2011/09/03

نور 2




احيانا بتكون شايف نفسك حزين .. فتبقى حزين .. ساعتها قلبك بيدق الدقه الممله دى وبتحسه تقيل اوى فى صدرك .. متعرفش اذا كان بدق بسرعه ولا بيرتعش ولا في ايه .. المهم انك بتحسه تقيل.
وفى عز لحظه زى دى يجيلك تليفون .. تضحك اوى من قلبك .. قلبك يبطل دق ويتنطط  وكأنه فرحان يمكن لانه حاسس ان الصوت اللى كان طالع كان صوت سعيد.
اهو دا اللى حصل من اسبوعين تلاته.
اتصلت نور تسأل عن حاجه  .. بس معرفش ازاى قدرت تستدرجنى انى احكى عن ذكريات اياااااام فاتت .
تصدقى انى فعلا عمرى ماكنت حزين .. وانى مش لايق على ملاحمى انى اعمل حزين .
يخرب بيت مخك فكرتينى بحاجات كنت نسيتها من زمن .. انا فاكر اول بنت حبيتها زماااااان وانا فى تالته اعدادى .. وعمرنا ما اتكلمنا مع بعض .. كان عندنا اى ولد يكلم اى بنت يبقوا الاتنين قليلات الادب .. بس انا كنت مخطط ادخل صيدله بقى وهى تدخل بشرى ونتجوز .. وفى السنتين الفرق دول اكون ظبطت امور .. عارفه الحلو بقى انها دخلت تجاره وانا دخلت اسنان وانقطعت اخبارها ... كانت زى القمر تصدقى .. ومعرفش فين اراضيها دلوقتى :)).
وفاكر اول بنت حبيتها فى الكليه .. يا نهار اسوخ على المسخره لما رحت قابلت ماماتها وانا لسه فى اولى كليه .. وعشان جو الاكشن يكمل كانت يومها عامله حادثه ورابطه عنيها وكان منظر ابن لذينا .. كل ما افتكر الموقف دا اقول يخرب بيت الجرأه اللى كنت فيها .. لما رحت قلت لها انا بحب بنتك وعاوزك تبقى عارفه ولو ينفع اتدم معنديش مانع  ... وكل ما افتكر عمى الله يرحمه وهو بيشجعنى اروح اتقدم وبقى مؤمن بقضيتى .. وفى الاخر فهمت انه مرضيش يقولى ان دا عبط عشان كان متأكد انى مش هسمع كلامه فقال يجارينى واكيد اهلها كده كده مش مجانين يعنى عشان يوافقوا نتخطب من اولى كليه... وفضل يتريق عليا فى الموضوع دا لحد ما مات الله يرحمه .
وفاكر كمان وانا فى الكليه وكان ليا زميلات كتير .. وقمت فى مره قفشت عليهم كلهم وقلت لهم انا مش هكلم بنات تانى .. يا نهار منيل على الاحراج .. كل ما افتكر الموقف دا وشى يحمر لحد دلوقتى .. انا كده حسيستهم اننا كنا صيع والحقيقه مكانتش كده خالص ... هيبرت الموضوع بشكل بشع .. ولما بشوف ناس غشيمه فى التعامل مع الناس وفى اظهار الصح والغلط بفتكر الموقف دا جدا .. وخصوصا ان مكنش فيه مبرر له ابدا.
انا فاكر اول لقاء مدونين رحته .. كان فى بنوته هناك رقيقه جدا وكنت اعرفها من زمان شات بس .. وفاكر انها كانت بنت محترمه اوى اوى .. ويوم لقاء المدونين خدت رقم تليفونى من صديقه مشتركه .. واتصلت بيا بعد كده .. اظن انها لحد النهادره مش متخيله انها عملت كده .
فاكر انها اتصلت بيا مره وبعدين حست ان دا تصرف غلط انها تكلم ولد فى التليفون .. فادت رقم تليفونى لصاحبتها .. شافت ان العلاقه لو كانت فى جروب هتبقى مش غلط اوى .. يا نهار الوان .. تعرفى ان مكالمه التليفون بنت اللذينا دى غيرت تاريخى كله .
قصه حب وقصه شغل وقصه سنتين تلاته مكانوش مستحيل هيبقوا كده الا بعد مكالمه التليفون وعزومه البيتزا بتاعه كليه علوم دى :)
كل دا بدأ بفضول مكالمه .. ايام من اجمل ايام حياتى عيشتها بعد المكالمه دى .. وايام من اسوأ ايام حياتى عيشتها بعد المكالمه دى :))
انا اول مره اكتشف دلوقتى وانا بكملك انى مش حزين .. انا مش حزين بجد .. يا نهار ابيض على صندوق الذكريات دا .. انا افتكرت ان الحزن مش بيليق على ملامحى ابدا .
ياااااااه يا بت يا نور فكرتينى بحاجات وايام .. طب تصدقى والله العظيم انا خرجت من المود تماما ..والله بجد اانا مينفعش اكتئب .. طب عارفه هقولك حاجه لو فضلت مش مكتئب كده اسبوعين وحسيت انى تخطيت مرحله الحزن دا
هكتب بوست فى المدونه وهجيب سيرتك وهشهرك فى مصر والعالم العربى :))
اقفلى يا فقر عشان اقوم اشوف اللى ورايا ... وحولى بقى من المستشفى دى عشان انا زهقت منك .. اه وابقى دورى على قصيده لعلى سلامه  .. فيها جمله هى بالظبط انا 
" والحزن نشن ماجتش فيا"
بت يا نور شكرا بجد وربنا يخليكى :)

هناك 6 تعليقات:

رحلتنا في الحياة يقول...

ياخسارة كنت عايزه ينشل ويجى فى دماغك بالظبط P:

sony2000 يقول...

هههههههههههه

ياعم احمد ربنا بقا

تحب تاخد شويه من عندي؟

محمد فاروق الشاذلى يقول...

فعلا يا محمود الحزن مش لايق عليك وكويس قوى إنه لما نشن ماجتش فيك، حاول تخلى مخك مايضفيش تفاصيل كتير فى موضوع نور علشان تشوف بكره كويس بدل النشان ما يجى فى قلبك المرة اللى جاية.
تحياتى

غير معرف يقول...

-نوووووووووووووور ايه اللى جابك يا نور؟

-عليش خد مكانك فى كل حتة يا سعيد حتى فى البيت

غير معرف يقول...

مش عارفه اعلق بايه
بس بجد يابختك انك قادر تحكي دايما اللي في بالك

نفسي ابقي كدا واكتب اللي عايزاه من غير خوف

يابختك

غير معرف يقول...

السلام عليكم
كلامك جميل جداوروحك حلوه
وربنا يديم عليك الابتسامه والفرحه
وليا رجاء عندك
لو شفت العيسوي قوله نورالهدي بتسلم عليك