2008/05/07

كنت قاصدنى ولا قاصد ماما ياريس؟؟


الاول كده وندخل فى الموضوع ع طول


الريس قال فى علاوه ماشى؟؟


انا طبعا فرحت وكل افراد الاسره وانا اشهد ان الخدمه هنا ممتازه


بكل براءه طلبت من امى انها تزود المصروف حلاوه العلاوه


الغريبه انها وافقت وقال يااااااه من عنيا بص يا محمود عشان انا بحبك انا هقسم الزياده بينى وبينك وملكش دعوه باخواتك

- الظاهر انها كانت بتورطنى - اكيد كانت قاصده


انا طاير من الفرحه يااااااه ياماما شكرا ليكى - معلش عبيط وقليل الخبره


وبينى وبين نفسى شكرا ليك يا ريس


نحسب العلاوه تطلع هنزيد 50 جنيه


يعنى انا نصيبى كام ؟؟ عليكوا نور 25جنيه مصرى .....رضى


ال ايه تانى يوم الاقى الراجل الطويل بيقول انهم غلو كل حاجه


ماشى يا برنس وايه يعنى ما انا مصروفى زاد واحنا ناس كبيره اوى


تالت يوم وانا رايح الكليه الموصلات غليت زادت بالنسبه لى انا جنيه وربع كل يوم وده رايح بس وزيهم جاى


لانى بركب تلات مواصلات واحده زادت .75 والتانين زادوا ربع جنيه


يعنى جنيه وربع فى 26يوم فى الشهر لاننا شغالين ست ايام مش خمسه فى الاسبوع


يطلعلك بالصلاه على النبى انى هصرف زياده 65
نخصمهم من 25الجنيه الى ختهم يبقى مصروفى نقص كاااااااااااام؟؟؟
صح 40 جنيه

طبعا رحت قلت لماما كده انتى خصمتى من مصروفى 40 حنيه مش زودتيه 25 حنيه


قالتلى مليش دعوه وانا هجيبلك منين مش احنا قسمنا الزياده سوا وسبنى انا احسبها اصلها خرمت معايا انا كمان جامد احمد ربنا انها جت معاك على 40 جنيه


وصرخت فى وشى -كان الله فى عونها الصراحه مش عارف هتمشيها ازاى


انا قلتها لا طبعا مش هنهرج الريس استهبلكم تيجى تستهبلنى انا ؟؟؟


ثم هو كان قاصدكم انتم مجبش سرتى انا


قالتلى لا هو طلع لسانه للعشب كله


قلتلها لا ليكم بس انا مليش دعوه


حد شافه طلع لسانه للطلبه؟؟؟

ودلوقتى عندى سؤال اعزائى المدونين

الريس كان قصدنى انا ولا قاصدها هى؟؟


انا معنديش مشكله انه يطلع لى لسانه - دا لسان الريس برضه - بس انا عايز اعرف لما طلع لسانه كان قصدنى انا ولا قاصد امى

معلش اصلها هتفرق


دا ممكن اخد منها ال 40 جنيه لو طلع كان بيطلع لسانه ليها مش لى

ابوس ايديكم ركزوا الريس - ايوه الريس - طلع لسانه للطلبه ولا الموظفين


ربنا يخليكو ركزواا




***

فى موضوع تانى على بطوط لما يقول ابقوا شوفوه


ودعواتكم فى الامتحانات ومازالت متوقف عن الكتابه بس ده طق فى دماغى



هناك 59 تعليقًا:

واحدة مفروسة يقول...

بطوط........كان قاصدنى انا يا بطوط
و كان قاصد عم احمد البواب
و ام الهنا اللى بتيجى من آخر الدنيا علشان تساعدنى
كان قاصدنى انا يا بطوط....ذاكر انت بس و ربنا يخليلك الست الوالده يارب و تفرح بيك

انين الحزن يقول...

بطووووووووووط

ازيك ياحوده عامل ايه في المذاكره

قشطه ياعم ماشيه معاك علاوة قصدي حلاوة


بس من وجه نظري الريس كان نفسه حد يقطع لسانه

لو جرالي حاجه ابقي افتكرني

حاول يعني

سلاموووووووووز وربنا يوفقك وترجعلنا وانت ناجح

وزة

appy يقول...

كان قاصد كريم بيومي هههههههههه
ماما وانت والتاس اللى فى العشوائيات ركز فى مذكرتك ربنا معاك ومعانا

Salma Amer يقول...

اولا ربنا معاك في المذاكرة والامتحانات ويارب يوفقك
ثاني حاجة نورتني بتعليقك الجميل عندي
أما بقى للحسبة الصعبة دة فعلا هي زي البيضة والفرخة لو عرفنا هي البيضة الأول ولا الفرخة ممكن نعرف نجاوب على سؤالك

تحياتي

فاتيما يقول...

لأ يا بطوط عيب عليك أنت بتظلم كدا
يعنى هوه ضغط على الحكومة عشان تدينا ال 30 % طب يعمل إيه أكتر من كا يعنى
كونهم بقى طلعوا وحشين شريرين هوه ذنبه إيه بلاش افترا بقى
المهم شد حيلك بس فى المذاكرة
مستقبلك هو الأهم و بكره تعدل انت و كل زمايلك و اللى زيك الدنيا المايلة دى

A.SAMIR يقول...

السيد احمد عز ملك الحديد قال ان الناس لما بتربط زيادة اسعار الطاقة بزيادة اسعار السلع والخدمات دة نوع من الفلكولور المصري
يعني الاتنين مالهمش دعوة ببعض
ابو الحديد قال كدة
انت بقى رأيك ايه؟؟؟؟؟؟؟
تحياتي

خمسة فضفضة يقول...

السلام عليكم ورحمة الله وبركاته

شوف يا محمود يا ابني يا حبيبي مش مشكله الريس كان قاصد مين المهم واللي عاوزه اعرفه دلوقتي اللسان اللي في اول البوست
ده بتاع مين ؟؟؟؟ماهو مش معقول يكون لسان الريس لكذا سبب
اولا دا قصير
ثانيا اللسان ده مشقق وشكل صاحبه عنده نقص فيتامينات وانيميا ومش معقول يعني يبقي ريسنا حبيبنا عنده انيميا ولا مش عارف يجيب كام شريط مقويات ياخدهم ويهتم بصحته
يبقي السؤال اللي بيطرح نفسه دلوقتي
ده لسان مييييييييييين ؟؟

:-)

Wael يقول...

انا مختش بالى بصراحة من المشهد بالتفصيل , مش عايز اظلم الراجل D:

ربنا يوفقك (:

لماضة يقول...

ههههههههههه
لا يا بطوط ده كان قاصد محدودي الدخل
اللى انا بتزعهمهم حاليا ولله الحمد
انا لسه كاتبه موضوع عن الحكايه دي
بس انت غلبتنيى
والله انت سكر

الفارس الملثم يقول...

ولا يا محمود هم يضحك وهم يبكي ..

الناس لما سمعت خبر العلاوه كان ناقص تعمل زي انور وجدي وفيروز وتغني معايا ريال معايا ريال ..

وزي ما قلت لو حسبتها اتلاقيها خصم من المهيه مش زياده

ربنا يوفقك في الامتحانات يا محمود

سلام يا باشا

مفقوعة مرارتي من حماتــــــــــــي يقول...

هاتفرق أيه معاك يابطوط
ماهي العلاوة دي طربقت علي دماغاتنا كلنا
بس اللي يغيظ بقي أنه مش كله أخد العلاوة بس كله عاني من الغلاء
خلي بالك انت بس من مذاكرتك وشد حيلك عشان وحشتنا وعايزينك لما ترجع تاني تبقي راجع مبسوط
ربنا معاك

Noha El-arabi يقول...

كان قاصد
كان
كاااااااااااااااااااااااااااااان
قاااااااااااااااااااااااااااااااااااااااااااااااااااااااااااااااااصد
مين
انت بتقول
كان قاصد مين
...............................................
عفوا انتهت مساحة التعليق

monaliza يقول...

يااه يابطوط بجد مش عارف عندك حق برضه انت هتلاقيها منه ولا من الدكاترة ولا من المذاكرة
هو ياسيدى كان قاصدنا كلنا شروة واحدة احنا معندناش تمييز ولا تفرقة
انت ركز فى مذاكرتك واحنا هنركز فى الدعاء
ربنا ينجحك باعلى تقدير

Bongo يقول...

طيب احمد ربنا ان مامتك زودت لك المصروف لما العلاوة زادت اساسا

يعني حاولت تخفف الصدمة شويه ..

انما مامتك بقي تعمل ايه ههههه

و بعدين بعيدا عن كان بيطلع لسانه لمين ..

شكل اللسان اللي فوق ده غرررريب اووووي !!

enjy يقول...

والله يا بطوط يا ابنى هو كان قاصد انه يشل شوية ناس بالهبل فالشعب ينقص فالدخل القومى يزيد فتبقى عيشتكم منغنغة بس انتوا ناس مستعجلين كدة ومش راكزين ايه يعنى لما مصروفك ينقص اربعين جنيه دة انت حاجة غريبة...اشوفك فى مدونتى يمكن تعجبك وتضيف لها لينك عندك يللا باااى

حمامة يقول...

اكيد اكيد يعنى

كان قاصد

امممممممم

كان قصدنا كلنا يا عم

ريح نفسك مش هتاخد الاربعين جندى :d

dodda يقول...

كان قاصد كل مرضى الضغط والسكر...
خطه جامده موت عشان الكثافه السكانيه تخف
حسبى الله ونعم الوكيل
وال ايه.. كانوا فتكرين ان فلوس العلاوه
حيطلعوها من الضرايب
طب الشعب استهبل لان الضرايب بتتدفع مره واحده
راحوا هما مستهبلين ونشنوا على المواصلات اللى بتتدفع كل يوم
وسمعنى سلام سيب اللى يطق يمووت

ربنا يكرمك فى الامتحان وشد خيلك

امواج يقول...

بيقولك الحكومه عمله للشعب ودن من طين وودن من ........
لا مش عجين الدقيق غالى من طين برده


بالتوفيق يابطوط

Dr-hema يقول...

كان قاصد العبيط اللى صقف

كان قاصد الشعب الغلبان الطيب اللى بيصدق اى حاجة


كان قاصد انه يعمل حركة فينا


د/هيما

Miss. Sosa يقول...

والله يا بطوط يااخوية انت دخلت كلية السنان ديه غلط
انت اصول كنت تبقى عالم في الرياضيات
ده انت كل بوستاتك جمع وطرح وقسمة بطريقة بطوطية ماحصلتش
انت اصول تبقى رائد علم الرياضة الحديث
وتنزل كتاب رياضة لبتوع الثانوية العامة اسمه بطوط المعاصر

بنت المسلمين يقول...

احم احممم
هيهيهيهيهي
يعنى القضية انه كان لميييين؟
طب هو غالبا كان لمامتك بشكل مباشر
و مرة واحدة
و ليك انت
بشكل غير مباشر
و مرتيييييييييييين
هىهىهىىهى

بطوط حبوب يقول...

انا متابع بس مش هقدر ارد سامحونى

Foxology يقول...

عاااااادى يا دوكتور مفيش مشاكل انت اقعد فى البيت واضربلك شهادة من على النت واشتغل بيها ف اى مستوصف هما عاوزينا نعمل كدة وبلاها مواصلات غالية يا سيدى :))

تحياتى يا بطوط

الصارم الحاسم يقول...

مش رضيت بالنص بالنص

ومعملتش الاضراب

اشرب يا حلو
:))))))

Abd-Alrahman & NOUR يقول...

الصراحة انا اول مرة اجي عندك
بس البوست بتاعك جامد
ههههههههههه
الصراحة هوة كان قاصد كل الناس

مدونتك حلوة اوي يا بطوط
اتشرفت بزيارتها
ياريت تبقي تنورني

عبدالرحمن

صيدلانيه طالعه نازله يقول...

ياعم هو كان قاصدنى انااااااااا
و بعتلى ايميل بكده علشان محدش يفتكر انه عليه يقوم الشعب يزعل منه و قال لى اكتبها فى مدونه بس انا نسيت مشاغل بقى اصلنا كنا متراهنيين انا و هوه انه هيقرطس الشعب خلال اسبوع و هوا اللى كسب الرهان ادى الحكايه كلها
و انا دلوقتى حاسه بالذنب انى اتسببت فى مشكله للراجل و احرجته مع الشعب اللى بيحبه موووت مووت مووووووووت
هدى اعصابك انت و زاكر و انا حاحل المشكل ده مبسووووط ياعم

بت خيخة وأى كلام يقول...

ههههههههههههههههههههه
هههههههههههههههههههههههه
هههههههههههههههههههههههههههههههه
ههههههههههههههههههههههههههههههه
كان بيطلعهولنا كلنا يا بطوط
ومش بس لسانه
ده كمان فقعنا تلاتين قفا على سهوة
ههههههههههههههههههههههههههه
ههههههههههههههههههههههههههه
ههههههههههههههههههههههههههههههههه
معلش يا بطوط تعيش وتاخد غيرها

اختك خيخة

صيدلانيه طالعه نازله يقول...

ايوه يا كابتشن ليك عندى تاج
بعد ما تخلص مذاكره تعالى استلمه و امضى على كده

somaa mahaba يقول...

لا مؤاخذه يا بطوط هو زقلط قال طظ للجميع والللى مش عجبه يروح ينضف بلالليع
واحشنا موضوعاتك وتعليقاتك ومباركتليش على الرئاسه على فكره
ولا شوفت قايمه الجواز فى عهدى
شكلها ايه
تحياتى ليك سومه_87

اهو ده عيبه يقول...

مش مهم يا بطوط طلع لسانه لمين

المهم انه طلع لسانه بانفاسه العطرة وعبق المسك والعنبر وانت بتاع اسنان وفاهم

اذا كانت خرمت معاك فهى خرمت مع الكل

والاهم من كده اننا عرفنا ان لسان الريس يتميز عن لسانا يعنى مش مجرد مراكز تذوق حلو ولاذع والكلام ده

لا ده فيه مراكز تذوق بنى ادمين عايزين علاوة

ايوية يقول...

جيت على الجرح
ربنا معاك فى الامتحنات

عاليا حليم يقول...

حتى ماما بتوزع الزيادة بشكل وهمى ؟؟؟؟

sasatifa يقول...

بص يا بطوط انا مش فاكر اوى بس مستعد ارهق نفسى واقولك هو طلعه ليك ولا لماما ....بس...ده هيعتمد على نسبتى يا معلم ،ماشى
..........................
لا علاوة ايه اللى نقسمها يا ريس ؟؟هو الريس يستهبل اهالينا الكبار واهلينا يستهبولنا وانت عاوز تستهبلنى انا ..هأ...انا محدش يستهبلنى غير ريسنا

Heba يقول...

ازيك يا محمود

ده للشعب كله وحياتك

أنا كمان المواصلات زادت عليا

ربنا يكون معانا

أحنا مش ماسكين مصروف البيت يا دوبك مصروف ايدينا

والله أبويا بيصعب عليا جدا

مش عارفة بينظمها ازاي

دعاء مواجهات يقول...

هههههههههههههه

ياابنى ما انت لو كنت مركز كويس كنت عرفت انة طلعة للشعب كلو

هيييية

نعييش وناااااخد غيرها يابرنس

ربنا يوفقك ف الإمتحانات

تحيااتى لييك ولماما

خبيب يقول...

انت لسه بتمتحن كل ده يا عم الحاج ؟

يللا خلص بقى ..

أو ادخل اكتبلنا موضوعين تلاتة

هو احنا هنستفيد م العلام ايه يعني ؟

:)

---

شد حيلك وربنا يوفقك في الامتحانات

smraa alnil يقول...

ههههههههههههه
يا ابني انت مش عايش
دة انا شايفاه بام عيني
بيطلع لسانه للعيل اللي في بطن امه

بس سيبك انت
دة انت تقوم تصلي ركعتين شكر انها جت علي 40 جنيه

ربنا يوفقك وذاكر انت واوعي تقول لسان الريس في الامتحان

نوسه يقول...

يبنى روح امسك لك كتاب يبنىىىى
الامتحان قرررررررب يبنىىى
وذاكر بضمير كده
------
الكلام اللى فوق ده لنفسى بردو :(
-----------
وبعدين تصدق انت فكرتنى ازود مصروفى :)
ده فعلا المواصلات غليت وانا مزودتش المصروف :)
بيستكردونى الناس دى ولاايه:) جيالك يا باباااااااااا

ayman badr يقول...

أكيد طلعلنا لسانه كلنا مش انت بس والمشكلة فى المصقفاتية نعمل ايه بس ربنا يصبرنا ويوفقك ويوفقنا فى الامتحانات
مستنى زيارتك واسف على الانقطاع
سلام

بطابيطو ترمس يقول...

بص ياابو البطابط انا هقولك الرئيس مش طلع لسانه ولا حاجه متظلموش الراجل ياجماعه وهو يعني ياعيني كان هيعرف منين ان في زيادة في الاسعار
هو كان نفسه يفرحنا مش اكتر
واول كلمه هيقولهالك الاسعار العالميه زادت مش مصر بس
حاجه تشل
ما علينا عارف انا مش فاقعني غير حاجه واحدة
الميكروباص ابو جنيه وبريزة بقي بجنيه ونص ليه لما الزيادة ربع جنيه بس
اموت وافهمها
وانا بقي محدش زودلي مصروفي يعني خلاص قربت اشحت علي اخر الشهر
ربنا يخليه لينا
ابقي ادخل سلم يا ابو البطابط
بطابيطو ترمس

ست البيت يقول...

مش محتاجة ذكاوة دي كان قاصد الأعداء طبعا ... مش ذنب الكبير انك وقفت في وسط المسافة بينه وبين الأعادي وهو بيطلع لهم لسانه كان عاوز يفرسهم
جت فيك ...
لأ انت ولا مامي يا ابو البطابيط
استنى افتكرت لكيد تقصد يوم الاثنين
يا ابني دا كان بيهزر مع سوسو وتوتو ولولو
نيتك وحشة

NilE_QueeN يقول...

مامتك قالت الحق

هو طلع لسانه للشعب كله

ربنا يعينك على الامتحانات

BASEEM_18 يقول...

جميلة تدوينتك هذه ..

والأجمل إسلوبك الساخر .. وطريقة طرحهــا ..

اما بخصوص لسان الريس ..
فأتمنى ان يقف الوضع عند " تطليعة لسانه " وبس ولا ياتي يوم ونشوفة طلع حاجة تانيه أثقل و أكبر من لسانه ...

المـــفـــــــقــــــــوعـــــة مــرارتـهــا يقول...

بص انا جيت اسلم واقولك ربنا يوفقك وتخلص الإمتحانات علي خير بجد وحشتنا ووحشتنا مشاركاتك اللذيذة
ماتفتكرش اننا نسيناك عشان ملخوم في الإمتحانات
ماتجيش الا لما تخلص
سلااااااااااام

سومه...مجنونه فى بلد عاقل يقول...

ايه يا عم بطوط انت لسه مخلصتش ربنا معاك يا دك
سومه_87

فاتيما يقول...

عامل إيه يا دكتور ؟؟
لعل و عسى تكون رافع راسنا قصاد الدكاترة و بدعيلك عليهم فى سرى متقلقش ...
ربنا يوفقك و منتظرين العود الاحمد
لاااا
العود بطوط

Sometimes يقول...

يا مواضيعك يا بطوط
هههههههههههههههههه
ماعلينا هو مطلع لسانه لمين اهو طلع وخلاص واللى كان كان
اما بالنسبة للمواصلات
فاحمد ربنا يابنى وبوس ايدك شعر ودقن
انا بس يومين الامتحانات ( هما مش يومين بالظبط هما11 يوم ) هصرف بس 120 جنية
شفت ازاى ان انت فى نعمة

عمرو النوبى يقول...

بطـــوط بلاش تفكرنى ونبى .. علشان ده كان يقصدنى انا بقا واحمد ربنا انها رسيت معاك على 40 جنية انا عدت معايا بكتير وربنا يستر لسة ياما هنشوف

بس خلى بالك ان هو يقصدنى انا عااااااااااا

تحياتى يا بطوط

وياريت تشرفنى فى المدونة بتاعتى

فاتيما يقول...

هيه
قربت تخلص و لا لسه يا دوك ؟؟
طيب ربنا يوفقك فى الباقى يا رب
منتظرين عودتك و تعليقاتك و بوستاتك التمام ...
تحياتى و تمنياتى بكل خير يحصلك و ناجح بتفوق أن شاء الله

RAMA يقول...

هههههههههههههههههههه

مسخرة

*سمر* يقول...

اقولك هو كان قاصد مين ...كان قاصدنى انا D:
ربنا معاك فى الامتحانات ...
على فكرة انا خدمت كل الدفعة ..ودعيت على الدكاترة عملا بنصيحتك :)

ادم المصرى يقول...

مرسى بطوط على البوست الجميل ده قبلى مرورى

didi يقول...

هيــــــــــــــــه وصلت وحدى في البتاع دا ...المهم وندخل في المهم يا سي بطوط .. ومن غير لف ودواران كتير ..انا حالى كدا من حالك .. دا ايام منكنت بشتغل .. اه اصل انا اشتغلت في مدرسه بعيده شويه .. باخد 3 مواصلات في اليوم رايح بس دا غير اللى جاى ... وبعدين اكتشفت انى بصرف على المواصلات بس من جيب ابويا .. ههه .. اه والله .. لما حسبتها لقيتنى باخد مواصلات 6 ايام في الاسبوع يعنى ب 130 جنيه مصري في الشهر وقابله للزيادة لو فنجرت من جيبي وعزمت حد كدا ولا كدا ادفعله يعنى :D.. بس لما شوفت الكواليس .. وتعمقت شويه في المواضيع لقيت ان الريس مالوش دعوه بالموضوع .. كان كل همه يسعدنا الراجل .. كتر خيره .. بس العيب طلع من الناس اللى تحته .. ما عرفوش يظبطوها .. عشان يعرفوا يا كلوها ... بعد الكلام دا .. احب ابلغك ان صفحتى متراقبه وشوفلنا حد يجيبلنا عيش حاف .. اصل الحلاوة غليت كتيييير :D

حسام مصطفي إبراهيم يقول...

ههههههههه
بجد دمك خفيف قوي .. بس انت عندك امتحانات .. والريس ايده طايلة .. فلم عفاريتك شوية .. وربنا يعديها على خير.

nigro يقول...

محمووووووود
حبيب قلبي
عامل يا دكترة
يا رب تكون شغال كويس في الإمتحانات
ربنا يوفقك يا واد
بجد واحشني آخر حاجة
ربنا يرجعك بالسلامة مبسوط و مستكنيص زي كده

مستنيييييك يا واد

يلا سلام

عاليا حليم يقول...

الامتحانات عاملة ايه ؟؟؟

بت خيخة وأى كلام يقول...

هتخلص امتحانات امتى بقى؟

بالنجاح يارب

شفقة و احسان يقول...

حلوة اوى اوى يا بطوط...خلى بالك من الامتحانات
شفقة

نوره الخشن يقول...

هههههههههههه

انا ماما مارديتش تزودني مع ان انا كمان المواصلات زادت معايا حوالي جنية ونص والسندوتشات وووو .....

بس هو الحقيقة طلع لسانو للموظفين بشكل مباشر وولباقي بشكل غير مباشر والمعنى في كرش الشاعر ازااااااي بئه اقولك انا ازاااااي

هو عارف انو لما هيطلعلهم لسانو هما كمان هيطلعولنا لسانهم وبكده هيبئه هو ماتعبش لسانه وطلعه للكل بس طلع لسانه لفئه والباقي يطلعوا لسانهم لبعضيهم وهكذا

ولا انت فاهم حاجة لان انا نفسي مش فاهمه اه والله

خليك فامتحاناتك وبعدين لما تخلص نشوف موضوع اللسان ده يمكن على ربنا مايعدلهالك وتخلص يكون الواحد لسانو اتعوج ونخلص ونبئه ضربنا كل العصافير بكل الطوووووووووب بئه