير طبعا

صاحب المضيفة يقول...

دا احنا على كده عواجيز قوي بمقياسك ياعم بطوط

ربنا يرحمنا ويحسن الينا


تحياتي

Ahmed Al-Sabbagh يقول...

مالك بس يا ابو البطابيط

:))

هدى نفسك

تحياتى لك

احمد الصباغ

غير معرف يقول...

هههههههههههههههه
اهي دي جامده جداااااااااا
هدي نفسك ياابني عشان الشن
له حكمه

Unknown يقول...

هههههههههههه
الله يرحمه ويسامحك انا مبحبش اللى يقفلها فى وشى
انا هعيط انا لسه فى 3ثانوى وبفكر هعمل ايه السنه دى واخش كليه ليه وهشتغل ايه بعد التخرج وهتجوز امتى
دا انا حتى سميت العيال اللى هجيبهم يعنى كل حاجة فى دماغى سهلة بس كل ما أفوق بحس ان انا عاوز اعيط
سيبونى اعيط
اااااااااااااااااااااااا

aya يقول...

والنبى يا محمود انت رايق وفايق

يا عم نام فى الاوضة ولو حد عمل دوشة سيبلهم البيت وانزل

وبعدين العمر يتحسب بالخبرة
وديه اكيد بقى جدك اكبر فيها


ربنا يوفقك يا سيدى
ويديك طولة العمر

ويرحم جدك
ويصبر مامتك

*سمر* يقول...

هاهاها ...بجد اسلوبك خطير ..
وبتناقش الكلام وتقلب فيه كده بطريقة وهمية ..وبتتناول نفس المواضيع الى كل يوم نسمع عنها ..بس ايه ... بطريقة مميزة جدا جدا ..

تحياتى ليك على بوست ده ..
والختام ..سلام :)

wa7di-ofakker-137@blogspot.com

lonely يقول...

معقوله يا جدو الحديد وصل للرقم ده
ياخبر أبيض
طيب ما احنا كده اللى خسرانين يافندم
واضح ان حضرتك اللى عملت الفرق الكبير ده

الواحد مش عارف فى حياتك هيحصل ايه تانى
P:

سلام يا جدو

الميكروباص يقول...

يا بطوط انت كبير في المقام، وسيبك من الحديد

Mafrousa يقول...

ده انت حكايه و الله ..موضوع قوى جدا انت بتجيلك الافكار القويه ديه منين ...اه نسيت انت عندك حاجه و تسعين سنه انا آسفه يا جدو..
و بعدين الطاخ اللى فى الاخر ديه حموت و اعرف هيه ايه....و بعدين يا بطوط انت بتتكلم فى الحديد ليه يا بابا...ما بلاش
عارف يا بطوط انا عندى فاتوره من شهر 12 اللى فات فيها فاتورة علبه اللبن كانت ب 4.5 اليوم بعد مرور 4 اشهر كامله بقت ب 7.25 يعنى زادت 2.75 فى 4 شهور ده يعنى ان شاء الله بعد عمر طويل و لما يجو اولادك علبة اللبن حتكون زى سعر كيلو اللحمه دلوقتى اللى هوه......كتييييييييييييييييييييييير
يالهوى ده احنا حنعدى علينا ايام ما يعلم بيها الا ربنا ...بطوط انت قلبت عليا المواجع
اختك مفروسه من محافظة 6 اكتوبر الجديده....و يجعله عامر....بكره الشارع بتاعكم حيبقى محافظه

Mafrousa يقول...

ملحوظه
------
انت ماينفعش تجمع اولادك التلاته سوسو و لولو و توتو اللى همه مدوناتك فى حته واحده انا تعبت يابنى مابين التلاته رايحه جايه ...ابقى دور على طفطف للزوار

غير معرف يقول...

ربنا يسامحهم
هما من ساعه مرشو الفول المدشوش بلمبيدات والبط بتاعنا بقي يخرف وجلاسات الكهرباء غاليه ومستشفي المجانين بتسرحهم دلوقتي
هلاقيها منين ولا منين بس يارب
المفروض اننا مرشحه انتخابيه واعول كل البط بتاعي هلاحق منين ولا منين بس
يعني انت ازمتك في سيخين حديد علي سدادتين ودان
يابني احنا شدينا سقف الشقه بتاعتنا ب25 الف والله السقف بس
يلا مهي خربت
بس والله بلوج لذيذ يابو البطابط
خلي بالك الانتخابات بكرة عايزاك ترشحني
بطابيطو ترمس

د/اجدع بنوته يقول...

بطوططط اكبر م جده

بطوططط عايز حئه

عسل يابطوطططططط

والصوره البطوطيه ده سكرررررر

كان فيها بطوط خارج م مجاعه ولا ايه

ههههههههههههههههههههههههههههه

واحد من البلد دى يقول...

يا سيدى ما تزعلش...بس أنا خايف أقول عليك..أكبر من جدك...يروحوا مخصخصينك...وتدخل بقى فى مواضيع من بتاعة(باتا)و(عمر أفندى)..خليك صغير أحسنلك...وإنت يا سيدى كبير المقام..وبما أن الرئيس -أى رئيس-لا يراه الشعب ..فيجب علينا أن نهتف للرئيس الحالى ونقول بالفم المليان..........يعيش الرغيف...يالا ورايا..يعيش الرغيف..يعيش الرغيف....هههههههههه

موناليزا يقول...

ده طلع اننا كلنا كبار اوى واحنا مش واخدين بالنا
ايه الحسابات الجامدة دى
بس انا عندى ليك حل كويس انت قبل ماتنام اكتب ورقة والزقها ع الباب واكتب عليها ممنوع الازعاج طبعا لو عازين يصحوك مش هيهتموا بالورقة وده اكبر دليل انك كبير وبتعرف تقرا وتكتب وهما لا ههههههههههه

دودو في كي جي تو يقول...

انا بحب بطوط

بذرة امل يقول...

عندك حق يابطوط
الواحد زهق ياخى
نفسه يغير
نفسى كدة اشوف وجه جديد
بس المشكلة مش فى التغيير
المشكلة ان اللى هيجى ده هيكون افضل منهولا انيل

بطوط حبوب يقول...

روز

انا لى 50% من الفلوس الى تيجى من كتاباتك
بما ان انا الملهم بتاعك
ويا ستى نحن نكتب ما نريد بالطريقه التى نحب ان نقرئها بها
والله حلوه

*******************************

اعترافات انثى

شكرا ونورتينى

*******************************

صاحب المضيفه

احنا عواجيز جدا وده بجد مش تهريج

*******************************

احمد الصباغ

يا عم بقى حاجه تقفع بجد
الواحد حاسس انه كبر مليون سنه
نورتنى بجد وشكار جدا لزيارتك

*******************************

مادى

هههههههههههههه
انا مهدى نفسى على الاخر اصلك مشفتنش وانا متعصب

*******************************

sasatifa

انا معرفتش اكتب اسمك بالعربى هو ايه بالعربى ولا بيتقرى ازاى
المهم ما علينا
شرفتنى باول زياره وان شاء الله متكنش اخرهم
ويا عم ملكش دعوه بموضوع السن ده
اصلهم لسه هيطبقوه بعد ما انت تاخد الثانويه
هههههههههههههههههه
ولا يهمك

*******************************
ايه

انا رايق روقان جامد
هو حد واخد منها حاجه
بس بجد احنا شفنا كتييييييييييييير اوى وحاسس اننا كبرنا كتييييييييييييير اوى
حتى اكتر من جدى
ربنا يسترها

بطوط حبوب يقول...

سمر

ربنا يخليكى يااااااارب يا رفاعه روحى المعدنيه
تحياتى ليكى

******************************

فاطمه

لا والله الحديد ده مش انا السبب فيه
هو الى كده
الى يسامح الى كبرونا قبل معدنا

******************************

لورنس العرب

ربنا يخليك

******************************

واحده مفروسه
اهو الافكار بتجيلى لما بنزل اجيب لبن او اروح اجيب لحمه
رغم ان غالبا امى الى بتعمل كده

مدوناتى اتنين بس
وكل واحده ليها طريقه مختلفه تماما عن اختها
وبصرحه خايف اخلط الاتنين ع بعض يقوم الناس يستغلثوها

*******************************

بطابيطو

هو العيب فى الفول
متخافيش رشحى نفسك بس واحنا وراكى انا خلاص حسيت ان محدش يقدر يمثلنا غيرك
رغم العار الى هيجى العيله
بس يخرب بيت العيله عشان خاطرك

نورتينى فى عشتى الجديده

*******************************

داجدع بنوته

ههههههههههههههه
كان خارج من ماطلبه بحقه

*******************************

واحد من البلد دى

هههههههههههههههه
تصدق يعملوها

*******************************

موناليزا

هههههههههههههههههه
فكره جامده مووووووووووت رغم انى مش هعرف انام برضه

******************************

دودو

نورتنى

**************************

بذره امل

نفسك تشوفى وجه جديد
عليك وعلى الفوتو شوب
انما فى الحقيقه مستحيل

NilE_QueeN يقول...

دا كلام كبير اوى

صيدلانيه طالعه نازله يقول...

انا حاسه انك دخلت فى زنقه الامتحانات والا ماكنش حيحصلك كده
ياعم انت الكبير و لا يهمك
الكبر مش بالسن يابنى الكبير بالتجارب اللى شافها و احنا الحمد لله عايشيين فى بلد كلها تجارب و حكم و احنا جيل شاف اللى محدش شافه
يعنى انت كبير و كبير الرحيميه كمان
سلااااااااااااااااام

صحفية روشة يقول...

اهتفوا معايا بطوط اكبر من جده بطوط عايز حقه بطوط اكبر من جده

جامده يا مان
والله كنت هموت من الضحك

مبروك
انت فى لوحة الشرف
ابقى زورنا وانت تفهم

الـسـيـدة نـون يقول...

هو الطبيعى انك تكون اكبر من جدك
لكن الغير طبيعى ان مامتك تكون اكبر منك
غريبة الحكاية دى

سلام
اختك خيخة

بنت مصريه يقول...

يا صباح التهيييييس
انا تهت يا بطوط توهتنى يا راجل
بس واضح انك بتخاف م ال.........
عادى يا عم ما كلنا بنخاف من ال.......
واللى بيعملوه ال.......
يارب انصرنا على ال........
صباحو تهييييس ههههههه
احييك

نسيـــــــان يقول...

اخي العزيز :
استطعت ان ترسم ابتسامة على محياي لم يستطع احد لا من قريب ولا من بعيد ان يرسمها
ذكرتني في عمي لما كان البيت ازا وقعت ورقه على الارض الكل يحس بيها في حالة نومو .
الله بيعين اخرتها بتنحل يا اخونا
وين بدها اتروح هلازمة اخرتها محلول و ان ما انحلت
اييييييييي بدي احلحل عضامهم للي كانو السبب

Asmaa mahaba يقول...

انا حمشى من هنا قبل ما الفكره تدور فى دماغى واقتنع
تحياتى ليك سومه_87

Unknown يقول...

ههههههههههههههههههههههههههههههههه

زى العسل يابطوط

شكلى حاجز كرسى عندك بس المشاريب عليك

Hosam Yahia حسام يحيى يقول...

طبعا انتا الكبير يابطوط باشا

Ehab يقول...

بطوط اكبر من جده
باااااااااااااااطل باااااااطل
جواز بطوط من فؤاده باطل
لا استنى مش دي ده فيلم تاني
بطوط اكبر من جده بطوط اكبر من جده

هي الحسبه اللي انت حسبتها دي فكره عبقريه جدا ازاي مخدناش بالنا منها اراهنك هتلاقي البوست ده مسروق ومبعوت للناس كلها على اليميل بعد شويه هههههههههههههههه

لا بجد طلعت دماغ يا بطوط

بس بطل تعلق الأول عند الناس وتروشني
التعليق الأول بطوط والتاني والتالت وهيجيب الرابع ويا سلاااااااااااااااااام

سعدت بمعرفتك

khobayb يقول...

هههههههههههههههههه
هههههههههههههه

انت رائع

وأنا معاك قلبا وقالبا

انت أكبر من جدك

ولو حسبتها بالعيش

هتلاقيك أكبر من جد جد جدك !

غني يابهيه يقول...

والله معاك حق ده احنا طولنا اوى
ده الواحد بقاله قرون عايش

bastokka طهقانة يقول...

مدونة هايلة
احب انا الافكار المطرقعة

الى الامام مع ان البلد ترجع للخلف


اوروفوار

ftafeet يقول...

ياحلاوه ياولااااااه
ده العلام حلو برضه

معلش ياخويا بماانى ساقطه حساب فامعرفش وكمان بحساباتك دى بماانى انى عجوزه والسن بيحكم فنا مش فاكره حاجه

انت مين؟ انا فين؟؟؟ انا مين ؟؟؟

ايه ماشى انا عجبتنى البوست اوى على فكره

بااااااااااااى

نونااا

أم أحمد يقول...

بقي كل الحدوتة دي عشان تنام من غير ماحد يدخل عليك
ده انت دماغك متكلفة
انت عايش في ليبيا مالنا احنا ومال ليبيا يابطوط

la3lahakhier يقول...

يعنى فيى علاقة بينك وبين جدك وبين ارتفاع اسعار البط؟
افهم بس

بطوط حبوب يقول...

نيل _كوين

مش للدرجادى

******************************

صيدلانيه طالعه نازله

اهو ده الى انا بقوله
احنا دقت على دماغنا اكتر من جدودنا صوح ولا ايه؟؟
هههههههه وحلوه كبير الرحميه دى
ووالله مذنوق فى الامتحانات ادعيلى

******************************

صحفيه روشه

سلامتك من الموت انما لو كان من الضحك خلاص زى بعضه
وشكر خاص ليكى على لوحه الشرف
بجد اخجلتم تواضعنا

******************************
بنت خيخه

لا غريبه ولاحاجه احنا فى زمن العجب

*******************************

بنت مصريه

مساء التهييس
اوعى تتهوى تانى
نورتينى

*******************************

نيسان

سرورى بسعادتك لا استطيع وصفها
تحياتى لك وازال الله همك

******************************

سوما _87

ههههههههههههه
خليها تدور احنا عايزين حقنا

******************************

m5m

انت الى عسل
والمشاريب على حسابى
نورتنى

*******************************
حسام يحى

ربنا يكرمك

*******************************
الشنكوتى الكبير

باااااااااطل ايه يا عم انت
ايوه كده انا اتخضيت بحسب الكومنت كله باااااااااااطل

ياااااااارب ما يتسرق البوست لانها بجد حاجه بتخنقنى اوى

وبعدين بلاش حقد انا طلعت الاول والتانى والرابع اثبت نفسك واطلع زيي
ههههههههههههههه
انا اسعد بمعرفتك
ان شاء الله نكون اصدقاء

*******************************
خبيب

هههههههههههههههه
كفايه اكبر من جدى دلوقتى

******************************

غنى يا بهيه

هههههههههههههههه
نورتنى

*******************************

طهقانه

البلد ترجع للخلف واحنا طالعين للامام
ربنا يستر

*******************************

فتافيت

كلنا ساقطين فى الحساب
بس الحق حق
نورتينى

******************************
ام احمد

ليبا مصر الحق حق ولا ايه؟؟!!

***************************

لعلها خير

اكيد فى علاقه
ايه العلاقه؟؟!!
اكيد شريفه بس مش عارفها
نوتينى

غير معرف يقول...

هههههههههههه... انت لو حسبتها مع كل البضاعه يا بطوط .. هتعرف ان الجيل بتاعنا دا

ايون

احنا يعنى

احنا انسان الغاب طويل الناب

ههههههههه

هتلاقينا طرزان والانسان الاول

ومش بعيد هتلاقينا الفراعنه كمان


يعنى لازم نتنفخ كدا ونتبعجر ونقول

احنا المصريين

بل احنا القدماء المصريين


يعنى السياحه اللى انضربت دى ... جايه تتفرج على اعمالنا احناااااااا

هههههههه